Category: कलाप्रेस

काठमाडौं । सामान्यतया कुनै पनि पेशामा आबद्ध भइ आफ्नो कर्ममार्फत उल्लेखनीय ख्याती प्राप्त गरेका व्यक्तिहरूलाई ‘सेलिब्रेटी’ भनेर बुझ्ने गरिन्छ । यद्यपि, व्यवहारमा सेलिब्रेटी शब्दको प्रयोग धेरैजसो कलाकारिता क्षेत्रमा क्रियाशील व्यक्तिहरूका लागि हुने गरेको छ ।

सेलिब्रिटी वा कलाकारहरू सबैका साझा हुन्छन् भन्ने विश्वास गरिन्छ । कुनै पनि राजनीतिक ‘वाद’ वा विचारसँग नजिक नभइकन कलामार्फत सबैको मन जित्नु कलाकारको धर्म पनि हो । तर, यो मान्यतालाई खण्डित गर्दै कलाकारहरू प्रत्यक्षरूपमा राजनीतिमा संलग्न भएका थुप्रै उदाहरण विश्वव्यापीरूपमा छन् ।

छिमेकी मुलुक भारतमा कलाकारितामा नाम कमाएका थुप्रै हस्तीहरूले पछि राजनीतिमा आफ्नो स्थान बनाउन सफल भए । कलाकारितापछि राजनीतिमा इन्ट्री गरेका बलिउड हस्तिहरूको नाम लिनुपर्दा सुनिल दत्त, विनोद खन्ना, राज बब्बर, स्मृति इरानी, हेमा मालिनी, जया प्रदा, जया बच्चन, गोविन्दा, शत्रुघ्न सिन्हा लगायत दर्जनौं छन् ।

पछिल्लो समय नेपालमा पनि कलाकारहरूको राजनीतमा चासो र आवद्धता बढेको पाइन्छ । धेरै कलाकारहरू राजनीतिक विभिन्न राजनीतिक पार्टीसँग झुकाव राख्छन् भने केही कलाकारहरू सक्रिय राजनीतिमै होमिएका छन् । सक्रिय राजनीतिमा होमिएकाहरूको संख्या धेरै ठूलो छैन । न त उनीहरू एउटै पार्टीमा स्थिर भएर रहन नै सकेका छन् ।

सरकारले आगामी स्थानीय चुनावको मिति घोषणा गरेसँगै नेपालमा चुनावी रौनक बढ्न थालेको छ । राजनीतिक दलका नेताहरू चुनावकेन्द्रित गतिविधिमा व्यस्त छन् । पार्टी प्रवेश अभियानलाई पनि उच्च महत्व दिइरहेका छन् पार्टीहरूले । यस क्रममा उनीहरूको आँखा कलाकारितामा नाम कमाएका सेलिब्रिटीहरूतिर पनि छ । नाम चलेका सेलिब्रिटीहरूलाई पार्टीमा भित्र्याउन पाए उनीहरूलाई पछ्याउने लाखौं मानिसहरूको भोट आकर्षित गर्न सकिने राजनीतिक दलहरूको विश्वास छ ।

यहाँ हामी कलाकारितामा नाम कमाएपछि विभिन्न दलमार्फत प्रत्यक्ष राजनीतिमा होमिएका केही कलाकारहरूबारे चर्चा गर्न गइरहेका छौं ।

कोमल वली

लोकसंगीतमा स्थापित नाम हुन् कोमल वली । कुशल समाचारवाचिकाका रूपमा पनि उनी चर्चित थिइन् । रेडियो नेपालको जागीर छोडेर राप्रपामार्फत उनले आफ्नो राजनीतिक जीवन सुरू गरेकी हुन् ।

२०७३ साल फागुन ६ गते रेडियो नेपालमा राजीनामा दिएर ७ गते उनी राप्रपाको केन्द्रीय महाधिवेशनमा उम्मेदवारी दिन पुगेकी थिइन् । तर, उनी राप्रपामा लामो समय टिक्न सकिनन् । सो पार्टीसँग चाँडै विरक्तिएर उनी एमाले प्रवेश गरिन् । एमालेमा भने उनलाई राम्रै फलिफाप भयो ।

