Category: कलाप्रेस

काठमाडौं । कोभिड-१९ महामारीले प्रभावित भएर ऋणको सावाँब्याज तिर्न नसकेका चलचित्र क्षेत्रका ऋणीलाई पनि सरकारले भुक्तानीको अवधि थप गरेको छ । शुक्रबार सार्वजनिक गरिएको चालु आर्थिक वर्षको मौद्रिक नीतिमा उल्लेख भएको यो व्यवस्थाले केही हदसम्म भएपनि फिल्म क्षेत्रलाई राहत मिलेको छ ।

कोभिड-१९ बाट अति प्रभावित चलचित्र क्षेत्रमा प्रवाह भएको कर्जा बैंक तथा वित्तीय संस्थाले मूल्याङ्कन गरी २०७८ पुस मसान्तसम्ममा पुनरसंरचना तथा पुनरतालिकीकरण गर्न सक्ने व्यवस्था मिलाइने जनाइएको छ । यस्तै, मनोरञ्जन व्यवसायका ऋणीले २०७८ पुससम्म भुक्तान गर्नुपर्ने साँवा तथा ब्याज दायित्वको समयावधि एक वर्षसम्म थप गरी कम्तिमा चार किस्तामा भुक्तानी गर्न सक्ने व्यवस्था गरिने जनाइएको छ ।

यसअघि सरकारले असार मसान्तसम्म ऋण तिर्नुपर्ने जनाएको थियो । तर, मौद्रिक नीतिमा भाखा एकवर्षलाई थप गरिएपछि यसले फिल्म निर्माता र हल संचालकलाई ठूलो राहत मिलेको छ । महामारीको दोस्रो लहरको कारण अहिले मुलुकभरका ११० वटा भन्दा बढी फिल्म हल बन्द छन् भने कतिपयले ऋण लिएर पनि व्यवसाय थालेका थिए ।

काठमाडौं । नेपाली टेलिभिजनमा तन्नेरी पुस्ताले निकै रुचाएको एड्भेन्चर रियालिटी सो ‘रोडिज’को चौंथो संस्करण आरम्भ भएको छ । शुक्रबार राजधानीको एक पाँचतारे होटलमा चौंथो सिजनको घोषणा गरियो ।

फिल्म निर्देशकको रुपमा कहलिएका सिमोस सुनुवारले निर्देशकीय जिम्मेवारी लिएपछि रोडिजको आउँदो सिजनलाई लिएर निकै आशा राखिएको छ । सिमोसले आफ्नो प्राविधिक कला र प्रतिभालाई प्रस्तुत गर्ने तयारी गरेका छन् ।

अबको दुई सातामा बीपी राजमार्गदेखि छायांकन सुरु हुने सोजलाई नेपालका विभिन्न स्थानमा सुट गरिनेछ । यसपटक पनि आशिष राना लाउरे, दिया मास्के, अनुपविक्रम शाही र अघिल्लो रोडिजका विजेता समन श्रेष्ठ निर्णायक छन् । आयोजित प्रेसमिटमा चारैजना जज् आफ्नो रोडिज अवतारमा देखिए ।

होस्टको रुपमा रेमनदास श्रेष्ठ प्रस्तुत हुनेछन् । रोडिज इन्डियाको फ्रेमवर्कभित्रै रहेर कार्यक्रम संचालन गरिने निर्देशक सुनुवारले बताए । यसपटक पनि रोडिज इन्डियाका विजेतालाई अतिथिको रुपमा ल्याउने तयारी भएको छ ।

काठमाडौं । नेपाली एड्भेन्चर रियालिटी सो हिमालय रोडिजको चौंथो सिजन सुरु भएको छ । शुक्रबार राजधानीमा आयोजित प्रेसमिटमा सोको औपचारिक घोषणा गरियो ।

कोरोनाभाइरस महामारीको कारण ढिला सुरु भएको चौंथो सिजनको डिजिटल अडिसन पनि सुरु भएको छ । कोभिड-१९ संक्रमणलाई ध्यानमा राख्दै यसपटक डिजिटल अडिसन आयोजना गरिएको हो ।

चौंथो सिजनको नारा ‘सिजन अफ सर्भाइभल’ राखिएको छ । एन्ड्रोइड अपरेटिङ सिस्टम रहेको मोबाइलबाट एप डाउनलोड गरी अडिसन फर्म भर्न सकिने भएको छ ।

हिमालय टेलिभिजनका कार्यकारी निर्देशक श्याम कँडेलले महामारीबाट बच्दै सोजको कामलाई अगाडि बढाइने बताए । यसपटकको सिजनलाई फिल्म निर्देशक समेत रहेका सिमोस सुनुवारले निर्देशन गर्ने भएका छन् । यसअघिका तीन सिजनलाई अमनप्रताप अधिकारीले निर्देशन गरेका थिए ।

