महायज्ञमा केदार र वर्षा, चलचित्रको प्रचारको साथै २५ हजार सहयोग

काठमाडाैं । भदौ ६ गतेबाट प्रदर्शनमा आउन लागेको चलचित्रको प्रचारका क्रममा ‘माग्ने राजा’को मुख्य कलाकार केदार घिमिरे, वर्षा शिवाकोटी, निर्देशक ऋषि लामिछाने, लेखक सामिप्यराज तिमिल्सिना पशुपति परिसर पुगेका छन् । पशुपति परिसरमा अयोजना भइरहेको महायज्ञमा भक्तजनहरुसँग भजन गाएर नाचगान समेत गरे ।

कलाकार घिमिरेले २५ हजार १ रुपैयाँ सहयोग पनि गरेका छन् । भक्तपुर र ललितपुरमा मामाघर आश्रम स्थापनार्थ मानवसेवा फाउण्डेसनले आयोजना गरेको महायज्ञमा घिमिरेले आर्थिक सहयोग पनि गरेका हुन् ।

चलचित्रको प्रचार गर्न महायज्ञ पुगेका विषयमा घिमिरेले भने, ‘साउनको सोमबार पशुपति गएको थिएन । आज सोमबार पारेर गएको थिएँ । त्यहाँ महायज्ञ पनि भइरहेको रहेछ । हाम्रो चलचित्र हेर्ने दर्शक पनि उपस्थित हुनुभएको रहेछ । त्यहाँ पनि सहभागी भयौं ।’

उनले थपे, ‘पूण्य भूमिमा पुग्दा दर्शकहरु पनि भेटिनुभयो । म त खुसीले भजन गाएर नाचेँ पनि । भवन निर्माणका लागि सहयोग पनि गरेँ ।’