Category: प्रवास

सरकारले गैरआवासीय नेपाली तथा कूटनीतिक नियोगका कर्मचारीलाई त्रिभुवन अन्तर्राष्ट्रिय विमानस्थलमा अनअराइभल भिसा दिने भएको छ । गत मङ्सिर १०, पुस १० र यही माघ १० गते बसेको मन्त्रिपरिषद् बैठकको निर्णयअनुसार अनअराइभल भिसा खुला गरिएको अध्यागमन विभागले जनाएको छ ।

विभागले आइतबार सूचना प्रकाशन गर्दै नेपाली मूलका विदेशी (राहदानीमा जन्मस्थान नेपाल उल्लेख भएको) वा नेपालीसँग नाता सम्बन्ध भएका वा गैरआवासीय नेपाली, कूटनीतिक तथा औपचारिक राहदानवाहक, युएनका कर्मचारी, नेपालमा रहेका अन्तर्राष्ट्रिय संस्थामा कार्यरत विदेशी कर्मचारीलाई विनाशर्त अनअराइभल भिसा खुला गरिएको जनाएको हो ।

विभागले नेपालको भिसा भएका विदेशी नागरिकलाई आगमन अनुमति भने दिइने जनाएको छ भने नेपालको भिसा नभएका विदेशीले विदेशस्थित नेपाली नियोगबाट भिसा लिएरमात्र नेपाल आउन पाउनेछन् ।

विदेशी नागरिकलाई पूर्वस्वीकृति विना स्थलमार्गबाट नेपाल प्रवेशको अनुमति दिइएको छैन । सबै विदेशीले यात्रा शुरु गर्नुभन्दा बढीमा ७२ घण्टाको पिसिआर परीक्षणको नेगेटिभ रिपोर्ट र दश दिनको क्वारेन्टिन अनिवार्य रहेको छ । यसअघि सम्बन्धित मुलुकमा रहेका नेपाली नियोगबाट पूर्वस्वीकृति लिएर आएकालाई मात्र अनअराइभल भिसा दिने गरिएको थियो ।

गैरआवासीय नेपाली सङ्घ (एनआरएनए)को महाधिवेशनबाट सङ्घको संशोधित विधान र आर्थिक प्रतिवेदन सर्वसम्मतिले पारित गरिएको छ ।

विशेष महाधिवेशनमा सङ्घको वार्षिक प्रतिवेदन महासचिव डा हेमराज शर्मा, आर्थिक प्रतिवेदन सङ्घका कोषाध्यक्ष महेशकुमार श्रेष्ठ र विधान संशोधन प्रस्ताव विधान संशोधन सुझाव समितिका संयोजक भूषण घिमिरे र सङ्घका उपाध्यक्ष मन केसीले संयुक्त रुपमा प्रस्तुत गरे ।

महाधिवेशनले एनआरएनएका कोषाध्यक्ष महेशकुमार श्रेष्ठले प्रस्तुत गर्नुभएको सङ्घको आर्थिक वर्ष २०७४/७५ र २०७५/७६ को आर्थिक प्रतिवेदन सर्वसम्मतिले पारित गरेको छ ।

सङ्घमा आर्थिक व्यवस्थापन र पारदर्शीता कायम राख्न गर्नुपर्ने सुधार सम्बन्धमा सुझाव दिनका लागि गोवा कटुवालका संयोजकत्वमा रञ्जित महतो र डिला खरेल सदस्य रहेको एक समिति गठन गरिएको छ ।

महाधिवेशनमा प्रस्तुत विधान संशोधनको प्रस्ताव सर्वसम्मतिले अनुमोदन गरियो । विधानमा रहेका संशोधित प्रावधानअनुरुप काम कारवाही अगाडि बढाउने प्रतिबद्धता जाहेर गरे ।