एमाले अध्यक्ष केपी शर्मा ओलीको निकट मानिने वली हाल पार्टीको केन्द्रीय सदस्य छिन् । उनले हालै मात्र राष्ट्रियसभा सदस्यको रूपमा आफ्नो चार वर्षे कार्यकाल पूरा गरेकी हुन् ।

निर शाह

नेपाली सिने क्षेत्रका पुराना हस्ती तथा टेलिभिजनकर्मी निर शाह पनि कांग्रेसमार्फत सक्रिय राजनीति गर्ने सुरसारमा छन् । कांग्रेसले उनलाई राष्ट्रिय सभा सदस्यको रिक्त पदमा मनोनीत गर्ने वचन दिएको चर्चा अहिले व्यापक छ ।

त्यसो त शाह पहिले माओवादीसँग निकट थिए । माओवादी खुल्ला राजनीतिमा आएपछि एक सयभन्दा बढी कलाकार सो पार्टीमा प्रवेश गरेका बेला उनको पनि त्यसमा नाम थियो । माओवादीले नै मुलुकका लागि केही गर्छ भन्दै अभिव्यक्ति दिएका उनी अरु कलाकारले झैं टीका लगाएर पार्टी प्रवेश भने गरेनन् । यद्यपि, माओवादीप्रति समर्थन भने जनाइरहेका थिए ।

तर, दोस्रो संविधान सभा निर्वाचनमा भने शाहले नेपाली कांग्रेस रोजे । कांग्रेसमा औपचारिक प्रवेश गरेर उनी चुनावमा काठमाडौं क्षेत्र नम्बर १ का कांग्रेस उम्मेदवार प्रकाशमान सिंहलाई भोट माग्न खटिएका थिए । उनले त्यसबेला दर्जनौं आमसभामा सम्वोधन गरेका थिए ।

भुवन केसी

सदावहार नायक भुवन केसी ‘परिवर्तनको बाहक एमाले हो’ भन्दै २०७० सालको संविधान सभा चुनाव अगाडि एमाले प्रवेश गरेका थिए । केसीलाई एमालेले काठमाडौं क्षेत्र नं १ मा उम्मेदवारको बनाउने तयारीसमेत थियो । तर पार्टीभित्र तीव्र विरोध भएपछि अन्तिम समयमा उनलाई टिकट दिने निर्णयबाट एमाले ब्याक भएको थियो । हातमै आएको टिकट टिकट खोसिएपछि भुवन केसी विरक्तिए । पछिल्लो समय उनी राजनीतिमा खासै सक्रिय छैनन् । एमाले सरकारका पालामा चलचित्र विकास बोर्डको अध्यक्ष बन्न निकै प्रयास गरेको भए पनि सरकारले उनलाई पत्याएन । अहिले उनी चलचित्रमा नै व्यस्त छन् ।

रेखा थापा

नेपाली सिने क्षेत्रकी सफल नायिका, निर्देशक तथा निर्माताको छवी बनाउन सफल नायिका रेखा थापा पनि पछिल्लो समय चलचित्रभन्दा राजनीतिमा बढी सक्रिय छिन् । २०७३ सालदेखि राप्रपामा संलग्न रहेकी उनी अहिले पार्टीको केन्द्रीय सदस्य छिन् । राप्रपाको हालै सम्पन्न महाधिवेशनमा उनी महामन्त्री लडेर पराजित बनेकी थिइन् ।

राप्रपाअघि रेखा नेकपा माओवादीसँग निकट थिइन् । अध्यक्ष प्रचण्डबाट टिका लगाएर माओवादीमा प्रवेश गरेकी रेखा त्यहाँ धेरै टिकिनन् । रेखालाई माओवादीले सांसदको टिकटसमेत दिने तयारी गरेको थियो । तर, मतदाता सूचीमा नाम नभएका कारण रेखाको त्यो अवसरबाट वञ्चित भइन् । पछि उनी माओवादी छोडेर राप्रपा प्रवेश गरिन् । राप्रपाको एकता महाधिवेशनबाट उनी लोकप्रिय मत पाउँदै केन्द्रीय सदस्य निर्वाचित भएकी थिइन् ।

