Author: Shyamkrishna Dahal

विराटनगर । प्रदेश १ का मुख्यमन्त्री शेरधन राईले बहुमतप्राप्त आफ्नै पार्टीको सरकार ढालेर राष्ट्रपति, प्रधानमन्त्री, प्रदेश प्रमुख र मुख्यमन्त्रीहरुलाई अपदस्थ गर्ने षड्यन्त्र असफल पार्न ताजा जनादेशमा जानु परेको बताएका छन् ।

प्रदेश १ को तीन वर्षे समीक्षात्मक कार्यक्रमलाई विराटनगरमा सम्बोधन गर्दै मुख्यमन्त्री राईले प्रदेशमा समेत अस्थिरता र अराजकता सिर्जना गर्ने प्रयास भएको बताए । उनले आफूमाथिको अविश्वास प्रस्तावलाई सामना गर्ने पनि बताए ।

राईले आफूमाथिको अविश्वास प्रस्तावमाथिको कानुनी प्रश्न कायमै रहेको भन्दै त्यसको निरुपण गरिने बताए । उनले केन्द्रमा सरकार ढालेर राजनीतिक अस्थिरता सिर्जना गर्ने प्रयास असफल पार्न अब ताजा जनादेशमार्फत जनताले अभिमत प्रकट गर्नुपर्ने बताए ।

राईले भने, ‘हामीले सीधा भन्दा मुलुकलाई पुनः अस्थिरतामा लगेर नौ महिने, १८ महिने र ६ महिने सरकार बनाउने ढाल्ने फोहोरी खेलमा लैजाने षडयन्त्र भएपछि ताजा जनादेशमा जानुपर्ने बाध्यता आएको हो । अब जनताले ती तत्वलाई परास्त गर्नुपर्छ ।’

काठमाडौं । सभामुख अग्निप्रसाद सापकोटाले धरानको सर्दु जलाधार क्षेत्रको सरकारी जग्गा व्यक्तिको नाममा गरेको भनी आफ्नो नाम जोडिएकोमा राजनीतिक पूर्वाग्रह भनेका छन् ।

सभामुखको सचिवालयको तर्फबाट प्रेस विज्ञ श्रीधर न्यौपानेले आइतवार प्रेस विज्ञप्ति जारी गरी तत्कालीन वनमन्त्री रहेका बेला सापकोटाले सर्वोच्च अदालतको आदेशमात्र पालना गरेको जनाएका छन् ।

सर्वोच्च अदालतले २०६७ चैत १७ मा निवेदकहरुको माग बमोजिम रोक्का रहेका जग्गा फुकुवा गरी दिनु भनी मालपोत कार्यालय सुनसरीका नाममा परमादेश दिएको र महान्यायाधिवक्ताको रायसमेतका आधारमा अदालतको फैसला कार्यान्वयनमात्र गरिएको सापकोटाको सचिवालयले जनाएको छ ।

प्रेस नोटमा भनिएको छ, ‘सम्मानित सर्वोच्च अदालतको फैसला कार्यान्वयन गर्नुपर्ने बाध्यात्मक संवैधानिक व्यवस्था तात्कालीन वन तथा भूसंरक्षण सचिवले उठाएको उल्लेखित टिप्पणी अनुसार अगाडि बढाइएको स्पष्ट छ । संविधानको धारा १२८ को उपधारा ४ मा ‘सर्वोच्च अदालतले आफ्नो वा मातहतको अदालतको न्याय सम्पादनको कार्यमा कसैले अवरोध गरेमा वा आदेश वा फैसलाको अवज्ञा गरेमा कानूनबमोजिम अवहेलनामा कारबाही चलाई सजाय गर्न सक्नेछ’ भन्ने व्यवस्थालाई ध्यानमा राखिएको थियो ।

सभामुखको सचिवालयले देशको पछिल्लो विकसित राजनीतिक घटनाक्रममा संविधान, लोकतन्त्र र जनाधिकारको रक्षार्थ उभिएका सभामुखलाई जोडेर गरिएको प्रचार राजनैतिक पूर्वाग्रहबाट प्रेरित देखिएको दाबी गरेको छ ।

गत शुक्रवार काठमाडौंमा आयोजित एक कार्यक्रममा बालुवाटारको जग्गा खोजबिन अभियानका अभियन्ता अधिवक्ता युवराज कोइरालाले सापकोटा वनमन्त्री हुँदा सर्दु जलाधार क्षेत्रको सरकारी जग्गा व्यक्तिको नाममा गराएको तर अख्तियारले मुद्दा नचलाएको आरोप लगाएका थिए ।

