काठमाडौं । दशैंको फूलपातीको अवसर पारेर असोज १३ गतेबाट रिलिजमा आउन लागेको चलचित्र ‘माइतीघर’ ले नृत्य प्रतियोगिता आयोजना गरेको छ। यो चलचित्रको शीर्ष गीत ‘बसन्त नै बस्न खोज्छ यहाँ लोलायर’ मा नृत्य गरेर उत्कृष्ट हुने व्यक्ति वा समुहलाई ५ लाख नगद पुरस्कार दिने निर्माण टिमले घोषणा गरेको छ ।
चलचित्रका प्रस्तुतकर्ता रोहित अधिकारीका अनुसार भदौको पहिलो साता चलचित्रको शिर्ष गीत सार्वजनिक हुनेछ। सार्वजनिक भएको उक्त गीतको ४० सेकेन्डदेखि २ मिनेटसम्मको भिडियो बनाएर ओएसआर डिटिजलको मेल आइडी osrdigitalnp@gmail.comमा पठाउनुपर्नेछ । ती भिडियोहरु ओएसआरको युट्युब, फेसबुक र टिकटक एकाउन्टबाट सार्वजनिक हुनेछ ।
सार्वजनिक भिडियोमध्येबाट सर्वाधिक धेरै भ्यूज आउने र उत्कृष्ट कोरियोग्राफी भएको भिडियोलाई छनोट गरेर ५ लाख नगद पुरस्कार दिइने अधिकारीको भनाइ छ । भिडियो भदौको २० गतेसम्ममा बनाएर पठाइसक्नुपर्नेछ । भने निर्माणपक्षले असोजको १२ गते उत्कृष्ट भिडियो बनाउने व्यक्ति वा समुहको नाम घोषणा गर्ने र पुरस्कार प्रदान गर्नेछ ।
‘बसन्त नै बस्न खोज्छ यहाँ लोलायर’ मा भारतीय गायिका सञ्जिवनीको स्वर छ । मिलन तामाङको निर्देशनमा बनेको ‘माइतीघर’ मा धिरज मगर, केदार घिमिरे, प्रकाश सपुत, उपासना सिंह ठकुरी, श्यामाश्री शेर्पा, युवराज लामा, वुद्दि तामाङ, शिशिर वाङ्देल, रजनी गुरुङ, सन्तोष शाही, फूलकुमार बमजम, संगीता थापा लगायतका कलाकारहरुको अभिनय छ ।
चलचित्रमा चन्द्रकुमार दोङको कथा, सुशन प्रजापतिको डोआपी, रामशरण पाठकको पटकथा तथा संवाद र सुरेन्द्र पौडेलको सम्पादन छ। रविन शेरचन र धिरज तामाङको लगानी रहेको चलचित्रको कार्यकारी निर्मातामा ईश्वर श्रेष्ठ र निरज कटुवाल छन् ।
Leave a Reply