करिश्मा मानन्धरः

नेपाली सिने क्षत्रकी अर्की सफल अभिनेत्री करिश्मा मानन्धर भर्खर अर्थात चैत ८ गते नेकपा एमाले प्रवेश गरेकी छिन् । पार्टी अध्यक्ष केपी ओलीको भिजन र उर्जाबाट प्रभावित भएको भन्दै पार्टी प्रवेश गरेकी करिश्मालाई नेकपा एमालेले एक भव्य कार्यक्रमको आयोजना गरी स्वागत गरेको छ ।

डा. बाबुराम भट्टराईले नेतृत्व गरेको नयाँ शक्ति पार्टीमार्फत करिश्मा राजनीतिमा होमिएकी हुन् । तर, सो पार्टी छिन्नभिन्न बनेसँगै उनी राजनीतिमा सक्रिय थिइनन् । डा. भट्टराई हाल जनता समाजवादी पार्टीको अध्यक्ष छन्, तर करिश्मा उनीसँग गइनन् । बरु एमालेप्रति उनको मोह जाग्यो । अध्यक्ष केपी ओलीसँग भेटेपछि उनी एमाले प्रवेश गर्न तयार भएकी हुन् ।

उद्धव पौडेलः चलचित्र वितरण, निर्माण तथा प्रदर्शनमा उच्च स्थान बनाएका उद्धव पौडेल पनि राजनीतिमा सक्रिय छन् । कमल थापानिकट मानिएका पौडेल राप्रपाका पूर्वकोषाध्यक्ष समेत हुन् ।

कमल थापाले राप्रपा छोडेसँगै पौडेल पनि सो पार्टीबाट अलग भएका छन् । उनले गत माघ २६ गते राप्रपालाई एकताबद्ध बनाउन आफू असफल भएको भन्दै पार्टी परित्यागको घोषणा गरेका थिए । अहिले उनी कमल थापाले गठन गरेको राप्रपा नेपालमा छन् ।

बालेन शाह

स्ट्रक्चरल इन्जिनियर तथा र्‍यापर बालेन शाह युवा पुस्तामाझ चर्चित नाम हो । आसन्न स्थानीय चुनावमा काठमाडौं महानगरपालिकाको मेयरका लागि स्वतन्त्र उमेदवारी घोषणा गर्दै उनी पनि राजनीतिमा होमिएका छ्न् । यद्यपि उनले कुनै राजनीतिक पार्टीसँग भने आवद्द नहुने बताउँदै आएका छन् । उनको उम्मेदवारीले युवा मतदातामा चर्चा पाइरहेको छ ।

रविन्द्र खड्का

पुरानो पुस्ताका अभिनेता रविन्द्र खड्का राजतन्त्रका पक्षधर हुन् । पूर्वराजा ज्ञानेन्द्र शाहको प्रत्यक्ष शासनकालमा उनी काभ्रेको मेयरमा मनोनीत गरिएका थिए । तर, पछि प्रत्यक्ष चुनाव लड्दा उनले दुई सय भोट पनि कटाउन सकेनन् । पछिल्लो समय उनी राजनीतिमा धेरै सक्रिय छैनन्, तर उनी राजावादीकै रूपमा चिनिएका छन् । हाल उनी कलचित्र कलाकार संघको निर्वाचित अध्यक्ष पनि हुन् ।

राजनीतीमा आफ्नो भविष्य खोजिरहेका चर्चित सेलिब्रेटीहरू एउटै पार्टीमा भने टिक्न नसकेको जस्तो देखिन्छ । कुनै पनि कलाकारले एउटै पार्टीमा स्थिर भएर राजनीतिक जीवन अघि बढाउन सकेका छैनन् ।

राजनीतिमा लागेका कलाकार कति सफल ?

सफल निर्माता तथा अभिनेता दीपकराज गिरीले कलाकारीता क्षेत्रमा काम पाउन छोडेपछी राजनीतिमा लाग्नुभन्दा देशको समुन्नत विकासमा उल्लेखनीय टेवा पुर्‍याउनसक्ने क्षमता विकास गरेर मात्र राजनीतिमा होमिनु अर्थपूर्ण हुने बताउँछन् । कलाकारिताबाट राजनितीमा लागेकाहरू खासै स्थापित हुन नसकेको गिरीको भनाइ छ ।

