काठमाडौं । ७८ औं गोल्डेन ग्लोब्स अवार्डको मनोनयन सार्वजनिक भएको छ । लकडाउन समयमा ओटीटी प्लेटफर्ममा हेरिएका नयाँ र पुराना फिल्म र सिरिज मनोनयन सूचिमा छन् ।
नेटफिल्क्सका फिल्म र सिरिज सर्वाधिक विधामा मनोनयन भएका छन् । ‘म्यांक’ सिरिजमात्र ६ विधामा मनोनित भएको छ । ‘द ट्रायल अफ दी सिकागो ७’ पाँच विधामा मनोनित छ ।
टेलिभिजन खण्डमा ‘द क्राउन’ ६ विधामा मनोनित छ । गतवर्ष निधन भएका अभिनेता चाडविक बोसम्यान अभिनित नेटफिल्क्स फिल्म ‘मा राइनिज ब्ल्याक बटम’ पनि मनोनित भएको छ ।
आउने सोमबार बिहान भर्चुअल रुपमा गोल्डेन ग्लोब्स अवार्ड वितरण हुँदैछ । टेलिभिजनका प्रसिद्ध होस्ट नोरम्यान लियरले दीर्घ साधना सम्मानको रुपमा क्यारोल बर्नेट अवार्ड प्राप्त गर्नेछन् ।
उत्कृष्ट फिल्मको मनोनयनमा द फादर, म्यांक, नोमल्यान्ड, प्रमिसिङ योङ वुमन र द ट्रायल अफ दी सिकागो ७ छन् । विदेशी भाषी फिल्ममार्फत डेनमार्कको एनोदर राउन्ड, फ्रान्सको ला लोरोना, इटालीको द लाइफ अहेड, अमेरिकाको मिनारी, फ्रान्सको टु अफ अस छन् ।
काठमाडौं । सामाजिक अभियानमा सक्रिय जोडी धुर्मुस-सुन्तली अब अभिनयमा पनि कमब्याक गर्ने भएका छन् । धुर्मुसले वेब-सिरिज ‘म त मर्छु कि क्या हो’ मार्फत अभिनयमा फर्कने जनाएका छन् ।
उक्त सिरिजको फस्टलुक पोस्टरसमेत उनले फेसबुकमार्फत सार्वजनिक गरेका छन् । सामाजिक कथावस्तुमा निर्माण हुने सिरिजको पहिलो एपिसोड चाहिँ झन्डै २ घन्टा लामो हुने धुर्मुसले जनाए ।
पोस्टरको सुरुमै धुर्मुस–सुन्तली ब्याक अगेन स्लोगन राखिएको छ । सिरिजको लेखन एवं निर्देशन पनि धुर्मुस–सुन्तलीले नै गर्ने भएका छन् । सिरिजमा रवि गिरी, बुद्धि तामाङ, विजय बराल, पल्पसा डंगोल, बालदीप राई लगायतको अभिनय हुनेछ ।
सिरिजलाई आफ्नै युट्युव च्यानलमार्फत रिलिज गर्ने तयारी धुर्मुसको छ । धुर्मुसले निर्माण गरेको फिल्म ‘सेन्टी भाइरस’ लकडाउनअघि रिलिज भएको थियो । अहिले भरतपुरमा गौतमबद्ध अन्तराष्ट्रिय क्रिकेट रंगशाला निर्माणमा उनीहरु सक्रिय छन् ।
काठमाडौं । दुब्र्यबहार र कुटपिटको घटनामा अभिनेत्री सुष्मा कार्की, आरती खड्का र युट्युवर उत्सव रसाइलीबीच मिलापत्र भएको छ । दरबारमार्ग प्रहरीमा दुबै पक्षले मेलमिलापको लिखित सहमति गरेका हुन् ।
प्रहरीले नेपाल प्रेसलाई जानकारी गराएअनुसार दुबै पक्षले आइन्दा यस्तो काम नगर्ने कागजी व्यहोरामा हस्ताक्षर गरेका छन् । सुष्मालाई थप्पड हानेकी अभिनेत्री श्वेता खड्काकी बहिनी आरतीले माफी मागिन् ।
तीनैजनाले मिडियाबाजी नगर्ने, आफूले ‘लेखाउन लगाएका’ समाचारलाई डिलिट गर्ने र सामाजिक संजालमा माफी सहितको स्टाटस लेख्ने सहमति भएको छ । आफूलाई जातीय गाली गरेको बताएका रसाइलीले त्यसको प्रमाण देखाउन नसकेको प्रहरी स्रोतले बतायो ।
कागजमा हस्ताक्षरपछि प्रहरीकै अगाडि तीनैजनालाई अँगालो हाल्न लगाइएको थियो । तीनैजनाले आइन्दा यस्तो कार्य नगर्ने प्रतिबद्धता व्यक्त गरेको पनि प्रहरीले जनाएको छ । गत सोमबार राती लन्डन पब क्लबमा आफूमाथि कुटपिट गरेको भन्दै सुष्माले आरती खड्का र उत्सव रसाइलीविरुद्ध प्रहरीमा उजुरी दिएकी थिइन् ।
काठमाडौं । अन्ततः एकवर्षको अन्यौलतापछि हलिउड फिल्म ‘मुलान’ शुक्रबार नेपालमा रिलिज हुने भएको छ । फिल्मको नेपाल वितरक एप्पल इन्टरटेनमेन्टले चिनियाँ सुपर हिरो फिल्मलाई यसैसाता प्रदर्शन गर्ने निर्णय गरेको हो ।
कम्पनीकी जेनिस पहारीका अनुसार शुक्रबार फिल्म रिलिज हुनेछ । तर, विहिबार आयोजना गरिएको राजनीतिक आम–हड्तालको कारण रिलिज केही तलमाथि पनि हुनसक्नेछ । डिज्ने स्टुडियोको बहुप्रतीक्षित फिल्म मुलान लकडाउनको कारण अन्तिम समयमा रोकिएको थियो ।
चिनियाँ दन्त्यकथामा आधारित यो फिल्म विदेशी बजारमा भने यसअघि नै प्रदर्शन भैसकेको छ । ‘द बालाड अफ मुलान’ भन्ने चिनियाँ कथामा फिल्म आधारित छ । चीनमा छायांकन गरिएको फिल्ममा येफेइ लुजस्ता ठूला स्टारले अभिनय गरेका छन् ।
यतिबेला नेपाली फिल्मको पाइपलाइन भने रित्तो छ । शिव श्रेष्ठको एउटा यस्तो प्रेम कहानीअघि नेपाली फिल्म रिलिज भएका छैनन् ।
काठमाडौं । पपस्टार रिहानाले भारतीय किसानको प्रदर्शनको पक्षमा अभिव्यक्ति दिएपछि त्यसको तरंग विश्वभर फैलिएको छ । भारतीय विदेश मन्त्रालयले रिहानाको नाम नलिइकन त्यसलाई ‘सेलेव्रिटी प्रपोगान्डा’को संज्ञा दिएको छ ।
विदेश मन्त्रालय प्रवक्ता अनुराग श्रीवास्तवले विज्ञप्ती जारी गर्दै अन्तराष्ट्रिय सेलेव्रिटीले दिएको अभिव्यक्तिमा कुनै सत्यता नरहेको बताएका छन् । केही निहित स्वार्थमा चलेका व्यक्ति र समूहले भारतीय संविधान र सरकारविरुद्ध उक्साइरहेको पनि उल्लेख छ ।
इन्डिया टुगेदर र इन्डिया प्रपोगान्डाविरुद्ध ह्यासट्याग उल्लेख गर्दै विज्ञप्तीमा किसान प्रदर्शनलाई भारतीय लोकतन्त्र र त्यसको मर्मसँग जोडेर हेर्न आग्रह गरिएको छ । रिहानाले सीएनएनको एउटा न्यूज ट्वीट गरेपछि भारतीय अभिनेत्री कंगना रनावतले उनलाई मूर्खको संज्ञा दिएकी थिइन् ।
सीएनएनले किसान प्रदर्शनलाई रोक्न भारतले दिल्ली वरपर इन्टरनेट सेवामा प्रतिबन्ध लगाएको समाचार लेखेको थियो ।
काठमाडौं । अहिलेसम्मका सबै मिस नेपालका टाइटल विजेता एक ठाउँमा भेला भएर सेलिव्रेसन गरेका छन् । पूर्वमिस नेपाल माल्भिका सुब्बाको पहलमा क्लब प्लाटिनममा दुई दर्जन मिस नेपाल विजेता भेला भए र रमाइलो गरे ।
पूर्वमिस नेपाल अनुष्का श्रेष्ठले सबै मिस नेपाल टाइटल विजेताबीच सम्बन्धलाई हार्दिक बनाइराख्न यस्तो पार्टी आयोजना गरिएको बताइन् । माल्भिका सुब्बादेखि पछिल्लो छिमलका सबै मिस नेपाल र अन्य टाइटलका विजेता सहभागि थिए । तस्विर : क्लब प्लाटिनम
काठमाडौं । गण्डकी प्रदेश सांसद राजिव गुरुङ उर्फ दीपक मनाङेले फिल्म ‘२ नम्बरी’ निर्माण गर्ने भएका छन् । फिल्मका प्रस्तुतकर्ता एवं अर्का निर्माता किरण नेपालीले गुरुङ निर्माताको रुपमा यस फिल्ममा संलग्न हुने जानकारी दिए ।
लकडाउनका कारण यो फिल्मको छायांकन बीचमै रोकिएको थियो । बाँकी छायांकनलाई चाँडै सुचारु गर्ने जानकारी निर्माता विकले दिए । दीपेन्द्र लामाले निर्देशन गरिरहेको फिल्ममा दयाहाङ राई, उगेन छोदेन, पल शाह र वर्षा राउतको अभिनय छ ।
चैत १५ गते घान्द्रुकबाट बाँकी फिल्म छायांकन निरन्तर हुने जनाइएको छ । कोरोना महामारीले गर्दा यसवर्षको जनैपूर्णिमामा हुने भनिएको पूर्वनिर्धारित रिलिज डेट स्थगित भएको छ । भुटानी नायिका छोदेन फिल्मको लागि काठमाडौं आउँदैछिन् ।
काठमाडौं । भारतमा चर्किएको किसान आन्दोलनलाई लिएर अहिले विश्व सेलेव्रिटी विभाजित छन् । जलवायु परिवर्तन अभियन्ता ग्रेटा थनवर्गदेखि अमेरिकी गायिका रिहानासम्मले भारतको किसान आन्दोलनमा समर्थन जनाएका छन् ।
प्रहरी र किसानबीचको झडप बढ्न थालेपछि दिल्लीमा इन्टरनेट सेवा अवरुद्ध भन्ने सीएनएनको समाचारलाई रिहानाले सेयर गरेपछि यसले चर्चा बटुलेको छ । सोही समाचारलाई ग्रेटाले पनि सेयर गर्दै भारतीय किसानको प्रदर्शनमा समर्थन जनाएकी छिन् ।
रिहानाले पनि उक्त ट्वीट गरेपछि बलिउड अभिनेत्री कंगना रनावतले क्रुद्ध हुँदै जवाफ दिएकी छिन् । कंगनाले किसान आन्दोलनमा सहभागिप्रति लक्षित गर्दै भारतलाई विभाजन गर्न खोज्ने नक्कली किसान र आतंककारी भनेकी छिन् ।
No one is talking about it because they are not farmers they are terrorists who are trying to divide India, so that China can take over our vulnerable broken nation and make it a Chinese colony much like USA…
Sit down you fool, we are not selling our nation like you dummies. https://t.co/OIAD5Pa61a
उनी लेख्छिन्, ‘कसैले पनि यसबारे कुरा गरेको छैन किनभने उनीहरु किसान हैनन् बरु आतंककारी हुन् जो भारतलाई विभाजित गर्न चाहन्छन् जसले गर्दा अमेरिकालाई जस्तै भारतलाई पनि चीनले उपनिवेश बनाउन सकोस् ।’ कंगनाले रिहानालाई मुर्ख समेत भनेकी छिन् ।
भारतमा किसानहरु मोदी सरकारले ल्याएको कृषि कानुन खारेजीको माग गर्दै आन्दोलनरत छन् । उक्त कानुनले नीजि कम्पनी र बिचौलियालाई फाइदा पुग्ने किसानको आरोप छ । उच्च न्यायलयले समस्या समाधानका लागि एउटा कमिटी पनि गठन गरेको छ ।
