काठमाडौं । कर्ण दास गम्भीर गीत गाएर चिनिएका गायक हुन्। उनका छोरा मर्कुश दास भने रोमान्टिक गीतका साथ पहिलो म्युजिक भिडिओ लिएर आएका छन्। युट्युब मार्फत ‘थाहा छैन’ बोलको गीत सार्वजनिक भएको छ। गीतमा शब्द र संगीत कुशल पोखरेलको छ।
मर्कुशले चार वर्षअघि मेलिना राईसँग ‘जिन्दगी ओराली उकाली’ बोलको गीत गाएका थिए। गीतले युगल गायनतर्फबाट इमेज अवार्डसमेत जितेको थियो।
स्तरीय गीत भए पनि त्यसको म्युजिक भिडिओ बन्न सकेन। त्यसबाहेक पनि गायक मर्कुशले दुई गीत गाएका छन् जसको अडियो र लिरिकल भिडियो मात्र सार्वजनिक भयो। पहिलो पटक भिडिओसहितको गीत सार्वजनिक गरेका मर्कुश यस गीतका म्युजिक भिडिओ निर्देशक पनि हुन्।
पोखराबाट मध्याह्नु ब्यान्डका गायकका रुपमा उदाएका कर्ण दासले पछि आधुनिक गायनमा पनि विशिष्ट छाप छोडे। बुबाजस्तै मर्कुशको संगीत यात्रा पनि ब्यान्डबाटै सुरु भएको हो। उनी प्लस टुको पढाइपछि ‘प्रतिविम्ब’ ब्यान्डमा सक्रिय भए। पाँच सदस्य रहेको ब्यान्डले पोखराका कन्सर्ट र रेस्टुरेन्टहरुमा प्रस्तुति दिने गर्दथ्यो।
बिबिएको पढाइ छोडेर काठमाडौं आएका मर्कुशले गायनभन्दा बढी संगीतको प्राविधिक पाटोमा बढी समय दिए। दुई वर्ष ‘अकस्टिक स्टुडियो’मा साउन्ड इन्जिनियरका रुपमा काम गरेका उनले नेपाल म्युजिक स्कुलमा केही समय पियानो सिके। त्यसयता स्वअध्ययन र स्वअभ्यासबाट उनी संगीत क्षेत्रको नजिक छन्।
तर, गीत सार्वजनिक गर्ने उनको रहर पूरा भएको थिएन। केही अडिओ र लिरिकल भिडिओ सार्वजनिक भए पनि गीत बाहिर ल्याउन सकेका थिएनन्। जिन्दगी ओराली उकाली सार्वजनिक हुँदा मर्कुश नेपालमै थिए। हाल उनी अष्ट्रेलियामा छन्। हस्पिटालिटीमा डिप्लोमा सकाएका उनी भविष्यमा संगीतको औपचारिक अध्ययन गर्ने सोच रहेको बताउँछन्।
मर्कुशका अनुसार यो गीत एक वर्षअघि नै सार्वजनिक गर्ने तयारी भएको थियो। तर, कोरोना महामारीका कारण ढिलाइ भयो। ढिलै भए पनि पहिलो पटक गीतको भिडियो सार्वजनिक भएपछि उत्साह बढेको उनले बताए। उनले भने, ‘भिडियोसहित नयाँ गीत आउँदा खुसी त छ नै। पहिलो पटक म्युजिक भिडिओ निर्देशन गरेकोले पनि उत्साहित छु।’
२५ वर्षीय मर्कुशको मात्र नभई भिडियोमा सम्बद्ध धेरै जनाका लागि नयाँ अनुभव बनेको छ। अष्ट्रेलियामा छायांकन भएको भिडिआमा सुबिर भन्डारी र हिलारी रावलले अभिनय गरेका छन्। प्रयुष मानन्धरको सिनेमेटोग्राफीको भिडियोलाई सुदीप विष्टले सम्पादन गरेका छन्।
‘थाहा छैन’ शिक्षा सदन एजुकेसन एन्ड भिसा सर्भिसेज, सानो क्याफे र लाखे इभेन्टसको सहयोगमा निर्माण भएको हो। विदेशमा बसेर पनि संगीतमा सक्रिय हुने बताएका उनले चाँडै नयाँ गीत संगीत लिएर स्रोतामाझ आउने बताए। हेर्नूस गीत :
काठमाडौं । दशैंअघि फिल्म रिलिजको वातावरण गराउन फिल्म निर्माता र प्रदर्शकले प्रधानमन्त्री शेरबहादुर देउवालाई भेट्ने भएका छन् । यसअघि सत्तारुढ दल माओवादी केन्द्रका अध्यक्ष पुष्पकमल दाहाल प्रचण्ड र प्रमुख प्रतिपक्षी एमाले अध्यक्ष केपी शर्मा ओलीलाई भेटेका उनीहरुले कांग्रेस सभापति समेत रहेका देउवालाई भेट्न लागेका हुन् ।
फिल्म क्षेत्रलाई चलायमान बनाउन सरकारले ३ देखि ६ महीनासम्म रिलिज हुने फिल्मको कूल लगानीको ५० प्रतिशत सुनिश्चित गर्नुपर्ने मुख्य माग प्रधानमन्त्रीलाई पेश गर्ने तयारी छ ।
‘कम्तीमा ३ देखि ६ महीनासम्म हलमा लाग्ने फिल्मको लगानीको आधा रकम सरकारले ग्यारेन्टी गर्नुपर्छ र सोहीअनुसार यो क्षेत्रलाई चलायमान बनाउन सकिन्छ’ निर्माता संघका अध्यक्ष आकाश अधिकारीले नेपाल प्रेसलाई भने ।
‘हामी दशैंलाई मिस गर्न चाहँदैनौं र यसका लागि सरकारले उपयुक्त वातावरण तयार गर्नुपर्छ’ अधिकारीले भने, ‘हामीले प्रधानमन्त्रीसँग फिल्म छायांकनको लागि अनुदानसहित फिल्म हलको लागि डिमान्ड शुल्कको माग पनि प्रस्तुत गर्नेछौं ।’
दिनुहँजसो हुने छलफलमा निर्माताले यिनै माग राखेकाले अहिले हल खुलाउन सरकारले अनुमति दिएपनि फिल्म नभएकाले हल संचालन हुन सकेका छैनन् । भोलि प्रधानमन्त्रीसँग भेटपछि दशैंमा फिल्म रिलिजका लागि टुंगो लाग्न सक्ने चलचित्र विकास बोर्डका अध्यक्ष दयाराम दाहालले जानकारी दिए ।
दशैं फूलपाति सुरु हुन २० दिन बाँकी रहेपनि अहिलेसम्म लाइनअप तयार नहुँदा रिलिज नहुने सम्भावना बढ्दै गएको छ । सरकारले हल खुलाउन अनुमति दिएपनि उत्साहित फिल्मकर्मी अहिले भने रिलिजकै टुंगो नलाग्दा निराश बनेका छन् ।
काठमाडौं । दशैको माहोल नजिकिँदै गर्दा ‘ह्याप्पी दशैं’ बोलको नयाँ गीत सार्वजनिक भएको छ । दशैं नजिकिएसँगै स्माइल नेपाल अनलाइन टिभीको युट्युब च्यानलबाट नयाँ गीत सार्वजनिक भएको हो । देवी घर्ती, राजु ढकाल, अस्मिता डल्लाकोटी र रविन लामिछानेको स्वरमा सजिएको गीतको भिडियोमा सन्तोष पन्त, सुष्मा ढकाल, फिलिप देवकोटा र अस्मिता डल्लाकोटीको पनि अभिनय रहेको छ । डल्लाकोटी दोहोरी च्याम्पियनको उत्कृष्ट ८ मा पर्न सफल गायिका पनि हुन् ।
एकआपसमा माया र सदभाव साटेर दशैं मनाऔं भन्ने सन्देश गीतमार्फत दिन खोजिएको गायीका डल्लाकोटीले बताईन । उनका अनुसार गीतमा विदेश पुगेका नेपाली दशैं मनाउन गाउँघर नै फर्किन्छन् भन्ने कथालाई प्रस्तुत गरिएको छ ।
गीतको शब्द सन्तोष पन्तले लेखेका हुन् भने गीतमा संगीत पनि पन्तले नै भरेका छन् । गीतमा संगीत संयोजन चेतन गोतामेको छ भने गीतको भिडियो मदन खड्काले निर्देशन गरेका हुन् । वीरेन्द्र भट्टले छाँयाकन गरेको भिडियोलाई अविनास डिसीले सम्पादन गरेका हुन् ।
काठमाडौं । बलिउड अभिनेत्री शिल्पा शेठ्ठीका पति राज कुन्द्रालाई धरौटीमा रिहा गर्न अदालतले आदेश दिएको छ । पोर्न फिल्मको धन्दा गरेको आरोपमा उनलाई प्रहरीले पक्राउ गरी हिरासतमा राखेको थियो ।
हिन्दूस्तान टाइम्सका अनुसार मेट्रोपोलिटन म्याजिस्ट्रेट कार्टले सोमबार कुन्द्र र उनका सूचना प्रविधि प्रमुख रिया थोर्पेलाई मात्र ५० हजार भारु धरौटीमा रिहा गर्न आदेश दिएको हो ।
