स्थानीय तहको कार्यसम्पादन मूल्यांकनमा धादिङको नीलकण्ठ नगरपालिका सर्वोत्कृष्ट

काठमाडौं । संघीय मामिला तथा सामान्य प्रशासन मन्त्रालयले आर्थिक वर्ष २०८०/८१ को स्थानीय तह संस्थागत क्षमता स्वमूल्याङ्कन (लिजा) को नतिजा सार्वजनिक गरेको छ । देशभरका ७५३ स्थानीय तहमध्ये धादिङको नीलकण्ठ नगरपालिका ९३.५० अंक प्राप्त गरी सर्वोत्कृष्ट भएको हो ।

नीलकण्ठ नगरपालिकाको प्रमुख भीमप्रसाद ढुंगाना रहेका छन् । उनी नेपाली काँग्रेसबाट निर्वाचित भएका हुन् । ढुंगाना नगरपालिका संघका अध्यक्ष समेत हुन् । यस्तै उपप्रमुख दिपक विश्वकर्मा छन् । उनी नेकपा (माओवादी केन्द्र)बाट निर्वाचित हुन् ।

मन्त्रालयले शुक्रबार नतिजा सार्वजनिक गर्दै उत्कृष्ट पालिकालाई सम्मान समेत गरेको छ ।

शुक्रबार मन्त्रालयमा आयोजित एक कार्यक्रममा संघीय मामिला तथा सामान्य प्रशासन मन्त्री भगवती न्यौपानेले उत्कृष्ट नतिजा ल्याउने पालिकालाई सम्मान गरेकी हुन् ।

कार्यक्रममा नगरपालिकातर्फ प्रथम, द्वितीय र तृतीय स्थान हासिल गर्ने क्रमशः धादिङको नीलकण्ठ नगरपालिका, चितवनको खैरहनी नगरपालिका र रुपन्देहीको तिलोत्तमा नगरपालिकालाई सम्मान गरिएको थियो । खैरहनी नगरपालिकाको प्रमुख शशीकुमार खनिया छन् । उनी पनि नेपाली कांग्रेसबाटै निर्वाचित हुन् । उपप्रमुख भने कविता उप्रेती छन् । उनी नेकपा (एमाले)बाट निर्वाचित हुन् ।

त्यसैगरी, गाउँपालिकातर्फ धादिङकै बेनीघाट रोराङ गाउँपालिका प्रथम, गुल्मीको रुरुक्षेत्र गाउँपालिका द्वितीय र स्याङ्जाको अर्जुनचौपारी गाउँपालिका तृतीय भएका छन् । स्थानीय तहको कार्यप्रक्रिया, उपलब्धि र शासकीय पद्धतिको लेखाजोखा गरी सुधारका क्षेत्र पहिचान गर्ने र स्वस्थ प्रतिस्पर्धाको भावना जागृत गराउने उद्देश्यले मन्त्रालयले हरेक वर्ष यो मूल्यांकन गर्दै आएको छ । बेनिघाट रोराङ गाउँपालिकाको अध्यक्ष कृष्णबहादुर थपलिया छन् । उनी माआवादी केन्द्रबाट निर्वाचित हुन् । गाउँपालिकाको उपाध्यक्ष टापबहादुर श्रेष्ठ छन् । उनी नेकपा (एकीकृत समाजवादी) निर्वाचित जनप्रतिनिधि हुन् ।

कार्यक्रममा मन्त्री न्यौपनेले गुणस्तर परीक्षणपछिको नतिजामा उत्कृष्ट हुने पालिकालाई बधाई दिँदै सुशासनको अभ्यासलाई थप उचाइमा पुर्याउन आग्रह गरिन् । त्यसै अवसरमा मन्त्रालयले नयाँ ‘स्थानीय शासन कार्यसम्पादन मूल्याङ्कन प्रणाली (एलजीपीएएस)’ को समेत शुभारम्भ गरेको छ । यो नयाँ प्रणालीले स्थानीय तहको कार्यसम्पादनलाई थप प्रभावकारी र नतिजामुखी बनाउन सहयोग पुग्ने विश्वास मन्त्रालयले लिएको छ ।

