Author: Anisha Tiwari

जनकपुरधाम । कोरोना संक्रमणका कारण लामो समयदेखि बन्द प्रदेश २ का भारतसँगको सीमानाका नखुल्दा आवतजावतमा समस्या भएको छ । सरकारले नाका खोल्ने खोल्ने निर्णय गरेको एक साता बितिसक्दा पनि सीमा क्षेत्रमा आवागमन सहज नभएको हो ।

भारती सीमा सुरक्षा बल (एसएसबी)को अवरोधका कारण प्रदेश २ का नाकाहरु अझै ठप्प छ । ठूला नाकाबाट सर्वसधारण पैदल आवत–जावत गरिरहेका छन् ।

महोत्तरीको मुख्य नाका भिट्ठामोडमा खासै चहलपहल छैन । विगतका वर्षहरुमा दशैंका बेला यो नाकामा अत्यधिक भीडभाड हुन्थ्यो । तर गाडी नचल्दा नाका सुनसान छ ।

भारतीय बजारबाट भिट्ठामोड नाका भएर पैदल नेपालतर्फ आएका महादेव यादवले गाडी नचल्दा समस्या भएको सुनाए । ‘तरकारी, तेल र मसलाहरु लिन उताको बजार गएको थिएँ । जलेश्वरमा सामान महँगो हुनाले प्रायः उतैबाट भान्साका समानहरु ल्याउँछु’, महोत्तरी जलेश्वरका उनले भने, ‘साइकल चढेर पनि उता जान दिएनन्, एसएसबीले रोक्छन् ।’

नेपाल सरकारले नाका खोलेको विषयमा एसएसबी अनभिज्ञ छ । भिट्ठामोड नाकामा खटिएका एक एसएसबीले नेपालको गाडी प्रवेश गर्न दिने निर्देशन नआएको बताए । नेपालले निर्णय गर्दैमा नाका नखुल्ने उनको भनाइ थियो ।

सिरहाको माडर नाका पनि पूर्ण रुपमा सञ्चालनमा आउन सकेका छैन । ‘एसएसबीले मन लागे गाडी आउन दिन्छन्, मन नलागे आउन दिँदैनन्’, सिरका प्रमुख जिल्ला अधिकारी प्रदिपराज कँडेल भन्छन्, ‘स्वास्थ्य मापदण्ड पालना गरेर भारतबाट यात्रुवाहक गाडी आउदा पनि आपत्ति छैन । तर एसएसबीले नै आउन दिइरहेका छैन ।’

धनुषाको जटही नाका पनि सुनसान छ । जिल्ला प्रशासन कार्यालय धनुषाले स्थलमार्गबाट धनुषा प्रवेशका लागि जनकपुर, जटही, महिनाथपुर, इनर्वा, दुहबी र धनौजी भन्सार कार्यालयलाई तोकेको छ । ती कुनै पनि नाका भएर सवारी साधन आउने–जाने गरेका छैनन् ।

प्रदेश २ को सबभन्दा ठूलो नाका पर्साको बीरगञ्जमा भने स्वास्थ्य मापदण्ड पालना गरेर भारतीय यात्रुबाहक सवारीहरु भित्रिन थालेको छ । झण्डै डेढ वर्षपछि भारतबाट गाडीहरु आउन थालेपछि बीरगञ्जका व्यवसायी उत्साहित बनेका हुन् । तर यो नाकाबाट पनि नेपाली सवारीसाधन भारत जान पाएका छैन् ।

पर्साका सहायक प्रमुख जिल्ला अधिकारी भिमकान्त पौडेलले वीरगञ्ज नाकामा कुनै किसिमको अवरोध नरहेको बताए । उनले भने, ‘मालवाहक सवारी त सधैं आउथ्यो । तर अब स्वास्थ्य मापदण्डको पालना गरेर यात्रुबाहक सवारी पनि आउन थालेको छ ।’