मुम्बइ प्रहरीले कुन्द्रालाई गत जुलाइमा पक्राउ गरेको थियो र उनीमाथि गत साता मात्रै १ हजार ४ सय ६७ पेजको चार्ज सिट दायर गरिएको थियो । कुन्द्राले आफूलाई साधारण धरौटीमा छोड्न अदालतमा अपिल गरेका थिए । आफुविरुद्ध प्रहरीसँग कुनै बलियो प्रमाण नभएको उनले दावी गरेका छन् ।
उनको तर्फबाट दायर अपिलमा भनिएको छ, स्वेच्छाले कथित भिडिओहरुमा अभिनय गरेको पनि कुन्दाको दावी छ ।
काठमाडौं । नेपाली फिल्म क्षेत्रमा उपाधिलाई लिएर विवाद हुनु नयाँ होइन । प्रत्येक व्यक्ति र संस्थाले निजी तवरबाटै उपाधि वितरण गरिरहेका हुन्छन् । यसलाई लिएर एकरुपता पनि पाइँदैन ।
केही वर्षपहिले एक टेलिभिजन कार्यक्रम संचालकले राजेश हमाललाई महानायक र करिश्मा मानन्धरलाई महानायिका भएको बताए । उनले टिभी कार्यक्रमबाटै राजेश र करिश्मालाई यस्तो उपाधि दिएपछि दर्शकले पनि हमाललाई महानायक र करिश्मालाई महानायिका भन्न थाले ।
यसबीचमा धेरैपटक यो उपाधिलाई लिएर पटक–पटक विवाद समेत हुने गरेको छ । यसैसाता काठमाडौंमा आयोजित एक पत्रकार सम्मेलनमा अभिनेताद्धय भुवन केसी र शिव श्रेष्ठले नायिका गौरी मल्ललाई महानायिकाको उपाधि दिए ।
शोभित बस्नेतले निर्देशन गरेको फिल्म डाँडाको बरपीपलमा भुवन र शिवले गौरीजस्तो अभिनेत्री अझै केही पुस्तामा नआउने दावी गर्दै गौरीलाई अभिनयकी वास्तविक महारानी र महानायिका भएको बताए । भुवनले त अझै शिवलाई महानायक भन्न समेत भ्याए ।
जवाफमा अभिनेत्री मल्लले आफूलाई पद र सम्मानभन्दा दर्शकको माया ठूलो हुने बताइन् । ‘काम सुरु गर्दा महानायिका हुन्छु र पद पाउँछु भनेर गरेको होइन । यो देशमा उपधिको कुनै औचित्य छैन’ गौरीले भनिन्, ‘विभिन किमिसको उपाधिले मान्छेहरुलाई सिंगारेको देख्छु । मलाई उपाधि चाहिँदैन । हामीलाई श्रम गर्र्ने मौका दिनूस । पदभन्दा दर्शकको माया र स्नेह नै माथि छ ।’
हालैको एक टिभी कार्यक्रममा करिश्मा मानन्धरलाई भुवन र राजेश हमालमध्ये कसलाई रोज्नुहुन्छ भनेर सोधिएको थियो । जवाफमा करिश्माले हमाललाई छनौट गरेकी थिइन् । अर्कोतर्फ, भुवन र राजेशबीच पहिलेदेखि नै महानायक इस्युमा मतभिन्नता छ ।
भुवनले यस्तो जवाफमा दिनुलाई अस्वभाविकरुपमा लिन मिल्दैन । बस्नेत निर्देशित फिल्म डाँडाको बरपीपलमा भुवन र शिवले दशकपछि सहकार्य गरेका छन् । उक्त फिल्मको एउटा गीत लन्च कार्यक्रममा गरिएको थियो ।
मुम्बई । सोनी पिक्चर्स इन्डियाले आगामी १२ महीनासम्मको नयाँ फिल्म १७ वटा फिल्म रिलिजको लाइनअप घोषणा गरेको छ ।
लाइनअपमा स्पाइडरम्यान, भेनम, बुलेट ट्रेन, म्यान फ्रम टोरन्टो, डन्ट ब्रीथ टु, रेसिडेन्ट एभिलसहितका ब्लकबस्टर फिल्म छन् । सोनी पिक्चर्सले नेपालको एप्पल इन्टरटेनमेन्टसँग मिलेर नेपालमा फिल्म रिलिज गर्छ ।
भारतमा यी फिल्महरु रिलिज निर्धारित मितिमै हुने भएपनि नेपालमा भने हलहरु नखुल्दा लाग्ने योजना अन्यौलपूर्ण छ । कोरोनाभाइरस महामारीले भारतीय फिल्मलाई चलायमान बनाउन सोनी पिक्चर्सले ब्लकबस्टर फिल्महरु रिलिज गर्न लागेको हो ।
काठमाण्डौ । विवाहित महिलाको सौन्दर्य प्रतियोगिता ‘मिसेस नेपाल इन्टरनेसनल’ आयोजना हुने भएको छ । कोरोनाभाइरस महामारीले रोकिएको पेजेन्टको नयाँ संस्करण परिमार्जित भई मिसेस नेपाल वर्ल्डको रूपमा आयोजन हुन लागेको आयोजक संस्था रिबन इन्टरटेनमेन्टले जनाएको छ ।
पहिलो संस्करणको घोषणासंगै यस पेजेन्टका बिजेताले सन् २०२२ को जनवरीमा अमेरिकाको लस भेगासमा आयोजना हुने मिसेस वर्ल्डमा नेपालको तर्फबाट प्रतिनिधित्व गर्ने भएकी छिन्। यसवर्ष देखि रिबनले आयोजना गर्ने कार्यक्रममा एकै मन्चबाट मिसेस नेपाल वर्ल्ड र मिसेस नेपाल इन्टरनेसनलका साथै एमएस नेपाल इन्टरनेसनल गरी तीन जना बिजेताको छनोट गरिने भएको छ ।
मिसेस इन्टरनेसनल नेपाल तथा एमएस नेपाल इन्टरनेसनलका विजेताले नेपाललाई प्रतिनिधित्व गरी सन् २०२२ मा सिङ्गापुरमा आयोजना हुने मिसेस इन्टरनेसनल तथा एम। एस। इन्टरनेसनलमा सहभागिता जनाउने छन। यो वर्ष मिसेस वर्ल्डमा नेपालको पहिलो सहभागिता हुनेछ।
बिगतको वर्षहरुमा झैँ सामाजिक मुद्दालाई आफ्नो कार्यक्रमको नारा तथा वर्षभरी विजेताले उक्त मुद्दामा केन्द्रित रही काम गर्नुपर्ने हुँदा यस वर्षलाई मिसेस नेपालले क्यान्सर बिरुद्धको जनचेतना अभियानलाई वर्षको मुद्दा बनाएको छ।
यस अघि सम्पन्न मिसेस इन्टरनेसनलमा सबिता लामिछाने, अनुपमा राई, सुरुची पाण्डे, चन्दा थापा गिरी र भाविषा कोइराला चटौतले उपाधी जितेका थिए। मिसेस इन्टरनेसनलमा यसअघि नेपालबाट सुरुचि पाण्डे, एलाईजा महर्जन, चन्दा थापा गिरीका साथै स्नेहा थापाले प्रतिनिधित्व गरेका थिए ।
काठमाडौं । नेपाली गायन रियालिटी सो ‘सारेगमप लिटिल च्याम्प्स’को घोषणा भएको छ । सोमबार राजधानीमा आयोजित पत्रकार सम्मेलनमा यसबारे जानकारी गराइएको हो ।
नेपाल आइडलका तीन निर्णायकहरु न्यूह बज्राचार्य, इन्दिरा जोशी तथा कालीप्रसाद बाँस्कोटा यसमा पनि जजको रुपमा रहने भएका छन् । कार्यक्रमको सञ्चालन रीमा विश्वकर्मा र मदनकृष्ण श्रेष्ठका छोरा यमनले संचालन गर्ने भएका छन् ।
पहिलो पटक नेपालमा हुन लागिरहेको अन्तर्राष्ट्रिय गायन रियालिटी सोलाई नोबडी प्रोड्युसनले उत्पादन गरेको हो । कार्यक्रमको निर्देशन एलिन श्रेष्ठले गर्नेछन् । यो रियालिटी सो साताको शुक्रवार र शनिवार बेलुका ९ बजे ग्यालेक्सी फोर के र डोको युट्युब च्यानल बाट प्रसारण हुने जनाइएको छ ।
आफ्नो गायन करियर नै रियालिटी सोबाट सुरु भएकाले यसलाई लिएर आफू उत्साहित भएको इन्दिराले बताइन् । विशेषगरि बच्चाहरुसँग मिलेर काम गर्नुपर्ने भएकाले आफू रोमाञ्चक रहेको समेत उनले बताइन् ।
काठमाडौं । फिल्म निर्माता समेत रहेका सन्तोष अधिकारीले निर्माण गरेको राष्ट्रिय गीत ‘म नेपाल हो’को सांगीतिक भिडिओ इन्टरनेट रिलिज भएको छ । अधिकारी स्वयम फिचर्ड म्युजिक भिडिओलाई संविधान दिवसको अवसर पारेर राजधानीमा आयोजित कार्यक्रममा सार्वजनिक गरियो ।
गीत रिलिज कार्यक्रममा अवकाश प्राप्त उपरथी जगदीश चन्द्र पोखरेल, डीआजी ज्ञानेन्द्र महत, क्याप्टेन तथा अभिनेता विजय लामा, निर्देशक दीपेन्द्रकुमार खनाल, देवकुमार श्रेष्ठ, अभिनेता प्रशान्त ताम्राकार लगायतको उपस्थीति थियो ।
