काठमाडौं । ग्रामी अवार्ड मनोनित र्यापर राजा कुमारीका प्रशंसकलाई खुशिको खबर । विश्वचर्चित यी अमेरिकन-इन्डियन गायिकाले आफ्ना र्याप तथा हिपहप गीतमार्फत चिसिएको काठमाडौंलाई तताउने भएकी छिन् । मंसिर १८ गते काठमाडौंको फरेनहाइट क्लबमा उनले प्रस्तुति दिने भएकी हुन् ।
विश्व संगीतका चर्चित नामहरु गिवेन स्टेफानी, फिफ्थ हार्मोनी, फलआउट ब्वाय, डिभाइनसँग सहकार्य गरेकी राजा कुमारीले पछिल्लोपटक बलिउड फिल्म ‘गल्ली ब्वाय’मा केमियो भूमिका पनि निर्वाह गरेकी थिइन् । रणवीर कपुर र आलिया भाट स्टारर यो फिल्मले नेपाली बक्सअफिसमा समेत राम्रो कमाइ गरेको थियो ।
वास्तविक नाम स्भेता यल्लाप्रगढा राओ रहेकी उनको स्टेज नाम चाहिँ राजा कुमारी हो । उनलाई ल्याउँदा नेपाल कोरोनाभाइरस महामारीबाट सामान्य अवस्थामा फर्किएको र नेपाली पर्यटनलाई टेवा पुग्ने आशा समेत क्लब फरेनहाइटले लिएको छ । राजा कुमारी डिसेम्बर ३ मा दिल्ली हुँदै नेपाल आउनेछिन् । उनलाई त्रिभुवन विमानस्थलमा समेत भव्य स्वागत गरिने आयोेजकले जनाएको छ ।
यो कन्सर्ट हेर्नका लागि दर्शकले १ हजार र २ हजारका टिकट खरिद गर्न सक्नेछन् । क्लब फरेनहाइटका संचालक मिलन श्रेष्ठका अनुसार, नेपालमा समेत राजा कुमारीका युवा फ्यान धेरै भएकाले उनलाई नेपाल ल्याउन लागिएको हो ।
केही वर्षअघि राजा कुमारीसँग र्याप गायनमा सहकार्य गरेका चर्चित भारतीय र्यापर डिभाइनले पनि काठमाडौंमा प्रस्तुति दिएका थिए । क्लब फरेनहाइटले यसअगाडि पनि भारतका चर्चित कलाकार ल्याएर कन्सर्टको आयोेजना गरिसकेको छ । यसअघि फरेनहाइटमा आदित्य नारायण झा, टोेनी कक्कड जस्ता गायकहरुले प्रस्तुति दिइसकेका छन् ।
काठमाडौं । ‘नेपाल मानव अधिकार अन्तर्राष्ट्रिय चलचित्र महोत्सव’को नवौं संस्करण बिहीबार सम्पन्न भएको छ । मानव अधिकार चलचित्र केन्द्रले आयोजना गरेको महोत्सव चार दिनसम्म भर्चुअल रुपमा सञ्चालन भएको थियो ।
महोत्सवमा नेपाललगायत २४ देशका ४२ चलचित्र प्रदर्शन गरिएको थियो । महोत्सवमा प्रदर्शन भएका तीन विधाका तीन चलचित्रले पुरस्कार जितेका छन् । महोत्सवमा राजेशप्रसाद खत्रीको ‘जुलुङ्गो’, मीरा खड्का र ज्योति बेलबासेको ‘नो स्कुल टुडे’ र एन्जिला चौधरी र पुष्पा जोशीको ‘ललित’ ले उत्कृष्ट बन्दै पाँच सय अमेरिकी डलर पुरस्कार पाएका छन् ।
जुलुङ्गो’ले फिक्सन तर्फबाट उकृष्ट, ‘नो स्कुल टुडे’ले उत्कृष्ट वृत्तचित्र र महिला फिल्मेकरतर्फको उत्कृष्ट चलचित्रका रुपमा ‘ललिता’ लाई पुरस्कृत गरिएको हो । महोत्सवमा आशा मगराती, मनोजबाबु पन्त र लिना रञ्जितले निर्णायक मण्डलको भूमिका निर्वाह गरेका थिए ।
महोत्सवको पहिलो गत सोमबार बिहान ७ बजेदेखि छनोट भएका चलचित्रहरू ‘मुभी डटकम’ वेबसाइटमा प्रदर्शन भएका थिए । महोत्सवमा लघु चलचित्र, वृत्तचित्र, फिचरलगायत सबै विधाका चलचित्रहरु प्रर्दशन गरिएका थिए ।
महोत्सवको सहआयोजक राष्ट्रिय मानव अधिकार आयोग र नेपालका लागि क्यानाडाको राजदूतावास रहेको थियो । यस्तै महोत्सवका लागि युरोपियन युनियन, आईओएम, आइसिजे, प्लान इन्टरनेसनल, मोबाइल आर्ट फर पिसले सहयोग गरेका थिए । चलचित्र विकास बोर्ड र मानव अधिकार चलचित्र सन्जालले महोत्सवलाई प्रवद्र्धन गरेका थिए ।
काठमाडौं । नेपाल र इजरायलबीचको जनस्तरको सम्बन्धलाई कला-संस्कृतिको माध्यमबाट समेत प्रवद्र्धन गर्ने उद्देश्यले राजधानीमा तीनदिने इजरायली फिल्म महोत्सव नयाँ ढाँचामा शुरु भएको छ ।
कोभिड महामारी मत्थर नभइसकेकाले आफ्नै सवारीसाधनमा बसेर चलचित्रको आनन्द लिन पारखीहरूलाई इजरायली दूतावासले १३ औँ संस्करणको महोत्सव ‘ड्राइभ इन फिल्म सोज्’ ढाँचामा प्रस्तुत गरेको हो । एफएम रेडियो जडित सवारीसाधनमा बसेर सोल्टी होटलको सवारी बिसौनीमा ९०.६ मेगाहर्जमा ‘ट्युन’ गरेपछि विशाल पटाङ्गिनीको ठूलो पर्दामा दृश्य हेर्दै आवाज सुन्दै महोत्सवको मजा लिन सकिनेछ ।
संस्कृति, पर्यटन तथा नागरिक उड्डयनमन्त्री प्रेमबहादुर आलेले महोत्सवको बिहीबार साँझ उद्घाटन गर्दै इजरायली फिल्म निर्माता तथा लगानीकर्तालाई नेपालको मनोहर दृश्य र सौन्दर्यको छायाङ्कन गर्न आह्वान गरे ।
विदेशी फिल्म निर्माताहरूलाई छायाङ्कनका लागि नेपालमा आकर्षित गर्न आफ्नो मन्त्रालयले सूचना तथा सञ्चार प्रविधि र अर्थ मन्त्रालयसँग सिनेमा बनाउनेहरूलाई सहुलियत दिन आग्रह गरेको जानकारी उनले दिए । मुलुकको पर्यटन प्रवद्र्धनमा छायाङ्कनबाट सकारात्मक प्रभाव पर्ने वास्तविकतालाई दृष्टिगत गरी त्यस निम्ति अन्तरसरकारी निकायसँग समन्वय गरिएको उनले बताए ।
नेपालका लागि इजरायली राजदूत हनान गोडेरले इजरायली संस्कृति, कला र परम्पराको प्रवद्र्धनका साथै दुई देशबीचको जनस्तरको सम्बन्धलाई थप सुदृढ एवं सुमधुर तुल्याउन महोत्सव आयोजना गरिएको बताए । अभिनेता राजेश हमालले फिल्महरु सिमानारहित र तिनको सन्देश सार्वभौमिक हुने भएकाले गुणस्तरीय फिल्मप्रति आफ्नो लगाव र आकर्षण सधै रहेकाले कलाक्षेत्रमा नै आफू रमाइरहेको बताए ।
महोत्सवमा काठमाडौंस्थित कूटनीतिक नियोगका प्रमुख तथा पदाधिकारी, पूर्वराजदूत, परराष्ट्र मन्त्रालयका उच्च अधिकारी, वरिष्ठ सञ्चारकर्मीका साथै इजरायलमा उच्च शिक्षा हासिल गरेका नेपालीहरूको संस्था सलोम क्लबका पदाधिकारीहरूको उपस्थिति थियो । शनिबारसम्म जारी रहने महोत्सवमा सवारीसाधन भएका चलचित्र पारखीलाई निःशुल्क सिनेमा हेर्ने व्यवस्था मिलाइएको छ ।
काठमाडौं । कोरोनाभाइरस महामारीको दोस्रो लहरले रोकिएका फिल्मको छायांकन अहिले धमाधम सुचारु हुँदैछन् । मिलन चाम्सको निर्माण एवं निर्देशन रहेको ‘गोर्खा वारियर २’ सुटिङ बिहीबारदेखि सिन्धुलीमा सुरु भएको छ ।
त्यहाँको माडीस्थित कालीगाउँमा पूजाआजासहित दोस्रो सेड्युलको छायांकन सुरु भएको जानकारी निर्देशन चाम्सले दिए । कोरोनाको दोस्रो लहरअघि फिल्मको ४० प्रतिशत छायांकन सकिएको छ ।
सिन्धुलीसहित दमौली, मलेसिया र बेलायतमा बाँकी भाग खिचिने जानकारी चाम्सले दिए । ब्रिटिस गोर्खा सैनिकको वीरता र संघर्षको गाथा चित्रण गर्ने फिल्मको मुख्य भूमिकामा रितेश चाम्सले अभिनय गरिरहेका छन् ।
११७ जनाको क्रिउसहित सुचारु भएको बाँकी छायांकन अझै एक महिना निरन्तर हुने जनाइएको छ ।
सिन्धुलीमा रितेश र विजय लामाले मुख्य दृश्यहरुको लागि फिल्म खिचिरहेका छन् । सन् २०२२ को अन्त्यमा रिलिज लक्ष्य राखिएको फिल्ममा रेविका गुरुङ, रियर राई, शिशिर वाङ्देल, भुवनसिंह राई, बुद्धि तामाङ, कविता आले, विरुद्ध घले, सारा राईको समेत अभिनय छ ।
‘गोर्खा वारियर-२’ रिलिजपछि मात्र फिल्म हलमा प्रिक्वेल प्रदर्शन गर्ने निर्देशक चाम्सको तयारी छ । फिल्मको छायांकनलाई २ वटा क्यामेरा प्रयोगमा आएको छ । यसले दृश्यको आयामलाई फराकिलो तुल्याउने र समयको बचत हुने आशा पनि निर्देशकले लिएका छन् ।
काठमाडौं। कोरोना संक्रमणदर कम भएसँगै निर्माताहरुले फिल्मको प्रदर्शन मिति घोषणा गर्न थालेका छन् । यसबीच नेपाली हरर फिल्म ‘कठपुतली’ अंग्रेजी नयाँ बर्षको दिन आउँदो पुष १५ गते (डिसेम्बर ३०) मा प्रदर्शन हुने भएको छ ।
