Category: कलाप्रेस

काठमाडौं । झन्डै दुईवर्षसम्म नायिका साम्राज्ञी शाह फुर्सदमै रहिन् । निषेधाज्ञाको बीचमा भने उनले अनलाइन बिजेसन संचालनमा ल्याएकी थिइन् । नयाँ फिल्ममा काम नगरेपछि उनीसँग लाइनअप पनि छैन ।

तर, निषेधाज्ञा खुकुलो भएसँगै मनोरञ्जन क्षेत्र जुर्मुराउन थालेपछि साम्राज्ञी पुनः व्यस्त हुन थालेकी छिन् । म्युजिक भिडिओ नै सहि, महंगी एक्ट्रेस साम्राज्ञीले राम्रै पारिश्रमिक लिएर म्युजिक भिडिओमा काम थालेकी छिन् ।

कुरा भैरहेका फिल्महरु तत्काल छायांकनमा नजाने भएपछि साम्राज्ञी म्युजिक भिडिओ सेटमा फर्किएकी हुन् । ट्री इन्टरटेनमेन्टले निर्माण गरिरहेको एउटा गीतको भिडिओमा साम्राज्ञीलाई दर्शकले हेर्न पाउने भएका छन् ।

विश्व नेपाली र अस्मिता अधिकारीको स्वर रहेको सो म्युजिक भिडिओमा दर्शकले साम्राज्ञीलाई देख्न पाउने भएका छन् । इन्स्टाग्राममा फोटो सार्वजनिक गर्दै साम्राज्ञीले सेटमा फर्कन पाउँदा खुशि लागेको बताएकी छिन् । तस्बिरमा उनी हट देखिएकी छिन् ।

काठमाडौं । घटस्थापना रिलिजको माग गर्दै ‘डाँडाको बरपिपल’ र ‘धन्दागिरी’ फिल्मले आज चलचित्र संघमा निवेदन दिएका छन् । संघ अन्तर्गत गठित चलचित्र प्रदर्शन व्यवसायिक समितिका संयोजक अशोक शर्माले ती दुई फिल्मबाट मंगलबार निवेदन प्राप्त भएको बताए ।

आगामी तीन महीनासम्म रिलिज गर्ने फिल्मले संघद्वारा गठित समितिमा निवेदन दिनुपर्ने नियम ल्याइएको छ । समितिले आफूसँग दर्ता हुन आएका फिल्मलाई समेटेर आगामी २१ गते लाइनअप घोषणा गर्ने तयारी गरेको छ । समितिले २० गतेभित्र रिलिज डेटसहितको निवेदन मागिएको छ ।

अन्य फिल्महरुले पनि निवेदन लिएर आउने तयारी गरेको संयोजक शर्माले नेपाल प्रेसलाई जानकारी दिए । कोरोनाले थलिएको चलचित्र क्षेत्रलाई चलायमान बनाउन विदेशी र नेपाली फिल्म एकै मितिमा प्रदर्शन हुन नपाउने र सेयर बाँडफाँटसहितका योजनाहरु समेत ल्याएको छ ।

असोज २१ गतेदेखि विदेशी फिल्महरु रिलिज सुरु हुनेछन् । सो दिनमा हलिउड फिल्म ‘फास्ट एन्ड फ्युरियस ९’ र ‘नोबडी’ रिलिज हुनेछन् । असोज २६ गते रिलिज हुने फिल्मको औपचारिक घोषणा २१ गते सार्वजनिक गरिने भएको छ ।

काठमाडौं । फाल्गुनन्द लिङ्देन फिल्मस्ले निर्माण गरिरहेको फिल्म ‘अञ्जली’ अहिले काठमाडौं उपत्यकाका विभिन्न स्थानमा छायांकन भइरहेको छ । घरेलु हिंसा तथा बालबालिका अपहरणलाई मुख्य विषय बनाइएको फिल्ममा कथा र निर्देशन दिनेश लिङ्देनको छ ।

फिल्ममा एलिना बाँसकोटा, दिक्पाल कार्की, विमला खजुम लिम्बु, हाङ चेम्जोङ, विमला गिरी, यासेली योङहाङ, शर्मिला शर्मा, नरेश वनेम, प्रजलिका गिरी, सागर केरुङ, विशाल सेनेहाङ, दिविसा सापकोटा, जनक कार्की, नन्दु तुम्बापो, अजय खडका, दिनेश माङमु, पुन्य ओझा, माइकल तुम्बापो, बिमल ढुङ्गेल, दावा शेर्पा, प्रेम आले मगर, देब राई, मेख मगरको अभिनय छ ।

सुशिल अधिकारीको छायांकन, पुन्य ओझाको द्वन्द्व, दिनेश माङमुको नृत्य रहेको फिल्ममा कविता राई लिङ्देन, मणि ताम्लिङ र राम दाहाल निर्माता छन् । फिल्म आगामी मंसिरमा रिलिज हुने जनाइएको छ । जिल्ला प्रशासन कार्यालयहरुले स्वास्थ्य मापदण्ड पालना गर्दै फिल्म गतिविधि खुलाउन अनुमति दिएपछि छायांकन कार्य सुचारु हुन थालेका छन् ।

काठमाडौं । बलिउड स्टारद्धय सलमान खान र शाहरुख खानका दुई बहुप्रतीक्षित फिल्म सन् २०२२ को मध्यमा प्रदर्शन हुने भएका छन् । बलिउड हंगामाका अनुसार सलमानको ‘टाइगर ३’ र शाहरुखको ‘पठान’ आउने वर्षको मध्यमा लाग्नेछन् । यी दुई फिल्मले अहिलेसम्म प्रदर्शन मितिलाई निश्चित गरिसकेका छैनन् ।

अक्टोबर २२ देखि भारतको मुम्बइस्थित फिल्म हल खुल्ने तय भएपछि दुई दर्जनभन्दा बढी फिल्मले प्रदर्शन मिति घोषणा गरेका छन् । सलमान र कट्रिनाको मुख्य भूमिका रहेको टाइगरकोे तेस्रो सिक्वेल नेपालमा समेत निकै प्रतीक्षित छ ।

शाहरुखको कमब्याकको कारणले पनि पठान निकै प्रतीक्षित छ । सन् २०२२ का इद, दिवाली, गणतन्त्र दिवस, स्वतन्त्रता दिवस र क्रिसमस, गान्धी जयन्तीजस्ता आकर्षक डेट सबै लक्ड भैसकेका छन् । यस्तोमा पठान र टाइगर ३ को डेट कहिले लक्ड हुन्छ, यो बुझ्नु आकर्षक हुनेछ ।

सलमान अहिले कट्रिना क्याफसँग टाइगर ३ को सुटिङमा व्यस्त छन् । विदेश सुटिङपछि सलमान अहिले मुम्बई फर्किएका छन् । अब सलमानले बिग बोसको सुटिङ थाल्दैछन् । मनीष शर्माको निर्देशनमा बनिरहेको टाइगर ३ मा शाहरुखको केमियो भूमिका छ ।

शाहरुख स्टारर पठानमा दीपिका पादुकोण, जोन अब्राहम, आशुतोष राणा, डिम्पल कपाडियाको समेत मुख्य भूमिका छ । सिद्धार्थ आनन्दको निर्देशनमा बनेको फिल्म पठानमा दीपिकाले जासूस चरित्रमा खेलेकी छिन् । पठानमा समेत सलमानले केमियो भूमिका निर्वाह गरेका छन् ।

काठमाडौं । बिहे प्रस्ताव स्वीकारेपछि गायिका इन्दिरा जोशी र उनका फियोन्से शरद केडिया सार्वजनिकरुपमै खुल्न थालेका छन् ।