‘अहिले राजनीतिमा लागेका अधिकांश कलाकारमध्ये कोमल वली अलिक स्थापित हुन सफल भएको देख्छु, अरु साथीहरूले खासै केही उपलब्धी हासिल गरेको देखिदैन,’ उनले भने, ‘मलाई ज्ञान भएसम्म कलाकारीता हुँदै राजनीतिमा लागेका साथीहरूमध्ये वलीजी राष्ट्रियसभा सदस्यसम्म बन्नुभयो । अरु त सबै पार्टीको कार्यकर्ता न हुनुहुन्छ । कलाकारहरूले त टिकट पाएको पनि खास्सै सुन्नमा आउँदैन ।’

लेखक तथा कवि श्रवण मुकारङ नेतृत्वदायी भूमिकामा पुग्न सके मात्र कलकारिता क्षेत्रका व्यक्तीहरू राजनितीमा लागेको अर्थपूर्ण हुने बताउँछन् ।

‘नेपालमा पछिल्लो समय कलाकारिता क्षेत्र हुँदै राजनीतिमा लाग्ने परिपाटी बढेको देख्छु तर आजसम्म राजनीतिमा लागेका नेपाली कलाकारहरू कुनै नेतृत्वदायी भूमिकामा पुगेको भने देख्दिन,’ उनले भने, ‘भारततिरको हेरेर नेपाली कलाकारहरू राजनीतिक दलमा आवद्ध भएका हुन् कि जस्तो पनि लाग्छ, तर भारतको र यहाँको परिवेश छुट्टै छ ।’

नेपालमा राजनीतिक दलहरूले कलाकारलाई भोट बढाउने माध्यमको रूपमा मात्रै प्रयोग गर्दै आएको उनको भनाइ छ । मुकारुङले वर्तमान परिवेशमा राजनीतिमा सक्रिय कलाकारहरूमा विचारधारा, सिद्धान्त र भिजनकै कमी रहेको पनि बताए ।

‘जति पनि कलाकारहरू अहिले राजनीतिमा सक्रिय देखिएका छन्, उनीहरूमा चेतना, विचारधारा र सिद्धान्तकै कमी भएको देख्छु । उनीहरूले केही उल्लेखनीय काम गरेर देखाउँलान् भन्ने चाँही मलाई लाग्दैन,’ उनले भने ।

काठमाडौं । भद्रकाली मन्दिरमा बिहिबार शुभमुहूर्त गर्दै चलचित्र ‘सरी मम’ को छायांकन सुरु गरिएको छ । क्यामेरा पुजा गर्दै थालिएको छायांकनमा अभिनेत्री सरीता लामिछाने र प्रभात पलले मुहूर्त सर्ट दिएका थिए ।

निर्माता तथा वितरक गोपालकाजी कायस्थले क्ल्याप हानेको मुर्हुत सर्टको निर्देशन रञ्जित रानाले गरेका थिए । विनोद लामाको प्रस्तुतीमा निर्माण हुने चलचित्रमा सरिता र प्रभातका अलावा सरोज खनाल, विजय लामा, एलिस राई, विहान श्रेष्ठ, रेजिना मगर, युनिषा बजगाई र प्रविल कटुवालको अभिनय रहने छ । चलचित्रको सम्पुर्ण छायांकन वागमती र गण्डकी प्रदेशमा गरिनेछ ।

एनएफआई क्रियसनको व्यानरमा निर्माण हुने चलचित्रलाई नविन बोगटीले निर्देशन गर्दैछन् । उनले यसै चलचित्रबाट निर्देशनमा डेव्यु गर्न लागेका हुन् ।

३० दिनको छायांकन सेड्युल राखिएको चलचित्रलाई दीर्घ गुरुङले छायांकन गर्नेछन् । सामाजिक कथावस्तुमा निर्माण गरिने चलचित्र आगामी बर्षको दशैं र तिहारको बीचमा रिलिज गरिने निर्माता विनोद

लामाले बताए ।

काठमाडौं । सिने जगतको सबै भन्दा प्रतिष्ठित अवार्ड समारोहको रुपमा चिनिँदै आएको अस्कर अवार्ड २०२२ को मुल समारोह मार्च २७ का लागि तय भएको छ ।