निर्माण टिमले तमु ल्होसारको सार्वजनिक विदा भएकाले फिल्म बिहीवारबाटै प्रदर्शन गर्न लागेको हो । कठपुतली फिल्मका निर्माता एवम् निर्देशक भीमसेन लामाले रिलिज मिति घोषणा गरेका हुन् ।
‘कठपुतली’ ले हालै अमेरिकाको प्रतिष्ठित इन्टरनेसनल फिल्म फेस्टिभल ‘विन्टर फिल्म अवार्ड’ मा दुईवटा अवार्ड जितेको छ । फिल्ममा गौरी मल्ल, मिथिला शर्मा, कर्मा, शिल्पा माष्के, उषा रजक, सुवर्ण थापा लगायतको अभिनय छ ।
पृथ्वी राना मगर निर्माता रहेको फिल्मको कार्यकारी निर्माता सम्पदा मल्ल, सह–निर्मातामा विशाल गुरुङ, धर्म श्रेष्ठ र हेम थापा छन् । पोस्ट-प्रोडक्सनको सम्पूर्ण काम लन्डन स्टूडियोमा भएको हो । पृथ्वी राना प्रोडक्सनको ब्यानरमा निर्मित ‘कठपुतली’ नेपालमा बनेका अन्य हरर फिल्मभन्दा एकदमै भिन्न रहेको निर्देशक लामाले दाबी गरेका छन् । उनी यो फिल्मलाई आफ्नो ड्रिम प्रोजेक्ट बताउँछन् ।
काठमाडौं । कोरोनाभाइरस संक्रमणको स्थितीमा सुधार भए प्रदीप खड्का अभिनित फिल्म ‘प्रेमगीत ३’ आगामी फागुन १३ गते (फेब्रुअरी २५) मा हलमा प्रदर्शन हुने भएको छ ।
निर्माण कम्पनी आसुसेन फिल्मसले बिहीबार बिहान फिल्मका दुई नयाँ पोस्टर सार्वजनिक गर्दै नयाँ रिलिज मिति घोषणा गरेको छ ।
स्वास्थ्य मन्त्रालयका अनुसार बुधबारको दैनिक कोरोना संक्रमणदर ५ प्रतिशत तल छ । जिल्ला प्रशासन कार्यालय काठमाडौंले अहिले ५० प्रतिशत अकुपेन्सीमा फिल्म हल खुलाउन अनुमति दिएको छ ।
कोरोना संक्रमणदर १५ प्रतिशतभन्दा वृद्धि भए फिल्म हलहरु पुनः बन्द गर्ने जिल्ला कोभिड संकट व्यवस्थापन केन्द्र (डीसीसीएमसी)को योजना छ । मंसिर लागेयता दैनिक संक्रमणदर ४ प्रतिशत तलै छ ।
गत वर्षको चैत २८ गते रिलिज मिति तय गरेको प्रेमगीतको तेस्रो सिक्वेलको रिलिज अन्तिम समयमा रोकिएको थियो । दशैंदेखि फिल्म हलहरु खुलेपछि र सूर्यवंशीजस्ता फिल्मले राम्रो प्रदर्शन गरेपछि फिल्म निर्मातालाई हौसला प्रदान गरेको छ ।
प्रेमगीत ३ निर्माता एवं निर्देशक सन्तोष सेनले मुम्बईबाटै फिल्म रिलिज मिति घोषणा गरेका हुन् । फिल्मको भारतीय साझेदार कम्पनी इम्पोसिबल फिल्मससँग छलफलका लागि भारत पुगेको उनले तत्कालै नेपाल र भारतमा संयुक्तरुपमा रिलिज नहुने भएपछि नेपालमै भएपनि एकल रिलिज गर्न लागिएको बताए ।
नेपाल प्रेससँग उनले भने, ‘नेपाली दर्शक दुईवर्षदेखि फिल्मको पर्खाइमा हुनुहुन्छ । लामो समय रोकेर राख्ने कुरा पनि भएन । अब फिल्मको माहौल बनाउन पनि रिलिज गर्न लागेका हौं ।’
फिल्मले केही दिनमै नयाँ ट्रेलर रिलिज गर्ने तयारी समेत गरेको छ । प्रदीप खड्का र क्रिस्टिना गुरुङको मुख्य भूमिका रहेको फिल्ममा शिव श्रेष्ठ, मनिष राउत, समृद्धी शाही ठकुरी, सुनिल थापा, सन्तोष सेन, माओत्से गुरुङ, पुष्कर कार्की लगायतको अभिनय छ ।
काठमाडौं । नेपाली कांग्रेसको चौधौं महाधिवेशन नजिकिएसँगै फिल्मकर्मीमाझ पनि चुनावी सरगर्मी व्यापक छ । कतिपय फिल्मकर्मी महाधिवेशन प्रतिनिधि चुनिएका छन् भने कतिपय चुनावमा पराजित भएका छन् । महत्वपूर्ण के रह्यो भने कुनै दलतिर पनि सार्वजनिक नभएका कतिपय कलाकार भने महाधिवेशनसँग राजनीतिकरुपमा कित्ताकट भैरहेका छन् ।
केन्द्रीय महाधिवेशन प्रतिनिधि बन्न इलाम चुलाचुलीबाट उम्मेदबारी दिएकी चर्चित कोरियोग्राफर तथा निर्देशक रिनशा राई पराजित भएकी छिन् । विगतमा कुनै राजनीतिक दलतिर पनि सार्वजनिक नभएकी रिनशा यसपटक भने कांग्रेसको महाधिवेशन प्रतिनिधिको लागि उम्मेदरबा बनिन् । उनी चुनाबकै लागि भनेर केही सातायाता गृहजिल्लामा इलाममा व्यस्त रहिन् ।
निर्माता संघका महासचिव तथा फिल्म निर्माता रोज राणा प्युठानबाट कांग्रेस महाधिवेशन प्रतिनिधिमा सर्वसम्मत चयन भएका छन् । क्षेत्रीय सभापति समेत रहेका उनी पार्टी सभापति सभापति शेरबहादुर देउवा गुटका हुन् । फिल्म निर्देशक सम्झना उप्रेती रौनियार मधेशी कोटाबाट प्रदेश सभा-१ काठमाडौंबाट महाधिवेशन प्रतिनिधिमा विजयी भएकी छन् ।
निर्देशक तीर्थ थापा लमजुङाबाट महाधिवेशन प्रतिनिधि र प्राविधिक मनोज केसी काठमाडौ जिल्ला क्षेत्र नं १ प्रदेश (क) बाट प्रदेश प्रतिनिधि चुनिएका छन् । हेटौंडा निवासी कलाकार सुशान्तकुमार श्रेष्ठ मकवानपुरको प्रतिनिधि सभा क्षेत्र नं १ प्रदेश सभा (क)बाट सभापतिमा निर्विरोध छानिएका छन् ।
काठमाडौं । नेपाली अभिनेता कार्म हलिउड फिल्म ‘फ्रोस्टबाइट’मा अनुबन्धित भएका छन् । सन् २०२२ को फेब्रुअरीमा नेपाल र अमेरिकामा छायांकन हुने फिल्मलाई सुपरहिरो फिल्म ‘एक्समेन’ र ‘थोर’ लेखक ज्याक स्टेन्जले लेखेका हुन् ।
डिज्नेका एनिमेटर किरणभक्त जोशीले अमेरिकन कम्पनी इलेक्ट्रिक ब्रेन इन्टरटेनमेन्टसँग मिलेर फिल्म निर्माण गर्न लागेका हुन् । सगरमाथामा खसेको हिमपहिरोमा बाँच्न सफल चार आरोहीको कथा फिल्मले भन्छ ।
यो फिल्ममा कार्मसँगै बलिउड अभिनेता गुल्सन ग्रोबर पनि देखिनेछन् । अन्य कलाकार अमेरिकाबाटै लिइने भएको छ । लकडाउनअघि नेपालमा रिलिज भएको द म्यान फ्रम काठमाण्डूमा कार्म र ग्रोबरले सहकार्य गरेका थिए ।
अभिनेता ग्रोबर बलिउड फिल्म ‘सूर्यवंशी’बाट पुनः चर्चामा छन् ।
नेपाल प्रेससँग कुरा गर्दै अभिनेता कार्मले आफू अनुबन्धित भएको र आउँदो वर्ष छायांकन हुने फिल्मलाई लिएर आफू उत्साहित भएको बताए । उनले आफ्नो भूमिका खुलाउन अस्वीकार गरे । यो फिल्ममा भुटानका एकजना कलाकार पनि हुनेछन् ।
यसअघि सोफिया वल्र्ड निर्देशन गरेका जियोफ्री जेम्स क्लार्कले फ्रोस्टबाइट निर्देशन गर्ने भएका छन् । ‘नेपालको पर्यटनलाई प्रवद्र्धन गर्ने उद्देश्य फिल्म बन्न लागेको हो र म उत्साहित छु’ कार्मले भने ।
उनी अभिनित फिल्म कठ्पुतली डिसेम्बर २ मा रिलिज हुँदैछ भने उनी हालै प्रशान्त रसाइली निर्देशित फिल्म लंगडोको साथीको डबिङ सकेर सिक्किमबाट फर्किएका छन् ।
काठमाडौं । कोरोनाभाइरस संक्रमणको स्थिती सहज भए आउँदो वर्षको दशैंमा फिल्मको माहौल पुनः लयमा फर्कनेछ । ठूला ब्यानरदेखि स्टारकास्ट सम्मका फिल्मले यो मितिमा अहिल्यैदेखि नजर राख्न थालेका छन् ।
बुढासुब्बा फिल्म्सले निर्माण गर्न लागेको सोसल ड्रामा ‘रत्नपार्क’ २०७९ सालको दशैं फूलपातिमा प्रदर्शन हुने भएको छ । निर्माण कम्पनीले फिल्मको कार्यशाला सुरु हुनु केही साताअघि मात्र उक्त फिल्मको प्रदर्शन मिति तय गरेको छ ।
निर्माता नवराज गिरीले नेपाल प्रेसलाई भने, ‘हाम्रो अघिल्लो फिल्म डाँडाको वरपीपल रिलिज भएकै मितिमा रत्नपार्कलाई प्रदर्शन गर्ने हाम्रो तयारी छ ।’
बुढासुब्बाले गतसाता र्याप गायक समीर घिसिङलाई लिड रोलमा औपचारिकरुपमा अनुबन्धित गरेको छ । भिटेनको स्टेज नामले चिनिने गायक घिसिङले यसअघि केही फिल्मको ओएसटीमा काम गरेपनि अभिनयको हिसाबले यो फिल्म पहिलो हुनेछ ।
भिटेनले पनि डेब्यु फिल्मलाई लिएर उत्साहित भएको बताए । ‘लगभग मेरै वास्तविक जीवनको नजिक छ यसको कथावस्तु’ नेपाल प्रेससँग उनले भने, ‘अब वर्कसपमा गएर आफूलाई अभिनयमा निखार्ने तयारीमा छु ।’
