काठमाडौं । परोपकार प्रसूति तथा स्त्री रोग अस्पतालले नर्सिङ क्याम्पसहरूलाई १० दिनभित्र काउन्सिलको नवीकरण गर्न माग गरेको छ ।
अस्पतालले सूचना जारी गर्दै सम्बन्धित परिषद् र युनिभर्सिटीको नवीकरण तथा अस्पतालसँग गत वर्ष भएको सम्झौताको प्रतिलिपि संलग्न राखी १० दिन भित्र निवदेन दिन आग्रह गरेको छ।
साथै अस्पतालमा क्लिनिकल अभ्यास गराउन ल्याउने प्रोग्राम र विद्यार्थी सङ्ख्या खुलाई नवीकरणका लागि निवेदन दर्ता गर्न आग्रह गरेको छ ।
म्याद समाप्त भए पश्चात प्राप्त भएका निवेदन दर्ता नगरिने समेत सूचनामा भनिएको छ ।
काभ्रे । दोलालघाटमा कोभिड–१९ विरुद्धको दोस्रो डोज खोप लगाउने क्रममा स्वास्थ्यकर्मीलाई कुटपिट भएको छ । भुम्लु गाउँपालिकाले जिल्ला प्रशासन कार्यालयसमक्ष आफ्ना स्वास्थ्यकर्मीमाथि हातपात गर्ने अनिल पोटलाई कारवाहीको माग गरेको छ ।
पोटेले भुम्लु–१० स्थित दोलालघाट स्वास्थ्य एकाइका अहेब हितेशकुमार मण्डललाई बुधबार ८ नं वडास्थित दुलालेश्वर माध्यमिक विद्यालयमा खोप लगाइरहेको अवस्थामा कुटपिट गरी अन्य स्वास्थ्यकर्मीलाई गालीगलौज गरेकाले कानुनबमोजिम कारबाहीका लागि गाउँपालिकाद्वारा बिहीबार दिइएको लिखित निवेदनमा जनाइएको छ ।
साथै स्वास्थ्यकर्मी मण्डललेसमेत आफूमाथि हातपात गरी भ्याक्सिन फ्याँकीदिन्छु भन्दै पटक-पटक धम्क्याउने पोटेलाई कारबाहीको माग गर्दै गाउँपालिकासमक्ष निवेदन पेश गरेका छन् ।
गाउँपालिकाका प्रमुख प्रशासकीय अधिकृत ढाकाराम अर्यालका अनुसार खोप लगाउन अवरोध गर्दै खोपको रेकर्ड फाइल च्यात्ने वडा सदस्य मनोज श्रेष्ठलाई समेत कारबाहीको माग गरिएको छ ।
श्रेष्ठले आफूलाई फरक लक्षित समूहलाई खोप लगाउन दबाब दिँदै गालीगलौज गरी हातपात गर्ने प्रयास गर्दा स्थानीयवासीले छेकेका र खोप दर्ता रजिष्ट्रर च्यातेको मण्डलले बताए । उनले भने, ‘वडा सदस्यले मलाई लक्षित समूहबाहेकलाई खोप लगाउन बारम्बार दबाब दिँदै आएका थिए, त्यस दिन कुटपिट गर्न खोज्दै खोपको दर्ता रजिष्ट्रर नै च्यातिदिए, स्थानीयवासीले नछेकेको भए म जनप्रतिनिधिबाट कुटिने थिएँ ।’
काठमाडौं । पछिल्लो २४ घण्टामा मुलुकमा १०७८ जना कोभिड बिरामी थपिएका छन् । ११ हजार ७६५ नमुना (पीसीआर ८५५५ र ३२१० एन्टीजेन) परीक्षण गर्दा ती संक्रमित थपिएका हुन् ।
सोही अवधिमा थप १२ जनाको मृत्यु भएको छ । ९११ जना निको भएका छन् । मुलुकमा सक्रिय संक्रमित संख्या १८ हजार १६८ पुगेको छ ।
गत २४ घण्टामा २ लाख ८९ हजारलाई कोभिडविरुद्धको खोप लगाइएको छ । बिहीबारको दैनिक संक्रमण दर ९ प्रतिशत भन्दा बढी छ ।
काठमाडौंमा २६७, ललितपुरमा ६५, भक्तपुरमा ३७, कास्कीमा ६५, मोरङमा ५५, झापामा ७५ जना संक्रमित थपिएका छन् । ९ जिल्लामा मात्र सक्रिय संक्रमित संख्या ५०० भन्दा बढी छ ।
कूल संक्रमित संख्या ७ लाख ९४ हजार, कूल मृत्यु ११ हजार १२३ र कूल निको हुने संख्या ७ लाख ६५ हजार पुगेको छ ।
रुपन्देही । लुम्बिनी प्रदेशका सबै जिल्लामा नेपाली कांग्रेसको १४ औं महाअधिवेशनको चुनावी कार्यक्रम शुरु भएपनि बाँकेमा रोकिएको छ । महाधिवेशनअन्तर्गत विभिन्न जिल्लामा वडा, पालिका तहसम्मका अधिवेशन भइरहँदा बाँके जिल्लामा भने यसको खासै चहलपहल देखिएको छैन ।
बाँकेमा हाल नौ हजार ६७८ क्रियाशील सदस्य रहेका छन् । जिल्लामा पहिलो चरणमा ८१ वडामा वडा अधिवेशन हुनेछ । दोस्रो चरणमा आठ वटा पालिकामा र त्यसपछि क्रमशः प्रदेश क्षेत्रीय अधिवेशन, प्रतिनिधिसभा क्षेत्रीय अधिवेशन र जिल्ला अधिवेशन सम्पन्न हुनेछ ।