परराष्ट्रमन्त्री प्रदीपकुमार ज्ञवाली, एनआरएनएका अध्यक्ष कुमार पन्त, प्रमुख संरक्षक डा शेष घले, पूर्वाध्यक्ष एवं अन्य संरक्षक देवमान हीराचन, जीवा लामिछाने, भवन भट्ट, रामप्रताप थापा, सङ्घ अन्तर्गतका राष्ट्रिय समन्वय परिषद्का पदाधिकारी एवं प्रतिनिधि तथा नेपाली काँग्रेसका नेता गोविन्द भट्टराईलगायतको सहभागिता थियो ।

गैरआवासीय नेपाली संघ(एनआरएनए)को विशेष महाधिवेशन आजदेखि शुरु भएको छ । भर्चुअल माध्यमबाट आइतबारसम्म चल्ने महाधिवेशनमा आर्थिक, वार्षिक र विधान संशोधन प्रस्ताव पेश गर्ने तयारी गरिएको छ ।

एनआरएनएको विशेष साधारणसभाको आज भर्चुअल उद्घान गर्दै परराष्ट्रमन्त्री प्रदीपकुमार ज्ञवालीले गैरआवासीय नेपालीले कोरोना भाइरसको विश्वव्यापी संक्रमणमाझ निर्वाह गरेको भूमिका प्रशंसायोग्य रहेको बताए ।

मन्त्री ज्ञवालीले संघले संकटका बेला आफ्नो औचित्य र भूमिकालाई स्थापित गर्न सफल भएको जनाए । मन्त्री ज्ञवालीले प्रवासमा संकटमा परेका नेपालीको राहत, उद्धार र उपचारमा गैरआवासीय नेपालीले महत्वपूर्ण भूमिका निर्वाह गरेकामा प्रशंसा गर्दै भने–, संकटको यस अहं परीक्षामा एनआरएनए खरो रुपमा उत्रिएको छ र सफल पनि भएको छ ।

नेपालको संविधानले पहिलो पटक गैरआवासीय नेपालीलाई औपचारिक रुपमा स्वीकार गर्दै एनआरएन नागरिकताको व्यवस्था गरेको स्मरण गर्दै मन्त्री ज्ञवालीले नेपाल सरकारको विदेश नीतिअन्तर्गत विदेशमा रहेका नेपालीको ज्ञान र सीपलाई नेपालको विकासमा जोड्ने नीति तय गरिएको जानकारी समेत दिए ।

महाधिवेशनलाई सम्बोधन गर्दै नेपाली कांग्रेसका केन्द्रीय सदस्य गोविन्द भट्टराईले विपन्न देश नेपालमा ठूलो लगानीको आवश्यकता रहेको र विदेशमा हरेक नेपालीले नेपालको उत्पादनमूलक क्षेत्रमा लगानी ल्याउन जोड दिनुपर्ने बताए ।

एनआरएनका प्रमुख संरक्षक तथा पूर्वाध्यक्ष शेष घलेले संस्थालाई साझा सङ्गठनका रुपमा अघि बढाएर सानो संयुक्त राष्ट्र संघका रुपमा अघि बढाउनुपर्नेमा जोड दिए । अर्का पूर्वाध्यक्ष देवमान हिराचनले विधान संशोधन, एनआरएन फाउण्डेशनन, भिजन २०२० लगायत विषयमा घनीभूत छलफल गर्न सुझाव दिए ।

संघका संरक्षक तथा पूर्वाध्यक्ष जीवा लामिछानेले कोरोना भाइरसको संक्रमणले विश्वको अर्थतन्त्र आक्रान्त रहेको बेला सबै मिलेर सामना गर्नाको विल्कप नभएको बताउँदै गैरआवासीय नेपालीले आर्जन गरेको विश्वासलाई कायम राख्न र संघको शाख बचाइराख्न सबैलाई आग्रह गरे ।