निशान कश्यपको निर्देशन रहेको गीतमा सह-कलाकारको रुपमा कञ्चन भुजेल र जस्मिन मुसेओटले अभिनय गरेका छन् । बादल थापा मगर र सुविन सेञ्चुरीको संगीत रहेको गीतमा स्वर पनि दुवैजनाले मिलेर दिएका छन् । भने गीतलाई सुविन सेञ्चुरीले एरेञ्ज गरेका हुन् ।
सार्वजनिक गीतमा अभिनेता अधिकारीले २० भन्दा बढि चरित्र चित्रण गरेका छन् । गीति भिडिओ हेरेपछि उपस्थित पाहुनाले अधिकारीको अभिनयको प्रशंसा गरेका थिए ।
निर्माता अधिकारीको लगानी रहेको फिल्म तीन जन्तु प्रदर्शनको पखाइमा छ । उनले फिल्महरु आमा र घरमा सह निर्माताको रुपमा काम गरेका छन् । उनले फेसन शोको पनि आयोजना गर्दै आएका छन् । कोरोना महामारीका कारण हेरिटेज अफ फेसन सिजन २ को मिति पटक पटक सर्दै आएको छ ।
काठमाडौं । कुनै बेलाको लोकप्रिय साङ्गीतिक समूह ओकिलीका गायक अनिष ओकिली लामो समयपछि दर्शक तथा श्रोतामाझ आएका छन् । उनले आफ्नो अफिसियल युट्युब च्यानलमार्फत सरिताको दिदी शीर्षकको गीत सार्वजनिक गरेका छन्।
गीतमा अनीश ओकिलीको स्वर शब्द तथा सङ्गीत छ । शब्दमा उनलाई अयोध्या पी उपाध्यायले साथ दिएका छन् । यस्तै गीतमा सङ्गीत संयोजन भने चाँद सिंहको छ । गीतलाई सङ्गीतकार राजन इशानले मास्टरिङ गरेका हुन् ।
राजन इशानकै कन्सेप्टमा तयार पारिएको गीतको म्युजिक भिडिओमामा अभिनेता यशराज गराच तथा प्रनिमा दाहालका साथमा सन्दीप क्षेत्रीलाई फिचर गरिएको छ । सन्तोष भुजेलको कोरियोग्राफी, शिवराम श्रेष्ठको छायाङ्कन तथा बिजेश पौडेलको सम्पादनमा तयार भएको उक्त भिडिओलाई बिजेश तथा राजनले निर्देशन गरेका हुन् ।
३ दशकदेखि नेपाली साङ्गीतिक क्षेत्रमा सक्रिय रहेका अनीश ओकिली एक परिचित नाम हो । उनको मेरी ओकिली, गुलाबी जाडो, झ्यालबाट हेरी लगायतका चर्चित गीत छन् ।
काठमाडौं । राष्ट्रपति विद्यादेवी भण्डारीले संविधान दिवसको अवसरमा नेपाली कलाकारिता क्षेत्रका विभिन्न व्यक्तिहरुलाई योगदान पुर्याएबापत मान-पदवी, अलङ्कार र पदकद्वारा विभूषित गर्ने घोषणा गरेकी छिन् ।
स्वरसम्राट नारायणगोपाललाई मरणोपरान्त महाउज्वल राष्ट्रदीपको घोषणा भएको छ । पछिल्लो छिमलमा रुचाइएका अनमोल केसी, प्रकाश सपुत, विष्णु माझी, केकी अधिकारी लगायतको नाम पनि विभूषण तालिकामा उल्लेख छ । सूची :
काठमाडौं । कमेडी च्याम्पियन सिजन २ को उपाधि ताप्लेजुङका भरतमणी पौडेलले जितेका छन् । आज भएको ग्राण्ड फिनालीमा पौडेलले नेपालकै लोकप्रिय कमेडी रियालिटी सो च्याम्पियन जितेका हुन् ।
सिक्किमका विक्की अग्रवाल फस्ट रनरअप र गोरखाका सन्तोष थापा सेकेन्ड रनरअप घोषित भए । जितसँगै भरतमणीले कार र २५ लाख रुपैयाँ जितेका छन् ।
उपाधि जितेपछि नेपाल प्रेससँग कुरा गर्दै दोस्रो कमेडी च्याम्पियन भरतमणीले भविष्यमा पनि कमेडीलाई निरन्तरता दिन आफूलाई प्रेरित गरेको बताए । उनको समर्थनमा प्रशंसकले हर्षोल्लास मनाउँदै नाराबाजी गरेका छन् ।
विश्वभरका दर्शकको मतदानको आधारमा विजेता चुनिएको थियो । अन्तिम प्रतिस्पर्धामा विक्की, सन्तोष र भरतमणीबीच कडा प्रतिस्पर्धा भएको थियो । पौडेलले पूर्वयुवराज पारससहितका नेताहरुको क्यारिकेचर गर्दै चर्चा बटुलेका थिए ।
घरबेटी र पूर्वयुवराज पारश शाहको चरित्र चित्रणलाई दर्शकले रुचाएको बताउँदै उनले जिताउने दर्शकलार्ई धन्यवाद समेत दिए । भरतलाई अघिल्लो सिजनका बिजेता हिमेश पन्त लगायतले पनि बधाई दिएका थिए ।
काठमाडौं । आज राती भएको कमेडी च्याम्पियनको दोस्रो सिजनको उपाधि नेपालको पूर्वीजिल्ला ताप्लेजुङका भरतमणी पौडेलले जिते । उनलाई गोरखाका सन्तोष थापा र सिक्किमका विक्की अग्रवालले कडा टक्कर दिएका थिए ।
राती १० बजेसम्म भोटिङ खुल्ला थियो । दर्शकीय मतको आधारमा भरतमणी सर्वोत्कृष्ट ठहरिए । जितसँगै उनले एउटा कार र २५ लाख रुपैयाँ पनि जितेका छन् ।
फस्टरनरअप विक्की भए भने सन्तोष सेकेन्ड रनरअप घोषित भए । भरतमणीको जितसँगै उनका समर्थकले हर्षोल्लास मनाएका थिए । फस्ट र सेकेन्ड रनरअप विक्की र सन्तोषले पनि भरतलाई बधाई दिएका थिए । हेर्नूस तस्विरहरु :
काठमाडौं । गैरआवासीय नेपाली सङ्घले उत्पादन गर्न लागेको साङ्गीतिक कार्यक्रम ‘एनआरएन द सिङ्गर’ लाई कान्तिपुर टेलिभिजनले प्रसारण गर्ने भएको छ । दुवै पक्षबीच उक्त ‘शो’ प्रसारण गर्न सम्झौता गरिएको छ ।
कार्यक्रम आगामी नोभेम्बरदेखि हरेक शुक्रबार राति ९ः०० देखि १०ः०० बजेसम्म प्रसारण गरिने सम्झौतामा उल्लेख छ । आयोजकका अनुसार यो प्रतियोगिताको फाइनल कार्यक्रम काठमाडौँमै हुनेछ र त्यसको प्रत्यक्ष प्रसारण पनि कान्तिपुर टेलिभिजनबाटै हुनेछ ।
एनआरएनए आइसीसीअन्तर्गत संस्कृति तथा सम्पदा उपसमितिले डायस्पोराका नेपालीभाषी अग्रज र अनुजका स्वर प्रतिभाको पहिचान गर्ने उद्देश्यले टेलिभिजन रियालिटी शो ‘एनआरएन द सिङ्गर’ सुरू गरेको हो ।
संस्कृति तथा सम्पदा उपसमितिका संयोजक गोविन्दप्रसाद गौतमले ‘प्रि अडिसन’ तयारी लगभग सकिएको बताए । गत जुन २७ देखि ‘प्रि अडिसन’ खुला गरिएको थियो । कोरोना महामारीका कारण ‘भर्चुअल अडिसन’ पठाउन आग्रह गरिएको एनआरएनए आइसीसीको भाषा, साहित्य, संस्कृति तथा सम्पदा समितिका संयोजक हिक्मत थापाले बताए ।
दक्षिण एशियाबाहेक विश्वभर छरिएर रहेका सबै नेपाली भाषीले यो प्रतियोगितामा भाग लिन पाउनेछन् । ‘खोजी : एउटा उत्कृष्ट प्रवासी नेपाली आवाजको’ नारा दिइएको यो प्रतियोगिताको निर्णायक मण्डलमा वरिष्ठ सङ्गीतकार शम्भुजित बाँस्कोटा, गायक शम्भु राई, गायिका शर्मिला बर्देवा तथा एनआरएनएका पूर्वअध्यक्ष जीवा लामिछाने छन् ।
यो सांगीतिक रियालिटी सोका अन्तिम १५ प्रतिस्पर्धी छानिएको छ ।
काठमाडौं । घरमा थुप्रिएका पुराना लुगाहरुको व्यवस्थापन सहरीया घरपरिवारको साझा समस्या बन्दै गएको छ । फेसनेवल युवायुवतीहरु त पुराना लुगाहरु सद्दे नै भए पनि लगाउन रुचाउँदैनन् । तर, समस्या पर्छ यतिका लुगा कहाँ थन्क्याउने ?