यो पनि पढ्नुहोस् : सभामुखमाथि धरानको ३४८ बिघा सरकारी जग्गा व्यक्तिको नाममा गराएको आरोप (भिडियो)

काठमाडौं । प्रतिनिधिसभाको आउँदो निर्वाचका लागि मतदानस्थलमा सीसी क्यामराको प्रयोग गर्न निर्वाचन आयोगलाई विभिन्न राजनीतिक दलले सुझाव दिएका छन् ।

आयोगले निर्वाचन आचारसंहिताबारे राजनीतिक दलसँग आइतबार गरेको छलफलमा निर्वाचनलाई निष्पक्ष र पारदर्शी बनाउन दलका प्रतिनिधिहरूले यस्तो सुझाव दिएका हुन् ।

निर्वाचन आयोगमा अनुसार आचारसंहिताको कार्यान्वयनलाई प्रभावकारी बनाउनु पर्ने, अनुगमनकर्ता तथा अनुगमन समितिलाई प्रभावकारी बनाउनु पर्ने, दलको निर्वाचन खर्च पारदर्शी हुनुपर्नेलगायतका सुझाव पनि दलहरुले दिएका थिए।

‘कार्यक्रममा सहभागी राजनीतिक दलका प्रतिनिधिहरूले निर्वाचन आचारसंहिताको कार्यान्वयनलाई प्रभावकारी बनाउनु पर्ने, अनुगमनकर्ता तथा अनुगमन समितिलाई प्रभावकारी बनाउनु पर्ने, दलको निर्वाचन खर्च पारदर्शी हुनुपर्ने, मतदान पश्चात मतदान केन्द्रबाट मतपेटिका ढुवानी गर्ने क्रममा दल तथा उम्मेदवारका प्रतिनिधिलाई मतपेटिका सँगै आउने व्यवस्था मिलाउनु पर्ने, मतदानस्थलमा सीसी क्यामराको प्रयोग गर्नुपर्ने लगायतका महत्वपूर्ण विषयहरूमा लिखित एवं मौखिक रुपमा सुझाव दिनु भयो,’ आयोगले विज्ञप्ति जारी गर्दै भनेको छ।

छलफलमा संघ, प्रदेश र स्थानीय तहमा प्रतिनिधित्व गर्ने १२ वटा राजनीतिक दलका प्रतिनिधि सहभागी थिए ।

आयोगका तर्फबाट प्रमुख निर्वाचन आयुक्त दिनेशकुमार थपलिया, निर्वाचन आयुक्तहरू नरेन्द्र दाहाल, इश्वरीप्रसाद पौड्‍याल, रामप्रसाद भण्डारी र डा. जानकी कुमारी तुलाधर, आयोगका सचिव देवकुमारी गुरागाईँलगायतको उपस्थिति थियो।

पोखरा । उपप्रधान तथा ओलीपक्षीय नेकपा सचिवालय सदस्य ईश्वर पोखरेलले प्रचण्ड-माधव पक्षले चुनाव नगराउन निर्वाचन आयोगलाई धम्की दिइरहेको टिप्पणी गरेका छन् ।

प्रधानमन्त्रीले ताजा जनादेशका लागि संसद विघटन गरेको जिकिर गर्दै पोखरेलले प्रचण्ड-माधव निर्वाचन नगराउन लागिपरेको आरोप लगाए । ‘प्रचन्ड र माधव नेपाल निर्वाचन आयोगमा गएर थर्काउँदै चुनाव गराउन पाइँदैन भन्दै थर्काउनुहुन्छ’, पोखरामा आइतबार आयोजित ओलीपक्षीय प्रेस संगठनको प्रदेश भेलामा पोखरेलले भने ।

जनताको ताजा जनादेशका लागि जाने कुरा कुनै पनि हालतमा असैंवधानिक र अलोकतान्त्रिक नहुने उनको तर्क छ । माधव-प्रचण्डको सत्ता तृष्णाको मनोरोगका कारण संसद विघटन गर्नुपरेको उपप्रधानमन्त्री पोखरेलको दाबी छ ।

