Category: वित्त प्रेस

काठमाडौं । नेपाल राष्ट्र बैंकका कार्यकारी निर्देशक गुरुप्रसाद पौडेलले अटो मोबाइल क्षेत्रमा दुई खर्ब रूपैयाँभन्दा धेरै कर्जा प्रवाह भएको बताएका छन् ।

काठमाडौंको भृकुटीमण्डपमा जारी ‘नाडा अटो सो, २०२५’ मा नेपाल आर्थिक पत्रकार संघ (नाफिज) र नाडा अटोमोवाईल्स एशोसिएशन अफ नेपालको संयुक्त रुपमा आयोजना गरिएको ‘कर्जा नीतिमा स्थिरताः अटोमोबाइल बजारको दीर्घकालिन विकासको आधार’ विषयक अन्तरक्रियामा उनले यस्तो बताएका हुन् ।

बैंक तथा वित्तिय संस्थाले मात्रै नभई हायर पर्चेज कम्पनीहरूले पनि यस क्षेत्रमा लगानी गर्ने गरेको उनले बताए ।

‘हामीले यो क्षेत्रलाई अनुत्पादक भनेका छैनौ । हायर पर्चेज कम्पनीलाई लाइसेन्स दिनुले पनि एटोमोवाईल्स क्षेत्रलाई प्राथमिकतामा राखेको पुष्टी गर्छ,’ उनले भने । २०७० यता हायर पर्चेज कम्पनी मार्फत अटो क्षेत्रमा कर्जा प्रवाह गरिरहेको उल्लेख गरे । १० वटा हायर प्रचेज कम्पनीले २६ अर्ब रुपैयाँ कर्जा प्रवाह गरेको उनको भनाइ रहेको छ ।

‘अटो क्षेत्र अनुत्पादक क्षेत्र होइन । सरकारले अनुत्पादक क्षेत्र मानेको भए विशिष्टिकृत कम्पनी स्थापना गर्दैनथ्यो । कुनैपनि व्यक्तिले गाडी खरिद गर्दा ४० प्रतिशत नगद बुझाउँछ र ६० प्रतिशत ऋण पाउँछन् । विदेशमा समेत ६० देखी ८० प्रतिशतसम्म लोन टु पर्चेज (एलटिपी) रेसियो लगाएका छन्’, उनले भने, ‘नेपालमा व्यक्तिगत र व्यवसायीक गाडीमा फरक एलटिपी लगाउन सकिन्छ । व्यक्तिगत गाडी खरिद गर्न जाँदा ब्याजदर कम छ । तर, सार्वजनिक यातायातमा बढी जोखिम रहेको हुन्छ । त्यसैले बैंकहरुले निजी गाडीको तुलनामा सार्वजनिक यातायातमा बढी व्याज लगाउँछन् ।’

उत्पादनमुलक उद्योगले २ करोड रूपैेयाँसम्म कर्जा लिदाँ आधारदरमा २ प्रतिशत मात्रै प्रिमियम थपेर व्याजदर लिने गरेको छ ।

रूपन्देही । नागरिकलाई पुँजीबजारमा उत्प्रेरित गर्ने उदेश्यले त्रिशक्ति सेक्युरिटिज लिमिटेडले बुटवलबाट सेवा थालेको छ ।

नेपाल उद्योग वाणिज्य महासंघका केन्द्रीय सदस्य उज्जल कसजु, नेपाल उद्योग परिसंघका लुम्बिनी प्रदेश अध्यक्ष एजाज आलम र नेपाल चेम्बर अफ कमर्सका लुम्बिनी प्रदेश अध्यक्ष टंकप्रसाद पोखरेलले संयुक्त रुपमा वुटवल शाखाको उद्घाटन गरेका हुन्।

लगानीकर्तालाई छिटोछरितो, सहज र प्रभावकारी सेवा प्रदान गर्दै, ग्राहक सेवा विस्तार गरी अघि बढ्ने योजना रहेको कम्पनीले जनाएको छ ।

कार्यक्रममा नेपाल उद्योग वाणिज्य महासंघका केन्द्रीय सदस्य उज्जल कसजुले पुँजीबजार देशको अर्थतन्त्रको ऐना रहेको र जनतामा भएको पैसा पुँजीबजारमा आउँदा ठूला परियोजना निर्माणमा लगानी गर्ने वातावरण बन्ने अवस्था रहेको बताए।

नेपाल उद्योग परिसंघका लुम्बिनी प्रदेश अध्यक्ष एजाज आलमले उत्पादन र पूर्वाधारका क्षेत्रमा लगानी गर्न चाहिने रकम पुँजीबजारवाट आउने वातावरण बन्दै गरेको र लगानीको सुरक्षाका साथै व्यवस्थित र दिगो पुँजीबजारको निर्माणमा लाग्नुपर्ने बताए ।

नेपाल चेम्वर्स अफ कमर्सका लुम्बिनी प्रदेश अध्यक्ष टंकप्रसाद पोखरेलले नेपालको पुँजीबजार सकारात्मकतर्फ जाँदा लगानीको वातावरण बन्ने र पुँजी परिचालन हुने राम्रो पक्ष रहेको बताए ।

कार्यक्रममा त्रिशक्ति सेक्युरिटीजका संस्थापक अध्यक्ष टंकप्रसाद गौतम र प्रबन्ध निर्देशक गोविन्द प्रसाद दाहालले आर्थिक केन्द्रको रुपमा विकास भइरहेको बुटवल क्षेत्र मोफसलको पुँजीबजारको हव बन्नसक्ने सम्भावना देखेर बुटवलमा शाखा कार्यलय सञ्चालन गरेको र लगानीकर्तालाई पुँजीबजार सम्वन्धी उत्कृट सेवा दिने प्रतिवद्वता व्यक्त गरे ।

त्रिशक्ति सेक्युरिटिजले केन्द्रीय कार्यालय पुतलीसडक, शाखा कार्यालयहरु पोखरा, महेन्द्रनगर, हेटौंडा, ललितपुर, बनेपाबाट डिम्याट,टिएमएस्लगाएत शेयर कारोबार सम्बन्धी सेवाहरु प्रदान गर्दै आइरहेको संचालक विष्णुप्रसाद पौडेलले जानकारी दिए ।

हेटौंँडा ।  मोतिहारी–अमलेखगञ्ज पेट्रोलियम पाइप लाइन नेपाल आयल निगमलाई हस्तान्तरणको तयारी अन्तिम चरणमा पुगेको छ । पाइप लाइन विस्तारको सम्पूर्ण काम सकिएर अहिले सोही पाइप लाइनबाट मोतिहारीदेखि अमलेखगञ्जसम्म पेट्रोलियम पदार्थको आयात भइरहेको छ ।

‘पाइप लाइनबाट नियमित रुपमा पेट्रोलियम पदार्थ आयात भइरहेको छ’ नेपाल आयाल निगम मधेश प्रादेशिक कार्यालय अमलेखगञ्जका प्रमुख प्रलयंकर आचार्यले भने,‘पाइन लाइनबाट ल्याइएको पेट्रोेलियम पदार्थको परीक्षण काम पनि भइरहेको छ, त्यसका लागि भारतीय आयल निगमको प्राविधिक टोली फिल्डमै खटिरहेका छन्  ।’

पाइप लाइनमा कुनै समस्या देखिएको खण्डमा तत्कालै मर्मत सम्भार भइरहेको छ, परीक्षणको कामसमेत सकिएकाले छिट्टै पाइप लाइन हस्तान्तरण गर्ने तयारी भइरहेको उनको भनाइ छ ।

दुवै देशका प्रधानमन्त्रीले संयुक्त रुपमा पाइप लाइनको उद्घाटन गर्ने वा कसरी हस्तान्तरण गर्ने विषयमा दुवै पक्षबीच छलफल भइरहेको प्रमुख आचार्यले बताए। यस्तै बाराको अमलेखगञ्जदेखि चितवनको लोथरसम्म पेट्रोलियम पाइप लाइन विस्तारको काम छिट्टै अघि बढाइने भएको छ ।

अमलेखगञ्जबाट लोथरसम्म ६९ किलोमिटरमा निर्माण हुने सो पेट्रोलियम पाइप लाइनको काम अगाडि बढाउने विषयमा उच्चस्तरीय प्राविधिक टोलीबाट डिपिआर निर्माणको काम अन्तिम चरणमा पुगेकाले अबको केही दिनभित्रै पाइप लाइन निर्माणको कामले तिव्रता लिने नेपाल आयल निगम मधेश प्रादेशिक कार्यालय अमलेखगञ्जका प्रमुख आचार्यले बताए ।

