Category: कलाप्रेस

काठमाडौं । सत्तारुढ दल नेकपा माओवादी केन्द्र अध्यक्ष पुष्पकमल दाहाल प्रचण्डले कोरोना महामारीको कारण प्रभावित नेपाली फिल्म क्षेत्रलाई सरकारले सघाउने आश्वासन दिएका छन् । बुधबार आफूसँग भेट्न आएका फिल्मकर्मीसँग कुरा गर्दै दाहालले फिल्म क्षेत्रको समस्याबारे आफू जानकार रहेको बताए ।

महामारीको कारण थलिएको नेपाली फिल्मलाई उकास्नेबारे आफूले प्रधानमन्त्री शेरबहादुर देउवा र अर्थमन्त्री जनाद्र्धन शर्मालाई भेटेर जानकारी गराउने आश्वासन समेत दाहालले दिएका थिए । प्रचण्डलाई भेट्न चलचित्र विकास बोर्ड अध्यक्ष दयाराम दाहालसहित चलचित्र संघ, निर्माता संघ, प्राविधिक संघ लगायतका अध्यक्ष उनको निवास खुमलटारमा पुगेका थिए ।

लामो समयदेखि बन्द भएकाले नेपाली फिल्मलाई चलायमान बनाउन सरकारी सहयोग आवश्यक रहेको र बजेटमा प्रस्तुत व्यवस्था अपर्याप्त रहेको भन्दै आफूहरु प्रचण्डलाई भेट्न पुगेको चलचित्र संघका महासचिव अशोक शर्माले बताए । साथै, देशव्यापी हल खुलाउन समेत फिल्मकर्मीले प्रचण्डसँग माग गरेका थिए । ‘हाम्रो मागमा प्रचण्डजी सकारात्मक हुनुभयो’ भेटपछि चलचित्र विकास बोर्ड अध्यक्ष दयाराम दाहालले नेपाल प्रेसलाई भने ।

मागहरु समेटर चलचित्रकर्मीले मागपत्र प्रस्तुत गरेका थिए । सोही मागपत्र लिएर केही दिनमा संचारमन्त्रालय समेत प्रधानमन्त्री शेरबहादुर देउवा, सत्तारुढ जनता समाजवादी संघीय परिषद अध्यक्ष बाबुराम भट्टराई र राष्ट्रिय अध्यक्ष उपेन्द्र यादवलाई पनि भेट्ने कार्यक्रम रहेको छ ।

फिल्म क्षेत्रको समस्या र मागको विषयमा सरकारलाई दवाब दिने उद्देश्यले फिल्मकमो टोलीले बुधबारबाट राजनीतिक भेटघाट थालेको हो ।

काठमाडौं । नागरिक, राजनीतिक दल र सेलेव्रिटीमाझ अमेरिकी अनुदान सम्झौता एमसीसी चर्चामा छ । सम्झौतालाई लिएर कसैको पनि एकमत छैन । अभिनेता राजेश हमालले एमसीसीबारे नागरिकलाई स्पष्ट पार्न अमेरिका र नेपाल सरकारलाई आग्रह गरेका छन् । अन्य सेलेव्रिटीले पनि एमसीसीलाई लिएर आ-आफ्ना मत व्यक्त गरिरहेका छन् ।

यस्तोमा, अभिनेत्री करिश्मा मानन्धरले पनि आफ्नो धारणा राखेकी छिन् । करिश्मको बुझाइमा एमसीसीलाई लिएर दलहरुले जनतालाई स्पष्ट पार्न सक्नुपर्छ । दलहरुको विगतको निर्णयका परिणामले गर्दा एमसीसी विवादमा मुछिएको करिश्माको बुझाइ छ ।

फेसबुकमा करिश्माको टिप्प्णी छ : घरमा हात्ती ल्याएर घरका मान्छे बाहिर बस्नुप¥यो भने हात्ती ल्याउनु ठीक होला ? अगुवा गर्नेहरुको विगतको निर्णयका परिणामहरुले गर्दा नै जनतामा यो अविश्वास प्रस्ताव उब्जाएको होला नि त । जनताकै विरोधमा गएर कसरी अगुवाइ गर्ने ?’

काठमाडौं । फिल्म क्षेत्र चलायमान बनाउन तीन प्रतीक्षित नेपाली फिल्मलाई रिलिजको तयारी थालिएको छ । चलचित्र संघ र चलचित्र निर्माता संघले भोलि बोलाएको बैठकमा चपली हाइट ३, म यस्तो गीत गाउँछु २ र हिजो आजका कुरालाई रिलिज गर्नेबारे टुंगो लगाइने भएको छ ।

निर्माताले मागे बमोजिम लगानीको न्यूनतम सुनिश्चितता (एमजी) र हल तथा निर्माताले प्राप्त गर्ने हिस्साबारे बाँडफाँट भए भोलि नै यी दुई फिल्म दशैं तथा तिहारमा रिलिज हुनेछन् । प्रदर्शकको छाता संस्था चलचित्र संघका महासचिव अशोक शर्माले नेपाल प्रेसलाई भने, ‘सेयर र एमजीको कुरा टुंगियो भने भोलि नै यी तीन फिल्म रिलिजको टुंगो लाग्छ । फिल्म क्षेत्रलाई चलायमान बनाउन पनि रिलिजको जरुरी हुन्छ ।’

शर्माका अनुसार पहिलो साता निर्मातालाई ५५ प्रतिशत र दोस्रो साता ५० प्रतिशत सेयर दिनेबारे चलेको छलफल सकारात्मक रहेको र यसबारे निर्णय हुन बाँकी छ । ‘एमजीको लागि पनि कुरा सकारात्मक छ’ शर्माले जानकारी दिए ।

अहिलेसम्म हलिउडको बहुप्रतीक्षित फिल्म ‘फास्ट एन्ड फ्युरियस’को नवौं श्रृंखलामात्र रिलिजको निश्चित भएको छ । भिन डिजेल स्टारर यो फिल्मले मल्टिप्लेक्समा दर्शक तान्न सक्ने अपेक्षा गरिएको छ ।

असोज पहिलो साता मुलुकभरका हल खोल्ने तयारी

चलचित्र विकास बोर्डले काठमाडौं उपत्यका बाहेक प्रमुख फिल्म बजार रहेको जिल्लाका प्रमुख जिल्ला अधिकारीहरुसँग हल खुलाउनेबारे छलफल गरेको छ । बोर्ड अध्यक्ष दयाराम दाहालले १० भन्दा बढी जिल्लाका सीडीओसँग संवाद गरेका छन् ।

जिल्लापिच्छे निषेधाज्ञाको समयावधि फरक-फरक भएकाले मुलुकभरका फिल्म हल खुल्न कम्तीमा एक साता लाग्ने भएको हो । ‘सबै सीडीओ सा’बहरुले निषेधाज्ञा अवधि सकिने वित्तिकै हल खुलाउने गरी आदेश जारी हुने बताउनुभएको छ’ अध्यक्ष दाहालले भने ।

अहिले काठमाडौं उपत्यकास्थित फिल्म हलहरुलाई ५० प्रतिशत अकुपेन्सीमा खुलाउन अनुमति दिइएपनि देशव्यापी खुल्नुपर्ने र शतप्रतिशत अकुपेन्सी कायम हुनुपर्ने माग गर्दै चलचित्र संघले हल खोलेको छैन । मुलुकभरका हल खुलाउन संचार मन्त्रालयले पनि कोभिड संकट व्यवस्थापन केन्द्र (सीसीएमसी)लाई पत्र लेख्ने भएको छ । संचार सचिव बैकुण्ठ अर्यालले देशव्यापी हल खुलाउन सीसीएमसीमार्फत पहल गर्ने आश्वासन दिएका छन् ।

मुम्बई । अन्ततः कंगना रनावत नै सीताको भूमिकामा फिल्ममा देखिने भएकी छिन् । निर्देशक अलौकिक देशाइले सामाजिक संजालमार्फत ‘सीता एक अवतार’को शीर्ष भूमिकामा कंगना देखिने जनाएका छन् ।