नयाँ सिजन युवापुस्ताको संघर्षमा केन्द्रित रहने निर्देशक सुनुवारले बताए । नयाँ पात्र र नयाँ विषयवस्तुमार्फत नेपाली युवाको संघर्षलाई चित्रण गर्ने उनले जनाए ।

यो सिजनको निर्णायकमा अनुपविक्रम शाही, दिया मास्के, आशिष राना लाउरे र समन श्रेष्ठ रहेनछन् । होस्टमा चाहिँ रेमनदास श्रेष्ठ रहने भएका छन् ।

भारतको भायकम-१८ को लाइसेन्स लिएर हिमालय टेलिभिजनले कार्यक्रम उत्पादन र प्रसारण गर्दै आएको छ । डिजिटल अडिसनको समय दुई साता राखिएको छ र त्यसपछि फिजिकल अडिसन बोलाउने तयारी छ । असोजको पहिलो साताबाट कार्यक्रम प्रसारण हुने जनाइएको छ । ।

लस-एन्जल्स । गायिका ब्रिट्नी स्पियर्सका बुवा जेमी छोरीको अभिभावकत्व (कन्जरभेटर)बाट हट्न सहमत भएका छन् । स्पियर्सका न्यायिक वकिलले जेमीलाई उक्त भूमिकाबाट हटाउन दायर गरेको एउटा याचिकाको दुई सातापछि उनले हट्ने निर्णय गरेका हुन् ।

तर, कुन समयदेखि अभिभावकत्वबाट हट्नेछन् भन्ने कुराको यकिन भएको छैन । हलिउड रिपोर्टर म्यागजिनले समाचारको पुष्टि गरेको छ । १३ वर्षदेखि स्पियर्सको कन्जरभेटर बनेका बुबा पछिल्लो दुई महीनामा उत्पन्न विवादकै कारण हट्न सहमत भएका हुन् ।

आफ्ना बुवाले अभिभावकत्व ग्रहण गरेर आफ्नो स्वतन्त्रता र खुशि लुटेको भन्दै मिडियामा अन्तर्वार्ता दिएपछि स्पियर्स चर्चामा थिइन् । जुन २३ को अदालती सुनुवाईमा स्पियर्सले निकै भावुक बयान दिएकी थिइन् जहाँ आफ्ना पिताले विहे, करियर लगायतका काममा अवरोध गरेको बताएकी थिइन् । कन्जरभेटरको नाममा आफूलाई शोषण गरेको र आफू खुशि नभएको गायिकाले बताएकी थिइन् ।

काठमाडौं । कोभिड-१९ संक्रमण रोकथामका लागि मास्कको प्रयोगबारे जनचेतना जगाउन स्वास्थ्य मन्त्रालयले भर्चुअलरुपमा लाइभ कन्सर्टको आयोजना गरेको छ ।

अहिले लाइभ भैरहेको कन्सर्टमा नेपालका चर्चित कलाकारहरुले गायकी प्रस्तुत गरिरहेका छन् । नेपाली फिल्म, संगीत र खेलकुदका हस्तीले मास्कको उचित प्रयोगका लागि समेत आह्वान गरिरहेका छन् ।

स्वास्थ्य मन्त्रालयले अहिले मास्क सप्ताह मनाइरहेको छ । ‘म जिम्मेवार नेपाल’ नारासहित भर्चुअल म्युजिक कन्सर्टको आयोजना गरिएको हो ।

‘दाइजोको निहुँमा
गाली खाँदै
मरेतुल्य भइसकेँ म…

सहनु नै मेरो भाग्य हो कि
हे दैव मलाई
मलाई सहने शक्ति देऊ’

प्रस्तुत शब्दहरु गायिका टीका प्रसाईद्वारा स्वरबद्ध गीत ‘दाइजो’मा समावेश छन् । हारितालिका तीज छेकोमा रिलिज गरिएको यो गीतले दाइजो कूप्रथाको पीडालाई प्रस्तुत गर्छ ।

राजु सिंहद्वारा संगीतबद्ध गीतमा आनन्द बज्राचार्यका शब्द र प्रसाइका शब्द समावेश छन् । यसअघि युट्युवमा हिट तथा रोमान्टिक गीत पस्किएकी गायिका प्रसाईले यसपटक भने नारी पीडाको यथार्थलाई उजागर गर्ने गीत पस्किएकी छिन् ।