एनआरएनएका निवर्तमान अध्यक्ष भवन भट्टले सबै हात एकै साथ अभियानअनुसार सबैलाई संस्थाको विकासका लागि एकता आह्वान मुलुकको समृद्धि नै गैरआवासीय नेपालीको सपना भएकाले नेपालमा लगानीका लागि जोड दिए ।

कार्यक्रममा एनआरएनएका संस्थापक रामप्रताप थापाले संस्थाभित्र मेरो र तेरो नभई सामूहिक रुपमा हाम्रो भन्ने भावनाले अघि बढ्नुपर्नेमा जोड दिए । भर्चुअल रुपमै दुई दिनसम्म चल्ने संघको विशेष महाधिवेशनमा आर्थिक, वार्षिक र विधान संशोधन प्रस्ताव पेश गर्ने तयारी गरिएको छ ।

एनआरएनएका अध्यक्ष कुमार पन्तका अध्यक्षतामा सम्पन्न उद्धघाटन सत्रमा सञ्चालन संस्थाका उपाध्यक्ष रविना थापा, महासचिव डा हेमराज शर्मा, सल्लाहकार कुल आचार्य, टिबी कार्की, उपाध्यक्ष डा बद्री केसी, सोनाम लामालगायतले शुभकामना मन्तव्य दिए।

पूर्व युवराज्ञी हिमानी शाहले सञ्चालन गरेको सेवामुलक संस्था हिमानी कोषको कार्यक्षेत्र अब अन्य देशमा पनि बिस्तार हुने भएको छ । नेपाल बाहिर पहिलोपटक अष्ट्रेलियामा हिमानीले सो संस्थाको शाखा स्थापना गरेकी छन् ।

शाखा उद्घाटनका अवसरमा भिडियो सन्देश जारी गर्दै हिमानीले अष्ट्रेलियामा हिमानी कोष दर्ता भइसकेको जानकारी दिइन् । अन्य देशमा पनि कोष बिस्तारको क्रममा रहेको उनले बताइन् ।

‘हामी विभिन्न देशमा बिस्तार हुने क्रममा छौं । नेपालका गरिब र दुखीको जीवन र समग्र राष्ट्रको मुहारमा परिवर्तन ल्याउन केही हदसम्म योगदान पुगोस भन्ने हाम्रो उद्देश्य हो,’ हिमानीले भिडियो सन्देशमा भनेकी छ।

आफूहरुको मूल धर्म नेपाल र नेपालीको सेवा मात्र भएको भन्दै उनले देश र विदेशमा रहेका नेपालीहरुबाट साथ र सहयोगको अपेक्षा राखिन् । नेपालमा भूकम्प, बाढी–पहिरो, कोरोना महामारीजस्ता संकटका समयमा कोषले अहोरात्र काम गरेको उको भनाइ छ ।

काठमाडौं । गैरआवसिय नेपाली संघ (एनआरएनए)को विशेष महाधिवेशन शनिबारदेखि सुरु भएको छ । भर्चुअलरुपमा सुरु भएको महाधिवेशन आइतबारसम्म चल्नेछ ।

परराष्ट्रमन्त्री प्रदीप ज्ञवालीले महाधिवेशनलाई सम्बोधन गरे । महाधिवेशनले गत कार्यकालको आर्थिक प्रतिवेदन पारित गर्ने र विधानमा आवश्यक संसोधन गर्ने अध्यक्ष कुमार पन्तले जानकारी दिए ।

काठमाडौं । कोरोनाभाइरस संक्रमणमा वृद्धि भएपछि हङकङमा शनिबारदेखि लकडाउन सुरु भएको छ । भाइरसलाई नियन्त्रण गर्न पहिलोपटक हङकङले सहरलाई लकडाउन गरेको हो ।

हङकङमा पहिलो संक्रमण पुष्टि नेपालीको घनाबस्ती रहेको जोर्डन क्षेत्रमा भएको थियो । शुक्रबार मात्रै ६१ जनामा संक्रमण र १ जनाको मृत्यु भएको थियो । बढी संक्रमण जोर्डनमै देखिएको छ ।