यसैसाता खुम्बु आइसफल क्षेत्रमा शरदले गरेको बिहे प्रस्तावलार्ई इन्दिराले स्वीकारेपछिको भिडिओ भाइरल बनेको थियो । केही वर्षदेखि प्रेम सम्बन्धमा रहेको यो जोडीलाई इन्गेजमेन्ट औंठी साटासाट गरेपछि सार्वजनिक थलोमै देख्न थालिएको छ ।

मिडिया छल्दै हिँड्ने उनीहरु सगरमाथाबाट फर्किएपछि भने सम्बन्धलाई खुलाउन चाहेका छन् । शनिबार उनीहरु दरबारमार्गको किंग्स लाउन्ज क्लबमा भेटिए ।

क्लबमा इन्दिरा, शरदसहित संगीतकार न्यूह बज्राचार्य र भिजे सुशिल नेपाल पनि थिए । न्यूह र सुशिल इन्दिराका निकै मिल्ने साथी पनि हुन् । हुनसक्छ, इन्गेजमेन्टको खुशियालीमा उनीहरुले क्लबमा गेट–टुगेदर पनि गरेका थिए ।

काठमाडौं । पूर्वयुवराज्ञी हिमानी शाहका प्रशंसक प्रशस्तै छन् । उनको स्वभाव र सामाजिक देनलाई लिएर प्रशंसाको पुल बाँध्ने टन्नै छन् । यस्तोमा थपिएकी छिन् अभिनेत्री मनीषा कोइराला ।

शनिबार राती मनीषा र हिमानीले सँगै रात्रीभोज गरे । निकट पारिवारिक जमघटमा उनीहरुले एकअर्काको भावना र विचार सेयर गरे । अहिले सामाजिक संजालमा हिमानी र मनीषाका क्यान्डिड तस्बिर सार्वजनिक भएका छन् ।

मनीषाले इन्स्टाग्राममा हिमानी र साथीहरुसँगका केही तस्बिर सेयर गरेकी छिन् जसमा उनले हिमानीलाई बहादुर महिला भन्दै प्रशंसा गरेकी छिन् । ‘गएको राती महिला केही बहादुर महिलाहरुसँग समय बिताएँ’ मनीषा भन्छिन्, ‘विश्वलाई बहादुर महिलाहरु आवश्यक पर्छ ।

म्युजिक थेरापिस्ट एमी टेन्नीको भनाई उध्दृत गर्दै मनीषाले अरुलाई बनाउने र विस्तार गर्ने महिलाहरु जरुरी भएको बताएकी छिन् । उक्त जमघटमा मनीषाकी निकट साथी डा. अर्पणा शाह, बन्दना राणा लगायत पनि थिए ।

पेरिस । प्रियंका चोपडा र प्रबल गुरुङको सम्बन्ध नयाँ होइन । प्रबल प्रियंकाका रुचाइनेमध्येका एक फेसन डिजाइनर हुन् । प्रबलकै डिजाइनमा प्रियंकाले केही ग्लोबल स्टेजमा आफ्नो सौन्दर्य पस्किएकी छिन् ।

आइतबार विश्व फेसनको सहर मानिने पेरिसमा प्रियंकाको ड्रेसअप पुनः चर्चाको विषय बन्यो । पृथ्वीको रङसँग मिल्ने वातावरणमैत्री कन्सेप्टमा प्रबलले तयार पारेको कस्ट्युम लगाएर प्रियंकाले पेरिसमा आयोजित ग्लोबल सिटिजन इभेन्टमा भाग लिएकी छिन् ।

यति मात्रै होइन, प्रियंकाले आइकोनिक आइफल टावर अगाडि प्रबलको डिजाइनमा फोटोसुट समेत गराइन् । ३९ वर्षिया म्याट्रिक्स चार स्टार प्रियंकाले उक्त इभेन्टमा प्रबलकै डिजाइन लगाएर सहभागिता जनाइन् ।

स्प्रिङ २०२२ को लाइनमा प्रबलले तयार पारेको उक्त गाइन हरियो र नीलो रङमा डिजाइन भएको छ र पातहरु समेत बुनिएको छ । आफ्नो डिजाइन लगाएकी प्रियंकालाई इन्स्टाग्राममार्फत प्रबलले धन्यवाद दिएका छन् ।

मुम्बइ । कात्तिक ६ गतेदेखि भारतको आर्थिक राजधानी मुम्बइस्थित फिल्म हलहरु खुल्ने भएपछि एकैदिन १४ भन्दा बढी बलिउड फिल्मले प्रदर्शन मिति घोषणा गरेका छन् ।

घरेलु फिल्मलाई चलायमान बनाउन संघर्ष गरिरहेको नेपाली फिल्मलाई बलिउडको यो खबरले उत्साह प्रदान गरेको छ । जसअनुसार असोज २१ गतेदेखि नेपाली फिल्म हलहरु खुल्ने तयारीमा छन् ।

नेपालमा असोज २१ गते हलिउड फिल्म फास्ट एन्ड फ्युरिस ९ रिलिज तयारी छ । नेपाली फिल्महरु असोज २६ गतेदेखि प्रदर्शन हुनेछन् । तीन महीनाभित्र प्रदर्शन हुने फिल्मले असोज २० गते भित्र रिलिज डेट घोषणा गर्नुपर्नेछ ।

बलिउडमा एकैदिन सन् २०२१, २०२२ र २०२३ को रिलिज लाइनअप घोषणा भएको छ । बलिउड व्यापार समीक्षक तरण आदर्शका अनुसार सन् २०२३ सम्मै प्रदर्शन मिति घोषण भएको छ । हेर्नूस रिलिज क्यालेन्डर :

न्यूयोर्क । ‘मिस नेपाल युएस २०२१’ को ताज प्रतिक्षा शुक्लाले जितेकी छन् । न्यूयोर्कमा आयोजित फिनालीमा उनले दश प्रतिस्पर्धीलाई पछि पारिन् । कला न्यौपाने फस्ट रनरअप एलिसा लिम्बु सेकेन्ड रनरअप घोषित भए । विजेताले क्रमशः १५००, १००० र ५०० अमेरिकी डलर जिते ।

मिस नेपाल आयोजक संस्थाको दशौं वार्षिकोत्सव अन्तर्गत यसपटक फिनाली आयोजना गरिएको हो । शीर्ष दशमा अपेक्षा सिंह गुरुङ परियार, कला न्यौपाने, प्रतिक्षा शुक्ला, प्रतिशा प्रधान, प्रितिजा जैसी, रीया श्रेष्ठ, सुनिता अधिकारी, सान्यमिता श्रेष्ठ ,सोन्यासा थापा तथा एलिशा लिम्बु पुगेका थिए ।

पूर्वमिस नेपाल माल्भिका सुब्बाले भर्चुअल माध्यममार्फत यसपटक ग्रुमिङ सिकाएका थिइन् । अमेरिकी सरकारले ट्रेडमार्क उपलब्ध गराएपछि पहिलोपटक पेजेन्ट आयोजना भएको हो । क्विन्स थिएटरमा आयोजना भएको फिनाली अघि कार्यक्रममा भाग लिनेको कोभिड-१९ परीक्षण गरिएको थियो । प्रतियोगिता २०११ मा न्यूयोर्कबाट अमित शाहले सुरु गरेका थिए । पहिलो मिस नेपाल युएसको उपाधि सुजिता बस्नेतले जितेकी थिइन् ।

कार्यक्रममा ८० हजार अमेरिकी डलरको छात्रवृत्ति नेपाली डायस्पोराका महिलालाई प्रदान गर्ने घोषणा भएको थियो ।