‘तीज पर्व संयोग मात्र हो । दाइजोको समस्या समाजमा सँधै भरि हुने गरेको छ र यसलार्ई चित्रण गरेकी हुँ’ प्रसाईले नेपाल प्रेसलाई भनिन्, ‘तीज भनेकै महिलाहरुको पर्व भएकाले यसले पनि महिलाकै समस्यालाई प्रस्तुत गरेको छ ।’

हेर्नूस् गीत :

काठमाडौं । हिन्दु नारीहरुको महान पर्व तीज नजिकिए संगै बजारमा तीज गीत निकाल्ने लहर बढ्दै गएको छ । कोभिड-१९ ले फिल्म क्षेत्र ठप्प भएपछि कलाकारहरु म्युजिक भिडियोतर्फ आकर्षित भएका छन् ।

पछिल्लो समय कलाकर एबम निर्देशक दिपाश्री निरौला पनि म्युजिक भिडियोतर्फ देखिन थालेकी छिन् । दिपाश्री निरौला निर्देशित र अभिनित तीज गीत ‘दिदी-बहिनी’ को म्युजिक भिडियो सार्वजनिक भएको छ।

श्रीकृष्ण बम मल्लको शब्द र संगीत रहेको ‘दिदी-बहिनी’मा दिपाश्री निरौला, निर्मल शर्मा, गजीत विष्ट, सुमन गिरी र रजनी केसी लगायतका कलाकारले अभिनय गरेका छन् ।

शान्तीश्री परियार, लक्ष्मी मल्ल र श्रीकृष्ण बम मल्लको स्वर रहेको गीतमा योगेश काजीको एरेन्ज रहेको छ ।

काठमाडौं । युट्युव ट्रेन्डिङको शीर्षस्थानमा पुगेको गीत ‘कुरा बुझ्न पर्च’ अहिले चर्चामा छ । त्यो भन्दा अर्को चर्चा यी गीतमा सँगै फिचर्ड भएका दुई नायिका स्वस्तिमा खड्का र आँचल शर्मालाई लिएर भैरहेको छ ।

प्रकाश सपुतद्वारा संगीतबद्ध गीतमा आँचल र स्वस्तिमाले जोडी बाँधेका छन् । बिहीबार राजधानीमा आयोजना गरिएको गीतको सक्सेस-सेलिव्रेसन प्रेसमिटमा आँचल र स्वस्तिमा दुबै खुलेर प्रस्तुत भए ।

गीतमा पुरुषसँग जोडी बाँध्नुभन्दा स्वस्तिमासँग जोडी बाँध्दा आफूलाई रमाइलो लागेको र राम्रो प्रतिक्रिया मिलेको आँचलले बताइन् । ‘केटाभन्दा स्वस्तिमासँग जोडी बाँध्दा रमाइलो भयो’ आँचलले भनिन्, ‘मनमाया र फूलमायाको यो जोडीलाई दर्शकले पनि रुचाउनुभएको छ ।’

साथै, लिरिक्सको कारण आफूले गीतमा फिचर्ड हुने सोच बनाएको आँचलले बताइन् ।

प्रायः म्युजिक भिडिओमा केटा र केटीलाई जोडी बाँध्ने गरिएपनि गायक तथा संगीतकार सपुतले यसमा चाहिँ केटी–केटीको जोडी बाँधेका छन् । प्रेसमिटमा दुई विवाहित नायिका समेत रहेका आँचल र स्वस्तिमाले आफूहरुको वैवाहिक जीवन रमाइलोसँग बितिरहेको बताए ।

मुम्बई । तीन बलिउड डीभा कट्रिना क्याफ, आलिया भाट र प्रियंका चोपडा जोनसलाई अब एउटै फिल्ममा देख्न पाइने भएको छ । यी तीन एक्ट्रेसले सामाजिक संजालमार्फत ‘जि ले जरा’ फिल्ममा देखिन लागेको जनाएका छन् ।

प्रियंकाले आफू यो फिल्म गर्न आतुर भएको बताएकी छिन् । ‘यो फिल्मको सेटमा उभिन म निकै आतुर छु । मेरो हृदयलाई यसले निकै खुशि तुल्याएको छ’ प्रियंकाले ट्वीटरमा लेखेकी छिन् ।

बन्न लागेको यो फिल्मले मित्रतालाई सेलिव्रेसन गर्ने प्रियंकाले जनाएकी छिन् । ‘खासमा यो सिस्टरहुड र मित्रताको कथा पनि हो’ उनले लखेकी छिन् । कट्रिनाले आफू प्रियंका र आलियासँग देखिन पाउनुलाई रमाइलो क्षण हुने बताएकी छिन् ।