पद्मश्रीसहित चारपटक राष्ट्रिय अवार्ड जितेका निर्देशकले सामाजिक संजालमार्फत कंगनासँगको तस्बिर पनि सेयर गरेका छन् । पछिल्लोपटक करिना कपुर सीता बन्ने र उनले यस भूमिकाको लागि १२ करोड भारु मागेको चर्चामा थियो ।

यो घोषणासँगै ती अघिल्ला हल्लामा विश्राम लागेको छ ।

निर्देशक अलौकिक लेख्छन् : सीताको सुरुआत भो । ब्रम्हाण्डले तिनै व्यक्तिलाई मद्दत गर्छन् जो विश्वासहित समर्पित हुन्छन् । एक पवित्र चरित्रको सपना जुन अहिलेसम्म खोजिएको थिएन, अब यो वास्तविकतामा परिणत हुँदैछ । यो पवित्र यात्राले हामीले पौराणिक यात्रालाई हेर्ने दृष्टिकोणलाई बदल्नेछ ।’

एसएसएस स्टुडियोकी निर्मात्री सलोनी शर्माले यो फिल्मलाई महिला हुनुको नाताले यो ठूलो फिल्ममा कंगनाको आगमनले आफू निकै उत्साहित भएको बताएकी छिन् । कंगना एक वास्तविक भारतीय महिला र सारकी प्रतीक हुन् : नीडर, चुनौतिपूर्ण र साहसी ।

यसअघि करिना सीता बन्ने खबर बाहिरिएपछि सामाजिक संजालमा उनलाई लिएर व्यापक विरोध भएको थियो । करिनाले सीताको भूमिका गरेमा यो हिन्दू धर्म र माता सीताको अपमान हुने बताएका थिए । त्यतिबेला करिनालाई बहिष्कारको माग समेत गरिएको थियो ।

न्यूयोर्क । विश्व फेसनको सबैभन्दा ठूलो मेला ‘मेट गाला २०२१’ पुनः फर्किएको छ । गएराति न्यूयोर्कमा भएको यो भव्य कार्यक्रममा विश्व सेलेव्रिटीहरु उपस्थित रहे ।

कोरोना महामारीले अघिल्लो वर्ष रोकिएको कार्यक्रम यसपटक सीमित उपस्थितीमा भएको हो । मेट गालालाई विश्व फेसनको अस्कर अवार्ड मानिन्छ । यसपटक स्टाइलिस पहिरनमा सेलेव्रिटीले रेडकार्पेट नापे ।

प्रत्येक वर्ष आयोजना हुने मेट गालाको यो संस्करणबाट संकलित रकम मेट्रोपोलिटन आर्टस् म्युजियममा खर्च गरिने भएको छ । यसपटकको मेट गालाको थिम अमेरिकन फेसन राखिएको छ ।

अमेरिकी पहिचान र फेसनलाई पुनःपरिभाषित गर्ने उद्देश्य यसपटक राखिएको छ । ‘मलाई लाग्छ, अमेरिकी फेसन पुनर्जन्म हुने चरणमा छ’ फेसन डिजाइनर एन्ड्रिउ बोल्टनले भने ।

यसपटक दुई भागमा मेट गाला प्रस्तुत गरियो । पहिलो : इन अमेरिका : अ लेक्जिकोन अफ फेसन र दोस्रो : इन अमेरिका : एन एन्थोलोजी अफ फेसन । प्रबल गुरुङ लगायका डिजाइनरले पहिलो भागमा फेसन प्रस्तुति दिएका छन् ।

यसपटक तिमोथी क्यालामेट, बिल्ली एलिस, अमान्डा गोरम्यान, नाओमी ओसाकाले कार्यक्रम होस्ट गरेका थिए ।

काठमाडौं । बारम्बार विवादमा आइरहने र्‍यापर समिर घिसिङ उर्फ भिटेनले सामाजिक सञ्जालमार्फत सरकारमाथि आक्रोश पोखेका छन् । आफ्नो गीत रिलिज गर्नुपूर्व लिरिक्स पठाउन र व्याख्यासमेत गर्न सरकारबाट आदेश आएको भन्दै उनी आक्रोशित बनेका हुन् ।

इन्स्टाग्राम स्टोरीमा भिटेनले अश्लिल गालीगालौजसहितको स्टोरी पोष्ट गरेका छन् ।

‘उनीहरुको स्वीकृतिपछि मात्रै मैले आफ्नो गीत सार्वजनिक गर्न सक्छु रे । मेरो निजी अधिकार कहाँ गयो ?’ उनले प्रश्न गरेका छन्, ‘तँलाई सुन्नै मन छ भने गीतको शब्द होइन, भावना बुझ् ।’

आफ्नो म्युजिक भिडिओमा गाडी जलाउँदै गरेको सिन गर्नुपरेको र त्यो काम गर्नुअगाडि सरकारलाई गीत सुनाएर अनुमति लिन भनिएको घिसिङको भनाइ छ । कुन गीतका लागि यस्तो आदेश आएको हो भन्ने उनले खुलाएका छैनन् । बरु उनले सरकारकाे आदेश नमान्ने बताएका छन् । 

‘गर्दिने हो सुटिङ, हेरौं कसले रोक्न सक्छ,’ उनले लेखेका छन् ।

काठमाडौं । चर्चित लोकगायिका विष्णु माझीको निजी जीवनबारे राष्ट्रिय मानवअधिकार आयोगले चासो दिएको छ । उनको पछिल्लो गीत ‘चरी जेलैमा’ सुपरहिट भएसँगै उनको अवस्थाबारे सामाजिक सञ्जालमा विभिन्न चर्चा-परिचर्चा हुँदै आएका छन् ।

आयोगका अधिकारीहरुले आइतबार माझीको माइती जिल्ला स्याङ्जास्थित जिल्ला प्रशासन र प्रहरी कार्यालयहरुलाई टेलिफोन गरी उनको अवस्था बुझ्न मौखिक सोधपुछ गरेका थिए । आयोगका प्रवक्ता टीकाराम पोखरेलले नेपाल प्रेससँग कुरा गर्दै सञ्चारमाध्यममा माझीको विषयमा आएका विवरणहरुबारे यथार्थ पत्ता लगाउन प्रशासनलाई भनिएको बताए ।

आयोगको मौखिक निर्देशनपछि जिल्ला प्रहरी कार्यालय स्याङ्जाका प्रमुख एवं एसपी होविन्द्र बोगटीले आइतबार गायिका माझीको माइतीघरमा स्थाानीय प्रहरी टोली पठाएका थिए । तर, घरमा कोही पनि नभेटिएको स्थानीय प्रहरीले रिपोर्टिङ गरेका छन् ।

एसपी बोगटीले भने, ‘हामीले अनौपचारिकरुपमा माइतीमा बुझ्न खोजेका थियौ । तर, घरमा कोही पनि रहेनछ । बुवाआमा बितिसक्नुभएको रहेछ । अरु कुराहरु थाहा हुन सकेन । उहाँका बुबाआमा बितिसक्नुभएको रैछ । त्यसैले धेरै कुरा थाहा हुन सकेन’ एसपी बोगटीले भने ।

यो पनि पढ्नूस : #चरी जेलैमा : परिवन्द होइन राजीखुशीले !

