रुपन्देहीको उपचुनावमा नाउपा अयोग्य, यी हुन् भाग लिन पाउने २६ दल

काठमाडौं । रुपन्देही निर्वाचन क्षेत्र नम्बर ३ को आसन्न उपचुनावमा २६ दलले भाग लिन पाएका छन् । निर्वाचन आयोगले चुनावका लागि दल दर्ता गराएकोमा रित पुगेका २६ दललाई योग्य घोषणा गरेको हो ।

२७ दलले दल दर्ताका लागि निवेदन पेश गरेकोमा रञ्जिता श्रेष्ठ नेतृत्वको नागरिक उन्मुक्ति पार्टी (नाउपा) भने उपचुनावको लागि अयोग्य ठहरिएको छ । नागरिक उन्मुक्ति पार्टीले दर्ताका लागि पेश गर्नुपर्ने विवरण पेश नगरेकाकाले अयोग्य ठहरिएको आयोगका प्रवक्ता नीता पोखरेलले नेपाल प्रेसलाई बताइन् । उनका अनुसार नाउपाले केन्द्रीय समितिको निर्णय लगायतका विवरण पेश गरेको थिएन ।

पार्टीको आन्तरिक विवादका कारण नाउपाका दुई समूहले छुट्टाछुट्टै निवेदन दर्ता गराएको थियो । नाउपाबाट संरक्षक रेशमलाल चौधरी पक्षबाट रामलाल डगौराले साउन २३ र अध्यक्ष रञ्जिता श्रेष्ठले अन्तिम दिन २७ गते दल दर्ताको निवेदन दिएकी थिइन् ।

निर्वाचन आयोगको निर्णय अनुसार गत साउन २१ देखि २७ गतेसम्म नेपालको संविधानको धारा २७१ र राजनीतिक दल सम्बन्धी ऐन, २०७३ को दफा ४८ बमोजिम निवेदन दर्ता हुन आएका २७ राजनीतिक दलमध्ये कानूनी रीत पुरा भएका २६ दललाई राजनीतिक दल सम्बन्धी ऐन, २०७४ को नियम १७ को उपनियम ४ बमोजिम दल दर्ता गरिएको आयोगका सहसचिव एवम प्रवक्ता नीता पोखरेलले बताइन् ।

दल दर्ता सूचीको पहिलो नम्बरमा मंगोल नेशनल अर्गनाइजेशन पार्टी रहेको छ भने अन्तिम नम्बरमा खम्बुवान राष्ट्रिय मोर्चा, नेपाल रहेको छ ।