कट्रिना लेख्छिन्, ‘एउटा महान पटकथा, महान निर्देशक, एउटा सडक यात्रा र सीमित आकाश ।’ एक्सेल इन्टरटेनमेन्टको ब्यानरमा फरहान अख्तरले फिल्मलाई निर्देशन गर्ने भएका छन् । आगामी वर्षा याममा फिल्मांकन सुरु हुने भएको छ ।

‘क्वान्टिको’ फेम्ड प्रियंकाले गतवर्ष नेटफिल्क्सको फिल्म ‘ह्वाइट टाइगर’मा अभिनय गरेकी थिइन् । सिटाडेल सिरिज र म्याट्रिक्स चार फिल्ममा पनि उनले अभिनय गर्नेछिन् ।

काठमाडौं । सत्तारुढ दल नेकपा माओवादी केन्द्रका अध्यक्ष पुष्पकमल दाहाल प्रचण्डले कोभिड-१९ महामारी प्रभावित फिल्म क्षेत्रलाई राहत दिलाउन सरकारले विशेष प्याकेज ल्याउने बताएका छन् ।

आज बिहान खुमलटारमा आफूलाई भेट्न आएका फिल्मकर्मी नवल खड्कासहितको डेलिगेसन टोलीलाई प्रचण्डले सो जवाफ दिएका हुन् । ‘सम्बन्धित मन्त्रालयका मन्त्रीलाई भनेर फिल्म क्षेत्रलाई राहत दिलाउन मैले प्रयत्न गर्नेछु’ दाहालको भनाई उध्दृत गर्दै निर्देशक खड्काले नेपाल प्रेसलाई भने ।

दाहालसामु खड्का लगायतका टोलीले फिल्म क्षेत्रलार्य अनुदान र कर छूटसहितको सहयोग प्याकेज ल्याउन माग गरेका थिए । ‘हामीले विशेष प्याकेज माग गरेका हौं नत्र फिल्म क्षेत्र धराशायी हुने चिन्ता हामीले व्यक्त ग¥यौं’ खड्काले भने, ‘साथै, एमसीसी र भ्रष्टाचार न्यूनीकरणको कुरा पनि प्रस्ततु गरेका छौं ।’

जवाफमा दाहालले आफ्नो तर्फबाट वातावरण बनाउने वचन दिएका थिए । टोलीमा दाङका जनसंस्कृतिकर्मी केएल पीडित पनि थिए । आधा घण्टा भएको भेटमा पार्टी स्थायी कमिटी सदस्य कृष्णबहादुर महरा पनि सहभागि थिए ।

न्यूयोर्क । मिस नेपाल अमेरिका २०२१ प्रतियोगिताको मुख्य प्रशिक्षकमा पूर्वमिस नेपाल माल्भिका सुब्बा चयन भएकी छिन् । आगामी सेप्टेम्बर २३ देखि २५ सम्म न्यूयोर्कमा प्रतिस्पर्धा हुँदैछ ।

मिस नेपाल अमेरिकाको यो संस्करणसँगै आयोजक संस्थाले पनि स्थापनाको १० औं वर्षगाँठ सेलिवे्रसन गर्दैछ । प्रतियोगितामा भाग लिन इच्छुकले सेप्टेम्बर १, २०२१ सम्म आवेदन दिन सक्ने भएका छन् ।

नेपाली र अमेरिकी सांस्कृतिक सम्बन्धलाई बलियो तुल्याउन उद्यमी अमितप्रताप शाहले पेजेन्ट गर्दै आइरहेका छन् । यो प्रतिस्पर्धामार्फत अहिलेसम्म नेपाली र अमेरिकी महिलाले शिक्षा र सशक्तीकरणका लागि ८० हजार डलर बराबरको सहयोग प्राप्त गरेका छन् ।

सन् २०२१ मा न्यूयोर्कबाट सुरु भएको मिस नेपाल अमेरिकाको पहिलो संस्करण सुजिता बस्नेतले जितेकी थिइन् ।

काठमाडौं । मुलुकमा अहिलेसम्मकै बिग बजेटमा निर्माण हुने दावी गरिएको फिल्म ‘एक्स-नाइन’ अहिले चर्चामा छ । छायांकन कहिलेदेखि सुरु हुने टुंगो नलागेपनि स्टारकास्टको कारण यसले चर्चा पाइरहेको छ ।

‘लप्पन छप्पन’ फेम्ड निर्देशक मुकुन्द भट्टको यो प्रोजेक्ट अनमोल केसी, सौगात मल्लदेखि विदेशी कलाकारको सम्भावित लाइनअपले चर्चामा आएको हो । अनमोल र सौगातसँगै फिल्ममा बुधबार पुष्प खड्का पनि जोडिएका छन् ।