आइतबार नै आयोगले पोखरास्थित क्षेत्रीय कार्यालयलाई पनि बुझ्न आग्रह गरेको थियो । क्षेत्रीय कार्यालयले पनि स्याङ्जा प्रहरीलाई यसबारे बुझ्न भनेको थियो । आयोगका प्रवक्ता पोखरेलले स्वयम् पीडितले उजुरी नगरेसम्म अनुसन्धान र कार्वाहीको प्रक्रिया भने अघि बढाउन नमिल्ने बताए ।

‘स्वयम् व्यक्तिले म पीडित छु भनेर उजुरी दिएमा हामी अनुसन्धान अघि बढाउन सक्छौं’ प्रवक्ता पोखरेलले भने । यसअघि २०७५ सालमा पनि विष्णु माझीको अवस्थाबारे जिल्ला प्रशासनले चासो दिएको थियो । त्यसबेला स्याङ्जाकै प्रमुख जिल्ला अधिकारीले विष्णु र उनका श्रीमानलार्य कार्यालयमा नै डाकेर सोधपुछ गरेका थिए ।

प्रशासनले बोलाएपछि उनीहरु २०७५ साल पुस २ गते त्यहाँ हाजिर भएका थिए । सोधपुछका क्रममा विष्णुले आफूमाथि श्रीमानबाट कुनै किसिमको गलत व्यवहार नभएको बताएकी थिइन् । थुप्रै लोकप्रिय गीतहरुमा स्वर दिएकी गायिका माझी सार्वजनिक जीवनमा कहिल्यै नदेखिएकाले उनलाई श्रीमानले बन्धक बनाएर राखेको चर्चा पहिल्यैदेखि चल्दै आएको छ । यद्यपि, उनीहरुलाई नजिकबाट चिन्ने कलाकारहरु भने श्रीमान सुन्दरमणि अधिकारीसँग विष्णु माझीको राम्रो समझदारी रहेको बताउने गर्छन् ।

अहिले विष्णु माझीले गाएको चरी जेलैमा गीत निकै चर्चामा छ, जसलाई उनकै श्रीमान सुन्दरमणिले लेखेका र संगीत दिएका हुन् ।

काठमाडौं । विष्णु माझीको स्वरमा रहेको ‘चरी जेलैमा’ गीतले युट्यूवमा अर्को ठूलो कीर्तिमान कायम गरेको छ । एक महिनाभित्रै २ करोड भ्यूज पार गर्दै गीतले नयाँ कीर्तिमान राखेको हो ।

गत १८ अगष्टमा युट्यूवमा अपलोड गरिएको गीतले यसअघि छोटो समयमा १ करोड भ्यूजको रेकर्ड समेत राखेको थियो । १३ दिनमै १ करोड पुगेको भ्यूज थप १७ दिनमा दोब्बर भएको छ । यससँगै छोटो समय (२६ दिन) मा दुई करोड भ्यूज पाउने गीतको रकर्ड पनि यसले राखेको छ ।

यसअघि यो रेकर्ड अस्मिता अधिकारीले गाएको गीत ‘टाढा भएपनि’ को नाममा थियो । उक्त गीतले ३८ दिनमा दुई करोड भ्यूज क्रस गरेकोमा चरी जेलैमाले त्यसलाई ब्रेक गरेको हो । यस वर्षको तीजमा गाउँदेखि शहरसम्म यो गीतले एकछत्र आधिपत्य जमाएको थियो । अहिले पनि गीतले उत्तिकै आक्रमक भ्यूज बटुलिरहेको छ ।

यसअघि विष्णु माझीले गाएको ‘सालको पात’ बोलको गीत उनको सर्वाधिक गीतका रुपमा रहेको थियो । उक्त गीतले अहिलेसम्म ७ करोडभन्दा बढी भ्यूज बटुलेको छ । चरी जेलैमाको अहिलको गति हेर्दा सालको पातको रेकर्ड ब्रेक गर्ने सम्भावना देखिएको छ ।

‘चरी जेलैमा’ लाई विष्णुका श्रीमान सुन्दरमणि अधिकारीले लेखेका र संगीतवद्ध गरेका हुन् । यो गीत हिट भएसँगै विष्णुमाझीको सार्वजनिक जीवन पनि चर्चाको विषय बनिरहेको छ ।

काठमाडौं । एक महिना सिकाइ अनि दुई हप्तामा फिल्म । क्यामेरा र फिल्ममेकिङको ‘फ’सँगपनि परिचित नभएका किशोरीले छोटो समयमै फिल्म बनाएर देखाउलान् भन्ने पत्याउन गाह्रै पर्छ ।

तर, कृपालय प्रडक्सनले प्लान इन्टरनेसनलको ‘गल्र्स गेट इक्वेल’अभियानअन्तर्गत रहेर गरेको फिल्म मेकिङ कार्यशालामा भाग लिएका १० किशोरीले एक महिना सिकेकै भरमा उम्दा फिल्मबनाएर देखाए ।

एक महिना सिकेका उनीहरूले बाँकी दुई हप्तामा तयार गरेका फिल्म नै देखाए । नेपाल चलचित्र विकास बोर्डको हलमा उनीहरूले बनाएका फिल्म हेर्दा सिकारु हैन अनुभवी फिल्म मेकिङको झलक देख्न सकिन्थ्यो ।

शुक्रबार १० जना किशोरीले एक महिने फिल्म मेकिङ कार्यशाला अन्तर्गत बनाएका ५ फिल्मको प्रदर्शन गरिएको थियो । ‘वुमन मेक फिल्मस्’ शीर्षकमा गरिएको यो तालिमलाई अस्कर इन्टरनेसनल कलेज र चलचित्र विकास बोर्डले पनि सघाएका थिए । ५ फिल्मकोे लम्बाई औसतमा ५ मिनेट थियो ।

नेपाली फिल्ममा महिलाको चरित्र चित्रण अस्वभाविक र यथास्थितिवादी रहेको टिप्पणी हुने गरेको छ । महिला सम्बन्धी थुप्रै ‘स्टेरियोटाइप’ चिर्न र फिल्म निर्माणमा महिलाको संख्या बढाउने उद्देश्यले कार्यशाला गरेको आयोजक कृपालयको धारणा थियो ।

कृपालयकी प्रोजेक्ट हेड आश्मा पोखरेलले कार्यशालाका लागि देशभरबाट आवेदन मागिएको र यसरी आएका आवेदनबाट १० जनालाई छनोट गरी कार्यशालामा सहभागी गराइएको जानकारी गराइन् ।

सुरुमा कार्यशाला भौतिक रुपमै काठमाडौ र चित्लाङ गरी दुई ठाउँमा गर्ने योजना रहे पनि महामारीको दोस्रो लहर आएसँगै कार्यशाला भर्चुअल रुपमा सम्पन्न गरिएको थियो ।
कार्यशालाका प्रोजेक्ट को–अर्डिनेटर नवविजय श्रेष्ठले सैद्धान्तिक र प्रायोगिक दुवै विधिको प्रयोग गरी किशोरीलाई फिल्म मेकिङमा दीक्षित गर्ने प्रयास गरेको जनाए

‘एक महिनालामो तालिममा १८ देखि २४ वर्षसम्मका किशोरीले नेपाली समाजको बनावटमाथि रचनात्मक प्रश्न गर्ने शिल्प सिके । यी पाँच चलचित्रको प्रदर्शनले यो महिला चलचित्रकर्मीलाई क्षमता देखाउन राम्रो मञ्च प्रदान गर्नुका साथै आत्मविश्वासी बनाएको महसुस गरेका छौँ,’ नवविजयले भने ।

प्लान नेपालकी अभियान विशेषज्ञ सृजना बज्राचार्यले छोटो समयमै किशोरीहरूले उत्कृष्ट फिल्म बनाउन सफल भएकोमा खुशी लागेको बताइन् । ‘यति छोटो तालिमको भरमा यति राम्रा बन्लान् भन्ने सोचेको थिइँन तर उनीहरूले उत्कृष्ट फिल्म बनाएका छन्,’ उनको भनाइ थियो ।

एक महिने कार्यशालमा आश्रुती त्रिपाठी, प्राधान्या योञ्जन, एन्जला चौधरी, पुष्पा जोशी, पूर्णिमा महर्जन, अम्बिका भण्डारी, अस्मिता लावती, श्रीषा कुँवर, मीरा खड्का र ज्याती बेलबासे सहभागी थिए । १० जनाले ५ समूहमा विभक्त भई बनाएका फिल्ममा उनीहरूले ५ फरक महिलाको जिन्दगीलाई फिल्ममा समावेश गरेका थिए । यसरी बनेका सबै फिल्म डकुमेन्ट्री हुन् ।

यौनकर्मीको कथामा फिल्म बनाएकी पुष्पा जोशीले कार्यशालाले आफूलाई फिल्म बनाउने कला मात्र नसिकाएर महिलाका मुद्दालाई लेन्सको आँखाले कसरी हेर्न सकिन्छ भन्ने पनि ज्ञान दिएको बताइन् ।

उनले भनिन्, ‘यो तालिमले मलाई चलचित्र निर्माण सम्बन्धी प्रविधिक ज्ञान त दियो नै साथै महिलालाई बुझ्ने र यसलाई प्रविधिका माध्यमबाट अभिव्यक्त गर्ने कौशल सिकाएको छ । भविष्यमा म अझै धेरै डकुमेन्ट्री चलचित्र बनाउने छु फिल्ममा पितृसत्ताको वर्चस्वलाई थोरै भएपनि चुनौती दिने प्रयास गर्नेछु ।’

