Category: प्रवास

काठमाडौं । अमेरिकी सहर टेक्ससमा पछिल्लो पटक भएको गोली प्रहारको घटनामा नेपाली नागरिक मारिएका छन् ।

टेक्ससको अस्टिनमा बसोबास गर्दै आएका पोखरा सराङकोटका रमेश थापाको मृत्यु भएको जनाइएको छ । अस्टिन प्रहरी विभागका अनुसार मध्यरात त्यहाँको स्थानीय आवसिय क्षेत्रमा थापालाई गोली हानिएको थियो ।

अस्टिन प्रहरीले स्प्रिङ रोडस्थित कंकड अपार्टमेन्ट (आवास गृह) क्षेत्रमा मंगलबार राती गोली हानेर थापाको हत्या गरिएको जनाएको छ । घटनापछि प्रहरीलाई खबर गरेका व्यक्तिले राती १२ः३० बजेतिर गोली चलेको जनाएका थिए ।

प्रहरी घटनास्थल पुग्दा त्यहाँको पार्किङ लटमा रमेश घाइते अवस्थामा फेला परेका थिए । उनलाई त्यहीँ मृत्यु भएको घोषणा प्रहरीले गरेका थिए । प्रहरीले हत्यारा पत्ता लगाउन अनुसन्धान सुरु भएको जनाएको छ भने गोली चलाउनेले प्रयोग गरेको सवारी साधन पत्ता लगाउने तयारी गरेका छन् ।

झन्डै ११ वर्षअघि मेक्सिको हुँदै थापा अमेरिका पुगेका थिए । तीनवर्षअघि भाइ लक्ष्मण पनि अमेरिका पुगेका थिए । दाजुको मृत्यु भएपछि भाइ लक्ष्मण पनि भावविह्वल बनेका छन् ।

पछिल्लो समय अमेरिकामा एसियाली नागरिकमाथि आक्रमणका घटना बढिरहेको पृष्ठभूमिमा यो हत्य भएको हो । त्यहाँस्थित नेपाली राजदूतावासले पनि एसियाली माथिको आक्रमण रोक्नका लागि आग्रह गरेको छ ।

रासस । गैरआवासीय नेपाली संघ (एनआरएनए) पोर्चुगलले गैरआवासीय नेपालीलाई नै नक्कली हवाई टिकट बेच्ने संघका कोषाध्यक्षलाई निलम्बन गरेको छ । संघले नक्कली हवाई टिकट बेचेको घटना सार्वजनिक भएलगत्तै कोषाध्यक्ष विक्रमजंग कुँवरलाई पदबाट निलम्बन गरेको हो ।

राजधानी लिस्बनमा सञ्चालित लक्ष्मी ट्राभलका सञ्चालक कुँवरले नक्कली हवाई टिकट बेचेको सेवाग्राहीहरुले आरोप लगाएका थिए । कुँवरको ट्राभलमार्फत पोर्चुगलबाट नेपाल जान ११ जनाले काटेको हवाई टिकटसहित विमानस्थलमा बोर्डिङ पासका लागि अनुरोध गर्दा डेस्कमा रहेका कर्मचारीले टिकट नक्कली भएको भन्दै फिर्ता गरेपछि घटना सार्वजनिक भएको हो ।

फिर्ता भएका सेवाग्राहीहरु गुनासोसहित ट्राभलको ढोका पुगेका र नेपाली समुदायका प्रतिनिधि र पत्रकारहरु पीडितको आवाज सुन्न जम्मा भएका थिए ।

फर्काइएका ११ जनाले प्रतिव्यक्ति ६२० यूरो अर्थात् करिब ७० हजार रुपैयाँ तिरेर टर्किस एयरलाइन्सको टिकट काटेको भक्तपुर घर भई पोर्चुगल बस्दै आउनुभएका पीडित विजय धिमालले बताए ।

सञ्चालकले ठगेको भन्दै पीडितहरुले पोर्चुगाली प्रहरीमा रिपोर्ट गरेपछि प्रहरीले छापा मारेको छ । प्रहरीले ट्राभलमा रहेका कागजपत्रहरु पनि जफत गरेको छ । सञ्चालक कुँवरले भने आफ्नो एजेन्सीलाई टिकट जारी गर्ने निकाय कालो सूचीमा परेकोले समस्या आएको प्रतिक्रिया दिएका छन् ।

पोर्चुगलमा अवस्थित नेपाली संघ सङ्गठनहरुले पीडितलाई न्याय दिलाउन माग गर्दै समाजको नेतृत्व गर्ने व्यक्तिबाट यस्ता क्रियाकलाप हुनु घोर आपत्ति भएको बताएका छन् ।

अष्ट्रेलिया । प्रवासी नेपाली एकता मन्च अष्ट्रेलियाले नेपालमा बिभिन्न समयमा भएका प्रजातान्त्रिक आन्दोलनमा शहीदका परिवार, घाइते तथा अपांगका साथै द्वन्द्वपीडितहरुलाई सहयोग गर्न ५० लाख रुपैयाँको अक्षयकोष स्थापना गरेको छ ।