अधिकांश वडामा सर्वसम्मत नेतृत्व चयन हुने अवस्था भए पनि पालिकादेखि भने समूहगत प्रतिस्पर्धा हुने अवस्था देखिएको छ ।
केन्द्रीय निर्वाचन समितिले क्रियाशील सदस्यको नामावली असोज ९ गते सार्वजनिक गरेको थियो । अब अधिवेशन कहिले हुन्छ भन्ने जिज्ञासा बाँकेका आमकार्यकर्तामा छ ।
लुम्बिनी प्रदेशमा अब बाँकेमा मात्रै अधिवेशन हुन बाँकी छ । लामो रस्साकस्सीपछि क्रियाशील सदस्यता विवाद टुंगिएको बाँकेमा अधिवेशन अब छिट्टै हुने कार्यकर्ताले आंकलन गरेका छन् ।
मिति कहिले तोक्ने भनेर सम्बन्धित तहमा छलफल भइरहेको बाँके कांग्रेस सचिव तप्त पौडेलको भनाइ छ ।
रुपन्देही । भदौ १९ गते रुपन्देहीको तिलोत्तमा नगरपालिकास्थित कफी कम्पनी नजिकै २७ वर्षीया सीता भण्डारी पौडेलको शंकास्पद मृत्यु भएपछि माइती पक्षले न्यायको माग गर्दै निरन्तर आन्दोलन गरिरहेको छ ।
सीताका घरकै व्यक्तिको मिलेमतोमा हत्या गरेको भन्दै सुरु भएको न्यायको आन्दोलन २५ दिनदेखि जारी छ । गृहमन्त्री बालकृष्ण खाँणको गृहनगर तिलोत्तमामा दैनिकजसो नाराबाजी गर्दै न्यायको आन्दोलन जारी रहँदा अहिलेसम्म गृहमन्त्री खाँणको कुनै प्रतिक्रिया नआएको भन्दै आन्दोलनर पक्ष आक्रोशित भएका छन् ।
निरन्तर नगरपालिकामा आन्दोलन हुँदासमेत गृहमन्त्रीले न्यायका लागि पहल नगरेको आन्दोलनर पक्षको भनाइ छ । सिताको मृत्यु हत्या नभइ आत्महत्याबाट भएको लुम्बिनी प्रादेशिक अस्पतालको पोष्टमार्टम रिपोर्टले भने पनि माइती पक्ष भने यो मान्न तयार छैनन् ।
परिवारकै मिलेमतोमा सीताको हत्या गरी आत्महत्या गरेको बहना बनाइरहेको उनीहरुको भनाइ छ । पोष्टमार्टममा आत्महत्या भएको भन्दै सुरुमा जाहेरी लिन नमानेको प्रहरी प्रशासनले माइतीपक्षको विरोध र चर्को दवावपछि मृतक सीताका श्रीमान र उनकी दिदीलाई हिरासतमा लिइ आत्महत्या दुरुत्साहनसम्बन्धी मुद्दा चलाएको छ ।
जिल्ला प्रहरी कार्यालय रुपन्देहीका प्रहरी प्रमुख मनोज केसीले घटनाका बारेमा सुक्ष्म रुपमा अनुुसन्धान गरिरहेको बताए । सिआईवीको टोलीले समेत अनुसन्धानका लागि रुपन्देहीमा बसेर फर्केको छ । तर अनुसन्धानमा के भेटियो भन्ने जानकारी भने दिइएको छैन ।
प्रहरी प्रमुख केसीले पक्राउ परेकाहरुलाई हिरासतमा राखेर अनुसन्धान भइरहेको बताए । यसबारे उनी थप केही बोल्न चाहेनन् । यता गृहमन्त्री बालकृष्ण खाँणका स्वकीय सचिव ब्रिजेश न्यौपानेले घटनाका बारेमा सत्यतथ्य अनुसन्धान गर्न निर्देशन दिएको बताए ।
गृहमन्त्री खाँण सरकार विस्तार भएपछि मात्रै गृहजिल्ला आउने स्वकीय सचिव न्यौपानेले बताए । सरकार विस्तारमा बिलम्ब हुँदा कामको भार धेरै भएको बताउँदै गृहमन्त्री गृहजिल्ला आउन नपाएको उनको भनाइ छ ।
रुपन्देही । बहुप्रतिक्षित सिद्धबाबा सुरुङमार्गको निर्माणको कामले गति लिने भएको छ । ८ वर्षदेखि चर्चामै सीमित रहेको सिद्धार्थ राजमार्गको बुटवल–पाल्पा खण्डमा पर्ने सिद्धबाबा सुरुङमार्गको निर्माणका लागि टेण्डर आह्वानसँगै यसले गति लिने भएको हो ।
सिद्धबाबा सुरुङ मार्ग निर्माणको लागि काम चालु आर्थिक वर्षभित्रै सुरु गर्ने गरी तयारी भइरहेको र जसका लागि आह्वान गरिएको ग्लोबल टेण्डरमा नौ कम्पनीले आवेदन दिएका छन् ।