१ महिने कार्यशालामा उनीहरूलाई राजन कठेत, रजिला श्रेष्ठ, बबिन दुलाललगायतले प्रशिक्षण दिएकाथिए । किशोरीलाई प्रशिक्षण दिएका राजन कठेतले कार्यशालाले फिल्म बनाउने सीपसँगै किशोरीमा समाजसँग घुलमिल हुने गुणको पनिविकास गराएको धारणा राखे ।

‘यति छोटो समयावधिमा यी दशचलचित्रकर्मीले डकुमेन्ट्री फिल्म बनाउन चाहिने आधारभुत ज्ञान त पाए नै, यसैका साथै चलचित्रकर्मीले अपरिचित व्यक्तिमाझ आफूलाई कसरी पस्किने र उनीहरूको जीवनबारे चलचित्र निर्माण गर्ने ज्ञान पनि हासिल गरे,’ उनको धारणा थियो ।

काठमाडौं । विष्णु माझीद्वारा स्वरबद्ध तीज गीत ‘चरी जेलैमा’ लगातार तीन सातादेखि युट्युवमा सर्वाधिक हेरिने नेपाली गीत बनेको छ ।

१३ दिनमै सर्वाधिक छिटो १ करोड भ्यूजको कीर्तिमान राखेको गीतलाई पछिल्लो साता पनि ५५ लाख ५९ हजार पटक हेरिएको छ । शनिबार बिहानसम्म १ करोड ८९ लाख कूल भ्यूज छ यसको ।

टीकटक, युट्युवसहितका सामाजिक संजालमा प्राप्त चर्चाको कारण यसले आगामी सप्ताहन्तमै २ करोड भ्यूज मार्क प्राप्त गर्न सक्ने युट्युव एनालिस्ट कुमार व्यञ्जनकारले बताए ।

उनका अनुसार केही दिनमै २ करोड भ्यूजको सफलता हासिल गरे यो गीतले सर्वाधिक छिटो २ करोड भ्यूज प्राप्त गर्ने नेपाली गीतको रेकर्ड राख्नेछ ।

‘तीजको कारण गीतको सूचीमा तीज गीतको दबदबा थियो’ उनले भने, ‘आउने सातादेखि नियमित गीतहरुले बढी भ्यूज पाउन सक्छन् ।’ रुटिन अफ नेपाल बन्दले तयार पारेको गीत सूचीमा कुन-कुन गीत छन् यो साता । हेनूस :

१) चरी जेलैमा : विष्णु माझी

२) आयो तीजको लहर : मेलिना राई

३) कुरा बुझ्न पर्च : प्रकाश सपुत

४) ए जिन्दगी : प्रमोद खरेल

५) कुरा काट्ने : खुमन अधिकारी

६) घन्काइ देऊ मादलु : सुमित्रा कोइराला

७) छम्की देऊ पानी : सुकदेव र सुनिता

८) जोखौं माया : मेलिना राई र विष्णु घिमिरे

९) माया बिरानी २ –तातो गोली : महेश काफ्ले

१०) तिम्रो मनमा एक कान्छा : निकिता थापा

काठमाडौं । टेलिभिजन कार्यक्रम ‘जातको प्रश्न’को दोस्रो सिजन असोज २२ गतेदेखि प्रसारण हुने भएको छ । शनिबार राजधानीमा आयोजित पत्रकार सम्मेलनमा यसबारे जानकारी दिइयो ।

१२ एपिसोड रहेको कार्यक्रमको पहिलो सिजनले सफलता प्राप्त गरेपछि समता फाउन्डेसनले दोस्रो सिजन ल्याउन लागेको हो । अहिले दोस्रो अध्यायको लागि एपिसोड छायांकन भैरहेको छ ।

दोस्रो सिजनलाई अभिनेताद्धय राजेश हमाल र दयाहाङ राई, राष्ट्रिय मानवअधिकार आयोगकी पूर्वसदस्य मोहना अन्सारी, गायक प्रकाश सपुत र संचारकर्मी निश्मा ढुंगाना चौधरीले संचालन गर्ने भएका छन् ।

शान्ता नेपालीको नेतृत्वमा निर्माण हुने जनाइएको कार्यक्रमको दोस्रो सिजन पनि १२ भागको हुनेछ ।

कार्यक्रममा बोल्दै अभिनेता हमालले जतिसुकै राम्रो संविधान बनाएपनि व्यवहारमा उतार्न ठूलो चुनौति रहेको बताए । जातको प्रश्नको पहिलो सिजन सुटिङ गर्दा आफूले जातिय विभेदलाई गहिराइबाट बुझ्न अनुभव पाएको बताउँदै हमालले संविधानमा लेख्नुभन्दा व्यवहारमा उतार्नु महत्वपूर्ण रहेको बताए ।

अर्का होस्ट तथा अभिनेता राईले समुदायमा गरिने जातीय विभेद एउटा समुदायको मात्र चासोको विषय नरहेको बताए । ‘जब हाम्रो समाजमा जातकै आधारमा विभेद गरिन्छ भने त्यो समाजकै ठूलो समस्या हो । म पनि समाजको माइलो जातको रुपमा हुर्किएको मान्छे हुँ । मैले पनि विभेदका कुराहरु भोगेको छु ।’

कार्यक्रममा नेपालमा रहेको जातिय विभेदको समस्या समाधान र दलितहरुले भोगिरहेको यथार्थता र अनुभवलाई समेट्ने गरिन्छ । नेपाल प्रेससँग कुरा गर्दै निर्देशक नेपालीले पहिलो सिजनजस्तै दोेस्रोलाई पनि दर्शकले रुचाउने बताइन् ।

‘समता फाउण्डेशनले जात सबैको साझा मुद्दा हुनुपर्छ र जातबारे सबै जात-जातिले संवाद गर्नुपर्छ भन्ने भाष्यको निर्माण गर्न ‘जातको प्रश्न’ को दोस्रो सिजन शुरू गरेको हो’ जारी विज्ञप्तिमा उल्लेख छ । दशैं घटस्थापनाको भोलिपल्टदेखि दोस्रो सिजन सुरु हुनेछ ।

काठमाडौं । युट्युवमै सहि, हिट फिल्म ‘कबड्डी’का दुईजना कलाकारहरु म्युजिक भिडिओमार्फत भएपनि दर्शकमाझ आएका छन् ।

सुरेश अधिकारीद्वारा संगीतबद्ध नयाँ गीत ‘जाले रुमाल’मा ‘कबड्डी’का दुर्ई लोकप्रिय कलाकार बुद्धि तामाङ र नायिका रिस्मा गुरुङलाई देख्न सकिन्छ । यो रोमान्टिक ट्रयाकमा यी दुईजना फिचर्ड छन् ।

भिडिओमा रिस्मा र बुद्धिलाई हेर्दा दर्शकलाई कबड्डीकै मनोविज्ञान महसुस हुनसक्ने विश्वास गर्न सकिन्छ । फिल्ममा कमै नृत्य पस्किने बुद्धिले यसमा भने कम्मर मर्काएका छन् ।

भिडिओमा दर्शकले ‘कबड्डी’ फिल्मकै पात्र र कथालाई महसुस गर्न सक्छन् ।

कृष्ण केसीको स्वर तथा शब्द रहेको गीतलाई राजन इशानले म्युजिक अरेन्ज गरेका छन् । शुक्रबार इन्टरनेट रिलिज भएको गीतलाई दर्शकले सकारात्मक प्रतिक्रिया दिएका छन् ।

काठमाडौं । विकी अग्रवाल नेपाली कमेडीमा नयाँ आयाम भित्र्याउने साहसी प्रतिभा हुन् भने भरतमणी पौडेल समकालीन हास्यब्यङ्ग्यको उत्कृष्ट उदाहरण हुन् । त्यसैगरी सन्तोष थापालाई विकी र भरतमणीको सुन्दर ‘फ्युजन’को रुपमा लिन सकिन्छ ।