काठमाडौं । आगामी असोज २१ गते बिहीवारदेखि मुलुकभरका फिल्म हलहरु खुल्ने भएका छन् । नेपाल चलचित्र संघले आज देशभरका सदस्य हलहरुलाई पत्र लेख्दै सो मितिदेखि प्रदर्शन सुरु गर्न भनेको हो ।

आज बसेको बैठकले महासचिव अशोक शर्माको संयोजकत्वमा चलचित्र प्रदर्शन व्यवसायिक समिति गठन गर्दै फिल्म हल खुलाउनेबारे ६ बुँदे निर्णय समेत गरेको छ ।

दुई साताको अन्तरालमा मात्र दोस्रो फिल्म रिलिज गर्न पाइने भएको छ । स्वदेशी र विदेशी फिल्मको सेयर बाँडफाँटको हकमा पहिलो साता निर्माता तथा वितरकलाई ५५ प्रतिशत र दोस्रो साता ५० प्रतिशत सेयर दिइने भएको छ ।

नेपाली फिल्म प्रदर्शन मिति तोकिएको समयमा विदेशी फिल्म प्रदर्शन गर्न नपाइने भएको छ । आगामी ३ महीनाभित्र प्रदर्शन गरिने फिल्महरुको प्रदर्शन मिति असोज २० गतेभित्र घोषणा हुनेपर्ने निर्णय पनि बैठकले गरेको छ ।

यस्तो प्रावधान तीन महीनासम्म कायम रहने भएको छ ।

काठमाडौं । आगामी कात्तिक ५ गतेदेखि भारतको मुम्बइस्थित फिल्म हलहरु खुल्ने भएका छन् । मुख्यमन्त्री उद्दव ठाकरेको कार्यालयले ट्वीटमार्फत यस्तो जानकारी दिएको हो ।

कोभिड-१९ मा संक्रमण आएको भन्दै हल खुलाउने निर्णय भएको मुख्यमन्त्री ठाकरेले जनाएका छन् । हल खुलाउने निर्णयसँगै मुख्यमन्त्री कार्यालयले फिल्म हलमा अपनाउनुपर्ने कोभिड संक्रमणविरुद्धको मापदण्ड पनि सार्वजनिक गर्ने तयारी भएको छ ।

हल खुलाउने निर्णय भएको केही घण्टामै अक्षयकुमार स्टारर फिल्म सूयंवंशीको प्रदर्शन मिति घोषणा भएको छ । आगामी तिहारकै अवसरमा सूर्यवंशी प्रदर्शन मिति घोषणा भएको बलिउड ट्रेड एनालिस्ट तरण आदर्शले जनाएका छन् ।

मुम्बईमा हल खुलेपछि यसले नेपाली फिल्म क्षेत्रलाई पनि राहत मिलेको छ । नेपालका वितरक र प्रदर्शक मुम्बईमा हल खुलेपछि ठूलो फिल्म रिलिज हुने र यसले फिल्म क्षेत्रलाई चलायमान बनाउन सघाउ पुग्ने आशामा थिए ।

काठमाडौं । सर्वाधिक उचाइमा आयोजना गरिने फेसन सोको रुपमा विश्व कीर्तिमान राखेको माउन्ट एभरेस्ट फेसन रनवेको दोस्रो संस्करण सगरमाथा आधार शिविरमा सम्पन्न भएको छ ।

विभिन्न १० मुलुकबाट आएका सुपरमोडलसहित इटालीका राजकुमार कोसिमो दे मेडिसीले नेपाली डिजाइन लगाएरै र्‍याम्प नापे । कासा डिजाइन र बुद्धिस्ट लाइनका डिजाइन लगाएर इटालेली प्रिन्सले नेपाली डिजाइनलाई प्रवद्र्धन गर्ने प्रयास गरे ।

५५०० मिटर उचाइमा आयोजना गरिएको हिउँले भरिएको र्‍याम्पको पृष्ठभूमिमा सर्वोच्च शिखर सगरमाथाको आकर्षक दृश्यावलोकन गर्न सकिन्छ । गिनिज बुक अफ वर्ल्ड रेकर्डमा नाम लेखाइसकेका पंकज गुप्ता, रमिला नेमकुल र रिकेन महर्जनले फेसन सोको आयोजना गरेका हुन् ।

संसारका कीर्तिमानहरुको सूची राख्ने गिनिज पुस्तकले पृथ्वीकै अग्लो स्थानमा आयोजना गरिने फेसन सोको रुपमा माउन्ट एभरेस्ट फेसन रनवेलाई केही वर्षअघि सूचीकृत गरेको छ ।

उक्त रनवेमा फेसन डिजाइनर रमिला नेमकुल र कासाले दिगो फेसनमा आधारित लाइन सार्वजनिक गरेका थिए । नेपाल पर्यटन बोर्डद्वारा प्रवद्र्धित सोमा कासाले बुद्धिस्ट फेसन लाइन पनि लन्च गरेको थियो । भगवान गौतम बुद्धको दार्शनिक सूत्र अहिंसा परम धर्मबाट उक्त लाइन प्रभावित रहेको जनाइएको छ ।

दुईवर्ष लामो अध्ययनपछि प्राप्त फेब्रिक र २१ देशहरुको छाता संस्था सेरिकल्चर अर्गनाइजेसनको सहकार्यमा रमिलाले बुद्धिस्ट फेसन लाइन सार्वजनिक गरेकी हुन् ।

आरबी डायमन्ड ज्वेलरीका रिकेन महर्जनले ताज डिजाइन गरेका थिए । नेपाली ढुंगा क्यानाइट प्रयोगमार्फत हिमालयलाई उतार्ने किसिमले उनले क्राउन डिजाइन गरेको जनाइएको छ । रनवेमा प्रयोग गरिएका एस्सेसरिज वातावरणमैत्री र दिगो फेसनमा आधारित रहेको जनाइएको छ ।

महामारीपछि पहिलोपटक आयोजना गरिएको यस्तो खालको कार्यक्रमलाई सगरमाथा आधार क्षेत्रका शेर्पा समुदायले पनि स्वागत गरेका छन् । आरोही कान्छा शेर्पाले यस्ता खाले कार्यक्रमले खुम्बु क्षेत्रको पर्यटन विकासमा टेवा पुग्ने बताए ।

गोक्यो हिमनदीको छेउमा आयोजना गरिएको फेसन सोलाई हेर्न ४७ जनाको समूह त्यहाँ उपस्थित थियो । आगामी नोभेम्बर १ देखि स्कटल्यान्डको ग्लास्गोमा सुरु हुने राष्ट्रसंघीय जलवायु सम्मेलन (कोप२६)मा पनि हिमालय क्षेत्रमा जलवायुको असर र प्रभावबारे मुद्दा उठान हुँदैछ ।

यसैवर्ष नेपाल आएका कोप२६ का अध्यक्ष आलोक शर्माले पनि हिमालय क्षेत्रको दिगो विकास र जलवायु परिवर्तनको असरबारे चासो राखेका थिए ।

काठमाडौं । एसियन म्युजिकले निर्माण गरेको वेब-सिरिज ‘लभ नम्बर २२’को फस्टलुक पोस्टर शनिबार रिलिज भएको छ । दशैं लगत्तै सिरिजलाई फोपी ओटीटी प्लेटफर्म र टेलिभिजनमा रिलिज गर्ने तयारी भएको कम्पनीका म्यानेजिङ डिरेक्टर इश्वर गुरुङले जनाए ।

अमृत ढुंगाना र रक्षा थापालाई फिचर्ड गरिएको पोस्टरमा तन्नेरीको मनोविज्ञानलाई दर्शाउने प्रयत्न गरिएको छ । रिलिज भएका दुई पोस्टरमा अमृत र रक्षा रोमान्टिक मुडमा देखिन्छन् । तन्नेरीको जीवनशैलीलाई प्रस्तुत गर्ने फिल्ममा उनीहरुको सम्बन्ध, चाहना र द्वन्द्वलाई प्रस्तुत गरिएको र प्लस टु पुस्ताले रुचाउन सक्ने प्रबन्ध निर्देशक गुरुङले बताए ।

