Author: Shyamkrishna Dahal

काठमाडौं । नेपाली सेनाले विषम परिस्थितिको अनुचित फाइदा उठाएर केही समूहले सर्वसाधारण नागरिक तथा सार्वजनिक सम्पत्ति समेतमा अत्यधिक क्षति पुऱ्याउने, लुटपाट एवम् आगजनी गर्ने कार्य भइरहेको भन्दै यस्ता गतिविधि नगर्न आग्रह गरेको छ ।

यस्ता गतिविधि नरोकिएको खण्डमा नेपाली सेनालगायत सम्पूर्ण सुरक्षा निकायहरु आफ्नो प्रमुख जिम्मेवारी नेपाल र नेपालीको सुरक्षाको लागि स्थिति नियन्त्रण आजै रात १० बजेबाट दृढ रहने भन्दै देशबासीलाई सघाउन अपील गरिएको छ ।

सोहीअनुसार नेपाली सेना लगायत अन्य सुरक्षा निकाय तैनाथ हुने सेनाको विज्ञप्तिमा उल्लेख छ ।

काठमाडौं । प्रधान सेनापति अशोकराज सिग्देलले अहिले राष्ट्रको नाममा सम्बोधन गरिरहेका छन् ।

कास्की  ।  जेन–जी प्रदर्शनकारीले कास्की कारागारबाट ९ सय बढी कैदीबन्दी निस्किएका छन् । दिउँसो कारागारको सुरक्षा व्यवस्था कडा बनाएको प्रहरी साँझ परेसँगै फर्किएको थियो । त्यसपछि जेन–जीका प्रदर्शनकारी कारागार प्रवेश गरेका थिए । त्यहाँबाट ९ सय बढी कैदीबन्दी निस्किएको प्रहरीले जनाएको छ ।
कास्की कारागारका अनुसार त्यहाँ ९८१ कैदीबन्दी थिए । जेन–जी प्रदर्शनकारीले कास्कीका अधिकांश सरकारी कार्यालयमा आगजनी गरेका छन् ।

त्यस्तै तुलसीपुर कारागारका एक सय २४ कैदी निस्किएका छन् ।बेलुकी पाँच बजेतिर कारागारको मूल गेटको पर्खाल तोडेर उनीहरू निस्किएका हुन् ।

कारागार भित्र हो–हल्ला गर्दै गेट तोड्न खोजेपछि सुरक्षार्थ खटिएका सुरक्षाकर्मीले हवाई फायर गरेपनि उनीहरू निस्किएको कारागार प्रमुख कारागारका प्रमुख गिरबहादुर सेजुवालले बताए ।

एउटा ब्लकमा बसेका कुल एक सय ७९ कैदी बन्दी मध्य एक सय २४ जना जेल तोडेर भागेपनि थप ५५ जना भने आफूहरू नजाने भन्दै कारागार भित्रै बसेको कारागार प्रमुख सेजुवालले बताए ।

काठमाडौं । त्रिभुवन अन्तर्राष्ट्रिय विमानस्थलमा प्रवेश गर्न खोजेका जेनजी आन्दोलनकारीलाई नेपाली सेनाले फर्काइदिएको छ । विमानस्थल प्रवेश गर्न खोजेका जेनजीका २/३ जना प्रतिनिधिलाई सेनाले भिआईपी कक्षमा लगेर देखाइदिएपछि उनीहरू फर्किएका हुन् ।

अहिले अवस्था नियन्त्रणमा रहेको छ ।  नेताहरू विदेशिन लागेको हुनसक्ने आशंकामा आन्दोलनकारी प्रवेश गर्न खोजेका थिए । तर, सेनाले भीआईपीहरू नलुकेको देखाइदिएपछि फर्किएका हुन् ।

काठमाडौं । प्रधान सेनापति अशोकराज सिग्देलले राष्ट्रको नाममा सम्बोधन गर्दैछन् ।

साँझ ७ बजे उनले सम्बोधन गर्दै तयारी छ ।

सेनाले यसअघि सार्वजनिक अपिलमार्फत विद्यमान परिस्थितिलाई थप जटिल हुन नदिन सामाजिक सद्भाव तथा राष्ट्रिय एकतालाई कायम राख्दै संयमित हुन नेपाली सेना सम्पूर्ण युवा जनशक्ति र देशवासीमा अनुरोध गरेको थियो ।

