बुटवलमा राष्ट्रिय स्तरको महोत्सव हुने, कृषि, प्रविधि, पर्यटन र औद्योगिक प्रदर्शनी गरिने

काठमाडौं । रुपन्देही उद्योग सङ्घको आयोजना तथा बुटवल उपमहानगरपालिका र नेपाल उद्योग परिसंघको संरक्षकत्वमा राष्ट्रिय औद्योगिक प्रदर्शनी, कृषि, प्रविधि तथा पर्यटन महोत्सव हुने भएको छ ।

आगामी पुस ३ गतेदेखि १७ गतेसम्म बुटवलमा १६औँ राष्ट्रिय औद्योगिक प्रदर्शनी, कृषि, प्रविधि तथा पर्यटन महोत्सव हुने भएको हो ।

औद्योगिक प्रदर्शनीका विषयमा काठमाडौंमा पत्रकार सम्मेलन गर्दै संघले १६औँ राष्ट्रिय औद्योगिक प्रदर्शनी, कृषि, प्रविधि तथा पर्यटन महोत्सव २०८२ को नारा ‘समृद्ध नेपाल निर्माणको आधार, स्वदेशी उद्यमशीलताको विस्तार’ रहेको छ। सङ्घले २०४५ सालमा नेपालमै पहिलो पटक र २०५३ सालदेखि निरन्तर औद्योगिक प्रदर्शनी आयोजना गरिएको जनाएको छ ।

बुटवलस्थित अन्तर्राष्ट्रिय प्रदर्शनी केन्द्रमा आयोजना हुने औद्योगिक प्रदर्शनीमा स्वदेशी उत्पादन, नयाँ प्रविधि, पर्यटन तथा कृषि उत्पादनसँग सम्बन्धित वस्तुहरूका लागि छुट्टाछुट्टै १० वटा पेभिलियन हुनेछन् ।

नेपाल उद्योग परिसंघका अध्यक्ष वीरेन्द्रराज पाण्डेले अहिले उद्योगीहरू संकटमा परिरहेको बेला रुपन्देही उद्योग संघले स्वदेशी उद्योगको उत्पादन प्रवर्द्धन गर्नका लागि गरेको प्रदर्शनीले सबैलाई उत्साह थप्ने र निराशालाई चिर्न सक्ने अपेक्षा गरेको बताए ।

उनले उद्योगहरू स्थापित नभएसम्म र निजी क्षेत्र बलियो नभएसम्म देशलाई समृद्धिमा लैजान नसकिने भएकाले यो विषयमा ध्यान दिन आग्रह गरे ।

भर्खर निर्माण सम्पन्न भएको आधुनिक अन्तर्राष्ट्रिय प्रदर्शनी केन्द्रमा आधुनिक स्तरकै स्टल हुनेछन् । यसको सजावटदेखि व्यवस्थापन तथा हालसम्म आयोजना भएका प्रदर्शनी भन्दा धेरै भिन्न हुनेछन् ।

स्वदेशी उद्योगका उत्पादन मात्रै प्रदर्शन र तीनको बजारीकरण गर्दै उपभोक्तामा स्वदेशी उत्पादन प्रयोग गर्नुपर्छ भन्ने भावनाको विकास गराउने यो प्रदर्शनीको मुख्य उद्देश्य रहेको संघका अध्यक्ष कृष्णप्रसाद पराजुलीले बताए ।

आयोजना गर्ने हरेक प्रदर्शनीहरू सधैँ नमुना अर्थात् भिन्न खालको हुने गरेको छ । सो पटकको प्रदर्शनीमा नेपाल उद्योग परिसङ्घले सञ्चालन गरिरहेको मेक इन नेपाल स्वदेशी अभियानलाई थप प्राथमिकताका साथ अगाडि बढाएको निवर्तमान अध्यक्ष दिलीप सापकोटाले जनाए ।

प्रदर्शनीको मुख्य उद्देश्य नै स्वदेशी उद्योगलाई प्रवर्द्धन गर्ने भएकाले प्रदर्शनीमा स्वदेशी उत्पादन मात्रै समावेश हुने उनको भनाइ छ ।