विकीका प्रस्तुतीहरुमा ‘वर्ड प्ले’को प्रभावकारी योग, ‘प्रप्स’को आकर्षक प्रयोग, ‘वान लाईनरको सही सदुपयोग , ‘अन एक्स्पेक्टेड ईन्ट्री’ र ‘आउट अफ बक्स कन्टेन्ट’ को प्रचुरता पाईन्छ भने भरतमणीमा ‘उत्कृष्ट क्यारिकेचर’, ‘हुबहु अभिनय’, ‘भेराईटीज अफ कन्टेन्ट’ र पफर्मेन्समा कन्फिडेन्स देखिन्छ । सन्तोस थापाका सेटमा ‘रियल लाईफ एक्सपेरियन्स’, ‘अर्ग्यानिक कन्टेन्ट’, हाउभाउको सही प्रयोग र प्रस्तुतीमा शालिनता र सरलता भेटिन्छ ।‌

कमेडी च्याम्पियनको फाईनल ईपिसोडसम्म आईपुग्दा ‘टप थ्री’का केही अविस्मरणीय प्रस्तुतीहरु कहिल्यै बिर्सन सकिँदैन । विकी अग्रवालको ‘यहाँनीर दुख्छ हो’, ‘एयर होस्टेज र बस कन्डक्टर’, ‘हरिमाया भाउजू’, ‘फिल्म डाईरेक्टर’, ‘रावणको पुनर्जन्म’, ‘पेन्टोमाईम’ लगायतका प्रस्तुतीहरु सम्झन लायक छन् ।

भरतमणीका ‘घरबेटी र डेराबाल’, ‘डाक्टर साहेब’, ‘जेष्ठ नागरिक दुःख’, ‘पत्रकारको कथा’, ‘पुर्व युबराज पारसको क्यारिकेचर’ लगायतका प्रस्तुतीहरु दर्शकका मनमा बसि रहनेछ्न । त्यसैगरी सन्तोस थापाका ‘अङ्ग्रेजी टिचेर’, ‘महोत्सवको कथा’, ‘डेलिभरी ब्वाईको पीडा’, ‘मपनी व्यापारी’, फिनालेमा प्रश्तुत गरेको ‘भरत(विकीको चेपुवा’ लगायतका प्रश्तुतिहरु जिवन्त र हास्यब्यङ्ग्यात्मक थिए ।

हजारौंबाट सयौं, सयौंबाट दर्जनौं, दर्जनौंबाट ‘उत्कृष्ट ३’ मा आईपुग्नु चानचुने कुरो होईन । यसकालागि तीनैजनाले कडा मेहेनत गरेका छन् । उनीहरु मध्ये जो ‘च्याम्पियन’ बनेपनि नेपाली हास्यब्यङ्ग्यमा एउटा बलियो इटा थपिने आशा गर्न सकिन्छ ।

च्याम्पियनका निर्देशक विशाल भण्डारीको अथक प्रयास, टीमको बलियो सहयोग, प्रायोजकको बलियो साथ तथा दर्शकको अपार मायाले कमेडी च्याम्पियन फिनालेको पूर्वसन्ध्यामा छ । त्यसैले आफ्नोच्याम्पियन आफैं चुन्नुहोस् । हास्यमेव जयते !

काठमाडौं । अभिनेता राजेश हमालले बहुचर्चित अमेरिकी अनुदान सम्झौता एमसीसीबारे नेपाली नागरिकको असन्तुष्टि र भावनालाई स्पष्ट पार्न र सम्बोधन गर्न नेपाल एवं अमेरिकी सरकारलार्ई आग्रह गरेका छन् ।

मध्यरात २ बजे भिडिओ सन्देश जारी गर्दै हमालले नेपाली नागरिकलाई एमसीसीबारे विश्वास दिलाउन र असन्तुष्टिलाई साम्य पार्न अमेरिकाको भूमिका जरुरी रहेको बताएका हुन् ।

‘एमसीसीका कतिपय सम्झौताका बुँदाप्रति नेपाली नागरिकको असन्तुष्टि छ । नेपाली नागरिकलाई विश्वास दलाउनु र असन्तुष्टिलाई स्पष्ट पार्नुमा अमेरिकाको ठूलो भूमिका रहन्छ । अमेरिका यसका लागि तयार हुनुपर्छ’ हमालले भनेका छन् ।

नेपाली जनताको चाहना र भावनाविपरित गरिने क्रियाकलाप सौहार्दपूर्ण नहुने, यसले दूरगामी असर पार्न सक्ने र प्रत्युत्पादक हुनसक्ने हमालको भनाई छ । नेपाली नागरिकको चित्त बुझाउन सरकारको कर्तव्य समेत रहेको उनको भनाई छ ।

एमसीसीलाई लिएर पछिल्लो समय राजनीतिक दल र नागरिकबीच मतैक्य नभएको बेला ठूलो फ्यान फलोइङ भएका हमालले यस्तो आग्रह गरेका हुन् । सामाजिक संजालमा हमालको यस्ता आग्रहलाई लिएर फ्यानहरुले समर्थन जनाएका छन् ।

काठमाडौं । अनमोल केसी र सुहाना थापा अभिनित फिल्म ‘ए मेरो हजुर ४’को प्रदर्शन पुनः सात महीना पछाडि धकेलिएको छ । निर्माता सुनिलकुमार थापाले सामाजिक संजालमार्फत फिल्म पोस्टपोन्ड भएको जनाएका छन् ।

पूर्वनिर्धारित मिति भदौ १८ गते फिल्म रिलिज हुन नसकेपछि पोस्टपोन्ड भएको जानकारी उनले दिएका छन् । उनका अनुसार अब यो फिल्म कोरोना महामारीको परिस्थिती सामान्य भए आगामी चैत २५ गते प्रदर्शनमा आउने भएको छ ।

‘अब बिस्तारै कोरोना कहर पनि कम हुँदै गएको साथै नेपाल सरकारले सिनेमा हलहरु पनि खोल्ने अनुमति दिएकाले विस्तारै चलचित्र क्षेत्र पनि चलायमान हुने कुरामा हामी पनि आशावादी छौं’ थापाले फेसबुकमा लेखेका छन् ।

अहिले काठमाडौं उपत्यकामा ५० प्रतिशत अकुपेन्सीमा मात्र फिल्म हल संचालन गर्न सरकारले अनुमति दिएको छ तर, चलचित्र संघले देशव्यापी रिलिज र शतप्रतिशत अकुपेन्सी माग गर्दै हल खोलेको छैन ।

काठमाडौं । अभिनेता तथा पूर्व इन्डियन आइडल प्रशान्त तामाङ एउटा गतिलो फिल्ममार्फत पुनरागमनको खोजीमा छन् । उनी अभिनित गोर्खा पल्टन र परदेशी फिल्मबाहेक अन्य फिल्मले बक्सअफिसमा उछाल ल्याउन सकेनन् । हुनसक्छ, उनलाई मुख्य भूमिका लिएर मुहूर्त गरिएको फिल्म ‘अस्तित्वको लडाइ’ले त्यो मानक कायम राख्नसक्छ ।

प्रशान्तले अभिनय गर्ने सोही फिल्मको शुभसाइत शुक्रबार गरिएको छ । मकवानपुरको चैनपुर राक्सिराङमा फिल्मको शुभसाइत गरिएको हो । गोविन्द गौतमले निर्देशन गर्ने यो फिल्मले चेपाङ समुदायको कथा प्रस्तुत गर्छ । राक्सिराङ चेपाङ समुदाय बहुल गाउँ हो जहाँ भूमिको समस्यालाई लिएर चेपाङहरु सदियौंदेखि पीडित छन् । कौडीको भाउमा चेपाङहरुले भूमि विक्री गर्दा हुने उनीहरुको बिल्लीबाठ फिल्मको कथा हो ।

फिल्मको स्क्रिप्ट समेत लेखेका निर्देशक गौतमले सामाजिक कथावस्तुमा बन्ने फिल्ममा प्रशान्तले चेपाङ युवकको भूमिका निर्वाह गर्ने बताए । तिहारपछि छायंकन सुरु हुने फिल्मलाई चेपाङ समाजले निर्माण गर्न लागेको हो । फिल्ममा प्रशान्त तामाङ, सुनिल थापा, सम्पदा बाँनियाको मुख्य भूमिका रहने जनाइएको छ ।