‘डिपिआर निर्माणको काम अन्तिम चरणमा पुगेर पाइप लाइनको काम अघि बढाउन चितवनमा कार्यालयसमेत स्थापना भइसकेको छ’, प्रमुख आचार्यले भने, ‘अबको केही दिनभित्रै माटो सम्याउने कार्य पनि सुरु हुन्छ ।” सुरु भएको तीन वर्षभित्र काम सकिने लक्ष्य रहेको उनको भनाइ छ ।

भारतको मोतिहारीदेखि बाराको अमलेखगञ्जसम्म पाइप लाइनको काम सकिएर पाइप लाइनबाटै पेट्रोलियम पदार्थको आयात सुरु भएपछि अमलेखगञ्जबाट लोथरसम्म पाइप लाइनको काम सुरु गर्न लागिएको हो ।

चितवनको लोथरमा कुल २३ बिघा १२ कठ्ठा जग्गामा ग्रिनफिल्डसहितको एक लाख लिटर पेट्रोलियम पदार्थ भण्डारण गर्नसक्ने टनेल निर्माण गरिने प्रमुख आचार्यले बताए। नेपाल–भारतबीच ‘जिटुजी’ सम्झौता मार्फत निर्माण हुन लागेको अमलेखगञ्ज–लोथर पाइप लाइन विस्तारको काम भारतीय आयल निगमले गर्नेछ ।

यसैबीच अमलेखगञ्जस्थित आयल निगमको पेट्रोलियम पदार्थ लोडिङ गर्ने बईमा समस्या देखिएपछि भारतीय प्राविधिक टोलीले मर्मत गर्ने भएको छ ।

काठमाडौ‌ं ।  नेपाली  हिन्दू महिलाहरुको महान चाड हरितालिका तीज नजिकिँदै छ ।  हरितालिका तीजको अवसर पारेर महिलाहरुले सुनको गहना बनाउन जोड दिन्छन् । तर अहिले सुनको मूल्य आकाशिएर  २ लाख हाराहारी पुगेको  छ । सुनको मूल्य तोलाकै २ लाख पुग्न लागेकाले याे पटक तीज लक्षित सुनकाे व्यापार बढ्ने देखिँदैन ।

आज नेपाली बजारमा  बुधबारको तुलनामा आज सुनचाँदीको मूल्यमा सामान्य वृद्धि भएको छ ।

नेपाल सुनचाँदी व्यवसायी महासङ्घका अनुसार आज एक तोला सुनको मूल्य रु एक लाख ९४ हजार ८०० निर्धारण भएको छ । त्यति नै परिमाणको चाँदी रु दुई हजार २९० मा खरिदबिक्री भइरहेको छ ।

बुधबार एक तोला सुन रु एक लाख ९३ हजार ५०० मा किनबेच भएको थियो भने त्यति नै परिमाणको चाँदी रु दुई हजार २५५ मा क्रयविक्रय भएको थियो ।

अन्तरराष्ट्रिय सञ्चारमाध्यमहरूका अनुसार आज प्रति औँस सुन तीन हजार ३३८ अमेरिकी डलरमा कारोबार भइरहेको छ ।

काठमाडौं । राष्ट्रिय सहकारी बैंकले सुधारको रिपोर्ट ल्याएको छ । बैंकले सार्वजनिक गरेको गत आर्थिक वर्षको असार मसान्तसम्मको वित्तीय विवरणमा अधिकांश सूचक सबल बन्दै गएको देखिएको हो ।

वित्तीय विवरण अनुसार बैंकले नोक्सानीमा उल्लेख्य सुधार गरेको छ । गत आर्थिक वर्षसम्म बैंकको नोक्सानी ४ करोड ८१ लाख ६१ हजार ७२४ रुपैयाँ रहेको छ । जबकि उक्त नोक्सानी अघिल्लो आवमा १ अर्ब ६६ करोड ६७ लाख ९९ हजार ९६४ रुपैयाँ थियो ।

यस अवधिमा बैंकको खुद ब्याज आम्दानी १ अर्ब ५७ करोड १९ लाख रुपैयाँ गरेको छ । अघिल्लो आवमा यस्तो आम्दानी १ अर्ब १५ करोड ९१ लाख रुपैयाँ भएको थियो । यस्तै, बैंकले खुद शुल्क तथा कमिशन आम्दानी ३ करोड ७० लाख गर्दा खुद ब्याज, शुल्क तथा कमिसन आम्दानी १ अर्ब ६० करोड ८९ लाख गरेको छ ।

बैंकको वितरणयोग्य नाफा ४ अर्ब ३३ करोड ५५ लाख ४७ हजार रुपैयाँ ऋणात्मक छ । अघिल्लो आवमा यस्तो मुनाफा ३ अर्ब ३९ करोड ६५ लाख ऋणात्मक छ । बैंकको प्रति शेयर खुद सम्पत्ति मूल्य १०७ रुपैयाँ १२ पैसा रहेको छ ।

चुक्ता पुँजी २ अर्ब ८९ करोड १५ लाख रुपैयाँ रहेको बैंकको जगेडा कोषमा ४ अर्ब ५४ करोड १४ लाख रुपैयाँ छ ।

गत आर्थिक वर्षमा बैंकले ४७ अर्ब ५ करोड ६२ लाख रुपैयाँ निक्षेप संकलन गरी १५ अर्ब ४ करोड ८१ लाख रुपैयाँ कर्जा लगानी गरेको छ । बैंकको खराब कर्जा भने ३०.३७ प्रतिशत छ ।

काठमाडौं । मंगलबारबाट काठमाडौंको भृकुटीमण्डपमा नाडा अटो शो २०२५ सुरु भएको छ । यो शोमा बाइक, विद्युतीय र पेट्रोलियम गाडी लगायत राखिएको छ । शोको उद्घाटन प्रधानमन्त्री केपी शर्मा ओलीले गरेका हुन् ।

नाडा शोमा विषेश छुट तथा नयाँ गाडी लन्च हुने गरेको छ । यस वर्षको शोमा विभिन्न ब्राण्डको ६ वटा नयाँ गाडी लन्च गरिएको छ । भने, पहिले नै लन्च भएका गाडीहरु पनि नाडा अटो शो राखिने गरिन्छ ।

नयाँ लन्च भएका गाडी किन्ने ग्राहकले विद्युतीय स्कुटर नै फ्रीमा पाउने छन् । कम्पनी अनुसार गाडी किन्नेले एक तोला सुन र आइफोन समेत पाउने छन् । भने, शोमा गाडी किन्दा कम्पनी अनुसार फरक फरक छुट दिइएको छ । नडा शोमा लन्च गरेका गाडीमा छुट दिएर नै मूल्य सार्वजनिक गरिएको छ ।

एमएडब्लु दुईवटा नयाँ गाडी लन्च गर्यो

नाडा अटो शोमा एमएडब्लु वृद्धिले दुईवटा नयाँ विद्युतीय कार सार्वजनिक गरेको छ । जसमा नामी भिगो ई–२ र नामी भिगो ई–२ प्लस आज लन्च गरेको हो । शोमा कम्पनीले भिगो ई–२ को भेरियन्ट अनुसार मूल्य ३७ लाख ९९ देखि ४३ लाख ९९ हजार रुपैयासम्म रहेको छ । नामी भिगो ई–२ को मूल्य ३८ लाख ९९ हजार हो । तर, शोको अफरमा ३७ लाख ९९ हजार रुपैयाँ मूल्य तोकिएको छ ।

यी गाडीमा फास्ट चार्जिङ प्रविधि रहेको कम्पनीले बताएको छ । भने, ब्याट्री फास्ट चार्च हुन्छ । गाडीमा १९० एमएमको ग्राउन्ड क्लियरेन्स छ ।

बीवाइडी एटो २ सार्वजनिक

काठमाडौं । नेपालमा बीवाइडी गाडी आयात गरेर विक्री गर्ने कम्पनी साइमेक्स इन्कले नाडा अटो शो एटो टू सार्वजनिक गरेको छ । शोमा यो गाडी सार्वजनिक गरेको छ । कम्पनीले यस गाडीको सुरुवाती मूल्य ४३ लाख ९९ हजार रहेको छ ।