नायिका सुश्मा कार्कीले प्रहरीमा उजुरी गरेपछि शालीन स्वभावकी नायिका श्वेता खड्का विवादमा तानिएकी छन् । श्वेताले आफूमाथि दुर्व्यवहार गरेको र उनकी बहिनीले हातपात नै गरेको आरोप सुष्माको छ ।
यो घटना हिजो (सोमबार) रातिको हो । धेरै सेलिब्रटीहरुसँग निकट सम्बन्ध भएका यूट्यूवर उत्सव रसाइली र सुष्माको झगडा हुँदा श्वेता र उनकी बहिनीले हस्तक्षेप गरेका थिए । यस क्रममा श्वेताकी बहिनी आरतीले सुष्मालाई एक थप्पड हानेको र कपाल लुछेको उत्सवले स्वीकारेका छन् ।
श्वेताकी बहिनी आरती र युट्युबर उत्सव ।
उत्सवले नेपाल प्रेससँग घटना विवरण यसरी सुनाएः
‘श्वेता दिदीको बहिनी आरतीको एनिभर्सरी मनाउन हामी दरबारमार्गको लन्डन पब क्लबमा भेला भएका थियौं । श्वेता दिदी, भिनाजु, उहाँकी बहिनी, मसहित अन्य साथीहरु त्यहाँ थियौं । त्यही क्लबमा सुष्मा कार्की पनि आएकी रहिछन् । वासरुम जान लाग्दा उनीसँग मेरो जम्काभेट भयो । त्यही बेला उनले भिडियो अन्तर्वार्तामा श्वेता र पूजा शर्मा लगायतलाई मात्र फेवर गर्ने र आफूलाई सपोर्ट नगर्ने भनेर कराउन थालिन् ।
कराउने क्रममा उनले ममाथि अपशब्द प्रयोग गर्नुका साथै जातीय गाली समेत गरिन् । उनले मलाई प्रयोग गरेका शब्द सार्वजनिक रुपमा भन्न पनि मुस्किल हुन्छ । मलाई यसरी गाली गरेको देखेर श्वेता दिदीको बहिनी आरती पनि आउनुभयो । उहाँले सुष्मालाई कपाल भुत्लाएर एक झापड हान्नुभएको हो । अलिअलि धकेलाधकेल पनि भएको थियो ।
श्वेता र उनका श्रीमान विजयेन्द्र ।
विवाद बढ्दै गएपछि अरु साथीले छुट्याए । सुष्माले ममाथि गरेको गाली र अपमानविरुद्ध म पनि बुधबार बिहान प्रहरीकहाँ निवेदन लिएर जाँदैछु । ममाथि गरिएको जातीय गालीले मलाई दुःखित तुल्याएको छ । जहाँसम्म श्वेता दिदीले दुर्व्यवहार गरेको कुरा छ, त्यो सरासर गलत हो । हामी पनि प्रहरीकहाँ गएर सुष्माविरुद्ध कारबाहीको माग गर्नेछौं ।
काठमाडौं । आफूमाथि दुर्व्यवहार र कुटपिट भएको भन्दै नायिका श्वेता खड्कासहित तीनजना विरुद्ध प्रहरीमा उजुरी गरेकी नायिका सुष्मा कार्कीले विवादको जड यूट्यूवर उत्सव रसाइली भएको बताएकी छन् ।
रसाइलीले आफूलाई पहिलेदेखि नै नानाथरी ट्रोल गरेर अपमान गर्दै आएको उनको भनाइ छ । ‘मैले यस्तो नगर भन्दा तपाईंजस्तो पब्लिक फिगरले यस्ता कुरा पचाउनुपर्छ भनेर पन्छाउने गर्थ्याे’ उनले भनिन् ।
घटना भएको दिन पनि क्लबमा उत्सवबाटै विवाद सुरु भएको सुष्माले बताइन् । ‘मलाई देखेपछि यो केटी को हो यसलाई निकाल भन्दै उसले ह्यारेसमेन्ट गर्यो, अनि श्वेताका मान्छेहरु आएर हात हाल्ने काम गरे’, उनले भनिन् ।
श्वेताकी बहिनी आरतीले आफूलाई कपाल लुछेको र श्वेताले पनि गालीगलौज गरेको भन्दै उनले प्रहरीमा उजुरी दिएकी छिन् ।
काठमाडौं । कुनैबेला थियो बद्री पंगेनीको जनवादी ट्रयाक ‘सैं पनि एमाले, मै पनि एमाले’ आन्दोलन र चुनावी अभियानमा हिट थियो । लाग्थ्यो, तत्कालिन एमालेको लागि यो एउटा ‘ब्रान्डेड गीत’ हो ।
एमाले दलको छाता मुनि आबद्धले यो गीत गाउँथे र एकाकार हुनुको महसुस गर्थे । अहिले भने समयले एकसय असी डिग्रीको कोल्टे फेरेको छ । नेकपा दल विभाजन भएपछि कला क्षेत्र पनि विभाजित भएको छ ।
फिल्म सेलेव्रिटी संसद विघटन र नेकपा विभाजनलाई दिएर यसअघि नै विभाजित छन् । अब भने पालो संगीत क्षेत्रको । केही जनवादी गायक-गायिकाले केपी ओलीको पक्षमा गीत निकालेका छन् । केहीले प्रचण्ड-नेपाल पक्षमा र केहीले गीतमार्फत एकताको पक्षमा शब्द पोखेका छन् ।
बद्री पंगेनीसँग ‘मै पनि एमाले, सहि पनि एमाले,’ गाएकी प्रिया भण्डारी नेकपा विभाजनपछि फेरि अर्को गीतमा देखिएकी छन् । बैकुण्ठ महतको ‘एकता तोडेर नजाऊ साथी हो’ गीतमा प्रियाले स्वर दिएकी छन् ।
शहिदको रगत र आकांक्षालाई धोका दिएर एकता नभाँड्न आग्रह गरिएको यो गीतले एकताको सन्देश दिन्छ । यसमा केपी ओली नेतृत्वको सरकारले विकासका कामहरु गरिरहेको दृष्य देखाउँदै यस्तो प्रयासलाई अवरोध गर्न पार्टी विभाजन गर्न खोजिएको सन्देश दिन खोजिएको छ ।
गायिका कोमल ओलीले ‘केपी ओली’ बोलेको गीत युट्युवमा सार्वजनिक गर्दै प्रधानमन्त्री ओलीको आवश्यकतालाई दर्शाउने प्रयास गरेकी छिन् । केपी ओलीलाई राजनेताको रुपमा यो गीत प्रस्तुत गरिएको छ । राष्ट्रिय सभाकी सांसद समेत रहेकी उनी ओली पक्षको नेकपामा खुलेरै लागेकी छिन् ।
काठमाडौं । गायिका अञ्जु पन्त दोस्रो विहेको तयारीमा छिन् । दशकअघि संगीतकार मनोज राजसँग उनको सम्बन्ध विच्छेद भएको थियो ।
उनै मनोजसँगको सन्तानको रुपमा रहेकी छोरी पारितोषिकाको आग्रहमा अन्जुले दोस्रो विहे गर्न लागेकी हुन् । नेपाल प्रेससँग कुरा गर्दै पन्तले अर्को वर्ष आफूहरु विहे बन्धनमा बाँधिने तयारीमा रहेको बताइन् ।
‘मिडियामा विहेको खबर आउन थालेपछि भने हामीलाई दबाब भएको छ र विहे गने तयारीमा छौं’ उनले भनिन् । इलामका थीर कोइरालासँग अन्जुले विहे गर्न लागेकी हुन् ।
दुबैको परिवारबीच विहेको कुरा भएपनि मिति भने तय भएको छैन । उनीहरु एकवर्षदेखि डेटिङमा छन् । थीर र अञ्जु दुबै क्रिस्चियन धर्मावलम्वी हुन् ।
छोरी पारितोषिकाले पनि मिडियामा आफ्नी आमाले विहे गर्नुपर्ने धारणा राख्दै आएकी थिइन् । सामाजिक संजालमा थीरले पनि अञ्जुका तस्विरहरु सेयर गरेका छन् ।
काठमाडौं । आफूलाई श्वेता खड्कासहितले गालीगलौज र कुटपिट गरेको भन्दै अभिनेत्री सुष्मा कार्कीले प्रहरीमा उजुरी दिएकी छिन् ।
अभिनेत्री श्वेता खड्का, उनका पति विजयेन्द्र राउत, बहिनी आरती खड्का र पत्रकार उत्सव रसाइलीले कुटपिट गरेको भन्दै कार्की दरबारमार्ग प्रहरी समक्ष उजुरी लिएर पुगेकी हुन् ।
नेपाल प्रेससँग कुरा गर्दै उनले आफूमाथि कुटपिट र दुर्व्यवहार भएकोले कारबाहीका लागि उजुरी लिएर आएको बताइन् । प्रहरीले छलफलका लागि श्वेतासहित आरोपित पक्षलाई पनि दरवारमार्ग बोलाएको छ ।
लन्डन पब क्याफेमा पुगेका बेला आफूमाथि कुटपिट भएको सुष्माको दावी छ । आफूमाथि भएको दुर्व्यवहारको भिडियो समेत प्रहरीलाई सुष्माले बुझाएकी छन् ।
श्वेताले आफूलाई अपशब्द र गालीगलौज पनि गरेको र बहिनी आरतीले हात हालेको सुष्माले प्रहरीलाई बताएकी छन् ।
उनले प्रहरीमा दिएको जाहेरी अनुसार आफ्नो जन्मदिनको पार्टी आयोजना गर्न भेन्यु खोज्न जाने क्रममा लण्डन पबमा पुगेको र सोही क्रममा श्वेताको परिवार र उत्सव रसाइली झगडा गर्न आएको बताएकी छन् ।
काठमाडौं । बलिउडको पावरफूल कपल विराट कोहली र अनुष्का शर्मा अहिले मम-ड्याड बनेको खबरले चर्चामा छन् । टेस्ट क्रिकेटको व्यस्तता छाडेर विराट अहिले पत्नी अनुष्कासँगै छन् ।
उनले केही साता नवजात शिशुको तस्विर सार्वजनिक गरेनन् । तर, न्वारनसहित यो जोडीले छोरीको तस्विर आउट गरेका छन् । छोरीको नाम राखिएको छ –भमिका ।
भमिका अर्थात विराट कोहली र अनुष्का शर्माको छोटकरी नाम । बलिउडमा अहिले कपलको नामबाटै शिशुको नामाकरण गर्ने ट्रेन्ड छ । अनुष्काले इन्स्टाग्रामबाट तस्विर सेयर गर्दै प्रशंसकलाई धन्यवाद दिएकी छिन् । आफू पिता बनेको विराटको ट्वीट सन् २०२० मा भारतमा सबैभन्दा बढी लाइक गरेको ट्वीट बनेको थियो ।
काठमाडौं । अभिनेता सौगात मल्ल अब फिल्म निर्माता बन्ने भएका छन् । निर्देशक सुवर्ण थापासँग उनले नयाँ फिल्म ‘द सेक्र्टस अफ राधा’मा सहकार्य गर्र्दैैछन् ।
माघ अन्त्यदेखि छायांकन सुरु हुने फिल्मको लिड मेलमा स्वयम सौगात हुने भएका छन् । नेपाल प्रेससँग कुरा गदै निर्माता एवं निर्देशक थापाले सौगातको ब्यानर आदियोगी भिजन र आफ्नो ब्यानरमा फिल्म बन्ने जनाए ।
सौगात पहिलोपटक फिल्म निर्माता बन्न लागेका हुन् । ‘लुट’ फेम्ड अभिनेताले बनाउने फिल्मको अहिले प्रि-प्रोडक्सन भैरहेको छ । चाँडै प्रेसमिट गर्दै नायिका लगायतका लिड पात्रको बारेमा जानकारी गराइने भएको छ ।
सुवर्णले यसअघि सुनगाभा : द डान्स अफ दी अर्किड्स, फन्को र बाटो मुनिको फूल २ लगायतका फिल्म निर्देशन गरेका छन् । सुवर्ण र सौगातले २०१२ को लेस्बियन ड्रामा ‘सुनगाभा’मा समेत सहकार्य गरेका थिए ।
सौगातको पाइपलाइनमा लप्पन छप्पन २, तीन जन्तु, मन्त्र फिल्म रिलिज तयारीमा छन् । सौगातको पहिलो अभिनय फिल्म कागबेनी २००८ मा रिलिज भएको थियो ।
काठमाडौं । छोरी कवितालाई मुख्य भूमिकामा लिएर अभिनेत्री करिश्मा मानन्धरले फिल्म ‘बनवास’ निर्माणको घोषणा गरेकी छिन् । करिश्माकै होमप्रोडक्सनमा बन्ने फिल्मलाई सुशिल क्षेत्रीले निर्देशन गर्नेछन् ।