काठमाडौं । राष्ट्रपति रामचन्द्र पौडेलले विषम परिस्थितिको शान्तिपूर्ण समाधानका लागि आन्दोलनकारी नागरिकलगायत सबैलाई सहयोग गर्न आग्रह गरेका छन् ।

प्रधानमन्त्री केपी शर्मा ओलीको राजीनामा स्वीकृति भइसकेकाले अहिलेको विषम परिस्थितिबाट मुलुक, जनता र लोकतन्त्रलाई माया गर्दै समस्या समाधानका लागि सबै पक्षको सहयोग पाउनेमा विश्वास व्यक्त गरेका छन् ।

राष्ट्रपति पौडेलले लोकतन्त्रमा नागरिकले उठाएका मागहरू जेनजीका प्रतिनिधिसमेत बसी वार्ता र संवाद मार्फत समाधान गर्न सकिने भएकाले संयमित हुन र वार्तामा आउन सबै पक्षलाई अपिल गरेका छन् ।

काठमाडौं । नेपाली सेनाले नेपालको स्वतन्त्रता, सार्वभौमसत्ता, भौगोलिक अखण्डता, स्वाधीनता, राष्ट्रिय एकताको रक्षा र नेपाली जनताको जिउधनको सुरक्षार्थ विषम परिस्थितिमा पनि नेपाली सेना प्रतिबद्ध रही आएको बताएको छ ।

सार्वजनिक अनुरोधमार्फ्त सेनाले नेपालमा हाल भइरहेको “जेनजी” आन्दोलनका विकसित घटनाक्रमहरु बारे विश्लेषण गरिरहेको जनाएको छ ।

जनधनको अपूरणीय क्षतिप्रति दुःख प्रकट गर्दै मृतक प्रति श्रद्धातञ्जली, शोक सन्तप्त परिवारजनमा समवेदना र सहानुभूति सँगै घाइतेको स्वास्थ्य लाभको कामना गरेको छ ।

‘नेपाल र नेपाली जनताको हित र सुरक्षामा सदैव समर्पित नेपाली सेनाले हाल विकसित अवस्थालाई मध्यनजर गर्दै नेपाल र नेपाली जनताको जिउधनको रक्षा गर्न प्रतिबद्ध रहेको छ । यस विषम परिस्थितिमा देशको ऐतिहासिक, सांस्कृतिक, पुरातात्त्विक र राष्ट्रिय सम्पत्तिको संरक्षण गर्नु हामी सबैको साझा दायित्व हो । तसर्थ, विद्यमान परिस्थितिलाई थप जटिल हुन नदिन सामाजिक सद्भाव तथा राष्ट्रिय एकतालाई कायम राख्दै संयमित हुन नेपाली सेना सम्पूर्ण युवा जनशक्ति र देशवासीमा हार्दिक अनुरोध गर्दछ’, सेनाले भनेको छ ।

काठमाडौं । नेपाल विद्युत प्राधिकरणका पूर्वकार्यकारी निर्देशक कुलमान घिसिङले जनजीसहित सबै नेपाली नागरिकहरु संयमित हुने समय आएको बताएका छन् । प्रधानमन्त्रीले राजीनामा दिइसकेको अवस्थामा निजी तथा सार्वजनिक सम्पत्ति तोडफोड नगर्न उनको अपिल छ ।

सामाजिक सञ्जालमा पोस्ट गरेको अपिलमा घिसिङले सरकारको गलत रबैया, गैरजिम्मेवारीपन र असंवेदनशीलताका कारण उत्पन्न परिस्थितिप्रति दुख व्यक्त गरेका छन् ।