अन्य कलाकारको छनोट प्रक्रिया भने जारी रहेको एसोसियट निर्देशक रामशरण कोइरालाले जानकारी दिए । चलचित्रमा रोशन श्रेष्ठको द्वन्द्व हुने जनाइएको छ ।

काठमाडौं । मुकुन्द भट्टको निर्माण तथा निर्देशन रहेको मल्टिस्टारर फिल्म ‘लप्पन छप्पन’को दोस्रो सिक्वेल आगामी शिवरात्रीमा प्रदर्शन हुने भएको छ । निर्माताले फागुन १३ गते प्रदर्शन मिति घोषणा गरेका हुन् ।

कोरोना महामारीको कारण पटक-पटक प्रदर्शन मिति घोषणा गरेको फिल्मले पुनः नयाँ मिति सार्वजनिक गरेको हो । ‘एक किसिमको जोखिम लिएर हामीले शिवरात्रीको अवसरमा फिल्म रिलिज गर्ने निधो गरेका छौं’ नेपाल प्रेससँग निर्देशक भट्टले भने ।

शिव श्रेष्ठ, सौगात मल्ल, अर्पण थापा, अनुपविक्रम शाही, प्रकाश कुँवर, दीपक क्षेत्री, सरिता गिरी लगायतको मुख्य भूमिका छ । यो ग्याङस्टार फिल्मले अपराध रोक्न चलाइएको मिसनको कथा भन्छ ।

यो फिल्मबाट केरोलिन कोलिन्डा, सुपर गुरुङ, आना ढकाल, सिर्जना सिना, रन्जीत वन्त लगायतले डेब्यु गर्दैछन् । यसअघि आगामी चैत २७ गते रिलिज गर्ने भनिएको फिल्म प्रिपोन्ड भएर अघि आउन लागेको हो । सो मितिमा ए मेरो हजुर ४ आउने भएपछि लप्पन छप्पन २ ले शिवरात्री रिलिज रोजेको हो ।

काठमाडौं । सरकारले कलाकार, पत्रकार, चिकित्सक, खेलाडी, इन्जिनियर, कानून व्यवसायी लगायतलाई आयकर तथा मूल्य अभिवृद्धि करमा मिनाह गर्ने घोषणा गरेको छ ।

अर्थमन्त्री जनाद्र्धन शर्माले आज प्रतिस्थापन विधेयक सार्वजनिक गर्दै २०७८ साल फागुनभित्र आयकर बुझाएमा लाग्ने शुल्क तथा व्याजमा छूट हुने जनाएका हुन् ।

त्यसरी कर बुझाएमा सोभन्दा अगाडिको आयकरमा लाग्ने आयकर तथा मूल्य अभिवृद्धि कर मिनाहा हुने व्यवस्था मिलाएको पनि मन्त्री शर्माले जनाएका छन् ।

सरकारको यस्तो निर्णयपछि कलाकारलाई राहत पुग्ने जनाइएको छ ।

काठमाडौं । इन्द्रबहादुर राईको चर्चित नाटकमाथि बनेको फिल्म ‘जार’को टीजर ट्रेलर शुक्रबार इन्टरनेट रिलिज भएको छ ।

सौगात मल्ल, गीताञ्जली थापा र अनुपविक्रम शाही अभिनित यो ड्रामालाई फूर्वा छिरिङ लामाले निर्देशन गरेका हुन् ।

सन् १८ सयको दशकको अन्त्यतिर सिक्किमेलीको नेपाली भाषी समाजमा भएको घटनालाई राईले पुस्तकमा उतारेका थिए । त्यही पुस्तकको एडप्टेसनको रुपमा यसलाई प्रस्तुत गरिएको हो ।

सिक्किमको सेटिङमा छायांकन गरिएको फिल्ममा सौगात, गीताञ्जली र अनुप पात्र लुक्समा चित्रित छन् । गीताञ्जलीलाई केन्द्रमा राखिएको यो फिल्ममा उनका लागि सौगात र अनुपले गर्ने संघर्षलाई कथ्य तुल्याइएको छ ।

फिल्मको रिलिज चाँडै हुने टिजरमा उल्लेख छ । फेरी टेल पिक्चर्सले होप रिल एन्ड एलए सर्ट्सको ब्यानरमा फिल्म निर्माण गरेको हो । फिल्म निर्माणदेखि नै कास्टको कारणले यो फिल्मले चर्चा बटुलेको थियो ।

हेर्नूस टीजर :

https://www.youtube.com/watch?v=Vn0ykZJDbvM&t=39s

काठमाडौं । नायिका ऋचा शर्मा राणा अहिले सन्तानसुखको महसुस गरिरहेकी छिन् । मंगलबार पहिलो सन्तानस्वरुप छोरालाई जन्म दिएकी अभिनेत्रीेले आमा बनेपछि आफूजस्तो धनीमान्छे कोही झैं नलागेको बताएकी छिन् । सामाजिक संजालमा ऋचाले सन्तान जन्माएपछिको मनोवाद लेखेकी छिन् ।

‘पर्दामा अनेक भूमिका निभाउँद निभाउँदै आज पर्दाबाहिर आमा बन्ने सौभाग्य पाउँदा, यो जत्तिको महत्वपूर्ण र न्यानो चरित्र सायद मैले कहिल्यै निर्वाह गर्ने मौका पाएको थिइँन जीवनमा’ ऋचा लेख्छिन्, ‘आजसम्म के कति कमाएँ, लेखाजोखा छैन तर, आमा झैं माया गर्ने सासु आमा हुनुुहुन्छ । बुवाझैं आशिष दिने ससुरा बुवा हुनुहुन्छ । मनले मागे भन्दा बढी बुझिदिने जीवनसाथी । आज सन्तानको आगमनसँगै म जत्तिको धनी मान्छे कोही झैंै लागिरहेको छैन ।’

ऋचाले सोही मनोवादमार्फत छोराको नाम पनि राखेकी छिन् : आभ्यान विक्रम राणा ।

काठमाडौं । हरितालिका तीज आज देशभरका हिन्दू महिलाहरुले महादेवको पूजाआज गरी मनाउँदैछन् । सेलेव्रिटीमाझ पनि तीज पर्व निकै लोकप्रिय छ । नायिका र गायिकाहरु व्रत बसेर आज तीज मनाउँदैछन् ।

लोकप्रिय एक्ट्रेसहरुले आज सारीमा सजिएको तस्विर खिचाएका छन् । उनीहरुले सामाजिक संजालमार्फत तीज लुक्स सार्वजनिक गरेका छन् र प्रशंसकलाई तीजको शुभकामना दिएका छन् ।

विगतमाजस्तो यसपटक भने सार्वजनिक थलोमा भेला भएर नायिकाले तीज मनाएका छैनन् । कतिपयले भर्चुअलरुपमा मनाइरहेका छन् । अमेरिकामा रहेका नायिकाहरुले पनि तीजको अवसरमा गेट–टुगेदर गरेको तस्विर आउट भएको छ । हेर्नूस तस्विरहरु :

काठमाडौं । नेपाली-अमेरिकन कलाकार सङ्घको अध्यक्षमा निशा सुनार निर्वाचित भएकी छिन् । सङ्घको मङ्गलबार सम्पन्न चौथो अधिवेशनबाट सुनारको नेतृत्वमा १७ सदस्यीय कार्यसमिति निर्विरोध निर्वाचित भएको हो ।

सङ्घको वरिष्ठ उपाध्यक्षमा वसन्ती राई, उपाध्यक्षमा विमल डाँगी, विक्की पुलामी, ऐटना कार्की, राजेन्द्र राई, महासचिवमा सङ्गीता थापा, सचिवमा मधुकुमार गिरी, कोषाध्यक्षअख पुष्कर बराल, सहकोषाध्यक्षअख पूजा न्यौपाने र युथ कोर्डिनेटरमा दिलीपकुमार श्रीष निर्वाचित हुनुभएको प्रमुख निर्वाचन अधिकृत सोमनाथ घिमिरेले जानकारी दिए ।