उपप्रधान पोखरेलले तत्कालीन माओवादीको राजनीति सकिएकोबेला एमालेको शरणमा आएको दाबी गरे । उनले भने, ‘माओवादीको पोलिटिक्स सकिएकोथ्यो । उहाँहरू पावरबाट बाहिर हुनुहुन्थ्यो । मानवताविरोधी कार्यका लागि टाउकोमा तरवार थियो । त्योबाट छुटकारा पाउन पार्टी एकता गर्नु भयो ।’उनले माधव नेपाल पनि प्रचण्डको मुंग्रो समाएर केपी विरोधी काम गरेको आरोप लगाए ।

‘टू इन वान भएर ओल्टेकोल्टे हुन पाइँदैन’

पोखरेलले पार्टीनिकट पत्रकारलाई पार्टी र पेशा दुवैमा कटिबद्ध भएर लाग्न सुझाव दिए ।

‘पत्रकारले आफ्नो पेशागत दक्षता भने प्रदर्शन गर्नैपर्छ । दक्षता भएन भने अघि बढ्न सकिँदैन । विचारको पनि स्पष्टता हुन जरुरी छ,’ पोखरेलले भने, ‘पेशागत दक्षता नभएर पार्टीमा लाग्छु भन्ने सोच्नु हुँदैन ।’

पोखरेलले कार्य दक्षता भएर पनि विचारमा स्पष्टता भएन भने अन्तिममा ‘नागरिक समाजको अगुवा’ भइने आरोप लगाए । ‘धेरैलाई देखेको छु । कार्य दक्षता भएर अग्रज भएका छन् । तर, अन्तिममा विचार खुइलिँदै गएर उनीहरु नागरिक समाजमा परिणत भएका छन्,’ उनले भने, ‘विचार र दक्षतासहित अघि बढिसकेपछि ओल्टेकोल्टे हुनै पाइँदैन ।’

काठमाडौं । नेपाली कांग्रेसका सभापति शेरबहादुर देउवाले प्रतिनिधिसभा विघटनविरुद्ध सोमबार देशभर हुने प्रदर्शनमा सहभागी हुन आव्हान गरेका छन् ।

विज्ञप्ति जारी गर्दै सभापति देउवाले प्रतिनिधिसभा विघटन संविधानमा भएको व्यवस्था प्रतिकूल र जनभावनाविपरीतको कार्य भएकोले कांग्रेस एकमत साथ आन्दोलनमा रहेको जनाएका हुन् ।

कांग्रेस केन्द्रीय समितिको पूर्व निर्धारिता कार्यक्रम अनुसार सोमबार ७७ वटै जिल्लामा सरकारविरुद्ध प्रदर्शन हुँदैछ । सभापति देउवाले विगतका आन्दोलन कार्यक्रममा झै घर-घरबाट प्रदर्शनमा सहभागि भई सरकारविरुद्ध ऐक्यवद्धता जनाउन आग्रह गरेका हुन् ।

सोमबार हुने प्रदर्शनअन्तर्गत सभापति देउवाले रुपन्देही, वरिष्ठ नेता रामचन्द्र पौडेलले धादिङ, उपसभापति विमलेन्द्र निधिले सप्तरी, महामन्त्री डा.शशांक कोइरालाले दाङ, पूर्व महामन्त्री प्रकाशमान सिंहले कास्की, पूर्व महामन्त्री कृष्ण सिटौंलाले झापा, नेताहरु डा. रामशरण महतले काभ्रे, अर्जुननरसिंह केसीले काठमाडौं, डा.मिनेन्द्र रिजालले प्यूठान, गगन थापाले चितवन, प्रदीप पौडेलले दैले, गुरुराज घिमिरेले दोलखालगायतका जिल्लामा सम्बोधन गर्ने तय भएको छ ।

कांग्रेसले यसअघि देशभरका प्रतिनिधिसभा क्षेत्र, प्रदेशसभा क्षेत्र, स्थानीय तह र वडा केन्द्रित प्रदर्शन र सभा गरिसकेको छ ।

काठमाडौं । प्रचण्ड-माधव पक्षीय नेकपाले पशुपतिनाथ र हिन्दू धर्मका विषयमा आफ्ना नेताहरुको भनाइलाई बंग्याइएको भन्दै आपत्ति जनाएको छ । सो पक्षका प्रवक्ता नारायणकाजी श्रेष्ठले आइतवार पेरिसडाँडामा आयोजित पत्रकार सम्मेलनमा पशुपतिनाथ र जनताको धार्मिक आस्थाप्रति सम्मान रहेको बताए ।

