तुइनखोलाकाे १५ हजार घनमिटर पहिरो पन्छाएर सकिन लाग्यो, रातिदेखि नै बाटो खुल्ने

चितवन । तुइनखोलामा दुई दिनदेखि खसेक‍ो पहिरो पन्छाउने काम अन्तिम चरणमा पुगेको छ । माथिबाट खसेको १५ हजार घनमिटर बराबरको पहिरोको राति ९ बजेसम्म करिब एक हजार घटनमिटर जति पन्छाउन बाँकी रहेको सडक डिभिजन कार्यालय भरतपुरका इन्जिनियर अर्जुन घिमिरेले जानकारी दिए ।

उनका अनुसार अहिले माथिबाट खसेर भित्तामा अड्किएका ढुङ्गा माटो पनि पन्छाउने काम भइरहेक‍ो छ ।

‘माथिबाट झर्न लागेजस्ता लगभग सबै जसो ढुङ्गा माटो खसेको देखिन्छ’, उनले नेपाल प्रेससँग कुरा गर्दै भने, – हामी भित्तातिर अड्किएका सबै सफा गरेर मात्रै सडक खुलाउने तयारीमा छौँ ।

अहिले डिभिजन सडकका इन्जिनियर सहितको ७ जना प्राविधिक टोली, सात जना अपरेटर, चितवनका प्रमुख जिल्ला अधिकारी, प्रहरी प्रमुख सहितको टोली तुइनखोलामा खटिएका छन् ।

दसैंको समयमा यात्रुहरु तथा ढुवानीका सामग्री अलपत्र नपरुन् भनेर आज राति नै सडक सञ्चालनमा ल्याउने तयारी गरिएको जनाइएको छ । रातिको समयमा फ्लोड लाइट बालेर पहिरो सफा गरिएको हो ।

ठूलो पहिरो पछि हिजो पनि पानी परेर लेदोसहितको पहिरो खसेको थियो । आज भने माथिबाट पहिरो खसेको नदेखिएको इन्जिनियर घिमिरेले बताए ।

यद्यपि पहिरो ठूलो र जोखिमस्थल ठाउँ भएकोले प्राविधिक टोली पहिरो गएको माथि परीक्षणका लागि भने जान सक्ने अवस्था नरहेको इन्जिनियर घिमिरेले बताए । ड्रोन र पारीतर्फबाट खिचिएको फोटो हेरेर प्राविधिक टोलीले तत्काल तुइनखोलाको भीरमा पहिरो नखस्ने अनुमान गरेको छ । यद्यपि यश क्षेत्रमा जोखिम कायम भएकोले सावधानी अपनाएर यात्रा गर्नुपर्ने इन्जिनियर घिमिरेले बताए ।