अनि यही समाजभित्र त्यस्ता घरपरिवार पनि उत्तिकै छन्, जसलाई एकजोर नयाँ कपडा किन्न पनि दशैं पर्खिनुपर्छ । उनीहरुका लागि जिउ ढाक्नु नै ठूलो कुरा हुन्छ । त्यसैले फाटेका, च्यातिएका र थोत्रिएका लुगाले नै काम चलाउँछन् । पुराना लुगा थन्क्याउन समस्या भोगिरहेका र नयाँ लुगा किन्ने क्षमता नभएका मानिसहरुबीच पुलको काम किन नगर्ने ? यही सोचले सुरु भयो, रिसाइकल लुगाको व्यवसाय ।
संसारका विभिन्न सहरमा पुराना लुगाहरु संकलन गरेर सस्तो मूल्यमा बेच्ने पसलहरु धेरै भेटिन्छन् । पेरिस र मिलानजस्ता युरोपका फेसन सहरदेखि सुरु भएको यस्तो अवधारणा अहिले नेपालमा पनि मौलाउँदो छ । केही व्यवसायीले काठमाडौंमै यस्ता पसलहरु सञ्चालन गरिरहेका छन् ।
अघिल्लो लकडाउनअघि काठमाडौंको अनामनगर, बानेश्वर र ललितपुरको जावलाखेल क्षेत्रमा केही फेसन डिजाइनरले पुराना लुगाको संकलन थालेका थिए । संकलित ती लुगालाई पुनः प्रयोगमा आउने किसिमले सफा र चिटिक्क तुल्याएर विक्री गर्ने आउटलेट पनि उनीहरुले खुलाए । अहिले काठमाडौंमा यस्ता आउटलेटको संख्या एक दर्जन पुगेको छ ।
सहर बजारका घरबाट संकलन गरिएका सेकेन्ड-ह्यान्ड लुगालाई पुनः लगाउन मिल्ने गरी धोएर र आइरन गरेर यस्ता आउटलेटमा लुगाहरु बेच्न राखिएको हुन्छ । बिपन्न ग्राहकले खरिद गर्न सक्ने गरी १० देखि ५०० रुपैयाँसम्म छानेर लुगाहरु यी आउटलेटमा किन्न पाइन्छ । प्रायः सुकुम्बासी बस्ती र निम्न वर्गका मानिस यस्ता पसलका ग्राहक हुने गरेका छन् । वातावरणीय, आर्थिकरुपमा मितव्ययी, सामाजिकजस्ता धेरै कोणबाट लुगाहरुको पुनःप्रयोग स्वागतयोग्य कुरा रहेको फेसन डिजाइनर बताउँछन् ।
फास्ट फेसनले बढायो चुनौति
रिसाइकल लुगामा काठमाडौंका दुई मोडल ।
बजार ट्रेन्डअनुसार अघि बढ्ने फेसनको प्रवृत्तिलाई आमरुपमा फास्ट फेसनको रुपमा बुझने गरिन्छ । तीव्ररुपमा बदलिने फास्ट फेसनले गर्दा कुनै एउटा स्टाइल लामो समय रहँदैन । जसले गर्दा एउटा ट्रेन्ड हेरेर किनिएको लुगा अर्को महीना पुरानो हुनसक्छ । फेसनअनुसार नयाँ नयाँ लुगा किन्दै जाँदा पुराना लुगा थुप्रिने समस्या बढी हुने गर्छ ।
नेपाली फेसन बजार फास्ट फेसनमा आधारित छ । नेपालको फास्ट फेसन हङकङ, चीन र थाइल्यान्डजस्ता बजारमा निर्भर छ । युरोपबाट एसियामा भित्रिएको फेसनको यो प्रवृत्तिले एकातर्फ आर्थिकरुपमा चुनौति सिर्जना गरेको छ भने अर्कोतर्फ वातावरणीयरुपमा । फेसन डिजाइनर यस्तो बेला फास्ट फेसनसँगै लुगाको पुनः प्रयोग हुनु वातावरणीयरुपमा महत्वपूर्ण हुने बताउँछन ।
थुप्रिएर बसेका लुगालाई पुनः प्रयोगमा ल्याउन खुलेका यस्ता पसलमा सर्वसाधारणले निकै कम मूल्यमा छानीछानी लुगा किन्ने गर्छन् । नेपालमा पनि सेकेन्ड ह्यान्ड कपडाको बिक्री-वितरण गरिदै आएको छ । यसरी लगाइने लुगाको फाइदा धेरै हुने जानकार बताउँछन् । उनीहरुको बुझाइमा पुराना कपडाको पुनःप्रयोग हुँदा खर्चमा पनि बचत हुन्छ र लुगाको मूल्य पनि सस्तो हुँदा विपन्न मानिसलाई फाइदा पुग्छ ।
साथै, सँधै पानीको अभाव हुने काठमाडौंजस्ता ठूला सहरमा लुगाको पुनःप्रयोगले पानीको बचत हुने र लुगा धुन प्रयोग हुने रसायनमा पनि कमी आउने उनीहरुको भनाई छ । यिनै कारणले गर्दा नेपालमा लुगाको पुनःप्रयोग गर्ने ट्रेन्डमा वृद्धि भएको देखिन्छ ।
जसले पहिलोपटक यस्तो अवधारणा ल्याए
लुगाको रिसाइकल अवधारणा ल्याएर पहिलोपटक नेपालमा थ्रीप्ट पसल संचालन गर्ने व्यक्ति हुन् चिजमान गुरुङ । चिजमान गुरुङले सन् २०१४ देखि काठमाडौंकाे सामाखुशीमा यस्तो आउलेट सञ्चालनमा ल्याएका थिए । उनले थन्किएर बसेका लुगाहरुलाई संकलन गरेर पुनः प्रयोगमा ल्याउने व्यवसाय संचालन गरेका थिए । सुरुमा लुगाहरु दान गर्न रुची राख्ने उनले लुगाहरु बेच्ने सोच बनाएर थ्रीप्ट पसल चलाउन थालेका हुन् ।
‘पुनः प्रयोगको फाइदा बुझेपछि मैले पसल नै संचालन गर्ने सोच बनाएको हुँ । अहिले राम्रैसँग चलिरहेको छ’ नेपाल प्रेससँग उनले भने । सुरुमा बसुन्धारा, बसपार्क, टुँडिखेल र महोत्सवमा गएर लुगा बेच्ने उनी अहिले सामाखुशिमा ‘सुखावती स्टोर’ संचालन गरिरहेका छन् । सुरुमा साथीहरुसँग लुगा संकलन गरेर व्यवसाय थालेका उनलाई अहिले लुगा डोनेसन गर्नेको घुइँचो छ । संकलन भएका लुगालाई धोएर तथा रिसाइकल गरेर पुनः प्रयोग गर्न मिल्ने रुपमा उनले पसलमा राखेका छन् ।
अहिले उनको व्यवसायलाई ९ जनाले सहयोग गरिरहेका छन् जसमा ६ जना महिलाहरु छन् । उनको एक सहयोगीले भनिन् ‘सुरुमा समाजसेवा गर्ने तरिकाले व्यापार गरेका थियौं । पैसा नपरेको सामानको महत्व हुँदैन भनेर सस्तोमा दिने भनेर पसल खोल्ने निर्णय भएको हो ।’ लुगा अभाव भएका निम्न वर्गको मानिसहरुलाई लक्षित गर्दै खोलिएको उक्त स्टोरमा अहिले १० रुपैयाँदेखि ५०० रुपैयाँसम्म लुगा किन्न पाइन्छ । ‘दैनिक श्रम गरेर खानेहरुले दिनहुँ लुगा फेर्न खोज्छन्, काठमाडौंमा पानीको अभाव भएकाले दिनहुँ कपडा फेरेर लगाउन खोज्नेहरुको लागि लक्षित गरेर खोलेका हौ’ उनले भनिन् ।
पसल सुरु गर्दा दैनिक ३०० देखि ५०० रुपैयाँ व्यापार गर्ने उक्त पसलले अहिले भने दैनिक पाँच हजारसम्मको व्यापार गर्छ । ‘एउटा कपडाको लाइफ साइकल बढ्नु भनेको वातावरणको लागि पनि धेरै राम्रो कुरा हो,’ उनी भन्छिन्, ‘सस्तोमा कपडा पाउनु भनेको पैसा बचत हुनु पनि हो ।’
यो संस्थाले संचालनमा आएको ६ वर्षमा ३० हजार टनभन्दा बढी लुगालाई पुनः प्रयोग गरेको छ । ‘यी सबै लुगा ल्यान्डफिलमा जाने थियो । कपडा कुहिने वस्तु नभएकाले वातावरण प्रदुषण त गथ्र्यो नै’ उनको कथन छ । उनीहरुले व्यापार मात्र गर्दैनन् । यहाँबाट संकलन भएको रकम गरिबलाई खुवाउने काम पनि गर्दै आएका छन् ।’
पसल सुरु गर्दा दैनिक ३०० देखि ५०० रुपैयाँ व्यापार गर्ने उक्त पसलले अहिले भने दैनिक पाँच हजारसम्मको व्यापार गर्छ । ‘एउटा कपडाको लाइफ साइकल बढ्नु भनेको वातावरणको लागि पनि धेरै राम्रो कुरा हो,’ उनी भन्छिन्, ‘सस्तोमा कपडा पाउनु भनेको पैसा बचत हुनु पनि हो ।’