मन्त्रालयले सार्वजनिक गरेको नतिजा अनुसार सर्वोत्कृष्ट २ मा नगरपालिका नै परेका छन् । तेस्रो नम्बरमा आएर गाउँपालिका पर्न सफल भएको छ । तेस्रो नम्बरमा बेनीघाट रोराङ गाउँपालिका, धादिङ परेको छ । जुन गाउँपालिकामध्ये सबैभन्दा उत्कृष्ट स्थानीय तह बनेको छ ।

उत्कृष्ट १० मा ७ नगरपालिका र ३ गाउँपालिका, महानगरपालिका र उपमहानगरपालिका अटाएनन

यस वर्षको मूल्यांकनमा ९० भन्दा बढी अंक ल्याउने स्थानीय तहको संख्या ५ रहेको छ । उत्कृष्ट १० स्थानीय तहमा ७ वटा नगरपालिका पर्न सफल भएका छन् भने बाँकी ३ वटा गाउँपालिका परेका छन् ।

समग्रमा उत्कृष्ट १० भित्र पर्न सफल स्थानीय तह

१. नीलकण्ठ नगरपालिका, धादिङ – ९३.५० अंक

२. खैरहनी नगरपालिका, चितवन – ९२.७५ अंक

३.बेनीघाट रोराङ गाउँपालिका, धादिङ – ९१.७५ अंक

४. तिलोत्तमा नगरपालिका, रुपन्देही – ९१.२५ अंक

५. देवदह नगरपालिका, रुपन्देही – ९०.७५ अंक

६. सूर्योदय नगरपालिका, इलाम – ९०.५० अंक

७.रुरुक्षेत्र गाउँपालिका, गुल्मी – ९० अंक

८. बाणगंगा नगरपालिका, कपिलवस्तु – ८९.७५ अंक

९. रत्ननगर नगरपालिका, चितवन – ८९.०० अंक

१०. अर्जुनचौपारी गाउँपालिका, स्याङ्जा – ८८.७५ अंक

महानगरपालिकामा ललितपुर सबैभन्दा उत्कृष्ट, काठमाडौं पाँचौँमा

देशका ६ वटा महानगरपालिकमध्ये ललितपुर महानगरपालिकाले सबैभन्दा बढी अंक ल्याएर पहिलो स्थान हासिल गरेको छ । उच्च १० स्थानीय तहमा महानगरपालिका पर्न सकेन ।

ललितपुर महानगरपालिकाः ८८.२५ अंक

विराटनगर महानगरपालिकाः ८७.२५ अंक

भरतपुर महानगरपालिकाः ८६.५० अंक

पोखरा महानगरपालिकाः ८३.५० अंक

काठमाडौँ महानगरपालिकाः ८१.७५ अंक

वीरगञ्ज महानगरपालिकाः ६५.२५ अंक

उपमहानगरपालिकामा बुटवल सबैभन्दा उत्कृष्ट, धरान आठौँ नम्बरमा

११ वटा उपमहानगरपालिकमध्ये रुपन्देहीको बुटवल उपमहानगरपालिकाले ८८.५० अंकसहित शीर्ष स्थान ओगटेको छ । उत्कृष्ठ १० स्थानीय तहमा उपमहानगरपालिका पर्न सकेनन् ।

