काठमाडौं । नेपाल प्रिमियर लिग (एनपीएल)मा अनियमितता भएको आरोपबारे छानबिन गर्न गठित कार्यदलले राष्ट्रिय खेलकुद परिषदको लेटरहेड प्रयोग गर्न नपाउने भएको छ । परिषदले हिजो कार्यदललाई यस्तो निर्देशन दिएको हो ।
हालै मात्र कार्यदलको तर्फबाट परिषदको लेटरहेडमा एउटा विवादास्पद पत्र नेपाल क्रिकेट संघ (क्यान) मा गएको थियो ।
कार्यदलकी संयोजक रञ्जना प्रधानद्वारा हस्ताक्षरित पत्रमा अख्तियार दुरुपयोग अनुसन्धान आयोगको छानबिन नसकिएसम्म एनपीएलका कुनै पनि काम कारबाही नगर्न, नगराउन निर्देशनात्मक आदेश दिएको छ ।
कार्यदलले आफ्नो क्षेत्राधिकार नाघेर यस्तो निर्देशन दिएपछि परिषदका सदस्य सचिव टंकलाल घिसिङ असन्तुष्ट छन् ।
यही विषयलाई सम्बोधन गर्दै कार्यदललाई अब आइन्दा परिषदको लेटरहेड प्रयोग नगर्न भनिएको हो ।
एनपीएलका सम्बन्धमा क्रिकेट संघलाई लेखिएको पत्र राखेपको नभएको प्रेस नोटमा जनाइएको छ । साथै कार्यदललाई आफ्नो टीओआरभित्र रही काम गर्न तथा परिषदप्रति प्रश्न उठ्ने कुनै पनि काम नगर्न पनि निर्देशन गरिएको छ ।
Leave a Reply