हङकङ सरकारले विज्ञप्ती जारी गर्दै लकडाउन–कन्ट्याक्ट ट्रेसिङ र परिक्षणलाई एकसाथ अघि बढाउने बताएको छ । हङकङको रात्रीकालिन पर्यटकीय थलो जोर्डनको टेम्पल स्ट्रिट पनि लकडाउनमा छ ।

परिक्षण नभएसम्म घरबाट बाहिर निस्कनमा रोक लगाइएको छ । ४८ घन्टाभित्र सबैजनालाई परिक्षण गर्ने सरकारी तयारी छ ।

काठमाडौं । नेपाल सरकार र इजरायल सरकारविच श्रम सम्झौता भएको ४ महिनापछि नेपाली कामदार इजरायल पठाउने विषयले पुर्णता पाएको छ ।

नेपाल सरकार र इजरायल सरकारविच आज श्रम, रोजगार तथा सामाजिक सुरक्षा मन्त्रालयमा श्रम सम्झौता भएको ४ महिना पछि कार्यान्वयन भएको हो । यो सँगै नेपाली कामदार वैदेशिक रोजगारीको शिललिशामा इजरायल पठाउने विषयले पुर्णता पाएको छ । नेपाल सरकार र इजरायल सरकारविच २०७७ असोज १४ गते श्रम सम्झौता भएको थियो ।

श्रम सम्झौताको अभिन्न अंगका रुपमा रहेको कार्यान्वयन सम्झौता पत्रमा नेपाल सरकारको तर्फबाट श्रम, रोजगार तथा सामाजिक सुरक्षा मन्त्रालय मातहत रहेको वैदेशिक रोजगार विभागका महानिर्देशक कुमार दहाल र इजरायल सरकारको तर्फबाट नेपालका लागि इजरायलका राजदूत खनान गोडेरले हस्ताक्षर गरेका हुन् । हस्ताक्षर गर्दै नेपालका लागि इजरायलका राजदूत खनानले सम्झौता अनुसार नेपालबाट जाने कामदारको लागि कुनै विभेद नगरी इजरायलका नागरिक सरह सेवा सुविधा प्राप्त गर्ने व्यवस्था रहेको बताए । उनले नेपाल सरकारले छिट्टै प्रक्रिया सुरु गर्ने पनि विस्वास व्यक्त गरे ।

नेपाल सरकारको तर्फबाट हस्ताक्षरकर्ता विभागका महानिर्देशक दहालले सम्झौता अनुसार इजरायल जाने नेपाली कामदारको लागि एक आन्तरिक कार्यविधि तर्जुमा गरी छिट्टै प्रक्रिया थालनी गर्ने नेपाल प्रेसलाई जानकारी दिए । तर प्रक्रिया पुरा हुन केहि समय भने लाग्ने सक्ने उनले बताए । इजरायलका लागि नेपालका राजदूत डाक्टर अन्जान शाक्यले नेपाल–इजरायल श्रम सम्झौताले दुवै देश बीचको मित्रतामा थप टेवा पुग्ने विस्वास भर्जुअल माध्यमबाट व्यक्त गरे ।

कोरोनाको महामारीका बीचमा नेपलाी नागरिकलाई इजरायलमा रोजगारीको अवसर प्राप्त हुन लागेकोमा श्रम, रोजगार तथा सामाजिक सुरक्षा मन्त्री गौरीशंकर चौधरीले खुसी व्यक्त गरे । इजरायलबाट नेपालले सीप तथा प्रविधि हस्तान्तरणमा उल्लेख्य उपलब्धी हाँसिल गरिरहेको र आगामी दिनमा कृषि लयागत रोजगारीका अन्य क्षेत्रमा समेत नेपाली नागरिकलाई रोजगारीको अवसर मिल्ने विस्वास व्यक्त गर्दै यस प्रक्रियामा संलग्न दुवै देशका राजदुत लगायत सम्बद्ध कर्मचारीलाई मन्त्री चौधरीले धन्यवाद व्यक्त गरेको मन्त्रालयका सह–सचिव एवम प्रवक्ता भरतमणि सुवेदीले बताए ।