मन्चको राष्ट्रिय समिति बैठकले आन्दोलनका शहीद परिवार, घाइते अपांग र द्वन्द्वपीडितसँगै विपन्न परिवारहरुलाई लक्षित रोजगारीको निम्ति विभिन्न विधाहरुमा तालिम उपलब्ध गराउन तथा युवा सशक्तीकरण एवं रोजगार अभिमुखीकरण कार्यक्रमको निम्ति स्थापना गरेको अक्षय कोषको परराष्ट्रमन्त्री प्रदीपकुमार ज्ञवालीले भर्चुअल रुपमा उद्घाटन गरेका छन् ।

प्रवासी नेपाली एकता मञ्च अस्ट्रेलियाको राष्ट्रिय समितिको बैठकमा परराष्ट्रमन्त्री ज्ञवालीले आइतबार भर्चुअल रुपमा सम्बोधन गरेका थिए ।

उनले नेपालको हरेक क्षेत्रको विकास र प्रगतिको निम्ति प्रवासी नेपालीहरूको साथ र सहयोग रहेको र वर्तमान राजनैतिक अवस्थामा सम्माननीय प्रधानमन्त्री केपी ओलीद्वारा चालिएको सकारात्मक कदमको संसारभर रहेका प्रवासी नेपालीहरुले साथ र समर्थन दिएकोमा कृतज्ञता व्यक्त गरे ।

काठमाडौं । ओमानस्थित नेपाली राजदूतावासले शनिबार साहित्य र प्रकृतिसम्बन्धी एक वेबनारको आयोजना गरेको छ ।

काठमाडौंको सेरोफेरोका महत्वपूर्ण र मनमोहक पर्यटकीय गन्तव्यका बारेमा जानकारी दिने अभिप्रायले आफ्नो नेपाल भ्रमणको अनुभव समेटेर अरबी भाषामा नियात्रा लेखी नेपाली पर्यटन र साहित्यिक क्षेत्रमा पुर्‍याएको योगदानस्वरूप ओमानी नागरिक स्व मोहम्मद अल हार्थीलाई मरणोपरान्त सम्मान गर्ने उद्देश्यले सो कार्यक्रम आयोजना गरिएको हो ।

कार्यक्रममा ओमानस्थित नेपाली राजदूत शर्मिला पराजुलीले स्व हार्थीको नेपाल भ्रमण तथा लेखनबारे प्रकाश पारे । उनले स्व हार्थीको सम्मानमा उनकी छोरी तथा बालचित्र पुस्तक लेखिका एवं प्रकाशक इब्तिहाज अल हार्थीलाई सम्मानपत्र प्रदान गरे । साथै उनले स्व हार्थीप्रति समर्पित वेबसाइटको शुभारम्भ गरे ।

कार्यक्रममा प्रा तुल्सी दिवसले स्व ओमानी लेखकप्रति सम्मान व्यक्त गर्ने अवसर प्राप्त भएकामा खुशी व्यक्त गर्दै कविताका माध्यमबाट मानिसलाई कसरी प्रकृतिसँग आबद्ध गर्न सकिन्छ भन्ने सम्बन्धमा आफ्ना विचार व्यक्त गरे।

मध्यपूर्वको मरुभूमि पार गरेकी ओमानी नागरिक श्री बैदा अल जद्जाली तथा श्री जेनी मेक्गीलले आफ्नो साहसिक यात्राका बारेमा अनुभव बाँड्दै स्व हार्थीको लेखनबाट नेपालको बारेमा जान्ने मौका प्राप्त भएको बताए ।

कवि नवराज पराजुलीले पुस्तक भाषानुवादसम्बन्धी आफ्ना अनुभव साट्दै मोहम्मद अल हार्थीको योगदानबारे प्रकाश पारे ।

कार्यक्रममा प्रथम ओमानी महिला सगरमाथा आरोही नादिरा अल हार्थी, इन्टरनेशनल डिप्लोमेसी एण्ड प्रोटोकल अध्ययन संस्थानका अध्यक्ष श्री इनेस पिरेस, लेखिका लक्ष्मी कोथानेथ लगायत करिब ५० जनाको सहभागिता थियो ।

काठमाडौं । नेपाल र ओमानबीच कृषि र पर्यटन क्षेत्रका विद्यार्थी आदानप्रदान गर्ने विषयमा सहमति भएको छ ।

ओमानस्थित नेपाली दूतावासद्वारा जारी वक्तव्यमा दुई मुलुकका विश्वविद्यालयबीच सहकार्य गर्ने सहमति भएको उल्लेख छ ।

राजदूत शर्मिला पराजुली ढकाल र ओमनस्थित कावुस विश्वविद्यालयका उपकूलपति एवं राजपरिवारका सदस्य डा. फहाद अलजुलन्दा अल सइदीसँग विहिबार भेटवार्ता भएको थियो ।

उक्त अवसरमा अनुसन्धान तथा प्राज्ञिक विषयमा समेत सहकार्यका लागि बैठकहरु नियमित गर्ने सहमति भएको छ ।

काठमाडौं । नेपालस्थित दक्षिण कोरियाली दूतावासले अत्यावश्यक बाहेकका भिसा जारी नगर्ने जनाएको छ ।

दूतावासले विहिबार विज्ञप्ती जारी गर्दैैै कोभिड-१९ संक्रमणको अवस्थालाई ख्याल गर्दै कुटनीतिक नियोग, सरकारी कार्यक्रम र अत्यावश्यक व्यवसायिक क्रियाकलापको भिसा मात्र जारी गर्ने जनाएको छ ।