श्रेष्ठले भने, ‘पशुपतिनाथ विश्वभरिका हिन्दूहरूको आराध्यदेव र आस्थाको केन्द्र हो । त्यसको हामी सम्मान गर्छौं र जनताको धार्मिक आस्थाको पनि सम्मान गर्छौं । हाम्रा नेताहरूको प्रस्तुतिलाई गलत ढंगले तोडमोड गरेर धर्म र पशुपतिनाथजस्तो धार्मिक संस्थालाई संकीर्ण राजनीतिक स्वार्थका लागि उपयोग र तुच्छ स्वार्थका लागि दुरुपयोग नगर्न अनुरोध छ ।’

प्रधानमन्त्री केपी शर्मा ओलीले केही दिनअघि पशुपतिनाथमा पुगेर पूजा अर्चना गरी सुनको जलहरी लगाउने घोषणा गरेपछि प्रचण्ड-माधव पक्षले ओलीले धर्मनिरपेक्षता त्यागेको आरोप लगाएको थियो । माघ २८ गतेको काठमाडौंकाे आमसभामा अधिकांश वक्ताले ओलीको पशुपतिनाथ भ्रमणबारे कडा टिप्पणी गरेका थिए ।

रघुजी पन्तले २०५८ मा राजा वीरेन्द्रले पशुपतिमा क्षमापूजा गर्दा वंशनाश भएको प्रसंग निकाल्दै ‘ओलीको के हुने हो ?’ भनी प्रश्न गरेका थिए । विश्व हिन्दू महासंघलगायतका संस्थाले नेताहरूको अभिव्यक्तिप्रति आपत्ति जनाउँदै हिन्दू धर्म र पशुपतिनाथको अपमान गर्नेलाई बहिस्कार गर्न आह्वान गरेकै बेला प्रवक्ता श्रेष्ठले यस्तो स्पष्टीकरण दिएका हुन् ।

संघर्षका कार्यक्रम घोषणा गर्न आयोजित पत्रकार सम्मेलनमा पत्रकारको प्रश्न सकिएपछि उनले आफैं समय लिएर पशुपतिनाथबारे स्पष्टीकरण दिएका हुन् ।

काठमाडौं । प्रतिनिधिसभा विघटनविरुद्ध रहेको प्रचण्ड-माधव पक्षीय नेपाल कम्युनिष्ट पार्टीले चौथो चरणको संघर्षको कार्यक्रम घोषणा गरेको छ।

आइतबार पेरिसडाँडामा पत्रकारसम्मेलन गरेर सार्वजनिक गरिएको कार्यक्रममा काठमाडौंको टुँडिखेललाई मानव साङ्लोले घेर्नेलगायतका छन् ।

केन्द्रीय संघर्ष समितिले फागुन ५ देखि २१ गतेसम्म संघर्षका कार्यक्रम सार्वजनिक गरेको छ ।

यस्ता छन् आन्दोलनका कार्यक्रम :

–फागुन ५ देखि १२ सम्म जिल्ला कमिटीले आफ्नो तहमा कार्यक्रम गर्ने ।

–फागुन ६ गते मानव साङ्लोले काठमाडौंको टुँडिखेल घेराउ गर्ने।

–७ गते सबै वडामा कार्यक्रम

–८ गते राजनीतिक दल, नागरिक समाज र बौद्धिक समुदायसमेतको उपस्थितिमा बृहत् अन्तरक्रिया गर्ने ।

–९ गते महिलाा हिंसा, बलात्कारविरुद्ध देशव्यापी प्रदर्शन ।

– फागनुन १० गते काठमाडौं उपत्यकाका प्रत्येक जिल्लाका दलितद्वारा प्रदर्शन ।

–फागुन १४ गते काठमाडौंमा बृहत् युवा र्‍याली ।

–फागुन १२ गते चितवन र २१ गते दाङमा बृहत् विरोध कार्यक्रम ।

बुटवल । प्रचण्ड-माधव पक्षीय नेकपाका प्रभावशाली नेता घनश्याम भुसालका मुख्य सहयोगी मानिने रुपन्देहीको तिलोत्तमा नगरपालिकाका मेयर बासुदेव घिमिरे केपी ओली पक्षमा लागेका छन् ।

अर्थमन्त्री तथा नेकपा महासचिव विष्णु पौडेलसँगको पटक-पटकको छलफलपछि उनले आइतवारबाट घनश्याम भुसालको साथ छाडेका हुन् । भुसालको गृहनगर तिलोत्तमाका मेयर घिमिरे र उपमेयर जागेश्वरी चौधरी दुवैजना पार्टी विभाजनपछि प्रचण्ड-माधव पक्षमा थिए ।