सरिन पोखरेलको कथा र निर्देशन रहेको वेब–सिरिजको अहिले पोस्टप्रोडक्सन भैरहेको छ । इश्वर गुरुङ र इभान गुरुङले निर्माण गरेको सिरिज २२ एपिसोडमा निर्माण हुने भएको छ । सिरिजमा खगेन्द्र श्रेष्ठ र दीपेन्द्र तामाङको सहनिर्माण छ । सिरिजमा अमृत र रक्षासहित अमितेश शाह, अस्मिता खनाल, रिवाज लामा, सेजल गौतम, नारायण प्रधान, स्वर्णीमा खतिवडाको अभिनय छ ।

चाँडै सिरिजको ट्रेलर रिलिज हुने भएको छ । एसियन म्युजिकले तीनवर्ष निर्माण गरेको २१ भागको सिरिज ट्वान्टीफस्ट लभ निकै चर्चित थियो । कम्पनीले १७ वर्षदेखि संगीतको प्रवद्र्धन र बजारीकरण गर्दैै आएको छ ।

पछिल्लो युवापुस्ता लक्षित वेब सिरिज बनाउँदै आएको छ ।

काठमाडौं । दुर्गेश थापा र पल शाहको नयाँ गीत बहिस्कार शुक्रबार युट्युवमा रिलिज भएको छ । दुई महीना पहिले लोकदोहोरी प्रतिष्ठानले बहिस्कार गर्ने घोषणा गरेपछि त्यसको जवाफ दिन दुर्गेशले यो गीत ल्याएका हुन् ।

गीत ल्याएकै दिन यो दुर्गेश पुनः विवादमा तानिएका छन् । भिडिओमा प्रयुक्त उनको गेटअप र ड्रेस जोनी डीप स्टारर हलिउड फिल्म ‘पाइरेट्स अफ दी क्यारेबियन’बाट चोरी भएको भन्दै सामाजिक संजालमा व्यापक आलोचना भएको छ ।

हेयर स्टाइल, मेकअप र ड्रेस दुरुस्तै जोनी डीपको चरित्रसँग मिलेपछि कतिपय दर्शकले चोरी नगर्न दुर्गेशलाई सुझाएका छन् । तर, दुर्गेशले चाहिँ त्यो कन्सेप्टलाई चोरी भन्न नमिल्ने बताए ।

‘कतिपय कन्सेप्ट मिल्छ तर, यसलाई चोरी भन्न मिल्दैन’ नेपाल प्रेससँग उनले भने ।

काठमाडौं । कोरोनाभाइरस महामारीको कारण अहिले फिल्म गतिविधि ठप्पप्रायः छ । लामो समय फिल्म क्षेत्र बन्द हुँदा नाम चलेका स्टारहरु म्युजिक भिडिओ, सिरियल लगायतका अन्य माध्यममा व्यस्त छन् । यस्तोमा, ठूलो पर्दाकी हिट अभिनेत्री साम्राज्ञी शाह पनि सांगीतिक भिडिओमा व्यस्त भएकी छिन् ।

अभिनय करियरमा खासै म्युजिक भिडिओमा नदेखिने अभिनेत्री साम्राज्ञी लामो समयपछि एउटा नयाँ म्युजिक भिडिओमार्फत पुनरागमन गर्दैछिन् । दर्शकले उनलाई एक नयाँ गीतको भिडिओमा देख्न पाउने भएका छन् । लामो समय हल बन्द हुँदा साम्राज्ञीलाई हेर्न नपाएका उनका प्रशंसक समेत यो खबरले खुशि हुनसक्छन् ।

निर्माताद्वय दिनेश दर्शनधारी र यशोदा राईका पुत्र नयाँ कलाकार देलविस दर्शनधारी र राज रोहन तुम्बाहाम्फेसँग साम्राज्ञीले स्क्रिन शेयर गर्ने भएकी हुन । ट्री इन्टरटेन्मेन्टले निर्माण गर्ने ‘माया पिरेम’ बोलको गीतको म्युजिक भिडिओलाई दिपेश सापकोटाले निर्देशन गर्दैछन् ।

गायक विश्व नेपाली र गायिका अस्मिता परियारको स्वरमा रहेको गीतको शब्द डिपी खनालले कोरेका छन् भने शंकर थापा स्माइलको संगीत र उदय राज पौडेलको संगीत संयोजन गरेको छ ।

गीतमा कोरियोग्राफी माइकल चन्दको रहनेछ । गीतको भिडिओ छायाँकन काठमाडौँका विभिन्न स्थानमा गरिने निर्देशक सापकोटाले बताए । भिडियोलाई ट्री मिडियाको अफिसियल युट्युव च्यानलमार्फत एक कार्यक्रमका बीच सार्वजनिक गरिने निर्माण पक्षले जनाएको छ । शाह र निर्माण पक्षबीच भएको सम्झौतापश्चात छोटो प्रतिक्रिया दिदै अभिनेत्री शाहले गीत र मनपरेपछि आफूले म्युजिक भिडिओ गर्न सहमत भएको बताइन् ।

‘यसको शब्द संयोजन र अडियो भर्सन निकै मनपरेपछि भिडिओ गर्न राजी भएकी हुँ’ नेपाल प्रेससँग साम्राज्ञीले भनिन् । स्रोतका अनुसार यो म्युजिक भिडिओ अभिनय गरेबापत साम्राज्ञीले राम्रै अमाउन्ट समेत पाएकी छिन् । साम्राज्ञी फिल्ममा सर्वाधिक पारिश्रमिक लिने नेपाली अभिनत्री हुन् ।

यो गीतका लागि साम्राज्ञीले फोटोसुट पनि गराएकी छिन् । हेर्नूस तस्बिरहरु :

काठमाडौं । प्रतिष्ठित ब्यूटी पेजेन्ट मिस युनिभर्स नेपालले सन् २०२१ को संस्करणको लागि आवेदन आह्वान गरेको छ ।

मिस नेपालपछिको दोस्रो प्रतिष्ठित पेजेन्टले सेप्टेम्बर २२ देखि ३० सम्म इच्छुक युवतीलाई आवेदन दिन भनेको छ । निःशुल्क आवेदन दिन सकिने जनाइएको छ ।

अक्टोबर १ मा क्वार्टर फाइनलिस्ट, अक्टोबर १० मा सेमीफाइनलिस्ट, अक्टोबर २० देखि २९ सम्म क्लोज क्याम्प र अक्टोबर ३० (कात्तिक १३ गते) ग्रान्ड फिनालीको कार्यतालिका घोषणा गरिएको छ ।

गतवर्षकी मिस युनिभर्स नेपाल विजेता अनिष्का शर्माले अमेरिकामा भएको फिनालीमा भाग लिएकी थिइन् । अघिल्लो वर्ष नै मिस युनिभर्स पेजेन्टले हिडन ट्रेजरसँग अलग भएको घोषणा गरेको थियो ।

काठमाडौं । मान्छे मार्ने लाइसेन्सको रुपमा जेम्स बन्ड पात्र चर्चित छ । यो पात्रमा अभिनय गर्ने बेलायती अभिनेता डेनियल क्रेग चर्चित छन् । उनै अभिनेता क्रेगलाई बेलायतले मानार्थ नेभी सेनाको अधिकृत पदमा नियुक्त गरिएको घोषणा गरेको छ ।

