काठमाडौं । नेपाली कम्युनिस्ट पार्टीका संयोजक पुष्पकमल दाहाल प्रचण्डले सबै घटकहरूसँग अब केन्द्रीय सदस्यहरूको सङ्ख्या मात्रै बढाउनेतिर ध्यान नदिनेबारे छलफल भएको बताएका छन्।
बागमती प्रदेशमा कार्यरत केन्द्रीय सदस्यहरूको बैठकहरूको बैठकलाई सम्बोधन गर्दै हिजो एउटा पक्षमा पालिका कमिटीमा राख्न पनि उपयुक्त हुँदैन भनेकाहरू अहिले केन्द्रीय समिति र पोलिटब्युरो भएर आइसके भन्ने पनि सुनिएको बताए।
उनले भने, ‘त्यसो हुँदा इमान्दारहरुलाई अपमान र हीनताबोध हुन जान्छ त्यसले राष्ट्रिय राजनीतिमा जस्तो आन्दोलन तयार गर्नुपर्ने हो त्यो नहुन सक्छ, हामीले अलग अलग घटकहरूसँग छलफल गर्दा केन्द्रीय सदस्यहरूको सङ्ख्या मात्रै बढाउनेतिर ध्यान नदिऔँ भन्ने छ।’
नेकपाले देशको नेतृत्व गर्ने गरी अघि बढेको देखेपछि देशभित्र र बाहिरका प्रतिक्रियावादीहरूमा आतङ्क सिर्जना भएको बताए।
उनले थपे, ‘हाम्रो एकताले अवसरवादीहरूलाई पनि छटपटी भएको छ, त्यसले झूट बोलेर, सोसल मिडियाको प्रयोग गरेर भ्रम छर्ने काम भइरहेको छ।’
बैठकले प्रदेश स्तरीय एकता सभा मंसिर २३ गते हेटौँडामा गर्ने र जिल्ला स्तरीय र पालिका स्तरीय सभा पनि गर्ने निर्णय गरेको छ।
Leave a Reply