शनिवारको बुटवलको जनसभामा भाग लिन पुगेका महासचिव पौडेलले आइतवार अपरान्ह मेयर घिमिरे र उपमेयर चौधरीको बीचमा बसेर ‘हामी सँगै थियौं र सँगै हुनेछौं’ भन्ने स्टाटससहितको फोटो फेसबुकमार्फत सार्वजनिक गरेपछि दुवै नेकपा पंक्तिमा खैलाबैला मच्चिएको थियो ।

घिमिरेनिकट स्रोतका अनुसार उनी र उपमेयरसहित नगरपालिकाका अधिकांश वडाध्यक्ष र सदस्यहरूले सल्लाह गरेर प्रचण्ड-माधव पक्ष परित्याग गर्ने निर्णय भएको हो । सो नगरपालिकामा तत्कालीन एमालेले जितेको थियो ।

पार्टी विभाजनपछि रुपन्देहीमा प्रचण्ड-माधव पक्षको अधिकांश बैठक र छलफलहरू घिमिरे नेतृत्व र उनकै होटलमा हुने गरेका थिए । त्यस्तै उपमेयर चौधरीलाई अ‍ोली पक्षले केन्द्रीय सदस्य मनोनीत गरे पनि अश्वीकार गरेकी थिइन् ।

आइतवार महासचिव बिष्णु पौडेललाई विदाइ गर्न मेयर उपमेयरसहित भैरहवा विमानस्थलमा पुगेका थिए ।

काठमाडौं । प्रतिनिधिसभा विघटनविरुद्ध दायर मुद्दाको संवैधानिक इजलासमा सुनुवाइको क्रममा आजदेखि जवाफी बहस शुरू भएको छ ।

रिटको विपक्षमा सरकारी वकिल र सभामुखको तर्फबाट शुक्रबारदेखि बहस सकिएपछि आइतबारदेखि रिट निवेदकका तर्फबाट जवाफी बहस शुरू भएको हो । त्यसपछि सर्वोच्च अदालतका अनुसार जवाफी बहसपछि एमिकस क्यूरीले सुझाव दिनेछ ।

एक साताभित्र यी सबै प्रक्रिया सकिएपछि फैसला आउनेछ ।

प्रधानमन्त्री ओलीको सिफारिसमा राष्ट्रपति विद्यादेवी भण्डारीले पुस ५ गते प्रतिनिधि सभा विघटन गरेपछि विघटनविरुद्ध सर्वोच्चमा १३ वटा रिट दर्ता भएका थिए ।

सबै रिटमाथि माघ ४ देखि बहस शुरू भएको थियो ।

बुटवल । नेपाली कांग्रेस माहाधिवेशन प्रतिनिधि तथा दाङ जिल्ला कमिटी सदस्य भेषराज खत्री केपी ओली नेतृत्वको नेकपामा प्रवेश गरेका छन् ।

लुम्बिनी प्रदेशका मुख्यमन्त्री तथा ओलीपक्षीय नेकपाका इन्चार्ज शंकर पोखरेलले खत्रीलाई आइतवार खादा लगाएर पार्टी प्रवेश गराएका हुन् ।

सोही अवसरमा नेकपा मालेको केन्द्रीय सदस्य लीला विक पनि माले परित्याग गरी नेकपामा प्रवेश गरेको नेकपा केन्द्रीय सदस्य शान्ता चौधरीले जानकारी दिइन् ।

पोखरेलले गृहजिल्ला दाङमा आफ्नो प्रभाव बढाउन पछिल्लो समय अन्य पार्टीका नेता कार्यकर्तासँग संवाद बढाएका छन् । पार्टी प्रवेश कार्यक्रममा ओलीपक्षीय नेकपाका केन्द्रीय सदस्य सुजिता शाक्य, शान्ता चौधरी, घोराही उपमहानगरपालिकाका मेयर नरुलाल चौधरीसमेत उपस्थित थिए ।

काठमाडौं । बालुवाटारको ललितानिवासस्थित सरकारी जग्गा व्यक्तिको नाममा लैजाने तत्कालीन मन्त्रिपरिषदको निर्णयका आधारमा  तत्कालीन प्रधानमन्त्री माधवकुमार नेपाललाई पनि मुद्दा चलाउन माग गर्दै परेको रिटमाथिको सुनुवाइका लागि आज पुनः पेसी तोकिएको छ ।