नेपाल प्रेससँग कुरा गर्दै करिश्माले बाबु–छोरीबीचको सम्बन्धलाई फिल्मले चित्रण गर्ने बताइन् । बाबुको रोलमा पाका अभिनेता सरोज खनालले अभिनय गर्ने भएका छन् ।
सामाजिक संजालमा पनि करिश्माले थिम पोस्टर लन्च गरेकी छिन् । यसै महिना कविताको फिल्म ‘एउटा यस्तो प्रेम कहानी’ रिलिज भएको थियो । यसअघि करिश्माले फागु फिल्म निर्माण गरेकी थिइन् ।
फागुन अन्तिम साता हुने दशौं नेफ्टा अवार्डको टाइटल स्पोन्सरमा एलआइसी ‘लाइफ इन्स्योरेन्स कर्पोरेसनले सहकार्य गर्ने भएको छ । चलचित्र प्राविधिक संघसँग आयोजकमा जोडिएको ड्रिम हाइ नेपाल प्राली र एलआइसीबीच शुक्रबार सम्झौता पत्र आदान प्रदान भएको हो ।
एलआइसीका तर्फबाट सिइओ लक्ष्मीप्रसाद दास र ड्रिम हाइ नेपालको तर्फबाट कमल जिसीले सम्झौता पत्रमा हस्ताक्षर गरेका छन् । टाइटल स्पोन्सर बापत नेफ्टा अवार्डलाई एलआएसीले कति रकम उलपब्ध गरायो भन्ने खुलाइएको छैन । सम्झौतापछिको सहकार्यसँगै नेफ्टा अवार्डको नाम अब एलआइसी नेपाल १० औं नेफ्टा अवार्ड –२०७७ भएको छ ।
टाइटल स्पोन्सरमा एलआइसी जोडिएसँगै नेफ्टा अवार्डको ब्युटी स्पोन्सरमा जोय पपाया र अर्को सहकार्य पार्टनर काठमाडौं वर्ल्ड स्कुल पनि जोडिएको छ भने अवार्डलाई पर्यटन बोर्डले प्रवर्धन गर्नेछ । अवार्ड समारोहले आन्तरिक पर्यटन प्रवर्धनमा समेत सघाउ पुर्याउने आयोजकले विश्वास लिएको छ ।
कोरोना भाइरसको महामारीको कारण गत बर्ष स्थगित भएको यो अवार्डमा २०७५ सालमा बर्षभरी प्रदर्शनमा आएका नेपाली फिल्मले प्रतिस्पर्धा गर्दैछन् । जुरीले फिल्मको उत्कृष्ट पाँच मनोनयन छानिसक्दा मनोनयन सार्वजनिक कार्यक्रम यहि माघ २४ गते काठमाडौंमा हुनेछ । अवार्ड समारोह भने फागुन २९ गते हुनेछ ।
कोरोना महामारीपछि सुस्ताउने अवस्थामा पुगेको चलचित्र क्षेत्रलाई थप चलायमान र सकृय बनाउन अवार्ड कार्यक्रम गर्न लागिएको प्राविधिक संघ अध्यक्ष पुष्कर लामाले बताए । महामारीको कारण डुबानमा परेको चलचित्र क्षेत्रलाई गतिशिल बनाउने आफुहरुको दायित्व भन्दै यस कार्यमा हातेमालो गर्न समग्र चलचित्रकर्मी, दर्शक तथा सुभचिन्तकहरुलाई लामाले आग्रह पनि गरेका छन् ।
काठमाडौं । नेपालमा छायांकन गरिएको बीबीसी सिरिज ‘ब्ल्याक नर्सिसस’लाई राजधानी काठमाडौंमा प्रिमियर गरिएको छ । चलचित्र विकास बोर्डको अडिटोरियममा सिरिज प्रदर्शन गरियो ।
गतमहिनादेखि बीबीसी वान टेलिभिजनमा प्रसारण सुरु भएको यो सिरिजको प्राइभेट स्क्रिनिङ नेपाली फिल्मकर्मी, मिडियाकर्मीमाझ गरिएको हो । सिरिजको आधाभन्दा बढी भाग मुस्ताङको नौरीकोट र मुक्तिनाथ क्षेत्रमा गरिएको थियो ।
सन् १९३९ मा रुमेर गोडेनद्धारा लिखित उपन्यास ‘ब्ल्याक नर्सिसस’मा फिल्म बनेको थियो र सोही बेला दुई विधामा अस्कर अवार्ड पनि जितेको थियो । बेलायतको एफ फक्स र बीबीसी वानले निर्माण गरेको सिरिजमा केही नेपाली कलाकारले समेत अभिनय गरेका छन् ।
सन् १९३४ को पृष्ठभूमिमा बनेको फिल्मले विद्यालय बनाउने उद्देश्यले नेपाल आएका क्याथोलिक भिक्षुणीहरुको कथा पेश गर्छ । यो सिरिजमा गेम अफ थ्रोन्स अभिनेत्री डायना रिग लगायतको अभिनय छ ।
सिरिजको नेपाल व्यवस्थापन चाहिँ लोकेसन नेपालले गरेको थियो । फिल्मस एन्ड फिल्मसको भगिनी संस्था लोकेसन नेपाल गौतम धिमाल र प्रेम उपाध्यायले स्थापना गरेको अन्तराष्ट्रिय निर्माता कम्पनी हो ।
काठमाडौं । भरतपुरमा निर्माण भैरहेको गौतम बुद्ध अन्तर्राष्ट्रिय क्रिकेट रंगशालाको अर्थ संकलनका लागि ‘स्टार क्रिकेट २०२१’ टुर्नामेन्ट आयोजना हुने भएको छ ।
शनिबार राजधानीमा आयोजित प्रेसमिटमा टीम धुर्मुस र टीम सुन्तलीबीच प्रतिस्पर्धा हुने जानकारी दिइयो । नेपाली फिल्म, संगीत र खेलकुदका ४० भन्दा बढी सेलेव्रिटी दुई समूहमा बाँडिएर क्रिकेट खेल्नेछन् ।
दयाहाङ राई, प्रमोद खरेल, सन्दीप क्षेत्री, दीपक विष्ट, श्रृंखला खतिवडा, बेनिशा हमाल, संगीना वैद्य, प्रशान्त ताम्राकार, पारस खड्का, रवि ओड, ज्ञानेन्द्र मल्ल, विनोद भण्डारीलगायतले क्रिकेट खेल्ने भएका छन् ।
माघ २४ गते निर्माणाधीन रंगशालामा प्रतियोगिता हुने भएको छ । प्रेसमिटमा बोल्दै आयोजक संस्था गृष्म ब्रोडकास्टिङ मिडियाका अध्यक्ष गृहेन्द्र घिमिरेले टुर्नामेन्टबाट संकलन हुने रकम रंगशालाको निर्माणमा प्रदान गरिने बताए ।
कर्पोरेट सोसल रेस्पोन्सिबिलिटी अन्तर्गत टुर्नामेन्ट आयोजना गरिएको उनले जनाए । तेक्वान्दो खेलाडी दीपक विष्ट र अभिनेता सन्दीप क्षेत्रीले सामाजिक काममा सक्रिय हुन पाउँदा आफूहरु उत्साहित भएको बताए ।
काठमाडौं । अभिनयसँगै सामाजिक कार्यमा सक्रिय छिन् मनीषा कोइराला । लकडाउनपछि उनी काठमाडौंस्थित घरमै ब्यस्त छिन् ।
यसै महिना पृथ्वी जयन्ती उनकै नेतृत्वमा काठमाडौंमा मनाइयो । उनले एउटा भजन पनि आफ्नै स्वरमा रेकर्ड गरिन् । सामाजिक कार्यमा पनि उनको सक्रियता लोभलाग्दो छ ।
शुक्रबार राजधानीमा आयोजित महिला हिंसाविरोधी कार्यक्रम ‘मिसन जननी जयते’मा मनिषाले बलात्कार पीडित पाँच वर्षे बालिकालाई सहयोग गर्ने घोषणा गरिन् ।
ती बालिकालाई निःशुल्क शिक्षा र आर्थिक सहयोग गर्ने वचन उनले दिइन् । उक्त समारोहमा सहभागि अभिनेत्री रेखा थापाले बलात्कारविरुद्ध महिलाको आवाज बलियो हुनुपर्ने खाँचो औंल्याइन् ।
काठमाडौं । पहिले सदावहार सुन्दरी करिश्मा मानन्धरको अभिनय र सुन्दरताको मात्र चर्चा हुन्थ्यो, अहिले उनका अभिव्यक्तिले पनि चर्चा पाउन थालेका छन् । पछिल्लो समय सामाजिक सञ्जालमार्फत आफ्ना राजनीतिक दृष्टिकोण सार्वजनिक गर्न थालेपछि उनको बेग्लै छवि निर्माण भइरहेको छ ।
त्यसो त करिश्मा प्रत्यक्ष राजनीतिमै होमिएकी हुन् । तर, डा. बाबुराम भट्टराईले स्थापना गरेको नयाँ शक्तिमा उनको राजनीतिक यात्रा लामो भएन । उनी पार्टी राजनीति छोडेर स्वतन्त्र छिन् । तर, राजनीतिको धङधङी बाँकी नै छ । खैर, उनी अब पूर्णकालीन राजनीति गर्ने मूडमा छैनन् ।
पछिल्लो राजनीतिक अस्थिरतालाई लिएर करिश्माको विचार सुन्दा लाग्छ– नेपालमा शासन व्यवस्था अझै संस्थागत भइसकेको छैन र राजनीतिमा व्यापक कोर्स करेक्सनको जरूरी छ ।
संसद विघटन र नेकपा विभाजनपछि तरल बनेको राजनीतिप्रति करिश्मा लगभग निराश छिन् । उनले दुईतिहाइ बहुमत प्राप्त दल समृद्धि निर्माणमा असफल भएको निष्कर्ष निकाल्दै राजनीतिक दल नै खारेज हुनुपर्ने ‘बोल्ड’ तर्क सामाजिक सञ्जालमा गरेकी थिइन् । एउटा सेलिब्रिटीले सार्वजनिक रूपमा यत्ति लेख्न निकै साहस जुटाउनुपर्छ । तर, करिश्मा यसलाई ‘नागरिक’ हुनुको प्रतिक्रिया बताउँछिन् ।
अढाइ वर्षअघि उनै करिश्मा डा. बाबुराम भट्टराईले नेतृत्व गरेको नयाँ शक्ति पार्टीमा थिइन् । कालान्तरमा नयाँ शक्तिले राजनीतिक आकर्षण गुमाएपछि भने करिश्माले बाबुरामको साथ छाडिन् । उनी सामाजिक सञ्जालमार्फत पछिल्लो राजनीतिक व्यवस्थाप्रति असन्तुष्टि जनाइरहेकी छिन् ।
किन नयाँ शक्ति ज्वाइन गर्नुभयो र किन छोड्नुभयो ? हामीले सोध्यौं ।
करिश्माले बाबुराम भट्टराईलाई लक्षित गर्दै कूटनीतिक जवाफ दिइन्, ‘एउटा दूर–दृष्टिकोण भएको राजनीतिज्ञ यदि मूलधार राजनीतिमा आउन सकेमा राम्रो हुन्छ भन्ने लागेको थियो । उहाँसँग आबद्ध भएर केही काम गर्न सकिन्छ भन्ने आशाले राजनीतिमा लागेकी थिएँ । केही समय दलभित्रै बसेपछि आफूले धेरै सिक्नुछ भन्ने महसूस गरेर पछाडि फर्किएँ ।’
नयाँ शक्ति प्रवेशलाई करिश्मा विशुद्ध राजनीति बुझ्ने आफ्नो एउटा कर्म भएको बताउँछिन् । तत्कालीन परिस्थितिमा डा. भट्टराईलाई सहयोग गरेर अगाडि बढ्दा राम्रै हुन्छ भन्ने लागेको थियो उनलाई । तर, फेरि लाग्यो– पार्टीमा बसेर आफूले कल्पना गरेको कुरा पूरा गर्न कठिन छ ।
‘यही सोचेर मैले आफूलाई राजनीतिबाट पछाडि हटाउनु उचित ठानें’ उनी स्मरण गर्छिन् । अढाइ वर्ष नयाँ शक्तिभित्र बसेर करिश्माले बुझेको कुरा हो– राजनीति सहज छैन । मुलुकको राजनीति माटो सुहाउँदो पनि छैन ।’
दशरथ रंगशालामा मुठ्ठी उचालेर देश सेवा गर्न लिएको शपथको स्मरण फिल्मको रिलजस्तै घुमिरहेको छ उनको मस्तिष्कमा । चलचित्र क्षेत्रमा स्टारडम बनाउन जति सजिलो छ, उति नै राजनीतिको मैदानमा नायकत्व खोज्नु स्यालको सिङ खोज्नुजस्तै कठिन । यो उनको अनुभव हो ।