एटो २ मा १०० किलोवाट क्षमताको मोटर रहेको कम्पनीले बताएको छ । फुल चार्जमा यसले ३४५ किलोमिटर दिने छ ।

नाडा अटो शोमा सो गाडी किन्दा १० वर्षको वारेन्टी कम्पनीले दिने छ ।

सिजीको एक्स्पेङको एक्स ९ लन्च

नाडा अटो शोमा सिजी मोटर्सले एक्स्पेङ एक्स ९ कार सार्वजनिक गरेको छ । यसको मूल्य शोमा २ करोड २० लाख रुपैयाँ कम्पनीले तोकेको छ । सो गाडाीमा २३५ किलोवाटको मोटर क्षमता रहेको रहेको कम्पनीले बताएको छ ।

डीसी चार्जरबाट २० मिनेटमा ८० प्रतिशत हुन्छ । फुल चार्जबाटा ५०० किलोमिटरको रेन्ज रहेको कम्पनीको दाबी छ ।

एलआरआरको जीली ग्यालेक्स एक्स ५ प्रो र जेवाई एयर अल्ट्रा लन्च

एलआरआर मोटरले जीली ग्यालेक्स एक्स ५ प्रो र जेवाई एयर अटो शोमा सार्वजनिक गरेको छ । जेवाई एयरको मूल्य शोमा ५४ लाख ९९ हजार तोकेको छ । यसको मूल्य बजार मूल्य ५८ लाख भएपनि शोमा छुट दिएर ५५ लाख तोकिएको कम्पनीले बताएको छ । मोटर पावर १६० किलोबाट र रेन्ज ४३० रहेको कम्पनीले बताएको छ ।

त्यस्तै, जिली ग्यालेक्सी एक्स ५ म्याक्सको मूल्य शोमा ६४ लाख ९९ हजार तोकिएको छ । जसको बजार मूल्य ६८ लाख हुने भएपनि शोमा छुट दिएको कम्पनीले बतायो ।

होअन कार लन्च, गाडी किन्छ स्कुटर फ्री

होअन ब्राण्डका गाडी नेपालमा आधिकारिक वितरक होनगन ट्रेड प्रालिले आकर्षक अफरसहित नयाँ गाडी नाडा अटो शोमा राखेको छ । कम्पनीले २१ लाख रुपैयाँमै विद्युतीय गाडी बिक्रीमा ल्याएको छ ।

उक्त गाडी किन्दा एउटा विद्युतीय स्कुटर फ्रीमा उपलब्ध गराइने कम्पनीले जनाएको छ । यस अफर अन्तर्गत गाडी र स्कुटर दुवै विद्युतीय भएकाले वातावरण मैत्री मात्र नभई ग्राहकलाई दैनिक प्रयोगमा समेत सहज हुने कम्पनीले जनाएको छ ।

ग्राहकले २१ लाख रुपैयाँमै दुई–दुई सवारी साधन (कार र स्कुटर) पाउने भएकाले यो अफरलाई प्रतिस्पर्धात्मक रुपमा हेरिएको छ ।

ह्याचब्याक लुमिन कार लन्च, मूल्य कति ?

चांगानको नयाँ इलेक्ट्रिक ह्याचब्याक लुमिन कार सार्वजनिक भएको छ । सो गाडीमा ३५ किलोवटा मोटर रहेको कम्पनीले बताएको छ । एक पटकको चार्जले ३०१ किलोमिटरको रेन्ज दिने कम्पनीको दाबी छ ।

कम्पनीले सो गाडीको मूल्य २२ लाख ९९ लाख रुपैयाँ तोकिएको छ ।

काठमाडौं । काठमाडौंको भृकुटीमण्डपमा ‘नाडा अटो शो २०२५’ शुरु भएको छ । मंगलबारदेखि शुरु भएको भदौ ८ गतेसम्म उक्त अटो शो आयोजना हुने भएको हो ।

१७ औं नाडा अटो शोको प्रधानमन्त्री केपी शर्मा ओलीले उद्घाटन गरेका हुन् । त्यस अवसरमा प्रधानमन्त्री शर्माले वैज्ञानिक खोज, अध्ययनसँगै नयाँ नयाँ विकास, आविष्कार र प्रगति भएको बताउँदै देशले पनि त्यस प्रकारको विकासको सहज उपभोग गर्ने स्थिति बनाउनुपर्नेमा जोड दिए ।

नाडा अटोमोबाइल्स एसोसिएसन अफ नेपाल (नाडा) अध्यक्ष करण चौधरीका अनुसार नाडा अटो शो ‘गो फर मोर’ भन्ने नारासहित आयोजना भएको छ । यस वर्षको शोले नवीनतम प्रविधि, ग्राहक संलग्नता र अटो क्षेत्रको सम्पूर्ण पारिस्थितकी तन्त्रलाई एकै छानामुनी ल्याएको छ ।

स्वचालन र बुद्धिमत्ताको नयाँ युगको प्रतीकस्वरूप उन्नत चारखुट्टे रोबोटहरू (यूनिट्री रोबट्स) र भविष्यको सहरी हवाई मोबिलिटीको पहिलो झलक (दीपल ईभिटोल युएभी) प्रदर्शनी गरिने आयोजकले जनाएको छ । यसका अतिरिक्त १९ वटा चारपांग्रे ब्रान्डहरू, १३ वटा हल्का व्यवसायीक सवारी साधन ब्रान्डहरू र ४ वटा दुईपांग्रे सवारी ब्रान्डहरू प्रदर्शनीमा राखिएको छ ।

त्यस्तै, नाडा अटो शोमा ३५ वटा कम्पनीहरू (लुब्रिकेन्ट, टायर, ब्याट्री, ग्यारेज उपकरण र वित्तीय संस्थाहरू) सहभागी हुने भएका छन् । एक लाखभन्दा बढी आगन्तुकको अपेक्षा गरिएको आयोजकले जनाएको छ ।

उनका अनुसार शोमा सुविधाजनक जोन विभाजनदेखि मिडिया डेस्कसम्म स्थापना गरिएको छ । स्वदेशमै निर्माण भएका सवारी तथा पार्टपुर्जाको प्रदर्शनी गरिएको छ । दैनिक भाग्यशाली विजेता घोषणा गरिने भएको छ । जसलाई एक वर्षसम्म निःशुल्क लुब्रिकेन्ट सेवा दिइने भएको छ ।

काठमाडौं । नेपाल स्टक एक्सचेञ्ज (नेप्से) परिसूचक ६ दशमलव ५१ अङ्कले बढेर दुई हजार ७७६ दशमलव ९० को विन्दुमा कायम भएको छ ।

आज ३१६ कम्पनीको एक करोड ३१ लाख २४ हजार ३१० कित्ता शेयर ६१ हजार ७८४ पटक खरिदबिक्री हुँदा  पाँच अर्ब ६३ करोड ६५ लाख ४८ हजार ३८ बराबरको कारोबार भएको नेप्सेले जनाएको छ ।

आज सबै समूहको उपसूचक बढेको छ । बैङ्किङ शून्य दशमलव ४०, विकास बैङ्क शून्य दशमलव २०, वित्त शून्य दशमलव ०२, होटल तथा पर्यटन शून्य दशमलव ०५, जलविद्युत् शून्य दशमलव १६ र लगानी समूह शून्य दशमलव २१ प्रतिशतले बढेको छ ।

त्यसैगरी जीवन बिमा शून्य दशमलव २५, उत्पादन तथा प्रशोधन शून्य दशमलव ४६, लघुवित्त शून्य दशमलव १२, म्युचुअल फन्ड शून्य दशमलव २९, निर्जीवन बिमा शून्य दशमलव ११, व्यापार शून्य दशमलव १८ र अन्य समूह शून्य दशमलव ०९ प्रतिशतले बढेको छ ।

आजको कारोबारमा सान्भी इनर्जी लिमिटेडको शेयर मूल्य सबैभन्दा धेरै छ दशमलव ९८ प्रतिशतले बढेको छ । सबैभन्दा धेरै घट्नेमा भने नारायणी डेभलपमेन्ट बैङ्क लिमिटेडको शेयर मूल्य सबैभन्दा धेरै छ दशमलव १४ प्रतिशतले घटेको छ ।

कारोबार रकमका आधारमा आज सबैभन्दा धेरै युनाइटेड मोदी हाइड्रोपावर लिमिटेडको रु ३१ करोड ७२ लाख ३७ हजार ८७२ बराबरको कारोबार भएको छ । कारोबार भएका शेयर सङ्ख्याका आधारमा भने सबैभन्दा धेरै सानिमा लार्ज क्याप फन्डको पाँच लाख ४३ हजार छ सय कित्ता खरिदबिक्री भएको छ ।