जनकपुरधाम उद्योग वाणिज्य संघका अध्यक्ष जीतेन्द्र महासेठले भारतको बिहारमा संक्रमण घटिसकेकाले गाडी आवत जावतको वातावरण बनाउन आवश्यक रहेको बताए । उनले भने, ‘भारतबाट मात्र सवारी आएर हुँदैन । नेपाली सवारी पनि भारतीय बजार पुग्ने वातावरण सरकारले बनाउनुपर्छ ।’

काठमाडौं । मासु व्यवसायीहरुले दसैंका लागि खसी तथा बोकाको मासुको मूल्य निर्धारण गरेका छन् । चाडपर्वको मौका छोपी आफूखुशी मूल्य लिनुभन्दा एकरुपता ल्याउन मूल्य निर्धारण गरिएको व्यवसायीहरुले बताएका हुन् ।

आन्द्राभुडी राखिएको मासु प्रतिकिलो एक हजार रुपैयाँ, बोसो राखिएकाको एक हजार २०० रुपैयाँ र ह्याकुलासहित रोजाइ (ग्राहकले रोजेअनुसार)को मूल्य एक हजार ३०० रुपैयाँ निर्धारण गरिएको हो । यस्तै कुखुराको मासु प्रतिकिलो३०० तथा रागाँ र बङ्गुरको मासु पाँच/पाँच सय रुपैयाँ तोकिएको छ ।

राष्ट्रिय मासु व्यवसायी सङ्घले फुलपातीका दिनदेखि लागू हुने गरी काठमाडौँ उपत्यकासहित देशभर खसी, बोका, कुखुरा र राँगाको मासुको मूल्य निर्धारण गरिएको जनाएको हो । सङ्घका अध्यक्ष रमेश खड्गीले खसी तथा बोकाको तीनथरि मूल्य निर्धारण गरिएको बताए ।

‘सङ्घबाट सबै मासु पसललाई निर्धारण गरिएको मूल्य कार्यान्वयनमा ल्याउनका लागि मूल्य सूची टाँस्न हामीले निर्देशन दिइसकेका छौँ । तोकिएको मूल्यअनुसार मासु बिक्री वितरण नभए सङ्घबाट कारबाही हुन्छ’, उनले भने ।

अन्य समयको तुलनामा दशैँमा कुखुरा र बङ्गुरको मासुको खपत कम हुने गरेको छ । खड्गीका अनुसार खपत कम हुने मासुको मूल्यमा तलमाथि भएपनि खसी, बोका तथा राँगाको मूल्यमा दशैँको अवधिमा कुनै परिवर्तन हुनेछैन । यही असोज ६ गते वाणिज्य, आपूर्ति तथा उपभोक्ता संरक्षण विभागले दशैँका लागि मासुको गुणस्तर, मूल्य र सरसफाइमा ध्यान दिन निर्देशन दिएको थियो ।

मासु व्यवसायीसँग छलफल गर्दै विभागले गुणस्तरसँगै मूल्यमा एकरुपता ल्याउन आग्रह गरेकाले सङ्घले मूल्य निर्धारण गरेको हो । चीनबाट च्याङ्ग्रा नआउँदा स्वदेशी च्याङ्ग्राको मूल्य यस वर्ष दोब्बर बढ्ने भएको छ । मुस्ताङमा उत्पादन कम र माग उच्च भएको भन्दै व्यवसायीले मूल्य बढाएका हुन् ।

अध्यक्ष खड्गीले गत वर्षको तुलनामा यस वर्ष च्याङ्ग्राको मूल्य बढ्ने बताए । चीनबाट च्याङ्ग्रा आएको छैन । देशमा उत्पादन भएका च्याङ्ग्रा कम हुँदा व्यवसायीले आफूखुशी मूल्य बढाउने गरेका छन् । सङ्घका अनुसार गत वर्ष जिउँदो च्याङ्ग्रा प्रतिकिलो ७०० देखि ८०० रुपैयाँ र मासु दुई हजारसम्ममा बिक्री भएकामा यस वर्ष प्रतिकिलो जिउँदो च्याङ्ग्रा नै १२ देखि १५ सयसम्म पुग्ने अनुमान गरिएको छ । नेपाल चौपाया खरिद, बिक्री तथा कृषि फार्म गुप्रका अध्यक्ष दीपक थापाले पर्याप्त मात्रामा खसी, बोकाको आयात भएको बताए । उनले व्यवसायीले आवश्यक पर्ने खसी, बोका ल्याइसकेकाले दसैंका लागि मासुको अभाव नहुने जानकारी दिनुए ।

