काठमाडौंबाटै राप्रपामा फुटको बीजारोपण, पार्टी प्यालेसमा बत्ती निभे पनि रोकिएनन् ज्योति

काठमाडौं । राष्ट्रिय प्रजातन्त्र पार्टी (राप्रपा) भित्र फुटको बीजारोपण भएको छ । महामन्त्री डा. धवलशम्शेर राणा पक्षधर युवाहरूले काठमाडौंमा समानान्तर समिति गठन गरेका छन् ।

राप्रपाको भातृसंगठन राष्ट्रिय प्रजातान्त्रिक युवा संगठनको काठमाडौं अधिवेशन आज चाबहिलमा आयोजना गरिएको थियो । तर, अधिवेशन उद्घाटन समेत नभई कोलाहल सिर्जना भयो । राणा पक्षका युवा ज्योति लामाले कार्यक्रम सुरु हुनुअघि मञ्चमा पुगेर माइकमा बोलिरहेका थिए । त्यही बेला अध्यक्ष लिङदेन कार्यक्रम स्थल आइपुगे ।

लिङदेनले लामालाई अधिवेशन औपचारिकरुपमा सुरु नभएको भन्दै बन्द सत्रमा आफ्नो कुरा राख्न सुझाव दिएका थिए । यही क्रममा लामा पक्षका एक युवाले लिङदेनसामु आएर विवाद गर्न खोजे । उनलाई संस्थापन पक्षका अध्यक्ष आकांक्षी अमित ठकुरीले प्रतिवाद गरेपछि दुई पक्षबीच हात हालाहालको अवस्था आएको थियो ।

कार्यक्रमस्थलमा सुरुबाटै बाक्लो संख्यामा प्रहरी परिचालित थिए । उनीहरूले स्थितिलाई नियन्त्रणमा लिए । त्यसपछि अध्यक्ष लिङदेनले अधिवेशन स्थगनको घोषणा गरे ।

अध्यक्ष आइपुगेपछि अर्को पक्षले उनलाई बोल्न रोकेको थियो । सोपश्चात दुई पक्षबीच झडपको स्थिति उत्पन्न भयो । झडपपश्चात अध्यक्ष लिङदेन अधिवेशन स्थगित भएको घोषणा गरेर हिँडे । जाँदा जाँदै उनले नेपाल प्रेससँग कुरा गर्दै अधिवेशनमा आयातित व्यक्तिहरूको घुसपैठ भएको दाबी गरे । यसको छानबिन हुने पनि बताए ।

लिङदेन हिँडेपछि असन्तुष्ट पक्षका युवा ज्योति लामाले आफूलाई स्वतः अध्यक्ष निर्वाचित भएको घोषणा गरे । उनले बोल्दा बोल्दै पार्टी प्यालेसभित्र लाइन काटेर बत्ती निभेको थियो । उनले अँध्यारोमै २५ जना सदस्यहरूको पनि नाम घोषणा गरे । असन्तुष्ट पक्ष आज समानान्तर समिति बनाउने तयारीका साथ नै आएको बुझिएको छ ।

यसअघि असन्तुष्ट समूहले सात बुँदे मागसहित राप्रयुसंघका केन्द्रीय संयोजकलाई ध्यानाकर्षण पत्र पनि पठाएका थिए ।ध्यानाकर्षण पत्रमा हाल गठित निर्वाचन समिति विधिसम्मत नरहेको जनाइएको छ । सहमतिका आधारमा विधिसम्मत अधिवेशन नभएमा आफूहरूले विद्रोह गर्ने पत्रमा उल्लेख थियो । अवैध निर्वाचन समिति विघटन गरी नयाँ निर्वाचन समिति गठन गर्नुपर्ने असन्तुष्ट पक्षको माग थियो । पत्रको बोधार्थ राप्रपा अध्यक्ष राजेन्द्र लिङदेनलाई पनि पठाइएको थियो ।

बुझिए अनुसार असन्तुष्ट समूहले अधिवेशनमा उपस्थित २०० जना प्रतिनिधिहरूलाई यो कार्यसमितिको पक्षमा हस्ताक्षर गराएको छ ।

ज्योति लामाले घोषणा गरेको समानान्तर समिति यस्तो छ:

अध्यक्ष: ज्योति लामा

सदस्यहरु:

उदय घिसिङ,

रिकेश खत्री

विजय मोक्तान

काले थिङ

विवेक पाण्डे

अनिता बानिया सिलवाल

सरोज घिसिङ

विक्की भाई मोक्तान

रामप्रसाद श्रेष्ठ

मनिष थापा मगर

राजकुमार नेपाल

उदय ठकुरी

कृष्ण कार्की

नवराज ठकुरी

सन्देश पराजुली

नवराज थापा

प्रशान्त काफ्ले

सुमन श्रेष्ठ

अजय कुमार श्रेष्ठ

अरुण न्यौपाने

बुद्धवीर नगरकोटी

सुशील सत्याल

दिपेश सिम्खडा