११ उपमहानगरपालिकाको बरियता

बुटवल उपमहानगरपालिकाः ८८.५० अंक

घोराही उपमहानगरपालिकाः ८७.०० अंक

हेटौडा उपमहानगरपालिकाः ८६.२५ अंक

धनगढी उपमहानगरपालिकाः ८४.०० अंक

नेपालगञ्ज उपमहानगरपालिकाः ८२.०० अंक

इटहरी उपमहानगरपालिकाः ८०.०० अंक

तुल्सीपुर उपमहानगरपालिकाः ७९.०० अंक

धरान उपमहानगरपालिकाः ७७.५० अंक

कलैया उपमहानगरपालिकाः ७६.५० अंक

जीतपुर सिमरा उपमहानगरपालिकाः ६५.२५ अंक

जनकपुर उपमहानगरपालिकाः ५०.२५ अंक

मुलुककै सर्वोत्कृट नगरपालिका नै नगरपालिकाको पहिलो, दोस्रोमा खैरहनी

मुलुककै सर्वोत्कृष्ट नगरपालिका नै नगरपालिकाको पनि पहिलो बन्न सफल भएको छ । दोस्रोमा भने चितवनको खैरहनी नगरपालिका बन्न सफल भएको छ ।

उत्कृष्ट नतिजा ल्याउने शीर्ष १० मा पर्ने नगरपालिका

१. नीलकण्ठ नगरपालिका, धादिङ – ९३.५० अंक

२. खैरहनी नगरपालिका, चितवन – ९२.७५ अंक

३. तिलोत्तमा नगरपालिका, रुपन्देही – ९१.२५ अंक

४. देवदह नगरपालिका, रुपन्देही – ९०.७५ अंक

५. सूर्योदय नगरपालिका, इलाम – ९०.५० अंक

६. बाणगंगा नगरपालिका, कपिलवस्तु – ८९.७५ अंक

७. रत्ननगर नगरपालिका, चितवन – ८९.०० अंक

८. सिद्धार्थनगर नगरपालिका, रुपन्देही – ८८.५० अंक

९. सूर्यविनायक नगरपालिका, भक्तपुर – ८८.०० अंक

१०. भिरकोट नगरपालिका, स्याङ्जा – ८८.०० अंक

गाउँपालिकातर्फ माओवादीले नेतृत्व गरेको बेनीघाट रोराङ गाउँपालिका उत्कृष्ट

७५३ वटै स्थानीय तहको सर्वोत्कृष्ट पालिका धादिङको निलकण्ठ नगरपालिका बन्दा गाउँपालिकातर्फ पनि धादिङकै बेनीघाट रोराङ गाउँपालिका उत्कृष्ट अंक ल्याएर पहिलो स्थान हासिल गरेको छ । दोस्रोमा भने गुल्मीको रुरुक्षेत्र गाउँपालिका बनेको छ । गाउँपालिकातर्फ सातौ स्थानदेखि १० औँ स्थानसम्मका ३ पालिकाले बराबर ८७ अंक प्राप्त गरेका छन् । जसमा मदाने गाउँपालिका गुल्मी, मालिका गाउँपालिका गुल्मी, रुपा गाउँपालिका कास्की र भिमसेन थापा गाउँपालिका गोरखा रहेका छन् ।

यि हुन उत्कृष्ट १० गाउँपालिका

१.बेनीघाट रोराङ गाउँपालिका, धादिङ – ९१.७५ अंक

२.रुरुक्षेत्र गाउँपालिका, गुल्मी – ९० अंक

३. अर्जुनचौपारी गाउँपालिका, स्याङ्जा – ८८.७५ अंक

४. जलजला गाउँपालिका, पर्वत – ८८.०० अंक

५. धुर्कोट गाउँपालिका, गुल्मी – ८७.५० अंक

६. सुस्ता गाउँपालिका, नवलपरासी (बर्दघाट सुस्ता नेपाल) – ८७.२५ अंक

७. मदाने गाउँपालिका, गुल्मी – ८७.०० अंक

८. मालिका गाउँपालिका, गुल्मी – ८७.०० अंक

९. रुपा गाउँपालिका, कास्की – ८७.०० अंक

१०. भिमसेन थापा गाउँपालिका, गोरखा – ८७.०० अंक