काठमाडौं । प्रधानमन्त्री केपी शर्मा ओलीले १७ औं नाडा अटो शोको आज उद्घाटन गरेका छन् ।

भृकुटीमण्डपमा आयोजित कार्यक्रममा प्रधानमन्त्री ओलीले वैज्ञानिक खोज, अध्ययनसँगै नयाँ नयाँ विकास, आविष्कार र प्रगति भएको बताउँदै नेपालले पनि त्यस प्रकारको विकासको सहज उपभोग गर्ने स्थिति बनाउनुपर्नेमा जोड दिए ।

उनले नयाँ ढंगले काम गर्ने युवाहरूलाई सरकारले सबै खालको साथ दिने विश्वास दिलाए ।

‘हामीले अग्रगमन र आधुनिकीकरणका लागि नीतिगत व्यवस्थाहरु र पूर्वाधार विकास गरेका छौँ । लगानी र काम गर्न कुनै बाधा छैन । अहिले असन्तुष्ट हुनुपर्ने कुनै कारण छैन । कोही असन्तुष्ट नै हुन्छु भनेर कसम खाएको छ भने त केही लाग्दैन’, उनले भने, ‘उत्तर र दक्षिणतिर नयाँ र पक्की मार्गहरु बन्दैछन्, अन्तर्राष्ट्रिय विमानस्थल थपेका छौँ । हरित उर्जा, मिथेन ग्यास, धौवादी फलामको उत्पादन गरेर प्रयोग गर्दैछौं । प्रविधिको रुपान्तरण भैसकेको छ । यी सबैको ध्येय विकास र समृद्धि हो । यसमा तपाईंहरु ढुक्कले अगाडि बढ्नुस् । देशका लागि योगदान दिनुहोस् ।’

काठमाडौं । भौतिक पूर्वाधार तथा यातायात मन्त्रालय अन्तर्गतको यातायात व्यवस्था विभागले सवारी साधनमा इम्बोस्ड नम्बर प्लेट अनिवार्य रूपमा जडान गर्न अनुरोध गरेको छ ।

विभागले आज एक सूचना जारी गर्दै असोज १ गतेदेखि सवारी दर्ता, नामसारी र नविकरण गर्दा अनिवार्य रुपमा इम्बोस्ड नम्बर प्लेट जडान गर्न अनुरोध गरेको हो ।

गत साउन २० गते भौतिक पूर्वाधार तथा यातायात मन्त्रीको अध्यक्षतामा बसेको विषयगत समितिको निर्णयानुसार, सबै प्रदेश सरकार मातहतका यातायात व्यवस्था कार्यालयहरूले असोज १ गतेदेखि सवारी दर्ता, नामसारी र नविकरण गर्दा अनिवार्य रूपमा इम्बोस्ड नम्बर प्लेट जडान गर्नुपर्ने निर्णय गरेको थियो ।

सोही अनुसार सबै सवारीधनीहरूले सम्बन्धित यातायात कार्यालयमा गई हाइ सेक्युरिटी इम्बोस्ड नम्बर प्लेट जडान गर्नुपर्नेछ। विभागले जारी सूचना मार्फत सबैलाई जानकारी गराउँदै आवश्यक प्रक्रिया अघि बढाउन अनुरोध गरेको छ।

सूचनामा विभागले भनेको छ, “सबै सवारीधनीहरूले यथाशीघ्र सम्बन्धित यातायात कार्यालयमा गई High Security Embossed Number Plate जडान गर्नु हुन यो सूचना मार्फत जानकारी गराइन्छ।”

बैतडी । जिल्लामा उद्योग दर्ताको क्रम बर्सेनि घट्दै गएको छ । घरेलु तथा साना उद्योग कार्यालयको गत तीन वर्षको तथ्याङ्क हेर्दा यहाँ उद्योग दर्ताको क्रम घट्दै गएको देखिएको हो ।

गएका तीन वर्षमा यहाँ सात सय ५३ दर्ता हुने उद्योगमा साना र मझौला उद्योग छन् । तर प्रत्येक वर्ष घट्दो क्रममा रहेका छन् । दर्ता भएका उद्योगमा कृषि, वन, आटामिल, मसला, अचारलगायतका छन् ।

आर्थिक वर्ष २०७९/८० मा यहाँ चार सय २७ उद्योग दर्ता भएका घरेलु तथा साना उद्योग कार्यालयका सूचना अधिकारी लक्ष्मणकुमार साउदले बताउनुभयो । तथ्याङ्कानुसार आव २०८०/८१ मा उक्त सङ्ख्याबाट घटेर एक सय ९१ उद्योगमात्र दर्ता भएको देखिएको छ ।

त्यसैगरी, आव २०८१/८२ मा पनि अघिल्लो वर्षको तुलनामा उद्योग दर्ता क्रम घटेको छ । गत आवमा यहाँ एक सय ३५ मात्र उद्योग दर्ता भएका देखिएका छन् । गएको तीन वर्षमा यहाँ वाणिज्यतर्फ तीन सय ९९ सय फर्म दर्ता भएका छन् । वाणिज्यतर्फ आव २०७९/८० मा एक सय ६३, २०८०/८१ मा एक सय ७३ र गत २०८१ र८२ मा ६३ फर्म दर्ता भएका छन् ।

घरेलु तथा साना उद्योग कार्यालयमा दर्ता भएका उद्योग नवीकरण पनि हुने गरेका छन् । दर्ता भएका उद्योग पाँच वर्षमा नवीकरण गर्नुपर्ने सूचना अधिकारी साउदले बताउनुभयो । आव २०७९/८० मा दुई सय ५१, आव २०८०/८१ मा दुई सय चार र गत आव २०८१/८२ मा तीन सय ९३ उद्योग नवीकरण भएका उनले बताए ।

तीन वर्षको अवधिमा वाणिज्यतर्फका एक हजार १२२ व्यवसाय नवीकरण भएका छन् । जिल्लामा उद्योग र व्यवसाय दर्ता खारेज पनि बढ्दो क्रममा छ । गएका तीन वर्षमा यहाँ दुई सय दुई उद्योग र व्यवसाय खारेज भएका छन् ।

युवाहरू वैदेशिक रोजगारीका लागि विदेशिने क्रम बढ्नु, बैंक तथा वित्तीय संस्थाबाट ऋण लगानी नहुनु, पुँजीको अभाव र स्थानीय तहमा पनि उद्योग दर्ता गराउनुपर्नेलगायत कारणले उद्योग तथा वाणिज्यतर्फका उद्योग व्यापारको खारेज बढेको र दर्ता हुने सङ्ख्या घटेको घरेलु तथा साना उद्योग कार्यालयका प्रमुख हेमराज भट्टले बताए ।

सरकारी सेवा सुविधा र अनुदानका लागि मात्र पनि उद्योग दर्ता हुने गरेका र पछि अनुदान र सुविधा नपाउँदा खारेज गर्ने गरेका उनले बताए ।

त्यसैगरी, गएको तीन वर्षको अवधिमा नयाँ उद्योग तथा वाणिज्य दर्ता, नवीकरण, खारेजलगायत शीर्षकबाट रु ७७ लाख छ हजार ७७८ राजस्व सङ्कलन भएको छ ।

काठमाडौं । स्थापनाको ६ महिनापछि राष्ट्रिय सहकारी नियमन प्राधिकरणको बोर्डले पूर्णता पाएको छ । सोमबार नवनियुक्त दुई सदस्यले पद तथा गोपनीयताको शपथ लिएसँगै प्राधिकरणले पूर्णता पाएको हो ।

२०८१ माघ १४ गते स्थापना भएको प्राधिकरणको अध्यक्ष डा. खगराज शर्मा रहेका छन् । उनलाई प्राधिकरणको अध्यक्षमा गएको असार ३१ गते नियुक्त गरिएको थियो । त्यसबाहेक सदस्यमा नेपाल राष्ट्र बैंकका कार्यकारी निर्देशक गुरु प्रसाद पौडेल र सदस्यमा भूमि व्यवस्था, सहकारी तथा गरिबी निवारण मन्त्रालयका सहसचिव मदन कोइराला रहेका छन् ।

