Author: Anisha Tiwari

काठमाडौं । भूकम्पमा परि घाइते भएकाको उद्धार, निशुल्क तथा प्रभावकारी उपचार गर्न, राहत एवम् खोजी कार्यमा जुट्न राष्ट्रिय मानव अधिकार आयोगले सबै सरोकारवाला निकायलाई आग्रह गरेको छ । आयोगले शनिबार एक प्रेस विज्ञप्ती जारी गर्दै नेपाल सरकार, राजनीतिक दल लगायत सम्बद्ध सबै पक्षलाई यस्तो आग्रह गरेको हो ।

शुक्रबार राति भूकम्पका कारण जाजरकोट र रुकुम पश्चिममा भएको मानवीय तथा भौतिक क्षतिप्रति राष्ट्रिय मानव अधिकार आयोग गहिरो दुःख व्यक्त गरेको आयोगका सहसचिव एवम प्रवक्ता डा.टीकाराम पोखरेलले जारी गरेको विज्ञप्तीमा भनिएको छ । विज्ञप्तीमा भनिएको छ, ‘भूकम्पमा परि ज्यान गुमाएका व्यक्तिप्रति आयोगले श्रद्धाञ्जली व्यक्त गर्दै शोक सन्तप्त परिवारजनमा हार्दिक समवेदना प्रकट गरेको छ । साथै, घाइतेको शीघ्र स्वास्थ्य लाभको कामना पनि गरेको छ ।’

आयोगको कर्णाली प्रदेश कार्यालयको टोली भूकम्प प्रभावितको मानव अधिकार अवस्थाबारे अनुगमन गर्न शनिबार नै भूकम्प प्रभावित स्थलतर्फ प्रस्थान गरिसकेको आयोगले विज्ञप्ती मार्फत जानकारी गराउदैँ आयोगले घटनाबारे विभिन्न माध्यमबाट अनुगमन गरिरहेको जनाएको छ ।

डोटी । शुक्रबार राति गएको भूकम्पबाट प्रभावितहरुका लागि डोटीको बोगटान फुड्सिल गाउँपालिकाले राहत स्वरूप दुई लाख रुपैयाँ सहयोग गर्ने घोषणा गरेको छ । शनिबार गाउँपालिकाका अध्यक्ष कमलबहादुर गडसिलाद्वा विज्ञप्ति जारी गर्दै सहयोगको घोषणा गरिएको हो ।

जाजरकोटको बारेकोट गाउँपालिका वडा न. १ रामीडाडाँ केन्द्रबिन्दु भएर गएको ६.४ रेक्टर स्केलको भूकम्पका कारण जाजरकोट र रुकुम पश्चिम लगायतको क्षेत्रमा ठुलो मात्रमा जनधनको क्षति भएको घटनाप्रति पालिकाले दुःख व्यक्त गरेको छ ।

अध्यक्ष गडसिलाद्धारा जारी विज्ञप्तिमा भनिएको छ ‘दुःखको यस घडीमा हाम्रो पालिकाबाट सद्भाव स्वरूप तत्काल राहतका लागी जाजरकोट र रुकुम पश्चिम जिल्ला विपद् व्यवस्थापन समितिको राहत कोषमा एक/एक लाख गरी दुई लाख रुपैयाँ उपलब्ध गराउने निर्णय गरेका छौँ ।’

भूकम्पबाट प्रभावितहरूलाई सुरक्षित स्थलतर्फ तत्काल स्थानान्तरण गर्न र भूकम्पमा परी पुरिएकाहरूको खोज उद्धार र घाइतेहरूको उपचार तथा राहत कार्यमा सक्रियताका साथ लाग्न गाउँपालिकाले सबैसँग अपिल गरेको छ ।

पोखरा । बागलुङमा कर्णाली प्रदेशका सभामुख र उपसभामुख चढेको स्कारपीओले मोटरसाइकललाई ठक्कर दिँदा एकजना घाइते भएका छन् ।