उक्त समारोहले अघिल्लो वर्ष प्रदर्शनमा आएका उत्कृष्ट चलचित्र तथा कलाकारहरुलाई सम्मान गर्ने छ । अघिल्लो वर्ष प्रदर्शन आएका मध्य विभिन्न विधामा सबैभन्दा बढी मनोनयनमा पर्ने १६ चलचित्रहरु यस् प्रकार छन् ।

१) द पावर अफ द डग

आफ्नो भाईकी नयाँ श्रीमती र उनकी छोरालाई क्रुर यतना दिईरहेको पात्रको कथामा आधारित यो चलचित्र विभिन्न १२ वटा विधामा मनोनयनमा परेको छ । जेन कम्पियनद्धारन निर्देशित यस् चलचित्रले उत्कृष्ट चलचित्र र उत्कृष्ट निर्देशकको अवार्ड आफ्नो पोल्टोमा पार्न सक्ने अनुमान गरिएको छ । फ्लिमकी निर्देशक जेन दुई पटकसम्म उत्कृष्ट निर्देशकको मनोनयनमा पर्ने पहिलो महिला निर्देशक हुन् । यो चलचित्र नेटफ्लिक्समा हेर्न सकिन्छ ।

२) कोडा

कोडा शब्दको अर्थ हुन्छ बहिरा मातापिताबाट जन्म लिएका सन्तान , यो चलचित्रले रुबी नामक पात्रको कथा भन्छ उनी आफ्नो परिवारको एक मात्र कान सुन्ने सदस्य हुन् । संगितमा आफ्नो भविष्य बनाउन चाहिरहेकी रुबीले परिवारलाई सहयोग गर्नेको करियरलाई अगाडि बढाउने भन्ने अन्तरद्वन्दको वरिपरी चलचित्रको कथावस्तु घुमेको छ । कलाकार ट्रोए कस्टुरले यस् फ्लिम बाट उत्कृष्ट सपोर्टिङ रोलमा अवार्ड हात पार्ने अनुमान गरिएको छ भने हाल यस् फ्लिमले ‘द पावर अफ दि डग’लाई उत्कृष्ट चलचित्रको विधा गतिलो टक्कर दिन सक्ने बताइएको छ । यो चलचित्र एप्पल टिभी प्लसमा हेर्न सकिन्छ ।

३) ड्युन

१० वटा विधामा मनोनयनमा परेको यो चलचित्र फ्र्याक हर्बेट्सको साइन्स फिक्सन उपन्यास ‘दि सन अफ दि नोबल फ्यामिली’ मा आधारित छ । यो चलचित्रले उत्कृष्ट छायकंन, सम्पादन, प्रोडक्सन डिजाइन, साउण्ड तथा भिजुवल डिजाइनमा जस्ता विधामा उत्कृष्ट ठहरिन सक्ने अनुमान गरिएको छ ।

४) बेल्फास्ट

विभिन्न ७ वटा विधामा मनोनयनमा परेको यो चलचित्रले बेल्फास्ट नामक किशोर कसरी हुर्किरहेको छ भन्ने विषयलाई प्रस्तुत गरेको छ । यस् चलचित्रलाई उत्कृष्ट पटकथा र उत्कृष्ट सिनेमाको विधामा अवार्ड हात पार्न सक्ने मानिएको छ ।

५) वेष्ट साइड स्टोरी

७ वटा विधामा मनोनयनमा परेको यो चलचित्रले न्युयोर्क सहरमा कसरी गल्ली गुण्डागर्दी सुरु भयो भन्ने कथा भन्छ , साथ–साथै चलचित्रमा टोनी र मारिया नामक पात्रहरुको प्रेम कथा पनि हेर्न पाईन्छ । यस् चलचित्रमार्फत अरियाना डिबोसले उत्कृष्ट सपोर्टिङ याक्टरको अवार्ड हात पार्ने अनुमान गरिएको छ ।

६) किङ रिचार्ड

यो चलचित्र प्रख्यात टेनिस खेलाडीका सेरिना विलियम्स र भिनस विलियम्सका पिता तथा टेनेसी प्रशिक्षक रिचार्ड विलियम्सको जीवनमा आधारित चलचित्र हो । चलचित्रमा विलियम्सको भूमिका विल स्मिथले निभाएका छन् भने यो चलचित्र विभिन्न ६ वटा विधामा मनोनयनमा परेको छ । यस् अघी पनि दुई पटक उत्कृष्ट अभिनेताको विधामा मनोनयनमा परेर पनि अवार्ड हात पार्न नसकेका विल स्मिथले यो चलचित्रमार्फत भने अवार्ड हात पार्ने आशा गरिएको छ ।