दूतावासले अप्रिल १ तारिखभन्दा अगाडि अत्यन्त जरुरी प्रवेशाज्ञाको लागि आवेदन दिन भनेको छ । लामो समयका लागि वैवाहिक र अध्ययन भिसा भने जारी हुने भएको छ ।

वैवाहिक बाहेक अन्य भिसा आवेदन अनलाइनबाट मात्र लिइने समेत दूतावासले जनाएको छ । भिसा आवेदनका लागि भने मार्च ३१ तारिखबाट बुकिङ सुरु हुने जनाइएको छ ।

काठमाडौं । कोरोना संक्रमण बढेको भन्दै कतार सरकारले जनस्वास्थ्यका मापदण्डलाई कडाइका साथ पालना गर्न विदेशी नागरिकलाई समेत निर्देशन दिएको छ ।

बुधबार बसेको कतारी मन्त्रिपरिषद् बैठकले भाइरसबाट सतर्कता र सुरक्षाका सम्बन्धमा ३३ बुँदे निर्देशन जारी गरेको हो । बुधबारदेखि लागु हुने गरि नियम कार्यान्वयनमा ल्याइने सरकारले जनाएको छ ।

सरकारी एवं नीजि क्षेत्रमा काम गर्ने कर्मचारीले बैठक गर्नुपर्दा ५ जनाभन्दा बढी उपस्थित हुन नपाइने, अनावश्यकरुपमा सामाजिक भेटघाट नगर्न र बन्द घरभित्र पनि पाँचजना भन्दा बढी भेला हुन नपाइने उल्लेख छ ।

कतारमा रहेका सबै सार्वजनिक पार्क, सामुन्द्रिक किनार, कर्निस लगायतका थलोलाई बन्द गर्ने र ती स्थानमा एकैपरिवारका २ भन्दा बढी भेला हुन नपाइने भएको छ ।

१२ वर्षभन्दा कम उमेरका बालबच्चालाई व्यापारिक भवनमा जान बन्देज लगाइएको छ । सवारी साधन वा गाडी प्रयोग गरि सार्वजनिक थलोमा जाँदा मास्कको अनिवार्य प्रयोग गर्न भनिएको छ ।

घरबाट कुनै पनि कामका लागि बाहिर निस्कँदा एतिराज एप्लिकेसन (ट्रयाकिङ प्रणाली) साथमा हुनैपर्ने उल्लेख छ । प्रस्तुत बुँदाहरु पालना नभए दण्ड अथवा जरिवाना समेत कतार सरकारले जनाएको छ । दोहास्थित नेपाली दुतावासले मापदण्ड पालना गर्न नेपाली नागरिकलाई आग्रह गरेको छ ।

लन्डन । संयुक्त अधिराज्य बेलायतमा आज जनगणना हुँदैछ । बेलायतका चार राज्यमध्ये इङ्ल्यान्ड, वेल्स र उत्तरी आयरल्यान्डमा हुन गइरहेको राष्ट्रिय जनगणनामा सहभागिता जनाउन नेपाली समुदायलाई पनि आग्रह गरिएको छ ।

“जनगणना नियमित प्रक्रिया भए पनि यसले पहिचान स्थापित गर्न सहयोग पुर्‍याउँछ,” बेलायतको अक्सफोर्ड विश्वविद्यालयको अनुसन्धान क्षेत्रमा प्राध्यापनरत कृष्ण अधिकारीले भने, ‘यहाँ रहेका नेपालीलाई एकताबद्ध बनाउने माध्यम बनेको जनगणनाले नेपाली समुदायको सशक्तीकरणमा पनि टेवा पुर्‍याउँछ । ”

उनले समुदायको सङ्ख्या धेरै भएपछि राष्ट्रिय तथा स्थानीय तहबाट निर्माण हुने योजना नेपालीको मागअनुसार बनाइन्छन् भन्दै स्थानीय सरकारबाट प्रदान गरिने सेवासुविधा आफ्नै भाषामा प्राप्त हुने समेत बताए ।

गैरआवासीय नेपाली सङ्घ यूके, इङ्ल्यान्ड राज्य समन्वय परिषद्का अध्यक्ष दीपक श्रेष्ठले जातिय पहिचानको महलमा नेपाली लेख्ने सहमति भएको जानकारी दिँदै जनगणनामा कोही पनि नछुटुन् भनेर हेल्पलाइन पनि सञ्चालन गरिएको बताए ।

पछिल्लो जनगणनामा इङ्ल्यान्ड र वेल्समा ६० हजार २०२ र स्कटल्यान्डमा एक हजार २६८ जना नेपालीले नाम लेखाएको सरकारी तथ्याङ्क छ । यो सङ्ख्या अहिले दोब्बर बढ्नसक्ने अनुमान गरिएको छ । लन्डन बोरो अफ वारनेटका उपमेयर लक्ष्यबहादुर गुरुङले फाराम भर्दा जातीय पहिचान र भाषाको महलमा नेपाली लेखेर पहिचान स्थापित गर्न आग्रह गरिएको बताए ।