बागलुङ ढोरपाटन नगरपालिका २ मल्कटिबाङमा भिमगिठे बागलुङबाट बुर्तिबाङतर्फ आउँदै गरेको कर्णाली प्रदेश २-००-१झ ००९३ नं. को स्कारपीओले ग११प ८१५७ नं. को मोटरसाइकललाई ठक्कर दिँदा १ जना घाइते भएको जिल्ला प्रहरी कार्यालय बागलुङले जनाएको छ ।

स्कारपीओमा सवार सबै जना सकुशल रहेको र मोटरसाइकल चालक निसीखोला गाउपालिका २ तल्लो ब्याङग्रीका १८ वर्षीय बिमल खत्री घाइते भएको बागलुङ प्रहरीका प्रहरी जवान प्रकाश पौडेलले जानकारी दिए ।
खत्रीको मुलद्धारमा चोट रहेको उपचारको लागी प्राथामिक स्वास्थ्य केन्द्र बुर्तिबाङ पठाईएको प्रहरी जवान पौडेलले बताए ।

रूपन्देही । भूकम्प प्रभावित क्षेत्रमा उद्दार र स्वास्थ्य उपचारमा सहयोग पुर्याउन लुम्बिनी प्रदेश सरकारको टोली हिँडेको छ ।

लुम्बिनीका मुख्यमन्त्री डिल्लीबहादुर चौधरी र कर्णाली प्रदेश सरकारका मुख्यमन्त्रीसँगको समन्वयमा दाङबाट राप्ती प्रादेशिक अस्पताल तुल्सीपुरका मेसु डा पदमराज अधिकारीको नेतृत्वमा स्वास्थ्यकर्मी र विशेषज्ञ चिकित्सक सहितको टोली भुकम्प प्रभावित क्षेत्र जाजरकोट र रुकुमका लागि हिँडेको हो ।

प्रदेश सरकारको तर्फबाट प्रदेशका गृहमन्त्री सन्तोषकुमार पान्डेयको नेतृत्वमा उद्दार टोली जान लागेको मुख्यमन्त्रीको सचिवालयले जनाएको छ ।

रुपन्देही । सीमामा नियमन र अनुगमन बढाउन बुटवल उद्योग वाणिज्य संघ रुपन्देहीले भैरहवा भन्सार कार्यालयसहित स्थानीय प्रशासनलाई ध्यानाकर्षण गराएको छ । हालै निर्वाचित पदाधिकारी तथा कार्यसमितिको टोलीले शुक्रबार भैरहवा भन्सार कार्यालय, प्रमुख जिल्ला अधिकारी र सुरक्षा निकायका प्रमुखलाई ध्यानाकर्षण गराउँदै उद्योग व्यवसाय बचाइदिने वातावरण बनाउन माग गरे । नेपाली उपभोक्ताले घरायसी प्रयोजनका नाममा बिना भन्सार सामान भित्राउँदा स्वदेशी बजार धराशयी भएको भन्दै उनीहरुले भन्सार कडाई नियमित र निरन्तर गर्न माग गरे ।

संघका उद्योग उपाध्यक्ष सुरज भट्टराई नेतृत्वमा आएको टोलीले भैरहवा भन्सार कार्यालय प्रमुख नारद गौतम, प्रमुख जिल्ला अधिकारी, सशस्त्र प्रहरी उपरीक्षक दिपककुमार थापा र जिल्ला प्रहरी कार्यालय रुपन्देहीका प्रमुखलाई ज्ञापनपत्र बुझाउँदै सिमानाका कडाईलाई यथावत राख्न आग्रह गरे । उनले जेठ १८ गतेदेखि भन्सार नाकामा भएको कडाईका कारण स्थानीय उद्योग व्यवसायमा सकारात्म प्रभाव परेकोले सीमामा नियमन र अनुगमनलाई निरन्तरता दिदै नेपाली उद्योगी व्यवसायीलाई संरक्षण गर्नुपर्ने बताए ।

