Author: Anisha Tiwari

काठमाडौं । नेपाल चेम्बर अफ कमर्सले कोसोभो देशसँग व्यापारिक साझेदारीको प्रस्ताव गरेको छ ।

मंगलबार बंगलादेशका लागि कोसोभोका राजदूत गुनेर उरेयासंग भेटबार्तामा चेम्बरका अध्यक्ष राजेन्द्र मल्लले व्यापार एवं लगानीका लागि प्रस्ताव गरेका हुन् । कोसोभोमा नेपालको कुटनीतिक सम्वन्ध स्थापना नभएपनि व्यापार र लगानीको सम्भावना भएका क्षेत्रमा सहकार्यका लागि राजदूत उरेयासंग अध्यक्ष मल्लले आग्रह गरेका छन् ।

‘दुवै देशको चेम्बर अफ कमर्सबीच सहकार्य गरेर व्यापार एवं संयुक्त लगानीको सम्भावना भएका क्षेत्रमा सहकार्यका लागि प्रस्ताव गर्दछु’, अध्यक्ष मल्लले भने । नेपालको जलविद्युत, पर्यटन एवं सूचना प्रविधिको क्षेत्रका लगानी गर्न अध्यक्ष मल्लले राजदूत उरेयासँग आग्रह समेत गरे । नेपालमा लगानीको प्रतिफल सुनिश्चित गर्नका लागि चेम्बरले पहल गर्ने अध्यक्ष मल्लको भनाइ छ ।

भेटवार्ताका क्रममा राजदूत उरेयाले हिमालयको देश नेपालबाट आफु निकै प्रभावित भएको बताए । उनले दुई मुलुकबीच व्यापार सहजीकरणका लागि पहल गर्ने बताए । भने, नेपालको सूचना प्रविधी एवं पर्यटनको क्षेत्रमा लगानीका लागि आफ्नो देशका निजी क्षेत्रसँग पहल गर्ने सोत राजदुत उरेयाले बताए ।

काठमाडौं । आइएमई ग्रुप तथा ग्लोबल आइएमई बैंकका अध्यक्ष चन्द्रप्रसाद ढकालले जाजरकोट, रुकुम पश्चिम लगायतका जिल्लाका भूकम्प प्रभावितहरूको लागि घोषणा गरिएको सहयोग रकम १ करोड ५० लाख रुपैयाँको चेक आज प्रधानमन्त्री पुष्पकमल दाहाल प्रचण्डलाई हस्तान्तरण गरेका छन् ।

अध्यक्ष ढकालले ग्लोबल आइएमई बैंक लिमिटेड, आइजीआई प्रुडेन्सियल इन्स्योरेन्स, आइएमई लाइफ इन्स्योरेन्स र आइएमई लिमिटेड लगायत आइएमई ग्रुपबाट प्रवर्द्धित कम्पनीहरू तथा आइएमई फाउन्डेसन मार्फत घोषणा गरिएको सहयोग रकमको चेक प्रधानमन्त्री दाहाललाई हस्तान्तरण गरेका हुन् ।

चेक हस्तान्तरणमा अर्थमन्त्री डा. प्रकाश शरण महत र मुख्यसचिव डा. बैकुण्ठ अर्याल समेत उपस्थित थिए ।

यसैगरी, आइएमई ग्रुपका प्रवन्ध निर्देशक हेमराज ढकाल, ग्लोबल आइएमई बैंकका प्रमुख कार्यकारी अधिकृत रत्नराज बज्रचार्य, आइएमई लिमिटेडका प्रमुख कार्यकारी अधिकृत खिलेन्द्र पौडेल, आइजिआई प्रुडेन्सियल इन्स्योरेन्सका प्रमुख कार्यकारी युगेशभक्त बादे श्रेष्ठ, ग्लोबल आइएमई बैंकका वरिष्ठ नायव प्रमुख कार्यकारी अधिकृत सुरेन्द्रराज रेग्मी, नायव प्रमुख कार्यकारी अधिकृत सुमन पोखरेल लगायतको पनि उपस्थिति थियो ।

सहयोग रकम हस्तान्तरण सँगै आइएमई ग्रुपले भूकम्पका कारण मृत्यु भएका नागरिकहरूप्रति हार्दिक श्रद्धाञ्जली व्यक्त गर्दै शोक सन्तप्त परिवारमा गहिरो समवेदना तथा घाइतेहरूको शीघ्र स्वास्थ्य लाभको कामना गरेको छ।
साथै, भूकम्प प्रभावित क्षेत्रमा आइएमई ग्रुप तथा आइएमई फाउन्डेसनले स्थानीय प्रशासनसँगको समन्वयमा थप राहत सहयोग समेत उपलब्ध गराउने प्रतिबद्धता समेत जनाएको छ ।