आवदेन दिएका कम्पनीहरुसंग छलफल भइरहेको सडक विभागको गुणस्तर अनुसन्धान तथा विकास केन्द्रका प्रमुख डा. विजय जैसीले जानकारी दिए । उनका अनुसार आवेदन दिनेमा अधिकांश चिनियां कम्पनी रहेका छन् ।
उनले अबको तीन महिनामा कम्पनी छनोट हुने बताए । कम्पनी छनोट भएपछि ९ महिनाभित्र डिजाइन बनाएर काम सुरु गर्नुपर्ने शर्त राखिएको छ । सरकारले सुरुङमार्गका लागि चालु आर्थिक वर्षमा ३० करोड रुपैयां छुट्टाएको छ ।
तत्कालीन अर्थमन्त्री विष्णु पौडेलले ५० करोड रुपैयाँ छुट्टाएको भए पनि प्रतिस्थापन विधेयकमार्फत २० करोड रुपैयाँ अर्थमन्त्री जनार्दन शर्माले घटाएका छन् ।
सुरुङ मार्ग बनाउनका लागि चाइना स्ट्रेट कन्ट्रक्सन इन्जिनियरिङ कर्पाेरेशन लिमिटेड (बेइजिङ), चाइना गेजुवा ग्रुप कम्पनी लिमिटेड (वुहान सिटी), चाइना फष्ट हाइवे इन्जिनियरिङ कर्पोरेशन लिमिटेड (बेइजिङ) र संयुक्त उपक्रम (जेभी) रहेका छन् । चिनियाँ कम्पनी जेडआईसीजीले नेपाली शर्मा एण्ड कम्पनीसंग जेभी बनाएर आवेदन दिएको छ । एसीसीई चिनियां कम्पनीले नेपाली कम्पनी अनक कन्ट्रक्सनसंग जेभी बनाएर आवेदन दिएको छ ।
जसमा अनक कन्ट्रक्सन लिड कम्पनी रहेको छ । सिनो हाइड्रो कर्पोरेशन लिमिटेड र पावर चाइना नर्थ वेष्ट इन्जिनियरिङ कर्पोरेशन लिमिटेड र पावर चाइना रोड ब्रिज ग्रुप कर्पोरेशन लिमिटेड (बेइजिङ)ले आवेदन दिएको छ ।
यस्तै चाइना सिभिल इन्जिनियरिङ कन्ट्रक्सन कर्पोरेशन र चाइना रेलवे १४ औं ब्युरो ग्रुप कम्पनी लिमिटेड र चाइना रेलवे सियुआन सर्भे एण्ड डिजाइन ग्रुप कम्पनी लिमिटेड (बेइजिङ)ले पनि तीनवटा चिनियां कम्पनी मिलेर आवेदन दिएका छन् ।
चाइना ओभरसिज इन्जिनियरिङ ग्रुप कम्पनी लिमिटेडर चाइना रेलवे २ नम्बर इन्जिनियरिङ ग्रुप कर्पोरेशन लिमिटेड (बेइजिङ) दुई चिनियां कम्पनीको जेभी बनाएर आवेदन दिएका छन । केएमसी र भीसीए पीएल जेभीले पनि आवेदन दिएका छन् ।
लन्डन । बेलायतस्थित नेपालीले कोदो लिमिटेड नामक कम्पनीको स्थापना गरी ‘कोदोको रक्सी’ बेच्न सुरु गरेका छन् । विशुद्ध कोदोको रक्सी बताइएको उक्त रक्सीको एक बोतललाई २६ पाउन्ड स्टर्लिङ अर्थात् ४१ सय ६५ नेपाली रुपैयाँ मूल्य तोकिएको छ। यो रक्सीमा ६० प्रतिशत अल्कोहलको मात्रा हुन्छ।
बेलायतमा बसोबास गर्दै आएका नेपाली व्यवसायीहरु जनक राई, जितेन्द्र चेम्जोङ, सुमन गुरुङ, आकाश सुनुवारलगायतले कम्पनी सञ्चालन गरेका हुन् । कोदो लिमिटेडका एमडी जनक राईले अहिले बेलायतमा मात्रै रक्सी उपलब्ध रहेको र आगामी डिसेम्बरसम्म नेपाली बजारमा समेत बिक्री हुने जनाएका छन् ।
कोदोको रक्सी भुटेको बंगुर मासु, राँगाको सुकुटी, आलुदमसँग खान सकिने कम्पनीले उल्लेख गरेको छ। अमेरिकी टेलिभिजन सीएनएनले नेपाली कोदोको रक्सीलाई विश्वको ५० अत्यधिक स्वादिलो रक्सीमध्ये एउटा भनेको छ।
चितवन । पर्यटकीय गन्तव्य किंग फिसर तालको प्रवर्द्धन गर्न भेट्रान फुटबल प्रतियोगिता हुने भएको छ । भरतपुर– ६ मा रहेको नवज्योती सामुदायिक वनमा खेल हुनेछ ।
किङ्ग फिसर ताल अन्तर टोल विकास संस्था स्तरीय प्रतियोगिता हुन लागेको हो । मैत्रीपूर्ण भेट्रान प्रतियोगिता हुन लागेको हो । केपा वाचनालय एवं पर्यटन सूचना केन्द्रको आयोजनामा खेल असोज १७ देखि २४ गतेसम्म हुने केन्द्रका अध्यक्ष पूर्णप्रसाद प्रसाइले जानकारी दिए ।
भरतपुर ६ मा ३२ वटा टोल सुधार समिति छन् । हरेक टोलबाट फुटबल टोलीको सहभागिता रहने प्रसाईको बताए । हरेक टिमबाट ९ जना खेलाडी खेल्नेछन् ।