केही आलोचक करिश्मालाई फेसबुके राजनीति गरेको आरोप लगाउँछन् तर, उनलाई यसमा मतलब छैन । ‘देशको परिस्थिति, राजनीतिक घटनाक्रम र विभिन्न समस्या देख्दा बोल्न मन लाग्छ, जसले गर्दा म आलोचित पनि हुन्छु’ उनको जवाफ छ, ‘जब तपाइँ एउटा पक्ष–विपक्षमा देखिनुहुन्छ तब विचारमा संकीर्णता देखिन्छ । अनि अर्को पक्षले भन्ने बाटो रहन्छ । तर, नेपाली नागरिकको हिसाबले चूप लागेर बस्न पनि सकिरहेको छैन । सकेसम्म नबोलौं भन्ने नै लाग्छ, तर फेरि बोल्न मन लाग्छ ।’
‘म राजावादी भने हैन । मैले देखेको कुरा मात्र भनेकी हुँ । हामी गणतन्त्रमै छौं । गणतन्त्रप्रति सम्मान छ । तर, मान्छेको मनमा विकल्पस्वरुप राजाको कुरा आउने भइसक्यो ।’
राजनीति इमानदार छैन । करिश्माको सबैभन्दा बृहद स्टेटमेन्ट हो, यो । उनी राजनीतिभन्दा कलाकारितालाई इमानदार देख्छिन् । ‘हुनुपर्ने राजनीति हो तर, कलाकार चाहिं आफ्नो काममा अति इमानदार देख्छु’ करिश्माको मूल्यांकन छ । हालैको एउटा स्टेटमेन्टमा करिश्माले राजतन्त्रप्रति सहानुभूति जनाइन् । पछिल्लो समय दलीय प्रणाली असफल भएको तर्क गर्दै उनले बरु राजतन्त्रले सबैलाई समेटेर अघि बढेको दाबी गरिन् ।
के तपाइँ अब राजा चाहिन्छ भन्ने निष्कर्षमा पुग्नुभएको हो ? करिश्मा खुलिनन् । उनी भन्छिन्, मलाई सबै राजनीतिक दलको विचारधारा थाहा नहोला । कुनै वादको बारेमा धेरै ज्ञान नहोला । तर, मेरो जीवनकालमा भएका राजनीतिक घटनाक्रमलाई चाहिं बुझ्छु म ।’ जनताले साथ दिंदादिंदै पनि राजनीतिक दल असफल हुनुले नागरिकमा उनीहरूको विकल्प खोज्ने विचार सिर्जना हुनु स्वाभाविक भएको करिश्माको ठम्याइ छ । ‘जनताले उहाँहरूलाई तिरस्कार गरेका हैनन् तर, भनेजस्तो काम नगरेपछि विकल्प खोज्नु स्वाभाविक हो जस्तो लाग्छ’ बहुदलीय व्यवस्थाप्रति करिश्माको डिफाइन छ ।
संसद विघटन हुनुअघि र पछाडिको राजनीतिक परिदृश्यमा कुनै नयाँ चिज देख्दिनन् उनी । भन्छिन्– संसद विघटन हुनु अगाडि र पछाडि एउटा नागरिकका लागि खास फरक छैन । त्यतिबेला पनि जुलुस र धर्ना भोगिरहेको थियो देश र अहिले पनि भोगिरहेको छ । यदि संसद पुनस्र्थापना भयो भने त्यसलाई चित्त नबुझाउनेहरू पुनः सडकमा आउनुहुन्छ । यो पार्टीगत वैचारिक द्वन्द्व हो । मैले भनेको कुरा गलत हुनसक्छ । मैले भनेको कुरामा सहमत हुनुपर्छ भन्ने छैन । तर, पार्टी सिस्टम फेल खायो । किनभने समाज नै अहिले विभाजित भएको छ ।’
करिश्माको ‘पलिटिकल कन्सस’ दलीय आलोचनाको वृत्तमा मात्र सीमित छैन । धर्मनिरपेक्षता र संघीयताबारे पनि उनी आलोचनात्मक छिन् । मुलुक धर्मनिरपेक्ष भएपछि धार्मिक असहिष्णुता र अनुशासनहीनता मौलाएको यी सुन्दरीको तर्क छ ।
भन्छिन्, ‘बरु २०४६ सालमा म किशोरी थिएँ । त्यतिबेला धार्मिक सहिष्णुता उच्च थियो । हामी सबै एकअर्काको धर्मलाई सम्मान गथ्र्यौं । अहिले त धर्मको बारेमा पनि विभाजित भएको देख्छु । चार जात छत्तीस वर्णको फूलबारीको रूपमा राजाले पनि सबैलाई सम्बोधन गरेकै थिए नि !’
फेरि अलिकति ब्याकफुटमा आइन् ।
उनलाई बाबुराम दूर-दृष्टिकोण भएका र सक्षम नेता लाग्छन् । तर, विकसित राजनीतिक घटनाक्रमले बाबुरामलाई अस्थिर बनाएको छ र करिश्माकै भनाइमा उनी कहिले कता–कहिले कता ठोक्किने गरेका छन् ।
‘म राजावादी भने हैन । मैले देखेको कुरा मात्र भनेकी हुँ । हामी गणतन्त्रमै छौं । गणतन्त्रप्रति सम्मान छ । तर, मान्छेको मनमा विकल्पस्वरुप राजाको कुरा आउने भइसक्यो ।’
गणतन्त्रप्रति उनको दृष्टिकोण छ, ‘मुलुकमा अभिभावकत्वको कमी देखिएपछि नागरिकको मनमा यस्तो कुरा आउँदो रै’छ । जो भोगिरहेको छु त्यो भन्न पाउनुपर्छ ।’
धर्मनिरपेक्षता र संघीयताबारे आफ्नो व्यक्तिगत विचार रहेको उनले बताइन् ।‘यसमा मैले धेरै गाली खान सकुँला । २०४६ सालअघि हिन्दू धर्मले सबैलाई सम्मान गरेको थियो । धर्मनिरपेक्ष भएपछि एक–अर्काको सद्भाव बढी हुनुपर्ने हो नि होइन र ? तर अहिले आएर यसमा विवाद भइरहेको छ । संघीयताले पनि कन्फ्युज मात्र थपेको छ । बहुमत ल्याएका दलले पनि संघीयताको अभ्यास राम्रो गर्न सकेनन् ।’
संसद विघटन राज्यको हितमा नभएर पार्टीगत भागबण्डामा कुरा नमिलेर भएको करिश्माको तर्क छ । संसद विघटन जनताको चाहना अनुरूप नभएको बताउँछिन् उनी । ‘पछिल्लो घटनाक्रमबाट जनतालाई नोक्सानबाहेक केही छैन’ भन्छिन्, ‘दलहरूले कसको फाइदाको लागि गर्नुभएको हो, त्यो थाहा भएन ।’
राजतन्त्रप्रति नरम विचार भए पनि करिश्मालाई राजावादी पार्टीमा लाग्ने कुनै चाहना छैन । राजावादी विचार भएका पार्टीले कार्यक्रममा बोलाउँदा पनि आफू नजाने गरेको उनी बताउँछिन् । ‘आक्षेप लाग्ला भनेर म कहीं गएकी छैन । नागरिकको विचार अभिव्यक्त गर्ने कुरामा पनि यो एउटा अवरोध हो जस्तो लाग्छ’ उनको ठम्याइ छ ।
फेरि पनि प्रश्न त्यही । कलाकार भएर राजनीतिक अभिव्यक्ति दिनु हुन्छ या हुँदैन ? करिश्मालाई लाग्छ– कलाकार राज्यका गहना मात्र होइनन् बरु आवाज हुन् ।
‘मेरो विचारमा राजनीतिक अभिव्यक्ति दिंदा हुन्छ किनभने हामी सबैजना राज्यसत्तासँग जोडिएका छौं’ करिश्मा भन्छिन्, ‘यदि राज्यसत्तामा आपत् आइलाग्यो भने हाम्रो जीवनमा प्रभाव पर्छ । हामीले अगुवाहरूलाई सचेत गराउनुपर्छ ।’
बाबुराम भट्टराईसँग निकट भएर अढाइ वर्ष काम गरिन् करिश्माले । नयाँ शक्तिमा जुन उद्देश्यले उनी लागेकी थिइन्, कल्पना र यथार्थबीच दूरी देखेपछि उनले बाबुरामसँग सहकार्य तोडिन् । उनलाई बाबुराम दूर-दृष्टिकोण भएका र सक्षम नेता लाग्छन् । तर, विकसित राजनीतिक घटनाक्रमले बाबुरामलाई अस्थिर बनाएको छ र करिश्माकै भनाइमा उनी कहिले कता–कहिले कता ठोक्किने गरेका छन् ।
‘उहाँ असाध्यै बौद्धिक, काम गर्न सक्ने सामथ्र्य भएको र नेपाल बुझेको नेता मान्छु’ बाबुरामबारे करिश्माको बुझाइ छ, ‘तर राजनीतिक परिवर्तनअनुसार उहाँले स्वतन्त्र भएर काम गर्न पाउनुभएको छैन । उहाँले पनि आफूलाई परिस्थितिअनुसार अगाडि बढाउनु परिरहेको छ । जसले गर्दा कहिले कोसँग गएर ठोक्किने र कहिले कोसँग ठोक्किने भएको छ । यद्यपि उहाँसँग राम्रो सम्बन्ध छ । अहिले पनि उहाँले मेरो सल्लाह लिनुहुन्छ ।’
नेपालमा तपाइँलाई मन पर्ने नेता को हो ? के नाम लिन सक्नुहुन्छ ? करिश्मा भने यो प्रश्नमा मौन रहिन् । ‘नाम नलिऊँ होला’ उनले मौनता साधिन् ।
काठमाडौं । बन्न लागेको एउटा पल्टिकल ड्रामा फिल्ममा बलिउड अभिनेत्री कंगना रनावतले भारतीय पूर्वप्रधानमन्त्री इन्दिरा गान्धीको चरित्र निर्वाह गर्ने भएकी छिन् ।
नाम तय नगरिएको यो बायोपिक फिल्ममा बलिउडका अन्य ठूला हस्तीहरु पनि सहभागि हुने जनाइएको छ । ‘हामी स्क्रिप्टको फाइनल चरणमा छौं । यो इन्दिरा गान्धीको बायोपिक फिल्म हैन तर त्यतिबेला राजनीतिक परिदृश्यलाई भने चित्रण गर्छ’ कंगनाले जारी गरेको वक्तव्यमा उल्लेख छ, ‘फिल्मले तत्कालिन सामाजिक राजनीतिक भूगोललाई जान्न मद्दत गर्छ ।’
बलिउडका अन्य कलाकारसँग यो फिल्ममा देखिन पाउने अवसरका लागि कंगनाले खुशि व्यक्त गरेकी छिन् । फिल्मले संजय गान्धी, राजिव गान्धी, मोर्जी देसाइ र लालबहादुर शाष्त्रीको चरित्रलाई चित्रण गर्ने भएको छ ।
फिल्म ‘रिभल्बर रानी’मा कंगनासँगै काम गरेका निर्देशक साइ कबिरले नै यो फिल्म निर्देशन गर्ने भएका छन् । लगातार ट्वीट गर्दै कंगनाले आफूले इन्दिरा गान्धीको गेटअपमा फोटोसुट पनि गरेको जनाएकी छिन् । फिल्मलाई मनिकर्निका फिल्मसले निर्माण गर्ने भएको छ ।
काठमाडौं । अमेरिकी राष्ट्रपति जो बाइडेनको सपथ ग्रहण समारोहमा कविता बाचन गरेर विश्व चर्चित बनेकी अश्वेत किशोरी अमान्डा गोरम्यानको प्रसिद्धी यत्तिकैमा सीमित छैन ।
अमेरिकी प्रकाशन गृह पेन्गुइनले गोरम्यानका तीनवटा अप्रकाशित पुस्तकलाई १०–१० लाख प्रति प्रकाशन गर्ने घोषणा गरेको छ । विश्वभरबाट उच्च मागपछि पुस्तकलाई छापेर बजारीकरण गर्ने निर्णय भएको पेन्गुइनले जनाएको छ ।
नयाँ पुस्तालाई समृद्ध मुलुक हस्तान्तरण गर्नुपर्छ भन्ने आशयको शक्तिशाली कविता बाइडेनको सपथ ग्रहणमा वाचन गरेपछि २२ वर्षे किशोरी ओभरनाइट विश्व चर्चित भएकी थिइन् ।
Great news: “Penguin announces ONE MILLION COPY first printings for @TheAmandaGorman books in response to overwhelming demand.” Her inaugural poem book is being rushed for March release; the original two books are slated for September.