इङ्ल्यान्ड र वेल्समा १८ वटा, स्कटल्यान्डमा १९ वटा र उत्तरी आयरल्यान्डमा ११ वटा जातिका लागि अलग्गै जातीय महलको व्यवस्था गरिएको छ ।

सोसाइटी अफ नेप्लिज प्रोफेसनल्स यूके, लन्डनको दक्षिणपूर्वी संयोजक तीर्थ पौडेलले अस्तित्वको पहिचान भए अल्पसङ्ख्यकले पनि अधिकारबाट वञ्चित हुन नपर्ने बताए ।

काठमाडौं । आठजना एसियालीको ज्यान जाने गरि बुधबार अमेरिकामा भएको हिंसात्मक घटनाको विश्व्यापी निन्दा भएको छ ।

नेपालस्थित अमेरिकी दुतावास र हलिउड फेसन डिजाइन प्रबल गुरुङले विज्ञप्ती जारी गर्दै घटनाको निन्दा गरेका हुन् । दुतावासले आफू एसियाली नागरिकको पक्षमा रहेको उल्लेख गर्दै आक्रमणको घटना रोक्न माग गरेको छ ।

‘अमेरिकीले नेपालसहितका एसियाली मुलुकमा आफ्नो देशको प्रतिनिधित्व गरेजस्तै हाम्रो घरमा पनि एसियन-अमेरिकनले आफ्नो प्रतिनिधित्व गरिरहेका छन् । यो घटनाप्रति हामी दुःख व्यक्त गर्दछौं’ काठमाडौंस्थित दुतावासद्वारा जारी वक्तव्यमा उल्लेख छ ।

विज्ञप्तीमा उल्लेख छ- हामीलाई आक्रमणको उद्देश्य थाहा छैन तरपनि हामी एसिएन-अमेरिकन, प्रशान्त क्षेत्रीय मुलुकसँग सँधै साथमा छौं ।’ हलिउड फेसन डिजाइन प्रबल गुरुङले पनि विज्ञप्तीमार्फत आक्रमणको घटना रोक्न र घृणा नफैलाउन अपिल गरेका छन् ।

यूरोप । अरुले भन्दा नयाँ गर्नुपर्छ भन्ने सोच थियो उनमा । काठमाडौं हुँदा होस् वा यूरोप, व्यवसायमा केही न केही नयाँपन दिन खोज्थे धादिङ बसेरीका प्रकाश ढकाल ।

अहिले उनी यूरोपमा छन् । लियो कम्पनीमार्फत् पोर्चुगलमा रेष्टुरेन्ट, ट्राभलिङ, किटटिड तथा मनी ट्रान्सफरको व्यवसायमा आजकल व्यस्त छन्, उनी । प्रकाशको तिनै व्यवसाय विदेशी र नेपालीको पहिलो रोजाइमा पर्दै आएको छ ।

‘मेहेनत, धैयर्ता र इमान्दारिता नै मेरो व्यवसायी जीवनको सफलताता हो,’ उनी भन्छन् । व्यवसायलाई यतिमै सीमित गर्न चाहँदैनन् उनी । उनको सोच छ- यूरोपभरि आफ्नो व्यवसाय फैलाउने ।

व्यवसायी प्रकाशले आफ्नो व्यवसायको नाम ‘गुफा’ राखेका छन् । पर्यटकहरू सोध्ने गर्छन्- किन राख्नुभयो यो नाम ?

उनको जवाफ छ, ‘यही नामका कारण त ग्राहक लोभिएका छन् । नेपालीहरूमा अपनत्व अनुभूति भएको छ ।’ यूरोपको पर्यटकीय गन्तव्यमा बसेर नेपालको समेत प्रमोशन गर्न पाउँदा उनी खुसी छन् ।

यूरोप र नेपालमा भिन्नता

नेपालको व्यवसायिक अनुभवले यूरोपमा साथ दिएको थियो प्रकाशलाई । तर, यूरोपको अनुभवले उनलाई सिकाएको छ- नेपालमा धेरै सिक्न बाँकी छ ।

कसरी त ? उनी भन्छन्, ‘हामीले लगानीकर्तालाई आकर्षित गर्न जस्तो वातवरण, नीति, नियम र पद्धति पछयाउनु पर्ने हो त्यो गरिरहेका छैनौं । जुन यूरोपमा छ ।’

लगानी गर्नेवित्तिकै मुनाफा खोज्ने स्वभावले व्यवसाय उकालो नलाग्ने उनी बताउँछन् । ‘हामी लगानी गरेपछि आजको भोलि नै मुनाफा खोज्छौं । व्यवसायमा त्यो सम्भव हुदैन,’ उनी सुनाउँछन् ।

पोर्चुगलबाट नेपालले धेरै कुरा सिक्न सक्ने उनको ठम्याइ छ । नेपालको जस्तै हावापानी भएको पोर्तुगलको अर्थतन्त्रमा पर्यटन र कृषिको ठूलो योगदान दिएको छ । ‘नेपालले पोर्चुगलबाट सिक्न सक्यो भने यी दुवै क्षेत्रमा आधुनिकता भित्रयाउन सकिन्छ,’ प्रकाश भन्छन् ।