७) नाइटमेअर एले

विभिन्न कलाहरुको प्रयोग गर्दै सहरका मान्छेलाई ठगिरहेको एक ठगको कथामा आधारित छ नाइटमेअर एले । यो चलचित्र विभिन्न ४ वटा विधामा मनोनयनमा परेको छ । यस् चलचित्रलाई डिज्नी प्लसमा हेर्न सकिन्छ ।

८) ड्राइभ माई कार

यो चलचित्र प्रख्यात जापनिज लेखक हारुकी मुराकामी को एक कथामा आधारित छ भने चलचित्र कथा दुई पात्रहरुले सँगै तय गरेको एक यात्रामा आधारित छ । विभिन्न चार विधामा मनोनयनमा परेको यस् चलचित्र मार्फत निर्देशक र्युसुक हामागुचीले उत्कृष्ट निर्देशकको अवार्ड हात पार्न सक्ने अनुमान गरिएको छ ।

९) लिसोरिस पिज्जा

१९७० को दशकको समयमा आधारित रहेर दुई पात्रहरुको प्रेम कथालाई देखाएको चलचित्र हो लिसोरिस पिज्जा । यो चलचित्र ३ वटा विधामा मनोनयनमा परेको छ । यस् चलचित्रका निर्देशक पौल थोमस एन्ड्रेसन पनि अवार्डका मुख्य दाबेदारको रुपमा लिइएका छन् ।

१०) द लस्ट डटर

बिदा मनाई रहेकी एक महिला बिदामै रहँदा अर्की एक महिला र उनकी छोरीको जीवन देखेर लालायित हुन्छिन् , आफ्नै अतितिका यादहरुमा रुमलिन्छिन् । यही विषयवस्तुमा आधरित चलचित्र हो ‘द लस्ट डटर’ । यो चलचित्र विभिन्न ३ वटा विधामा मनोनयनमा परेको छ । यो चलचित्रमार्फत अभिनेत्री ओल्भिया कोलमेनले उत्कृष्ट अभिनेत्रीको अवार्ड हात पार्ने अनुमान गरिएको छ । कोलमेनले यस् अघी पनि उत्कृष्ट अभिनेत्रीको अवार्ड हात पारीसकेकी छिन् ।

यस् सँग–सगैँ डन्ट लुक अप , दि ट्र्याजेडी अफ म्याक्बेथ, बिईङ दि रिकार्डोस , नो टाइम्स डाई , फ्ली र इन्कान्टो पनि विभिन्न विधामा उत्कृष्ट ठहरिन सक्ने प्रबल दाबेदारको रुपमा लिईएको छ ।

काठमाडौं । २५ लाख पुरस्कार राशीको नेपाली र्‍याप रियालिटी शो रबार्जको अडिसन सुरु भएको छ । शोको लागि पोखरा, चितवन, काठमाडौं, नेपालगन्ज, बुटवल, सुर्खेत र विराटनगरलगायत जिल्लामा अडिसन भइरहेको छ । साथै भारतको सिक्किम र दार्जिलिङ, सिलिगुडीमासमेत अडिसन हुनेछ ।

जजको भूमिकामा कवि जि, हाकिम, र लेजि रहने भएका छन् भने कार्यक्रमको फाउन्डर कोलिन बिक्रम राना हुन् । रबार्जले यसपटकको शोका लागि आईएनसी इन्टरटेन्मेन्टसँग सहकार्य गरेर रियालिटी शोको आयोजना गरेको हो ।

शोका विजेताले २५ लाख पाउनेछ भने दोस्रो हुनेले १० लाख र तेस्रो हुने प्रतियोगीले ५ लाख पुरस्कार पाउनेछन् ।

अहिले भइरहेको अडिसनमा हरेक दिन सयजनाभन्दा बढीले अडिसन दिइसकेका छन् । अमेरिका, बेलायत, अष्ट्रेलिया लगायत देशमा रहेका नेपालीहरुमाझ पनि यो रियालिटी शो आयोजना भइरहेको छ ।