काठमाडौं । एनसेल आजियाटा लिमिटेडले भाईटिकाको थिममा लघु चलचित्र प्रतियोगिताको आयोजना गरेको छ ।

कम्पनीले चलचित्र मार्फत दाजू–बहिनी, दिदि–भाइहरूको विशेष सम्बन्ध चित्रण गर्न भाईटिकाको थिममा लघु चलचित्र प्रतियोगिताको आयोजना गरेको हो ।

प्रतियोगितामा आकर्षक कथा र प्रस्तुतिमार्फत दर्शकलाई प्रेरित गर्ने खालको चलचित्र बनाउन सक्ने सबै ईच्छुक व्यक्ति वा समूहले भाग लिन सक्नेछन् ।

प्रतियोगितामा सहभागी हुन दिदि–भाइहरूको हृदयस्पर्शी सम्बन्धलाई ३ देखी ५ मिनेटको भिडियो अर्थात चलचित्रमा सुन्दर ढंगमा प्रस्तुत गरेको हुनुपर्नेछ । भिडियोको कथामा एनसेलको सरप्राइज योजना, रिचार्ज, डेटा वा भ्वाइस प्याक प्रयोगका बारेमा एक वा बढी तत्वहरू समावेश गरी ‘हामी तपाईंकै लागि’ विषयवस्तुको वरिपरि घुमेको हुनुपर्नेछ ।

उल्लेखित सबै कुरालाई ध्यानमा राखी सहभागीहरुले दिदि–भाइबीचको सुमधुर सम्बन्धलाई मन छुने प्रस्तुतिमार्फत उजागर गर्दै आफ्नो कलाकारितामार्फत निर्णायक मण्डलको मन जितेर पुरस्कार जित्ने मौका पाउनेछन् ।

प्रतियोगितामा प्रथम हुने व्यक्ति वा समूहले १ लाख रुपैयाँ नगद पुरस्कार प्राप्त गर्ने छन् । भने, दोस्रो हुनेले ७५ हजार रुपैयाँ नगद र तेश्रो हुनेले ५० हजार रुपैयाँ नगद पुरस्कार प्राप्त गर्नेछन् ।

प्राप्त सबै भिडियोहरु मध्ये छानिएका भिडियोहरु भाईटिकाको दिन एनसेलको सोसल मिडिया प्लेटफर्महरुमार्फत सार्वजनिक गरिनेछ । निर्देशक, निर्माता तथा अभिनेता आशिफ शाह, मल्टिमिडिया स्टोरीटेलर तथा द रेकर्ड नेपालको निर्माता साहाना बज्राचार्य र फिल्म निर्माता अविन भोको एक निर्णायक मण्डलले प्रतियोगितामा प्राप्त भिडियोहरुको समिक्षा र मुल्यांङकन गर्नेछ । प्रतियोगिताका विजेताहरु कार्तिक २९ गते भाईटिकाको दिन घोषणा गरिनेछ ।

प्रतियोगिताको भिडियो बुझाउने मिति कार्तिक २३ गतेसम्म थप गरिएको छ । थप जानकारी तथा सर्तहरुका बारेमा एनसेलको वेबसाइटमार्फत जानकारी लिन सकिन्छ ।

काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले ऊर्जा, पर्यटन, कृषि प्रशोधन, आइसिटी, औषधि र जडीबुटी क्षेत्रमा लगानी बढाउन एसिया-प्रशान्त क्षेत्रका लगानीकर्ताहरुलाई आग्रह गरेका छन् ।

एसिया-प्रशान्त चेम्बर अफ कमर्स एण्ड इन्डस्ट्री – क्यासि परिस‌‌घको आज काठमाडौंमा सुरु ३७ औँ सम्मेलनलाई सम्बोधन गर्दै अध्यक्ष ढकालले नेपालमा लगानी बढाउन आग्रह गरेका हुन्।