‘हाम्रो मुख्य लक्ष्य भनेको सपथ ग्रहणमा वाचन गरिएको कविता ‘हामीले चढ्ने पहाड’लाई छापेर पाठकमाझ लैजानु हो’ पेन्गुइन योङ रिडर्सकी संचार अधिकृत शान्ता न्यूलिनले भनिन्, ‘मार्च १६ सम्म यी पुस्तक प्रकाशन हुनेछन् ।’
बाँकी दुई पुस्तकलाई सेप्टेम्बरसम्म प्रकाशन गरिने पेन्गुइनले जनाएको छ ।
काठमाडौं । पछिल्लो समय नेपाली फेसनले ब्यापकता पाउन थालेको छ । नेपाली फेसन डिजाइनर ग्लोबल हुन थालेका छन् । सेलेव्रिटीदेखि विश्व राजनीतिका ठूला नामले नेपाली पहिरन लगाउन थालेका छन् ।
अमेरिकी उपराष्ट्रपति कमला ह्यारिसले हालै हलिउडका नेपाली फेसन डिजाइनर प्रबल गुरुङको डिजाइन लगाएर एक सार्वजनिक समारोहमा भाग लिइन् । अब भने पालो, बलिउड अभिनेत्री कायरा आडवाणीको ।
गुरुङले डिजाइन गरेको रेड सुटमा कायराले हालै फोटोसुट गरिन् । आफ्नो पहिरनमा फोटोसुट गरेपछि गुरुङले उनलाई गर्जियस, ग्रेसफूल र ट्यालेन्टेड अभिनेत्री भन्दै प्रशंसा गरे ।
काठमाडौं । अभिनेत्री करिश्मा मानन्धर अढाइ वर्ष राजनीतिकर्मीका रुपमा सक्रिय रहिन् । डा. बाबुराम भट्टराई नेतृत्वको तत्कालीन नयाँ शक्ति पार्टीले उनलाई सिधै केन्द्रीय सदस्य बनाएको थियो ।
तर, उनको राजनीतिक यात्रा लामो हुन सकेन । अहिले उनी नयाँ शक्तिबाट अलग भइसकेकी छन् । व्यक्तिगतरुपमा डा. भट्टराईसँग पनि उनको दुरी बढेको छ । उनले सामाजिक सञ्जालमा लेख्ने स्टाटसले पनि भट्टराईसँग सम्वन्ध चिसिएको संकेत गर्छ ।
पछिल्ला दिनमा करिश्माले केही राजनीतिक विषयवस्तुमाथि फेसबुकमा टिप्पणी गरिन् । वर्तमान राजनीतिप्रति असन्तुष्टि दर्शाएकी उनले डा. भट्टराईको पनि आलोचना गरेकी छन् । के डा. भट्टराईलाई हेर्ने उनको नजर फेरिएकै हो त ?
यस विषयमा नेपाल प्रेसले प्रश्न गर्दा करिश्माले सन्तुलित जवाफ दिइन् ।
करिश्मा भन्छिन्, ‘म उहाँलाई शिक्षित, बौद्धिक, समग्र भूगोललाई चिनेको र सामथ्र्यवान नेताको रुपमा चिन्छु । तर, राजनीतिक परिवेशमा बाँधिएर काम गर्दा उहाँ कहिले कता–कहिले कता ठोक्किनुभएको छ ।
उनी थप्छिन्, ‘उहाँले आफूलाई परिस्थितीअनुसार अगाडि बढाउनुपरेको छ । यसरी हिँड्दा बिचार त मर्ज हुने नै भयो । उहाँ स्वतन्त्र हुन सकिरहनुभएको छैन ।’ भट्टराईसँग आफ्नो व्यक्तिगत सम्वन्ध भने अहिले पनि राम्रो भएको उनले दावी गरिन् ।
‘उहाँसँग राम्रो सम्बन्ध छ । तीन महिनाअघि फोन गरेर सोध्नुभएको थियो । बसेर कुरा गरौं भन्दै हुनुहुन्थ्यो,’ करिश्माले सुनाइन् ।
नेताले रोमान्टिक बन्नु हुन्न भन्ने के छ ? त्यसमाथि नवविवाहितलाई त रोमान्टिक बन्ने अतिरिक्त सुविधा हुन्छ नै, चाहे उनी मुख्यमन्त्री नै किन हुन् ।
प्रदेश १ का मुख्यमन्त्री शेरधन राई हालै जाङ्मू शेर्पासँग विवाहवन्धनमा बाँधिए । शक्तिशाली ओहाेदाका व्यक्ति र भर्खरकी मोडलबीचको विवाहले मिडियामा चर्चा नपाउने कुरै थिएन । विवाहपछि पनि उनीहरुले भिडियो सार्वजनिक गरेर मिडियालाई खुराक प्रदान गरेका छन् ।
भिडियोमा शेरधन र जाङ्मू रोमान्टिक अवतार देखिएको छ । राई केही लजाएका देखिन्छन् । दुवैले आफ्नो जातिको परम्परागत पहिरन लगाएका छन् । जाङ्मूले आफ्नै यूट्यूव च्यानलबाट भिडियो सार्वजनिक गरेकी हुन् ।
भिडियोको क्याप्सनमा उनले लेखेकी छन्, ‘आधुनिक युगमा आफ्नो संस्कृति र भेषभुषालाई झल्काउँदै विवाहबन्धनमा बाँधिएका जोडी ।’भिडियोको पछिल्लो अंशमा उनीहरुलाई आधुनिक पहिरनमा देख्न सकिन्छ ।
काठमाडौं । शिवरात्रिमा रिलिज हुने भनिएको फिल्म ‘लप्पन छप्पन २’को प्रदर्शन मिति पोस्टपोन्ड भएको छ । मुकुन्द भट्टले निर्देशन गर्ने यो फिल्म अब चैत २७ गते रिलिज हुने भएको छ ।
भीएफएक्स लगायतका प्राविधिक काम बाँकी नहुने भएकाले फिल्मलाई नेपाली नयाँवर्षमा रिलिज हुन लागिएको हो । दोस्रोपटक फिल्मको नयाँ मिति सार्वजनिक गरिएको हो ।
शिव श्रेष्ठ, सौगात मल्ल, अर्पण थापा, अनुपविक्रम शाही, प्रकाश कुँवर, दीपक क्षेत्री, सरिता गिरी लगायत मुख्य भूमिकामा छन् ।
काठमाडौं । बलिउडले वर्ष २०२१ का लागि रिलिज हुने फिल्मको लाइनअप सार्वजनिक गरेको छ । बलिउड ट्रेन्ड एनालिस्ट तरण आदर्शका अनुसार आगामी क्रिसमससम्मको लाइनअप घोषणा भएको हो ।
जसअनुसार १९ फेब्रुअरीमा ट्युज्डे एन्ड फ्राइडेज, २६ मार्चमा हाती मेरे साथी, इदमा सलमान खान स्टारर राधे, सत्यमेव जयते १४ मे, १३ अगस्ट पुष्प, ४ सेप्टेम्बरमा शर्माजी नमकिन छन् ।
साथै, १ अक्टोबरमा कंगना रनावतको धाकड, १३ अक्टोबरमा आरआरआर, १५ अक्टोबर मैदान, ५ नोभेम्बर जर्सी, क्रिसमसमा लालसिंह चड्डा छन् । यो लाइनअपले नेपाली फिल्म क्षेत्रमा पनि प्रभाव पार्नेछ ।
काठमाडौं । नेपालमा एउटा फिल्म निर्माण गर्न औसत एकदेखि डेढ करोड रुपैयाँ खर्च हुन्छ । ती फिल्म हलमा लगाएर नाफा कमाउन कम्तीमा पाँच करोडको व्यापार गर्नुपर्छ, जुन सौभाग्य वर्षमा एकाध फिल्मले मात्रै पाउँछन् । बाँकी फिल्मले लगानी उठाउन सक्दैनन् । त्यसमा पनि केही फिल्मले त हलबाट पोस्टर खर्च समेत उठाउन सक्दैनन् ।
जुन फिल्म सिनेमा हलमा पत्तासाफ हुन्छन्, तिनीहरूको आम्दानीको अन्तिम स्रोत बन्न पुग्छ यूट्यूब । करोडौं लगानीका फिल्म दुई–चार लाख आम्दानीका लागि यूट्यूबमा निःशुल्क देखाउन बाध्य बन्छन् निर्माता । तर, यो ट्रेन्डले नेपाली चलचित्र क्षेत्रलाई भने दीर्घकालसम्म क्षति पुर्याइरहेको छ ।
दर्शक नेपाली यूट्यूबमा निःशुल्क हेर्न बानी परेका छन् । पछि यूट्यूबमा आइहाल्छ, किन हलमा गएर पैसा खेर फाल्ने ? दर्शकको यही मनोभावनाले नेपाली चलचित्रको व्यापार सुकिरहेको छ ।
हलमा नचलेका फिल्म यूट्यूबमा देखाउनुको अर्को प्रयोजन भनेको कम्तीमा आफूहरूले गरेको दुःख दर्शकसम्म पुगोस् भन्ने आकांक्षा पनि हो । यूट्यूबमा राम्रा प्रतिक्रिया आए निर्माता-निर्देशक र कलाकारलाई कम्तीमा मानसिक सन्तोष मिल्छ । कतिपय राम्रा फिल्मले हलमा दर्शक नपाएको तर यूट्यूबमा वाह्वाही पाएको देखिएको छ । यही प्रशंसाको भोकले गर्दा हलमा रिलिज भएको केही समयमै यूट्यूबमा रिलिज गर्ने क्रम बढेको छ । हलमा दर्शक तानेका फिल्महरू पनि यूट्यूबमा आइरहेका छन् ।
दीपकराज गिरी छक्का पञ्जा २ मा अभिनय गर्दै ।
हाम्रो छिमेकमा विश्वकै दोस्रो ठूलो चलचित्र उद्योग बलिउड छ । त्यहाँ वर्षेनि सयौं फिल्म निर्माण हुन्छन् । तर, कुनै पनि फिल्म दर्शकले यसरी यूट्यूबमा निःशुल्क हेर्न पाउँदैनन् । यूट्यूबमा हिन्दी फिल्म खोज्यो भने पुराना–पुराना मात्रै भेटिन्छन् ।
०००
‘छक्का पञ्जा’ नेपालमा सबैभन्दा बढी व्यावसायिक रूपमा सफल फिल्म सिरिज हो । यस सिरिजका तीनैवटा फिल्मलाई यूट्यूबमा राखिसकिएको छ । तीनवटैले एक करोडभन्दा बढी भ्यूज बटुलेका छन्, जसमध्ये पहिलो र दोस्रो सिक्वेललाई १ करोड ८० लाख पटक हेरिएको छ ।
मल्टिप्लेक्स टिकट दरलाई आधार मान्दा छक्का पञ्जाको पहिलो भागलाई ५ लाख जनाले हेरे । तर, यही फिल्म यूट्यूबमा आउँदा १ करोड ८० लाखले हेरेका छन् । ५ लाखले हलमा हेर्दा छक्का पञ्जाले झन्डै १५ करोडको कारोबार गरेको थियो ।
निर्माता दीपकराज गिरीले फिल्मको डिजिटल राइट १ करोड रुपैयाँमा हाइलाइट्स नेपाललाई बेचेका थिए । त्यसैले यसले यूट्यूबबाट कमाएको पैसा दीपकले पाउँदैनन् । यस्तै, उनले ‘छ माया छपक्कै’ को राइट १ करोड १५ लाखमा बेचेका थिए । यो फिल्म पनि यूट्यूबमा आइसकेको छ । अहिलेसम्म करीब ४० लाख भ्यूज पाएको छ ।