अध्यक्ष थापाका अनुसार गत वर्षको तुलनामा यसवर्ष झन्डै दोब्बरले मूल्य बढेपछि व्यवसायीले च्याङ्ग्रा कम ल्याउने भएका छन् । गत वर्ष काठमाडौँ उपत्यकामा सात हजार च्याङ्ग्रा बिक्री गरिएकामा यस वर्ष चार हजारजति मात्र बिक्री गर्ने तयारी छ ।

रुपन्देही । संघीय मन्त्रालयले लुम्बिनी विकास कोषलाई हस्तान्तरण नगर्दा बुद्ध जन्मस्थल लुम्बिनीमा गतवर्ष चीनबाट ल्याइएका विद्युतीय बस र ट्याक्सी अलपत्र परेका छन् ।

विश्व सम्पदास्थलमा सूचीकृत लुम्बिनीमा वातावरण प्रदूषण कम गर्न र पर्यटकलाई सुविधा दिन भन्दै भित्र्याइएका बस र ट्याक्सी संचालनको छाँटकाट नै नदेखिएपछि पर्यटन व्यवसायीहरु चिन्तित भएका छन् ।

गतवर्ष चीनबाट दुईपटक गरी ५ बस र १४ विद्युतीय ट्याक्सी लुम्बिनी ल्याइएको थियोे । त्यसयता यी सवारी साधन लुम्बिनीस्थित विद्युतीय चार्जिङ स्टेसनको पार्किङमा थन्काएर राखिएको छ  । तर लुम्बिनी विकास कोषले विभागीय मन्त्रालयबाट नै हस्तान्तरण नभएकाले रोकिएको जनाएको छ ।

‘हामीले संचालनको तयारी गरेका छौं, मन्त्रालयबाट विकास कोषलाई हस्तान्तरण भएपछि तुरुन्त टेण्डर प्रकृयामा जान्छौं’, लुम्बिनी विकास कोषका योजना प्रमुख सरोज भट्टराईले भने । गतवर्ष चीनबाट भारत हुँदै ती सवारी साधन सिधै लुम्बिनी ल्याइएको थियो । तर अहिलेसम्म हस्तान्तरण भएको छैन ।

एशियाली विकास बैंकको अनुदान सहयोगमा क्लिन इनर्जी प्रोजेक्टअन्तर्गत १३ करोड लागतमा बस र ट्याक्सी लुम्बिनी भित्र्याइएको थियो । यी सवारी यहाँ ल्याउँदा सरकारले साढे ३ करोड रुपैयां भन्सार शुल्क व्यहोरेको थियो  ।

खुल्ला आकाशमुनि थन्काएर राखिएका यी सवारी साधन नचलाइ राख्दा छिटो बिग्रनसक्ने यातायात क्षेत्र प्राविधिकहरु बताउँछन् ।

यसका लागि आवश्यक चार्जिङ स्टेसन करिब–करिब तयार भए पनि संचालनको मोडालिटी तयार नहुंदा लुम्बिनीमा लामो समयदेखि खुल्ला आकाशमुनि सवारी राखिएको हो ।

पर्यटन व्यवसायीले भैरहवास्थित गौतम बुद्ध अन्तर्राष्ट्रिय विमानस्थलबाट विश्व पर्यटकीयस्थल लुम्बिनीसम्म पर्यटक र तीर्थयात्रीलाई ल्याउन–लैजान बस र ट्याक्सी प्रयोग गरिने योजना सार्वजनिक भएपछि पर्यटक आकर्षण गर्न सकिने भन्दै खुसी व्यक्त गरेका थिए ।