सहकारी विज्ञ सदस्यमा डा. रमेश चौलागाई र चार्टर्ड एकाउन्टेन्टको तफएबाट सदस्यमा सी.ए महेश खनाल नियुक्त भएका छन् । सोमबार उनीहरूलाई भूमि व्यवस्था, सहकारी तथा गरिबी निवारणमन्त्री बलराम अधिकारीले पद तथा गोपनीयताको शपथ खुवाएका थिए ।

अब प्राधिकरणले पूर्ण क्षमताका साथ काम गर्न थाल्ने प्राधिकरणका अध्यक्ष डा. खगराज शर्माले बताए । ‘विभागले निकालेको तथ्यांक हेर्दा पनि करिब ३३ हजार सहकारी छन् भनेका छौँ । बचत तथा ऋणको कारोबार गर्ने सहकारीहरू ७५ प्रतिशत छन् भन्ने पनि विभिन्न भनाइ छन् । सुरुवातमा हामी दर्ता गर्दै छौँ र त्यो आधारमा यकिन सङ्ख्या आउला’, उनले भने,  ‘यी सबै सहकारीमा गएर स्थलगत अनुगमन गर्न थाल्ने हो भने यो कति सम्भव होला ? यो पनि विश्लेषण गर्नुपर्ने अवस्था छ । त्यसैले हामीले आवश्यक डकुमेन्टहरू र वित्तीय अवस्था सबै कुरालाई सिस्टममा इन्ट्री गराएर हेर्छौँ ।’

अध्यक्ष शर्माले क्षेत्राधिकारभित्र पर्ने सहकारीमा नियमन र सुपरिवेक्षण गर्ने जानकारी दिए । अध्यक्ष शर्माले भने, ‘ऐनले ३० प्रतिशतभन्दा बढी बचत तथा ऋणको कारोबार गरेका सहकारीहरू हाम्रो क्षेत्राधिकार भित्र पर्छन् । प्राधिकरणको विशुद्ध रूपमा बचत तथा ऋणको कारोबार गरिरहेका सहकारीहरूको नियमन र सुपरिवेक्षण गर्ने नै काम हो ।’

करिब एक वर्षमा खास नतिजा दिनेगरि काम अगाडी बढेको उनले जानकारी दिए ।

काठमाडौं । राष्ट्रिय सहकारी नियमन प्राधिकरणले बचत तथा ऋणको मुख्य कारोबार गर्ने सहकारीलाई प्राधिकरणमा अनिवार्य दर्ता गर्नुपर्ने व्यवस्था गर्ने तयारी थालेको छ । प्राधिकरणले यही भदौदेखि नै दर्ता प्रक्रिया थाल्ने भएको हो ।

जसका लागि मापदण्ड तर्जुमा गरि कार्यान्वयनको चरणमा रहेको प्राधिकरणका बोर्ड सदस्य तथा कार्यकारी निर्देशक शेषनारायण पौडेलले जानकारी दिए । उनले भने, ‘बचत तथा ऋणको मुख्य कारोबार गर्ने सहकारी संस्थाको दर्ता मापदण्ड, २०८२ तर्जुमा भई कार्यान्वयनको तयारीमा रहेको छ । सहकारी दर्ताको लागि एक अलग्गै दर्ता सफ्टवेयरको निर्माण भई लन्च गर्ने तयारी भइरहेको छ । २०८२ भाद्र महिना भित्रमा दर्ता प्रक्रियाको थालनी गरिने योजना रहेको छ ।’

सोमबार आयोजना गरिएको पत्रकार सम्मेलनमा पौडेलले दिएको जानकारी  अनुसार बचत तथा ऋणको मुख्य कारोबार गर्ने सहकारी संस्थाको सञ्चालन सम्बन्धमा जारी गरिएको नियमाकीय मापदण्ड, २०८२ जारी भई कार्यान्वयनको चरणमा रहेको छ ।

यही भदौ महिनामा नै ऐनको व्यवस्था अनुसारको मुख्य कारोबार गर्ने सहकारी संघ संस्थाको प्राधिकरणमा दर्ताका लागि दर्ता मापदण्ड जारी गरिनेछ । सहकारी संस्थाहरूलाई अनलाइनबाट नै दर्ता गरिने तयारी रहेको छ ।

छिटै नै सहकारी संस्थाहरूको नियमन तथा सुपरिवेक्षण कार्यविधि र आवश्यक प्रविधिको तयार गरी समस्या उन्मुख सहकारी संस्थाहरूलाई स्थलगत र अन्य सहकारी संघसंस्थाहरूलाई गैर स्थलगत नियमन प्रारम्भ गरिने समेत प्राधिकरणको तयारी रहेको छ ।

प्राधिकरणले नियम बमोजिम कुनै विषयमा पालना नगर्ने नगराउने बचत तथा ऋणको मुख्य कारोबार गर्ने सहकारी संस्थालाई पाँच लाख रुपैयाँदेखि १५ लाख रुपैयाँसम्म जरिवाना गर्ने समेत जनाएको छ ।

रुपन्देही । भैरहवा भन्सार कार्यालयले यो आर्थिक वर्षको पहिलो महिनामै लक्ष्यभन्दा २ प्रतिशत बढी राजस्व संकलन गरेर केही वर्षयता घटिरहेको राजश्व लक्ष्यमा सुधार देखाएको छ ।

देशकै दोस्रो ठूलो भन्सार नाकामा राजश्व संकलनमा सुधार आएपछि व्यवसायीहरु खुसी देखिएका छन् । यो कार्यालयले ४ वर्षदेखि वार्षिक राजश्व लक्ष्य पार गर्न सकिरहेको थिएन ।

भन्सार कार्यालयको तथ्यांकहनुसार आव २०८२–८३ को पहिलो महिनामा ८ अर्ब ८४ करोड ८५ लाख लक्ष्य रहेकोमा ९ अर्ब २ करोड ७२ लाख अर्थात् १ सय २ प्रतिशत राजस्व संकलन भएको छ । व्यवसायीहरूका अनुसार सरकारले ल्याएको केही नीतिगत सुधार र बजेटमा राखिएका सुधारले यस्तो अवस्था आएको आंकलन गरेका छन् ।

२०७८ पुस ५ गतेबाट लागू भएको अनिवार्य प्रतित पत्र (एलसी) खोलेर शतप्रतिशत र दुई वटा शीर्षकमा ५० प्रतिशत नगद मार्जिन राख्नुपर्ने व्यवस्था गरेसँगै आयातमा कमी हुँदै आएको थियो । देशका अधिकांश भन्सार कार्यालयबाट करिब ८४ प्रतिशत राजस्व असुली भइरहँदा यहाँ भने पहिलो महिनामा लक्ष्य पार भएको हो ।

गत वर्षको यही महिनाभन्दा अहिले २३ प्रतिशत बढी राजस्व संकलन भएको हो । भन्सार कार्यालयका अनुसार लगत्तै चाडपर्व आएकाले धेरै गाडी तथा कपडाहरु आयात भएका छन् भने धेरै मोटरसाइकल पनि आयात भएका छन् ।

मधेश आन्दोलन र नाकाबन्दीका बेला सहज मानिएको यो भन्सार नाका राज्यको लागि ठूलो योगदान गरेको थियो । बिस्तारै अन्य नाका सहज हुँदा सामानहरू पनि डाइभर्ट भएको छ । यहाँबाट लक्ष्य पार नहुनुको मुख्य कारण नै बाटोको समस्या रहेको भन्सारको बुझाई छ । पुल भाँचिदा र सडक निर्माणको कार्यले गर्दा पनि केही अवरोध भएको हो । राजस्वमा मुख्य योगदान दिने वस्तु आयत घट्दा राजस्व लक्ष्य प्रभावित हुने गरेको छ ।

भन्सार विभागले आर्थिक वर्ष २०८२–०८३ मा भने १ खर्ब १३ अर्ब ६६ करोड ६८ लाख १९ हजारको लक्ष्य तोकेको छ । वार्षिक लक्ष्यको आधारमा अहिलेको संकलनले ७ दशमलव ९५ प्रतिशत योगदान गरेको छ । २०८१ असोज मा ८ अर्ब ७८ करोड १६ लाख लक्ष्यमा ८ अर्ब ८१ करोड ५१ लाख अर्थात १ सय दशमलव ३९ प्रतिशत राजस्व संकलन गरेको थियो, त्यसपछि अहिले लक्ष्य पार भएको छ ।