दैनिक ज्यालादारीमा काम गर्ने र आर्थिक स्थिती कमजोर भएका ग्राहक पसलमा जान्छन् । ‘कपडा रियुज गर्दाको फाइदा बुझ्ने र पैसाको बचत गर्न चाहने ग्राहक आइरहेका छन्’ उनी भन्छिन्, ‘४/५ वर्ष अघि निम्न वर्गका मानिस मात्र आउने गर्दथे भने अहिले हुनेखाने युवा पनि आउने गर्छन् ।’
यति मात्र हैन, यो स्टोरले सातजनालाई रोजगारी दिएको छ । ‘यहाँ काम गर्नेहरु सीप पनि सिकिरहेका छन्,’ उनी भन्छिन् ।
अहिले सुखावती स्टोरले लुगाको विक्रीबाट हुने आम्दानीबाट निम्न वर्गाका २३ जना बालबालिकालाई तीन वर्षदेखि पढाइरहेको छ । २ जना बच्चालाई भुकम्पदेखि पढाउने र खुवाउने काम पनि स्टोरले गरिरहेको छ । साथै, विद्यालय र कलेजमा पुगेर गुरुङसहितका व्यवसायीले लुगाको पुनःप्रयोगबारे चेतना जगाउने काम पनि गरिरहेका छन् ।
दशैं आउन लाग्यो, थ्रीप्ट स्टोर जानूस
फेसन डिजाइनर अलिया गिरी
यस्तो शैली वातावरणदेखि लिएर सबै पक्षलाई राम्रो हो । नेपालमा अरुले लगाएको लुगा लगाउन मान्दैनन्, तर लुगा एकचोटी रिसाइकल गर्यो भने त्यो नयाँ नै हुन्छ । आफूले युज नगरेको लुगा अरुले नै प्रयोग गर्न पाउँछ ।
आर्थिक स्थिती न्यून भएकाले थ्रिप्ट स्टोरमा गएर किन्न सक्छन् । हामीले प्रयोग गर्न नमिल्ने कपडा भयो भने त्यसलाई रिसाइकल गरेर व्यागहरु बनाउन विभिन्न काममा प्रयोग गर्न सकिन्छ । नेपालमा मात्र होइन यो फास्ट फेसनको ट्रेन्ड जुन चलिरा’को छ, त्यो एकदम राम्रो हो । फास्ट फेसनले थ्रिप्ट स्टोरहरु खुल्ने क्रम बढिरहेको छ । लुगा अभाव हुनेलाई एकदमै राम्रो हुन्छ ।
हामीले प्रयोग गरेका कपडा ल्याण्डफिल हुन धेरै समय लाग्छ । यसले वातावरणमा असर गर्दछ । फेसन ट्रेन्ड भन्ने कुरा एक ठाउँमा सीमित हुँदैन । जमानामा चलेका फेसन अहिले नेपालमा फास्ट फेसनले ट्रेन्ड भइरहेको छ । फास्ट फेसनले धेरै छिटो डिजाइन चेन्ज गर्छ त्यसले गर्दा थ्रिप्ट स्टोर एकदमै प्रभावकारी हुन्छ ।
यस्तो लुगाहरु सबैले किन्न सक्छन् । हामीले लुगा धुन धेरै पानी र केमिकल खर्च हुन्छ । बिजुली खर्च हुन्छ । त्यसको लागि पनि फाइदा हुन्छ । ल्याण्डफिलमा कपडाहरु धेरै गैरहेको हुन्छ । हामीले लुगा फाल्नै पर्यो भने कहीँ न कहीँ फाल्नैपर्ने हुन्छ । थ्रिप्ट स्टोर भन्ने बित्तिकै पुराना लुगा मात्र पाइने होइन, कतिपय ब्रान्डेड लुगाहरु पनि पाइन्छ ।
आर्थिकरुपमा हेर्दा मैले कुनै एउटा लुगा २ हजार रुपैयाँमा किनेँ भने थ्रीप्ट स्टोरमा त्यति मूल्य पर्दैन । बजारमा नभेटिएका कुरा थ्रीप्ट स्टोरमा भेटिन्छन् । चाडबाड आउन लागेको छ । सस्तोमा लुगा किन्नुपरेको छ भने थ्रिप्ट स्टोरमा जाँदा राम्रो हुन्छ । आर्थिक अवस्था कमजोर भएका मानिसहरुको लागि यो सर्वोत्तम विकल्प हो ।
काठमाडौं । कलाकार रमेश केसी मट्टारेको हृदयघातका कारण निधन भएको छ । सुटिङका क्रममा अचानक ढलेका उनलाई गंगालाल हृदयरोग केन्द्र पुर्याउँदा डाक्टरले मृत घोषित गरेका थिए ।
आइतबार बिहान ‘हर्के हवल्दार’ टिमको एउटा म्युजिक भिडिओ सुटिङ लागि उनी आइतबार बिहानै मोटरसाइकल चढेर छन्दे स्टुडियो पुगेका थिए । तारकेश्वर नगरपालिका–६ महाँकालमा रहेको स्टुडियोमा पुगेको केही समयपछि उनी एक्कासी बेहोस भएर ढलेको एक कलाकारले बताए । त्यसपछि उनलाई तुरुन्त गंगालाल अस्पताल पुगे पनि ज्यान जोगिन सकेन ।
६९ वर्षिय केसी केसी लामो समयदेखि मुटुसम्बन्धी समस्याबाट पीडित थिए । उनको आजै पशुपति आर्यघाटमा अन्त्येष्टि गरिँदैछ । रंगमञ्चबाट अभिनय थालेका केसीले थुप्रै थुप्रै टेलिसिरियल र फिल्मसमेतमा अभिनय गरेका छन् । उनी पछिल्लो समय ‘एकादेशको चुरिफुरी’, ‘हर्के हवल्दार’ लगायत सिरियलमा देखिँदै आएका थिए । उनका श्रीमती, ३ छोरी र २ छोरा छन् ।
काठमाडौं । विष्णु माझीको स्वरमा रहेको गीत ‘चरी जेलैमा’ यो साता पनि युट्युवमा शीर्ष स्थानमा परेको छ । यो गीतले २६ दिनभित्रै २ करोड भ्यूज पार गरेर कीर्तिमान कायम गरेको छ । पछिल्लो साता यो गीतलाई ३० लाख २० हजार २१८ पटक हेरिएको छ भने कूल २ करोड १९ लाख ७५ हजार ९०९ छ ।
प्रकाश सपूतको शब्दमा रहेको गीत ‘कुरा बुझ्न पर्च’ दोस्रो सर्वाधिक हेरिने नेपाली गीत बनेको छ । एक सातामा मात्र यो गीतलाई १३ लाख ९५ हजार १९० पटक हेरिएको छ भने कूल १ करोड ८४ लाख ४३ हजार ३१५ पटक युट्युवमा हेरिएको छ ।
यस्तै प्रमोद खरलेको स्वरमा रहेको गीत ‘ए जिन्दगी’ तेस्रो स्थानमा छ । पछिल्लो सातामा यो गीतलाई ८ लाख ६१ हजार १२ पटक हेरिएको छ । यो गीतको कूल भ्यूज संख्या २४ लाख ३४ हजार ४२९ छ । हेर्नूस सूची :
विष्णु माझी ‘चरी जेलैमा’ : ३,०२०,२१८
प्रकाश सपूत ‘कुरा बुज्न पर्च’ : १,३९५,१९०
प्रमोद खरेल ‘ए जिन्दगी’ : ८६१,०१२
बसन्त थापा ‘साल को पात उडायो’ : ७१८,१६१
महेश कफ्ले ‘माया बिरनी-२ ततो गोली’ : ७१५,०२९
मेलिन राइ ‘आयो तीज को लहर’ : ६२७,७९७
मेलिन राइ ‘जोखौ माया’ : ६१८,२३०
निकिता थापा ‘तिम्रो मन मा ए कान्छा’ : ६१३,१९८
रमेश राज भट्टराई /रचना रिमाल ‘भन भन साइला’ : ५८४,३२३
काठमाडौं । टेलिभिजन रियालिटी सो कमेडी च्याम्पियन सिजन दुईको ग्रान्ड फिनाली आज बेलुका हुँदैछ । आज राती ११ बजेसम्म सोले नयाँ विजेता पाउनेछ ।
ताप्लेजुङका भरतमणी पौडेल, सिक्किमका विक्की अग्रवाल र गोरखाका सन्तोष थापाबीच उपाधिका लागि प्रतिस्पर्धा हुँदैछ ।
निर्देशक विशाल भण्डारीका अनुसार विजेता घोषणाको लाइभ प्रसारण बेलुकी साढे १० बजेदेखि सुरु हुनेछ । साढे ११ बजेसम्म दर्शकले कमेडी च्याम्पियन सिजन दुईको विजेता पाउनेछन् ।
विभिन्न नेता तथा कलाकारको क्यारिकेचर गरेर ताप्लेजुङका पौडेल चर्चामा छन् । सिक्किमका अग्रवाल भने कमेडीमा नयाँ प्रयोगहरु गरिरहेका छन् । उनी क्यारिकेचर गर्दैनन् ।
दर्शकले गोरखाका थापालाई पौडेल र अग्रवालको संयोजनको रुपमा लिने गर्छन् । ग्रान्ड फिनाली चाहिँ कान्तिपुर टेलिभिजन र ओएसआर डिजिटलमा हेर्न पाइने भएको छ ।
काठमाडौं । कमेडी च्याम्पियन सिजन २ को ग्रान्ड फिनाली आज राती ९ बजेदेखि सुरु हुँदैछ । ग्रान्ड फिनाली अघि तीनजना अन्तिम प्रतिस्पर्धीले नेपाल प्रेससँग भलाकुसारी गरेका छन् । प्रतिस्पर्धीहरु भरतमणी पौडेल, विक्की अग्रवाल र सन्तोष थापाले आफूहरुले जित्ने आत्मविश्वास व्यक्त गरे । संक्षिप्त भिडिओ अन्तर्वार्तामा कुन प्रतिस्पर्धीले के भने ?