बोर्ड सदस्यमा चिनियाँलाल श्रेष्ठ, बुद्धिमान घिसिङ, पुष्पा बस्नेत, नवीन श्रेष्ठ र माया राई निर्विरोध निर्वाचित भएका छन् । उक्त कार्यक्रममा महावाणिज्यदूत विष्णुप्रसाद गौतमले नेपाली कला क्षेत्रलाई अन्तर्राष्ट्रियस्तरसम्म फैलाउनका लागि नेपाली अमेरिकन कलाकार सङ्घले महत्वपूर्ण भूमिका खेल्ने विश्वास व्यक्त गरे ।

कार्यक्रममा सङ्घका प्रमुख संरक्षक अभय ढुङ्गेल, वरिष्ठ कलाकार डा महेशराज ठाकुर, न्हुच्छेनारायण डङ्गोल, नरबहादुर दाहाल, आङ गेलु शेर्पा, गोमा योन्जन गुरुङ, नरवीर गुरुङ, सन्जोक लामा योन्जन, नायक विक्रान्त बस्नेत, पत्रकार दिवाकर बागचन्दलगायतको उपस्थिति रहेको थियो ।

काठमाडौं । नेपाली फिल्मको पछिल्लो पुस्तामा पनि लिगेसीको परम्पराले निरन्तरता पाउने क्रम जारी छ । यो मेसोमा थपिएका छन् पाका फिल्मकर्मी युवराज लामा । सन् २००३ को फिल्म ‘धर्मात्मा’पछि टाढिएका फिल्म निर्माता तथा निर्देशक लामा डेढ दशकपछि कमब्याक तयारीमा छन् । आफ्नै निर्माण तथा निर्देशनमा चैतपछि सुटिङ सुरु हुने फिल्ममार्फत छोरा सिद्धार्थलाई नायकमा डेब्यु गराउने तयारीमा उनी छन् ।

अहिले पटकथा लेखनमा काम भैरहेको र दशैंपछि वर्कसप सुरु गर्ने युवराजको तयारी छ । यही फिल्ममार्फत छोरा सिद्धार्थलाई एक्टिङ करियरमा अघि बढाउने युवराजले योजना बुनेका छन् ।

युवराजका कान्छा छोरा नेपाली फिल्मलाई नयाँ भएपनि अभिनयमा भने अनुभवी हुन् । भारतको मलायलम फिल्ममा उनले अभिनय गरिसकेका छन् । उनले मलायलम उद्योगका सुपरस्टार मोहनलालसँँग फिल्म ‘योद्धा’ मा सिद्धार्थले एकसाथ स्क्रिन सेयर गरिसकेका छन् ।

अर्को मलायलम फिल्म ‘इदावाप्पथ्य’ मा पनि उनले मुख्य भूमिकामा अभिनय गरेका थिए । सन् २०१६ मा रिलिज भएको यो फिल्ममा अभिनेत्री मनीषा कोइरालाको पनि अभिनय थियो । मलायलममा सिद्धार्थलाई ‘उनिकुटा’ नामले चिन्ने गरिन्छ । पिताले निर्माण तथा निर्देशन गरेका ‘देउता’ लगायतका केही नेपाली फिल्ममा पनि उनले बाल कलाकारको रुपमा अभिनय गरेका छन् ।

लामाले छोराको नेपाली फिल्म डेब्युबारे भने, ‘सिद्धार्थले आफ्नो क्षमता र प्रतिभाले मलालयम इन्डस्ट्रीमा जुन पहिचान बनाएको छ, त्यो नेपाली दर्शकबीचमा पनि जानुपर्छ भन्ने मेरो सोच हो । किनकि, उसको क्षमता नेपाली दर्शकले पनि चिन्नु पर्छ । अनि, युवराज लामाको लिगेसी धान्ने पनि त कोही चाहियो नी । यसैले पनि नेपाली फिल्ममा छोरालाई डेब्यू गराउन लागेको हुँ ।’

काठमाडौं । फिल्म हल खुले लगत्तै नेपाली दर्शकले बहुप्रतीक्षित दुई हलिउड फिल्म हेर्न पाउने भएका छन् । एप्पल इन्टरटेनमेन्टले जेम्स बन्ड सिरिज ‘नो टाइम टु डार्ड’ र फास्ट एन्ड फ्युरियसको सिरिज ‘एफ–नाइन’लाई नेपालमा रिलिज गर्न लागेको हो ।

‘हल खुलेलगत्तै हामीले यी दुई फिल्म रिलिज गर्ने निश्चित भएको छ’ एप्पल इन्टरटेनमेन्टकी जेनिस पहारीले नेपाल प्रेसलाई भनिन्, ‘यी दुई फिल्मको नेपाल रिलिजका लागि हामीले भारतीय वितरकसँग प्रक्रिया पुरा गरेका छौं ।’

जेम्स बन्डको २५ औं श्रृंखला नो टाइम टु डाइमा डेनियल क्रेग, रमी मलिक, ली सिडक्सको अभिनय छ । कोरोना महामारीअघि नै रिलिजको तयारीमा रहेको यो फिल्म लकडाउनले रोकिएको थियो । जस्टिन लीन निर्देशित फिल्म ‘एफ नाइन’मा भिन डिजेल, मिसेल रोड्रिग्युज, टाइरिस गिब्सन, जोन सेनाको अभिनय छ ।

काठमाडौं उपत्यकाका जिल्ला प्रशासनले ५० प्रतिशत अकुपेन्सीमा हल खुलाउन अनुमति दिएपनि चलचित्र संघले देशव्यापी रिलिज र शतप्रतिशत अकुपेन्सी अनुमति नदिएसम्म फिल्म हल नखोल्ने निर्णय गरेको छ । देशव्यापी रिलिज र शतप्रतिशत अकुपेन्सीबारे पहल गर्न चलचित्र विकास बोर्डले कोभिड संकट व्यवस्थापन केन्द्र (सीसीएमसी)सँग छलफल थालेको छ ।

इटाली । विश्व प्रतिष्ठित भेनिस फिल्म फेस्टिभलको ७८ औं संस्करण आजदेखि इटालीमा सुरु भएको छ । आकर्षक र स्टाइलिस पहिरनमा विश्वचर्चित स्टारहरु उपस्थित रहे ।

कोरोना महामारीको कारण गतवर्ष रोकिएको भेनिस यसपटक भने भौतिकरुपमै सुरु भएको हो । यसवर्षकै बहुप्रतीक्षित फिल्महरु साइन्स फिक्सन ड्युन र दिवंगत राजकुमारी डायनाको बायोपिक स्पेन्सर प्रिमियर हुने तयारीमा छन् ।

भेनिस रेडकार्पेटमा यसपटक हलिउड अभिनेत्री जेनेडियाको कोचर निकै स्टाइलिस रह्यो । उनी रेडकार्पेटकै केन्द्रमा रहिन् । तिमोथी चार्लामेट र जेनेडिया स्टारर ड्युन प्रिमियर हुने तयारीमा छ ।

अभिनेत्रीहरु किस्र्टन डन्स्ट, केट हड्सन, हेलेन मिरेन, अभिनेता म्याक गिलेनहाल, तिमोथी चार्लामेट, जेसिका चेस्टेन, जोय साल्दाना, बेनेडिक्ट कम्बरब्याच, क्रिस्टेन स्टेवार्ट, अस्कर विजेता निर्देशक कोल झाओ, डेमी मुरेसहितका विश्व स्टारहरु रेडकार्पेटमा प्रस्तुत भए ।

विश्वकै जेठो फिल्म फेस्टिभल सेप्टेम्बर ११ सम्म चल्नेछ । डेल्टा भेरिएन्ट फैलिएको इटाली सहरमा कोभिड प्रोटोकल पालना गर्दै फेस्टिभल आयोजना भएको हो । ‘सबैजना फर्कने मुडमा छन् । पुनः फिल्म रिलिज गर्न चाहन्छन् । सबैजना तयार छन्’ फेस्टिभल निर्देशक अल्बर्टो बारबराले एपीसँग भनिन् ।

उनका अनुसार नेटफिल्क्स फिल्म ‘द पावर अफ डग’ समेत फेस्टिभलमा प्रदर्शन हुनेछ । फिल्म प्यारासाइटबाट अस्कर जितेका दक्षिण कोरियाली निर्देशक बोङ जोन हो यसपटक फेस्टिभलको मुख्य निर्णायक छन् । कोल झाओ र अभिनेत्री सिन्थिया इरिभो समेत रहेको जुरीले गोल्डेन लायन अवार्ड छनौट गर्नेछ ।