सरकारले वैदेशिक रोजगारीमा जाने नेपालीको सेवा, सुविधा, हित र सुरक्षालाई ध्यानमा राखेर विभिन्न मुलुकसंग द्विपक्षीय श्रम सम्झौता मार्फत नेपाली कामदार पठाउने नीति लिएको छ । त्यसै नीति अनुसार आज नेपाल सरकार र इजरायल सरकारकाविच नेपाली कामदार पठाउने विषयमा कार्यान्वयन सम्झौता भएको उनको भनाइ छ ।

काठमाडौं । नेपाल ट्रेड युनियन महासंघले आगामी वैशाख १७ र २७ मा निर्धारित मध्यावधि निर्वाचनमा प्रवासमा रहेका नेपाली श्रमिकलाई कार्यस्थलबाटै मतदानको व्यवस्था गर्न निर्वाचन आयोगको ध्यानाकर्षण गराएको छ ।

महासंघका अध्यक्ष विनोद श्रेष्ठले बुधवार निर्वाचन आयोगसमक्ष पत्र लेखी सर्वाेच्च अदालतको निर्देशन समेत स्मरण गराउँदै प्रवासमा रहेका नेपालीहरुले मतदान गर्न पाउने अधिकारको सुनिश्चितता गर्न माग गरेका हुन् ।

कम्तीमा पनि मतदाता नामावलीमा नाम समावेश भएर मतदान परिचयपत्र प्राप्त गरेका प्रवासी नेपालीलाई सम्बन्धित देशबाटै मतदानको आवश्यक व्यवस्था गर्न जिफन्टले ध्यानाकर्षण गराएको हो ।

सर्वोच्च अदालतले २०७४ चैतमा प्रवासमा रहेका नेपाली मतदाताहरुको मताधिकार सुनिश्चितताको लागि आवश्यक व्यवस्था गर्न सरकार र निर्वाचन आयोग समेतलाई निर्देशन जारी गरेको थियो । यसैबीच नेकपा प्रवास इन्चार्ज विन्दा पाण्डेले प्रवासी नेपालीलाई मतदानको अधिकारबाट वन्चित नगर्न निर्वाचन आयोगलाई आग्रह गरेकी छन् ।

काठमाडौं । आर्थिक समस्याले उच्च शिक्षा अध्ययन गर्न नसकिरहेका दक्षिण एसियाली विपन्न विद्यार्थीका लागि हेम–सरिता पाठक फाउन्डेसनले छात्रवृत्ति दिलाउने भएको छ ।

नेपालसहित भारत, बंगलादेश, भुटान, श्रीलंका र पाकिस्तानका विद्यार्थीले छात्रवृत्तिका लागि आवेदन दिन सक्ने भएका छन् । फाउन्डेसनले विज्ञप्ती जारी गर्दै उच्च शिक्षा अध्ययन गर्न नसकेका र निम्न आय भएका विद्यार्थीका लागि १० हजार अमेरिकी डलर राशीको छात्रवृत्ति घोषणा गरेको हो ।

वैश्विक चुनौतिसँग जुध्ने सक्ने, समुदायमा समर्पित र अरुको जीवनमा योगदान दिन सक्ने खुबी भएको विद्यार्थीलाई छात्रवृत्तिको लागि प्राथमिकतमा राखिने भएको छ । साथै, अमेरिकामा उच्च शिक्षा अध्ययन गर्न चाहने र छात्रवृत्तिबाट बञ्चित विद्यार्थीलाई लक्ष्य राखिएको छ ।

