Author: Anisha Tiwari

खोटाङ । सघन शहरी तथा भवन निर्माण आयोजना ओखलढुंगाले खोटाङमा एउटा अस्पताल सहित सात वटा स्वास्थ्य भवन निर्माण गरेको छ। आयोजनाले आर्थिक वर्ष २०७९–०८० मा करिब २० करोडको लगानीमा सदरमुकाम दिक्तेलस्थित जिल्ला अस्पतालमा सुविधा सम्पन्न भवन निर्माण कार्य अन्तिम चरण पुर्‍याएको छ। सो भवन निर्माण कार्य आगामी आर्थिक वर्षभित्र सम्पन्न गरेर हस्तान्तरण गर्ने लक्ष्य लिइएको जनाइएको छ।

यसै आर्थिक वर्षभित्र आयोजनाले तीन वटा स्वास्थ्य चौकी भवन निर्माण सम्पन्न गरेको छ। केपिलासगढी गाउँपालिकाको बासपानीमा, दिक्तेल रुपाकोट मझुवागढी नगरपालिकाको खाल्लेमा र ऐंसेलुखर्क गाउँपालिकाको जलेश्वरीमा स्वास्थ्य चौकी भवन निर्माण गरेर स्थानीय तहलाई हस्तान्तरण गरिसकेको आयोजनाका खोटाङका साइट इन्जिनियर शुसिलकुमार चौधरीले जानकारी दिए ।

ऐंसेलुखर्क गाउँपालिकाको बाकाचोलमा निर्माणाधिन स्वास्थ्य चौकी भवनको काम ७० प्रतिशत सम्पन्न भइसकेको चौधरीको भनाई छ। जन्तेढुंगा गाउँपालिकाको देवीस्थान, खोटेहाङ गाउँपालिकाको वाप्लुखामा स्वास्थ्य चौकी भवन निर्माण कार्य धमाधम भइरहेको र त्यहाँ ८५ प्रतिशत काम सम्पन्न भइसकेको आयोजनाले बताएको छ।

यस्तै, सडकतर्फ दिक्तेल रुपाकोट मझुवागढी नगरपालिकाको नेर्पा मिलनचोक देखी सिरवास–मेवाखोलासम्मको सडक निर्माण सम्पन्न भएर संचालनमा आइसकेको अवस्था छ। दिक्तेल रुपाकोट मझुवागढी नगरपालिकाकै पाथेका–चिमचिमादेखी सिरुवास सडक स्तरोन्नति, हलेसी तुवाचुङ नगरपालिकाको बडहरेस्थित डाँडागाँउ–लक्ष्मी मावि हुँदै घोपाटार–माझीगाँउ जोड्ने सडक स्तरोन्नतिको काम ९५ प्रतिशत सम्पन्न भइसकेको आयोजनाको भनाई छ।
हलेसी तुवाचुङ नगरपालिका बडहरेस्थित बुद्धेखोला हुँदै लेक–बुङ्देल–बोझे जोड्ने सडक स्तरोन्नतिको ८५ प्रतिशत काम सम्पन्न भइसकेको र बाँकी काम धमाधम भइरहेको छ ।

सघन शहरी तथा भवन निर्माण आयोजना ओखलढुंगाका आयोजना प्रमुख डा.युवराज पौडेलले खोटाङमा संचालित योजनाको प्रगती उल्लेखीय भएको बताएका छन्। ‘हामीले यस आर्थिक वर्षमा खोटाङमा ११ वटा योजना संचालन गरेका थियौं । धेरैजसो सम्पन्न भइसके र बाँकी रहेका केही योजना यसै आर्थिक वर्षभित्र सम्पन्न गर्छौ र केही योजना आगामी आर्थिक वर्षमा सम्पन्न गर्ने लक्ष्य राखेका छौं पौडेलको भनाई छ।