भेनिसमा यसपटक २१ वटा फिल्मले प्रतिस्पर्धा खण्डमा भाग लिएका छन् । ५० प्रतिशत अकुपेन्सीमा आयोजना गरिने भेनिसमा इन्डोरभित्र मास्क अनिवार्य गरिएको छ । सेप्टेम्बर ११ सम्म भेनिस चल्नेछ ।

काठमाडौं । नायिका ऋचा शर्मा आमा बनेकी छन् । पहिला सन्तानका रुपमा उनले छोरालाई जन्म दिएकी हुन् ।

ऋचा संलग्न टिभी रियालिटी शो कमेडी च्याम्पियनले उनी आमा बनेको पुष्टिसहित सामाजिक सञ्जालमा बधाइ दिएको छ ।

ऋचाले गत साता कमेडी च्याम्पियनबाट सुत्केरी विदा लिएकी थिइन् ।

काठमाडौं । माओवादी केन्द्र निकट युवा संगठन वाइसीएल इन्चार्ज रामप्रसाद सापकोटा दीपशिखाले गायकद्धय दुर्गेश थापा र भिटेनलाई भित्राउने बताएका छन् ।

वाइसीएल र अखिल क्रान्तिकारीको चितवनमा आयोजित संयुक्त भेलामा बोल्दै दीपशिखाले उक्त कुरा बताएका हुन् । ‘हामी भिटेन र दुर्गेश थापालाई पनि वाइसीएलमा ल्याउँछौं’ उनले भने ।

जनयुद्धमा बन्दुक बोकेर हिँड्ने युवाहरुको दस्ता वाइसीएल रहेकोमा परिवर्तित सन्दर्भमा प्रविधिको उपयोग हुने अत्याधुनिक युवाहरुलाई पनि संगठनमा ल्याउने तयारी रहेको दीपशिखाको भनाई थियो ।

दुर्गेश र भिटेनजस्ता युवाहरुलाई युवामा ल्याएर अब्बल दस्ता निर्माण गर्ने उनको भनाई छ । वाइसीएललाई सहरमा लोकप्रिय र सबैभन्दा ठूलो संगठन बनाइने उनको भनाई छ ।

‘समाजका सबै युवाहरुलाई हामी वाइसीएलमा ल्याउँछौं’ उनले भने, ‘एउटा राम्रो खेलाडी, राम्रो कलाकार, उत्कृष्ट विद्यार्थी वा समाजमा योगदान गरेका व्यक्तिलाई वाइसीएल बन्न लामो समय कुरेर क्रियशिल भइरहन जरुरी हुन्न ।’

सो इच्छाकामना भेलाले वाइसीएल अध्यक्षमा झलक गुरुङ र अखिल क्रान्तिकारी अध्यक्षमा सुमित्रा प्रजाको नेतृत्वमा नयाँ टीम निर्वाचित गरेको छ ।

काठमाडौं । अभिनेता आमेश भण्डारीले दिवंगत पिताको सम्झञनामा गीत सार्वजनिक पारेका छन् । मंगलवार बुबाको मुख हेर्ने दिनको अवसर पारेर उनले ‘बाबा’ बोलको गीत सार्वजनिक गरेका हुन् । गीतमा आमेशकै स्वर, शब्द र संगीत रहेको छ । भिडिओमा उनी आफै फिचर छन् भने उनको पिताको भूमिका शोभित बस्नेतले निभाएका छन् । त्यस्तै, आमेशको बाल्यकालको भूमिकामा अबश्य भण्डारी फिचर छन् ।

यसै बर्ष आमेशका पिताको निधन भएको थियो । उनी पिताकै साथ, हौसला र प्रेरणाले फिल्म क्षेत्रमा आएका थिए । पितासँग उनको साथीको जस्तो सम्बन्ध थियो । पिताको निधनपछि विक्षिप्त भएका आमेश लामो समय आँशुमा डुबेका थिए । गीतको भिडियोमार्फत उनले पिताले आफूलाई गर्ने प्रेम देखाएका छन् । गीतका शब्द निकै मर्मस्पर्शी छन् ।

गीत सार्वजनिक गर्दै आमेशले भनेका छन्, ‘मैले बुबालाई समर्पित गरेर बुबाको सम्झनामा यो गीत बनाएको हुँ । म जस्तै धेरैले आफ्नो बुबा गुमाउनुभएको छ । सबैलाई मेरो जस्तै पीडा हो । हिम्मत हार्नु हुँदैन, अगाडि बढ्न छाड्नु हुँदैन बुबा सधैं साथमा हुनुहुन्छ भन्ने सन्देश गीतमार्फत दिन खोजेको छु ।’ भिडियोमा पिता र सन्तानबीचको भावनात्मक सम्बन्धलाई निकै मनछुने ढंगबाट देखाइएको छ ।

सुरेश न्यौपानेको कन्सेप्ट र निर्देशन रहेको भिडियोलाई संकल्प भुजेलले खिचेका हुन् । दिन्सन शाहको सम्पादन र कलर, करिश्मा केसीको आर्ट डिरेक्सन, केवलमान सिंह बस्नेत प्रोडक्सन म्यानेजर रहेको गीतको भिडियोका क्रियटिभ हेड सलोन बस्नेत हुन् । आमेशले यसअघि ‘मेरो लागि तिमी’, नम्बर १०८’ गीत पनि गाइसकेका छन् । ‘फूलै फूलको मौसम तिमीलाई’ बाट नायकको रुपमा डेब्यू गरेका उनले ‘तँ म र ऊ’ र ‘मेला’ चलचित्रमा पनि अभिनय गरेका छन् ।

काठमाडौं । बलिउड फिल्म ‘उचाई’ छायांकनको लागि ‘लोकेसन हन्टिङ’ गर्न बलिउड निर्देशक सुरज वर्जत्यसहितको टोली नेपाल आइपुगेको छ ।

निर्देशक वर्जत्सयसहित निर्माण युनिटको टोली आज हिमालपारिको जिल्ला मनाङको सदरमुकाम चामे पुगेको छ ।

मनाङ पछि उक्त टोली मुस्ताङ जाने कार्यक्रम रहेको फिल्मको नेपाल व्यवस्थापनको जिम्मा लिएको कम्पनी थ्री ह्विलर्सले जनाएको छ ।

अक्टोबर ५ देखि नेपालको हिमाली जिल्लाहरुमा फिल्म सुटिङ हुँदैछ । अमिताभ बच्चन, डेनी डेनजोङ्पा, अनुपम खेर, बोमन इरानी र परिणिती चोपडा लगायतका कलाकार नेपाल आउने कार्यक्रम छ ।

मित्रताको कथा प्रस्तुत गर्ने फिल्मलाई नेपालको लुक्ला, नाम्चे, लाङटाङमा छायांकन गरिने भएको छ ।

काठमाडौं । टिभी रियालिटी शो कमेडी च्याम्पियनका एक फाइनलिस्ट भरतमणि पौडेलको पक्षमा झापामा मोटरसाइकल र्‍याली आयोजना गरिएको छ । भद्रपुर एयरपोर्टंदेखि विर्तामोडसम्म निकालिएकाे र्‍यालीका क्रममा समर्थकहरुले उनलाई कमेडी च्याम्पियनमा जिताउन आह्वान गरे ।

र्‍यालीमा सहभागीहरुले ‘भोट फर भरतमणि’ भन्दै नारा लगाएका थिए । गलाभरी माला र खादा भिरेका भरतमणिले अभिवादन गर्दै हात हल्लाएइरहेका थिए । उनले पनि आफूलाई कमेडी च्याम्पियन बनाउन भोट अपिल गरे ।

मोटरसाइकल र्‍यालीमा भाग लिएर भरतमणि आफ्नो गृहजिल्ला ताप्लेजुङतिर लागेका छन् । कमेडी च्याम्पियनको फाइनल आगामी २ असोजमा हुँदैछ । फाइनलमा भरतमणिसहित सन्तोष थापा र विक्की अग्रवाल भिड्दैछन् ।