कार्यालयलाई भन्सार विभागले आर्थिक वर्ष २०८१–८२ का लागि एक खर्ब ९ अर्ब ३३ करोड २२ लाख ५२ हजार राजस्व संकलन लक्ष्य दिएकोमा ९५ अर्ब १९ करोड ३८ लाख ९९ हजार रुपैयाँ अर्थात् ८७ दशमलव ०७ प्रतिशत राजस्व संकलन गरेको थियो । राजस्व लक्ष्य पूरा नभए पनि अघिल्लो वर्षभन्दा १४ अर्ब ३५ करोड अर्थात १७ दशमलव ७५ प्रतिशत बढी राजस्व संकलन गरेको छ ।

कार्यालयका अनुसार आर्थिक वर्ष २०७७÷७८ मा लक्ष्यभन्दा १३ प्रतिशत बढी राजस्व संकलन भए पनि त्यसयता यो अनुपात घट्दै गएको थियो । आर्थिक वर्ष २०७८–०७९ मा लक्ष्यको ९१ प्रतिशत, २०७९–८० लक्ष्यको ४९ प्रतिशत, आर्थिक वर्ष २०८०–०८१ मा लक्ष्यको ६३ प्रतिशत, आर्थिक वर्ष २०८१–०८२ मा लक्ष्यको ८७ प्रतिशत मात्रै राजस्व संकलन भएको भन्सार कार्यालयका सूचना अधिकारी नरेन्द्रप्रसाद चौधरीले जानकारी दिए ।

राजस्व संकलनमा योगदान दिने मुख्य वस्तुको आयात नै खुम्चिँदा पछिल्ला आर्थिक वर्षमा लक्ष्यअनुसार राजस्व संलकन गर्न नसकेको उनको भनाइ छ । कार्यालयले २०७८ मंसिरसम्म लक्ष्यअनुरूप सफलता हासिल गर्दै गए पनि पुस ५ गतेबाट लागू भएको प्रावधानले आयातमा कमी हँुदै आएको चौधरीको भनाइ छ ।

‘केही नीतिगत सुधार पनि भए, चाडपर्व पनि नजिक आइसकेका छन्, कपडा र गाडीहरूको आयात बढी देखिएको छ, औद्योगिक कच्चा पदार्थहरूको पनि आयात बढेको छ । चार वर्षयता लक्ष्य पार गर्न सकेका थिएनौँ, यो महिनामा पार भएको छ’ उनले नेपाल प्रेससँग भने ।

भन्सार एजेन्ट संघका अध्यक्ष मधु पन्थीका अनुसार देशभरका भन्सार कार्यालयबाट सरदर ८४ प्रतिशत राजश्व असुली भएकोको अवस्थामा भैरहवा भन्सारद्वारा लक्ष्यको १०२ प्रतिशत राजश्व असुली निकै राम्रो पक्ष हो ।

‘भैरहवा भन्सारको श्रावणको राजस्व लक्ष्य ८ अर्ब ८४ करोड ८५ लाखमा ९ अर्ब २ करोड ७२ लाख असुली जुन गत वर्षको २३ प्रतिशतले बढी बढी असुली भएको छ’ उनले भने ‘यसले यहाँको व्यापारमा सुधारको संकेत, व्यवसायीमा आत्मविश्वास बढ्नु, ब्याज घट्दो अवस्था, सरकारद्वारा नीतिगत लचकता, भारबहनको नाममा प्रशासनको सहजता खादी यसको सहजताका कारण हुन्’ उनले भने ।

काठमाडौं । नारायणी डेभलपमेन्ट बैंकका प्रमुख कार्यकारी अधिकृत (सीईओ)मा पशुपति पौडेल नियुक्त भएका छन् । बैंक सञ्चालक समितिले पौडेललाई बैंकको सीईओमा नियुक्त गरेको हो ।

बैंकका उप प्रबन्धक कृष्ण दवाडीका अनुसार पौडेलेले आइतबारदेखि नै सीईओकाे कार्यभार सम्हालेका छन् । नवनियुक्त सीईओ पौडेल भोजपुरको पौवादुङमा गाउँपालिका वडा नं. २ तिवारी भञ्ज्याङ निवासी हुन् ।

यसअघि बैंकका सीईओ रहेका विष्णु रेग्मीले स्वास्थ्यको कारण देखाई पदबाट राजीनामा दिएका थिए ।

काठमाडौं । नेपाल राष्ट्र बैंकले चाँदी आयातमा भुक्तानीको सीमा वृद्धि गरेको छ । केन्द्रीय बैंकले सीमा वृद्धि गरी पाँच लाख अमेरिकी डलर बराबर पुर्‍याएको जनाएको हो ।

सुनचाँदी व्यवसाय गर्ने उद्योगले चाँदीका गरगहना कलात्मक वस्तु, भाँडाकुँडा आदि बनाउन औद्योगिक कच्चा पदार्थको रुपमा आफ्नै प्रयोजनका लागि आयात गर्दा प्रतिपटक तीन लाख अमेरिकी डलर बराबरको सुविधा प्राप्त हुँदै आएको थियो ।

राष्ट्र बैंकले चाँदी आयात गर्दा प्रतिपटक अब पाँच लाख अमेरिकी डलर बराबरको वा सो बराबरको अन्य परिवत्र्य विदेशी मुद्राको सीमासम्म सटही सुविधा प्रदान गर्ने भएको हो ।

यसैगरी अन्य सुनचाँदी व्यवसायीले चाँदी आयात गर्दा प्रति पटक अमेरिकी डलर एक लाख वा सो बराबरको अन्य परिवत्र्य विदेशी मुद्राको सीमासम्मको सुविधा प्रदान गर्न सकिने केन्द्रीय बैंकले जनाएको छ ।

केन्द्रीय बैंकको विदेशी विनिमय व्यवस्थापन विभागका कार्यकारी निर्देशक रेवतीप्रसाद नेपालका अनुसार, निकासी आदेश पुष्टि हुने अग्रिम भुक्तानी वा प्रतितपत्र वा विदेशबाट खरिद आदेश बराबरको कागजात पेस गर्नुपर्नेछ ।

सटही सुविधा दिने वाणिज्य बैंकले प्रत्येक पटक सटही सुविधा प्रदान गर्दा सो पूर्व सटही सुविधा प्रदान भएको भए सो अन्तर्गत चाँदी आयात भई तोकिएबमोजिम निर्यात भए नभएको यकिन भने गर्नुपर्नेछ ।

वाणिज्य बैंक बाहेक बैंकबाट चाँदी आयातको सटही सुविधा लिई निर्यातको भुक्तानी लिन बक्यौता नरहेको सम्बन्धी स्वःघोषणा चाँदी व्यवसायीसँग लिनुपर्ने व्यवस्था गरिएको छ ।

महोत्तरी । मधेसमा राजस्व सङ्कलनमा उल्लेख्य प्रगति भएको छ । गत आर्थिक वर्ष २०८१/८२ को राजस्व सङ्कलन रु पाँच अर्ब ५४ करोड ७२ लाख ३३ हजार भएको छ । यो पछिल्ला सात आर्थिक वर्षकै उच्च हो ।

सात वर्ष पहिले आव २०७५/७६ मा रु दुई अर्ब ६६ करोड १५ लाख ३६ हजार राजस्व सङ्कलन भएको थियो । सात वर्षअघिको यो रकमभन्दा गत आव २०८१/८२ को सङ्कलन दोब्बर बढी भएको हो ।

मधेसको अर्थ मन्त्रालयले यसलाई उल्लेख्य प्रगति भनेको छ । कर प्रशासन सुदृढीकरण, डिजिटल प्रणालीको विस्तार र आन्तरिक आर्थिक गतिविधि बढ्नुले यो उल्लेख्य उपलब्धि हासिल भएको प्रदेशका अर्थ मन्त्रालयका सचिव रामकुमार महतो बताउँछन् । “राजस्व सङ्कलनमा यो उल्लेख्य प्रगति हो”, सचिव महतोले भने, “यसले अब राम्रो लिक समातेको छ ।”

यसअघि आर्थिक वर्ष २०८०/८१ मा प्रदेशमा रु तीन अर्ब पाँच करोड ९२ लाख ३१ हजार राजस्व सङ्कलन भएको थियो । चालु आर्थिक वर्ष आगामी वर्षहरुमा राजस्व सङ्कलनमा अझ सुधार हुँदै जाने मन्त्रालयले जनाएको छ । सङ्कलन प्रक्रियालाई वैज्ञानिक रुपमा व्यवस्थित गरिएको हुँदा थप उपलब्धि हासिल हुने सचिव महतोको भनाइ छ ।

