आज कुन-कुन नदीमा आउन सक्छ बाढी ? तामाकोशीमा जोखिम कायमै रहेको जानकारी

काठमाडौं । सरकारले शनिबार पनि मुलुकका विभिन्न भूभागमा भारी वर्षा हुनसक्ने र नदीनालामा बाढी आउन सक्ने भएकाले सतर्क हुन आग्रह गरेको छ ।

चिनियाँ क्षेत्रमा तामाकोशी नदी थुनिएकाले जिल्ला प्रशासन कार्यालय दोलखाले सूचना जारी गर्दै तटीय क्षेत्रका बासिन्दालाई सुरक्षित स्थानमा जान र सतर्क हुन अपिल गरेको छ ।

तामाकोशी नदीको बहाव घटेको वा बढेको नपाइएको जल तथा मौसम विज्ञान विभागले जनाएको छ । विभागका अनुसार शनिबार बिहान ७ बजेदेखि कोशी, कर्णाली र महाकालीका सहायक नदीमा भारी वर्षा भई पानीको बहाव बढन सक्ने पूर्वानुमान रहेको छ ।

आज कन्काई, पश्चिम राप्ती र बबई नदीमा पानीको बहाव बढ्न सक्ने अनुमान गरिएको छ । प्रदेश १ को इलाम, झापा, सुनसरी, धनकुटा, उदयपुर, भोजपुर, संखुवासभा प्रदेश २ को बारा, पर्सा, सर्लाही, वाग्मती प्रदेशको दोलखा, रामेछाप, रसुवा, सिन्धुपाल्चोक गण्डकी प्रदेशको गोरखा, मनाङ, लमजुङ, कास्की, पर्वत वागलुङ, म्याग्दी, तनँहु, स्याङ्जा, नवलपुरमा वर्षा हुनुका साथै बाढी आउन सक्ने सम्भावना रहेको महाशाखाले जनाएको छ ।
त्यस्तै लुम्बिनी प्रदेशको परासी, रुपन्देही, कपिलवस्तु, अर्धाखाँची, दाङ, बाँके, बर्दिया, पाल्पा, कर्णाली प्रदेशको सुर्खेत, सल्यान, दैलेख, जाजरकोट, कालिकोट, जुम्ला सुदूरपश्चिम प्रदेशको कंचनपुर, कैलाली, डडेलधुरा, बैतडी, डोटी, अछाम, बाजुरा, बझाङ, दार्चुला आसपासमा भारी वर्षा भई नदीहरुमा बाढी आउन सक्ने अनुमान रहेको महाशाखाले जनाएको छ ।