बालुवाटार जग्गा प्रकरणमा पूर्वप्रधानमन्त्री माधवकुमार नेपालको संलग्नता रहेको भए पनि अनुसन्धान गरी मुद्दा चलाउने विषयमा अख्तियार दुरुपयोग अनुसन्धान आयोगले उन्मुक्ति दिएको भन्दै उनीहरुलाई समेत विपक्षी बनाउन माग गर्दै सर्वोच्च अदालतमा परेको रिटको सुनुवाइ आज हुन लागेको हो ।

सर्वोच्च अदालतका न्यायाधीशहरु आनन्दमोहन भट्टराई र हरि फुयाँलको संयुक्त इजलासमा सो मुद्दाको सुनुवाइको लागि पेसी तोकिएको छ । वरिष्ठ अधिवक्ता बालकृष्ण न्यौपानेले अख्तियार दुरुपयोग अनुसन्धान आयोग काठमाडौं समेतलाई विपक्षी बनाई राजनीतिक नेतृत्वलाई बचाउने गरी आयोगले निर्णय गरी मुद्दा चलाएको भन्दै तत्कालीन प्रधानमन्त्रीलाई समेत मुद्दा चलाउन माग गरेर रिट दायर गरेका थिए ।

यसअघि पेसी तोकिए पनि हेर्न नभ्याइने भनेर सरेको मुद्दाको सुनुवाइका लागि आज पुनः पेसी तोकिएको हो ।

रुपन्देही । विभाजित नेकपा प्रचण्ड-माधव पक्षका नेता देव गुरुङले राजनीतिक दलको आपसी सहमतिबाट विघटित प्रतिनिधिसभालाई सक्रिय बनाउन सकिने तर्क गरेका छन् ।

शुक्रबार बुटवलमा आयोजित साक्षात्कार कार्यक्रममा बोल्दै गुरुङ्गले न्यायालयको प्रक्रियाबाट र राजनीतिक दलको आपसी सहमतिबाट विघटित प्रतिनिधिसभालाई सक्रिय बनाउन सकिने दाबी गर्दै २०५९ मा राजा ज्ञानेन्द्रद्वारा विघटित संसद राजनीतिक सहमतिमा २०६३ मा सक्रिय बनाइएको उदाहरण पेस गरे ।

प्रतिनिधिसभा विघटन गरेर प्रधानमन्त्रीले राष्ट्रघात र जनघात गरेको आरोप लगाउँदै नेता गुरुङ्गले सबै देशभक्त राजनीतिक दल, नागरिक समाज, मिडियालाई एक ठाउँमा उभिन आव्हान गरेका छन् ।

‘प्रतिगामी कदम नसच्चिएमा शैन्य शक्ति आकर्षित हुने र देशमा जनविद्रोह पनि हुन सक्छ’, गुरुङको दाबी छ । प्रतिनिधिसभा विघटनसँगै नेपाललाई क्रिडास्थल बनाउ विदेशी शक्तिकेन्द्रहरू चलमलाएको बताउँदै गुरुले वैशाखमा चुनाव हुन नसक्ने ठोकुवा गरे ।

रुपन्देही । ऊर्जामन्त्री एवं नेकपा ओली पक्षका नेता टोपबहादुर रायमाझीले नेकपाको अन्तरविरोध कुनै विचारसँग, नागरिकका मुद्दासँग नभई सीमित व्यक्तिको पदप्रतिष्ठासँग जोडिएको बताएका छन् ।

प्रेस संगठन लुम्बिनी प्रदेशस्तरीय भेलालाई शुक्रबार सम्बोधन गर्दै उनले भने, ‘आफ्नो पार्टीको प्रधानमन्त्री अपदस्त गरेर सत्तामा जान खोज्नेहरुलाई जनताले चिनेका छन्, विपक्षीका काँधमा चढेर प्रधानमन्त्रीलाई भरुवा बन्दुक देखाउनेहरूलाई केपी ओलीको एके ४७ ले सडकमा पुर्‍याएको छ, ओलीसँग स्वचालित हतियार छ भनेर हामीले धेरैपटक भनेका हौं ।’

विकास र समृद्धिको अभियान चाल्ने समयमा पार्टीका केही शीर्ष नेताहरुले पार्टी अध्यक्ष तथा प्रधानमन्त्री केपी ओलीविरुद्ध लागेर आफ्नो स्वार्थका लागि हिंडेको बताउँदै मन्त्री रायमाझीले अबको निकास नै निर्वाचन भएको दाबी गरे । जनमतबाट पत्तासाफ हुने डरले प्रचण्ड र माधव चुनावमा जान डराएको उनको टिप्पणी छ ।