प्रथम हुनेले ४० किलोको खसी पुरस्कार पाउनेछन् । द्वितीय हुनेले २५ किलोको खसी र तृतीय हुनेले नगद ७ हजार प्राप्त गर्नेछन् । भरतपुर–६ मा रहेको किंग फिसर ताल चौविसकोठीबाट ९ किलोमिटर दक्षिणपश्चिममा पर्छ ।
राष्ट्रपति चुरे तराई मधेस संरक्षण आयोजनाअन्तर्गत तालको १ करोड ४० लाखको लागतमा संरक्षण, र पुननिर्माण भएको हो । नेपाली सेनाको कालीप्रसाद गण (ई) भैंसे व्यारेक मकवानपुरको सहकार्यमा पुननिर्माण गरिएको हो । किंग फिसर ताल घुम्न आर्कषक फुट वे र ड्यामको निर्माण गरिएको छ ।
काठमाडौं । प्रमुख प्रतिपक्ष दल नेकपा एमालेको सांसद तथा पूर्वगृहमन्त्री खगराज अधिकारीले माधवकुमार नेपाल नेतृत्वको नेकपा (एकीकृत समाजवादी) पार्टी कृत्रिम गर्भाधानबाट जन्मिएको बच्चा जस्तो भएको बताएका छन् ।
बिहीबार प्रतिनिधिसभाको बैठकपछि सञ्चरकर्मीसँगको संक्षिप्त कुराकानीमा सांसद अधिकारीले नेकपा (एकीकृत समाजवादी) पार्टी कृत्रिम गर्भधानबाट जन्मिएको बच्चा जस्तो भएको बताएका हुन् ।
उनले नेकपा एमाले कानून र संविधानको रक्षाका लागि दृढताका साथ संसदमा उभिरहने बताए । उनले नेकपा एमालेले गरेको संसदको अवरोध खुलाउन खोजिएको हो भने प्रधानमन्त्री शेरबहादुर देउवाले एमालेका संसदीय दलका नेतासँग बसेर छलफल गर्नुपर्ने बताए ।
सांसद अधिकारीले कानून र संविधान मिचेर सरकारमा सहभागी गराइएको अवैधानिक पार्टी सहभागी भएको बैठकमा सहभागी बनेर नेकपा एमाले कुनै पनि नराम्रो कार्यमा संलग्न नहुने बताए ।
उनले भने– साँच्चिकै अवरोध खुलाउन खोज्नुभएको हो भने सभामुखले प्रमुख प्रतिपक्ष दलको नेतासँग व्यक्तिगत रुपमै भेट्नुहोस्, ज्ञानेन्द्रबहादुर कार्कीलाई सिधै तपाईको प्रधानमन्त्रीलाई संसदीय दलको नेतासँग भेट्नुहोस् । नेकपा एमाले कानून र संविधानको रक्षाका लागि दृढताका साथ संसदमा उभिरहन्छ ।
कलैया। किसानहरुको समस्या समाधान गर्न आईटी आर्मीको किसान मोर्चाले आग्रह गरेको छ । जिल्ला प्रशासन कार्यालय बारामा ज्ञापनपत्र बुझाउँदै मोर्चाले समस्या समाधान गर्न आग्रह गरेको हो ।
जिल्ला प्रशासन कार्यालयमार्फत प्रधानमन्त्रीको कार्यालय र कृषि तथा पशुपंक्षी कार्यालय सिंहदरबारमा ज्ञापनपत्र बुझाइएको हो । किसानहरुको समस्याका बारेमा सरकारले कुनै चासो नदिएको भन्दै बुधबार किसानहरुले बारामा प्रदर्शन गरेका थिए ।
नेपाल कृषि प्रधान देश रहेको र ७० प्रतिशत जनसंख्या कृषिमा आधारित रहे पनि सरकारको कुनियतका कारण कृषि पेशा तथा कृषकहरु मर्कामा परेको किसानहरुको आरोप छ ।
धान बाली लगाउने बेला बजारमा मलको चरम अभाव खेपिरहेका किसानहरुले कृषि सामग्रीको अभावमा उत्पादन घटेको भन्दै आन्दोलन गरेका थिए । बाराका बजारहरुमा युरिया मलको अभाव भएपछि भारतीय बजारहरुबाट खेतीका लागि मलखाद ल्याउँदा सिमानामा सुरक्षाकर्मीले खोसेपछि आक्रोशित भएका थिए ।
किसानलाई पेन्सनको व्यवस्था, अन्नदातालाई सम्मान, कृषि ऋण सहज ढंगले उपलब्ध , मलखाद्य विऊ विजनको तुरुन्त व्यवस्था, भूमिहीनलाई जग्गा र किसानहरुलाई आधुनिक कृषि औजारको व्यवस्थाको माग गर्दै आइटी आर्मी किसान मोर्चाले ज्ञापन पत्र बुझाइएको मोर्चाका नेता उमेश कुशवाहाले बताए । छिटो भन्दा छिटो माग पुरा भएन किसानहरु सशक्त आन्दोलनमा उत्रने समेत कुशवाहाले बताए ।