यसैसाता निर्माताले अनुपविक्रम शाहीसँग पनि अनुबन्धित गर्ने जनाइएको छ । यही फिल्मका लागि अनमोल महंगो मूल्यमा अनुबन्धित भएको निर्माता बताउँछन् । अनमोललाई ७५ लाख रुपैयाँमा अफर गरिएपनि उनको पारिश्रमिकबारे खुलाइएको छैन ।

सोनु सुद र सुुनिल सेठ्ठीलाई पनि अफर

बलिउड अभिनेताद्धय सोनु सुद र सुनिल सेठ्ठीलाई पनि ‘एक्स-नाइन’को एक प्रमुख भूमिकामा प्रस्ताव गरिएको छ । निर्माताहरु अहिले यी दुई भारतीय अभिनेतासँग सम्पर्कमा छन् ।

स्रोतका अनुसार आगामी अक्टोबरमा यीमध्ये कुनै एकजना अभिनेतासँग सम्झौता हुनसक्ने योजनाअनुसार छलफल चलिरहेको छ । यसअघि सुनिलसँग मात्र छलफल चलेपनि निर्माताले सोनुलाई पनि अफर गरेको स्रोतले नेपाल प्रेसलाई बतायो ।

यी दुई अभिनेतालाई हेरेरै स्क्रिप्ट तयार गरिएको र कुनै एकजनालाई जसरी भएपनि अनुबन्धित गराउने तयारीमा निर्माता छन् । क्यानडा, युरोप र नेपालमा छायांकन गर्ने निर्माण कम्पनीको तयारी छ ।

काठमाडौं । यसवर्षको गाइजात्रा भर्चुअल माध्यममार्फत आयोजना गरिने भएको छ । कोरोनाभाइरस महामारीको कारण भदौ १ देखि ७ गतेसम्म एपीवान टिभीबाट गाइजात्रा प्रसारण हुने भएको हो ।

यसअघि प्रज्ञा प्रतिष्ठानमा आयोजना हुने गाइजात्रा यसपटक भने भर्चुअलरुपमा हुने भएपछि हाँस्य कलाकारले सोही अनुसार तयारी थालेका छन् । कमेडियन मनोज गजुरेलले आफ्नो गर्ने कमेडी चरित्र र तिनको हुलिया सार्वजनिक गरेका छन् ।

यसपटक गजुरेलले बेलायती प्रधानमन्त्री बोरिस जोन्सन, रुसी राष्ट्रपति भ्लादमिर पुटिन, पूर्वशिक्षा मन्त्री कृष्णगोपाल श्रेष्ठ र प्रधानमन्त्री शेरबहादुर देउवाको चरित्र चित्रण गर्दैछन् ।

उनले जोन्सन र देउवाको भिडिओ कल तथा दुई मुलुकबीचको राजनीतिलाई तुलना गरेर व्यंग्य गर्दैछन् । अर्कोतर्फ धमलाको जमला व्यंग्यमार्फत पुटिन र देउवाको खोप संवाद प्रस्तुत गर्दैछन् । कार्यकालमा चर्चामा आएका पूर्वशिक्षामन्त्री श्रेष्ठबारे पनि उनले व्यंग्य गर्नेछन् ।

यसपटक पहिलो पुस्ताका हाँस्य व्यंग्य कलाकारहरु शैलेन्द्र सिंखडा, चट्याङ मास्टर, राजा राजेन्द्र, हिमेश पन्त लगायतले समेत कमेडी पस्कने भएका छन् । प्यारोडी गीतमार्फत पनि व्यंग्य हुने जनाइएको छ । पशुपति शर्मा, यमन श्रेष्ठ र किरण केसीले व्यंग्य गीत प्रस्तुत गर्नेछन् ।

पछिल्लो पुस्तामा चल्तीका कलाकार रियाशा दाहाल र भटभटे माइलो समेत चित्रित हुने जनाइएको छ । ‘सबै वर्ग र पुस्ताका कलाकारलाई समेटेर हामीले गाइजात्रा प्रस्तुत गर्न लागेका हौं’ कलाकार गजुरेलले भने ।

काठमाडौं । हाँस्य कलाकार दीपकराज गिरी र दीपाश्री निरौलाको समूहले राजधानीको शंखमुलमा मल्टिप्लेक्स फिल्म हल निर्माण सुरु गरेका छन् । ‘छक्कापञ्जा’ मल्टिप्लेक्स नाम राखिएको हल आगामी बैशाख १ गतेदेखि संचालनमा ल्याउने लक्ष्य राखिएको छ ।

