सुर्खेत । नेकपा माओवादी केन्द्रले प्रदेश कमीटीका पदाधिकारी टुंगो लगाएपछि सुर्खेत माओवादी केन्द्रका युवाहरु आक्रोशित भएका छन् ।
जहिलेपनि सुर्खेत, दैलेखका नेतालाई नेतृत्वमा जान नदिने गरिएको, जिल्ला केन्द्रीत गर्न खोजिएको भन्दै युवाहरुले नयाँ निर्माण गरिएको पदाधिकारीमा हेरफेर नगरे आन्दोलन गर्न बाध्य हुने बताएका छन् ।
नेकपा माओवादी केन्द्रले प्रदेश इन्चार्जमा जाजरकोटका शक्तिबहादुर बस्नेत, सह इन्चार्जमा कालिकोटका महेन्द्रबहादुर शाही, जाजरकोटका कालिबहादुर मल्ल र सल्यानका टेकबहादुर बस्नेतलाई मनोनयन गरेको छ । प्रदेश अध्यक्षमा रुकुम पश्चिमका राजकुमार शर्मा र सचिवमा जाजरकोटकै रामदिप आचार्य चयन भएपछि सुर्खेत माओवादमिा हलचल ल्याइदिएको हो ।
‘कर्णाली प्रदेश के सँधै रुकुम पश्चिम, जाजरकोट र कालिकोटले मात्रै चलाउने हो ? अरु बाँकी जिल्लामा माओवादी पार्टी खारेज गरिदिए भैगो नि त उसो भए ।’ युवा राज पौडेल भन्छन्, ‘हिजोका दिनदेखि निरन्तर पार्टीमा लागेका, शरिर भरि गोली र छर्रा बोकेर किन उपेक्षामा नरबहादुर विष्टलाई पारिएको हो ?’ उनले मुख्यमन्त्री महेन्द्रबहादुर शाहीको विरुद्धमा उपसभामुखले अविश्वासको प्रसतावमा हस्ताक्षर गर्नुको कारण अहिले आएर प्रष्ट भएको बताए ।
योङ्ग कम्युनिष्ट लिग सुर्खेतका अध्यक्ष पदम बनले माओवादी नेतृत्वले त्याग, तपस्या गरेका क्षमतावान नेतालाई पाखा लगाएको प्रतिक्रिया दिए । ‘सुर्खेती जनताका प्यारा नेतालाई नेतृत्वले जहिले पनि हेला गर्दै आइरहेको छ । योगदानका हिसाबमा पनि नरबहादुर विष्टको अन्यको भन्दा धेरै छ । तर राजनीतिक रुपमा उहाँलाई सिध्याउन खोजिएको छ ।’ नेपालप्रेससँग कुरा गर्दै उनले भने, ‘उहाँलाई अध्यक्ष वा इन्चार्ज नबनाएसम्म हामी सुर्खेतमा विरोध गरिहन्छौं । ’
Leave a Reply