भरतमणी : ढुकढुक भैरहेको छ । हामी सबैलाई ढुकढुक भैरहेको छ । अरुले जित्दा पनि हामी खुशि नै हुन्छौं । हामीले सकेको गरेका छौं । यसको मूल्यांकन दर्शकले गर्नुहुन्छ । कमेडी च्याम्पियनजस्तो बेस्ट प्लेटफर्म भेटेको हो । जसरी पनि जित्छु भन्ने आशा थियो ।
जसले जितेपनि खुशि नै हुन्छु । इमान्दारीपूर्वक भएर भन्दा अघिल्ला साथीहरुलाई फलो गरेर आएका हौं हामी । भोलिको दिनमा पनि हामी केही गर्न चाहन्छौं कमेडी क्षेत्रमा । जानेको र बुझेको कुरालाई प्रस्तुत दिनेनै छौं । हामीलाई पनि डर लागेको छ । दर्शकले विजेता छानिसक्नु भएको होला । म डराउनु भनेको सबै दर्शक डराउनु हो ।
हामी कारको लागि लडेको होइन । यो त प्राइज मात्र हो । हामीले निखारता देखाउन पाएका छौं । जसले कार जितेपनि हामीले हामीले सँगै कुदाउने निर्णय गर्यौं । सहकार्य गर्दा यो कार हामीले नै युज गर्छौै ।
विक्की : रिजल्टले माइन्ड अकुपाइड भएको छ । टाढाबाट फस्ट टाइम जित्छु भनेरै आएको हो । भाग्य पल्टिने कुरा म गर्दिन । क्वालिटी अनुभव पाएको छु । जसले जितेपनि जित्ने नै हो । मोटिभेट भएर आएँ गाउँ पुग्दा । सबैको माया र मोटिभेटसनले हामी यहाँ छौं ।
सन्तोष : हामी तीनको जितभन्दा पनि कमेडीको जित हो । म सिकारु हुँ । दाईहरुले भोगेका अनुभव सेयर गरेका हौं । जित एउटाको भएपनि हामीले हाम्रो यात्रालाई रमाइलो तरिकाले अघि बढ्न र कमेडीलाई चिन्ने मौका पाइयो । जिल्लामा जाँदा सोचेको भन्दा फरक भेटियो । त्यहाँ भेट्दा उहाँहरुको माया पाइयो । उहाँहरुको समर्थन देख्दा राम्रै काम गरेको महसुस भयो । गर्व महसुस भयो ।
मुम्बई । भारतको आयकर विभागले बलिउड अभिनेता सोनु सुदले २० करोड भारुभन्दा बढी कर छलेको जनाएको छ । सुदको मुम्बईस्थित घरमा लगातार तीन दिन छापा मार्दै विभागले शनिबार विज्ञप्ति सार्वजनिक गरेको हो ।
विदेशी दाताबाट अभिनेता सुदले क्राउड फन्डिङ प्लेटफर्मबाट २.१ करोड ननप्रोफिट सम्पत्ति जुटाएको र यो कार्य भारतीय कानूनको विपरित भएको विभागले जनाएको छ । पछिल्लो साता दिल्ली मुख्यमन्त्री अरविन्द केजरीवालसँग सहकार्य घोषणा भएको केही दिनमै आयकर विभागले सुदको घरमा छापा मारेको हो ।
भारतमा सुरु भएको कोरोनाको पहिलो लहरको बेला सुदले स्थापना गरेको सोनु सुद फाउन्डेसनलाई अहिलेसम्म १८.९४ करोडको डोनेसन मिलेको छ । जसमध्ये १.९ करोड विभिन्न कार्यमा खर्च भएको छ भने १७ करोड अहिले पनि खातामै छ ।
स्रोतका अनुसार लखनउको एक रियल स्टेट कम्पनीसँग सोनु सुदको फाउन्डेसनले हालै एउटा व्यापार सम्झौता गरेको र यसमा पनि कर छलिएको अनुमान गरिएको छ ।
महाराष्ट्रमा सत्तारुढ शिव सेना र दिल्लीमा सत्तारुढ आम आदमी पार्टीले यो समयमा भएको छापालाई लिएर प्रश्न उठाएका छन् । तर, बीजेपीले चाहिँ छापामारी र समयबीच कुनै सम्बन्ध नरहेको बताएको छ ।
काठमाडौं । गायक बुद्धी सुवेदीले पुर्वेली भाकामा आधारित, सिन्कौलीको पात बोलको गीत बजारमा ल्याएका छन् । गायक सुवेदीकै शब्द र संगीतमा तयार भएको गीतको संगीत संयोजन बरिष्ठ संगीतकार शिला बहादुर मोक्तानले गरेका हुन् ।
पुर्वी पहाडी जिल्लाहरुमा जात्रा तथा पर्वका बेला प्रख्यात पुर्वेली भाकामा आधारित गीतमा चर्चित कलाकार, सुरविर पण्डित (दारी बा), रिया लामा, एम बी गुरुङ तथा कृष्ण विके लगायतका कलाकारको नृत्य हेर्न सकिन्छ । दिपक गुरुङको सिनेमाटोग्राफी रहेको सो भिडियोको निर्देशन एमबी गुरुङले गरेका हुन् ।
काठमाडौं । अभिनेत्री करिश्मा मानन्धर अहिले कक्षा १२ को परीक्षामा व्यस्त छिन् । परीक्षाको चटारोले उनी सितिमिति फोन उठाउँदिनन् । नयाँ नम्बरबाट फोन आयो भनेपनि उनी ट्रु कलर एपबाट जानकारी लिएर मात्र उठाउँछिन् ।
शुक्रबार राती ९ बजेर ५३ मिनेटमा आएको फोनले भने उनलाई छक्क तुल्याइदियो । करिश्मालाई यो फोन थियो एमाले अध्यक्ष तथा पूर्वप्रधानमन्त्री केपी शर्मा ओलीको ।
ओलीले करिश्मालाई फोन गरेर परीक्षाबारे सोधेका थिए । करिश्माले ओलीसँगको संवादबारे सामाजिक संवादमा पनि उल्लेख गरेकी छिन् । ‘सुरुमा मजाक हो कि भन्ने लाग्यो तर उहाँ हाम्रो देशको पूर्वप्रधानमन्त्री हुनुहुन्थ्यो’ करिश्मा लेख्छिन्, ‘उहाँको आवाज सुन्दा घरको मुलीले छोराछोरीलाई गरेजस्तो सुनिन्थ्यो ।’
सुरुमा ओली बोलेको भनेर करिश्मालाई विश्वास लागेन । अनि ओलीले डुंगाको कथा सुनाए । यो कथा सुनेर मात्र आफूलाई ओली भन्ने लागेको सन्दर्भ पनि करिश्माले उल्लेख गरेकी छिन् ।
‘आधुनिताको यो दौडमा सद्भाव र मायाको दूरी मेटाउन यत्रो ठूलो भएर पनि सामान्य कलाकारलाई कल गरिदिनुभएकोमा धन्यबाद केपी बुवा ।’ करिश्माले ओलीको फोनलाई पुष्टि गर्न मोबाइलको स्क्रिनसट समेत सेय गरेकी छिन् ।
न्यूयोर्क । टेनिस स्टार भेनिस विलिम्यस फेसनको कारणले पनि चर्चामा आउँछिन् । यसैसाता सम्पन्न विश्व फेसन मेला मेट गालामा भेनस आफ्नो पहिरनले पुनः चर्चामा आइन् ।
भेनसको यो पहिरनमा नेपाल जोडिएको थियो । नेपाली फेसन डिजाइनर प्रबल गुरुङले डिजाइन गरेको एटेलियर पहिरनमा भेनस आकर्षक देखिएकी थिइन् । गुरुङको क्रिमसन सिल्क र सिल्क डचेज गाउनमा भेनस हट एन्ड सेक्सी देखिएकी थिइन् ।
भग म्यागजिनले प्रबल र भेनसको यो फेसन दोस्तीलाई सिनेम्याटिक ग्ल्यामर भनेको छ । मेट गालाको लेक्जिअन फेसन खण्डमा प्रबलको डिजाइनको प्रस्तुति थियो । आगामी स्प्रिङ र समरका लागि प्रबलले डिजाइन गरेको एटेलियर गाउनलाई भेनले पहिरिएकी थिइन् ।
‘फेसन डिजाइनरको रुपमा पनि मैले निकै क्षमतावान प्रबल गुरुङसँग काम गर्दा महान अनुभव महसुस गरेँ’ भेनले भगसँग मेट गालापछिको इभेन्टमा भनिन्, ‘म कति खुशि छु, वर्णन गर्न सक्दिन ।’
गुरुङले सन् १९३० देखि १९६० सम्मको हलिउड फिल्ममा रहेको फेसन शैलीलाई यो डिजाइनमा प्रस्तुत गरेका थिए ।
काठमाडौं । दशौं नेपाल-युरोपियन फिल्म फेस्टिभल आजदेखि भर्चुअलरुपमा सुरु भएको छ । फेस्टिभललाई सम्बोधन गर्दै चलचित्र विकास बोर्डका अध्यक्ष दयाराम दाहालले कोरोना महामारीले थलिएको नेपाली फिल्म क्षेत्रलाई चलायमान बनाउन फेस्टिभल महत्वपूर्ण हुने बताए ।
आठ दिनसम्म भर्चुअलरुपमा संचालन हुने फेस्टिभलमा ११ वटा युरोपेली फिल्म, पाँच नेपाली फिल्म र २३ वटा वातावरण संरक्षण तथा जलवायु परिवर्तनबारे बनेका फिल्म प्रदर्शन हुनेछन् ।