यूरोपमा आएका नेपालीले थोरै ट्रेन्ड बदल्न जरुरी रहेको प्रकाशको ठम्याइ छ । जागिर मात्र नभई आफ्नै व्यवसायको निम्ति पनि साच्नुपर्ने उनी बताउँछन् । ‘हाम्रो जस्तै अवस्था भएका बंगलादेशी, पाकिस्तानी इण्डियनहरू सधैँ आफनो व्यवसायलाई प्राथमिकता दिन्छन् । र छिट्टै सेटल हुन्छन्,’ उनी सुनाउँछन् ।

ग्राहकप्रतिको उत्तरदायित्व

व्यवसायमा ग्राहकलाई भगवान मान्छन् प्रकाश । व्यवसायी भएपछि ग्राहकप्रति उत्तरदायी हुनुपर्ने उनको बुझाइ छ । ‘ग्राहकलाई समयमै रेस्पोन्स गर्न सकिएन भने अर्को पटक आउने सम्भावना कम हुन्छ । त्यसैले हामी ग्राहकको हरेक कामको सक्दो छिटो रेस्पोन्स दिन्छौं,’ उनी अनुभव सुनाउँछन् । त्यसैले उनको दाबी छ, हाम्रोमा आउने ग्राहक पटक-पटक आउँछन् ।

उनले १५ जना भन्दा बढीलाई प्रत्यक्ष रोजगार दिएका छन् । रोजगारीमा पनि उनको पहिलो प्राथमिकतामा नेपाली पर्छन् । प्रकाश एनआरएनए पोर्चुगलका सचिव समेत हुन् । सामाजिक क्षेत्रमा पनि उतिकै सक्रिय छन् उनी ।

पोर्चुगलका नेपाली समुदाय माझ सामाजिक उत्तरदायित्व निर्वाह गर्ने कुरामा पनि उनको सक्रियता छ ।

यूरोपमा व्यवसाय गर्न आउनेलाई भिजन लिएर आउन प्रकाशको सुझाव छ । ‘यहाँ भिजन लिएर आउनुपर्छ । र जाँदा ज्ञान र सीप सँगै लिएर जानुपर्छ,’ उनी सुझाउँछन् ।

डेनमार्क- नेपाल पत्रकार महासंघ युरोप शाखाको आसन्न निर्वाचनका लागि अध्यक्ष पदमा पत्रकार महेशकुमार खातीले उम्मेदवारी घोषणा गरेका छन् ।

नेपाल प्रेससँग कुरा गर्दै उनले अध्यक्ष पदमा उम्मेदवारी दिएको घोषणा गरेका हुन् । उनले भने- पत्रकारिता आफैमा परिवर्तनको संवाहक हो र पत्रकारिताले परिवर्तनको आवाज उठाउँछ । अवको नयाँ कार्यसमितिमा म अध्यक्षमा उठ्नेछु ।’

महासंंघको वर्तमान सचिव समेत रहेका खातीले युरोपमा नेपाली पत्रकारिताको श्रीवृद्दि गर्न आफू लागिपर्ने प्रतिबद्धता समेत व्यक्त गरेका छन् । ‘पत्रकारितालाई मर्यादित तुल्याउनु मेरो दायित्व हुनेछ’ उनले भनेका छन् ।

सबै अग्रज र समकालीन साथीहरु मिलेर अघि बढ्न र युरोपमा कार्यरत पत्रकारलाई गोलबद्ध बनाई संस्थागत हितलाई प्रबन्धन गरि अगाडी बढाउन प्रयत्न गर्ने उनले जनाए ।

निर्वाचनका लागि नेपाल पत्रकार महासंघ केन्द्रीय समितिका प्रतिनिधि चिरन शर्मा, निर्वाचन समितिका संयोजक राजेश चाम्लिङ राई र सदस्यहरु, पर्यवेक्षक नरेश खपांगी मगरलाइ जिम्मेवारी दिइएको छ ।

अमेरिका- मास्क लगाउन आग्रह गर्दा नेपाली उबर चालकलाई दुर्व्यवहार गर्ने युवतीलाई उबर र अर्को राइडिङ सेवा प्रदायक लिफ्ट कम्पनीले आजीवन सेवा लिन प्रतिबन्ध लगाएका छन् ।

अमेरिकी मिडियाका अनुसार नाम नखुलेकी युवतीले ३२ वर्षीय नेपाली चालक शुभाकर खड्कालाई गाडीभित्रै अपशब्द प्रयोग गरेर दुर्व्यवहार गरेकी थिइन् । उनले मास्क च्यातिदिंदै खड्काकाे मोबाइल समेत फ्याँकेकी थिइन् ।

उक्त भिडियो सामाजिक संजालमा भाइरल भएको थियो । अमेरिकी मिडियाले समेत उक्त भिडियोमा आधारित रहेर प्रमुखताका साथ समाचार प्रकाशन गरेका थिए ।

उबरको राइड पोलिसी अन्तर्गत मास्क लगाएरै यात्रुलाई सेवा दिनुपर्ने नियम अन्तर्गत खड्काले तीन महिला यात्रुलाई मास्क लगाउन आग्रह गरेका थिए । तर, तीमध्ये एक युवतीले चाहिं अपशब्द प्रयोग गर्दै आक्रमणमा उत्रिएकी थिइन् ।