रूपन्देही । गुल्मीको इस्मा गाउँपालिका– ४ दोहलीमा चट्याङ लागेर नौजना घाइते भएका छन् । बुधबार ठूलो पानीसहित परेको चट्याङ लागेर १९ वर्षीया रिता नेपाली, २२ वर्षीया गीता नेपाली र ५० वर्षीय झक्य नेपालीसहित नौजना घाइते भएको जिल्ला प्रहरी कार्यालय गुल्मीका प्रहरी नायव उपरीक्षक पुरुषोत्तम पाण्डेयले जानकारी दिए ।
तीनजनाको गुल्मी अस्पताल तम्घासमा उपचार भइरहेको छ । ६ जनाको स्थानीय स्वास्थ्य संस्थामा उपचार भइरहेको प्रहरी जनाएको छ । चट्याङ लागेर तेजबहादुर नेपालीको एउटा गोरु मरेको प्रहरी नायव उपरीक्षक पाण्डेयले बताए ।
जनकपुरधाम । सिरहाको गोलबजार नगरपालिका– ९ स्थित जोभा प्राकृतिक वनबाट सखुवाको काठ चोरेर भाग्दै गर्दा जेसीबी र चालकलाई प्रहरीले नियन्त्रणमा लिएको छ । नियन्त्रणमा लिइएको जेसिबी गोलबाजार नगरपालिकाको भएको ईलाका प्रहरी कार्यालय मिर्चैयाका डीएसपी राजेन्द्र श्रेष्ठले बताए ।
ना १ ग ७०६ नम्बरको जेसीबी र चालक श्रवण कुमार साहलाई स्थानीयले पक्रेर प्रहरीको जिम्मा लगाएका हुन् । वडाध्यक्ष रामपुकार कामतीको निर्देशनमा जेसिबीमा राखेर चालक साहले सोमबार राति काठ चोरेर लगिरहेका बेला स्थानीयले नियन्त्रणमा लिएका थिए ।
राति नै काठ, जेसिबी र चालक साहलाई प्रहरीको जिम्मा लगाइएको थियो । जेसिबीसहित चालक र काठ नियन्त्रणमा लिएर अनुसन्धान भइरहेको प्रहरीले बताएको छ ।
वनमा हावाहुरीको समयमा खसेको काठ संकलन गरेर एकठाउँमा राख्न सोमबार नगरपालिकाको जेसीबी मगाइएको थियो । संकलन गरिएको काठमध्ये एउटा ठूलो तौलको सालको गोलिया जेसिबीमा राखेर लगिरहेका बेला पक्राउ गरी प्रहरीको जिम्मा लगाएको स्थानीयले बताएका छन् ।
स्थानीय सकलदेव सिंहका अनुसार हावाहुरीले ढालेको सखुवा र अन्य प्रजातिका करोडौं रुपैयाँ बराबरको काठ थियो ।
काठसहित जेसिबी र चालकलाई पक्रेर प्रहरीलाई बुझाएका स्थानीयले वडाध्यक्षमाथि कारबाहीको माग गरेका छन् । तर वडाध्यक्ष कामतीले यस विषयमा प्रतिक्रिया दिन मानेनन् ।
चितवन । नेपाली कांग्रेसका नेता अर्जुनरसिंह केसीले सुधारवादी पक्षहरुबीच समझदारी नबने आफूले पनि सभापति पदमा उम्मेदवारी दिने बताएका छन् ।
नेपाल प्रेस युनियन चितवनले भरतपुरमा गरेको पत्रकार सम्मेलनमा बोल्दै नेता केसीले भने, ‘प्रत्येक व्यक्ति महत्वकांक्षा लिएर बस्ने हो भने कसैको पछि लाग्ने कुरा हुँदैन, म पनि सभापतिको उम्मेदवार हो ।’
उनले पार्टीलाई संस्थागत सुदृढीकरण गर्न समझदारी भए जो सभापति बनेपनि सहयोग गर्न तयार रहेको बताए । ‘नेता होइन, नीति प्रधान बनाउँ, व्यक्ति होइन विचार प्रधान बनाउँ, यो संघर्षको क्रममा जो इच्छुक हुनुहुन्छ । सहमति गरेर जो भएपनि होऔं, एक बनौँ’, उनले भने, ‘एक हुन सकेनौँ भने सभापतिको उम्मेदवार म पनि हो ।’
उनले आफू पार्टीभित्रको सुधारवादी पक्षधर भएकाले स्वार्थविहीन संकल्प गरेर साझा उम्मेदवार बनाउन लागि परेको जिकिर गरे ।
बेइजिङ । चीनको गुझाउ प्रान्तमा भएको पानी जहाज दुर्घटनामा परी कम्तीमा १२ जनाको मृत्यु भएको छ । जान्क नदीमा भएको दुर्घटनामा परी अरु तीन जना हराईरहेका सरकारी अधिकारीहरुले जानकारी दिएका छन् ।
अत्यधिक भारीका कारण पानी जहाज पल्टीएको हुनसक्ने प्रारम्भीक अनुमान गरिएको छ । दुर्घटना भएका बेला जहाजमा कुल ४० यात्रु रहेका थिए । घटनापछि अरुलाई उद्धार गरिएको थियो भने हराईरहेकाहरुको अहिले पनि खोजी भइरहेको जनाइएको छ ।
खोजीका लागि ५० भन्दा बढी उद्धार जहाज, २१४ जना उद्धारकर्तालगायत परिचालन गरिएको छ ।
रासस