संघले प्रदर्शनीका मुख्य उद्देश्यहरूमा स्वदेशी उत्पादनहरूको प्रदर्शन र बजारीकरण, प्राविधिक र व्यावसायिक अनुभवको आदान प्रदान, नेपाली उद्योगको लागि अवसरको खोजी, उत्पादन उपभोक्ताहरू र सरकारी निकायबीच अन्तर्संवाद, आन्तरिक तथा बाह्य औद्योगिक वातावरणको जानकारी, निर्यातमूलक उद्योगको पहिचान र प्रोत्साहन, युवा तथा महिला उद्यमीहरूलाई प्रोत्साहन, पर्यटक क्षेत्रका व्यवस्था बारेमा सरोकारवालाबीच छलफल, औद्योगिक जनशक्ति निर्माणलाई राखिएको संघका पूर्व अध्यक्ष तथा नेपाल उद्योग परिसंघका लुम्बिनी अध्यक्ष एजाज आलमले बताए ।

देशको आर्थिक विकासको मेरुदण्डका रूपमा रहेको औद्योगिक क्षेत्रको संरक्षण, संवर्द्धन र विस्तारलाई मुख्य लक्ष्य बनाउँदै आगामी १६औँ राष्ट्रिय औद्योगिक प्रदर्शनी, कृषि, प्रविधि तथा पर्यटन महोत्सव–२०८२ आयोजना गर्न लागिएको उद्योग सङ्घले जानकारी गराएको छ।

स्वदेशी उत्पादनको प्रयोगलाई प्राथमिकतामा राख्ने र नयाँ उद्योग स्थापनालाई प्रेरित गर्ने उद्देश्यसहित यो महोत्सवले उद्योग तथा उपभोक्ताबीचको प्रत्यक्ष सम्पर्कलाई अझ सुदृढ बनाउने अपेक्षा गरिएको छ।

आयोजकका अनुसार प्रदर्शनीले स्वदेशी उत्पादनलाई व्यापक प्रचार–प्रसार गर्ने मात्र नभई, देशभरको औद्योगिक सम्भावनाको खोजी, नयाँ प्रविधिको पहिचान, कृषि व्यवसायीकरण, पर्यटन प्रवर्द्धन तथा युवा उद्यमशीलतालाई प्रोत्साहन दिने महत्त्वपूर्ण भूमिका खेल्नेछ।

साथै, कला–संस्कृतिको संरक्षण, गोष्ठी तथा अन्तरक्रिया कार्यक्रममार्फत ज्ञान आदानप्रदान गर्ने वातावरण पनि निर्माण गरिनेछ।

यस वर्षको प्रदर्शनीमा औद्योगिक प्रविधि, कृषि, हस्तकला, गार्मेन्ट, बेकरी र कन्फेक्सनरी, छाला उद्योग, खाद्यान्न, सूचना प्रविधि लगायतका क्षेत्र समेटिएका करिब ५०० स्टल रहनेछन्। प्रदर्शनीलाई हेर्न ८ लाखभन्दा बढी दर्शक आउने र करिब ३० करोड रुपैयाँ बराबरको व्यवसाय हुने अनुमान गरिएको छ।

महोत्सवलाई विविध तथा मनोरञ्जनात्मक बनाउन लोकदोहोरी प्रतियोगिता, आधुनिक गीत–सङ्गीत प्रस्तुति, हास्य कलाकारका कार्यक्रम, स्थानीय कलाकारका प्रदर्शन, विद्यालय तथा कलेज स्तरका लोकनृत्य र वक्तृत्वकला प्रतियोगिता, लोक भजन प्रतियोगिता र ‘प्रदर्शनी आइडल’ लगायतका विभिन्न सांस्कृतिक तथा प्रतिस्पर्धात्मक कार्यक्रम समावेश गरिएको छ।

महोत्सव सफल बनाउन रुपन्देही उद्योग सङ्घका अध्यक्षको संयोजकत्वमा १०१ सदस्यीय मूल समिति, ५१ सदस्यीय विशेष सल्लाहकार समिति, २५१ सदस्यीय सल्लाहकार समिति, साथै निवर्तमान अध्यक्षको संयोजनमा विशेष मूल्याङ्कन समिति तथा ३० वटा विभिन्न उपसमिति गठन गरिएको छ।

औद्योगिक, कृषि, पर्यटन र प्रविधि क्षेत्रलाई एकै स्थानमा जोड्ने महत्त्वपूर्ण मञ्चका रूपमा स्थापित हुने आयोजकको भनाई छ ।