श्याममोहन श्रेष्ठको पुस्तक ‘एक फिरन्तेको चट्याङे जीवन’ र ‘एन ओभरल्यान्ड ओडिसी’ सार्वजनिक

काठमाडौं । पर्यटन व्यवसायी श्याममोहन श्रेष्ठको जीवनकथा ‘एक फिरन्तेको चट्याङे जीवन’ र ‘एन ओभरल्यान्ड ओडिसी’ एकसाथ पाठकमाझ आएका छन् ।

पूर्व राजदूत केदारभक्त माथेमा, लेखक कर्ण शाक्य, चलचित्र निर्देशक प्रकाश सायमी, साहित्यकार भागीरथी श्रेष्ठ, प्राध्यापक डा. काशीराज पाण्डे, बैंकर सुशीलराम माथेमा, गेट कलेजका संस्थापक खेम लकाई र लेखकले संयुक्त रूपमा लोकार्पण गरेका हुन् ।

कार्यक्रमका प्रमुख अतिथि एवं त्रिभुवन विश्वविद्यालयका पूर्व उपकुलपति केदारभक्त माथेमाले श्याममोहनका दुवै पुस्तक जीवनमा निरन्तर अगाडि बढ्ने तर कहिल्यै हार नमान्नेको जीवनकथा भएको बताए ।

समाजमा आफ्नो स्थान खोज्न सङ्‍घर्ष गरिरहेका युवा पुस्ताका लागि पुस्तक प्रेरणादायी रहेको उनको टिप्पणी छ । ‘श्याममोहनलाई मैले ६ दशक पहिले दरबार स्कुलमा फ्रेन्च भाषा पढ्दा भेटेको हुँ,’ माथेमाले भने, ‘यी दुई पुस्तकमा मेरो पुस्ताको कथा समेटिएका छन् । त्यसैले पनि मलाई अति रोचक लागेको छ । यसले नेपालको बडी अफ नलेज पनि फराकिलो पारेको छ ।’

पर्यटन व्यवसायी एवं बेस्टसेलर लेखक शाक्यले दुवै पुस्तकमा ‘सेन्स अफ ह्युमर’ प्रशस्त रहेको बताए । ‘श्याममोहन र म सन् १९७०/७१ देखिका साथी हौं । उनले मलाई एयर फ्रान्सको अफिसमा फ्रान्सबाट ल्याएको तीतो कफी पहिलो पटक खुवाएका थिए,’ उनले भने, ‘हामी अलिअलि सोखिन, अलिअलि हाउडे, अलिअलि हिप्पी, अलिअलि सनकी र अलिअलि रौंसे हौं ।’

निर्देशक सायमीले श्याममोहन श्रेष्ठका दुई पुस्तक आत्मकथा मात्रै नभएर यात्रा, प्रेम, रोमान्स, अनुभूति र आत्मखोजको रोमाञ्चक दस्तावेज भएको बताए । साहित्यकार भागीरथी श्रेष्ठले पुस्तक हातमा लिएपछि नसकुन्जेल छाड्न नसकिने खालको रहेको सुनाइन् ।

नेपाल–फ्रान्स उद्योग वाणिज्य संघका संस्थापक अध्यक्ष समेत रहेका श्याममोहन श्रेष्ठले ३० वर्ष एयर फ्रान्समा काम गर्नुका साथै धुलिखेलमा मिराबेल होटल खोलेर पर्यटन व्यवसायलाई महत्त्वपूर्ण योगदान गरेका थिए । नेपाल–फ्रान्स सम्बन्धमा विशेष भूमिका खेलेबापत उनले सन् २०१९ मा फ्रान्स सरकारको सर्वोच्च नागरिक सम्मान ‘सभालियँ दँ लोर्द नेसियोनाल द ला लेजियों दो–नोर’ प्राप्त गरेका छन् ।

‘एक फिरन्तेको चट्याङे जीवन’ र ‘एन ओभरल्यान्ड ओडिसी’ मा श्याममोहनको झण्डै आठ दशक लामो जीवन यात्राका रोचकघोचक प्रसङ्‍गहरू इमानदारीपूर्वक समेटिएका छन् । इन्डिगो इन्कले प्रकाशनमा ल्याएको नेपाली पुस्तकको मूल्य ७९९ र अंग्रेजीको मूल्य ५९९ रुपैयाँ रहेको छ ।