वीरगन्ज । भूमि व्यवस्था, कृषि तथा सहकारी मन्त्री श्याम पटेलले संघीय कानुनका कारण प्रदेशमा काम गर्न थुप्रै चूनौती रहेको बताएका छन ।
वीरगन्ज उद्योग वाणिज्य संघले आज आयोजना गरेको सम्मान कार्यक्रममा बोल्दै मन्त्री पटेलले कर्मचारीहरुले गरेको ब्रिफिङ अनुसार संघीय कानुनको बाधा अडचनका कारण प्रदेशमा किसानका समस्या समाधान असर पुग्ने गरेको पाइएको बताएका हुन ।
उनका अनुसार भूमि सम्बन्धी ऐन छैन, यस्ता अरु थुप्रै कानुन नेपाल सरकारले ल्याउन सकेको छैन । जसका कारण प्रदेशमा काम गर्न कठिनाइ हुने गरेको पाइएको उनको भनाइ छ ।
तर त्यसको बाबजुद पनि आफ्नो कार्यकालभर किसानका समस्याको समाधानका लागि दत्तचित्त भएर काम गर्ने उनले प्रतिबद्धता व्यक्त गरेका छन ।
“संघीयता आए पनि कानुनी अडचन छन्, तर त्यसले काम रोकिँदैन,” उनले भने।
उनका अनुसार वर्तमान अवस्थामा किसानहरू अनेक समस्याबाट गुज्रिरहेका छन, ती समस्याको समाधान नै आफ्नो पहिलो प्राथमिकता रहनेछ ।
“म आफैँ किसानको छोरा हुँ, त्यसैले किसानका पीडा र समस्या मलाई राम्ररी थाहा छ,” मन्त्री पटेलले भने, “कार्यभार सम्हालेको दिन मातहतका कर्मचारीहरूले दिएको ब्रिफिङ सुनेपछि प्रदेशका किसानको अवस्था कति जर्जर छ भन्ने कुरा अझ स्पष्ट रूपमा बुझ्न पाएँ। ती सबै समस्यालाई सम्बोधन गर्ने गरी अध्ययन अघि बढाएको छु।”
सम्मान कार्यक्रममा मन्त्री पटेलले पहिलो चरणमा किसानदेखि व्यवसायीसम्मसँग स्थलगतरूपमा भेटघाट गरी सुझाव संकलन गरिरहेको जानकारी दिए।
उनका अनुसार मधेस प्रदेशलाई कृषि क्षेत्रमा नमुना बनाउने लक्ष्यसहित सुझाव लिने काम भइरहेको छ।
मन्त्री पटेलले किसान तथा व्यवसायीहरुलाइ आफूलाई मन्त्री नभई भाइ सम्झेर सल्लाह दिन आग्रहसमेत गरेका छन ।
उनी भन्छन, “म मन्त्री होइन, तपाईंहरूको भाइ हुँ। भाइ सम्झेर खुलेर सल्लाह दिनुहोस्, प्रदेशको हितमा हुने सबै सल्लाह कार्यान्वयन गर्नेछु ।”
उखु किसानको समस्याबारे पनि गुनासो आएको जनाउँदै मन्त्री पटेलले त्यसको समाधानका लागि मन्त्रालयस्तरमै छलफल अघि बढाएको मन्त्री पटेलको प्रष्टोक्ति छ ।
उनका अनुसार किसानमैत्री नीति र कार्यक्रममार्फत प्रदेशको कृषि क्षेत्र सुधार गर्ने आफ्नो प्रयास निरन्तर रहनेछ ।
वीरगन्ज उद्योग वाणिज्य संघका अध्यक्ष हरि गौतमको अध्यक्षता कार्यक्रममा सम्पन्न भएको थियो ।
Leave a Reply