काठमाडौं । पछिल्लो २४ घण्टामा मंगलबार देशभर ११ सय ५८ जनामा कोभिड संक्रमण पुष्टि भएको छ । १४ हजार ००३ वटा नमुना परीक्षण गर्दा (पीसीआर ११,६७२ तथा एन्टीजेन २,३३१) ती संक्रमित थपिएका हुन् ।
सोही अवधिमा १,३१८ जना निको भएका छन् भने थप १२ जनाको मृत्यु भएको छ । गत २४ घण्टामा २ लाख ८ हजार ९० जनाले कोभिड–१९ विरुद्धको खोप लगाएका छन् ।
मन्त्रालयका अनुसार हालसम्म मुलुकमा १८ हजार ४२२ जना सक्रिय संक्रमित छन् ।
नेपालमा कूल ७ लाख भन्दा बढी कोरोनाभाइरस संक्रमित छन् भने ११ हजार ११५ जनाले ज्यान गुमाएका छन् ।
अहिलेसम्म आईसीयूमा ३६४ जना, भेन्टिलेटरमा १२० जना, होम आइसोलेशनमा १७,१२५ जना, संस्थागत आइसोलेशनमा १२९७ र क्वारेन्टाइनमा ३२८ जना रहेको तथ्यांकमा उल्लेख छ ।
मन्त्रालयको अनुसार नेपालमा कोरोनाभाइरसको दैनिक संक्रमणदर ८.२ प्रतिशत छ भने मृत्युदर १.४ प्रतिशत छ । मुलुकमा निको हुनेको दर ९६.३ प्रतिशत छ ।
रूपन्देही । बुटवलको ज्योतिनगरमा पहिरो व्यवस्थापन तथा पीडितको उद्दार गर्न लुम्बिनी प्रदेश सरकारले प्रतिवद्वता जनाएको छ ।
बुटवलको ज्योतिनगर पहिरो तथा तिनाउ नदी कटान पीडितहरुका लागि उद्दार, राहत तथा पुनःस्थापनका लागि ३ चरणका कार्ययोजनाको बनाउने भएको मुख्यमन्त्री कुलप्रसाद केसीले बताएका छन् । एक महिनाअघि गएको पहिरो नजिकै प्रदेश सरकारका सबै कार्यालय भएपनि वास्ता नगरेको भन्दै सरकारको आलोचना बढेको थियो ।
मुख्यमन्त्री कुलप्रसाद केसीले तत्काल राहत तथा पुनःस्थापनका लागि जिल्ला प्रशासन कार्यालयले तथ्याङ्क संकलनका लागि निर्देशन गरिएको बताए ।
नेपाली कांग्रेस बुटवल नगरसमितिले सोमबार यो विषयमा ध्यानाकर्षण पत्र बुझाएपछि उनले आवश्यक तयारीका लागि छिट्टै बैठक बसेर अघि बढ्ने योजनामा रहेको बताए ।
गएको भदौ १३ गते झरेको पहिरोले बुटवल–३ ज्योतिनगरका दर्जनौं घरपरिवार विस्थापित भएका छन् । यसैगरी भदौ ११ गते आएको वर्षाले बुटवल–११, बुद्धनगरका आधा दर्जन बढी घर९परिवार घरबारविहीन बनेका छन् ।
बाढीपहिरो तथा डुबानले विस्थापित हुँदा समेत प्रदेश सरकारले समयमै चासो नदिएको भन्दै आलोचना भएको छ । घटना भएको एक महिना बितिसक्दा पनि सरकारले प्रभावितहरुको तथ्याङ्कनको कामसमेत गर्न नसकेको भन्दै तीव्र आलोचना भएको हो ।
यसैगरी बुटवलको राजमार्ग चौराहदेखि गोलपार्कसम्मको ६ लेन सडक विस्तार, कालिकापथ सडक विस्तार तथा बेलबास बेथरी सडक विस्तारलाई समेत तीव्रता दिन आवश्यक निर्देशन गरिने मुख्यमन्त्री केसीले आश्वासन दिएका छन् । सोमबार कांग्रेस नगरसभापति खेलराज पाण्डेसहितको टोलीले मुख्यमन्त्रीलाई ध्यानाकर्षण पत्र बुझाएको थियो ।
ज्योतिनगर पहिरो तथा तिनाउ नदी करिडोरका बाढी पीडितहरुलाई राहत, उद्धार र पुनःस्थापनाका लागि सभापति पाण्डेले ध्यानाकर्षण गराएका थिए ।
यसैगरी चौराह–गोलपार्क सडक विस्तारको काममा ढिलासुस्ती हुनुका साथै शहरको मुख्य सडक नै धुलाम्य र वर्षामा हिलाम्य हुँदा यात्रु तथा सहरबासीको स्वास्थ्यमा असर गर्नुका साथै दुर्घटनाको जोखिम भएको भन्दै ध्यानाकर्षण गराएका थिए ।
कांग्रेसले बेलबास–बेथरी सडक विस्तार र कालिकानगर बाइपास सडक विस्तारको कामलाई समेत समयमै पूरा गर्नका लागि ध्यानाकर्षण गराएको थियो ।
काठमाडौं । बालबालिकालाई भिटामिन ‘ए’ र जुकाको औषधि कात्तिक ७ र ८ गते खुवाइने भएको छ । यसअघि कात्तिक २ र ३ गते खुवाइने पूर्वनिर्धारित योजना थियो तर, दशैंको कारण मिति परिवर्तन भएको स्वास्थ्य तथा जनसंख्या मन्त्रालयले जनाएको छ ।