भन्सारले सिमानाका कडाई गर्ने नीति लिएसँगै नेपाली बजारमा व्यापार बिस्तार, स्थानीय उत्पादनको प्रवद्र्धन र राजश्व असुलीमा समेत बढोत्तरी भएको तथ्याङक छ, दशैं तिहारको समयमा नाकामा केही खुकुलो परिएको भन्ने सूचना अनौपचारिक रुपमा आएकोले भन्सार नाकामा कडाई यथावत गर्नुपर्ने उपाध्यक्ष भट्टराईको माग छ ।

भन्सार जाँचपासका ढिलाई, सर्भर डाउन, डिटेन्सन शुल्क, एजेन्ट मार्फत काम गराउनु पर्ने बाध्यत्मक व्यवस्थाका कारण उद्योगी व्यवसायी मर्कामा परेको भन्दै छिटै विग्रने कच्चा पदार्थको भन्सार प्रक्रिया फास्ट ट्रयाकमा गर्ने वातावरण मिलाउन समेत संघले आग्रह गरको छ ।

संघका वाणिज्य उपाध्यक्ष विमलराज भटराईले भन्सार क्षेत्रलाई थप व्यवस्थापन थप व्यवस्थित गर्नु पर्ने, हामोर्निक कोडमा एकरुपता, भारतिय जिएसटी बिलको आधारमा मुल्याङकन नहुँदा उद्योगी व्यवसायीहरु भन्सारमा सास्ती खेपेको उदाहरणहरु रहेकोले कार्यालयबाट हुने व्यवस्था कार्यालयबाटै गरिदिन र नहुने कुराहरु विभाग मन्त्रालय वा सरोकारवाला निकायमा पहल गरिदिन आग्रह गरे ।

सरकारले एकातर्फ भन्सार राजश्वलाई आम्दानीको स्रोत मानेको छ भने अर्कोतर्फ कमजोर भन्सार नियमन र खुल्ला सीमाबाट नेपालको कुल ग्राहस्थ उत्पादनको एक तिहाई बराबरको चोरी निकासी हुने गरेको संघको ज्ञापन पत्रमा उल्लेख छ । स्थानीय व्यवसाय तथा उत्पादनलाई टेवा दिन विगत लामो समय देखि भन्सार तथा खुल्ला सीमा नियमनको सन्दर्भमा संज्ञ निरन्तर पहल तथा पैरवी गर्दै आएको छ । खुद्रा उपभोग्य बस्तुमा समेत भन्सार महशुल लिने कार्यको थालनी भएको कारण स्थानीय व्यवसायमा सकारात्मक असर देखिएको सम्बद्ध निकायलाई संघले आभार व्यक्त गर्दै दशै तिहारजस्ता महत्वपूर्ण चाडपर्वको नाममा राजनैतिक तहबाट नै भन्सार खुकुलो पार्नुपर्ने धारणा तथा अभिव्यक्तिप्रति संघको गम्भीर ध्यानाकर्षण भएको छ । देशको अर्थतन्त्र दरिलो पार्न भन्सार तथा खुल्ला सिमा नियन्त्रण थप कडाईमा जानुपर्ने नीतिको विपरीत वर्तमान भन्सार कडाईको व्यवस्थालाई रोक्ने प्रयासप्रति स्थानीय उद्योगी व्यवासायीहरुको हितमा नरहेको बताए ।

नेपालको कुल ग्राहस्थ उत्पादनको ९० प्रतिशत र कुल रोजगारीको ८० प्रतिशत योग्दान निजी क्षेत्रको रहे पनि वेवास्ता गरिएमा अर्थव्यवस्थामा दीर्घकालीन नाकारात्मक असर पर्ने भन्दै संघले राष्ट्र हितको कार्यलाई निरन्तरता दिँदै उत्पादन तथा व्यवसायको प्रवद्र्धनमार्फत राजश्व अभिबृद्धिको लक्ष्य प्राप्तिको लागि हालको भन्सार नियमनलाई कडाई गर्दै सीमामा अनुगमन तथा निगरानी बढाउन अनुरोध गरेको छ । भन्सार नाका तथा सीमा नियमन पुर्ववत यथावत कडाई गरी भन्सार तथा राजश्व असुली समेत अपेक्षा गरिएअनुसार हुन नसक्ने हुदा व्यवसायिक सुरक्षा र राजश्व अभिबृद्धिमा संघको सहयोग र साथ हुने अध्यक्ष हरि प्रसाद अर्यालद्वारा जारी ज्ञापनपत्रमा उल्लेख छ ।
भन्सार कार्यालय प्रमुख नारद गौतमले चाडपर्वको वा कसैले भनसुनको नाममा भन्सार कार्यालयले कुनै पनि प्रकारको छुट नगर्ने बताउँदै भन्सार ऐन, कानुन अनुसारको मापदण्डमा रहेर काम गर्नेमा कार्यालय प्रतिबद्ध रहेको बताए । उनले अवैध काम गर्ने कही केही सूचना दिन माग गर्दै अवैध काम गर्नेमा छापा हान्ने प्रतिबद्धता जनाए ।

