बाढी र पहिरोले पाँच राजमार्ग अवरुद्ध

काठमाडौं । बाढी र पहिरोका कारण आज देशका विभिन्न पाँच राजमार्ग अवरुद्ध भएका छन् ।

प्रहरी प्रधान कार्यालयका अनुसार कोशी राजमार्ग, पासाङल्हामु राजमार्ग, भेरी करिडोर, अरनिको राजमार्ग र डोल्पाको त्रिपुरासुन्दरी नगरपालिका- १ छलघाटमा सडक अवरुद्ध भएका हुन् ।

पहिरोले अवरुद्ध भएका अन्य चार सडक एकतर्फी खुलाइएको प्रहरी प्रवक्ता विनोद घिमिरेले जानकारी दिए ।

रोल्पा र गुल्मी जोड्ने शहीद राजमार्ग, कालीगण्डकी करिडोरका साथै खोड्पे-बझाङ जोड्ने जयपृथ्वी राजमार्गमा सवारीसाधन सञ्चालनमा आएको उनले बताए ।