विद्युतीय सवारी साधन यहाँ ल्याइएपछि विकास कोषले संचालनको योजना बनाउन थालेको थियो । तर संचालनको ठोस मोडालिटी अझै बनाइसकेको छैन । विकास कोष आफैंले विद्युतीय सवारी सञ्चालन गर्नसक्ने अवस्था नरहेको बताउँदै आएको छ । कोषले टेन्डर आह्वान गरी सवारी सञ्चालन गर्न निजी कम्पनीलाई दिने मनसाय बनाएको छ ।

लुम्बिनी विकास कोषका इन्जिनियर सरोज भट्टराईले यातायात विभागसँग समन्वय भइरहेको र निजी तथा सरकारी कुन निकायलाई जिम्मेवारी दिने विषयमा अन्यौल भएको बताए ।

लुम्बिनीमा जापानको इसाका इलेक्ट्रिक कम्पनीले १३ करोड लागतमा बस र भ्यान चार्जिङ गर्ने स्टेसनको काम अन्तिम चरणमा पु¥याएको छ । तर, कोरोना महामारीले काम नसक्दै ठेक्का समयावधि सकिएको छ । म्याद थप अझै भएको छैन ।

सोलार र विद्युत्बाट बस र ट्याक्सी चार्जिङ गरिने छ । यसका लागि लुम्बिनीमा सोलार प्लान्ट जडान गरिएको छ । पावर हाउसबाट १ सय ५४ किलोवाट विद्युत् उत्पादन हुन्छ ।

चार्किङ स्टेसनबाट एकैपटकमा १३ सवारीसाधन चार्ज गर्न सकिने बनाइएको छ । यहाँ ल्याइएका बस पूर्ण वातानुकूलित र अपांगमैत्री छन्  । बसमा १९ र ट्याक्सीमा ५ सिट छन् । बस कार्डले स्टार्ट हुन्छ  भने बस र ट्याक्सी आवाजरहित छन् ।

एक पटक फुल चार्ज गरे चार सय किमिसम्म गुड्छ । आपतकालीन ठुल्ठूला ढोका छन् । लुम्बिनीमा बढ्दो वातावरणीय मध्यनजर गरेर विद्युतीय सवारी ल्याइएको हो ।

सुर्खेत । डिभिजन वन प्रमुख गोविन्दप्रसाद दाहाल र वीरेन्द्रनगर नगरपालिका– ९ का वडाअध्यक्ष सुरेश मानन्धरको मिलेमतोमा सुर्खेतको काँक्रेबिहान वन क्षेत्र मास्न खोजेको स्थानीयले आरोप लगाएका छन् । स्थानीयका अनुसार जग्गा व्यवसायीका लागि अनुकुल हुने गरी डिभिजन वन कार्यालय सुर्खेतले काँक्रेबिहार संरक्षित वन क्षेत्रको ६ हेक्टर वन मास्न लागिएको हो ।

काँक्रेविहार संरक्षित वन क्षेत्रको जग्गा छोडेर कम्पाउण्ड वाल निर्माण गर्न थालेपछि स्थानीयस्तरमा आलोचना हुन थालेको छ ।

सो क्षेत्रमा पक्की पर्खाल लगाउनका लागि महादेव खिम्ती हिराचन (केएसके) ज्वइन्ट भेन्चर कम्पनीसँग डिभिजन वन कार्यालयले सम्झौता समेत गरिसकेको छ । सम्झौताअनुसार कम्पनीले ११ करोड ८५ लाख ४२ हजार पाँच सय ६२ रुपैयाँ लागतमा निर्माणका लागि ठेक्का पाएको हो ।