रोचक कुरा त के छ भने, जेम्स बन्ड पात्रको फिल्म र्‍यांक ००७ रहेको छ । क्रेगलाई पनि बेलायती सेनामा फिल्ममा रहेको सोही र्‍यांकको दर्जा दिइएको छ ।

मानार्थ नेभल अफिसरको उपाधि पाएपछि अब अभिनेता क्रेग बेलायती सशष्त्र सेनाको लागि उनी दूत बन्नेछन् । ‘कमान्डर क्रेग सेवा गर्ने इच्छासहित नेभल सेनामा आबद्ध हुनुभएको छ’ ००७ को आधिकारिक पृष्ठमा उल्लेख छ ।

बेलायती सेनाको मामिला हेर्ने संसद सदस्य टोनी राडकिनले अभिनेता क्रेगलाई रोयल नेभीमा स्वागत गर्न पाउनु खुशिको कुरा भएको बताए । क्रेगको फिक्सनल पात्रलाई यथार्थमा बदलिएको उनले धारणा राखे ।

‘संसारभरको मिसन पुरा गरेर क्रेगले बेलायतलाई सुरक्षित राख्न वितेका १५ वर्षमा क्रेग कमान्डरको रुपमा परिचित छन्’ राडकिनले बताए ।

गत सेप्टेम्बर २८ मा जेम्स बन्ड फिल्मको पछिल्लो श्रृंखला नो टाइम टु डाइ लन्डनमा विश्व प्रिमियर भएको थियो । सेप्टेम्बर ३० मा यो फिल्म बेलायतमा प्रदर्शन हुनेछ । अक्टोबर ८ मा अमेरिका रिलिजको तयारी छ ।

नेपालमा पनि फिल्म रिलिजको तयारी भएको एप्पल इन्टरनेटमेन्टले जनाएको छ ।

काठमाडौं । गायिका इन्दिरा जोशीले केही महीना पहिले आफू सिंगल नरहेको खुलासा गरेकी थिइन् । उनले त्यतिबेलै आफू कसैसँगको प्रेममा रहेको बताएकी थिइन् ।

प्रेममा रहेको केही महीनामै इन्दिराको सरप्राइज इन्गेजमेन्ट भएको छ । प्रेमीले उनलाई सगरमाथा क्षेत्रको खुम्बुमा पुगेर इन्गेजमेन्ट औंठी लगाइदिएका छन् ।

फेसन डिजाइनर शरद केडियाले इन्दिरालाई खुम्बुमै इन्गेजमेन्ट रिङ लगाइदिएका छन् । सगरमाथा आधार शिविरमा बिहीवारदेखि सुरु भएको माउन्ट एभरेस्ट फेसन रनवेमा भाग लिन त्यहाँ पुगेका इन्दिरा र शरदबीच इन्गेजमेन्ट भएको हो ।

हेलिकोप्टरमार्फत त्यहाँ पुगेका उनीहरु अहिले खुम्बु क्षेत्रमै छन् । त्यही मौकामा शरदले इन्दिरालाई औंठी लगाइदिएको भिडिओ सार्वजनिक भएको हो । भिडिओमा शरदले घुँडा टेकेर इन्दिरालाई औंठी लगाइदिएका छन् भने इन्दिराले खुशि हुँदै स्वीकारेकी छिन् ।

पाइलट विवेकले भिडिओ सार्वजनिक गर्दै इन्दिरा र शरदलाई सुखद भविष्यको शुभकामना दिएका छन् । यी दुई जनाले केही महीनायता डेट गरिरहेपनि सार्वजनिकरुपमा प्रेमलाई स्वीकार गरिसकेका छैनन् ।

तर, गायिका जोशीले चाहिँ इन्गेजमेन्ट नभएर प्रेम प्रस्तावलाई स्वीकारेको दावी गरेकी छिन् । निकट स्रोतका अनुसार उनीहरु केही वर्षदेखि डेटिङमा छन् र केही महीना पहिले इन्दिराले आफू प्रेम सम्बन्ध रहेको भन्दै औंठी सार्वजनिक गरेकी थिइन् ।

काठमाडौं । काठमाडौंमा नेपाल युरोपेली युनियन फिल्म फेस्टिभल भर्चुअलरुपमा जारी छ । युरोपियन युनियन नेपालको डेलिगेसनले आयोजना गरेको यो फेस्टिभल अन्तर्गत शुक्रबार हरित फिल्म निर्माण अर्थात ग्रीन फिल्म मेकिङबारे मास्टरक्लास आयोजना हुने भएको छ ।

शुक्रबार दिउँसो २ बजे भर्चुअलरुपमा कार्यक्रम आयोजना हुने जारी विज्ञप्तिमा उल्लेख छ । श्रव्यदृश्य सामाग्री निर्माण गर्दा वातावरणमा पर्ने असरलाई कम गर्नेबारे मास्टरक्लासमा छलफल हुने जनाइएको छ । साथै, सार्वजनिक तथा निजी निकायहरुले तयार गरेका नीति तथा व्यवस्थालाई समेत उक्त भर्चुअल कक्षामा छलफल हुने जनाइएको छ ।

मास्टरक्लासका प्रशिक्षकको रुपमा भ्यालरियो कारुसो रहने भएका छन् । साइकोलोजीमा स्नातकोत्तर र ह्युमन कम्प्युटर इन्टरेक्सनमा पीएचडी गरेका डा. अल्बर्टो बाट्टाचीले हरित फिल्म निर्माणका विधि र फाइदाबारे आफ्नो अनुभव सुनाउँदैछन् ।

इटलीको ट्रेन्टिनो क्षेत्रको लोकेसन स्काउटको रुपमा काम गर्ने अल्बर्टोले थुप्रै फिल्ममा सहायक निर्देशकको रुपमा पनि काम गरेका छन् । सन् २०१९ देखि अडियो भिज्युवल प्रडक्सनमा हरित फिल्म निर्माणको अभियानमा संलग्न ट्रेन्टिनो फिल्म फन्ड एन्ड कमिसनमा पनि आबद्ध छन् ।

मास्टरक्लासमा हरित फिल्म मुल्यांकन प्रणालीका निर्देशिका बमोजिम फिल्म निर्माणस्थललाई कसरी दिगो बनाउन सकिन्छ भन्ने बिषयमा निर्माताहरुले व्यवहारिक रुपमा के गर्न सक्छन् भनेर जान्ने मौका पाउने आयोजकले बताएको छ ।

मास्टरक्लासमा फिल्म निर्माता संघका अध्यक्ष आकाश अधिकारीले वक्ताको रुपमा बोल्नेछन् । मास्टरक्लासमा फिल्म क्षेत्रका विभिन्न विधामा काम गर्ने व्यक्तिहरु पनि सहभागि हुने आयोजकले जनाएको छ ।

काठमाडौं । अभिनेता पल शाहसँगको सम्बन्धका प्रश्नले पछ्याउन थालेपछि गायिका समीक्षा अधिकारी मिडियाबाट पन्छिन थालेकी छिन् । हुनसक्छ यही कारण उनले राजधानीमा आयोजना गरिएको प्रेसमिट बङ्क गरिन् ।

बुधबार राजधानीको अनामनगरस्थित एक रेष्टुरेन्टमा नेत्र भण्डारी र समीक्षाको स्वरमा समावेश गीत रिलिज तथा गायकको जन्मदिन सेलिव्रेट गर्ने कार्यक्रम आयोजना गरिएको थियो । उक्त समारोहमा गायिका अधिकारी पनि पुगिन् । कार्यक्रम रिपोर्टिङ गर्न संचारकर्मी पनि त्यहाँ पुगेका थिए ।