ती युवती पर्सियन भएको र वास्तविक नाम नखुलेको जनाइएको छ । घटनापछि ती युवतीले इन्स्टाग्राम एकाउन्ट ब्लक गरेकी छिन् । भिडियो भाइरल भएपछि उबरले ती युवतीलाई सेवा लिनबाट प्रतिबन्ध लगाएको जनाइएको छ ।

सनफ्रान्सिस्को- अहिले अमेरिकामा कोरोनाभाइरस महामारी कायमै छ । अहिलेसम्म ५ लाख ३८ हजारले ज्यान गुमाएका छन् । ज्यान गुमाउनेमा नेपाली डायस्पोराका सदस्य समेत छन् ।

अहिले इन्टरनेटमा एउटा भिडियो भाइरल भैरहेको छ । जसमा केही अमेरिकी युवतीले नेपाली उबर चालकलाई अपशब्द प्रयोग गदै दुव्र्यहार गरेका छन् । यो घटना सनफ्रान्सिस्कोको बे एरियामा भएको हो ।

Nepali Uber driver in Bay Area – asked them to get out of car because one of them didn’t have mask and this happened pic.twitter.com/hXfVhWL4PY

— HopClear (@HopClear) March 9, 2021

मास्क नलगाइकन गाडीभित्र बसेकी एक युवतीलाई ड्राइभरले मास्क लगाउन आग्रह गर्दा झगडा भएको देखिन्छ । ती युवतीले चालकको मास्क निकालेर रिसाउँदै फ्याँकेकी छिन् । उनले अंग्रेजीमा अश्लिल शब्दहरु पनि प्रयोग गरेकी छिन् ।

यो घटनालाई लिएर अमेरिकास्थित नेपाली समुदाय र अन्यले ब्यापक विरोध जनाएका छन् । मास्क लगाउनुपर्छ भनेर चेतना दिँदा उल्टै धम्काइएको भन्दै इन्टरनेट प्रयोगकर्ताले दुब्र्यवहारको विरोध गरेका छन् । सनफ्रान्सिस्को भाइरसबाट प्रभावितमध्येको थलो हो ।

सिड्नी– प्रवासी नेपाली एकता मन्च अष्ट्रेलियाको कार्यकर्ता भेला आइतबार सम्पन्न भएको छ ।

नेकपा (ओली समूह)का स्थायी समिति सदस्य एबम गण्डकी प्रदेशका मुख्यमन्त्री पृथ्वी सुब्बा गुरुङ को प्रमुख आतिथ्यतामा सम्पन्न कार्यक्रमको सभापतित्व मञ्चका केन्द्रीय सदस्य एवं न्यू साउथ वेल्स राज्य इन्चार्ज केशव जोशीले गरेका थिए ।

भेलामा बिशेष अतिथिको रुपमा मंच अस्ट्रेलियाका अध्यक्ष रमेश पाण्डे थिए । मुख्यमन्त्री गुरुङले भर्चुअल रुपमा गरेको सम्बोधनमा प्रधानमन्त्री केपी शर्मा ओलीले लिएको कदम सहि भएको बताए । प्रधानमन्त्रीलाई देश तथा तथा विदेशमा रहेका नेपालीले साथ दिनुपर्ने कुरामा गुरुङले जोड दिएका थिए ।

कार्यक्रममा मञ्चका सचिवालय सचिव, प्रवक्ता, इन्चार्ज, थप गरिएका केन्द्रीय सदस्यहरु र न्यू साउथ वेल्स राज्य कमिटीको घोषणा पनि गरिएको थियो । चुनिएका सदस्यहरुलाई अध्यक्ष रमेश पाण्डेले पद तथा गोपनियताको शपथ गराएका थिए ।

उक्त अबसरमा बोल्दै अध्यक्ष पाण्डेले प्रधानमन्त्री ओलीले चालेको कदम संबैधानिक रहेको र समृद्ध नेपाल, सुखी नेपालीको राष्ट्रिय अभियानमा प्रबासी नेपालीको सहयोग रहने प्रतिबद्दता ब्यक्त गर्दै गरे ।

भेलामा गैरआवसीय नेपाली संघको अष्ट्रेलिया न्यू साउथ वेल्स कोर्डिनेटर देव गुरुङ, गैरआवासीय नेपाली संघ ओसियाना कोर्डिनेटर होम पाण्डे, मंच अस्ट्रेलियाका सल्लाहाकारहरु भवानी ओली र विनोद श्रेष्ठले शुभकामना मन्तव्य राखे ।

स्वागत मन्तब्य प्रवासी नेपाली एकता मंच अस्ट्रेलियाका केन्द्रीय सदस्य अनिल खड्काले गरेका थिए । मञ्च अस्ट्रेलियाको सचिवको जिम्मेवारी केन्द्रीय सदस्य शिशिर नेपाल, प्रवक्तामा केन्द्रीय सदस्य सन्तोष दाहाल चुनिएका छन् ।

केन्द्रीय सदस्यहरु केशव जोशी, राम रानाभाट, राजु उपध्याय र चिनबहादुर नेपालीले इन्चार्जको भूमिका पाएका छन् ।