अमेरिकाबाट आइ–ट्वान्टी प्राप्त, ३.५ जीपीए, संघसंस्था र विभिन्न समुदायको हितमा सक्रियलाई छात्रवृत्तिको मापदण्डमा राखिएको छ । फेब्रुअरी १ देखि खुला हुने आवेदनको अन्तिम मिति अप्रिल १५ रहेको छ । मे १५ मा उत्कृष्ट पाँच घोषणा गरिने र जुलाइ १५ मा छात्तवृत्ति घोषणा गरिने जनाइएको छ ।

मायाज देसी बुटिकसँग मिलेर हेम–सरिता पाठक फाउन्डेसनले छात्रवृत्ति लन्च गरेको हो ।

काठमाडौं । कोरोनाभाइरसबाट विदेशमा मृत्यु हुने नेपालीको संख्या ३१९ पुगेको छ । २० देशमा नेपालीले ज्यान गुमाएको गैरआवसिय नेपालीको स्वास्थ्य विभागले पुष्टि गरेको छ ।

यो साता बेलायत र दक्षिण अफ्रिकामा थप एक–एक जना नेपालीले ज्यान गुमाएका छन् ।

संघका स्वास्थ्य विभाग प्रमुख चीरन शर्माका अनुसार भाइरसबाट जर्मनीमा नेपालीको पहिलो मृत्यु भएको थियो । जापान, साउदी अरब, युनाइटेड अरब इमिरेट्स, पोर्चुगल र भारतमा सबैभन्दा बढी नेपाली संक्रमित भएका छन् ।

अहिलेसम्म ५०४९ देशमा ५४ हजार ५१९ नेपाली संक्रमित भएका छन् । ५२ हजार ९४५ नेपाली रिकभर भएका छन् । विदेशमा नेपाली निको हुने दर चाहिँ ९५ प्रतिशत छ ।

न्यूयोर्क । संयुक्त राज्य अमेरिकाले अस्थायी कृषि कामदार र अस्थायी गैरकृषि कामदारको सूची सार्वजनिक गरेको छ जसमा नेपाललाई पनि समावेश गरिएको छ । यो कार्यक्रमलाई एचटुए र एचटुबी भनिन्छ । आगामी जनवरी १९ देखि लागू हुने यो कार्यक्रमका लागि २०२१ को भिसा कार्यक्रममा सहभागी हुने योग्य देशको सूची सार्वजनिक गरिएको हो ।

केही देशले अस्थायी कृषि कामदार मात्र पठाउन पाउनेछन् भने केहीले अस्थायी गैरकृषि कामदारमात्र । केही देशहरु दुबै कार्यक्रममा कामदार पठाउन योग्य हुने भएका छन् । २०२१ को लागि फिलिपिन्सलाई एचटुबी कार्यक्रममा समावेश गरिएको छ भने सामाओ र टोंगालाई दुबै कार्यक्रमबाट हटाइएको छ । कृषि कामदार पठाउन पाउने सूचीमा नेपाललाई समावेश भने गरिएको छैन ।

यो सूची अद्यावधिक गर्ने काम चाहिँ अमेरिकाको डिपार्टमेन्ट अफ होमल्यान्ड सेक्युरिटीले गर्छ । तर, नेपालीहरु स्वतः योग्य हुने नभई युएससीआइएसले निधो गरेर मात्र भिसा दिने भएको छ । आर्थिक वर्ष २०२० मा ५१७ जनाले एच श्रेणीको कामदार भिसा प्राप्त गरेका थिए ।

काठमाडौं । प्रवासी नेपालीहरु रहेका विभिन्न देशमा नेपाली कांग्रेसको नीति,अनुसन्धान र प्रशिक्षण सम्बन्धी कामको समन्वय गर्ने जिम्मेवारी बेल्जियमका गंगाधर गौतमले पाएका छन् ।