कार्यक्रम सुरु हुनु अगाडि नै आयोजकले समीक्षालाई नायक पल शाहसँग सम्बन्धित कुरा नसोध्न पहिल्यै आग्रह गरेका थिए । यसका लागि मिडियाकर्मी पनि तयार थिए । तर, कार्यक्रममा पुगेकी समीक्षा भने समारोह सुरु नहुँदै बाहिरिइन् । उनी सुटुक्क निस्किएपछि आयोजक समेत बिलखबन्दमा परे ।

पत्रकारले दुई घण्टा समीक्षालाई कुरे तर उनी आइनन् । उनी नआएपनि मिडियाकर्मी पनि त्यहाँबाट उठेर हिँडे । मोडल एलिसा राइले आफू १० मिनेटका लागि भए पनि आउने जानकारी दिएपनि त्यहाँ गइनन् । दुबै गायिका तथा मोडल नआएपछि गायक भण्डारीले आफूहरुलाई जानकारी नदिइ सुटुक्क हिँडेको भन्दै दुःख व्यक्त गरे ।

पछिल्लो समय नायक पल र गायिका समीक्षाको निकटतालाई लिएर चर्चा छ । प्रेसमिट नै बङ्क गरेर हिँड्नुले उनी पलसँगको सम्बन्धलाई लिएर मिडियाले गर्ने प्रश्नबाट तर्किन खोजेजस्तो देखिन्छ । यसबारे चर्चा व्यापक भएपछि समीक्षाले फेसबुकमा स्टाटस लेख्दै आरोपको खण्डन गरेकी छिन् । स्टुडियोलाई पहिले नै समय दिइसकेकाले आफू निस्किएर हिँडेको जवाफ उनले दिएकी छिन् । स्टुडियो कामले मात्र बाहिरिएको तर, अनर्गल प्रचार हुँदा आफू दुःखित भएको उनको भनाई छ ।

समीक्षाले यसो हुनुमा अन्य कारण नभएको दावी पनि गरेकी छिन् ।

काठमाडौं । भारतीय क्रिकेटका महान सचिन तेन्दुलकर र पत्नी अञ्जलीकी छोरी पछिल्ला दिनमा सामाजिक संजालमा निकै प्रशंसा कमाइरहेकी छिन् । २३ वर्षिया साराको सामाजिक संजालमा निकै बलियो फ्यान फलोइङ छ ।

इन्स्टाग्राममा उनी हट एन्ड बोल्ड तस्विर सेयर गर्छिन् । उनको सौन्दर्यमा लठ्ठिने धेरै छन् । आज मात्र साराले इन्स्टामा आफ्नो जिम लुक्स सेयर गरेकी छिन् । जसलाई लिएर फ्यानदेखि बलिउड सेलेब्स सम्मले उनको प्रशंसा गरेका छन् ।

साराले एक स्पोर्टस् वियर व्रान्डको प्रवद्र्धन गर्ने क्रममा उनले तस्बिर सेयर गरेकी हुन् । सारा जिम वियरमा निकै आकर्षक देखिएकी छिन् । जुन तस्विरलाई बलिउडका अर्जुन कपुर, कात्तिक आर्यन र अनन्या पाण्डेजस्ता कलाकारले पनि सेयर गरेका छन् ।

यति मात्र हैन, उनको तस्विरमा अभिनेत्री सैयामी खेर, गायिका कनिका कपुर, टाइगर श्रफकी बहिनी कृष्णा श्राफले इमोजीसहित कमेन्ट गरेका छन् । उनको तस्विरमा ४ लाख ३० हजारभन्दा बढीले लाइक गरेका छन् ।

बलिउड संचारमाध्यमका अनुसार सारालाई फिल्ममा ल्याउन करन जोहर लगायतका निर्माताले पहल गरिरहेका छन् । तर, उनले यसबारे कुनै निर्णय दिएकी छैनन् ।

काठमाडौं । नेपाललाई दिगो फेसनको राजधानी बनाउने उद्देश्यले आज सगरमाथा आधार शिविरमा फेसन सो प्रतिस्पर्धा आयोजना हुँदैछ । संसारकै उच्चस्थानमा आयोजना गरिने फेसन सोको रुपमा केही वर्षअघि कीर्तिमान राखेको फेसन सोको दोस्रो संस्करण आयोजना हुन लागेको हो ।

आज हुने फेसन सोमा नेदरल्यान्डकी राजकुमारी एलिसा क्याटेरिना इगर र इटालीका राजकुमार सहभागी भएका छन् । हुने भएका छन्। फेसन सोको उद्देश्य हिमालको संरक्षण गर्ने विषयमा तथा जैविक संरक्षण गर्न विश्‍वको ध्यानाकर्षण गर्नु रहेको जनाइएको छ ।

फेसन शोमा विश्‍वका चर्चित १४ जना सुपरमोडलले भाग लिने भएका छन् । इटाली, डेनमार्क, बेलायत, पोल्यान्ड, रसिया, नेदरल्यान्ड, नेपाल र फिनल्यान्डका सुपर मोडलहरु सहभागि भएका छन् । सोही फेसन शोमा क्याप्टेन विजय लामाले र्‍याम्प वाक गर्ने भएका छन्।

कोभिड-१९ महामारीले पर्यटन क्षेत्रमा परेको असरलाई फेसन सोले पर्यटक आगमनमा थप प्रोत्साहन गर्ने आयोजकले विश्‍वास गरेको छ। नेपाल पर्यटन बोर्डको प्रवर्द्धनमा हुन लागेको कार्यक्रम कासा बुटिक डिजाइन, आरबी डायमन्ड र के फिल्मसले आयोजना गर्न लागेका हुन्।

काठमाडौं । डिजिटल प्लेटफर्ममा लघु फिल्म, हाँस्य सिरियल, सर्ट फिल्म लगायतकोे निर्माण ह्वात्तै बढेको छ । युट्युबमा दर्शकको आकर्षण बढेपछि कमेडी सिरियलको निर्माणमा पनि निर्माताको ध्यान गएको छ । यसबीच, हाँस्य सिरियल ‘उकुसमुकुस’को प्रशारण सुरु भएको छ । यो सिरियलको पहिलो भाग बुधबार आमा अग्नीकुमारी मिडिया नामक युट्युब च्यानलबाट प्रशारण भएकोे छ । अब, हरेक साताको बुधबार बेलुकी यो सिरियलको प्रशारण हुने निर्माता नहकुल भट्टराइले जानकारी दिए ।

दिलिप तामाङ् ‘हुरहुर’को निर्देशनमा तयार भएको यो सिरियललाई गोेल्ड फिल्मस्ले प्रस्तुत गरेको हो । केदारप्रसाद घिमिरे ‘माग्ने बुढा’को संवाद रहेको सिरियलमा दिलिपको नै कथा छ । सिरियलको श्रृङ्खला निर्देशक सितादेवी तिमल्सेना हुन् । राहुल राइले छायांकन गरेको सिरियलको पहिलो भागमा टीकटक एपको क्रेजसँगै यसको राम्रा र नराम्रा दुबै पाटोलाई देखाउन खोजिएको छ ।

सिरियलमा जयनन्द लामा, भुइसाल लामा, दिलिप तामाङ, देवी आले, धनराम मुस्कान, प्रकाश लिम्बु, बेदना राई, नहकुल भट्टराई, दिपक लम्साल, टुल्कु तामाङको साथमा बाल–कलाकार सोहन थापाको अभिनय छ ।

काठमाडौं । अभिनेता तथा गायक प्रशान्त तामाङको मृत्युको हल्ला मंगलबार दार्जिलिङ, कालिम्पोङ, सिक्किम लगायतका क्षेत्रमा फैलियो । सामाजिक संजालबाट यस्तो खबर फैलिएपछि यो कुराले उनका प्रशंसकलाई दुःखी तुल्यायो ।