युरोपेली डेलिगेसनका कार्यवाहक राजदूत स्टेफन माइकनले फेस्टिभलको माध्यमबाट नेपाल र युरोप थप नजिक हुने बताए । फेस्टिभल स्कोप प्लेटफर्मबाट भर्चुअलरुपमा फिल्म प्रिमियर गरिने भएको छ ।
फेस्टिभलका सद्भावना दूत समेत रहेका अभिनेता दयाहाङ राईले आगामी वर्ष भौतिकरुपमै फेस्टिभल आयोजना हुने पर्खाइमा आफूहरु रहेको बताए । युरोप र नेपालका जीवनशैली र संस्कृति आदानप्रदान हुने उनले बताए ।
उक्त प्लेटफर्ममा खाता खोलेर दर्शकले निःशुल्करुपमा फिल्म हेर्न पाउनेछन् । भर्चुअल शुभारम्भ कार्यक्रममा फिल्म निर्देशक, निर्माता र फिल्म पदाधिकारीहरु सहभागि थिए ।
फेस्टिभलमा देखाइने नेपाली फिल्महरुमा धोन्डुप छिरिङको ‘आमा खान्डो’, विनोद पौडेलको बुलबुल, सहायक श्रीमानको को-हजब्यान्ड, सर्जियो बासोको सरिता : टेल मी हु आइएम, राजन कठेतको ‘स्प्लिट इन्ड्स’ छन् ।
कार्यक्रममा लैंगिक समानताबारे निर्माण भएका छोटो फिल्मका विजेताहरु घोषणा गरिएको थियो । फिल्म प्रदर्शनसँगै फेस्टिभल अवधिभर नेपाली फिल्म क्षेत्रका विभिन्न व्यक्तिहरुबीच विभिन्न आयामबारे छलफल समेत हुने कार्यक्रम छ ।
काठमाडौं । प्रमोद खरेल र मेलिना राईद्वारा स्वरबद्ध गीत ‘हिमालबाट हिउँ पग्लि’ रिलिज भएको छ । शुक्रबार राजधानीमा आयोजित पत्रकार सम्मेलनमा म्युजिक भिडिओसहित लिरिक्स पुस्तिका लन्च गरियो ।
फिल्म निर्देशक समेत रहेका आकाश अधिकारी र नायिका नीता ढुंगाना फिचर्ड गीतमा सुरेश अधिकारीको संगीत छ । भिडिओमा नायक शिव श्रेष्ठले पनि अभिनय गरेका छन् ।
राष्ट्रिय भावना र सन्देशले ओतप्रोत रहेको गीत पछिल्लो राजनीतिक परिस्थितीमा झनै सान्दर्भिक हुने आयोजित प्रेसमिटमा जानकारी दिइयो । चिन्तामणी शिवाकोटीको शब्द रहेको गीतलाई ओएसआर युट्युव च्यानलबाट लन्च गरिएको छ । गीतमा अधिकारीको कन्सेप्ट रहेको छ ।
काठमाडौं । नेपाल म्यूजिक भिडिओ निर्देशक समाजको कार्यसमिति बैठकले म्यूजिक भिडिओका बिभिन्न सृजनात्मक पाटोमा काम गर्ने निर्देशक, कोरियोग्राफर र छायाँकारको प्रतिलिपि अधिकार सुनिश्चित गर्न पहल कदमी अगाडी बढाउने निर्णय गरेको छ । भदौ ३१ गते समाजको केन्द्रिय कार्यालय मालिगाउँ, काठमाण्डौमा बसेको बैठकले उक्त निर्णय गरेको हो ।
प्रतिलिपि अधिकारको सुरक्षाको लागि समाजले कार्यबिधि बनाएर सम्वन्धित पक्षहरुसंग सहकार्य गरि अघि बढ्ने गरि निर्णय भएको समाजका महासचिव सुव्रतराज आचार्यले बताए ।
‘विश्वभरी सार्वजनिक स्थानहरु जस्तैः क्याफे, रेष्टुराँ, बार तथा क्लवहरु, सार्वजनिक यातायात, एअरपोर्ट, बसपार्क, सार्वजनिक कन्सर्ट कार्यक्रमहरु, हवाईजहाज लगायतमा नेपाली म्यूजिक भिडियोहरु प्रदर्शनी हुन्छ भने त्यसबापत सर्जकहरुले प्राप्त गर्नुपर्ने बौद्धिक सम्पत्ति अन्तर्गतको अधिकार पाइरहेको अवस्था छैन । त्यसकारण म्यूजिक भिडियो निर्देशक समाजको अगुवाईमा नेपालका सम्पूर्ण भिडियो निर्देशक, कोरियोग्राफर तथा छायांकारहरुको बौद्धिक सम्पत्ति रक्षार्थ यो निर्णय गरिएको हो’, आचार्यले बताए ।
यो कामबाट म्युजिक भिडिओका सर्जकहरुको अधिकार सुनिश्चित भई आर्थिक लाभ प्राप्त हुने र यो निर्णय ऐतिहासिक हुने महासचिव आचार्यको दाबी छ ।
बैठकले म्यूजिक भिडिओलाई राज्य मातहत ल्याउनको लागि आवश्यक प्रक्रिया अगाडि बढाउने निर्णय पनि गरेको छ । ‘हालको अवस्थामा म्यूजिक भिडिओहरु राज्यको मातहतमा नरहेकोले यसलाई फिल्म निर्माणको एक पाटोमा राख्नुपर्ने आवश्यकता रहेको छ । त्यसकारण म्यूजिक भिडिओलाई पनि राज्यको सम्वन्धित निकाय मातहतमा ल्याउनको लागि आवश्यक प्रकृया तत्काल सुरु गर्ने निर्णय पनि गरेका हौँ’, समाजका अध्यक्ष बिधान कार्कीले बताए ।
काठमाडौं । प्रतिष्ठित टाइम म्यागजिनले यसवर्ष संसारका सय प्रभावशाली व्यक्तिहरुको सूची सार्वजनिक गरेको छ । सूचीमा बेलायती राजकुमार प्रिन्स ह्यारी र उनकी पत्नी मेगन मर्केलदेखि भारतीय प्रधानमन्त्री नरेन्द्र मोदीसम्म छन् ।
आइकन, पायोनियर्स, टाइटन्स, आर्टिस्ट, लिडर्स र इन्नोभेटर्स विधामा म्यागजिनले सूची सार्वजनिक गरेको हो । सूचीमा तालिबानको अफगानिस्तान सरकारका उपप्रधानमन्त्री अब्दुल घानी बरदारसम्म छन् ।
कला क्षेत्रबाट टाइटानिक नायिका केट विन्सलेट, अस्कर विजेता निर्देशक केओल झाओ, नायिका स्कारलेट जोहान्सन छन् । हेर्नूस सूची :
काठमाडौं । आगामी कार्तिक ११ गते बिहिवारदेखि मुलुकै ठूलो ‘रियालिटी डान्स च्याम्पियन शो’ हुने आयोजना हुने भएको छ । इन्टरनेशनल डान्स एकेडेमी एण्ड फिल्मस् प्रालिले ‘रियालिटी डान्स च्याम्पियन शो’ शुरु गर्न लागेको हो ।
काठमाडौंको द एभरेष्ट होटलमा बिहिबार भएको पत्रकार सम्मेलनमा कि एडभर्टाइजिङ र कान्तिपुर टेलिभिजनबीच सम्झौता गर्दै कार्यक्रम शुभारम्भको घोषणा गरिएको हो । कार्यक्रममा कि एडभर्टाइजिङ सर्भिस प्रालिका अध्यक्ष रविन्द्रकुमार रिजालले उक्त शोमा १६ वर्ष भन्दा माथि र ४५ वर्षभन्दा मुनिका प्रतिस्पर्धीलाई भाग लिन दिइने जानकारी दिए ।
दशैँपछि रियालिटी शोे शुरु हुने जानकारी उनले दिए । कान्तिपुर टेलिभिजनबाट सो प्रशारण हुने भएको छ ।
उनले भने, ‘यस मेगा शोमा १६ वर्ष भन्दामाथि र ४५ वर्ष भन्दा मुनिका प्रतिष्पर्धीलाई भाग लिन दिइनेछ, यो सबैका लागि हो तर पनि यो उमेर समूहका प्रतिष्पर्धीहरुलाई प्राथमिकतामा राखिएको छ, अहिले कान्तिपुर टेलिभिजन र कि एडभर्टाइजिङ सर्भिस प्रालिबीच सम्झौत भएको हो, हामी डान्स शो दशैँपछि शुरु गर्छौं ।’
उक्त सो प्रत्येक बिहिवार र शुक्रबार गरी हप्ताको दुई दिन बेलुकी ९ः०० बजे प्रशारण हुनेछ । डान्स च्याम्पियनका निर्णायकमा नायिका निरुता सिंह, कोरियोग्राफर जगत रावल र डान्सर आस्मा विश्वकर्मा रहेका छन् । त्यस्तै कार्यक्रम प्रस्तोताको रुपमा उमेश राई (फुलन्देकी आमा) रहनेछन् । ३२ भागको यो कार्यक्रम आयोजनालाई २५ लाख खर्च हुने जनाइएको छ ।
काठमाडौं । संगीत रोयल्टी संकलन समाजको अध्यक्षमा पुनः सुरेश अधिकारी चयन भएका छन् । बुधबार काठमाडौंमा सम्पन्न समाजको १२ औं साधारण सभाले अधिकारीलाई नेतृत्वमा चुनेको हो ।
सदस्यहरुमा गीतकारतर्फ चन्द्र शर्मा, बी पाण्डे, सुवास रेग्मी, सुजन लम्साल, विमल अधिकारी चयन भएका छन् । संगीतकारतर्फ वसन्त सापकोटा, पीएन सापकोटा, शिरिष देवकोटा, रामु खड्का, राजेन्द्रकुमार कार्की सदस्यमा चयन छन् ।