प्रवासी नेपाली एकता मञ्च अष्ट्रेलियाले ३३ सदस्यिय केन्द्रीय सचिवालय गठन गरेको जनाए छ । जसअनुसार केन्द्रीय सचिवालय सदस्यहरुमा रमेश पाण्डे, मान्डब कार्की, राम रानाभाट, केशव जोशी, सन्तोष दाहाल, शिशिर नेपाल, दिपक पहारी, भुवन पाण्डे, राजु उपध्याय, बि एन मन्डल, प्रकाश पन्थी, रामप्रसाद घिमिरे, टि. एन. आर्यल, गोमा मैनाली, बालगोपाल उपध्याय, रमेश थापा, चिन नेपाली, उत्तम अधिकारी, हेम खनाल, दिनेश भट्टराई, तेजेन्द्र मल्ल, होमनाथ निरौला, सिता केसी थापा, अरुण श्रेष्ठ, अशिम कोइराला , कृष्ण गैरे र कृष्ण सापकोटा रहेका छन् ।

थप गरिएका केन्द्रिय सदस्यहरुमा उदेश राइ, चन्डिका ओली ओडरी, मदन गोर्खाली, गणेश मल्ल ठकुरी, सुशिल पोखरेल र दिनेश पाण्डे रहेका छन्।

त्यस्तै भेलाले ५१ सदस्य न्यू साउथ वेल्स राज्य कमिटी घोषणा गरेको छ । जसको संयोजकमा कृष्ण सापकोटा, उप–संयोजकमा सिताराम घिमिरे र सचिवमा शिव पौडेल रहेका छन् । क्षेत्रीय संयोजकहरुको को रुपमा दिबाकर काफ्ले, कृष्ण गैरे, नरविर नेम्वाङ, कृष्ण निरौला, दिपक पहारी, विशाल रानामगर, अर्जुन पौडेल, प्रशान्त भण्डारी र प्रेम दाहाल रहेका छन् ।

सदस्यहरुमा सुरेन्द्र न्यौपाने, किशोर लामा, सफल पोखरेल, नबिन खनाल, अर्जुन धिताल , दीपक अधिकारी, प्रकाश पौडेल, नबिन प्रसाइ, बिशालजित अधिकारी, विकास उप्रेती, अन्जन सोनी सुनार , सन्तोष तिवारी, मोहन भण्डारी, अशिश बराल, हरी भट्टराई अशोक उप्रेती, सुमन ओली, रमेश अधिकारी, जनक पाण्डे, डा. पर बहादुर पुन , दिर्ग जङ तामाङ, सुशील पौडेल , प्रशन्न दाहाल , विश्व सुवेदी, अर्जुन गैरे , सुशिल आर्यल, रवी श्रेष्ठ, सरोज सुबेदी, दिपक ओझा, ॠषि सापकोटा, तारा गुरुङ, जय थापा, शसाङ्क बस्याल, सन्जीव न्यौपाने र नमराज्ज राना रहेका छन्।

कार्यक्रमको समापन गर्दै सभापति केशब जोशीले आफूले अहिलेसम्म प्रधानमन्त्री ओली जस्तो आँटिलो विद्वान र प्रतिबद्द नेपाली अरु प्रधानमन्त्रीमा नदेखेको र ओलीले चालेको कदम प्रतिगमन नभै प्रगतिगमन भएको धारणा राखे ।

नव नियुक्त सचिव शिशिर नेपाल र एनएसडब्लु संयोजकमा कृष्ण सापकोटाले प्रतिबद्धता मन्तव्य व्यक्त गरेका थिए ।

काठमाडौं । आप्रवासीको रुपमा २० वर्षअघि अमेरिका पुगेका नेपालका नवराज केसी न्यूयोर्क सहरको सिटी काउन्सिल चुनाबमा उम्मेदवार बनेका छन् । उनी यो चुनाव लड्ने पहिलो नेपाली–अमेरिकन हुनेछन् ।

आगामी जुन २२ मा हुने डेमाक्रेटिक प्राइमरीमा सिटी काउन्सिलको १९ बाट उनले उम्मेदवारी दिएका हुन् । न्यूयोर्कको राजनीतिमा अहिलेसम्म नेपाली आप्रवासी यसरी खुलेर अघि बढेका छैनन् ।

न्यूयोर्कको क्वीन्स आफ्नो लागि घरजस्तै भएकाले आफूले उम्मेदवारी दिएको उनले जनाएका छन् । क्वीन्स नेपाली समुदाय बसोबास गर्ने सहर हो । आफ्नो चुनावी अभियानलाई डोनेसन प्रदान गरेका ३६६ जनामध्ये आधा नेपाली आप्रवासी रहेको उनले जनाएका छन् ।

केसीले नोभेम्बरमा हुने चुनावमा छनौट हुनका लागि डेमोक्रेटिक प्राइमरीमा अन्य पाँचजना प्रतिस्पर्धीलाई जित्न आवश्यक छ ।

स्पेन । स्पेनको भ्यालेन्सिया राज्यमा पर्ने कोस्टाब्लाङका क्षेत्रमा गैरआवासीय नेपाली सङ्घ (एनआरएनए) स्पेनको क्षेत्रीय समिति गठन भएको छ ।

एक हजार नेपालीको बसोबास रहेको कोस्टाब्लाङका क्षेत्रीय समितिको आवश्यकता महसुस गरी सुरेन्द्र भुजेल थापाको अध्यक्षतामा क्षेत्रीय समिति गठन गरिएको छ ।