निर्माता गिरीले पनि भिटेनलाई लिड रोलमा ल्याउनु चुनौति र अवसर दुबै भएको बताए । ‘वर्कसपमार्फत उनको अभिनयमा निखारता ल्याउनु जरुरी छ’ उनले भने, ‘वर्कसप सकिएको डेढ महिनामै छायांकनमा जानेछौं ।’
घिसिङलाई कति मूल्यमा अनुबन्धित गरिएको हो भन्ने जानकारी भने उनले दिएनन् । काठमाडौंमा बाँच्नको लागि गर्ने संघर्षको कथामा रत्नपार्क आधारित हुने जनाइएको छ ।
फिल्ममा घिसिङकै लिड रोलदेखि म्युजिक कम्पोजसमेत हुनेछ । नयाँ निर्देशक र अन्य कलाकारलाई लिएर बुढासुब्बाले चाँडै पत्रकार सम्मेलनको आयोजना गर्ने तयारी गरेको छ ।
काठमाडौं । गत सोमबार इन्टरनेटमा सेयर भएको एउटा तस्बिरलाई लिएर नेपाली फिल्म क्षेत्र तरंगित बनेको छ । आफूहरु दुईजनाको तस्बिरलाई स्वयम निर्माता सन्तोष सेन र निर्देशक सुदर्शन थापाले सामाजिक संजालमा सेयर गरेका छन् ।
सुदर्शनले क्याप्सनमा लेखेका छन्, ‘चलचित्रमा देखिने काल्पनिक पात्र नभई, चलचित्र बनाउने दुई वास्तविक पात्रको भलाकुसारी ।’ सन्तोष लेख्छन्, ‘कलाकारलाई पर्दाको हिरो अनि आम दर्शकको सपनाको राजा सपनाको रानीमात्र बनाउने हैन अलिकति भएपनि वास्तविक जीवनमा हिरो हुन हामी पनि जानेका छौं ।’
धेरैका लागि सन्तोष र सुदर्शनको यो पोट्रेट तस्बिर मात्र हैन, आफैमा एउटा सन्देश पनि हो । सन् २०१६ मा रिलिज भएको फिल्म प्रेमगीतपछि सन्तोष र सुदर्शनको यो फोटोले धेरैकुरा भन्छ ।
यी दुईजनाको भेटवार्ता हुने तत्कालिन कारण चाहिँ रिलिज तयारीमा रहेको ‘प्रेमगीत ३’ र ‘म यस्तो गीत गाउँछु २’ नै मुख्य बहाना थिए । यो भेटमा यी दुईले रिलिजको तयारीबारे गफगाफ पनि गरे ।
यसबाहेक अर्को कुरा पनि अपेक्षित थियो । त्यो हो : भविष्यमा पुनः सहकार्य गर्ने । नेपाल प्रेससँग कुरा गर्दै निर्देशक थापाले भविष्यमा सहकार्य गर्नेबारेमा पनि निर्माता सेनसँग संवाद भएको बताए । ‘प्रेमगीत पनि हुनसक्छ या अन्य प्रोजेक्ट पनि हुनसक्छ । हामीले सहकार्य गर्ने तयारी गरेका छौं । अस्तीको भेटको त्यसको सुरुआत हो’ सुदर्शनले भने ।
सुदर्शनले सन्तोषको निर्माण रहेको ‘प्रेमगीत’लाई निर्देशन गरेका थिए । त्यसपछि यी दुईबीचको सहकार्य टुट्यो । फिल्म लाइनमा स्थायी शत्रु र स्थायी मित्र हुँदैनन् भन्ने सन्देश सोमबारको उक्त तस्बिरले दिएको छ ।
सुदर्शन अहिले भने माघ १९ गते रिलिज हुने आफू निर्देशित ‘फिल्म म यस्तो गीत गाउँछु २’ को रिलिज तयारीमा छन् । सन्तोष चाहिँ ‘प्रेमगीत ३’ रिलिज तयारीका लागि भारतीय साझेदारसँग छलफल गर्न मुम्बईमा छन् ।
काठमाडौं । अभिनेत्री मनीषा कोइराला बेला-बेलामा चर्चामा आइरहिन्छन् । उनी यसपटक भने आफ्ना अभिव्यक्तिलाई लिएर बलिउड मिडियाको केन्द्रमा छिन् । पिंकभिल्ला पोर्टलसँगको अन्तवार्तामा मनीषाले बलिउड अभिनेत्री कंगना रनावतलाई प्रतिभावानको संज्ञा दिएकी छिन् । आलिया भाट र उनका प्रेमी रणवीर कपुरले पनि राम्रो काम गरिरहेको भन्दै उनले प्रशंसा गरेकी छिन् ।
आलियाको काम गराइ शैली निकै चम्किलो रहेको मनीषाको भनाई छ । मुख्यतः कंगनाको प्रशंसामा मनीषा यतिबेला उत्रिएकी छिन् जतिबेला कंगना ‘भारतीय स्वतन्त्रता नक्कली’ भएको भनेपछि विवादमा छिन् ।
साथै, कंगनाले यसै महिना भारतको सर्वोच्च नागरिक सम्मान पद्मश्री अवार्ड पनि पाएकी छिन् । कंगना र मनीषाको बिचार निकट मानिन्छ । कंगना भारतमा हिन्दू धर्मको पक्षमा खुलेर लागेकी छिन् भने नेपालमा मनीषा हिन्दू राज्य पुनस्र्थापनाको पक्षमा छिन् ।
पिंकभिल्लाको अन्तवार्तामा मनीषाले भनिन्, ‘नयाँ पुस्ता महान छ । उनीहरु अन्तर्राष्ट्रिय स्तरमै उत्कृष्ट हुने बाटोमा छन् । कात्तिक आर्यन पनि राम्रा अभिनेता हुन् । रणवीर पनि महान हुन् । आलियाको काम हेरेपनि मलाई खुबै मनपरेको छ । उनले अझै राम्रो गर्न सक्छिन् । कंगना प्रतिभावान लाग्छिन् । मलाई उनको क्वीन फिल्म मनपरेको थियो ।’
आफ्ना को-स्टारहरुबारे मनीषाले भनिन्, ‘मैले नाना पाटेकर, अरविन्द स्वामी, आमिर खान र अन्य प्रतिभावान अभिनेताहरुसँग काम गर्ने मौका पाएकी थिएँ ।’
काठमाडौं । पछिल्लो समय नेपालमा टेलिभिजन रियालिटी सोको क्रेज बढिरहेको छ । यस्ता सोमा दर्शकीय आकर्षण बढेसँगै टेलिभिजन हाउसहरुले पनि नयाँ-नयाँ सोको उत्पादन गर्न थालेका छन् ।
यस्तोमा, इमेज टिभी एचडीबाट नयाँ रियालिटी सो प्रसारणमा आउने भएको छ । भ्वाइस स्टार नेपाल प्रालीले निर्माण गर्ने ‘नेपाल्स सिङ्गिङ सुपरस्टार’ प्रशारण हुन लागेको हो । इमेज टिभी एचडी र भ्वाइस स्टार नेपाल प्रालीबीच सम्झौता भएको छ ।
टेलिभिजनका तर्फबाट कार्यकारी अधिकृत महेन्द्र विष्ट र नायव महाप्रवन्धक सुरेश शर्मा तथा भ्वाइस स्टार नेपालका तर्फबाट क्रियटिभ डाइरेक्टर रवि श्रेष्ठ र सुरज जोशीले सम्झौतामा हस्ताक्षर गरेका थिए ।
‘नेपाल्स सिङ्गिङ सुपरस्टार’मा संगीतिक क्षेत्रमा संघर्षरत गायक र गायिका तथा दुरदराजमा रहेका प्रतिभालाई स्थान दिइने निर्देशक रवि श्रेष्ठले बताए ।
रविका अनुसार सोका लागि पहिलो चरणमा डिजिटल अडिसनबाट प्रतिष्पर्धीहरुको छनोट गरिनेछ । डिजिटल अडिसन पुसको पहिलो साताबाट खुल्ला हुनेछ । डिजिटल अडिसनबाट छानिएका प्रतिभालाई फिजिकल अडिसनमा सामेल गराइनेछ ।
२५ श्रृंखलासम्म चल्ने प्रतिष्पर्धामा विजयी हुने प्रतियोगीले २५ लाख नगद पाउनेछन् । विजेताको घोषणा दर्शकले दिएको भोटका आधारमा हुनेछ । सोको निर्णायकहरु पक्का भइसकेका छन् । तर, प्रचारको लागि ‘गेस द जजेज’ क्याम्पिन हुनेछ । उक्त क्याम्पेनमा विजयी हुनेले उचित पुरस्कार पाउनेछन् ।
काठमाडौं । ‘नुमाफुङ’ र ‘गुडबाइ काठमाण्डू’ फेम्ड निर्देशक नवीन सुब्बा नयाँ फिल्म ‘गाउँ आएको बाटो’देखि पुनरामगमन गर्ने तयारीमा छन् ।
मेन्छेम पिक्चर्सले निर्माण गर्न लागेको सोसल ड्रामा फिल्मको मंगलबार ललितपुरमा आयोजित पत्रकार सम्मेलनमा निर्माण घोषणा गरियो ।
दयाहाङ राई र पशुपति राईको मुख्य भूमिका हुने फिल्म किनपनि अपेक्षित छ भने समीक्षकले रुचाएको नुमाफुङ र केही फेस्टिभलमा प्रदर्शन भएको गुडबाई काठमाण्डूपछि सुब्बा निर्देशनको तयारीमा छन् ।
नेपाली फिल्मको परम्परागत कथ्य संरचना र शैलीबारे आलोचक मानिने निर्देशक सुब्बाले यस फिल्ममार्फत फिल्म लगानीमा सामुदायिक मोडेलको पनि सुरुआत गर्दैछन् ।
फिल्म घोषणाको पत्रकार सम्मेलनमा पनि निर्देशक सुब्बाले कोभिड-१९ महामारीपछिको फिल्म निर्माणमा ठूलै चुनौति आउने भएकाले त्यसको तयारीमा जुट्नुपर्ने बताए ।
नुमाफुङ प्रदर्शनको १७ वर्षपछि सुब्बाले फिचर फिल्म निर्देशन गर्न लागेका हुन् । उनी निर्देशित गुडबाई काठमाण्डू बुसान लगायत फेस्टिभलमा प्रदर्शन भएको छ र कोभिड-१९ महामारको अवस्था सामान्य भए नेपाली हलहरुमा रिलिज तयारीमा छ ।
६ वर्षअघि सुब्बाले निर्देशन गरेको पल्टिकल ड्रामा सिरिज ‘सिंहदरबार’ प्रदर्शनमा आएपनि सुब्बाको परिचय चाहिँ फिल्म निर्देशककै रुपमा रहेको छ ।
‘गाउँ आएको बाटो’ खासमा के हो ?