नेपाली कांग्रेसको प्रवासी संगठन नेपाली जनसम्पर्क समितिका युरोप महासचिव रहेका गौतमलाई नीति प्रतिष्ठाका प्रमुख तथा कांग्रेस उपसभापति विमलेन्द्र निधीले प्रवासको संयोजक नियुक्त गरेका हुन् ।

नेपाली जनसम्पर्क समिति रहेका सबै देशमा एक एक जना शाखा प्रमुख नियुक्त गर्ने अधिकार समेत निधीले गौतमलाई प्रत्यायोजन गरेका छन् ।

काठमाडौं । दक्षिण कोरिया सरकारले यहाँ अध्ययनरत विदेशी विद्यार्थीलाई पनि इ–९ भिसा उपलब्ध गराउने गरी तयारी थालेको छ । इ–९ भिसा कोरियाली भाषा परीक्षा उत्तीर्ण गरी इपिएस प्रक्रियामार्फत कोरियामा रोजगारीका लागि आउने प्रवासी श्रमिकलाई दिने भिसा (प्रवेशाज्ञा) हो ।

यहाँ अध्ययनरत विज्ञान र इञ्जिनीयरिङ विषयमा स्नातक प्राप्त विदेशी विद्यार्थीलाई रोजगारी प्रदान गर्ने हेतुले सो भिसा प्रदान गर्न लागिएको यहाँको श्रम मन्त्रालयलाई उद्धृत गर्दै प्रवासी श्रमिक युनियनका अध्यक्ष उदय राईले बताए ।

यहाँको रोजगार तथा श्रम मन्त्रालयले तयार पारेको अवधारणाका विषयमा कानून मन्त्रालयसँगको समन्वयमा यो वर्षभित्र नयाँ कानून कार्यान्वयनमा ल्याउने गरी काम शुरु भएको छ । यस अवधारणालाई कार्यान्वयन गर्नुअघि कानून मन्त्रालयले सर्वेक्षण गर्नेछ र आवश्यक निर्णय लिनेछ ।

इपिएस प्रक्रियामार्फत रोजगारीका लागि कोरिया आउने प्रवासी श्रमिकले पहिलोपटक चार वर्ष १० महिनाको लागि भिसा प्राप्त गर्दछन् र सो अवधिको समाप्तिपछि श्रमिक अनिवार्य स्वदेश फर्किनुपर्ने प्रावधान छ । प्रवासी विद्यार्थीलाई प्रदान गर्ने भनिएको भिसामा भने विद्यार्थीका लागि पनि एउटै नियम हो या अन्य नियम हो भन्ने कुरा भने थाहा हुन सकेको छैन । यस विषयमा यहाँको कानून मन्त्रालय र रोजगार मन्त्रालयले संयुक्त रुपमा निर्णय गरी लागू गर्ने छन् ।

हाल इपिएसमार्फत इ–९ भिसामा आएका नेपाली औद्यौगिक र कृषि क्षेत्रमा श्रम गरिरहेका छन् । विद्यार्थीका लागि पनि दिने भनिएको भिसा सोही क्षेत्रमा हुनेछ । यदि यस अवधारणा कार्यान्वयन भएमा दक्षिण कोरियामा एक हजार ५०० को सङ्ख्यामा रहेका स्नातक प्राप्त नेपाली विद्यार्थीले इपिएस प्रक्रियामार्फत कोरियामा आएर श्रम गरिरहेका श्रमिकले झैँ रोजगारीको अवसर पाउने छन् ।

यहाँका केही विद्यार्थीले भने यो अवधारणा स्वागतयोग्य नभएको बताएका छन् । अध्ययन गरेर दक्ष भएका विद्यार्थीलाई उनीहरूको अध्ययनकै क्षेत्रमा अवसर दिनुपर्नेमा मजदूरको भिसा दिने अवधारणा उचित नभएको भनाइ उनीहरूको छ ।