सो सीमा क्षेत्रमा निर्माणाधीन पर्खालभन्दा बाहिर ५–७ मिटर वनको जग्गा छोडेर भित्र पर्खाल लगाइएको निर्माण कम्पनीका फिल्ड प्राविधिक महेन्द्रप्रसाद शर्माले जानकारी दिए । उनले डिभिजन वन कार्यालय सुर्खेतका कार्यालय प्रमुख गोविन्द प्रसाद दाहाल र वडाअध्यक्षको निर्देशनमा काँक्रेबिहार वन क्षेत्रको जग्गा छोडेर पर्खाल लगाइएको बताए ।

‘पर्खालभन्दा बाहिर जग्गा छोड्न डिभिजन वन कार्यालयका प्रमुख र वडाअध्यक्षले निर्देशन दिएका हुन् । सोहीअनुसार हामीले काम गरिरहेका छौं’, उनी भन्छन् ।

सुर्खेतको काँक्रेबिहार संरक्षित वन क्षेत्र नेपालको पहिलो संरक्षित वन हो । २०५९ साल वैशाख ३० गते नेपाल सरकारद्वारा संरक्षित वन क्षेत्र घोषणा भएको थियो । एक सय ७५ हेक्टर क्षेत्रफलमा फैलिएको यो क्षेत्र पर्यटकीय दृष्टिकोणलेसमेत महत्वपूर्ण छ ।

डिभिजन वन कार्यालयल सुर्खेतले काँक्रेबिहार वन क्षेत्रको सीमा र निजी व्यक्तिहरुको नाममा दर्ता भएका जग्गाको सीमा छुट्याउने गरी पर्खाल निर्माण गर्न थालिसकेको छ ।

यसअघि कम्पाउण्ड वाल निर्माण नहुँदा काँक्रेबिहार क्षेत्र भित्रको रिङरोड (जंगल वरिपरिको बाटो)लाई देखाएर जग्गा व्यवसायीले प्लटिङ गरी जग्गा किनबेच गराइसकेका छन् ।

पर्खालको सुरक्षाका लागि सीमाभित्रको जग्गा छोडेर पर्खाल लगाइएको डिभिजन वन कार्यालय सुर्खेतका कार्यालय प्रमुख दाहालले जानकारी दिए । ‘पर्खाल लगाउँदा सेड व्याकका लागि जग्गा छोडिएको हो’, उनले भने ।

वडाअध्यक्ष मानन्धरले आफूहरु वन क्षेत्रको जग्गा मास्न नदिनेमा प्रतिबद्ध भएको बताउँछन् । ‘यो क्षेत्रलाई जगेर्ना गर्नु हामी सबैको कर्तव्य हो । सरकारी वन क्षेत्रको जग्गालाई कुनै हालतमा मासिन दिइँदैन । प्राविधिकहरुले सुरक्षाको दृष्टिले सेट ब्याक पर्खाल लगाउन भनेपछि हामी तयार भएका हौं । यसमा मेरो कुनै मिलेमतो छैन’, उनले भने, ‘तर पाँच मिटर जग्गा भित्र पर्खाल लगाउन सुरु गरिएको हो । त्यो वन क्षेत्रको सुरक्षाका लागि नै हो ।’

उनले विगतमा पोल गाडेर राखिएको स्थानबाट नै वनको सिमाना कायम हुने दावी गरे ।

रूपन्देही । पूर्वपश्चिम राजमार्गको दाङ र बाँकेको वन क्षेत्रमा बाघको आतंक फैलिएको छ । बाघको समूह नै हिड्न थालेपछि वन कार्यालयले सचेतना अपनाउन सार्वजनिक आह्वान गरेको छ।

बाँकेको गाभर कुसुम क्षेत्रमा बाघले मान्छे खाएदेखि नै सो क्षेत्रमा बाघको समुह देखा पर्न थालेको छ । बाँके र दाङको सीमा क्षेत्रमा पाटे बाघ र चितुवाको समुह देखिएको डिभिजन वन कार्यालय लमहीले जनाएको छ ।

वन कार्यालयका अनुसार बाँके र दाङको सीमानामा रहेको दाङको अमिलिया–रिहार सडकखण्डमा चितुवा र बाघको समुह देखा परेको छ । आइतबार राती लमही नगरपालिका वडा नम्बर ९ हर्दवामा राजमार्गमै चितुवा र बाघको समूह देखापरेको वन कार्यालयले जनाएको छ ।