धुर्मुस–सुन्तलीले निर्माण गरेको फिल्म ‘सेन्टी भाइरस’ को डिजिटल राइट १ करोड १६ लाखमा बिक्री गरियो । यो फिल्मले हलबाट अपेक्षित रेभेन्यु चाहिं बटुल्न सकेन । यो डिजिटल राइटको मूल्य फिल्मको कुल लगानीको झन्डै ७० प्रतिशत हो । यूट्यूबले स्वेदश मात्र हैन, विदेशमा समेत बजारको खोजी गर्यो । निर्माताले डिजिटल राइटबाटै लगानी सुनिश्चित गर्न थाले ।
हल र यूट्यूबमा फिल्म हेर्ने आँकडाबीचको असमानताले दर्शकीय चाहना र माध्यमगत रुचिलाई दर्शाउँछ । छक्का पञ्जा, कबड्डी, ए मेरो हजुरलगायतका फिल्म सिरिजले प्लेटफर्मको खोजी मात्र गरेनन्, दर्शकलाई यूट्यूबमा प्रतीक्षा गर्न अभ्यस्त तुल्याए । कालान्तरमा, यूट्यूबभन्दा हलको बक्स अफिस ग्राफ ओरालो लाग्न थाल्यो ।
बक्स अफिसभन्दा यूट्यूबमा कमाइ बढ्न थालेपछि निर्माताको ध्यान डिजिटल राइट सुनिश्चित गर्नतर्फ केन्द्रित भयो । राम्रा फिल्म होल्ड गर्न डिजिटल कम्पनीले पनि करोडौं लगानी दाउमा पार्न थाले । दर्शकले तारिफ गरेका केही ठूला फिल्मबाट डिजिटल कम्पनीले करोडौं कमाए । तर, समीक्षा नकारात्मक आउन थालेपछि भने करोडौं लगानी धरापमा पनि परेको स्थिति छ ।
सुहाना थापा र अनमोल केसी ए मेरो हजुर २ मा ।
२०७० सालको मध्य र शुरुआत यूट्यूब प्लेटफर्ममा नेपाली फिल्म खुबै चले । जायजेथा बेचेरै केही सांगीतिक रेकर्ड कम्पनीले यूट्यूब राइट खरीदमा होड गरिरहेका थिए । तर, २०७६ सालपछि परिस्थितिले साथ दिएन । ठूला लगानीका फिल्म नेगेटिभ समीक्षाले फ्लप हुन थालेपछि त्यसको असर यूट्यूबमा पर्यो । अन्ततः केही डिजिटल कम्पनीका सञ्चालकले हात झिके भने केहीले देश छाडेरै जानुपर्यो ।
उँचाइमा पुगेको फिल्मको यूट्यूब आम्दानी र प्लेटफर्म ओरालो लाग्नुमा वर्ड अफ माउथ र पाइरेसी मुख्य कारण रहे । हाइलाइट्स नेपालले झन्डै १ करोड रुपैयाँमा खरीद गरेको छक्का पञ्जा कुनैबेला पाइरेसी भएपछि लगानीकर्ताले घाटा ब्यहोर्नु मात्र परेन, अन्तर्राष्ट्रिय बजारमा समेत धक्का लाग्यो । यस्तो प्रवृत्ति बढेपछि डायस्पोराको बजार मात्र खुम्चिएन, यूट्यूब लगानीमा डिजिटल कम्पनीले चासो देखाउन छाडे ।
फलस्वरुप, निर्माताले आफ्नै कम्पनीको यूट्यूब प्लेटफर्ममा फिल्म रिलिज गर्ने ट्रेन्ड बढ्यो । यूट्यूबमा फिल्म रिलिज नगर्ने भनेर बसेका निर्माता पनि दर्शकको उच्च दबाबपछि रिलिज गर्न बाध्य भए । दीपकराज गिरी एउटा उदाहरण हुन् जसले छक्का पञ्जा सिरिजलाई यूट्यूबमा रिलिज नगर्ने वचन दिएका थिए । तर, व्यापक दबाबपछि उनले यूट्यूबमै फिल्म रिलिज गर्न बाध्य हुनुप¥यो ।
आफ्नै यूट्यूब च्यानल कुनै बेला आफ्नो फिल्म डिजिटल कम्पनीलाई निर्धक्क दिने निर्माता त्यतिबेला सचेत भए जब कम्पनीले सय वर्षसम्मको कपिराइट दाबी गर्न थाले । बेचिएको मूल्यभन्दा बढी रकम कम्पनीले कमाएको देखेपछि निर्माताले आफ्नै यूट्यूब प्लेटफर्म सिर्जना गर्न थाले ।
दीपकराज गिरीले आफ्नो पछिल्लो फिल्म ‘छ माया छपक्कै’ लाई आमा अग्निकुमारी मिडिया च्यानलबाट रिलिज गरे । यो च्यानल केदार घिमिरे उर्फ माग्ने बुढाले चलाउँछन् ।
निर्देशक दीपेन्द्र के. खनालले आफ्नो कम्पनी डीएस डिजिटलबाट बन्ने सबै फिल्मको राइट आफैंमा राखेका छन् । निर्माता सुवास गिरीले पनि सुवास इन्टरटेनमेन्टबाट बन्ने फिल्मको राइट आफ्नै प्लेटफर्ममा रिलिज गर्छन् ।
प्रियंका कार्कीको आफ्नै युट्युव च्यानल । जुन उनले लकडाउनको समयमा संचालनमा ल्याएकी थिइन् ।
गायक राजेशपायल राई, अभिनेता विल्सनविक्रम राईले पनि यूट्यूबलाई नै आम्दानीको स्रोत बनाएका छन् । जसले गर्दा डिजिटल कम्पनीको महत्वमा ह्रास आएको छ । यो प्रवृत्ति पछ्याउने निर्माताको सूची लामो छ ।
पाइरेसी र नकारात्मक समीक्षाको प्रहार प्रारम्भिक दिनमा डिजिटल कम्पनीले स्टारडम र उनीहरूको बजार मागको आधारमा फिल्ममाथि लगानी गर्न थाले । यस्तो दिन पनि आयो कि, ठूला डिजिटल कम्पनी फिल्म निर्माताको रूपमा रूपान्तरित हुन थाले । हाइलाइट्स नेपालले दयाहाङ राई, दीपकराज गिरी, अनमोल केसीलगायतका कहलिएका स्टारमाथि करोडभन्दा बढी खन्याउन थाल्यो ।
तर, पाइरेसी र नेगेटिभ वर्ड अफ माउथको असर लगानीमा सीधा प¥यो । डिजिटल राइट नै नउठ्ने अवस्था आएपछि हाइलाइट्सले लगानी बन्द गर्यो ।
जति यूट्यूब प्लेटफर्म सजिलो छ, उत्तिकै डरलाग्दो पनि । विदेशबाट पाइरेसी हुने फिल्मका अपराधीलाई कानूनी दायरामा ल्याउन प्राविधिक रूपले अप्ठ्यारो हुने भएपछि पाइरेसीलाई नियन्त्रण गर्न कठिन भयो । फलस्वरुप, लगानी टाइटानिक जहाजजस्तै डुब्न थाल्यो ।
यूट्यूबको आम्दानी कति ? यूट्यूबले केही सूचकको आधारमा कन्टेन्ट निर्मातालाई पैसा दिन्छ । यदि १ करोड भ्यूज भएको खण्डमा झन्डै ४० लाख रुपैयाँ निर्माताले पाउने सम्भावना हुन्छ । यसमा पनि केही पूर्वशर्त र आधारहरू छन् ।
अमेरिका, युरोप र अष्ट्रेलियाबाट भिडियो हेर्दा प्राप्त हुने पैसाको आधाभन्दा पनि कम निर्माताले प्राप्त गर्छन् । भन्नुको अर्थ, नेपालमा यूट्यूब रिलिजको बजार स्वदेशमा हैन, विदेशी दर्शकको मनोविज्ञान र मागमा निर्भर गर्छ । कबड्डी, लुट र जात्रालगायत सिरिजका विदेश मागसँगै ती फिल्म हेर्ने दर्शकीय भ्यूज पनि उच्च थियो ।
यूट्यूबले कन्टेन्टको गुणस्तर, समीक्षा, इन्गेजमेन्ट, भ्यूज प्राप्त हुने देश र लम्बाइको आधारमा रेभेन्यु तय गर्छ । यूट्यूब संचालकका अनुसार सबैभन्दा बढी रेभेन्यु नोभेम्बर, डिसेम्बर र जनवरीमा प्राप्त हुन्छ । यो समयमा धेरै पर्व पर्ने र अन्तर्राष्ट्रिय विज्ञापन पनि प्राप्त हुने भएकाले कमाइ राम्रो हुने बताइन्छ । डलरको भाउ घटबढ हुँदा पनि यसको सीधा असर नेपालमा आउने यूट्यूबको कमाइमा पर्छ ।
यूट्यूबमा देखिने विज्ञापन र ती विज्ञापनमा हुने क्लिकको आधारमा रेभेन्यु प्राप्त हुन्छ । हाइलाइट्स नेपालका ओम गुरुङका अनुसार जतिसुकै भ्यूज प्राप्त भए पनि स्थानीय विज्ञापन नभएसम्म व्यावसायिक नाफा हुँदैन । विज्ञापन नै प्रमुख आयस्रोत रहेको गुरुङको भनाइ छ ।
नेपाली फिल्मले पाँच करोडको व्यापार गर्न सक्यो भने त्यसलाई हिट मान्न सकिन्छ । चलचित्र विकास बोर्डको एउटा तथ्यांक अनुसार नेपालको कुल जनसंख्याको २.५ प्रतिशतले मात्र हलमा गएर फिल्म हेर्छन् । तर, अनलाइनमा भने फिल्म कुर्नेको संख्या बढ्दो छ । प्रायः नेटिजन निःशुल्क फिल्म हेर्ने पर्खाइमा बसेका हुन्छन् । यो यूट्यूब प्रवृत्ति नै फिल्मको प्रदर्शनलाई चुनौती बनेको छ ।
ओटीटी प्लेटफर्म थ्रेट पछिल्लो समय निःशुल्क यूट्यूब प्लेटफर्मका लागि सशुल्क प्लेटफर्म ओभर दी टप (ओटीटी) चुनौती बनेको छ । डिसहोम, नेटटिभी, चलचित्र घरलगायतका एपले पैसा तिरेर हेर्न मिल्ने ओटीटी सेवा दिन थालेका छन् । डिसहोमले लकडाउनअघि रोज राणाको एक फिल्म ‘मेरो पैसा खोइ’ लाई ३० लाख रुपैयाँ राइट दिएको थियो । ऋचा शर्मा, खगेन्द्र लामिछानेलगायतका सेलिब्रिटीले पनि ओटीटी प्लेटफर्म लन्च गरेका छन् ।
लकडाउनको कालखण्ड नेटफ्लिक्स, एचबीओ म्याक्स, अमेजन प्राइमसहित नेपाली एप मौलाउने समय बन्यो । नेटफ्लिक्सजस्ता ठूला स्ट्रिमिङ जायन्टले कमाउने मामिलामा अरूलाई उछिने । लकडाउन अवधिभर नेपालका केही डिजिटल कम्पनीले यूट्यूबमा फिल्म रिलिज त गरे तर, अपेक्षित उपलब्धि हासिल गर्न सकेनन् । यसो हुनुमा ओटीटीसामु बढेको दर्शकीय पहुँच र विकास भएको स्कूल अफ थट्सलाई कारण मान्न सकिन्छ ।
निर्माता-निर्देशक भन्छन् : वाध्यता छ निर्माता–निर्देशक पनि युट्युवमा फिल्म हाल्नु आफूहरुको रहर नभएको बताउँछन् । दर्शकहरुको आग्रह र दवावमा परेर फिल्म युट्युवमा हाल्नुपरेको उनीहरुको स्वीकारोक्ति छ ।
निर्माता तथा अभिनेता दिपकराज गिरी र निर्माता–निर्देशक दीपेन्द्र के खनालको भनाइ यस्तो छः