विकासका काममा आलटाल गर्ने कुरामा कसैसँग ‘कम्परमाइज’ हुँदैन। कामको जिम्मा लिने निर्माण कम्पनीले काम तिव्ररुपमा र गुणस्तरीय गर्नुपर्छ भनेर ताकेतासँगै अनुगमन पनि हामीले निरन्तर गरिहेका छौं, पौडेल भने । बाँकी रहेका योजनाको पनि ७० प्रतिशत भन्दा माथि काम सम्पन्न भइसकेको अवस्था रहेको उनले जानकारी दिए। उनले भने, ‘सुविधा सम्पन्नयुक्त जिल्ला अस्पतालको भवन निर्माण कार्य पनि तिव्रगतिमा निर्माण भइरहेको छ।’

जिल्लामा गत आर्थिक वर्षमा सम्पन्न हुन नसकेका योजना यस आर्थिक वर्षभित्र सम्पन्न गर्ने लक्ष्य रहेको आयोजनाको भनाई छ। दिक्तेल रुपाकोट मझुवागढी नगरपालिकाको जिल्ला आयुर्वेद कार्यालय हुँदै भुते जोड्ने सडक, दोर्पा–दुम्ली सडक, हाटडाँडा काफ्ले गाउँ सडक, जन्तेढुंगा गाउँपालिकाको वोपुङ–डुम्रीबोटे हुँदै बंसिलाघाट जोड्ने सडक स्तारोन्नतिको काम धमाधम अवस्थामा रहेको आयोजनाको दावी छ। गत आर्थिक वर्षका अन्य योजनाको पनि काम भइरहेको र चाँडै सम्पन्न गर्नमा ध्यान दिईएको आयोजनाले बताएको छ।

हेटौँडा । प्रदेश उच्च शिक्षा ऐन बनेको १५ महिना पछि बागमती प्रदेश उच्च शिक्षा परिषद्को सचिवालय उद्घाटन भएको छ । बुधबार बागमती प्रदेशका मुख्यमन्त्री शालिकराम जम्कट्टेलले उद्घाटन गरेका हुन् । बागमती प्रदेशसभाले बनाएको प्रदेश उच्च शिक्षा ऐन २०७८ चैत्र १४ गते प्रमाणिकरण भएको थियो । प्रदेश सरकारले प्रदेश उच्च शिक्षा नियमावली २०७९ समेत बनाईसकेको छ । ऐन बनेको १५ महिनापछि आज परिषद् सचिवालयको कार्यालय उद्घाटन भएको हो ।

सचिवालय उद्घाटन भएसँगै अब प्रदेश सरकारलाई प्रदेश विश्वविद्यालयको काम अघि बढाउने बाटो खुलेको छ । १५ सदस्यीय परिषद्को अध्यक्ष मुख्यमन्त्री र उपाध्यक्ष सामजिक विकास मन्त्री रहने व्यवस्था छ । परिषद्को सदस्यहरुका प्रदेश नीति तथा योजना आयोगका उपाध्यक्ष, प्रमुख सचिव, आर्थिक मामिला तथा योजना मन्त्रालयका सचिव, अध्यक्ष र उपाध्यक्षले मनोनित गरेका सदस्यहरु र सामजिक विकास मन्त्रालयका सचिव सदस्य सचिव रहने व्यवस्था छ । परिषदको बैठक एक वर्षमा ३ पटक बस्नै पर्ने ऐनमा उल्लेख छ ।

उद्घाटन समारोहमा बोल्दै बागमती प्रदेशका मुख्यमन्त्री जम्कट्टेलले अब बागमती प्रदेश सरकारले सार्वजनिक विश्वविद्यालय स्थापनामा सरकार अघि बढने बताए । प्रदेश सरकारबाट स्थापना हुने प्रदेश विश्वविद्यालय, प्रदेश सरकारको स्वीकृतिबमोजिम मुनाफा आर्जन नगर्ने सामुदायिक विश्वविद्यालय, शैक्षिक उपाधि प्रदान गर्न सक्ने स्वायत्त प्रतिष्ठान, उच्च शिक्षण संस्था र आङ्गिक क्याम्पसलाई स्वायत्तता दिने मुख्यमन्त्री जम्कट्टेलले बताए । उनले प्रदेशको आवश्यक्तालाई मध्यनजर गर्दै प्राविधिक क्षेत्रमा दक्ष जनशक्ति उत्पादनमा जोड दिन प्रदेश सरकारको मुख्य उद्देश्य रहेको बताए ।