निर्देशकका अनुसार सडक र आधुनिकताले गाउँमा ल्याएको सामाजिक, आर्थिक र राजनीतिक परिवर्तनको कथा नै यो फिल्मको विषयवस्तु हो । डेढकरोड रुपैयाँमा निर्माण हुने बताइएको फिल्मको छायांकन केही सातामै सुरु गर्ने तयारी छ ।
भोजपुरको बालङ्खा, संखुवासभाको खाँदबारी र सुनसरीको धरानमा छायांकन हुने फिल्मको तालिका ४५ दिनको राखिएको छ । दयाहाङ र पशुपतिसहित प्रसन राई, खानुमा राई, केशव राई, प्रमिशा राई, प्रेम सुब्बाको मुख्य अभिनय छ ।
निर्देशक सुब्बा र महेश राईले मिलेर पटकथा लेखेका हुन् । अमेरिकी छायांकार मार्सिन क्याप्रोनले फिल्म खिच्दैछन् । अमोद राई निर्माता रहेको फिल्ममा नेपालबाट सञ्जु राई, हङकङदेखि देवराज राई, बेलायतबाट नरहाङ राई र अमेरिकादेखि भीम राई कार्यकारी निर्माता छन् ।
फिल्मको कथावस्तु राई समुदायकै भएकाले सबै कलाकार र टीम पनि सोही समुदायबाट लिइएको जानकारी निर्देशक सुब्बाले दिए ।
निर्देशक सुब्बा के भन्छन् ?
निर्देशक सुब्बा खासगरि कोभिड-१९ महामारीपछि चिन्तित सुनिए । पोस्ट–पेन्डेमिक समयमा फिल्मको निर्माण, प्रदर्शन र वितरणमा ठूलै परिवर्तन आउने बताउँदै उनले आफूले निर्देशन गर्न लागेको नयाँ फिल्मको तयारी पनि जुम मिटिङबाटै गरेको बताए ।
महामारीले नेपाली फिल्मलाई थप मौलिक, प्रतिस्पर्धात्मक र गुणस्तरीय बनाउनुपर्ने चुनौति थपिएको बताउँदै सूब्बाले नेपाली फिल्म निर्माताले चुनौतिलाई आत्मसात गर्न तयारी अवस्थामा बस्नुपर्ने बताए ।
प्राविधिक रुपान्तरणले नेपाली दर्शकको फिल्म चेतना विश्वस्तरीय भएको बताउँदै उनले अस्तित्वका लागि पनि नेपाली फिल्म विश्वस्तरीय बन्नु जरुरी रहेको बताए । ‘अब हामी हिजैको जस्तो फिल्म बनाएर टिक्न सक्दैनौं । त्यो तयारी हाम्रोमा देखिएको छैन । त्यो लेभलको जनशक्ति र ज्ञान निर्माण गर्नुपर्छ’ उनले भने ।
बेला–बेलामा दयाहाङ राई आलोचक सुनिने निर्देशक सुब्बा पत्रकार सम्मेलनमा दयाहाङसँगै सहभागी थिए । यो फिल्मको मुख्य पात्रमा समेत दयाहाङ छन् । अब दयाहाङलाई अभिनय गराउन चुनौतिपूर्ण रहेको उनको भनाई छ ।
‘दयाहाङलाई अभिनय गर्नु अभिनय चुनौतिपूर्ण छ । केही नन-एक्टर पनि हुनुहुन्छ । यी दुबै खाले एक्टिङ गर्नेको तरिका मिलाउन विधिहरु पनि विकास गर्नु जरुरी छ’ उनले भने ।
अभिनेता राईले पनि झन्डै २० वर्षपछि निर्देशक सुब्बासँग काम गर्न पाउनु आफ्ना लागि चुनौति र अवसर दुबै भएको बताए । ‘बीस वर्षको अन्तरमा पुनः समाजसँग जोडिने अवसर पाउँदै छु’ उनले भने, ‘राई भाषा बुझुने र समाजलाई बुझ्ने मौका पनि हुनेछ ।’
अमेरिकी छायांकार मार्सिन क्याप्रोनले आफू फिल्म खिच्ने ठाउँ र पात्रसँगको प्रेममा परेको बताए । निर्देशक छिरिङरितार शेर्पाले कोभिड महामारीको समयमा सुब्बाको फिल्मले नयाँ जीवन दिने आशा व्यक्त गरे ।
‘हङकङ नेपाली फिल्मको बजार चाहन्छ’
फिल्म निर्माता अमोद राई दुई दशकदेखि हङकङमा बसोबास गर्दै आएका छन् भने पेशाले उनी शिक्षक हुन् । हङकङ र नेपाली समाजको चरित्र अध्ययनमा उनको राम्रो दखल छ । हङकङमा बसोबास गर्ने चिनियाँ र गैरचिनियाँले नेपाली समाजसँग अन्तक्रिया गर्न कला, साहित्य र संस्कृति चाहेको र फिल्म बलियो माध्यम हुने उनको भनाई छ ।
‘नवीनजीसँग हङकङमा भेट हुँदा यस्तो आइडियामा फिल्म बनाउने योजना भयो । कम्युनिटी फन्डिङको अवधारणामा फिल्म बनाउने आइडिया बन्यो । नेपाली साहित्य, कला र संस्कृतिलाई पनि विकास गर्नुपर्ने हाम्रो दायित्व पनि थियो’ पत्रकार सम्मेलनमा निर्माता राईले भने ।
ह्ङकङले विविधतायुक्त समाजलाई स्वीकार्न खोजेको बताउँदै राईले अल्पसंख्यकको कथा भन्न चाहेको बताए । गत महिना हङकङमा लागू भएको नयाँ फिल्म नीतिले नेपाली फिल्म निर्माणमा कुनै बाधा नपुग्ने उनको भनाई छ ।
फिल्ममा सामुदायिक लगानीको मोडेल
नेपाली फिल्म निर्माणमा पहिलोपटक ‘गाउँ आएको बाटो’ले फिल्ममा सामुदायिक लगानीको अवधारणा ल्याएको छ । भन्नुको अर्थ, जुन समुदायको कथावस्तुमाथि फिल्म निर्माण हुन्छ, त्यसमाथि उक्त समुदायले गच्छेअनुसारको लगानी गर्नु ।
यो फिल्मको कथावस्तु पनि राई समुदायमा आधारित भएकाले गाउँ जाने बाटोले कम्युनिटी फन्डिङको अवधारणा ल्याएको हो । यस्तो लगानी मुलुकमै पहिलोपटक भएको हो ।
‘जुन कथा जुन समुदायबाट आउँछ, सोही समुदायले लगानी गर्ने र बजारीकरण गर्ने अवधारणाअनुसार हामीले यो फिल्म निर्माण गर्न लागेका हौं’ निर्देशक सुब्बाले भने ।
काठमाडौं । प्रियंका चोपडाले हालै आफ्नो अफिसियल इन्स्टाग्राम अकाउन्टबाट आफ्नो नामबाट चोपडा र जोनस थर हटाइन् । त्यसपछि प्रियंका र उनका पति निक जोनसको सम्बन्धमा दरार आउन थालेको आंकलन गर्न थालियो ।
यसैबीच, निक जोनसले सोसल मिडियामा एउटा भिडिओ सेयर गरेका छन् जहाँ प्रियंकाले कमेन्ट गर्दै सम्बन्धमा आउन लागेको दरारको खण्डन गरेकी छिन् । प्रियंकाले इन्स्टाग्रामबाट सरनेम हटाएपछि यी दुईको सम्बन्धलाई लिएर हलिउडदेखि बलिउड मिडियामा चर्चा छाएको छ ।
डिसेम्बर १ मा प्रियंका र निकबीचको बिहेको तीनवर्ष पुग्दैछ । यसअघि नै प्रियंकाले बायोबाट सरनेम हटाएर प्रशंसकलाई कन्फ्युज तुल्याइदिएकी छिन् । यसअघि नै प्रियंका र निकबीच डिभोर्स हुन लागेको खबर तरंगित भएको थियो ।
बिहे लगत्तै प्रियंकाले बायोमा आफ्नो नामपछि जोनस सरनम राखेकी थिइन् । प्रशंसकहरु किन प्रियंकाले सरनेमबाट जोनस हटाइन् भन्ने कुरा जान्न चाहिरहेका छन् । यसकारण अब फ्यानलाई प्रियंकाबाट प्रतिक्रियाको खाँचो पर्नेछ आखिर किन उनले यो काम गरिन् ।
गत सोमबार प्रियंकाको नयाँ हलिउड फिल्म म्याट्रिक्सको प्रदर्शन मिति घोषणा भएको छ । यसबाहेक पनि प्रियंकासँग केही हलिउड प्रोजेक्टहरु छन् । मलाइका अरोराले पनि अरबाज खानसँगको डिभोर्स अगाडि इन्स्टाग्रामबाट सरनेम हटाएकी थिइन् । बलिउडका अन्य सेलेब्सले पनि डिभोर्स अघि सोसल साइटबाट सरनमलाई हटाएको इतिहास छ ।
काठमाडौं । गायक प्रकाश दूतराजले एक महिनाअघि आफ्नै शब्द र संगीतमा रहेको दोहोरी गीत ‘जाम भो माइली’ सार्वजनिक गरे । शान्तीश्री परियारसँग मिलेर उनले गाएको उक्त गीत अहिले टीकटकदेखि सामाजिक संजालमा हिट छ ।
युट्युवमा मात्र यसलाई अहिलेसम्म ७७ लाख पटक हेरिएको छ । टीकटक र अन्य सामाजिक संजालको गणना यसमा छैन । लगातार दोस्रो साता युट्युवको शीर्षस्थानमा रहेको गीत रिलिजको एक महिनापछि पनि अझै यसलाई हेर्नेको संख्या उच्च छ ।
मौसम हिमालीको निर्देशन रहेको भिडिओमा गायक दूतराज, रोशनी कार्की र निक्स शर्माको मुख्य अभिनय छ ।
गीत सार्वजनिक भएको छोटो समयमै अत्यन्तै रुचाइएको छ टीकटकमा समेत यो गीतमाथि धेरैले भिडिओ बनाएका छन् । संगीतकार एवं गायक दूतराजले गीतमा समाजको थोरै समस्या, थोरै सचेतना अनि धेरै प्रेम समेटिएको कथाको भएको उल्लेख गरेका छन् ।
गीतमा ग्रामिण जीवनशैली झल्किने गरि वनपाखा, खोलानाला, मेलापातका सुन्दर दृश्यहरु समावेश भएको छ । ग्रामिण जीवनको मौलिकता र ठेट शब्द समावेश भएकाले पनि दर्शक एवं श्रोताले यसलाई रुचाएका छन् ।
भिडिओमा लाहुरे गाउँमा आएर युवतीहरुलाई ललाईफकाई गरेको देख्न सकिन्छ । गाउँकी सोझी युवतीलाई भगाएर लैजादै गर्दा गाउँलेहरुले ती युवतीलाई फर्काएर लाहुरेलाई गाउँबाट लखेटेको दृश्य समावेश छ ।