दीपकराज गिरी
मैले मेरा फिल्म युट्युवमा हाल्दिँन भनेर बसेको थिएँ, तर विदेशमा बस्ने दर्शकले चित्त दुखाए । युट्युवमा फिल्म हाल्नुपर्छ भन्ने पक्षमा म छैन । ४० लाख दर्शकले मसँग चित्त दुखाएपछि बाध्यताले फिल्म हाल्नुपरेको हो ।
युट्युवमा हाल्दा बाहिर बस्ने दर्शकलाई राम्रो हुन्छ । अरुले हाल्ने तर, मैले नहाल्ने गर्दा मलाई राम्रो ठानिएन । मलाई आउने गालीमध्ये किन फिल्म हालिएन भन्ने धेरै हुन्थे ।
युट्युवलाई प्लेटफर्मको रुपमा लिएर ९० प्रतिशत निर्माताले फिल्म हाल्छन् । मेरो विचार तत्कालै हाल्नु चाहिँ हुँदैन । डेढ–दुई वर्षपछि मात्र युट्युवमा हाल्दा ठीक हुन्छ । हाल्दिँन भन्दा न्याय हुँदैन, तर केही समयको ग्याप गरेर हाल्दा सान्दर्भिक हुन्छ ।
दीपेन्द्र खनाल युट्युवमा फिल्म हाल्ने कुराको विपक्षमा म छु । अरु प्लेटफर्म नभएर बाध्यताले हाल्नुपरेको हो । बरु ओटीटी प्लेटफर्मलाई युट्युवको विकल्पमा खोज्नुपर्छ ।
युट्युवमा फिल्म हाल्दा दर्शकको मनोविज्ञान सस्तोजस्तो हुन्छजस्तो लाग्छ । हलमा गएर हेर्ने कल्चर विकास हुँदैन । दुई–चार महिनामै फिल्म युट्युवमा आउँछ भनेर हल नजाने प्रवृत्तिको विकास हुन्छ । यदि हाल्ने हो भनै सबैतिर प्रदर्शृन सक्किएपछि मात्रै युट्युवमा हाल्नुपर्छ ।
काठमाडौं । गायक प्रमोद खरेलको उजुरीका आधारमा पक्राउ परेकी विन्ध्यबासिनी म्युजिक प्रालिकी संचालक लीना रेग्मी धरौटीमा रिहा भएकी छिन् । रिहालगत्तै उनले विज्ञप्ती जारी गर्दै एल्बम ‘प्रणय’को प्रतिलिपि अधिकार आफ्नो कम्पनीमा निहित हुने दाबी गरेकी छिन् ।
प्रहरीले उनलाई झन्डै साता लामो हिरासतपछि रिहा गरेको हो । गायक खरेलले दसवर्षदेखिको हिसाब माग्दै प्रहरीमा उजुरी दिएका थिए । वक्तव्यमा लीनाले विन्ध्यवासिनी म्युजिकसँगको सम्पत्तिमा प्रमोद खरेलको कुनै अधिकार नभएको उल्लेख गरेकी छिन् ।
‘गीतकार र गीतसँग सम्बन्धित विवाद भएमा आफै सुल्झाउनेछु भनेर प्रतिलिपि अधिकार धनी मानेर करार ऐन अनुसार सहमति भएको हो’ वक्तव्यमा उनले लेखेकी छिन् ।
विन्ध्यबासिनी म्युजिक प्रालिले आफ्ना ध्वनी अड्कन, उत्पादन गीत संगीत, भिडियो, अडियो र सीडी क्यासेट सबै ५० वर्षसम्म निर्वाधरुपमा विक्री वितरण गर्न पाउने ऐनले अधिकार दिएको समेत विज्ञप्तीमा उल्लेख छ ।
प्रमोद खरेलले उल्टै कम्पनीको अनुमति बिना ट्रयाक प्रयोग गरि विभिन्न ठाउँहरुमा प्रस्तुति दिई लाखौं आर्जन गर्दै हिँडेर गीतकार र संगीतकारको प्रतिलिपि अधिकार हनन गरेको आरोप समेत लगाइएको छ ।
राष्ट्रिय तथा अन्तर्राष्ट्रिय फिल्म सुटिङका लागि पोखरा र आसपासका क्षेत्र फ्रेममा अटाएका छन् । फिल्ममा उक्त क्षेत्रको दृश्य समेटिनुसँगै त्यहाँको पर्यटन प्रवद्र्धनमा सहयोग पुर्याएको छ । त्यस्तै ठाउँमध्ये कास्की अन्नपूर्ण गाउँपालिकास्थित घान्द्रुक गाउँ पनि छायांकनको लागि सम्भावना युक्त रहेको ठाउँ हो ।
सुन्दर घान्द्रुक गाउँमा नेपाल चलचित्र पत्रकार संघ कास्की शाखाको आयोजनामा मंगलबार ‘सिनेमा संवाद एट घान्द्रुक’ कार्यक्रममा ‘सिनेमा टुरिजमः सम्बन्ध र सम्भावना’ र ‘सिनेमा साहित्य : सम्बन्ध र साझेदारी’ बारे छलफल चल्यो ।
छलफलको पहिलो सेसन ‘सिनेमा टुरिजमः सम्बन्ध र सम्भावना’ मा वक्ताको रुपमा निर्देशक/नायक सुदर्शन थापा, पोखरा पर्यटन परिषद्का अध्यक्ष गोपी भट्टराई र पत्रकार वासु मिश्रले सहजीकरण गरे । छलफलको सुरुवातमै सहजकर्ता मिश्रले वक्तातर्फ भावार्थ रुपमा नेपाली भूगोललाई नेपालीले नै चिन्न नसकेको र पर्यटन प्रर्वद्धनमा ठूलो आयतनमा सहयोग नपुगेको बताए ।
कोभिडपछि अत्यन्तै प्रभावित क्षेत्रमध्ये फिल्म र पर्यटन दुबै पर्छन् । अहिलेको पर्यटन क्षेत्रको अवस्था कस्तो छ त ?‘कोरोनाले हरेक क्षेत्रलाई अस्तव्यस्त बनाएको छ । कोरोना साम्य बन्दै गएपछि भने विस्तारै लयमा फर्किँदै छ,’ पोखरा पर्यटन परिषद्का अध्यक्ष गोपी भट्टराईले भने, ‘आन्तरिक पर्यटनलाई कसरी पुर्नस्थापना गर्न सकिन्छ भनेर नेपाल सरकारसँग समन्वय गरिरहेको अवस्था छ ।’
निर्देशक सुदर्शन थापाले कोभिडले सम्पूर्ण क्षेत्रलाई असर गरेको बताउँदै सिनेमा र पर्यटन दुबै क्षेत्र पनि अति प्रभावित भएको सुनाए ।
उनले भने, ‘पर्यटन र सिनेमा एकदमै जोडिएको विषय हो । फिल्म छायांकनका लागि विभिन्न ठाउँमा पुगिन्छ । म पनि १२ वर्ष अघि घान्द्रुक आएको थिएँ ।’ आफू १२ वर्षअघि “मेरो एउटा साथी छ” फिल्म सुटिङका लागि नयाँपुलदेखि खच्चरमा सामान बोकाएर घान्द्रुक आएको स्मरण गर्दै उनले भने,
‘सिनेमाले पर्यटनलाई सहयोग त गर्छ नै । म त्यसबेला र अहिले आउँदा धेरै परिवर्तन भइसकेको छ । केही हदसम्म टेलिफिल्मले निकै चिनायो घान्द्रुकलाई । विकास निर्माणको काम पनि धेरै भइसकेको रहेछ ।’
तनहुँको मानहुँकोटको चर्चा यतिबेला चुलिएको छ । युवापुस्तामाझ चर्चित टिकटक एपमा राखिएको १५ सेकेण्डको भिडिओले उक्त डाँडालाई चर्चित बनायो । त्यसरी नै सिनेमाले कुनै ठाउँलाई पर्यटकीय हबको रुपमा विकसित बनाइसकेको छ । सहजकर्ता मिश्रले मानहुँकोटकै सन्दर्भ उल्लेख गर्दा पर्यटन परिषद्का अध्यक्ष भट्टराई सहमत सुनिए ।
निर्देशक दिनेश डीसी ।
उनले भने, ‘सिनेमाको माध्यमबाट विश्वका धेरै ठाउँहरु पर्यटकीय हब बनेका छन् । सिनेमाबाट पोखराका पेरिफेरि एक्सपोजर भइरहेका छन् । अहिले पर्यटन संस्थाहरु अस्ताएको हो कि भन्ने लाग्छ । त्यसमा हाम्रो समन्वय जरुरी छ ।’
तर सिनेमा र गीतसंगीतले पर्यटकीय क्षेत्रको रुपमा कुनैपनि स्थानलाई चिनाउन सहयोग गरेपनि त्यसको विकास निर्माणमा सहयोग गरि नै हाल्ने भने नहुने निर्देशक थापाको मत छ । उनले भने, ‘मुस्ताङमा सुटिङ गर्दा के यो माया हो ? फिल्म खिच्यौं तर त्यसमा भूगोलको चर्चा भएन ।
पछि त्यहीँ प्रेम गीत खिच्यौं । घाँसादेखि मुस्ताङसम्मको क्षेत्रलाई स्टोरीमा बाँधेर देखाउँदा स्थानीयको प्रतिक्रिया राम्रो पायौं । आन्तरिक पर्यटन आउँदा नै अझ राम्रो बनेको सुनियो । त्यो ठाउँलाई कसरी देखाउने, भेषभूषा, कल्चरलाई देखाउन सक्यौं भने रुचिका साथ दर्शकले हेर्न पाउँछन् ।’
सरकारी निकायको सहयोग भने अपेक्षा नगरिएको भएकाले वास्ता नभएको उनको प्रतिक्रिया छ । त्यसको साटो स्थानीय स्तरबाट पाएको सहयोगले नै हौसला मिलेको उनले बताए । ‘ड्रोन शटका लागि सरकारी अनुमति लिनुपर्छ । त्यसमा प्रक्रिया त्रुटि भयो भने पनि हामी सजाय भोगिरहेका हुन्छौं ।’
अभिनेता एवं निर्माता दीपकराज गिरी ।
पर्यटन सम्बद्ध संस्थाहरुको सहयोग सिनेमा क्षेत्रलाई पर्याप्त नभएको पो हो की ? भन्ने प्रशनमा पर्यटन परिषद्का अध्यक्ष गोपी भट्टराईले भने, ‘माया त गरेकै छौं तर समन्वय नभएको चाहिँ हो । विगतमा भएको कमजोरी भन्दा पनि आगामी दिनमा राम्रो गर्दै जाने हो ।’
उक्त प्रसंगमा भने निर्देशक थापाको मत केही फरक सुनियो । उनी भन्छन्, ‘कुनै ठाउँलाई सिनेमाले पर्यटन क्षेत्रलाई उकास्यो भने पनि धन्यवाद पाएनौं । हामी पनि छायांकन सकेर त्यस ठाउँसँग सम्बन्ध राखेनौं । स्थानीयस्तरमा त धेरथोर होला तर सम्बद्ध निकायसँग छैन ।’
यस्तै, नेपाली साहित्यीक कृति सेतो बाघ, वसन्ती, झोलादेखि लिएर पछिल्लो पुस्ताले अत्यधिक रुचाइएको उपन्यास ‘समर लभ’ माथि फिल्म बनेका छन् । तीनैको कथामा फिल्म निर्माण हुँदा साहित्यसँगको सम्बन्धलाई फिल्मले जोडेको छ ।
दोस्रो तथा अन्तिम सेसन ‘सिनेमा साहित्यः सम्बन्ध र साझेदारी’ मा यस्तै विषयमा छलफल चल्यो । सेसनमा वक्ताहरुमा कलाकार दीपकराज गिरी, लेखक गनेश पौडेल, कवि भूषिता वशिष्ठ र सहजकर्ता दिनेश डिसी थिए ।