अधिकारी तेस्रो कार्यकालको लागि अध्यक्षमा चुनिएका हुन् । आगामी कार्यकालको मुख्य एजेन्डा रोयल्टी विकास बोर्ड गठन र रोयल्टी मापदण्ड निर्धारण हुने नेपाल प्रेससँग उनले बताए ।
साधारणले सभाले अध्यक्ष र सदस्य चयन गरेपनि अन्य पदाधिकारी चयन गर्न बाँकी छ । केही दिनमा कार्यसमितिले पूर्णता पाउने अध्यक्ष अधिकारीले जानकारी दिए ।
न्यूयोर्क । यसवर्षको मिस नेपाल अमेरिकाका अन्तिम १० प्रतिस्पर्धी घोषणा भएको छ । आगामी सेप्टेम्बर २३ देखि २५ सम्म पेजेन्टको फिनाली आयोजना हुँदैछ ।
अन्तिम दश प्रतिस्पर्धीमा अपेक्षा सिंह गुरुङ परियार, कला न्यौपाने, प्रतिक्षा शुक्ला, प्रतिशा प्रधान, प्रतिजा जैसी, रिया श्रेष्ठ, सुनिता अधिकारी, सान्यामिता श्रेष्ठ, सोनिशा थापा र एलिसा लिम्बु छन् ।
विभिन्न अमेरिकी राज्यबाट प्रतिस्पर्धी छनौट भएको जारी विज्ञप्तिमा उल्लेख छ । यसपटक टाइटल विजेतासहित विभिन्न सबटाइटल विजेतालाई ५ हजार अमेरिकी डलरको छात्रवृत्ति प्रदान गरिने भएको छ ।
यसपटक मिस नेपाल अमेरिका फाउन्डेसन स्थापना गरिने र यसमार्फत विभिन्न सामाजिक कार्य तथा ब्यूटी विथ लिमिट प्रोजेक्टलाई सहायता प्रदान गरिने भएको छ । यसवर्ष मिस नेपाल अमेरिकाले दशौं वर्षगाँठ मनाउँदैछ ।
काठमाडौं । होमप्रोडक्सन फिल्मको सुटिङ सुरु नहुँदा नायिका अदिती बुढाथोकी अहिले फुर्सदमा छिन् । अहिले उनी माल्दिभ्स होलिडे सेलिव्रेट गरिरहेकी छिन् । बिदासँगै उनको पछिल्लो दैनिकी भने अहिले केही विज्ञापन र म्युजिक भिडिओमा बितिरहेको छ ।
फिल्म तत्काल फ्लोरमा जाने निश्चित नभएकाले पनि उनले अहिले सामाजिक संजालमार्फत दर्शक र फ्यानको अन्तक्रियालाई भने कम हुन दिएकी छैनन् । इन्स्टाग्राममा प्रत्येक दिन उनी हट तस्विर सेयर गर्छिन् र दर्शकको प्रतिक्रिया बुझ्ने काम गर्छिन् ।
आमा पुष्पा बुढाथोकीले निर्माण रहेको फिल्म ‘बाबरी’ मा अदितीको मुख्य भूमिका हुनेछ । अघिल्लो साल सुरु भएको फिल्मको छायांकन अझै पूरा भएको छैन । महामारीले रोकिएको फिल्मको छायांकन सिक्किममा गर्ने तयारी छ ।
अहिले अदिती छुट्टी मनाउन साथीहरुसँग माल्दिभ्समा छन् । उनले माल्दिभ्सको समुन्द्री किनारमा विकिनी अवतारमा खिचेका तस्बिरहरु इन्स्टाग्राममा शेयर गरेकी छन् । दशैंपछि छायांकन हुने ‘बाबरी’ को लागि उनी मुम्बईबाट सिक्किम जानेछिन् । फिल्ममा उनको जोडी धिरज मगरसँँग गाँसिएको छ ।
चामे । बलिउड फिल्म उचाईको निर्देशकसहितको टोली मनाङ, लुक्ला, लाङटाङ लगायतका हिमाली थलोहरुमा सुटिङ लोकेसनको खोजी गरेर मुम्बई फर्किएको छ । अक्टोबर २ मा नेपाल आइपुग्ने फिल्म क्रिउले अक्टोबर ४ देखि काठमाडौंदेखि फिल्म सुटिङ सुरु गर्ने भएको छ ।
यसैसाता निर्देशक सुरज वर्जत्यसहितको टोली नेपालमा लोकेसन हन्टिङ गरेर भारत फर्किएको छ । फिल्मको नेपाल व्यवस्थापक थ्री हिवलर्स कम्पनीका अनुसार अक्टोबर ४ मा काठमाडौंका केही लोकेसनबाट फिल्मांकन सुरु हुनेछ ।
निर्देशक सुरज वर्जत्यको टोली अल्टिच्युड एयरको दुई वटा हेलिकप्टरबाट मनाङ पुगेका थिए । निर्माता, निर्देशकको टोली दुई दिन मनाङमै बसेर फिल्म छायाङ्कनका लागि विभिन्न स्थानको अवलोकन गरेका छन् ।
सो टोलीले माथिल्लो मनाङको ङिस्याङ गाउँपालिका वरपरका विभिन्न स्थानको अवलोकन गरेका छन् । दुई दिनको अवलोकन पश्चात् टोली काठमाडौँ फर्किएर सगरमाथा आधारशिविरमा पनि छायाङ्कनका लागि स्थलगत अवलोकन गर्न गएको नेपालका लागि थ्री विलर्स फिल्मस्का अध्यक्ष लाइन प्रोड्युसर सुरज अचार्यले जानकारी दिए ।
उनका अनुसार मनाङमा १० दिन सो फिल्मको छायाङ्कन हुने मनाङका पर्यटन व्यवसायी विनोद गुरुङले बताए । यस चलचित्रमा अमिताभ बच्चन, अनुपम खेर, डेनी डेन्जोङ्पा, बोमन ईरानी, परिणिती चोपडाको कलाकारको मुख्य भूमिका रहनेछ ।
दुई साता अगाडि पनि टोलीले जोमसोम, कागबेनी, लुक्ला, नाम्चे बजार र लाङटाङ क्षेत्रको अवलोकन गरिसकेको छ ।
फिल्म छायाङ्कनले कोरोनाका कारण थला परेको त्यहाँको पर्यटन व्यवसायलाई सहयोग पुग्ने र फिल्म प्रदर्शन पश्चात् मनाङमा भारतीय पर्यटकको आकर्षण बढ्नसक्ने अनुमान गरिएको पर्यटन व्यवसायी गुरूङले बताए । उनका अनुसार यस बलिउड चलचित्र प्रदर्शन पश्चात् मनाङ मात्र नभइ सिङगो नेपालकै प्रचारप्रसचार हुने र नेपाललाई विश्व सामु चिनाउन मद्दत पुग्नेछ ।
काठमाडौं । मोफसलका ठूला फिल्म बजारहरु पोखरा, बिराटनगर, वीरगञ्ज, नारायणगढ, नेपालगञ्ज, बुटवल र हेटौंडाका फिल्म हलहरु असोज १ गतेदेखि खुल्ने भएका छन् ।
नेपाल प्रेससँग कुरा गर्दै कास्की, मोरङ, पर्सा, चितवन, बाँके, मकवानपुर र रुपन्देही जिल्लाका प्रमुख जिल्ला अधिकारीले कोभिड-१९ प्रोटोकल पालना गर्दै फिल्म हल खुलाउन अनुमति दिइएको बताए ।
गतसाता नै काठमाडौं, भक्तपुर र ललितपुरका प्रमुख जिल्ला अधिकारीले पनि ५० प्रतिशत अकुपेन्सीमा फिल्म हल खुलाउन अनुमति दिइसकेका छन् । तर, मोफसलमा भने ५० प्रतिशत अकुपेन्सी भनिएको छैन ।
असोज १ गतेदेखि नै मुलुकभरका सबैजसो विद्यालय पनि खुल्दै छन् । आज बसेको स्वास्थ्य मन्त्रालयको बैठकले संक्रमणको आधारमा मात्र विद्यालय र फिल्म हल खुलाउन डीसीसीएमसीलाई भनेको छ ।
असोज १ गतेदेखि फिल्म हल खुल्ने भएपछि फिल्मको लाइनअप तयार पार्न चलचित्र संघ र चलचित्र निर्माता संघको बैठक आज बस्दैछ । बैठकले दशैं र तिहारको लाइनअप तयार पार्ने जनाइएको छ ।
काठमाडौं । अभिनेत्री केकी अधिकारीले कपाल मुण्डन गर्दा आफूले विभेद खेप्नुपरेको बताएकी छिन् ।
हालैको एक अन्तर्वार्तामा उनले भनिन् : कतिपटक कामबारे सबै कुरा ओके भैसकेर पनि मेरो कपाल छैन भनेर थाहा पाएपछि के-के बहाना बनाएर प्रोजेक्टबाट हटाइएको छ ।’
उनी अगाडि भन्छिन् : अझै पनि हाम्रो सेन्ट्रल महिला पात्रलाई यस्तो लुक्समा देखिएकै छैन । त्यसैले मैले कपाल मुण्डन गरेकै कारण धेरै प्रोजेक्ट गुमाउनुपर्यो ।’
कपाल मुण्डन गरेपछि केकीले केही म्युजिक भिडिओमा विग (नक्कली कपाल) लगाएर काम गरिन् । रिलिज हुन बाँकी फिल्म ‘बोक्सीको घर’को लागि केकीले कपाल मुण्डन गराएकी थिइन् ।
सो अन्तर्वार्तामा केकी भन्छिन्, ‘हामीले नै सिकाएको होइन त लामो कपाल भएकोलाई दिदी र छोटो कपाल भएकोलाई दादा भन्नु भनरे ? यही कुरालाई गलत प्रमाणित गर्न मैले डायनाको मेकओभर गराएकी हुँ ।’
अहिले पनि नेपाली फिल्म उद्योगमा विभेद कायमै रहेको केकीको भनाई छ । आफू सिंगल नरहेको समेत केकीले उक्त अन्तर्वार्तामा बताएकी छिन् ।