सो दिन भिटामिन ‘ए’ र जुकाको औषधिसँगै बालभिटा पनि दिइनेछ । सरकारले ६ देखि ५९ महिनाका बालबालिकालाई भिटामिन ‘ए’ क्याप्सुल, १ देखि ५ वर्षसम्मका बालबालिकालाई जुकाको औषधि र ६ देखि २३ महिनाका बालबालिकाहरुलाई बालभिटा वितरण गर्दै आएको छ।
पोखरा । विश्व पर्यटन दिवसको दिन सोमबार बिहानै पोखराको मौसम खुलेको थियो । लामो समय कोरोना कहरले थलिएको यहाँको पर्यटनलाई टेवा पुगोस् भन्ने हेतुले पर्यटन बजारमा सकारात्मक सन्देश प्रवाह गर्न गण्डकी प्रदेश सरकारको निमन्त्रणामा आइतबार नै नेपालका लागि विभिन्न ११ देशका राजदूतसहित विशिष्ट कूटनीतिज्ञ पोखरा आइसकेका थिए ।
आइतबार पोखरा विमानस्थलमा गरिएको स्वागतसँगै साँझ गण्डकी प्रदेश सरकारद्वारा आयोजित रात्रिभोजमा सरिक विशिष्ट पाहुनाका लागि विश्व पर्यटन दिवसका अवसरमा सोमबार प्रकृति र संस्कृतिका विभिन्न पक्षहरू दृश्यावलोकन गराउन अन्नपूर्ण गाउँपालिकाको नागडाँडादेखि कास्कीकोटसम्मका लागि करिब तीन घण्टा दूरीको हाइकिङ आयोजना गरिएको थियो ।
खुलेको मौसमका कारण बिहानै टलक्क टल्किएका माछापुच्छ्रे सहितका हिमाल भने कुटनीतिज्ञहरू ९ः०० बजे नागडाँडामा पुग्दा बादलसँग लुकामारी गर्न थालिसकेका थिए । कतै बादलले छेकेको त कतै देखिएका हिमाली दृश्यले त्यहाँ पुग्ने जो कोही मक्ख देखिन्थे ।
कुटनीतिज्ञको टोलीमा सहभागी नेपालस्थित युनेस्कोका प्रतिनिधि माइकल क्रफ्टका लागि यो पोखराको पहिलो भ्रमण थियो । पोखराको बारेमा सुने पनि उनलाई आउने अवसर भने मिलेको थिएन । विश्व पर्यटन दिवसका अवसरमा हाइकिङमा सहभागी बन्दै माइकल कास्कीकोटबाट बादलभित्रबाट लुकामारी गरिरहेका हिमशृङ्खलालाई कैद गर्न व्यस्त देखिन्थे । पोखराको बारेमा सुने पनि आउने अवसर बल्ल मिलेको भन्दै खुसी देखिएका उनले भने, ‘म प्राकृतिक सम्पदासँगै संस्कृतिमा रमाउन मन पराउँछु, नेपालमा यो सबै छ, अझ पोखराको प्राकृतिक सौन्दर्य त निकै लोभलाग्दो रहेछ ।’
माइकलले यहाँबाट फर्किएपछि आफ्ना दुई सन्तान र श्रीमतीलाई लिएर छिट्टै पोखरा आउने वाचा गरे । ‘मलाई निकै सुन्दर लाग्यो, परिवारसहित छिट्टैै आउँछु, कोभिड १९ ले धेरैलाई घुम्न डुल्नबाट वञ्चित गरायो, अब सावधानी अपनाएर घुमघाम गर्नुपर्छ’, उनले भने । सम्बन्धित क्षेत्रले दीगो पर्यटनको विकासका लागि जोड दिन आवश्यक रहेको औँल्याउँदै उनले कोभिडका कारणले चुनौतीका साथै अवसर पनि थपेको उल्लेख गरे ।
नेपालका लागि फिनल्याण्डका राजदूत पर्टी एन्टीनेनले बिहान उठ्ने बित्तिकै माछापुच्छ्रेको हिमशृङ्खलाले आफूलाई निकै लोभ्याएको बताए । उनले नाम जस्तै पोखरा निकै सुन्दर रहेको प्रतिक्रिया दिए । तीन वर्षअघि सेप्टेम्बरमा पोखरा आएको अनुभव सुनाउँदै उनले जति आए पनि पोखरा आइरहन मन लाग्ने शहर भएको उल्लेख गरे । उनले भने, ‘नेपालको अरु ठाउँभन्दा पोखरा विशेष लाग्छ, तिहारपछि फेरि पोखरा आउने योजना छ, म अन्नपूर्ण रेञ्जको पदमार्गमा जानेछु ।’
उनले पोखरा पर्यटकीय गन्तव्य भएको जनाउँदै बिहान उठ्नासाथ हिमाल माथिमाथि बादलहरू उडिरहेको दृश्य हेर्न, लेकसाइड घुम्न र बारहरू जान पनि आफूलाई मन पर्ने अनुभव सुनाए । ‘नेपाल र यहाँको सन्दर्भमा पर्यटन महत्वपूर्ण छ, यसलाई अझै विकास गर्न जरुरी छ’, उनले भने, ‘कोरोना हराइसकेको छैन तसर्थ अझै सावधानी अपनाउन जरुरी छ, कोरोनाको महामारीमा नेपाललाई मेरो देशले पनि सहयोग गरेको छ ।’