उनले लेखेका छन्, ‘जेन जीको विरोध प्रदर्शन र त्यसपछि विकसित घटनाक्रम पछि प्रधानमन्त्रीले राजीनामा दिइसकेको अवस्थामा निजी तथा सार्वजनिक सम्पति तोडफोड नगर्न सम्पूर्ण आन्दोलनरत पक्षलाई अनुरोध गर्दछु । सार्वजनिक सम्पति तपाईं हाम्रै करबाट निर्माण भएको र पुनःनिर्माणमा पनि हाम्रै पैसा खर्च हुने हुँदा यसतर्फ ध्यान दिई संयमित बन्न अनुरोध गर्दछु । अबको मार्गदर्शन भनेकै संयमता, परिपक्वता र दीर्घकालीन सुधारको दिशामा उन्मुख हुनु हो ।’

जेन जीसहित अन्तरिम चुनावी सरकार गठन गरेर मध्यावधि निर्वाचन घोषणा गर्दै राष्ट्रलाई विद्यामान संकटबाट निकास दिन आवश्यक रहेकोमा घिसिङको जोड छ ।

काठमाडौं । डाक्टर सन्दूक रुइतले आन्दोलनरत जेनजीहरुलाई संयमित हुन आग्रह गरेका छन् ।

असहिष्णु भ्रष्ट राजनीतिक नेतृत्व पछि हटेकाले सार्वजनिक सम्पत्तिमाथि आगजनी र नष्ट नगर्न उनले अपील गरेका हुन् ।

अब देश निर्माणमा एकजुट हुनुपर्ने उनको भनाइ छ ।

उनले भनेका छन्, ‘सार्वजनिक सम्पत्तिको संरक्षण गर्नु हरेक नागरिकको पहिलो दायित्व हो। तसर्थ सार्वजनिक सम्पत्तिको नोक्सानी नगरौँ र गर्न नदिऔँ । संयम बनौँ ।’

काठमाडौं । देशको संघीय राजधानी काठमाडौं जेनजी आन्दोलनकारीको नियन्त्रणमा पुगेको छ । सडकदेखि सरकारी भवनहरुमासमेत उनीहरुले कब्जा गरेका छन् ।
हिजो सुरु भएको जेनजी आन्दोलनमा १९ जना प्रहरीको मारिएपछि आज आन्दोलनले उग्ररुप लिएको हो । काठमाडौंका ठाउँ ठाउँमा आन्दोलनकारीहरु भेला भएर नारा जुलुस, आगजनी र तोडफोड गरेका छन् । नेताहरुको निवास र सरकारी भवनहरु निशानामा परेका छन् ।

आन्दोलनकारीहरुले नेताका घर, सरकारी कार्यालय, प्रहरी बिट हुँदै अहिले उद्योग प्रतिष्ठानहरुमा समेत आक्रमण सुरु गरेका छन् । देशको प्रमुख प्रशासनिक निकाय सिंहदरबार पूर्णरुपमा आन्दोलनकारीको नियन्त्रणमा छ । आन्दोलनकारीले सिंहदरबारका भवनहरुमा यत्रतत्र आगजनी गरिरहेका छन् ।

नयाँ वानेश्वरस्थित संसद भवन आगजनीमा ध्वस्त बनेको छ । राष्ट्रपति भवन शीतलनिवास र प्रधानमन्त्री निवास बालुवाटारभित्र पनि आन्दोलनकारीले आगो लगाइदिएका छन् । सर्वोच्च अदालत, काठमाडौं जिल्ला अदालत, सरकारी वकिलको कार्यालयमा पनि आगजनी भइरहेको छ ।

प्रधानमन्त्री केपी शर्मा ओली, कांग्रेस सभापति शेरबहादुर देउवा र माओवादी अध्यक्ष पुष्पकमल दाहाल प्रचण्डको घरमा तोडफोड र आगजनी भएको छ । देउवा र उनकी पत्नी आरजुमाथि कुटपिटसमेत गरिएको छ । पूर्वराष्ट्रपति भण्डारीको घरभित्र पनि आगजनी भएको छ ।