हल्ला निकै फैलिएपछि प्रशान्त र उनकी पत्नी मार्था तामाङले विज्ञप्ति नै जारी गर्नुपर्‍यो । सितिमिति सार्वजनिकरुपमा नआउने उनकी पत्नी मार्थाले मृत्यु हल्लाको खण्डन गर्दै आफ्नो श्रीमान जीवित र स्वस्थ रहेको कुरा बताएकी छिन् ।

मार्था लेख्छिन् : सामाजिक संजालमा फेक न्यूज फैलिएपछि म यो लेख्न बाध्य छु । मेरो श्रीमान भगवानको आशिर्वादले जीवित र स्वस्थ हुनुहुन्छ । मेरो परिवार, आफन्त र साथीभाइले फोन र म्यासेज गरेर चासो दिनुभएको छ । चासो र मायाप्रति धन्यवाद ।’

उनले हल्ला फैलाउने त्यहाँका स्थानिय मिडियालाई उजुरी गर्ने समेत बताएकी छिन् । आफ्नै मृत्युको हल्ला फैलिएपछि प्रशान्तले पनि लेखेका छन् : मेरो आयु अझै लामो होस् भनी शुभकामना दिनुभएकोमा हजुरलाई धेरैभन्दा धेरै धन्यवाद व्यक्त गर्न चाहन्छु ।’

काठमाडौं । आफ्ना जिल्लावासी भरतमणी पौडेल कमेडी च्याम्पियन बनेपछि एमाले नेता योगेश भट्टराई निकै खुशी छन् । भरतमणीलाई जिताउन उनले सुरुदेखि खुलेर लविङ गर्दै आएका थिए ।

योगेशको सक्रियतामा गठित ‘भरतमणि सहयोग समिति ताप्लेजुङ’ ले आज एक कार्यक्रम गरी भरतमणिलाई ९ लाख ५ हजार रुपैयाँ प्रदान गर्यो । समितिका तर्फबाट उनले नै चेक हस्तान्तरण गरेका थिए । भरतमणीलाई जिताउने अभियानका क्रममा संकलन गरिएको रकम थियो यो ।

अमिल्दो चाहिँ के भयो भने यस कार्यक्रममा कमेडी च्याम्पियनमा दोस्रो र तेस्रो भएका विक्की अग्रवाल र सन्तोष थापालाई पनि निम्त्याइएको थियो । तर, उनीहरुलाई कुनै नगद पुरस्कारको व्यवस्था थिएन । उनीहरु दुवैलाई खादा ओढाएर सम्मानपत्र मात्र दिइयो । भरतमणीको दायाँ र बायाँ उभिएर बिक्की र सन्तोषले उनलाई ठूलो आकारको ‘चेक’ समात्न सहयोग गरे । आफूहरुले एक रुपैयाँ पनि पाएनन् ।

उक्त दृष्य देख्दा कार्यक्रममा उपस्थित सञ्चारकर्मीहरुले समेत असहज मानेका थिए । एकजनालाई मात्र पुरस्कार दिने कार्यक्रममा अरु प्रतिस्पर्धीलाई बोलाएर अनि चेक समात्न लगाएर बिल्ला गरिएको टिप्पणी पनि सुनियो ।

कार्यक्रममा तीनैजनालाई मन्तव्य दिन लगाइएको थियो । विक्की र सन्तोष दुवैले व्यंग्यात्मक तरिकाले असन्तोष पोखे ।

विक्कीले भने, ‘यहाँ तीनजना विजेता लेखेको छ, तर भरतमणिले २५ लाख पनि पायो, ९ लाख पनि पायो, गाडी पनि छ । हाम्रो त भाको पैसा पनि गइसक्यो ।’

उनको यस्तो व्यंग्यात्मक भनाइमा सहभागीहरु गललल हाँसेका थिए ।

सन्तोष थापाले पनि ठट्यौली शैलीमा ‘यहाँ किन आएछु जस्तो लागेको’ बताए ।

‘कमेडी च्याम्पियन जितेर हामीलाई यहाँ ल्याएको चाहिँ मेरो यति धेरै पावर छ भनेर रैछ,’ उनले हाँस्दै भने, ‘अहिले यहाँ किन आइयो जस्तो भइरहेको छ ।’

आफ्नो भरतमणीलाई कमेडी च्याम्पियनमा जिताउन योगेशले सुरुदेखि नै खुला लविङ गरिरहेका थिए । उनले व्यक्तिगतरुपमा पनि भरतमणिलाई एक लाख रुपैयाँ प्रदान गरेका छन् । आज दिएको ९ लाख चाहिँ ताप्लेजुङबासीबाट संकलित हो । भरतलाई भोट गरेर उब्रेको पैसा हस्तान्तरण गरिएको एक सदस्यले बताए ।

काठमाडौं । यसैसाता राजधानीमा फिल्म ‘डाँडाको बरपीपल’को गीत रिलिज गर्न प्रेसमिट आयोजना भएको थियो । सलोन बस्नेतको निर्माण र उनका बुवा शोभित बस्नेतको निर्देशन मात्र हैन, शिव श्रेष्ठ र भुवन केसीले धेरैपछि एकसाथ अभिनय गरेकाले पनि चर्चा थियो ।

यो फिल्मको प्रचारप्रसारका लागि कुनै मसलाको कमी थिएन तर भैदियो उल्टो । नसोचेको विवाद सिर्जिएपछि फिल्मको मुख्य कार्यक्रम नै ओझेलमा पर्‍यो । भुवन र शिवले महानायक र महानायिका विवाद झिकेपछि फिल्मको मूल कुरो विषयान्तर भैदियो ।

आफैले लगानी गरेको फिल्म महानायक विवादले ओझेलमा परेपछि यतिबेला सलोन असन्तुष्ट छन् । उनी बुवा शोभितप्रति रुष्ट छन् । नेपाल प्रेससँग कुरा गर्दै सलोनले अनावश्यक कुरा उठाएर फिल्मलाई ओझेलमा पारेपछि आफू दुःखित भएको बताए ।

स्रोतका अनुसार निर्देशक बस्नेत, भुवन केसी र शिव श्रेष्ठले सल्लाह गरेरै महानायक र महानायिका विवाद झिकेका थिए । उनीहरुले कार्यक्रम अघिदेखि नै यस्तो सल्लाह गरेको स्रोत बताउँछ । फिल्मलाई चर्चामा ल्याउन उनीहरुले यस्तो गरेपनि उल्टै फिल्म ओझेलमा परेपछि सलोनले चित्त दुःखाएका हुन् ।

सलोनले डाँडाको बरपीपललाई आगामी दशैं फूलपातिमा रिलिज गर्ने तयारी गरेपनि हल खुल्ने तत्काल सम्भावना देखिएको छैन ।

काठमाडौं । पूर्वमन्त्री तथा एमाले सांसद योगेश भट्टराईले टेलिभिजन रियालिटी सो कमेडी च्याम्पियन सिजन २ का विजेता भरतमणी पौडेललाई ९ लाख रुपैयाँ हस्तान्तरण गरेका छन् ।

राजधानीमा बुधबार आयोजित कार्यक्रममा भरतमणी सहयोग समिति ताप्लेजुङको तर्फबाट सो रकम प्रदान गरे । समितिले भरतमणीलाई जिताउन सुरुदेखि नै रकम संकलन गरेको थियो ।

सोका फस्ट रनरअप विक्की अग्रवाल र सेकेन्ड रनरअप सन्तोष थापालाई खादा ओढाएर सम्मान गरिएको थियो ।

काठमाडौं। नायिका प्रियंका कार्कीको गर्भवती अवस्थाबारे मिडियामा अनगिन्ति गसिपहरु आए । सोसल मिडियामा दिनहु ट्रोलहरु बने । प्रियंका आफैंले मनग्गे मसला दिइरहिन् । आज उनी गर्भवती भएकी छन् ।