(सार्क) का महासचिव इसाला रुवान विराकुनले आफ्नो देश श्रीलङ्काका कूटनीतिक नियोगका पदाधिकारीसहितको यो भ्रमण निकै फलदायी लागेको बताए । ‘पोखरा मलाई निकै मन पर्ने ठाउँ हो, परराष्ट्र मन्त्रालय र नेपाल पर्यटन बोर्डले यो अवसर हामीलाई जुराइदिएकामा आभारी छौँ’, उनले भने ।
श्रीलङ्का र नेपालका धेरै सांस्कृतिक एवं धार्मिक कुरा मिल्ने जनाउँदै उनले कोभिड–१९ ले दक्षिण एशियाली देशहरुको अर्थतन्त्रमा निकै प्रभाव पार्नुका साथै पर्यटन क्षेत्र झनै प्रभावित भएको बताए । श्रीलङ्काका नागरिकले पनि नेपाल मन पराउने र बुद्धको देश भनेर चिन्ने गरेको उल्लेख गर्दै उनले आफू पनि बुद्ध धर्मावलम्बी भएको बताए । नेपालमा सांस्कृतिक र धार्मिक पर्यटकलाई जोडेर पर्यटन विकास गर्न सकिने बताउँदै विराकुनले यही अक्टोबरबाट प्रत्येक मङ्गलबार र शनिबार काठमाडौँ–कोलम्बो उडान हुने जानकारी दिए ।
विदेशी राजदूतसहितका विशिष्ट कूटनीतिज्ञको पोखराको भ्रमण यहाँको पर्यटकीय विकासका लागि महत्वपूर्ण हुने गण्डकी प्रदेशका पर्यटन, उद्योग, वाणिज्य तथा आपूर्ति मन्त्रालयका सचिव ज्ञानेन्द्र पौडेलले बताए । कोरोनाले प्रभावित पर्यटनलाई पुरानै लयमा फर्काउन यो भ्रमण फलदायी हुने विश्वास लिइएको उनको भनाइ छ ।
यस भ्रमणले पोखरा घुम्नका लागि खुल्ला तथा सुरक्षित छ भन्ने सन्देश प्रवाह गर्ने पोखरा पर्यटन परिषद्का अध्यक्ष गोपीबहादुर भट्टराई बताउँछन् । विश्व पर्यटन दिवसका अवसरमा गरिएको यो कार्यक्रमले विश्व पर्यटन बजारमा महत्वपूर्ण प्रभाव पार्ने बताउँदै उनले यसले सम्पूर्ण पोखरेली पर्यटन व्यवसायीलाई उत्साही बनाएको बताए ।
कोरोना कहरले थलिएको पर्यटनलाई अघि बढाउनु अहिलेको आवश्यकता भएको भन्दै नेपाल पर्यटन बोर्ड गण्डकी प्रदेश कार्यालय पोखराका प्रमुख काशीराज भण्डारीले यो उच्चस्तरीय भ्रमण यहाँका लागि महत्वपूर्ण अवसर भएको बताए । विदेशी कूटनीतिज्ञको भ्रमणले पोखराको पर्यटन प्रवद्र्धनमा महत्वपूर्ण टेवा पुग्ने उनको भनाइ छ ।
काठमाडौं । नेपाल रेडक्रस सोसाइटीले स्वास्थ्य मन्त्रालयलाई आज एक लाख डोज भेरोसेल खोप प्रदान गरेको छ । स्वास्थ्य मन्त्रालयमा आयोजित कार्यक्रममा रेडक्रसका पदाधिकारीले स्वास्थ्य राज्यमन्त्री उमेश श्रेष्ठले खोप हस्तान्तरण गरे ।
यसै साता चीनले नेपाल रेडक्रस सोसाइटीलाई उपहार स्वरुप एक लाख डोज खोप उपहारस्वरुप प्रदान गरेको थियो ।
काठमाडौं । नेपालमा पहिलोपटक कोरोनाभाइरस परीक्षणको जीन सिक्वेन्सिङ सुरु भएको छ । स्वास्थ्य मन्त्रालयले विज्ञप्ती जारी गर्दै सरकारी प्रयोगशालाहरुमा जीन सिक्वेन्सिङ सुरुवात भएको जानकारी दिएको छ ।
मन्त्रालयका अनुसार त्रिभुवन विश्वविद्यालयको जैविक प्रविधि केन्द्रीय विभाग र टेकुस्थित राष्ट्रिय जनस्वास्थ्य प्रयोगशाला जिन सिक्वेन्सिङ सुरु गरिएको हो । जैविक प्रविधि विभागमा १६ वटा र राष्ट्रिय जनस्वास्थ्य प्रयोगशालामा २६ वटा नयाँ नमूनाहरु गरी जम्मा ४२ वटा नमूनाहरु सिक्वेन्सिङ गरिएको थियो ।
जसमध्ये भाद्र र असोजमा संकलन भएको मध्ये ४१ वटा नमूनाहरु सबैमा डेल्टा भेरियन्ट देखिएको मन्त्रालयले जनाएको छ । गत वैशाखमा ‘एस’ जीन नेगेटीभ भएको नमूनामा अल्फा भेरिएन्ट देखिएको छ।
डब्लुएचओ नेपाल कार्यालय र वासिङ्टन विश्वविद्यालयले प्रयोगशालालाई प्राविधिक सहयोग गरेका छन् ।