काठमाडौंका लाजिम्पाटस्थित त्रिशारा होटेल शंकर, बत्तीसपुतलीको ग्राटिया सेन्टरमा अडिसन सम्पन्न भएको छ । पोखरा, चितवनमा पनि अडिसन सकिसकेको आयोजकले बताएको छ ।

काठमाडौं । अभ्यानी प्रोडक्सनको आयोजनमा मिस्टर एण्ड मिस नेपाल टिनको पाचौं संस्करण सम्पन्न भएको छ । काठमाडौंस्थित लिसरा रिसेप्सनमा आयोजित उक्त कार्यक्रममा किशोरी तर्फ श्रृष्टी महर्जनले मिस नेपाल टिन २०२२ को उपाधि हात पारिन् ।

उनले अमेरिकाको मायामी स्टेटमा नाभेम्बरमा हुने मिस टिन युनिभर्समा नेपाललाई प्रतिनिधित्व गर्नेछिन् । त्यसैगरी श्रृष्टी भुषालले मिस नेपाल चीन चार्मको उपाधि जितिन् । उनले कोलम्बियामा हुने अन्तर्राष्ट्रिय प्रतियोगितामा नेपाललाई प्रतिनिधित्व गर्नेछिन् । यस्तै सेकेन्ड रनर अप शिवानी कापरले मिस वल्र्ड हेरिटेजमा नेपाललाई प्रतिनिधित्व गर्नेछिन् ।

किशोरतर्फको उपाधि अर्घाखाँचीका मन्दिप भुसालले चुम्दै गर्दा प्रयास ओझाले फस्ट रनर अप र निशान वाइवाले सेकेन्ड रनर अपको उपाधि जिते ।

अन्य उपाधितर्फ मिस ट्यालेन्ट श्रृष्टी महर्जन, मिस मल्टिमिडिया शिवानी कापर, पिपल्स च्वाइस श्रृष्टी भुसाल, मिस फोटोजेनिक सदिक्षा खनाल, मिस क्याटवाक सञ्जना भण्डारी, मिस इन्टेलेक्चुअल श्रृष्टी भुसाल, मिस कन्फिडेन्ट सन्जना भण्डारी र ब्युटी विथ पर्पसको अवार्ड याशिका सिंहले हात पारिन् ।

त्यसैगरी किशोरतर्फ मिस्टर ट्यालेन्ट निशान वाइवा, मिस्टर मल्टिमिडिया प्रयास ओझा, पिपल्स च्वाइस निशान वाइवा, मिस्टर फोटोजेनिक प्रकाश बोहोरा, मिस्टर मोडल रिशु शाह, बेस्ट वाक मन्दिप भुसाल र राम एक्वाल यादवल् हेन्डसम विथ पर्पसको उपाधि हात पारे ।

काठमाडौं । गायक धिरज राईको गीत ‘लुकी लुकी’ २५ बर्षपछि युट्युवमा फेरि सार्वजनिक गरिएको छ । ट्रि इन्टरटेन्मेन्टले यसपटक भिडिओ मेकिङ गर्दै नयाँ स्वरुप दिएको हाे ।

२५ बर्ष अगाडि नेपाल टेलिभिजनमा खिचिएको गीतको भिडिओमा धिरज राईलाई मात्र देख्न सकिन्छ ।

धिरज राईको स्वर, शब्द तथा संगीतमा तयार भएको गीतको भिडिओलाई माइकल चन्दले निर्देशन गरेका छन् । भिडिओमा नायिका आँचल शर्माको साथमा दुई कलाकार राज र डेलविसको डान्स हेर्न सकिन्छ । भिडिओमा उत्सव दाहालको छायांकन, शिलन लम्सालको सम्पादन छ ।

https://www.youtube.com/watch?v=JM-AdM02m-w

कीर्तिपुर सिनेप्लेक्समा आयोजित कार्यक्रममा बोल्दै धिरजले भने– ‘मलाई दर्शकले सधैँ गीतको भिडिओ बनाउन भन्नुहुन्थ्यो । युट्युवमा गीत खोज्दा २५ बर्ष अगाडिको पुरानो भिडिओ मात्र देखिन्थ्यो । अहिले गीत हेर्ने पनि जमाना भएकाले भिडिओा बनाउने निर्णय गरेको हुँ ।’