कार्यालयले दाङको रिहार क्षेत्रबाट बाँकेको शिवखोला, कुसुम क्षेत्रमा मोटरसाइकल, पैदलमार्ग र खुला सवारीसाधनबाट आवतजावत गर्दा विशेष सावधानी अपनाउनसमेत आग्रह गरेको छ । सकेसम्म रातको समयमा एक्लै उक्त क्षेत्र भएर हिडँडुल तथा आवतजावत नगर्न वन कार्यालयको आग्रह छ । अहिले सो क्षेत्रमा रहेको राजमार्गमा हिड्ने दुई पाङ्ग्रे सवारीधनी समूह बनाएर हिड्न थालेका छन् ।

बर्दिया । बबई नदीमा डुबेर सोमबार एक जनाको मृत्यु भएको छ । अर्का एक व्यक्ति बेपत्ता भएका छन् ।

बाग्लुङ घर भएका हुकुम विकको डुबेर मृत्यु भएको हो । बारबर्दियाका लेखनाथ पौडेल नदीमा डुबेर बेपत्ता भएको जिल्ला प्रहरी कार्यालयका प्रहरी उपरीक्षक ईश्वर कार्कीले जानकारी दिनुभयो ।

बेपत्ता पौडेलको खोजी गर्न बबई नदी तटिय क्षेत्रमा प्रहरी परिचालन गरिएको छ । उनको खोजीमा नदी तटीय क्षेत्रका बासिन्दा समेत जुटेका छन् ।

रासस

काठमाडौं । भारतको बिहार तथा आसाममा अवस्थित न्यून चापिय क्षेत्रको प्रभाव नेपालमा पनि परेको छ । सोही मौसमी प्रणालीका कारण नेपालमा बदली र वर्षा गराएको हो ।

जल तथा मौसम विज्ञान विभाग, मौसम पूर्वानुमान महाशाखाका अनुसार हाल गण्डकी, लुम्बिनी, कर्णाली र सुदूरपश्चिम प्रदेशमा सामान्य बदली रही अन्य प्रदेशमा आंशिक बदली रहेको छ । गण्डकी र लुम्बिनी प्रदेशका थोरै स्थानमा हल्का वर्षा भइरहेको छ । राजधानी काठमाडौँ उपत्यकामा बिहान सामान्य बदली रहे पनि अहिले पारिलो घाम लागेको छ । मध्यान्हपछि बदली र वर्षा हुनसक्ने अनुमान गरिएको छ ।

महाशाखाले जारी गरेको आगामी तीन दिनको मौसम पूर्वानुमानअनुसार दिउँसो देशभर आंशिकदेखि सामान्य बदली रही कर्णाली र सुदूरपश्चिम प्रदेका एक दुई स्थानमा र बाँकी प्रदेशका केही स्थानमा मेघ गर्जन/चट्याङसहित हल्कादेखि मध्यम वर्षाको सम्भावना छ । रातिको समयमा पनि सोही मौसमी प्रणाली कायम रहनेछ ।

बुधबार देशभर आंशिकदेखि सामान्य बदली रही कर्णाली र सुदूरपश्चिम प्रदेका एक–दुई स्थानमा र बाँकी प्रदेशका केही स्थानमा मेघ गर्जन/चट्याङसहित हल्कादेखि मध्यम वर्षाको सम्भावना छ । बिहीबार पनि देशभर आंशिकदेखि सामान्य बदली रही केही स्थानमा मेघ गर्जन/चट्याङसहित हल्कादेखि मध्यम वर्षाको सम्भावना रहेको महाशाखाले जनाएको छ ।

इटहरी । नेपालको एक्लो वन्यजन्तु आरक्ष कोसी टप्पुको रैथाने हात्ती मकुना मृत फेला परेको छ । वन्यजन्तु आरक्ष नजिकैको एक्वा वर्ड होटलबाट पाँच सय मिट दुरिमा र बाँध क्षेत्रबाट साढे दुई सय मिटर पुर्व हात्ति मृत फेला परेको हो ।