दूतराजले नेपाल प्रेससँग भने, ‘गीत सामाजीक सञ्जालले मात्र चर्चामा आएको होइन । अडियो मेकिङ, भिडिओ मेकिङ सबै कारणले चर्चामा आएको हो । यो गीतमा मौलिकता झल्किएकाले दर्शकले रुचाई दिनुभएको छ । गीतमा खास गरी नेपालीपन छ । समाजमा भइरहेको घटनालाई भिडिओमार्फत देखाइएको छ ।’
यी समाजमा घटेका घटनाहरु हुन् जुन अहिले पनि यथावत् नै छ । पात्रहरु भिडिओमा आउनुभन्दा अगाडि नै समाजमा यो घटना देखिरहेका छौ । घटना सकारात्मक या नकरात्मक भएपनि गीतमा नेपालीपन समेटिएको उनले बताए ।
उनले काम गर्दै जाँदा दर्शकले गीत मन पराइदिएकोमा खुशि व्यक्त गरे । उनले यसअघि पनि बैनी झ्यालैमा, घर कता हो बैनीको, आरनेजस्ता उनका गीत गाएका छन् । तत्कालै नयाँ गीत ल्याउने आफ्नो योजना नरहेको उनले सुनाए ।
काठमाडौं । नेपाली युवापुस्तामा रहेको अमेरिकी ड्रीम्सको कथामाथि फिल्म घुइँचो निर्माण हुने भएको छ । राजधानीमा सोमबार आयोजित पत्रकार सम्मेलनमा फिल्म निर्माणको घोषणा गरियो ।
फिल्मबारे कुरा गर्दै निर्देशक दीपेन्द्र लामाले भने, ‘यो सपनाहरुको घुइँचो हो । इमान्दार र बेइमानहरुको घुइँचो हो । सुखदुःखको घुइँचो हो र असल तथा खराबहरुको घुइँचो हो ।’
पहिलोपटक निर्देशक लामाले दयाहाङ राई, पल शाह र दीपकराज गिरीभन्दा नयाँ कास्टसँग सहकार्य गर्दैछन् । म्युजिक भिडिओका चर्चित मोडल कुन्साङ बोमजन र नायिका एलिजा गौतमको मुख्य भूमिका रहने फिल्मको छायांकन माघ अन्तिमदेखि हुनेछ ।
नेपालको डोल्पादेखि अमेरिकासम्म सुटिङ हुने फिल्मलाई रामजी दैलेखीले निर्माण गर्ने भएका छन् । निर्माता दैलेखीले नेपाली युवापुस्ताको अमेरिकी सपनामाथि फिल्म बन्ने बताए ।
यही फिल्मबाट ठूलो पर्दामा डेब्यु गर्न लागेका बोमजनले यो चरित्रमा अभिनय गर्न आफू उत्साहित रहेको बताए । ‘अहिलेको परिस्थितीलाई फिल्ममा उतारिनेछ र म पात्रलाई लिएर उत्साहित पनि छु’ उनले भने ।
निर्देशक लामाले फिल्ममा निर्देशकको रुपमा आइसकेपछि नायिका एलिजालाई आफू अनुकूल काम गराउने योजना रहेको सुनाए । ‘सँधै दयाहाङ र दीपकराजबाहेकसँग किन काम गर्नुहुन्न भन्नेको लागि पनि यो जवाफ हो’ निर्देशक लामाले भने ।
अन्य कलाकार र प्राविधिक छनौट हुन बाँकी रहेको जनाइएको छ ।
काठमाडौं । लोक संस्कृतिको जोगाउने उद्देश्यले चैतको दोस्रो साता काठमाडोंमा ‘राष्ट्रिय लोक दोहोरी महोत्सव २०७८’ आयोजना हुने भएको छ । टुँडिखेलमा महोत्सव गर्न लागिएको आयोजक डीएआर मूभिजका सञ्चालक श्याम धितालले जनाए ।
उनका अनुसार महोत्सवमा दुई सयभन्दा बढी स्टल रहने तथा विभिन्न जिल्लाको कला-संस्कृति झल्कने झाँकीदेखि विभिन्न जिल्लाका स्थानीय कलालाई देखाउने गरी कार्यक्रम आयोजना हुनेछ ।
२०७६ साल फागुनदेखि डीएआर मुभिज टुँडिखेलमा महोत्सव आयोजना गर्दै आएको थियो । सो महोत्सवमा २७ जिल्लाका सांस्कृतिक झाँकी प्रस्तुत गरिएको थियो । पाँच दिनसम्म चलेको महोत्सवमा पाँच लाखभन्दा बढी दर्शकले अवलोकन गरेका थिए ।
आगामी फेस्टिभलमा १० लाखभन्दा बढी दर्शकले फेस्टिभल अवलोकन गर्ने अपेक्षा गरिएको छ । दर्शकले निःशुल्क प्रवेश पाउने भएका छन् ।
काठमाडौँ । नेपालमा फिल्म पढाउने पहिलो कलेजको रुपमा स्थापित अस्कर इन्टरनेसनल कलेज (कलेज अफ फिल्म स्टडिज)ले चलचित्र विकास बोर्डसँग मिलेर दुई दिन फिल्म फेस्टिभल गर्ने भएको छ ।
कलेजले आउँदो मंसिर १० र ११ गते चलचित्र विकास बोर्डको हलमा फिल्म फेस्टिभल गर्न लागेको हो । कलेजका प्रिन्सिपल रामराजा दाहालले अस्कर कलेजले केही वर्षअघिदेखि गर्दै आएको फेस्टिभललाई निरन्तरता दिने उद्देश्यले आउँदो शुक्रबार र शनिबार फेस्टिभल गर्न लागेको जनाएका छन् ।
‘गत साल पनि हामीले महामारीकै बीचमा पनि भर्चुअल माध्यममा भए पनि फेस्टिभल गरेका थियौँ । महामारीका कारण मृतप्रायः रहेको उद्योगलाई गतिशील बनाउन यो फेस्टिभलले महत्वपूर्ण भूमिका खेलेको प्रतिक्रिया पाएका थियौँ,’ उनले भने, ‘ त्यही प्रतिक्रियाले उत्साहित भएर यो साल पनि निरन्तरता दिएका हौँ ।’
दाहालका अनुसार फेस्टिभलमा कलेजका विद्यार्थीले बनाएका फिल्मसँगै विश्वका प्रतिष्ठित फिल्म फेस्टिभलमा छानिएका फिल्म पनि देखाइनेछ । कलेजको संलग्नतामा निर्माण भएका र फेस्टिभलमा स्क्रिनिङ हुने फिल्म पनि विश्वका धेरै फेस्टिभलमा छानिएका फिल्म हुन् ।
नियमित फिल्म प्रदर्शनसँगै फेस्टिभलमा नेपाली सिनेमासम्बन्धी विभिन्न विषयमा छलफल पनि समानान्तर रुपमा चल्नेछन् । छलफलका विषय र सहभागी केही दिनमै टुंगो गरेर सार्वजनिक गर्ने प्रिन्सिपल रामराजा दाहालले जनाएका छन् ।
काठमाडौं । आउँदो महिना भारतको उत्तरपूर्वी राज्य सिक्किममा ग्लोबल फिल्म फेस्टिभल आयोजना हुँदैछ । सिक्किम फिल्म प्रवद्र्धन बोर्डले फेस्टिभललाई भव्य बनाउने तयारी गरिरहेको छ ।
यसका लागि नेपाली र बलिउड फिल्म क्षेत्रका निर्माता र सेलेव्रिटीलाई समेत निम्तो दिइएको छ । बलिउडबाट मलाइका अरोराले भाग लिनेछिन् भने, नेपालबाट अनमोल केसीलाई समेत निम्तो दिइएको छ ।
सिक्किम फिल्म प्रवद्र्धन बोर्डले गत आइतबार पोस्टर सार्वजनिक गर्दै फेस्टिभलमा सार्वजनिक हुने सेलेव्रिटी पाहुनाको नाम सार्वजनिक गरेको छ । नेपालबाट अनमोलसहित नम्रता श्रेष्ठ, भुवन केसी, दयाहाङ राई, विनय श्रेष्ठ, अदिती बुढाथोकीले भाग लिने भएका छन् ।
बलिउडबाट मलाइकासहित प्रियदर्शनले भाग लिने भएका छन् । मलाइकाले फेस्टिभलमा हुने जातिय पहिरनको प्रस्तुति कार्यक्रममा सो-स्टपरको रुपमा कार्य गर्नेछिन् । भुवन भने गतसाता सिक्किम पुगेरै फर्किएका हुन् ।
भुवनसहित निर्देशक मिलन चाम्सलाई सिक्किमका मुख्यमन्त्रीले फेस्टिभलबारे छलफल गर्न गान्तोक बोलाएका थिए । सिक्किमको फेस्टिभलमा नेपाली फिल्म साइनोदेखि जारसम्म प्रदर्शन हुने भएका छन् ।
काठमाडौं । चर्चित कोरियोग्राफर तथा फिल्म निर्देशक रिनशा बान्तवा राई अहिले इलाममा छिन् । उनी त्यहाँ पुग्नुको कारण चाहिँ फिल्म छायांकनलाई भने होइन । रिनशाको धपेडी भने अहिले राजनीतिक उद्देश्यलाई लिएर भइरहेको हो । कांग्रेस महाधिवेशनको प्रतिनिधि बन्नका लागि उनले इलाम क्षेत्र नम्बर २ बाट उम्मेदवारी दिएकी छिन् ।
आज हुने कांग्रेस महाधिवेशनको प्रतिनिधिको चुनावमा रिनशाले उम्मेदवारी दिएको नेपाल प्रेसलाई बताइन् । उनको घर इलामको चुलाचुली गाउँपालिका-४ आइतबारे हो । उनी जन्मथलो पुगेर चुनाब लडिरहेकी छिन् ।
कलाकारहरु धमाधम राजनीतिमा प्रवेश गरिरहँदा रिनशाको पनि राजनीतिक डेब्यु भएको छ । ‘गाउँ समाजको परिवेश र समाजसेवा गर्ने उद्देश्यले मलाई राजनीतिमा सक्रिय बन्न प्रेरित गर्यो’ उनले भनिन्, ‘गाउँ र जिल्लालाई केही योगदान गर्नेछु भन्ने उद्देश्य छ ।’
कांग्रेस कार्यकर्ता नरेन्द्रकुमार बान्तवाकी छोरी रिनशाले चुलाचुलीबाट धाएरै झापा दमकको विद्यालयबाट प्रारम्भिक शिक्षा हासिल गरेकी हुन् । रिनशा निर्देशित फिल्म ‘आइएम ट्वान्टी वान’ रिलिजको तयारीमा छ भने ‘इन्टुमिन्टु लन्डनमा’ लकडाउनअघि रिलिज भएको थियो ।
कलाकारहरु राजनीतिक दलमा प्रवेश गर्ने क्रम चलिरहँदा पनि रिनशा तटस्थ थिइन् । अहिले भने उनी खुलैर कांग्रेसको उम्मेदबार बनेकी हुन् ।