१० करोड लागतमा निर्माण हुने बताइएको हलमा दीपकसहितका फिल्म निर्माताहरुको लगानी छ । भाइरस महामारीको कारण जारी निषेधाज्ञा बीचमा पनि अहिले हल निर्माण धमाधम भैरहेको छ ।

‘फिल्म गतिविधि नै ठप्प भैरहेको बेलामा हल निर्माणले सुखद सन्देश जाने आशा लिएका छौं’ नेपाल प्रेससँग गिरीले भने, ‘निर्माणका लागि यो राम्रो अवसर पनि हो ।’ दुई अडिटोरियम हुने उक्त हलमा थ्रीडी र एट्मस ध्वनीसहितको अत्याधुनिक प्रविधि जडान हुने जनाइएको छ ।

आफ्नो चर्चित सिरिज ‘छक्कापञ्जा’ बक्सअफिमा हिट भएदेखि नै दीपक-दीपाले मल्टिप्लेक्स निर्माणको सोच बनाएका थिए । तर, भाइरस महामारीले योजनामा ढिलाइ भएको थियो । तर, निषेधाज्ञा सुरु भएसँगै निर्माणले तीव्रता लिएको हो ।

काठमाडौं । कोरोनाभाइरस महामारीले थलिएको नेपाली फिल्म क्षेत्रलाई राहत प्रदान गर्न चलचित्र विकास बोर्डले सरकारसँग ५० करोड रुपैयाँ मागेको छ ।

प्रदर्शन हुन बाँकी रहेका फिल्म, बन्द रहेका सिनेमा घर र प्राविधिकलाई राहत दिन उक्त रकम माग गरिएको बोर्ड सदस्य प्रकाश भट्टराईले बताए
। सरकारले यो रकम उपलब्ध गराए फिल्म क्षेत्रलाई राहत पुग्ने उनले जनाए ।

प्रदर्शन रोकिएका फिल्मलाई १५ करोड, फिल्म हललाई ३० करोड र श्रमजीवि फिल्मकर्मीको लागि भन्दै बोर्डले ५ करोड रुपैयाँ राहत मागेको हो । बोर्डका अनुसार ३४ फिल्म प्रदर्शनका लागि तयारी अवस्थामा छन् ।

बोर्डका अनुसार ११८ हल महामारीको कारण बन्द छन् । बजेटमा फिल्मबारे उल्लेख भएपनि त्यो पर्याप्त नभएको भन्दै बोर्डले सरकारसँग राहतको माग गरेको हो ।

काठमाडौं महानगरपालिकाले कर नतिर्ने ५२ कम्पनी तथा व्यक्तिको कालोसूची सार्वजनिक गरेको छ जसमा दुईवटा नाम चलेका फिल्म हलहरु पनि समावेश छन् ।

महानगरले जय नेपाल र गोपीकृष्ण फिल्म हलले अहिलेसम्म कर नबुझाएको उल्लेख गरेपनि कहिलेदेखि कर बुझाएनन् भन्ने कुरा खुलाएको छैन । कोरोना महामारीको कारण जयनेपाल हल सँधैको लागि बन्द भएको छ भने, गोपीकृष्ण हललाई भत्काइएको छ ।

कर तिर्न पटक-पटक ताकेता गरिएपनि अबको ३० दिनभित्र करको विवरण नबुझाए कानूनी कार्वाही गर्ने महानगरले जनाएको छ । राजस्व ऐनको दफा १२ बमोजिम तोकिएको कर नतिर्नेको सेवा बन्द गर्ने उल्लेख छ ।

गोपीकृष्ण र जयनेपाल अघिल्लो वर्ष नै बन्द भएका हुन् । लिज सम्झौता टुंगिएपछि जयनेपाल सँधैको लागि बन्द भएको छ भने गोपिकृष्ण पुननिर्माणको लागि भन्दै बन्द गरिएको छ ।

लस-एन्जल्स । अमेरिकामा कोभिड-१९ विरुद्धको खोप लगाउनेको संख्या कूल जनसंख्याको ५० प्रतिशत पनि पुगेको छैन । अपेक्षा गरिएअनुसार खोप लगाउने दर वृद्धि नहुँदा राष्ट्रपति बाइडेनलाई दबाब परिरहेको छ ।

यस्तोमा, खोप लगााउने कुरालाई लिएर हलिउड पनि विभाजित हुन थालेको छ । अभिनेत्री जेनिफर एनिस्टनले खोप नलगाउनेलाई आफूले साथी नबनाउने र सम्बन्ध नराख्ने कुरा सार्वजनिकरुपमै घोषणा गरेकी छिन् ।