कोसी टप्पु वन्यजन्तु आरक्षका रेन्जर अंकित पौडेलका अनुसरा हात्ती मृत फेला परेको आरक्षलाई बिहान साढे सात बजे आसपास जानकारी आएको हो । हात्ती के कति कारणले मरेका वा मारिएको बारेमा खोज सुरु भएको रेन्जर पौडेलले बताए ।

स्थानियहरुले भने हात्तीको स्वाभामिक मृत्यु नभएर करेन्ट लाएर मारिएको हुनसक्ने आशंका गरेका छन । हात्ती फेला परेको नजिकै नांगो तार भेटिएको र धेरैले मार्न चाहेको भन्दै मारिएको हुनसक्ने आरक्ष नजिकैका एक युवाले बताए । नाम नभन्ने सर्तमा उनले भने, ‘सीडीओलाई स्थनिय केहि जनप्रतिनिधि र नेताले मार्ने प्रस्तावै गरेका थिए । त्यसैले यो स्वभाविक मृत्यु हैन ।’

मकुना कोसी टप्पुको रैथाने हात्ति हो । आरक्षमा उपलब्ध १७ जंगली हात्तिमा आरक्षमै बसिरहने मकुना मात्रै हो ।

रूपन्देही । नेपाल विद्युत प्राधिकरणले अत्यावश्यक इन्टरनेट सेवा प्रवाहमा अवरोध गरेकोप्रति कम्प्युटर एशोसिएसन नेपाल महासंघ (क्यान महासंघ) खेद प्रकट गरेको छ ।

महासंघका अध्यक्ष नवराज कुँवर र महासचिव नारायण थापाले विज्ञप्ति जारी गर्दै नेपाल विद्युत प्राधिकरणले नियोजित रुपमा भरतपुर, बुटवल, काठमाडौं, विराटनगर, धरान, धनकुटा, ताप्लेजुङ, खाडीचौर, धनगढीलगायतका स्थानहरुमा इन्टरनेट सेवा प्रदायकहरुका फाइबर तार काटेको तथा सोही कारण अत्यावश्यक इन्टरनेट सेवा प्रवाहमा पुगेको अवरोधप्रति खेद प्रकट गरेको हो ।

क्यान अध्यक्ष नवराज कुँवरले सेवाप्रवाह रोकेर अन्याय नगर्न आग्रह गरेका छन् । ‘सरकारी निकाय नेपाल विद्युत प्राधिकरणद्वारा हालैका दिनमा गरिरहेको अत्यावश्यक इन्टरनेट सेवा प्रवाहमा अवरोध पुर्‍याउने गतिविधिहरुप्रति कम्प्युटर एशोसिएसन नेपाल महासंघ (क्यान महासंघ) खेद प्रकट गर्दछ’ विज्ञप्तिमा भनिएको छ ।

क्यान महासंघ सरकारी निकाय नेपाल विद्युत प्राधिकरणले बढाएको पोलको भाडादरका आधारमा पूर्वाधारको लागत अझ बढ्न गइ ईन्टरनेट सेवा प्रवाहमा प्रति ग्राहक १ सय पचास देखि ३ सयसम्म शुल्क बढ्ने क्यानले जनाएको छ ।

कञ्चनपुर । शुक्लाफाँटा नगरपालिकाका बासिन्दा जङ्गली हात्तीको बथान भगाउनका लागि रातभर जाग्राम बस्ने गरेका छन् । पछिल्लो समय शुक्लाफाँटा राष्ट्रिय निकुञ्जबाट छिर्ने हात्तीको बथानले पाकेको धान बाली खाएर नोक्सान पुर्‍याउन थालेपछि उनीहरु चिन्तित भएका हुन् ।