पूर्वाधारको कारण भन्सारको काममा केही ढिलाई भएको पाएका छौ । भएको जनशक्तिलाई शनिबार पनि उपयोग गरी कार्यालयले नियमित कार्य सम्पादन गरिरहेको छ । हामीले उद्योगलाई प्राथमिकतामा नै राखेर काम गर्ने गरेका छौं, उनले भने । सुरक्षा निकायमा प्रमुखहरुले सीमा क्षेत्रमा निगरानी बढाइएको र अवैध ओसारपसार न्यूनीकरणमा लागिरहेको उनले बताए ।

विराटनगर । जलवायु परिवर्तनले पारिरहेको प्रभावका बारेमा सबैलाई जानकारी दिने उद्देश्यले प्रकृति जोगाऔँ अर्को पुस्तालाई पनि हिमाल देखाँउ अभियान सम्पन्न भएको छ ।

राष्ट्रिय जनसांस्कृतिक महासङ्घ जिल्ला कमिटी ताप्लेजुङको आयोजनामा कञ्चनजङ्घा बेसक्याममा कार्यक्रम समापन गरिएको हो । जलवायु परिवर्तनको असरका बारेमा ध्यानाकर्षण गराउन ४८ सय मिटर उचाइमा रहेको कञ्चनजङ्घा बेसक्याम्पमा कार्यक्रमको आयोजना गरिएको महासङ्घका ताप्लेजुङ अध्यक्ष हेमराज निरौलाले बताए ।

कार्यक्रममा सहभागी हुन नेकपा एमाले पोलिटब्युरो सदस्य तथा कोशी प्रदेशका पूर्वमन्त्री तिलकुमार मेन्याङ्वो नेकपा एमाले ताप्लेजुङ उपसचिव तथा आठराई त्रिवेणी गाउँपालिका ताप्लेजुङका अध्यक्ष दिपेन पोमुसमेत बेसक्याम्पमा पुगेका थिए ।

समापन कार्यक्रममा मेन्याङ्वोले जलवायु परिवर्तनले हिमालमा पारेको असर प्रति चिन्तित भएको बताए । उनले आफ्नो तहबाट जलवायु परिवर्तनको असर सम्बन्धमा पहल गर्ने बताए ।

कञ्चनजङ्घा आधार शिविर पर्यटकीय दृष्टिले महत्त्वपूर्ण भएकाले कंचनजङ्गा क्षेत्रमा पूर्वाधार र टेलिफोनको लागि विशेष पहल गर्ने बताए । आठराई त्रिवेणी गाउँपालिका अध्यक्ष समेत रहेका दिपेन पोमुले जलवायु परिवर्तनका कारण कञ्चनजङ्घा हिमालमा हिउँ कम पर्न थालेको बताए । उनले सबैको हातेमालोमा मात्रै हिमाल जोगाउन सकिने र अर्को पुस्तालाई हिमाल देखाउन सकिने बताए ।

सांस्कृतिक महासङ्घ ताप्लेजुङका अध्यक्ष हेमराज निरौलाले महासङ्घले जलवायु परिवर्तन रोक्नका लागि सास्कृतीक अभियान सञ्चालन गरिरहेको बताए ।