इन-स्टाइल म्यागजिनलाई अन्तर्वार्ता दिँदै एनिस्टनले आफूले सहि निर्णय गरेको र अडानबाट पछि नहट्ने बताएकी छिन् । ‘अहिले पनि खोप लगाउन नचाहेको संख्या ठूलो छ’ एनिस्टन भन्छिन्, ‘किनभने उनीहरु खोपविरोधी कुरा गर्दै हिँड्छन् र उनीहरुलाई तथ्यमा विश्वास छैन ।’

खोप नलगाएकै कारण आफूले केही साथीहरुलाई गुमाएको एनिस्टनको भनाई छ । एनिस्टनको पछिल्लो अडानलाई लिएर ३७.७ मिलियन फलोअर्स भएको उनको इस्टाग्राममा बहस भैरहेको छ ।

न्यूयोर्क । उत्तर अमेरिकी बक्क्सअफिसमा हलिउड सुपरहिरोइन फिल्म ‘ब्ल्याक विडो’ले अर्को बिगबजेट फिल्म ‘एफ नाइन’को ग्रस कमाइलाई उछिनेको छ ।

स्कारलेट जोहान्सन स्टारर फिल्मले १७४ मिलियन डलर कमाएको छ भने भिन डिजेल स्टारर ‘एफ-नाइन’ले १७१ मिलियन डलर कमाइ गरेको छ । यो सँगै ब्ल्याक विडो सन् २०२१ मा सर्वाधिक ग्रस कमाउने हलिउड फिल्म बनेको छ ।

केट सट्ल्यान्ड निर्देशित ‘ब्ल्याक विडो’ले सिनेमा घरमा पहिलो सप्ताहन्त ८०.३ मिलियन डलर कमाएको थियो जुन महामारीपछिकै सर्वाधिक हलिउड कमाइ हो ।

‘ब्ल्याक विडो’ फिल्म हल र डिज्नको स्ट्रिमिङ प्लेटफर्ममा एकसाथ रिलिज भएको थियो । आगामी डिसेम्बर मध्यमा रिलिज तयारीमा रहेको ‘स्पाइडर म्यान : नो वे होम’ले सम्भवतः ब्ल्याक विडोलाई चुनौति दिने अनुमान छ ।

काठमाडौं । अभिनेता सौगात मल्ल फिल्म ‘एक्स-नाइन’मा अनुबन्धित भएका छन् । मुुकुन्द भट्टले निर्देशन गर्ने यो फिल्ममा आइतबार मात्र अनमोल केसी पनि ज्वाइन भएका थिए ।

यसअघि भट्टसँग फिल्म लप्पन छप्पनमा सहकार्य गरेका सौगातले यो फिल्ममा अभिनय गर्ने चरित्रबारे खुलाइएको छैन । जनवरीदेखि सुरु हुने फिल्मको सुटिङ क्यानडा, युरोप र नेपालमा हुने जनाइएको छ ।

फिल्ममा किङ योगी र मुकुन्द भट्टको पटकथा हुनेछ । राजीव तामाङ, वीरेन कुँवर, सोनु खत्री र सुबोध भट्ट निर्माता हुन् । दिनेश भट्ट कार्यकारी निर्माता हुन् । अन्य कलाकारसँग अनुबन्धनको तयारीमा निर्माताहरु जुटेका छन् । फिल्मको सिक्वेलको रुपमा अहिले कलाकारहरु लिइएको जनाइएको छ ।

न्यूयोर्क । मिस नेपाल नर्थ अमेरिका-२०२१ को उपाधि गरिमा ज्ञवालीले जितेकी छन् । न्यूयोर्कमा आज बिहान भएको ग्रान्ड फिनालीमा १८ जना प्रतिस्पर्धीलाई उछिन्दै उनले क्राउन पहिरिएकी हुन् ।

फस्टरनर अप याङ्गछेन लामा र सेकेन्ड रनरअप शुभेच्छा निरौला घोषित भएका छन् । अमेरिका र क्यानडामा बसोबास गर्ने नेपाली युवतीहरुले प्रतिस्पर्धामा भाग लिएका थिए ।

ग्रान्ड फिनालीमा पूर्वमिस नेपालहरु मलिना जोशी, श्रृंखला खतिवडा, सदीक्षा श्रेष्ठ समेत उपस्थित थिए । सुरजसिंह ठकुरी, बासु फुलारा, मलिना जोशी, सवु गदाल कार्की निर्णायक थिए । नेपाली महिलाहरुलाई सशक्त तुल्याउन कार्यक्रमको उद्देश्य रहेको आयोजक संस्थाका संस्थापक सभापति शैलेश श्रेष्ठले बताए ।

कसले कुन विधामा जिते ?