काठमाडौं । नवौं नेपाल मानवअधिकार फिल्म फेस्टिभल आजदेखि भर्चुअलरुपमा सुरु भएको छ । मानवअधिकार चलचित्र केन्द्रको आयोजनामा चल्ने फेस्टिभल मंसिर ९ गतेसम्म आयोजना हुनेछ । फेस्टिभलमा २४ वटा मुलुकका ४२ वटा फिचर, छोटा र डकुमेन्ट्री फिल्म प्रदर्शन हुने भएका छन् । ११ वटा नेपाली फिल्म देखाइने भएको छ ।
फेस्टिभललाई भर्चुअलरुपमा सम्बोधन गर्दै चलचित्र विकास बोर्डका अध्यक्ष दयाराम दाहालले कोभिड महामारीपछि फिल्म गतिविधि लयमा फर्कने अवस्थामा रहेको बताए । कोरोना प्रभावित फिल्म र क्षेत्रलाई सघाउन सरकार तयार रहेको उनले बताए ।
यस महोत्सवका फिल्महरुलाई मूभी डटकम अनलाइन वेबसाइट (9nhriff.muvi.com) लगइन गरेर हेर्न सकिनेछ ।
फिल्म जुरी मनोजबाबु पन्तले महामारीको कारण फिल्म डिजिटल प्लेटफर्ममा प्रवेश गरेको बताए । उनले इन्डिपेन्डेन्ट फिल्महरुलाई संरक्षण गर्नुपर्ने जरुरी भएको बताए । महोत्सवको पहिलो दिनको बिहानैदेखि फिल्महरु स्ट्रिमिङ गर्न सुरु भएको छ । प्रदर्शन भएको दिनको भोलिपल्ट बिहान ७ बजेसम्म यी फिल्म हेर्न पाइने भएको छ ।
फिल्म प्रदर्शनसँगै मानवअधिकार, कोभिड-१९ को प्रभाव, लैंगिक हिंसा, फिल्मको भूमिका र सशक्तीकरणजस्ता विषयमा छलफल समेत आयोजना हुने भएको छ । अधिकारवादी, फिल्म निर्माता, संचारकर्मी लगायतले छलफल प्यानलमा भाग लिने भएका छन् ।
ओटीटी प्लेटफर्ममा नेपाली फिल्म कसरी पुर्याउने भन्ने बारे पनि मास्टरक्लास आयोजना हुने भएको छ । फेस्टिभलमा अन्तर्राष्ट्रिय विधाका फिल्महरुको प्रदर्शन हुने भएको छ भने नेपाली फिल्महरुले प्रतिस्पर्धा मात्र गर्नेछन् ।
नेपाली फिल्मलाई निर्णायक मण्डलले उत्कृष्ट फिक्सन, उत्कृष्ट बृत्तचित्र र उत्कृष्ट चलचित्रकर्मीको छनौट गर्दै पुरस्कृत गर्ने भएका छन् । आशा मगराती, मनोजबाबु पन्त र लिना रञ्जित निर्णायकको रुपमा छन् । महोत्सवको सह-आयोजकको रुपमा राष्ट्रिय मानवअधिकार आयोग र क्यानडा राजदूतावास छन् ।
काठमाडौं । गायिका रानी शाक्य र गायक सुगम पोखरेलको युगल स्वरमा समाबेश गीत ‘तिम्रो हाँसो’ रिलिज भएको छ । दधी अधिकारीको शब्द रचना, कल्याण सिंहको संगीत रहेको उक्तगीतमा राहुल प्रधानको एरेन्ज र प्रदीप जोशीको मिक्सिङ एण्ड मास्टरीङ रहेको छ ।
सिन्धुपाल्चोकको रमणीय स्थल सुकुटे बिचमा छायांकन गरिएको गीतको भिडियोमा पहिलोपटक नायिका एलिजा गौतम र प्रहिल कार्कीले स्क्रीन सेयर गरेका छ्न् । लामो समयपछि भिडियोमा देखिएका यी दुई जनाको अस्क्रीन रोमान्स रहेको छ।
प्रहिल कार्कीको नै निर्देशन रहेको भिडियोमा सुरेन्द्र बसेलको कोरियोग्राफी, आभेश बज्राचार्य सिनेमाटोग्राफी ,माधव बेल्बासेको सम्पादन र जीवन स्वारको सह निर्देशन रहेको छ ।
काठमाडौं । मिस नेपाल नम्रता श्रेष्ठ विश्व सुन्दरी प्रतियोगितामा भाग लिन आज बेलुका अमेरिकातर्फ प्रस्थान गरेकी छिन् ।
उनलाई त्रिभुवन विमानस्थलमा द हिडन ट्रेजरका अध्यक्ष दिवाकर राजकर्णिकार, प्रमोद कंसकार लगायतले शुभकामनासहित बिदाइ गरे । त्यसतर्फ प्रस्थान गर्नुअघि नेपाल प्रेससँग कुरा गर्दै नम्रताले मिस वर्ल्डमा राम्रो गर्ने अठोटसहित आफू जान लागेको बताइन् ।
अमेरिकी राज्य पुएर्तो रिकोमा डिसेम्बर १६ मा मिस वर्ल्ड आयोजना हुँदैछ । कोरोना महामारीको कारण गतवर्ष स्थगित भएको संस्करण यसवर्ष हुन लागेको हो । अर्कोतर्फ, मिस अर्थको आइतबार हुने भर्चुअल समारोहमा मिस नेपाल अर्थ सुप्रिया श्रेष्ठले भाग लिँदैछिन् ।
काठमाडौं । अभिनेत्री नम्रता श्रेष्ठ र प्रेमी दावा स्टिभन शेर्पाको चारवर्षदेखिको रिलेसनसिप टुंगिएको छ । यी दुबैले सहमतीमै अलग भएर अघि बढ्ने निधो गरेका छन् ।
उनीहरुको ब्रेकअप केही महिना पहिले नै भैसकेको नम्रता निकट स्रोतले नेपाल प्रेसलाई जानकारी दिएको छ । ‘जहिलेसम्म हामी एकअर्कामा कम्फर्टेबल थियौं, हामी सँगै थियौं’ नम्रतालाई उध्दृत गर्दैै स्रोतले भन्यो, ‘कम्फर्टेबल नभएपछि हामी अलग भएका छौं ।’
पर्यटन व्यवसायी समेत रहेका शेर्पा र नम्रता पहिलोपटक एक फिल्मको प्रिमियर समारोहको बेला कुमारी हलमा सँगै देखिएका थिए । त्यसपछि नै उनीहरुले आफ्नो प्रेमलाई सार्वजनिकरुपमा प्रस्तुत गरिरहेका थिए ।
त्यसयता उनीहरु घुमघाम गर्न न्यूजिल्यान्ड र सगरमाथा आधार शिविरसम्म पुगे । चाँडै बिहे गर्ने उनीहरुको योजना पनि थियो । तर, आफूहरु सम्बन्धमा नरहेको कुरा स्वयम नम्रताले निकट साथीहरुलाई बताउन थालेकी छिन् ।
यसअघि सामाजिक संजालमा समेत दावा र नम्रताले घुमघाम र सँगै भएका तस्बिर पनि पोस्ट गर्दै आएका थिए । तर, यो गर्न पनि छाडेपछि उनीहरुको सम्बन्धलाई लिएर अड्कलबाजी भैरहेको थियो ।
काठमाडौं । खेम सेञ्चुरी र अस्मिता अधिकारीको स्वरमा रहेको गीत ‘रम रम मरौटी’ लगातार दोस्रो साता पनि युट्युवमा सर्वाधिक हेरिने गीत बनेको छ । सात दिनमा मात्र यो गीतलाई १४ लाख ६२ हजार ५५० पटक हेरिएको छ । यो गीतको कूल भ्यूज संख्या १ करोड २३ लाख ६६ हजार ४८३ छ ।
सहिमा श्रेष्ठ र सन्दिप न्यौपानेको स्वरमा रहेको गीत ‘ओकल दोकल २’ यो साता दोस्रो स्थानमा परेको छ । यो गीतलाई सातामा ११ लाख २४ हजाार ४९९ पटक हेरिएको छ भने कूल भ्यूज संख्या १३ लाख ५९ हजार १८६ छ ।
यस्तै प्रकाश दूतराजको स्वरमा रहेको गीत ‘जाम भो मार्ईली’ यो साता तेस्रो सर्वाधिक हेरिने नेपाली गीत बनेको छ । एक सातामा मात्र यो गीतलाई ९ लाख ११ हजार ३९० पटक हेरिएको छ भने कूल ७४ लाख ३० हजार ८२७ रहेको छ ।
भिटेनको गीत ‘गल्ली सडक’ पाँचौ स्थानमा छ । यो गीतलाई पछिल्लो साता ८ लाख ९९ हजार पटक हेरिएको छ भने कूल भ्यूज ३९ लाख नाघेको छ । रुटिन अफ नेपाल बन्दले तयार पारेको साताको सूची यस्तो छ :
१. खेम सेञ्चुरी र अस्मिता अधिकारी ‘रम रम मरौटी’ : १४६२५५०
२. सहिमा श्रेष्ठ र सन्दिप न्यौपाने ‘ओकल दोकल २’ : ११२४४९९
काठमाडौं । ‘चपली हाइट’ तीन कोरोना महामारीपछि रिलिज हुन लागेको प्रतीक्षित नेपाली फिल्म हो । आगामी पुस २ गते रिलिज हुने फिल्म स्टारकास्टले पनि चर्चामा छ ।
स्वस्तिमा खड्का, अर्पण थापा लगायतका कलाकारहरु समावेश मल्टिस्टारर फिल्मका अघिल्ला दुईवटा प्रिक्वेलहरु व्यवसायिकरुपमा हिट भैसकेका छन् । के ‘चपली हाइट’को तेस्रो सिक्वेलले दर्शकलाई फर्काउन सक्ला भन्ने प्रश्न अहिले सबैजनामा छ ।
फिल्म रिलिज हुने सोही मितिमा हलिउडको बहुप्रतीक्षित फिल्म स्पाइडरम्यान : नो वे होम पनि प्रदर्शन हुँदैछ । ‘स्पाइडरम्यान’ ‘चपली हाइट’को व्यापारमा चुनौति हुनसक्छ । हलिउड सुपरहिरोको उक्त ट्रेलरले राम्रै चर्चा बटुलेको छ भने चपली हाइटको ट्रेलर आजमात्र रिलिज भएको छ ।
यस्तोमा, के ‘चपली हाइट’ले जबर्जस्त ओपनिङ गर्ला ? आयोजित पत्रकार सम्मेलनमा निर्माता अर्जुनकुमारले भने, ‘अन्य फिल्मसँग जुध्दा फरक पर्दैन । यो ‘चपली हाइट’ हो । फिल्महरु आउँछन् जान्छन् ।’ उनले ‘स्पाइडरम्यान’ ठूलै फिल्म भएपनि त्यसले आफ्नो फिल्मलाई असर नपार्ने दावी गरिरहेका थिए । यी त भए फिल्म जुध्दा व्यापारमा असर पर्ने कुरा ।
अर्कोतर्फ, फिल्मको व्यापार स्टारकास्टमा पनि निर्भर हुनेगर्छ । चपली हाइटमा दर्शक तान्न स्वस्तिमा खड्काको स्टारपावर चल्नुपर्छ । सुरुमा स्टारपावर अनि त्यसपछि कन्टेन्ट । स्वस्तिमा यसबारे के भन्छिन ?