आन्दोलनकारीहरुले आगजनी र तोडफोड गर्दा प्रहरीले कुनै पनि हस्तक्षेप गर्न सकेका छैनन् । अधिकांस स्थानमा प्रहरीले लाचार भएर टुलुटुलु हेरिरहेको देख्नन सकिन्छ ।
काठमाडौंका सडकमा यत्रतत्र आन्दोलनकारीहरुको भिड छ । सुरक्षाकर्मीहरुको उपस्थिति देखिन्न । हिजो अत्यधिक बल प्रयोग गरेकोप्रति आलोचित भएका सुरक्षाकर्मी आज आत्मसमर्पणको स्थितिमा छन् ।

जनतासुकै आगजनी हुँदा काठमाडौंको आकाश धुवाँमय भएको छ । दैनिक जनजीवन ठप्प बनेको छ । काठमाडौंवासीहरु कोही आन्दोलन गर्न त कोही रमिता हेर्न घरबाहिर निस्किएका छन् । आगजनी गर्नेहरुमा भने अधिकांस जेनजी पुस्ताका युवायुवती देखिन्छन् ।

काठमाडौं । जेनजी आन्दोलनकारीहरू त्रिभुवन अन्तर्राष्ट्रिय विमानस्थलभित्र छिर्ने प्रयासमा लागेका छन् ।

आन्दोलनकारीको एउटा समूह विमानस्थलको गोल्डेनगेटबाट प्रवेश गरेको हो । उनीहरूलाई रोक्ने प्रयास भइरहेको सुरक्षा स्रोतले बतायो ।

सेनाको सुरक्षा तोडेर उनीहरूभित्र प्रवेश गर्ने कोशीस गरेका छन् । विमानस्थल भने बिहानैदेखि बन्द गरिएको छ ।

काठमाडौं । काठमाडौं महानगरपालिकाका मेयर बालेन साहले आन्दोलनरत जेनजीलाई घर फर्किन पुन: आग्रह गरेका छन् ।

अब देश जेनजीले नै बनाउने भन्दै उनले क्षति हुँदा तपाईँ हाम्रै हुने भन्दै फर्किन अपील गरेका हुन्।

उनले भनेका छन्, ‘देश तपाइँहरुकै हातमा हो । तपाईं हरूले नै बनाउने हो । अब जति क्षति हुन्छ तपाईं हाम्रो नै हुने हो । अब घर फ़र्कनुहोस् ।’

काठमाडौं । जेनजी आन्दोलनले सार्वजनिक सम्पत्तिमा क्षति नपुर्‍याउन भन्दै अपील जारी गरेको छ । आन्दोलनको परिणामस्वरूप सरकारले घुँडा टेकिसकेको हुँदा परिस्थितिले नयाँ राजनीतिक निकासको बाटो खोलेको अपीलमा उल्लेख छ ।

सार्वजनिक अपीलमा भनिएको छ, ‘अब यो देश हाम्रो नेतृत्वमा आएको छ, सार्वजनिक सम्पत्ति हामी सबैको सम्पत्ति हो । त्यसैले आन्दोलनमा संलग्न साथीहरुलाई संयमित रहन र सार्वजनिक सम्पत्तिमा क्षति नपुर्‍याउन हार्दिक अनुरोध गर्दछौं ।’

नागरिक सरकार र नयाँ राजनीतिक मार्गनिर्देशनको तयारी भइरहेको पनि अपीलमा उल्लेख गरिएको छ ।

‘हाम्रो न्यूनतम अडान सर्वस्वीकार्य व्यक्तिको नेतृत्वमा नागरिक सरकारको गठन र नयाँ निर्वाचनमा जानु हो । यसैमार्फत हामी हाम्रो सुरक्षित भविष्य भएको नेपाल बनाउन सक्छौं ।’

काठमाडौं । महाराजगञ्जस्थित राष्ट्रपति कार्यालय भवनमा आन्दोलनकारीले आगजनी गरेका छन् ।

जेनजीको आव्हानमा भएको आन्दोलनको दोस्रो दिन आज उनीहरूले नेता, पार्टी कार्यालय र प्रमुख प्रशासनिक केन्द्रलाई निशाना बनाएका छन् । यसैक्रममा महाराजगञ्जस्थित शीतल निवास छिरेका प्रदर्शनकारीले तोडफोड र आगजनी गरेका हुन् ।

