महानगरमा शैक्षिक सुधारको लागि चिरीबाबुलाई नेविसंघले गरायो ध्यानाकर्षण

ललितपुर । शैक्षिक संस्थामा भएको लापरबाही, मनमौजी रूपमा लिइने अतिरिक्त शुल्कलगायत विषयमा विद्यार्थीलाई अन्याय भएको भन्दै नेविसंघले ध्यानाकर्षण गराएको हो ।

छात्रवृत्ति वितरणको प्रक्रियालाई पूर्णरूपमा समावेशी, पारदर्शी र न्यायसङ्गत हुनुपर्ने, अपांगता भएका व्यक्तिहरू र आर्थिक, सामाजिक वा भौगोलिक रूपमा पछाडि परेका जेहेन्दार विद्यार्थीहरुलाई विशेष अवसर प्रदान गर्नुपर्ने, शैक्षिक सामग्री तथा विद्यालय पोशाकमा शैक्षिक संस्थाहरूको व्यापारीकरण बन्द गर्नुपर्नेलगायतका माग ज्ञापनपत्रमा समेटिएको छ ।

गत जेठ ६ गते ‘मेरो शिक्षा, मेरो प्रश्न’ अभियान अन्तर्गत आफूहरूले पहिलो पत्र बुझाए पनि उक्त पत्रमार्फत् राखिएका मागहरुलाई महानगरले नजरअन्दाज गरेको नेविसंघको भनाइ छ ।

ज्ञापन पत्रमा भनिएको छ, ‘अघिल्लो पत्रमा उठाइएका मागहरू हाल कुन चरणमा छन् ? कार्यान्वयन नहुनुको स्पष्ट कारण के हो ?’

यी प्रश्नको जवाफ तत्काल चाहेको र आफूहरुको माग पूरा नभएमा अन्य संघर्षका कार्यक्रमहरु घोषणा गर्न बाध्य हुने ज्ञापनपत्रमा उल्लेख छ । मेयरलाई ज्ञापनपत्र बुझाउने कार्यक्रममा नेविसंघका केन्द्रिय सदस्य भुवन भट्ट, नेविसंघ ललितपुर अध्यक्ष सरोज घोर्साइने लगायत विद्यार्थी नेताहरुको उपस्थिति थियो ।