नेपाली अर्थतन्त्रले ठुला प्राकृतिक प्रकोप र विश्वव्यापी आर्थिक धक्कालाई थेगेर वृद्धितर्फ उन्मुख रहेको बताउँदै अध्यक्ष ढकालले आत्मविश्वासका साथ लगानी बढाउन सकिने समय आएको बताए । पर्याप्त विदेशी मुद्रा सञ्चिति र बैङ्किग क्षेत्रमा पर्याप्त तरलता रहेकाले लगानिकर्ताहरुका लागि जोखिम कम हुँदै गएको पनि अध्यक्ष ढकालले उल्लेख गरे ।

नेपालको जलविद्युतलाई नवीकरणीय ऊर्जा गणनामा समावेश गर्ने भारतको हालैको निर्णय र बंगलादेशको आर्थिक वृद्धिले जलविद्युतको प्रचुर बजार सृजना भएको उल्लेख गर्दै अध्यक्ष ढकालले जलविद्युत परियोजनामा लगानीका अवसर छोप्नु पर्ने समय आएको बताए ।

यसैगरी विश्वस्तरीय होटेल र विमानस्थल लगायत पर्यटन पूर्वाधार बनिसकेकोले पर्यटन बजारले थप निजी लगानी खोजिरहेको पनि अध्यक्ष ढकालले उल्लेख गरे । बढ्दो पर्यटन बजारका लागि केबलकार, रिपोर्ट, थिम पार्क, हिल स्टेसन र ठुला होटेल लगायतका पर्यटन पूर्वाधारमा लगानी गर्न पनि अध्यक्ष ढकालले आग्रह गरे ।

नेपालले निर्यात बजार विस्तार गरिरहेको र विभिन्न मुलुकहरूसँग सहुलियतपूर्ण व्यापार सम्झौताहरू समेत भएकाले निर्यात केन्द्रित लगानी बढाउन पनि अध्यक्ष ढकालले लगानीकर्ताहरूको ध्यानाकर्षण गराए ।

नेपालले दक्षिण एसिया, एसिया प्यासिफिक क्षेत्र र त्यसभन्दा बाहिर भौतिक पूर्वाधार र डिजिटल कनेक्टिभिटी विस्तार गरिरहेको उल्लेख गर्दै अध्यक्ष ढकालले डिजिटल अर्थतन्त्रको विकासमा साझेदारीका लागि समेत आग्रह गरे ।

महासंघले लगानीका अवसरहरूको खोजी गर्न र लगानीमा हुने अवरोध हटाउन लगानीकर्ताहरुलाई सहयोग गर्न तयार रहेको तर्फ पनि अध्यक्ष ढकालले विश्वस्त रहन आग्रह गरे ।

काठमाडौं । साताको पहिलो दिन २१ अंकले घटेको सेयरबजार साताको दोस्रो दिन २१ नै बढेको छ ।

अघिल्लो दिन आइतबार मात्रै २१.४६ अंकले गिरावट भई १८२६.२३ बिन्दुमा झरेको सेयरबजार आज २१.३० अंकले वृद्धि भएर १८४७.५४ बिन्दुमा कायम भएको छ । यसअघि गत सोमबार मात्रै ३.०४ अंकले सेयरबजार बढेर १८७८.७० बिन्दुमा बन्द भएको थियो । भने, आज एक सातपछि सेयरबजार बढेको हो ।

सोमबार बजारमा ३५ लाख ५५ हजार ६७० कित्ता सेयरको खरिदबिक्री हुदाँ ९३ करोड ८९ लाख २९ हजार ४० रुपैयाँको कारोबार भएको छ ।

आज ह्याथवे इन्भेष्टमेन्ट नेपाल लिमिटेड, सिद्धार्थ प्रिमियर इन्स्योरेन्स लिमिटेड र आशा लघुवित्त वित्तीय संस्था लिमिटेडका लगानीकर्ताले सर्वाधिक नाफा कमाएका छन् । भने, लक्ष्मी लघुवित्त वित्तीय संस्था, वीन नेपाल लघुवित्त वित्तीय संस्था लिमिटेड र एनआइसी एसीया लघुवित्त वित्तीय संस्था लिमिटेडका लगानीकर्ताहरुले सर्वाधिक गुमाएका छन् ।

कारोबारका आधारमा आज सोल्टी होटल लिमिटेड ६ करोड ४३ लाख २० हजार रुपैयाँको कारोबारका साथ शिर्ष स्थानमा रहेको छ ।