मिस ट्यालेन्ट : रोशिका गजमेर
मिस कम्युनिटी आउटरिच : एलिना राई
मिस पपुलर : नग्मा गुरुङ्ग
मिस स्माइल : निमिका थापा
मिस बेस्ट ड्रेस : सेलिषा नेपाल
मिस पर्सोनालिटी : गरिमा ज्ञवाली
मिस डिसीप्लेन : सुप्रिता फुयाल
मिस क्याटवाक : दिना केसी
मिस पर्सोनालिटी : गरिमा ज्ञवाली
मिस राईजिगं स्टार : अलिशा गुरुङ्ग
मिस स्किन : चाँदनी लामा
मिस बेस्ट हेयर : मुना नेपाल
उत्कृष्ट शरीर : उर्जा केसी
उत्कृष्ट हेरिटेज : जेनी रावत

काठमाडौं । फिल्म तथा संगीत क्षेत्रका सेलेव्रिटीलाई कोभिड-१९ विरुद्धको खोप लगाउन सुरु गरिएको छ । आइतबार पाटन खोप केन्द्रमा सेलेव्रिटीले भेरोसेल खोपको पहिलो मात्रा लगाए ।

चलचित्र विकास बोर्डको समन्वयमा आयोजना गरिएको खोप लगाउन कलाकार, प्राविधिक, निर्माता, निर्देशकदेखि जनजाति फिल्मकर्मी खोप केन्द्र पुगेका थिए ।

धिरेन शाक्य, पल शाह, दुर्गेश थापासहित दर्जनौं कलाकारले खोप लगाए । कतिपय फिल्मकर्मीले चाहिँ यसअघि नै खोप लगाइसकेका छन् । बोर्ड अध्यक्ष दयाराम दाहालका अनुसार तीन हजारभन्दा बढी फिल्मकर्मीलाई खोप लगाउने कार्यक्रम छ ।

खोप लगाउन सकिए फिल्म गतिविधिलाई पनि लयमा फर्काउन सकिने आशामा विकास बोर्ड छ । अहिले फिल्म गतिविधि पूर्णरुपमा ठप्प छ ।
तस्विरहरु : उमेश कार्की

काठमाडौं । मुकुन्द भट्टले निर्माण गर्न लागेको नयाँ फिल्म ‘एक्स-नाइन’मा अनमोल केसी औपचारिकरुपमा अनुबन्धित भएका छन् ।

राजधानीको मेरियट होटलमा शनिबार अभिनेता केसी र फिल्म निर्माता कम्पनी गोल्डेन हिल्स पिक्चर्सबीच लिखित सम्झौता भएको छ । जनवरीदेखि सुरु हुने फिल्मको सुटिङ क्यानडा, युरोप र नेपालमा हुने जनाइएको छ ।

किङ योगी र मुकुन्द भट्टको पटकथा हुनेछ । राजीव तामाङ, वीरेन कुँवर, सोनु खत्री र सुबोध भट्ट निर्माता हुन् । दिनेश भट्ट कार्यकारी निर्माता हुन् । अन्य कलाकारसँग अनुबन्धनको तयारीमा निर्माताहरु जुटेका छन् ।

अनमोल महंगो पारिश्रमिकमा फिल्ममा अनुबन्धित भएको जनाइएको छ ।

काठमाडौं । तीनहजार भन्दा बढी फिल्मकर्मीलाई आजदेखि कोरोनाभाइरस विरुद्धको भेरोसेल खोप लगाइने भएको छ ।

चलचित्र विकास बोर्डका अनुसार ललितपुर पाटनस्थित खोप केन्द्रमा फ्रन्टलाइनमा खटिने फिल्मकर्मीलाई खोप लगाउन लागिएको हो ।

बिहान ९ बजे कलाकारहरुलाई, ११ बजे निर्मातालाई, १ बजे प्राविधिकलाई, २ बजे नृत्य र द्वन्द्व कलाकारलाई, ४ बजे निर्देशक र संगीतकर्मीलाई र बेलुका जनजाति फिल्मकर्मीलाई समय निर्धारण गरिएको छ ।

चलचित्र विकास बोर्ड अध्यक्ष दयाराम दाहालले संस्थाको सदस्यता परिचत्रपय लिएर खोप लगाउन पाइने व्यवस्था मिलाइएको जानकारी दिए । ‘फ्रन्टलाइनमा खटिने फिल्मकर्मीलाई खोप लगाउन सकिए कामलाई पनि लयमा ल्याउन सकिन्छ’ दाहालले भने ।

कोरोना महामारीको कारण अहिले फिल्म क्षेत्र ठप्प छ भने फिल्मकर्मीले खोप लगाउन पाउनुपर्ने माग गरेका छन् ।