काठमाडौं । नेपाल विद्युत् प्राधिकरणले आर्थिक वर्ष २०८१/८२ मा विद्युत् बिक्रीसहित १ खर्ब ३८ अर्ब ८७ करोडको कारोबार गरेको छ । भने सो समयमा ९ अर्ब ६ करोड ७० लाख (करअघिको) नाफा कमाएको छ । प्राधिकरणको जारी ४०औँ वार्षिकोत्सव समारोहमा यो तथ्यांक सार्वजनिक गर्ने तयारी छ ।

अघिल्लो आव २०८०/८१ मा १० अर्ब ५३ करोड नाफा गरेको थियो ।

यो अवधिमा प्राधिकरणको कुल सम्पत्ति ६.२ प्रतिशतले वृद्धि भएको छ । भने कुल सम्पत्ति ६ खर्ब ८७ अर्ब ९१ करोड पुगेको छ । ग्राहक सङ्ख्या अघिल्लो वर्षको तुलनामा यस वर्ष ४.६ प्रतिशत पुगेको छ । विद्युत् चुहावट ०.४७ प्रतिशतले कमी भई १२.२६ प्रतिशतमा आएको छ ।

आर्थिक वर्ष २०८१/८२ मा प्राधिकरणको प्रणालीमा ४३४ मेगावाट विद्युत् थपिएको छ । जसमा निजी क्षेत्रबाट २८० मेगावाट विद्युत् उत्पादन थप भएको हो ।

आर्थिक वर्ष २०८१/८२ मा विद्युत् व्यापारको क्षेत्रमा ऐतिहासिक वर्ष प्राधिकरणले जनाएको छ । नेपाल, भारत र बङ्गलादेशबीच त्रिपक्षीय विद्युत् निर्यातको सम्झौता भएको छ । जसअनुसार बङ्गलादेशमा ४० मेगावाट विद्युत् निर्यात सुरूवात भइसकेको छ ।

प्राधिकरणमा कार्यकारी निर्देशक हितेन्द्रदेव शाक्य आएपछि सार्वजनिक गरेको श्वेतपत्रमा ९ अर्ब ४८ करोड नाफा देखिएको थियो । अहिले थोरै नाफा घटेको देखिन्छ ।

प्राधिकरणबाट बाहिरिँदा तत्कालीन कार्यकारी निर्देशक कुलमान घिसिङले आव २०८१/८२ को पहिलो ६ महिनामा ११ अर्ब ३६ करोड रूपैयाँ नाफाको तथ्यांक सार्वजनिक गरेका थिए । आव २०७२/७३ मा ८ अर्ब ८९ करोड वार्षिक घाटामा थियो । भने त्यसपछिका वर्षमा निरन्तर नाफा कमाउँदै आएको छ ।

काठमाडौं । भदौ महिनाका लागि वाणिज्य बैंकहरुले नयाँ ब्याजदर सार्वजनिक गरेका छन् । साउनको तुलनामा वाणिज्य बैंकहरुको औसत ब्याजदर घटेको छ ।

बैंकहरुले सार्वजनिक गरेको नयाँ ब्याजदर अनुसार व्यक्तिगत मुद्दती निक्षेपको अधिकतम ब्याजदर औषतमा ५.५८ प्रतिशत विन्दुमा झरेको छ । जबकि यस्तो ब्याजदर साउन महिनामा ५.६९ प्रतिशत विन्दु रहेको थियो ।

ब्याजदर बढाउनेमा प्रभु बैंक रहेको छ । घटाउने बैंकहरुमा स्ट्याण्डर्ड चार्टर्ड बैंक,  लक्ष्मी सनराइज, एभरेष्ट, सानिमा, कुमारी, सिद्धार्थ, कृषि विकास र नेपाल एसबिआई बैंक रहेका छन् । अन्य बैंकहरुको ब्याजदर भने स्थिर रहेको छ ।

भदौमा कृषि विकास बैंकले मुद्दती निक्षेपमा व्यक्तिगततर्फ ५.२० प्रतिशत कायम गरेको छ भने संस्थागततर्फ २.८५ प्रतिशत ब्याजदर निर्धारण गरेको छ । एभरेष्ट बैंकले मुद्दती निक्षेपमा व्यक्तिगततर्फ ५.७५ प्रतिशत दिँदा संस्थागततर्फ ४.७५ प्रतिशत ब्याजदर तोकेको छ ।

कुनको कति छ ब्याजदर ?

काठमाडौं । चालु आर्थिक वर्ष २०८२/८३ को पहिलो महिना सरकारले ८५ अर्ब १९ करोड आम्दानी गर्दा ४६ अर्ब ३० करोड खर्च गरेको छ । महालेखा नियन्त्रक कार्यालयको तथ्याङ्कअनुसार चालु आवको पहिलो महिना वार्षिक लक्ष्यको पाँच दशमलव ५६ प्रतिशत आम्दानी र दुई दशमलव ३६ प्रतिशत खर्च भएको हो ।

सरकारले चालु आवमा १५ खर्ब ३३ अर्ब ४४ करोड ६९ लाख राजस्व उठाउने लक्ष्य राखेको छ । साउन मसान्तसम्ममा कर राजस्वबाट रू ८० अर्ब ६७ करोडभन्दा बढी अर्थात् वार्षिक लक्ष्यको छ दशमलव ०९ प्रतिशत र गैरकर राजस्वबाट तीन अर्ब ७९ करोड ५० लाख अर्थात् वार्षिक लक्ष्यको दुई दशमलव ४६ प्रतिशत सङ्कलन भएको विवरणमा उल्लेख छ ।

यस्तै, वैदेशिक अनुदानबाट रू ४२ करोड १९ लाख र अन्य प्राप्तिबाट ३० करोड ८९ लाख राजस्व सरकारी खातामा जम्मा भएको छ । यस वर्ष रू १३ खर्ब २५ अर्ब ५८ करोड ३९ लाख कर राजस्व, रू एक खर्ब ५४ अर्ब ४१ करोड ६१ लाख गैरकर राजस्व र रू ५३ अर्ब ४४ करोड ६९ लाख वैदेशिक अनुदान उठाउने सरकारको लक्ष्य छ ।

चालु आवका लागि रू १९ खर्ब ६४ अर्ब ११ करोड बराबरको बजेट ल्याइएकामा साउन मसान्तसम्ममा रू ४६ अर्ब ३० करोड ६१ लाख बराबर खर्च भएको छ । चालुतर्फ रू ११ खर्ब ८० अर्ब ९८ करोड बजेट विनियोजन भएकामा हालसम्म एक दशमलव ५६ प्रतिशत अर्थात् रू १८ अर्ब ४७ करोड ९८ लाख बराबर खर्च भएको महालेखाले जनाएको छ ।

यस्तै, पुँजीगत शीर्षकमा रू चार खर्ब सात अर्ब ८८ करोड ८० लाख विनियोजन भएकामा शून्य दशमलव १८ प्रतिशत अर्थात् रू ७२ करोड ६३ लाख मात्रै खर्च भएको छ । पहिलो महिनामा सबैभन्दा धेरै खर्च वित्तीय व्यवस्था शीर्षकमा भएको छ । चालु आवका लागि वित्तीय व्यवस्था शीर्षकमा रू तीन खर्ब ७५ अर्ब २४ करोड २० लाख बराबर विनियोजन भएकामा साउन मसान्तसम्म सात दशमलव २२ प्रतिशत अर्थात् रू २७ अर्ब १० करोड खर्च भएको छ ।

काठमाडौं । गत आर्थिक वर्षमा सन नेपाल लाइफले ५४ करोड २४ लाख रुपैयाँ नाफा आर्जन गरेको छ । यो नाफा अघिल्लो आर्थिक वर्षको तुलनामा ५.६५ प्रतिशत कम हो । त्यसबेला कम्पनीले ५७ करोड ४९ लाख रुपैयाँ नाफा आर्जन गरेको थियो ।

गत वर्ष कम्पनीले चार अर्ब ५३ करोड ९३ लाख रुपैयाँ बीमा शुल्क संकलन गरेको छ । जसमा कम्पनीले  एक अर्ब ५७ करोड ९९ हजार रुपैयाँ दाबी भुक्तानी दिएको छ ।