नगरपालिकाको चुरे क्षेत्र फेदीका धान बालीमा हात्तीको बथानले बढी नोक्सानी पुर्‍याउन थालेको छ । ट्र्याक्टरको ठूलो आवाज निकालेर, आगो बालेर, पटाका पड्काएर, उज्यालो गरेर र होहल्ला गरेर हात्तीको बथान भगाउँदै आएको नगरपालिकाको वडा नं ८ का अध्यक्ष बहादुरसिंह महराले जानकारी दिए ।

‘दर्जनौँको संख्यामा साँझ नपर्दै खेतबारीमा हात्तीको बथान पस्ने गरेको छ’, उनले भने, ‘स्थानीय बासिन्दा हात्ती भगाउनका लागि एक हप्तादेखि राति सुत्न पाएका छैनन् ।’ स्थानीयवासीले हात्ती धपाउन रातमा पालैपालो पहरा दिने गरेका छन । वडाध्यक्ष महराका अनुसार जङ्गली हात्तीले स्थानीय किसानको छ बिघा बढी जग्गामा लगाएको धान बाली खाएर सखाप पारिसकेको छ । बेलडाँडी, पारिफाँटा, पिल्लरीफाँटा, कसरौल, गर्जुमनी, खजुवा, पिपलाडीलगायतका क्षेत्रमा हात्तीले बढी क्षति पुर्‍याएको हो ।

साँझपख कुन ठाउँमा हात्ती आउन थालेका छन् । त्यसबारे एक गाउँका बासिन्दाले अर्को गाउँका बासिन्दालाई जानकारी दिई सजग बनाउने कार्यसमेत गर्दै आएका छन् । सोहीअनुसार सतर्कता अपनाइ हात्तीलाई भगाउने गरिएको स्थानीयवासी मदन धामीले बताए । उनका अनुसार हात्तीकै डरले धेरै किसानले पाक्न नपाउँदै धान बाली काटेर चुट्ने कार्यसमेत गरेका छन् । हात्तीको बथान विगत सात वर्षदेखि निरन्तररूपमा यस क्षेत्रमा आउने गरेको छ ।

बथानले खेतमा लगाएको धान बालीसँगै घरभित्र राखेको अन्न खाने र घर नै भत्काइदिने गरेकाले स्थानीय बासिन्दा निकै त्रसित भएका छन् । दुई वर्षअघिमात्रै नगरपालिकाको वडा नं १ बन्साहका एक व्यक्तिको हात्तीको आक्रमणमा परेर मृत्युसमेत भएको थियो । शुक्लाफाँटा राष्ट्रिय निकुञ्जको मध्यवर्ती क्षेत्र र चुरे फेदीका बस्तीमा हात्तीले बढी क्षति पुर्‍याउँदै आएको छ ।

यसैगरी हात्तीले बेदकोट र भीमदत्त नगरपालिका तथा लालझाडी गाउँपालिकाका किसानले खेतमा लगाएको धान बालीमा समेत नोक्सन पुर्‍याउँदै आएको छ । हात्ती भगाउनकै लागि सुरक्षा निकायसमेत परिचालन हुने गरेको छ ।

रासस

महोत्तरी । महोत्तरीगाउँपालिका–२ अनैठामा गएराति एक बालकको सर्पले डसेर मृत्यु भएको छ । मृत्यु हुनेमा मदन रामका १३ वर्षीय छोरा आकाश रहेको जिल्ला प्रहरी कार्यालयका प्रहरी नायब उपरीक्षक प्रकाश विष्टले जानकारी दिए ।

उनका अनुसार ओछ्यानमा सुतिरहेको अवस्थामा बालकलाई सर्पले डसेको र धनुषाको महेन्द्रनगरस्थित सर्पदंश उपचार केन्द्रमा पुर्‍याइएको थियो ।

केन्द्रमा उपचार गरी घर फर्किदै गरेका अवस्थामा बालकको स्वास्थ्यस्थिति जटिल बनेपछि जिल्ला अस्पताल जलेश्वरमा लगिएको र अस्पतालमा नै बालकको मृत्यु भएको जनाइएको छ ।