पत्रकार सम्मेलनमा उनले भनिन, ‘स्टारडमको प्रेसर लिएको छैन । राम्रो छ भने चल्छ । छैन भने छल्दैन । प्रेसर छैन ।’ उनले यसअघि फ्लप भएका फिल्म पनि कन्टेन्टकै कारण असफल भएकोतर्फ संकेत गरिन् ।
नौ वर्षपछि चपली हाइटको तेस्रो सिक्वेल रिलिज हुन लागेको हो । निकेश खड्काले निर्देशन गरेको फिल्मलाई अर्जुन कुमारले निर्माण गरेका हुन् ।
काठमाडौं । नौवर्षअघि ‘चपली हाइट’ रिलिज हुँदा दुई कारणले सहर हल्लिएको थियो । पहिलो : बिनिता बरालको सेमिन्यूड फोटोसुट र दोस्रो : नेपाली फिल्ममा मनोवैज्ञानिक थ्रीलर जनराको फिल्म सुरुआत ।
नौ वर्षपछि ‘चपली हाइट’कै तेस्रो श्रृंखलाको फिल्म ट्रेलर रिलिज भएको छ । यस्तो लाग्छ, सन् २०२१ सम्म आइपुग्दा चपली हाइटको गुदी साइकोलजिकल थ्रीलर कम र मर्डर थ्रीलर ज्यादा देखिन्छ ।
यी दुई जनराबीच खास प्रकारको भिन्नता छ । साइकोलोजिकल थ्रीलरमा दर्शक र पात्रबीच अन्तक्रिया हुन्छ भने मर्डर थ्रीलरमा हिंसाको प्रयोग ज्यादा ।
म्युजिक भिडिओमा समेत चलेका निकेश खड्काले तेस्रो सिरिजको निर्देशकीय पारी सम्हालेका छन् । खड्काले दीपेन्द्र खनालकै निर्देशकीय लिगेसीलाई निरन्तरता दिएका छन् वा छैनन् भन्ने कुरा पुस २ गते सिनेमा घरमा पुग्दा थाहा हुन्छ ।
‘चपली हाइट’को तेस्रो सिक्वेलको ट्रेलरले मुख्यतः फिल्मको कथावस्तु के हो भन्ने चीजको स्थापना गर्छ । श्रद्धा नामक युवतीको हत्या कसरी भयो भन्ने रहस्य पत्ता लगाउने संघर्ष यसको कथावस्तु हो । हत्या गरिएकी पात्रकी निकट साथी रहेकी स्वस्तिमालाई पक्राउ गरेर यथार्थ बुझ्न प्रहरीले गरेको केरकार र अर्कोतर्फ नेपथ्यमा अर्पण थापा र आमिर गौतमको चलखेललाई ट्रेलरमा चित्रण गरिएको छ ।
मुख्यतः हत्या घटनामा आरोपित तीनजना फरार अभियुक्तलाई पक्राउ गर्न प्रहरीले चालेको अप्रेसन यसको कथावस्तु हो । दीपाश्री निरौला प्रहरी अधिकृतको भूमिकामा देखिएकी छिन् । मुख्यतः अर्पणलाई सिरियल किलरको रुपमा चित्रण गर्न खोजिएको जस्तो देखिन्छ ।
२ मिनेट ३६ सेकेन्ड लामो फिल्मको ट्रेलरमा पात्रको भीड देखिन्छ । ट्रेलरमा एकैपटक धेरै पात्र र सोही गतिमा सम्पादन हुँदा कतिपय दर्शक कन्फ्युजन हुनसक्छन् । तर, मर्डर थ्रीलर रुचाउने दर्शकलाई ट्रेलर मनपर्नसक्छ । किनभने, कतिपय दर्शकको रुचि ‘लाउड’ फिल्म रुचाउने हुन्छ ।
‘चपली हाइट’को तेस्रो सिक्वेलमा स्वस्तिमासहित सुपुष्पा भट्ट कँडेल, महेश त्रिपाठी, प्रतीकमान श्रेष्ठ, अर्पण थापा, दीपाश्री निरौला, लक्ष्मी बर्देवा, लोकेन्द्र लेखक, विशाल पहारी, जीवन भट्टराई, सुस्मा निरौलाको मुख्य अभिनय छ । आमिर गौतम निर्माता अर्जुन कुमारका लक्की चार्म भैहाले ।
गायक समेत रहेका अर्जुन कुमारको निर्माण रहेको फिल्म पुस २ गते देशव्यापी प्रदर्शन तयारीमा छ ।
काठमाडौं । मिस नेपाल नम्रता श्रेष्ठ विश्व सुन्दरी प्रतियोगितामा भाग लिन भोलि अमेरिका प्रस्थान गर्दैछिन् । कोरोना महामारीपछि हुन लागेको पेजेन्टलाई लिएर उनी उत्साहित पनि छिन् ।
उनको सो उत्साह हिडन ट्रेजरले राजधानीमा बिहीबार आयोजना गरेको पत्रकार सम्मेलनमा पनि देखियो । विगतदेखि नै ब्यूटी विथ पर्पस र मल्टिमिडिया विधामा रहेको नेपालको दबदबालाई यसपटक पनि निरन्तरता दिने तयारीमा नम्रता छिन् ।
मल्टिमिडिया विधामा भोटिङ खुला भएको छ र नम्रताले आफूलाई भोट गर्न नेपालीहरुलाई आग्रह गरेकी छिन् । यो विधामा छानिए सीधै अन्तिम १२ मा प्रवेश गर्ने मौका मिल्नेछ । मबस्टर एप डाउनलोड गरेर नम्रतालाई मतदान गर्न सकिनेछ ।
अर्कोतर्फ, ब्यूटी विथ पर्पस विधाको लागि नम्रताको परियोजना रहेको धादिङको पुल पनि संचालनमा आएको छ । सो पुल र त्यहाँका बासिन्दाको संघर्षलाई लिएर नम्रताले तयार पारेको भिडिओ पनि तयार भएको छ । यो भिडियोलाई उनले मिस वर्ल्डमा पेश गर्नेछिन् ।
यसैबीच, मिस वर्ल्डमा नम्रताले पेश गर्ने परिचयात्मक भिडिओ आज सार्वजनिक भएको छ । यो भिडियोमा नेपाली कलासंस्कृति, वातावरण, महत्व र हिमालय चित्रण गरिएको छ । हेर्नूस भिडिओ:
काठमाडौं । अमेरिकामा रहँदै आएका रोशन अधिकारी भर्सटायल छन् । उनी गीतमा आफै स्वर भर्छन् भने भिडिओमा पनि अभिनय गर्छन् । उनै, रोशनको स्वरमा समावेश ‘रित्तो रित्तो’ बोेलको गीतको म्युजिक भिडिओ सार्वजनिक भएको छ । यो गीतमा दिग्गज धौरालीको शब्द, अर्जुन पोखरेलको संगीत छ ।
द डिभाइन म्युजिकको प्रस्तुतिमा तयार भएको यो गीतमा नेपः सिनेको सहकार्य छ । गीतको भिडिओमा नायिका पूजा शर्मा र मोडल तथा गायक रोशन अधिकारीले अभिनय गरेका छन् । मुस्ताङको रमणीय स्थानमा खिचिएको भिडियोमा रोशन र पुजा रोमान्टिक देखिएका छन् । विधान कार्कीले निर्देशन गरेको भिडियो आकर्षक छ ।
विकास दाहालको सम्पादन रहेको भिडिओलाई उत्सव दाहालले खिचेका हुन् । गायक तथा मोडल रोशनले पत्रकार सम्मेलनमा बोल्दै आफू निरन्तर रुपमा नेपाली सांगीतिक क्षेत्रको विकासमा लागिपर्ने बताए ।
काठमाडौं । पहिलो सगरमाथा आरोही तेन्जिङ नोर्गे शेर्पाबारेको फिल्म ‘तेन्जिङ’बाट नेटफिल्क्सले हात झिकेको छ । गतवर्ष उक्त अमेरिकी स्ट्रिम कम्पनीले कलाकार खोज्दै ‘कास्टिङ कल’ पनि आह्वान गरेको थियो ।
अब नेटफिल्क्सले फिल्म निर्माणलाई स्थगित गरेपछि वाल्ट डिज्ने स्टुडियोले फिल्मलाई निर्माण गर्ने भएको छ । डिज्ने प्लसमा रिलिज हुने फिचर लेङ्थ फिल्मको लागि भन्दै वाल्ट डिज्नेले गतसाता विश्वव्यापी कास्टिङ कल जारी गरेको छ ।
सन् २०२२ मा नेपाल र न्यूजिल्यान्डमा छायांकन सुरु हुने फिल्मको मुख्य पात्र तेन्जिङसहितका विभिन्न सहायक कलाकार खोजी गरिएको छ । २५ वर्षदेखि ४० वर्ष उमेरको तेन्जिङ पात्र मागिएको छ ।
तेन्जिङसहित थप चारवटा सहायक कलाकारको समेत कास्टिङ कल आह्वान गरिएको छ । मुख्य पात्रको लागि शेर्पा, तिब्बती अर्थात हिमालमा बसोबास गर्ने पुरुष वा महिला हुनुपर्ने सर्त छन् ।
अष्ट्रेलियाली कम्पनी डेनीलङले अहिले वाल्ट डिज्नेको लागि कास्टिङ कल आह्वान गरेको छ । नेपालको कास्टिङ भने निर्देशक छिरिङरितार शेर्पाको मिला प्रोडक्सनले हेर्ने भएको छ । मिलाले यसैसाता तिब्बती, नेपाली र अंग्रेजी भाषामा कास्टिङ कल गरेको छ ।
‘सुरुमा नेटफिल्क्सले बनाउने भनेर तयार भएको फिल्म अन्तिम समयमा उसले हात झिकेपछि अहिले डिज्नेले बनाउँदैछ’ नेपाल प्रेससँग निर्देशक शेर्पाले भने, ‘त्यतिबेला पनि कुनै कलाकारलाई कास्ट गरिएको थिएन । त्यही भएर हुनसक्छ डिज्नेले यो प्रोसेसलाई अघि बढायो होला ।’
निर्देशक शेर्पाका अनुसार सन् २०२२ को मध्यतिर यो फिल्म नेपालमा समेत छायांकन हुनेछ । शेर्पाले सन् १९५३ को मे २९ मा न्यूजिल्यान्डका एडमन्ड हिलारीसँगै विश्वको सर्वोच्च शिखर सगरमाथा आरोहण गरेका थिए । टाइम म्यागजिनले शेर्पालाई २० औं शताब्दीका सय प्रभावशाली व्यक्तिको सूचीमा राखेको थियो ।