काठमाडौं । जेनजी आन्दोलनका एक अगुवा अभिजित अधिकारीले अब नागरिक अगुवासहितको सर्वपक्षीय सरकार गठन गर्नुपर्ने पक्षमा आफूहरू रहेको बताएका छन् ।

अहिलेको संसदीय व्यवस्था हटाउने पक्षमा आफूहरू नरहेको भन्दै अबको सरकारमा राजनीतिक दलको पनि प्रतिनिधित्व हुनसक्ने बताए । उनले सरकारको नेतृत्व सुशीला कार्की,कल्याण श्रेष्ठ जस्ता पूर्व प्रधान न्यायाधीश,डा।सन्तुक रुइत वा कसैले गर्न सक्ने नेपाल प्रेससँग बताए ।

नेपाल प्रेससँग आन्दोलनका अगुवा अभिजित अधिकारीले गरेको कुराकानी यस्तो छ–

जेनजी अहिले राजनीतिक दलका नेताहरू डिसक्रेडिट भइसक्नुभएको छ । उहाँहरूको औचित्य समाप्त भइसकेको छ । त्यसैले अब बन्ने सरकार चाहिँ सबै पक्षलाई समेटेर गठन हुनुपर्छ भन्ने हाम्रो माग हो । त्यसमा नागरिक समाजका अगुवाहरू समेटिन सक्नुहुन्छ । त्यस्तै राजनीतिक दलको पनि प्रतिनिधित्व हुनसक्छ । अहिलेको संसदीय व्यवस्थालाई हटाउने पक्षमा हामी छैनौँ । यही व्यवस्थामा रहेर नागरिक सरकार गठन होस् भन्ने हाम्रो चाहना हो । त्यो नागरिक सरकारको नेतृत्व पूर्वप्रधानन्यायाधीश सुशीला कार्की, कल्याण श्रेष्ठ लगायतले गर्न सक्नुहुन्छ ।
यो सरकारको नेतृत्व सन्दुक रुइतजस्ता व्यक्तिले समेत गर्न सक्नुहुन्छ । तर, बङ्गलादेशमा मोहम्मत युनुसजस्ता व्यक्तिलाई सरकारको नेतृत्व दिँदा अहिलेसम्म चुनाव गराउन सक्नुभएको छैन । त्यसैले हामीले चाहेको नागरिक सरकारको नेतृत्व प्रशासन र यो व्यवस्थालाई राम्रोसँग बुझेको व्यक्तिले गरोस् भन्ने हो । अनि त्यो सरकारले फ्रेस इलेक्सन गरोस् । तर, सेनाले टेकओभर गर्नुभएन । सेनाको नेतृत्वमा हामी निर्वाचनमा जान तयार छैनौँ । त्यसो भयो भने फेरि आन्दोलन सुरु हुन्छ । सेनाले सहजीकरण चाहिँ गरिदिन सक्छ । हाम्रो तर्फबाट कसले नेतृत्व गरेर जाने भनेर हामीले निर्णय गरिसकेका छैनौँ । नागरिक सरकारले हामीलाई एड्भाइजरी जसरी राख्नुभयो भने त्यो बेटर हो । हामीलाई राजनीतिमा रुचि पनि छैन । तर, अब नागरिक सरकारले फ्रेस इलेक्सन गर्नुपर्छ । बाँकी कुरा इलेक्सनमै छिनोफानो हुन्छ ।

अभीजित अधिकारी,

जेन जी आन्दोलनको अभियन्ता

काठमाडौं । काठमाडौं महानगरपालिकाका मेयर बालेन साहले आन्दोलनकारीलाई अब हिंसा र तोडफोड रोक्न र सार्वजनिक सम्पत्ति जोगाउन अपिल गरेका छन् ।

उनले अब जेनजी पुस्ताले देशको नेतृत्व गर्ने र सेना प्रमुखसँग वार्ता गर्न तयार रहन भन्दै त्यसअघि संसद विघटन अनिवार्य भनेका छन् ।