समितिको उपाध्यक्षमा कमल देवकोटा, सचिव कमल पराजुली, कोषाध्यक्ष सुरेश बज्राचार्य, महिला संयोजक रोजिना श्रेष्ठ, युवा संयोजक सुरेन्द्र रानामगर, सदस्यमा रितेश श्रेष्ठ, दुर्गादत्त पराजुली, छवि श्रेष्ठ, निराजन लुइँटेल, झरना कार्की, राजकुमार क्षेत्री, वीरबहादुर खत्री, नवराज पाण्डे र प्रवीण सुवेदी रहेका छन् ।

गैरआवासीय नेपाली सङ्घ स्पेनको निर्णयानुसार त्यस क्षेत्रमा क्षेत्रीय समिति गठनका लागि सिफारिसका आधारमा समितिलाई स्वीकृत गरिएको गैरआवासीय नेपाली सङ्घ स्पेनका अध्यक्ष दिनेश गुरुङले बताए । सङ्घ स्पेनको विधानको परिच्छेद ७ धारा २० र यसको संशोधनसहित गठन भएको क्षेत्रीय समितिले भेला गरेको हो ।

क्षेत्रीय समिति गठनका लागि स्पेनका क्षेत्रीय उपाध्यक्ष तुल्सीबहादुर गुरुङ र एनआरएनए संस्थापक आइसिसी वीरेन्द्र श्रेष्ठलाई सङ्घले जिम्मेवारी दिएको थियो । उनहरुले क्षेत्रीय समिति गठनका लागि महत्वपूर्ण भूमिका खेलेको भन्दै अध्यक्ष गुरुङले धन्यवाद दिएको छन् ।

पोर्चुगलको पहलमा बिरामी रवीन्द्र स्वदेश फर्किए

पोर्चुगलबाट काभ्रेपलाञ्चोकका ३१ वर्षीय रवीन्द्र गौतम बिरामीका कारण नेपाल फकिएको छ । विगत चार वर्षदेखि पोर्चुगलमा बस्दै आउनुभएका गौतमलाई अल्सर र मानसिक समस्याबाट पीडित भएकाले गैरआवासीय नेपाली सङ्घको सहयोगमा बुधबार नेपाल पठाइएको हो ।

सङ्घका अनुसार उनले पोर्तोस्थित एक अस्पतालमा अल्सरको उपचार गराउँदै आएको थियो । केही समय अघिदेखि मानसिक रोग थपिएपछि गौतमलाई परिवारको आग्रहमा स्वदेश पठाइएको सङ्घका अध्यक्ष तिलक गैरेले जानकारी दिएको छ ।

सङ्घले यसअघि पक्षघातबाट थलिएका ललितपुरका शिव श्रेष्ठलाई पनि स्वदेश फर्काएको थियो ।

काठमाडौं । अमेरिकी अध्यागमन जेलमा ७९ कागजपत्रविहीन नेपाली रहेको खुलेको छ । उनीहरुमध्ये अधिकांश मेक्सिको हुँदै गैरकानुनी रुपमा अमेरिका छिर्ने क्रममा पक्राउ परेका छन् ।

अमेरिकी अध्यागमन र जेल हेर्ने निकाय आइसका अनुसार न्यूयोर्क, टेक्सस, क्यालिफोर्नियालगायतका जेलमा यति संख्यामा नेपाली रहेको खुलेको हो । जेलमा रहेका नेपालीमध्ये अधिकांशले देश निकालाको आदेश पाइसकेका छन् । यद्यपि उनीहरुले एसाइलमका रुपमा आवेदन चाहिं दिएका छन् ।

कतिपयको मुद्दालाई अध्यागमन अदालतले अस्वीकार गरेपछि बोर्ड अफ इमिग्रेसनमा सुनुवाइ भैरहेको छ । कतिपय चाहिं ट्राभल डकुमेन्ट नभएको कारण अमेरिका निकाला हुनबाट जोगिएका छन् । एरिजोना, जर्जिया र अलाबामा राज्यमा पनि नेपाली जेलमा रहेको जनाइएको छ ।

कोभिड महामारी र पूर्वट्रम्प प्रशासनले मेक्सिको सीमामा कडाइ गरेपछि लुकिछिपी अमेरिका पुग्ने नेपालीको संख्यामा कमी आएको जनाइएको छ । राष्ट्रपतिमा बाइडेन आएपछि अमेरिकी जेलमा रहेका नेपालीमा रिहा हुने आशा अभिव्यक्त भएको छ ।

किनभने बाइडेनले कार्यभार सम्हालेको पहिलो दिनमै संसदमा पठाएको बिलमा जनवरी १ अगाडि आएका कागजपत्रविहीनलाई ग्रीनकार्डको प्रक्रियामा लैजाने उल्लेख छ । यसले इमिग्रेसन जेलमा रहेका नेपालीलाई पनि फाइदा पुग्ने अपेक्षा गरिएको छ ।

उक्त बिल पारित भएमा २०२१ को जनवरी १ सम्म अमेरिकामा कागजपत्रविहीन भएका नेपालीलाई ग्रीनकार्ड र नागरिकता प्राप्तिको बाटो खुल्नेछ । यद्यपि, उक्त बिल पारित हुने वा नहुने भन्ने कुरामा निधो छैन ।