काठमाडौं । गायिका प्रविशा अधिकारीले प्रेमी निर्माण सिटौलासँग टीकाटालो गरेकी छिन् । आइतबार झापास्थित घरमा उनीहरुले इन्गेजमेन्ट गरे । उनीहरुबीच आगामी आइतबार बिहे हुँदैछ ।
लामो समय अमेरिकामा रहेका निर्माण प्रविशासँग बिहे गर्न दशैंँअघि नेपाल आएका थिए । निर्माण झापा चारपानेका हुन् । बिहेकै लागि दुबैजना अहिले झापा पुगेका छन् ।
पारिवारिक सहमतीमा यी दुबैजनाको बिहे अघि बढेको हो । लामो समयदेखि भर्चुअलरुपमा सम्बन्धमा बसेपनि निर्माण काठमाडौं आएपछि उनीहरुको पहिलोपटक भेट भएको हो ।
मंसिर ५ गते प्रविशाले आफ्न परिवार र आफन्तलाई साक्षी राखेर निर्माणसँग बिहे गर्न लागेकी हुन् । प्रविशा द भ्वाइस किड्स कोच बनेपछि अहिले चर्चामा छिन् । उनी युवापुस्तामा रुचाइएकी गायिका हुन् ।
काठमाडौं । कोरोना महामारीले रोकिएका ब्यूटी पेजेन्टहरु अब धमाधम हुने तयारीमा छन् । यी प्रतिस्पर्धामा भाग लिन नेपाली सुन्दरीहरु पूर्णरुपमा तयार छन् । कोही भौतिकरुपमै भाग लिन जाने अन्तिम तयारीमा छन् भने कतिपयले भर्चुअल माध्यमबाट प्रतिस्पर्धा गर्नेछन् ।
मिस नेपाल आयोजक द हिडन ट्रेजरले बिहीबार राजधानीमा पत्रकार सम्मेलनको आयोजना गर्दै आफ्ना ताज विजेताहरु तयार भएको जनाएको छ । अमेरिकाको पुएर्तो रिकोमा डिसेम्बर १६ मा हुने मिस वर्ल्डमा भाग लिन मिस नेपाल नम्रता श्रेष्ठ सप्ताहन्तमा त्यसतर्फ जाँदैछिन् ।
नोभेम्बर तेस्रो साता सुप्रिया श्रेष्ठले फिलिपिन्समा भर्चुअल रुपमा हुने मिस अर्थ प्रतियोगितामा भाग लिनेछिन् । कोरोना महामारीको कारण टोकियोमा पूर्वनिर्धारित मिस इन्टरनेसनल नहुने भएको छ ।
तस्बिरहरु : गौरब पौडेल
यसैवर्षको अगस्ट महीनामा पोल्यान्डको वार्सामा भएको मिस सुप्रान्यासनलमा सिमल कनौजियाले भाग लिइन् । सबैको आँखा यतिबेला विश्व सुन्दरी प्रतियोगितातिर छ । यसपटक मिस नेपाल वर्ल्ड नम्रता श्रेष्ठले मुलुकको प्रतिनिधित्व गर्दैछिन् ।
मिस वर्ल्डमा नेपालको तयारी कस्तो छ ?
उक्त प्रेसमिटमा नम्रताले तयार पारेका दुई भिडिओ प्रस्तुत भयो । पहिलो- उनको परिचयात्मक भिडियो र दोस्रो- ब्युटी विथ पर्पस विधाका लागि उनले धादिङमा निर्माण गरेको झोलुंगे पुलको भिडियो । यी दुबै भिडियोमार्फत नम्रताले प्रशंसा बटुलेकी छिन् ।
५० लाख लगानीमा धादिङमा उनले उक्त विधाका लागि तयार पारेको झोलुंगे पुल यसैसातादेखि प्रयोगमा आएको छ र २० हजार भन्दा बढी बासिन्दा यसबाट लाभान्वित हुनेछन् । ‘अब खोला तर्दा कसैको पनि मृत्यु नहोस् र कसैले पनि ज्यान गुमाउनु नपरोस्’ नम्रताले भनिन् । उनको भिडियो निकै मर्मस्पर्शी छ ।
उपाधि जित्न राम्रो प्रयास गर्ने बताउँदै उनले गिभअप नगर्ने बताइन् । कस्ट्युमदेखि नेपालले पहिलेदेखि जित्दै आएका विधाहरु जित्न पनि प्रयासहरु भैरहेको उनले बताइन् । नेपालले यसअघि मल्टिमिडिया र व्यूटी विथ पर्पस विधामा जित्दै आएको छ ।
मबस्टार एप डाउनलोड गरेर आफूलाई भोट गर्न नम्रताले आग्रह गरेकी छिन् । डिसेम्बरसम्मै नम्रतालाई भोट गर्न सकिनेछ । मल्टिमिडियामा जित्न सके अन्तिम १२ मा प्रवेश गर्ने बाटो खुल्नेछ ।
अर्कोतर्फ, व्यूटी विथ पर्पसमा पनि बाजी पर्ने संकल्प उनको छ । सन् २०१३, २०१८ र २०१९ मा नेपालले यो परियोजना जितिरहेको छ । हिडन ट्रेजर प्रमुख दिवाकर राजकर्णिकारले सिंगो नेपाल साथमा रहेको बताउँदै नम्रतालाई ढुक्क साथ अघि बढ्न आग्रह गरे ।
ढुंगेधाराको संरक्षणमा मिस अर्थ सुप्रिया
सुप्रिया श्रेष्ठले फिलिपिन्समा हुने मिस अर्थमा भर्चुअलरुपमा भाग लिनेछिन् । मिस नेपालको कार्यकाल सकिएपनि आफू नेपालको ढुंगेधारा संरक्षणमा क्रियाशिल हुने उनले बताइन् । ढुंगेधारा परम्परागत पानीको स्रोत भएको र पछिल्लो संरक्षण पनि हुन छाडेको भन्दै उनले यसतर्फ लाग्ने बताइन् ।
उनको सामाजिक परियोजनाका लागि रोजिएको काठमाडौं महानगरपालिका-१७ स्थित धोविचौरमा रहेको पुरानो ढुंगेधारा संरक्षणमा उनी अहिले जुटेकी छिन् ।
काठमाडौं । नायिका रिस्ता बस्नेत केही समयदेखि ठूलो पर्दाबाट हराएकी थिइन् । उनले अभिनय गरेका पछिल्ला केही फिल्म व्यवसायिक रुपमा सफल हुन नसकेपछि रिस्ता आफूलाई नयाँ स्वरुपमा ढाल्नका लागि समय लिएकी थिइन् ।
उनै, रिस्ता दर्शकमाझ फरक अवतारको साथमा आउँदैछिन् । उनको मुख्य भूमिका रहेको फिल्म ‘पासो’को फस्टलुकसँगै प्रदर्शन मिति सार्वजनिक गरिएको छ । यो फिल्म चैत १८ अर्थात अप्रिल १ तारिखबाट देशभर रिलिज हुने वितरक करण श्रेष्ठ ‘क्रेजी’ले जानकारी दिएका छन् ।
सरु र प्रमिला नाम गरेका दुई जना साथी एक अपराधिक गिरोहद्धारा कुनै उच्च पदस्थ व्यक्तिको शारीरिक तृष्णा मेटाउनका लागि अपहरणमा परेको कथामा यो फिल्म निर्माण भएको छ । यी दुईले आफूलाई खतरनाक परिस्थितीबाट जीवीत राख्न गरेको संघर्षको कथामा यो फिल्म निर्माण भएको निर्देशक आरबी पुनले जानकारी दिए ।
फिल्ममा पुनको नै कथा, पटकथा तथा संवाद छ । फिल्मलाई भगवान भुजेलले निर्माण गरेका हुन् । क्राइम र सर्भाइभल जनरामा निर्माण गरिएको निर्माणपक्षले जानकारी दिएको छ । बसन्त घिमिरे, अनु मुस्कान, अनुराग ढुंगाना, सरस्वती गुरुङ चलचित्रका सह-निर्माता हुन् । फिल्ममा रिस्ताको साथमा सुनिसा बजगाँई, रामकुमार बस्ताकोटी, प्रतिक दुलाल, प्रणव आकाशको मुख्य भूमिका छ । फिल्ममा सूर्य दयालुको संगीत, उत्तम हुमागाँइको छायांकन, भूपेन्द्र अधिकारीको सम्पादन छ ।
फिल्मको फस्टलुकबाटै नायिका रिस्ताको मिहिनेत झल्किएको छ । दर्शकले फरक स्वादको फिल्म हेर्न पाउने विश्वास निर्माणपक्षले गरेको छ । नायिका बस्नेतले पनि लामो समयपछि आफूले खोजेजस्तो कथामा काम गर्न पाएको बताइन् । फिल्मलाई जीजीए गु्रप र एफडी कम्पनीले वितरण गर्दैछन् ।
काठमाडौं । मुम्बइको फिल्म वितरण कम्पनी ‘इम्पोसिबल फिल्म्स’ले महंगो मूल्यमा ‘प्रेमगीत ३’को हिन्दी संस्करणको अधिकार खरिद गरेको छ ।
निर्माता सन्तोष सेनले भारतीय साझेदार कम्पनीले भारु ४ करोडमा आफनो फिल्मको हिन्दी राइट खरिद गरेको बताए । अब फिल्मको रिलिज मिति पनि चाँडै टुंगो लाग्ने भएको छ ।
रिलिजबारे निधो गर्न निर्माता सेन शनिबार मुम्बई जाँदैछन् । ‘मेरो पहल भनेकै सकेसम्म चाँडो नेपाली भाषामा फिल्मलाई नेपालभर रिलिज गर्नु हो । यसबारे आउने साता हामी इन्डियन पार्टनरसँग बसेर टुंगो लगाउनेछौं’ सेनले नेपाल प्रेसलाई भने ।
सकेसम्म नेपाल र भारतमा एकैपटक फिल्म रिलिजबारे पहल गर्ने तर, भारतीय रिलिज ढिलो हुने परिस्थिती आए नेपालमा चाँडो गर्ने तयारीमा निर्माता सेन छन् । कोरोना महामारीको कारण यसअघि प्रेमगीत-३ पोस्टपोन्ड भैसकेको छ ।
इम्पोसिबल फिल्मसले ७० प्रतिशत लाभांश आफूले लिने र ३० प्रतिशत नेपाली निर्मातालाई दिने गरी सहमती गरेको जनाइएको छ । प्रेमगीत-३ मा प्रदीप खड्का, क्रिस्टिना गुरुङको मुख्य भूमिका छ ।