धेरैलाई लागेको छ, बच्चा जन्माएपछि उनको चर्चा केही समय थामिएला । तर, त्यस्तो छाँट देखिँदैन । छोरी जन्मिएपछि पनि प्रियंकाले पेज ३ गसिपमा छाइरहने सम्भावना देखाएकी छन् । जस्तो कि, उनीले आजै छोरीको नाममा इन्स्टाग्राम अकाउन्ट खोलिदिइन् ।

इन्स्टाग्रामको नियमअनुसार १३ वर्षभन्दा कम उमेरको व्यक्तिले अकाउन्ट खोल्न पाइँदैन । यस्तोमा अभिभावक अरु कसैले यसको सञ्चालन गर्नुपर्ने भनेर बायोमा नै उल्लेख गर्नुपर्ने प्रावधान रहेको छ । प्रियंका–आयूष्मानले छोरीको अकाउन्ट आफूहरुले ह्यान्डल गर्ने बायोमा जनाएका छन् ।

गर्भवती हुनासाथै प्रियंका र आयूष्मानले छोरी जन्मने भन्दै ‘आयांका’ नामाकरण गरिसकेका थिए । छोरीका लागि दर्जनौं लुगाफाटा र खेलौना किनेर प्रियंकाले दराजमा सजाइसकेकी छन् प्रियंकाले । नभन्दै उनले छोरी नै पाइन् । स्मरणीय छ कि नेपालमा पेटमा रहेको बच्चाको भ्रुण पहिचान गर्नु कानूनसम्मत मानिँदैन ।

आज आयांका कार्की जोशी नाममा एक दिनकी प्रियंका पुत्रीको इन्टाग्राम एकाउन्ट खुलेको छ । जन्मिनासाथ आयांकाको पहिलो स्टाटस यस्तो छ, ‘ड्याडी र मम्मीले मलाई उहाँहरुको मायाको पोको भन्नुहुन्छ, र म असहमत छैन ।’

आयांकाको अकाउन्टलाई ३ हजारभन्दा बढीले फलो गरिसकेका छन् । आगामी दिनमा अब यसै अकाउन्टमार्फत प्रियंकाले गसिपका मसलाहरु उपलब्ध गराउन सक्छिन् । ट्रोलरहरु चनाखो रहनुपर्ने भयो ।

काठमाडौं । महानायक विवाद पुनः सुरु भएको छ । यसैसाता राजधानीमा आयोजित डाँडाको बरपीपल फिल्मको गीत रिलिज कार्यक्रममा शिव श्रेष्ठ र भुवन केसीले अभिनेत्री गौरी मल्ललाई महानायिकाको संज्ञा दिएपछि यो विषयले पुनः चर्चा पाएको हो ।

यो विषयलाई लिएर सामाजिक संजालमा करिश्मा मानन्धरका प्रशंसक र भुवन केसी पक्षधर फ्यानहरु बाझाबाझमा ओर्लिएका छन् । केही मिडिया र निजी संस्थाले राजेश हमाल र करिश्मा मानन्धरलाई कार्यक्रममार्फत महानायक र महानायिकाको उपाधि बाँडेका थिए ।

उक्त कार्यक्रममा भुवनले शिव श्रेष्ठलाई महानायक र गौरी मल्ललाई महानायिकाको उपाधि दिएका थिए । विवादमा पर्ने डरले गौरी मल्लले भने आफूलाई पदभन्दा दर्शकको माया ठूलो भएको जवाफ दिएकी थिइन् ।

महानायकको चर्चाबीच राजेश हमालले बुधबार फेसबुकमार्फत लेखेका छन् : कर्म सहि गर,  फल प्राप्त हुनेछ ।’ महानायक विवादको टाइम एन्ड स्पेसलाई हेर्ने हो भने राजेश हमालको यो स्टेटस सोही विवादलाई लिएर लक्षित देखिन्छ ।

सुरुआतदेखि नै शिव श्रेष्ठ र भुवन केसीसँग महानायक विवादकै कारण राजेशको सम्बन्ध हार्दिक छैन । यस्तोमा, हमालको उक्त फेसबुक स्टेटस यही विवादतर्फ लक्षित भएको बुझ्न कठिन छैन । उनको यो डिप्लोमेटिक जवाफलाई लिएर अहिले फिल्मवृत्तमा चर्चा चलेको छ ।

काठमाडौं । नायिका प्रियंका कार्कीलाई पुत्रीलाभ भएको छ । उनले छोरीसहितको तस्वीर फेसबुकमा सार्वजनिक गरेकी छन् । सामाजिक संजालमार्फत प्रियंका र पति आयुष्मान देशराज जोशीले शिशुको तस्विर पोस्ट गरेका छन् । उनले छोरीको नाम आयन्का कार्की जोशी नामाकरण गरेकी छिन् । 

गर्भवती भएपछि प्रियंकाले आफ्नो गर्भावस्थालाई लिएर सामाजिक संजालमा बेबी बम्प, बेबी सावर लगायतका तस्विर सार्वजनिक गरेकी थिइन् । उनका यी तस्विरलाई लिएर सामाजिक संजालमा निकै चर्चा हुने गथ्र्यो ।

काठमाडौं । पूर्वाञ्चल इन्स्टिच्युट अफ फिल्म एन्ड टेलिभिजनको अध्यक्षमा निर्देशक एवं अभिनेत्री दीपाश्री निरौला नियुक्त भएकी छिन् । इटहरीमा भएको कार्यक्रममा निरौलालाई अध्यक्षमा नियुक्त गरिएको हो ।

चलचित्र विकास बोर्डका पूर्वअध्यक्ष राजकुमार राईलाई इन्स्टिच्युटको संरक्षकको रूपमा राखिएको छ । इन्स्टिच्युटको सल्लाहकार समितिको संयोजकमा फिल्मकर्मी महासंघ प्रदेश १ का अध्यक्ष अरुणकुमार प्रधानलाई चयन गरिएको छ ।

संघका महासचिव तथा अभिनेता दिनेश कोइराला र महासंघ उपाध्यक्ष प्रकाश सुब्बालाई पनि सल्लाहकार समितिमा चयन गरिएको जनाइएको छ । ‘अध्यक्षमा नियूक्त हुन पाउँदा हर्षित छु’ निरौलाले नेपाल प्रेसलाई भनिन् । उक्त कार्यक्रमको मुख्य अतिथिको रुपमा अभिनेता तथा निर्माता दीपकराज गिरी पनि सहभागि थिए । उनले अध्यक्षसहितको सल्लाहकार समूहलाई बधाई दिएका छन् ।

‘पहिले हामीले परेर सिकेका थियौं तर अहिले पढेर सिक्ने मात्रै प्रतिस्पर्धी बजारमा उत्तिर्ण हुनसक्छन्’ दीपकले भने । अहिले छोटा फिल्म निर्माणमा इन्स्टिच्युट सक्रिय छ । जसले गर्दा त्यहाँ पढ्ने विद्यार्थीले कलालाई उपभोग गर्ने अवसर पाएका छन् ।

नृत्य कक्षा समेत सञ्चालन गरिरहेको उक्त इन्स्टिच्युटमा फिल्म निर्माणसँगै निर्देशन, पटकथा लेखन, छायांकन, अभिनय र सम्पादन लगायतका विषय पढ्न पाउने भएका छन् । फिल्म मेकिङ सँगै डिरेक्सन, स्क्रिप्ट राईटिङ, सिनेमाटोग्राफी, अभिनय, एडिटिङ लगायतका कोर्सहरू पढाई हुने जनाइएको छ ।