धिरजले आफूलाई अन्य थुप्रै कम्पनीले भिडिओको लागि प्रस्ताव गरेपनि तयार नभएको सुनाए ।

कार्यक्रममा बोल्दै नायिका आँचल शर्माले आफूले सानैबाट सुन्दै आएको हिट गीतमा काम गर्न पाउँदा खुसी लागेको बताइन् ।

निर्देशक माइकल चन्दले यो गीतको भिडिओ निर्देशन गर्न पाउनु आफ्ना लागि चुनौती र अवसर दुवै भएको सुनाए । कार्यक्रममा शुभकामना दिदै नायक शिव श्रेष्ठले एउटा सफल गीतमा कलाकारहरुले उत्कृष्ट काम गरेको बताए ।

मुम्बई । बलिउड अभिनेत्री सोनम कपुर आमा बन्दै छिन् । उनले इन्स्टाग्राममार्फत पति आनन्द आहुजासँग आफ्नो बेबी बम्पको तस्बिर सार्वजनिक गर्दै आमा बन्न लागेको पुष्टि गरिन् ।

उनले तस्बिर सेयर गर्दै लेखेकी छिन्, ‘चार हातहरू, हमी उत्तम तरिकाले तिम्रो हेरचाह गर्न सकँ । दुई मुटु, जो तिमिसँगै धड्कनेछ। हाम्रो परिवार, जसले तिमिलाई माया र समर्थन गर्नेछ। हामी तिमिलाई स्वागत गर्न पर्खन सक्दैनौं।’

सोनम र आनन्दले गर्भावस्थाका तस्बिर सार्वजनिक गरेसँगै बलिउड सेलिब्रिटीहरुले सामाजिक सञ्जालमार्फत उनीहरुलाई बधाई दिइरहेका छन् ।

अनिल कपूरकी छोरी सोनम कपुरले चार वर्षअघि आनन्दसँग विवाह गरेकी थिइन् ।

ललितपुर । अन्तर्राष्ट्रिय साहित्य समाज नेपाल च्याप्टरको आयोजनामा कवि डा. गोविन्द आचार्यद्धारा लिखित ‘दङ्गि उर्वशी’ महाकाव्य सार्वजनिक भएको छ । महाकाव्यको विमोचन संस्कृतिविद् सत्यमोहन जोशीले गरेका थिए ।

महाकाव्यको विमोचन गर्दै जोशीले भने, ‘इतिहास, साहित्य र संस्कृति हाम्रा धरोहर र वैभव हुन् । तिनको संरक्षण आजको सचेत नागरिकको दायित्व हो । यस महाकाव्यमा पनि मिथक, संस्कृतिको प्रयोग भएकोमा खुसी लागेको छ ।’

जोशी निवासमा भएको विमोचन समारोहको सभापतित्व अन्तर्राष्ट्रिय साहित्य समाज नेपाल च्याप्टरकी अध्यक्ष साहित्यकार सन्ध्या पहाडीले गरेकी थिइन् ।

कार्यक्रममा प्रा.डा. खगेन्द्र प्रसाद लुइँटेल, प्रा. कोषराज न्यौपाने, रमेश खकुरेल र अनेनासका उपाध्यक्ष राजेन्द्र श्रेष्ठ लगायतले कवि आचार्यलाई बधाइ तथा शुभकामना दिँदै समालोचकीय मन्तव्य राखेका थिए ।

कार्यक्रममा गायिका लोचन भट्टराई, साझा प्रकासनका महाप्रबन्धक प्रल्हाद पोख्रेल, साहित्यकार भुवनहरि सिग्देल र कवि इन्दिरा दाहल लगायतले कृतिमा प्रायोगिक विभिन्न छन्दका कविता वाचन गरेका थिए । कवि आचार्यले आफ्नो काव्ययात्रा र महाकाव्य यात्रासम्मको अनुभव पस्किएका थिए ।

साथै साहित्यकारका सहजता र जटिलताबारे आफ्नो स्वअनुभूति पनि पस्किएका थिए । कार्यक्रममा संविधानविद् भिमार्जुन आचार्य देखि प्राध्यपक, एमफी, पीएचडीका सोधार्थी साहित्यप्रेमीको बाक्लो उपस्थिति रहेको थियो ।