‘नेपाली कांग्रेस र मधेसकेन्द्रित दलहरू चुनावका लागि तयार रहँदा सधैभर नागरिकलाई त्रास देखाएर सत्तामा जानेहरू चुनावबाट डराएका हुन्’,

मन्त्री रायमाझीले कानुनी सर्वोच्चता कायम राख्न, अहिलेको संरचनालाई जोगाईराख्न र राष्ट्रलाई बचाई राख्न जनमतमा जाने उचित निर्णय भएको दाबी गरेका छन् । संसद पुनःस्थापनाको माग राखेर आन्दोलन गरिरहेको पार्टीप्रति संकेत गर्दै उनले आन्दोलनरत पक्षलाई यथाशक्य आफ्नो गल्ती स्वीकार्दै जनमतमा जाने निर्णय स्वीकार गर्न आग्रह गरे ।

रायमाझीले प्रचण्डले ३३ वर्षसम्म मनोनीत अभ्यक्ष भएर पार्टी चलाएको प्रसंग कोठ्याउँदै आफू र बादललाई ओली समूहबाट आउनलागेको कुप्रचार गरेर भ्रमको खेती गरेको बताए । उनले भने, ‘ओली समूहबाट उता जाने कोही छैन, उताको ठूलो समूह आउने तयारीमा छ, पोखरीमा पहिरो जानेवाला छ ।’

काठमाडौं । प्रधानमन्त्री केपी शर्मा ओलीसँग नेपालका लागि थाईल्याण्डका राजदूत भोषित भोरासाफले शिष्टाचार भेट गरेका छन् ।

भेटका क्रममा राजदूत भोरासाफले थाइल्याण्ड र भैरहवा विमानस्थलबीच सीधा हवाई सम्बन्ध जोड्न सके नेपालमा थाई पर्यटकको आगमन बढाउन सकिनेतर्फ प्रधानमन्त्रीको ध्यानाकर्षण गराएका छन् ।

प्रधानमन्त्रीले दुई मुलुकबीच बौद्ध धर्ममार्फत जोडिएका साँस्कृतिक एवं जनस्तरको सम्बन्धलाई थप प्रगाढ बनाउन दुवैतर्फ रहेका बौद्ध तिर्थस्थलमा पर्यटक आवागमनलाई बढावा दिनुपर्नेमा जोड दिएका छन् । ओलीले कुटनीतिक सम्बन्ध जोडिएको ६२ वर्ष लामो भएपनि यी दुई देशबीच सम्बन्ध भने त्यसभन्दा लामो रहेको उल्लेख गरेका छन् । यस सम्बन्धलाई थप उचाई दिन नयाँ सम्भावनाहरु पहिल्याउनु पर्ने उनको धारणा छ ।

प्रधानमन्त्री र राजदूतबीच दुई मुलुकको लामो समयदेखि रहिआएको मैत्रीपूर्ण सम्बन्धलाई नयाँ गतिका साथ अघि बढाउने विषयमा समेत छलफल भएको छ ।

काठमाडौं । कञ्‍चनपुरका नेपाल कम्युनिष्ट पार्टीका केन्द्रीय सदस्यहरूले भारतसँगको सीमा नक्सा (स्ट्रीप म्याप) तयार गर्दा धेरै ठाउँमा नेपाली भूमि भारततर्फ परेकोले सच्याउँन प्रधानमन्त्री एवम् पार्टी अध्यक्ष केपी शर्मा ओलीसमक्ष माग गरेका छन् ।

शुक्रबार प्रधानमन्त्रीसँग भेटघाटको क्रममा कञ्चनपुरका नेताहरूले भारततर्फ जान सहज हुनेगरी सीमापार यातायात सञ्चालन गर्न पनि ध्यानाकर्षण गराएका छन् । प्रधानमन्त्रीसमक्ष कञ्‍चनपुरमा प्रस्तावित औद्योगिक क्षेत्रको शिलान्यास तत्काल गर्नुपर्ने, महाकाली करीडोरका लागि बजेट लगायतका सबै तयारी भए पनि वातावरण प्रभाव मूल्यांकन प्रतिवेदनको कारण भइरहेको ढिलाई अन्त्य गरिनुपर्ने, भीमदत्त विमानस्थल तत्काल सञ्चालनमा ल्याउनुपर्ने र महकालीको तटबन्ध निर्माण तत्काल थाल्नुपर्ने मागसमेत राखिएको छ ।