वक्ताहरुसँग सहजकर्ता डिसीले साहित्यीक कृतिमाथि बनेका फिल्महरुको समीक्षा अनुभवबारे प्रश्न गरे । कवि भूषिताले सिनेमाको संवादमा मौलिकता हुनुपर्ने बताइन् । कलाकार दीपकराज गिरीले लेख्ने चिज र बोल्ने चिज दुबै फरक भएको बताए । ‘व्यावहारिक जीवनसँग जोडिने संवादले सिनेमामा दर्शकलाई जोड्छ । साहित्यबाट सिनेमा रुपान्तरित हुन्छ जब सहजता हुनै पर्छ ।’
साहित्यमाथि सिनेमा पर्याप्त मात्रामा नबन्नुको कारण सिनेमाकर्मी दर्शकसँग डराएको कलाकार गिरीले सुनाए । उनले भने, ‘लेखिने र बोलिनेमा फरक हुन्छ नै । जटिलता हुने कारणले गर्दा पनि होला नेपालमा साहित्यमाथि सिनेमा बनेन् ।’
लेखक गनेस पौडेलले पञ्चायती व्यवस्थाको ह्याङओभर अझै पनि नेपाली सिनेमाबाट उत्रिन नसकेको बताए । ‘पञ्चायतमा राजा महेन्द्रले नेपाली चलचित्रमा प्रयोग गरिने संवादलाई शुद्धिकरण गर्न र भाषिक एकीकरण गर्नका लागि पात्रले बोल्ने संवाद मौलिक लागेनन् । त्यसको ह्याङओभर अझै बाँकी छ । सिनेमा कला हो भाषा होइन ।’ आफ्नो परम्परा र संस्कृतिलाई घुसाएर हरेक प्रकारका कला सिनेमा देखाउन सकिने उनले बताए ।
बलिउड फिल्मको दृश्यलाई उल्लेख गर्दै कुनै भिलेनले हिरोलाई लखेट्दा होली मनाइरहेको दिन खेदेको देखाइने बताए । त्यसले परम्परा र संस्कृतिलाई पनि फिल्मको संवादसँगै चित्रण गरेको उनको भनाई थियो ।
कलाकार गिरीले भने एकाध बनेका फिल्मलाई गनेर चलचित्र क्षेत्रको इतिहासलाई ५० वर्ष मान्न नहुने बताए । प्रजातन्त्रको पुर्नस्थापना पछि नै नेपाली फिल्मको उत्थान भएको उनको भनाई छ । ३० वर्षको मात्र नेपाली फिल्मले यात्रा पार गरेको उनले बताए ।
निर्देशक सुदर्शन थापा ।
‘उपन्यासमा डायलग थोरै र विवरण धेरै हुन्छन् । फिल्म दृश्य भाषामा बोल्नुपर्ने हुन्छ त्यसमा पनि सीमितता छ । अर्को बजेटले पनि प्रभाव पार्छ,’ कलाकार गिरीले भने, ‘मार्केटले भन्छ, दुई करोड भन्दा माथि लग्यो भने डुब्यौं । एउटा भिलेनले हिरोलाई लखेटेको सिन देखाउनलाई होली सिनका लागि पाँच सय मान्छे जम्मा पार्न बजेटले नथेग्ने हुन्छ ।’ साहित्यसँग सिनेमाको साझेदारीको प्रश्नमा कवि भूषिताले सिनेमाकर्मी साहित्यकारसँग डराउन नहुने बताइन् ।
कार्यक्रमलाई समापन गर्दै चलचित्र पत्रकार संघ कास्कीका अध्यक्ष अरुण गिरीले लामो समयको बन्दाबन्दी पश्चात खुलेको पर्यटन र फिल्म क्षेत्रको प्रचारप्रसारका लागि आफुहरुले उक्त कार्यक्रमको आयोजना गरेको जानकारी गराए ।
उनले भने,“हाम्रो टिमलाई कोरोना पछि पनि केही न केही कार्यक्रम गरौं भन्ने लागेको थियो । साहित्य, पर्यटन र सिनेमा तीनै क्षेत्रमा काम भइरहेका थिएनन् । फेरि पछिल्लो समय फिल्मभित्र साहित्य र पर्यटन दुवै अटाउन थालेका छन् । हामीले तीनै क्षेत्रलाई एउटै मञ्चमा प्रस्तुत गर्ने निर्णय गर्यौं । जसमा पर्यटन व्यवस्थापन समिति घान्द्रुकका अध्यक्ष किसम गुरुङ र लामा अमृत फाउन्डेसनका अध्यक्ष अमृत गुरुङको साथ मिल्यो । अनि मात्र आँट गर्यौं ।”
फिल्म संवाद कार्यक्रमलाई गण्डकी प्रदेश सरकार, अन्नपूर्ण गाउँपालिका, नेपाल टुरिजम बोर्ड, इसेवा, कुटी रिर्सोट एण्ड स्पा, अन्नपूर्ण संरक्षण क्षेत्र आयोजना, पर्यटन व्यवस्थापन समिति घान्द्रुक, परिचय एडभरटाइजिङ, गुरुङ चलचित्र शिरसुबा, अमृत लामा फाउन्डेसन घान्द्रुक, मूल आमा समूह घान्द्रुक र डाँडा गाउँ युवा परिवार घान्द्रुकले सहयोग गरेको थियो ।
काठमाडौं । नेपाली ट्रान्सजेन्डर मोडल अन्जली लामाले एक हलिउड फिल्ममा अभिनय गर्ने भएकी छिन् । डेडलाइन हलिउड म्यागजिनका अनुसार अन्जलीसँगै उक्त फिल्ममा बलिउड अभिनेत्री ज्याकलिन फर्नान्डिजले समेत टीमअप गर्ने भएकी छिन् ।
महिलाको विषयवस्तुमाथि फिल्म बन्न लागेको हो । टाइटल चाहिँ सार्वजनिक गरिएको छैन । सार्वजनिक यात्राको क्रममा महिलाले भोग्नुपर्ने अनुभव र चुनौतिलाई चित्रण गरिने फिल्मलाई लिना यादवले निर्देशन गर्ने भएकी छिन् ।
गैरनाफामुलक कम्पनी वी डु इट टुगेदर र लर्भोलिनो इन्टरटेनमेन्टले मिलेर फिल्म बनाउन लागेका हुन्। विभिन्न क्षेत्रका महिलाहरु प्रोजेक्टमा आबद्ध छन् । जसमा कारा डेलेभिङ्ने, इभा लोंगोरिया, मार्गेरिटा बाइ लगायत आबद्ध हुने जनाइएको छ ।
निर्माता कम्पनी वु डु इट टुगेदरका प्रमुख चिलारा टिलेटीका अनुसार फिल्मले मिडिया र फिल्ममा महिलाको छवि वस्तुगतबाट विषयगत बनेको कुरालाई चित्रण गर्छ । विभिन्न देशका ६ जना महिला निर्देशकले फिल्ममा धारणा सेयर गर्ने भएका छन् ।
भारत र अमेरिकामा फिल्म छायांकन हुने भएको छ । सबैजना कलाकार महिला हुने भएका छन् । नेपाली ट्रान्सजेन्डर मोडल अन्जली लामा नेपाल र भारतीय र्याम्पमा चर्चित नाम हुन् ।
काठमाडौं । नेपाल उद्योग वाणिज्य महासंघको कार्यकारिणी समिति विस्तार भएको छ । विस्तारसँगै मनोरञ्जन फोरमले पनि पूर्णता प्राप्त गरेको छ ।
कार्यकारिणी समिति सदस्य आकाश अधिकारीको सभापतित्वमा गठित चलचित्र तथा मनोरञ्जन पनि विस्तार भएको छ । फोरमको सहसभापतिहरुमा चलचित्र संघका अध्यक्ष मधुसुधन प्रधान र नेपाल संगीत उद्योग संघका अध्यक्ष सूर्यबहादुर मगर चुनिएका छन् ।
फोरमका सदस्यमा नेपाल विज्ञापन संघका निवर्तमान अध्यक्ष रविन्द्रकुमार रिजाल शशी, नेपाल कलाकार संघका कोषाध्यक्ष सुनिल कट्वाल, चलचित्र निर्देशक मदन घिमिरे, चलचित्र निर्माता संघका सचिव छविराज ओझा, संगीत तथा चलचित्र उत्पादक समाजका अध्यक्ष निर्मल ढकाल, प्रस्तोता समाजका निवर्तमान अध्यक्ष तुलसी पराजुली छन् ।
आमन्त्रित सदस्यहरुमा निर्देशक समाज अध्यक्ष रक्षा सिंह राणा, गायिका इन्दिरा जोशी, अभिनेत्री नीता ढुंगाना, अभिनेता केदार घिमिरे, नृत्यकार दिनेश पाख्रिन, लोकगायिका मञ्जु पौडेल, निर्देशक प्रदीप श्रेष्ठ, पत्रकार सामप्यि तिमल्सिना, कलाकार सुशान्त श्रेष्ठ, धर्मेन्द्र आचार्यं, पवित्रा आचार्य, सम्पादक शिव पुरी छन् ।
फोरमका सल्लाहकारमा नीर शाह, गीतकार भोला रिजाल, प्राध्यापक एवं चलचित्र निर्देशक राजेन्द्र सलभ, कमला श्रेष्ठ र प्रेमा राज्यलक्ष्मी सिंह छन् ।
काठमाडौं । लकडाउनपछि बलिउडमा दुई ठूला फिल्मको भीडन्त निश्चित भएको छ । आगामी इदमा सलमान खानको राधे र जोन अब्राहमको ‘सत्यमेव जयते २’ प्रदर्शन हुने भएका हुन् ।
लकडाउन खुलेपछिको यो पहिलो ठूलो भीडन्त मानिएको छ । गतसाता सलमानले कोरोनाले थलिएको फिल्म व्यापारलाई उकास्न फिल्म रिलिज गर्न लागेको घोषणा गरेका थिए ।
बक्सअफिस भीडन्तको सम्भावित हिसाबले दुबैको प्रदर्शनलाई महत्वपूर्ण मानिएको छ । भारतीय गणतन्त्रको दिवसमा जोन अब्राहमले आगामी सन् २०२१ को इदमा फिल्म लगाउने घोषणा गरेका हुन् ।
काठमाडौं । लोकप्रिय भारतीय कमेडी टेलिभिजन कार्यक्रम ‘द कपिल शर्मा सो’ केही समयको लागि बन्द हुने भएको छ । भारतीय संचारमाध्यमका अनुसार फेब्रुअरी मध्यदेखि सोले ब्रेक लिन लागेको हो ।
दुईवर्षदेखि संचालन हुँदै आएको सो केही समयको लागि बन्द हुने टाइम्स अफ इन्डियाले जनाएको छ । कोरोनाभाइरस महामारीको कारण लाइभ दर्शकको संख्यामा कमी आएपछि यस्तो निर्णय गरिएको जनाइएको छ ।
फिल्म पनि रिलिज नभएको अवस्थालाई दृष्टिगत गरेर यस्तो निर्णय लिइएको संचालक कपिल शर्माले जनाएका छन् । साथै कपिलकी श्रीमती गिन्नी पनि गर्भवती छिन् । ब्रेकको समयमा कपिलले पत्नीसँग समय बिताउने भएका छन् ।
नयाँ सिजन कहिलेदेखि सुरु हुन्छ भन्ने बारे कपिलले केही खुलाएका छैनन् । तर, उनले केही समयपहिले नेटफिल्क्ससँग सहकार्य गर्न लागेको जनाएका थिए ।
दीपकराज गिरी
दीपेन्द्र खनाल