कम्पनीको प्रतिशेयर आम्दानी ११.२२ रुपैयाँ रहेको छ भने प्रतिशेयर नेटवर्थ १५४.२३५ रुपैयाँ रहेको छ । प्रतिशेयर कूल सम्पत्तिको मूल्य ३६४.६० रुपैयाँ रहेको छ । कम्पनीको पीई अनुपात ४३.७२ रुपैयाँ रहेको छ ।

कम्पनीको चुक्ता पुँजी पाँच अर्ब ८६ लाख रुपैयाँ रहेको छ । कम्पनीको जीवन बीमा कोषको आकार सात अर्ब ६२ करोडबाट १० अर्ब १० करोड रुपैयाँ छ ।

काठमाडौं । गत आर्थिक वर्षमा वाणिज्य बैंकहरुले ७१ अर्ब रुपैयाँभन्दा बढी नाफा कमाएका छन् । नेपालमा सञ्चालित २० वटा वाणिज्य बैंकहरुले गत आर्थिक वर्षको साउनदेखि असार मसान्तसम्म ७१ अर्ब ५१ करोड रुपैयाँ नाफा कमाएका हुन् । यो नाफा गत सोही अवधिको तुलनामा ४३.३९ प्रतिशत बढी हो । गत आवको सोही अवधिमा बैंकहरुले ४९ अर्ब ८७ करोड नाफा कमाएका थिए ।

बैंकहरुले सार्वजनिक गरेको तथ्यांकअनुसार १६ वटा बैंकको नाफा बढेको छ भने चार वटाको घटेको छ । नाफा घट्नेमा स्ट्याण्डर्ड चार्टर्ड बैंक, नेपाल एसबिआई बैंक, एनआइसी एशिया बैंक र सिटिजन्स बैंक रहेका छन् । गत आवमा सबैभन्दा बढी नबिल बैंकले खुद नाफा आर्जन गरेको छ । नबिल बैंकले ७ अर्ब १२ करोड कमाएको छ ।

सबैभन्दा बढी नाफा कमाउनेको दोस्रोमा नेपाल इन्भेष्टमेन्ट मेगा बैंक (एनआईएमबी) रहेको छ । यस बैंकले ६ अर्ब ७५ करोड रुपैयाँ नाफा आर्जन गरेको छ ।

सर्वाधिक नाफा कमाउनेको तेस्रोमा रहेको ग्लोबल आइएमई बैंकले ६ अर्ब २० करोड रुपैयाँ आर्जन गरेको छ ।

गत आवमा प्रभु बैंकले ५ अर्ब ४४ करोड नाफा कमाउँदा एभरेष्ट बैंकले ४ अर्ब ९१ करोड रुपैयाँ आर्जन गरेको छ । यस अवधिमा कृषि विकास बैंकले ४ अर्ब १५ करोड, लक्ष्मी सनराइज बैंकले ४ अर्ब ११ करोड र प्राइम कमर्सियल बैंकले ४ अर्ब २ करोड खुद नाफा कमाएका छन् ।

त्यस्तै, राष्ट्रिय वाणिज्य बैंकले ३ अर्ब ८१ करोड नाफा कमाउँदा नेपाल बैंकले ३ अर्ब ७७ करोड, सिद्धार्थ बैंकले ३ अर्ब ३९ करोड, एनएमबि बैंकले ३ अर्ब २८ करोड, स्ट्याण्डर्ड चार्टर्ड बैंकले ३ अर्ब २ करोड, सानिमा बैंकले २ अर्ब ५७ करोड, कुमारी बैंकले २ अर्ब ११ करोड र माछापुच्छ्रे बैंकले २ अर्ब १ करोड खुद नाफा आर्जन गरेका छन् ।

गत आवमा नेपाल एसबिआई बैंकले १ अर्ब ८० करोड नाफा कमाउँदा हिमालयन बैंकले १ अर्ब ५१ करोड र सिटिजन्स बैंकले १ अर्ब २९ करोड खुद नाफा आर्जन गरेका छन् । यस अवधिमा एनआईसी एशिया बैंकको गत वर्ष १६ करोड १५ लाख रुपैयाँ नाफा आर्जन गरेको छ ।

म्याग्दी । पछिल्लो तीन वर्षयता म्याग्दीमा उद्योग व्यवसाय दर्ताको तुलनामा बन्द हुने दर बढेको छ । आर्थिक मन्दीका कारण उद्यमी, व्यवसायीहरू वैकल्पिक पेसा रोज्ने र पलायन हुँदा व्यवसाय दर्ता घटेको र बन्द हुने दर बढेको हो ।

पर्यटन तथा उद्योग कार्यालयको तथ्याङ्कानुसार आर्थिक वर्ष २०८०/८१ को तुलनामा २०८१/८२ मा उद्योग व्यवसाय दर्ता २६ दशमलव ५४ प्रतिशतले घटेको र खारेज हुने दर एक सय सात प्रतिशतले बढेको छ ।

आव २०८१/८२ मा म्याग्दीमा ७० उद्योग र ८५ व्यवसाय दर्ता हुँदा ४२ उद्योग र ४८ वटा व्यावसायिक फर्म बन्द भएका कार्यालय प्रमुख अमृत कँडेलले बताए । आव २०८०/८१ मा दुई सय ११ उद्योग, व्यवसाय दर्ता भएको कार्यालयमा ८४ खारेज भएका थिए ।

चौध उद्योग र २९ व्यावसायिक फर्म खारेज भएको आव २०७९/८० मा एक सय एक वटा उद्योग र एक सय १० वटा व्यावसायिक फर्म दर्ता भएका थिए । आव २०७७/७८ मा सात सय ६२, आव २०७८/७९ मा पाँच सय ७० र २०७९/८० मा तीन सय १७ वटा उद्योग र व्यावसायिक फर्म दर्ता भएका थिए ।

आव २०८१/८२ मा दर्ता र खारेज भएका उद्योगको सङ्ख्या थपघट गर्दा उद्योगतर्फ दुई हजार ९१७ र व्यवसायतर्फ दुई हजार ६९० वटा कायम भएको छ । गत वर्ष दर्ता भएका उद्योगमा दुई सय १७ जनालाई रोजगारी सृजना भएको छ । गत वर्ष पाँच सय ३२ उद्योग र छ सय तीन व्यावसायिक फर्मको नवीकरण भएको छ ।

उद्योग व्यवसाय दर्ता नवीकरणबापत गत आवमा पर्यटन तथा उद्योग कार्यालयले रु ३० लाख २५ हजार ७७४ राजस्व सङ्कलन गरेको छ । आव २०८०/८१ मा रु १७ लाख ३८ हजार ५०० राजस्व सङ्कलन गरेको कार्यालयले प्रदेश सरकारले नीतिमा परिवर्तन गरेका कारण राजस्व बढेको जनाएको छ ।

म्याग्दी उद्योग वाणिज्य सङ्घका अध्यक्ष सुविन श्रेष्ठले घट्दो जनसङ्ख्या, बसाइँसराइ, वैदेशिक रोजगारी, स्थानीय तहमा मात्र दर्ता गरेर आन्तरिक राजस्व कार्यालयबाट पान नम्बर पाइने र कोरोना महामारीपछि आर्थिक मन्दीको असर उद्योग व्यवसाय दर्ता तथा खारेजीमा परेको बताए ।

“व्यवसाय र उद्योग खारेजी बढ्नु र दर्ता घट्नुलाई कोभिडपछिको आर्थिक मन्दी र वैदेशिक रोजगार मुख्य कारण हुन्”, उनले भने, “वैदेशिक रोजगारका लागि कारोबार देखाउन, बैंकबाट ऋण र राज्यबाट अनुदान लिन कागजी प्रक्रिया पूरा गर्न दर्ता भएका उद्योग र व्यवसाय उद्देश्य पूरा भएपछि कर तिरिरहनुभन्दा खारेज गर्नेहरू पनि छन् ।”

फेन्सी, हार्डवयर्स र होटल तथा रेष्टुरेष्टको व्यापार घटे पनि सटर नै बन्द नभएका तथा पर्यटनमूलक होटल व्यवसाय बढेका अध्यक्ष श्रेष्ठको दाबी छ । ग्रामीण क्षेत्रका उद्यमी र व्यवसायीहरूले स्थानीय तहमै दर्ता गरेर पान नम्बर लिन पाउने व्यवस्था भएपछि प्रदेश सरकारअन्तर्गतको पर्यटन तथा उद्योग कार्यालयमा दर्ता नगर्ने र खारेज गर्न थालेका अध्यक्ष श्रेष्ठले बताए ।