सोमबार उपसमूतर्फका १३ वटै समूहको सेयर मूल्य बढेको छ ।

काठमाडौं । ढुवानी व्यवसायी महासंघ नेपालले भूकम्प प्रभावित क्षेत्रहरुमा पठाउने लत्ताकपडा, औषधी जस्ता अत्यावश्यक राहत सामाग्रीहरु एक हप्ता सम्मको लागि निःशुल्क ढुवानी गर्ने निम्ति सम्पूर्ण ट्रान्सपोर्ट ढुवानी व्यवसायीहरुलाई विशेष अनुरोध गरेको छ ।

आइतबार एक विज्ञप्ति जारी गर्दै भूकम्पले पुर्‍याएको जनधनको क्षतीप्रति दुःख व्यक्त गर्दै घाइतेहरु उद्धार र राहत वितरणलाई प्रभावकारी बनाउन पनि अपिल गरेको हो ।

महासंघका महासचिव अरुण श्रेष्ठका अनुसार जाजरकोट र रुकुम पश्चिम भूकम्पले देशनै दुःखित भएको बेलामा सरकारको मात्रै मुख ताकेर बस्नु उचित हुँदैन । विपत्तिको बेलामा मलम लगाउने उद्देश्यका साथ एक हप्तासम्म लत्ताकपडा, औषधिजन्य र अत्यावश्यक राहत सामग्रीहरुको ढुवानी निः शुल्क गर्ने निर्णय गर्दै सम्पूर्ण संघहरुलाई पत्राचार गरिएको बताए ।

निःशुल्क ढुवानी सेवाका लागि महासंघले काठमाडौंमा तीन स्थान सहित काठमाडौं बाहिर वीरगञ्ज, इटहरी, नेपालगञ्ज, विराटनगर, रुपन्देही, झापाको बिर्तामोड, चितवन, धनगढी, उदयपुर, दाङ, हेटौंडा, पोखरा र बाराबाट प्रदान गरिने व्यवस्था मिलाएको महासचिव श्रेष्ठको बताए ।

साथै शनिबार नै सुर्खेत र नेपालगन्जबाट २ लाख हाराहारीको चार ट्रक अत्यावश्यक सामाग्री जाजरकोटमा निः शुक्ल ढुवानी समेत गरिएको महासंघ जनाएको छ ।

काठमाडौं । आइएमई ग्रुपद्वारा भुकम्प प्रभावितलाई एक करोड ५० लाख रुपैयाँ आर्थिक सहयोग प्रदान गरिने भएको छ ।

आइतबार ग्लोबल आइएमई बैंक, आइजीआई प्रुडेन्सियल इन्स्योरेन्स, आइएमई लाइफ इन्स्योरेन्स र आइएमई लिमिटेड लगायत आइएमई ग्रुपबाट प्रवर्द्धित कम्पनीहरू तथा आइएमई फाउन्डेसन मार्फत भूकम्पबाट प्रभावितलाई १ करोड ५० लाख नगद सहयोग रकम प्रदान गर्ने निर्णय गरेको हो ।

जाजरकोट, रुकुम पश्चिम लगायतका जिल्लाका प्रभावित क्षेत्रमा उद्धार तथा राहत वितरणका लागि संस्थागत सामाजिक उत्तरदायित्व अन्तर्गत प्रधानमन्त्री दैवी प्रकोप उद्धार कोषमा उक्त रकम प्रदान गरिने जनाइएको छ ।

आइएमई ग्रुपका अध्यक्ष चन्द्र प्रसाद ढकालले महाभूकम्प तथा महामारीका समयमा उद्धार, तत्काल राहत वितरणमा आइएमई ग्रुपलाई नै परिचालन गरेको स्मरण गर्दै यससपटक पनि हर सम्भव सहयोगका लागि जुटेको बताए ।

काठमाडौं । साताको दोस्रो दिन सोमबार नेपाली बजारमा सुनको मूल्य तोलामा ५ सयले घटेर १ लाख १५ हजार ४ सय रुपैयाँ कायम भएको छ ।

त्यस्तै, अघिल्लो दिन प्रतितोला १ लाख १५ हजार ३५० रुपैयाँमा स्थिर रहेको तेजाबी सुनको मूल्य आज प्रतितोला १ लाख १४ हजार ८५० रुपैयाँमा कारोबार भइरहेको छ सुनचाँदी व्यवसायी महासंघले जनाएको छ ।

सोमबार बजारमा चाँदी प्रतितोला १ हजार ४१५ रुपेयाँमा स्थिर रहेको छ ।