उमेरका हिसाबले उत्तरार्द्धतिर भए पनि जेनजीभन्दा कम छैनौँ : प्रचण्ड

काठमाडौं । नेपाली कम्युनिस्ट पार्टीका संयोजक पुष्पकमल दाहाल प्रचण्डले आफूहरू जेनजी युवाभन्दा कम नभएको बताएका छन्।

जसपासहित ४ घटकसँगको एकता सभालाई सम्बोधन गर्दै नेकपा जेनजी युवाहरूको असली अभिभावक भएको दोहोर्‍याए।

उनले भने, ‘हामी यहाँ उपस्थित भएको नेताहरू उमेरको हिसाबले उत्तरार्धतिर छौँ। तर राष्ट्रप्रतिको जिम्मेवारीप्रति, समाजवादको यात्रामा अगाडि बढ्नुपर्छ भन्ने कुरामा हामी कुनै जेनजी युवाभन्दा कम छैनौँ। अन्तिम समयसम्म हामी त्यो भूमिका पूरा गर्न चाहन्छौँ।’

उनले आफ्नो लागि अब पद ठुलो कुरा नभएको बताए। उनले थपे, ‘फेरि यहाँ पद छाड्नै चाहेन भन्छन्, हामीलाई सक्रिय राजनीति गर्ने वातावरण बन्यो भने पद ठुलो कुरा होइन। पदमा नभएपनि विश्वका ठुलठुला नेताहरूले राष्ट्र निर्माणमा भूमिका खेलेका छन्।’

आगामी महाधिवेशनले नै नेकपाको नयाँ मोडेलको खाका कोर्ने बताए। उनले आजसम्म १७ घटक एकता प्रक्रियामा आएको भन्दै कुनै विमति नभएको बताए।