त्यस्तै पुनर्वास नगरलाई स्मार्ट सिटीको रूपमा विकास गर्ने र शुक्लाफाँटा वन्यजन्तु आरक्ष विस्तारका क्रममा विस्थापित दुई हजार ७६ परिवारको पुन:र्स्थापना गर्ने विषयमा पनि प्रधानमन्त्रीसँग छलफल भएको छ ।

प्रधानमन्त्रीसँगको भेटमा नेकपाका केन्द्रीय सदस्य एवं राष्ट्रिय सभा सदस्य इन्दु कडरिया विष्ट तथा केन्द्रीय सदस्यहरु राजेन्द्रसिंह रावल, रामचन्द्र नेपाल, खेम सुवेदी र नरबहादुर धामीलगायतका नेताहरू सहभागी थिए ।

काठमाडौं । बालुवाटारस्थित ललिता निवासको सरकारी जग्गा व्यक्तिको नाममा पारिएको प्रमाणसहित सरकारमार्फत छानबिन गराएका अधिवक्ता युवराज कोइरालाले त्यस्तै प्रकरणमा सभामुख अग्नि सापकोटामाथि मुद्दा चलाउन अख्तियारले खुट्टा कमाएको आरोप लगाएका छन् ।

शुक्रवार काठमाडौंमा आयोजित कार्यक्रममा अधिवक्ता कोइरालाले सुनसरीको धरानस्थित सर्दु जलाधार क्षेत्रको ३४८ बिघा सरकारी जग्गा सापकोटा वनमन्त्री भएको बेला व्यक्तिको नाममा गराएको दावी गरेका हुन् ।

कोइरालाले भने, ‘तत्कालीन सचिवले सर्दु जलाधार क्षेत्रको जग्गा सरकारको नाममा दाखा गर्नुपर्छ भनेर राय दिएका थिए । तर, मन्त्री सापकोटाले व्यक्तिको नाममा गर्नू भनेर तोक लगाए । आज ती व्यक्तिले दुईतिरको जग्गा भोगचलन गरिरहेका छन् । उच्चस्तरीय समितिले सो निर्णय भ्रष्टाचार हो भनेर मुद्दा चलाउन सिफारिस गरेपनि अख्तियारले खुट्टा कमाइरहेको छ ।’

सरकारी, सार्वजनिक एवं गुठी जग्गा संरक्षण संघर्ष समितिले देशभरका सरकारी, सार्वजनिक एवं गुठी जग्गा आफू मातहत ल्याएर संरक्षण गर्न सरकारलाई दबाब दिन आयोजित हस्ताक्षर कार्यक्रममा कोइरालाले मन्त्रिपरिषदले निर्णय गरेरै उच्चस्तरीय समितिको सिफारिस अनुसार मुद्दा चलाउन पठाए पनि अख्तियारले फाइल नखोलेको आरोप लगाए ।

ललिता निवास, बालुवाटारलगायतका सरकारी जग्गाजमिन सरकारले आफ्नै मातहतमा ल्याई भोगचलन गराउन दबाब दिँदै माघ २३ गतेदेखि हस्ताक्षर अभियान चलाइएको थियो । हस्ताक्षर अभियान शुक्रबार शान्तिबाटिकामा कोणसभा गरी समापन गरिएको हो ।

समितिले ललिता निवास बालुवाटारको सरकारी जग्गा, सुनसरी, धरानस्थित सर्दु जलाधारको ३४८ बिघा जग्गा नेपाल सरकारको नाममा कायम गरी सो जग्गा अपचलन गर्नेउपर कारबाहीको माग गरेको छ ।

त्यस्तै धोबीखोला बगेको साबिक नगर २५ (क) कित्ता नम्बर ५०५ को जग्गामा मोही लाग्ने गरी मन्त्रिपरिषद्‍बाट निर्णय गर्ने तत्कालीन प्रधानमन्त्रीउपर कारबाही गरी सो जग्गा सरकारको नाममा दर्ता गर्न माग गरेको छ ।

मालपोत कार्यालयले राजकुलो र बाटोमा समेत मोही कायम गर्ने गरेको निर्णयलाई सदर गर्ने न्यायाधीशलाई कारबाहीको लागि दबाब दिन अभियान चलाइएको संघर्ष समितिका महासचिव समेत रहेका कोइरालाले बताए ।