विराटनगर । नेकपा माओवादी केन्द्र कोशी प्रदेश संसदीय दलका नेता इन्द्रबहादुर आङ्बोले कोशी प्रदेश सरकारका मन्त्रीहरूले प्रदेशसभाबाट नै सांसदहरूलाई धम्क्याएर सदन र संसद्को मुख थुन्न खोजेको आरोप लगाएका छन् । हप्काएको भरमा स्वर सानो नहुने उनले प्रष्टीकरण दिएका छन् ।
सांसदले उठाएको विषयहरूलाई सहज जवाफ दिएर समाधान गर्नुपर्नेमा मन्त्रीहरूले प्रदेश सभा र सांसदलाई धम्क्याउने काम गरेको उनको भनाइ छ । प्रदेशसभाको शुक्रबारको बैठकमा विशेष समयमा बोल्दै उनले सरकारका मन्त्रीहरू जिम्मेवार र जबाफदेही नभएको आरोप लगाए ।
उनले भने, ‘संसद् सत्ता नियन्त्रित हुनै सक्दैन, संसदीय दलभित्र तपाईँहरू आफ्ना सांसदलाई जे गर्नु हुन्छ गर्नुस्, तर संसद् सरकारद्वारा नियन्त्रित हुँदैन ।’
बजेटमा लुट भएको टिप्पणी गर्दै उनले भने, ‘अधिकांश मन्त्रीहरूले बजेटमाथि ब्रम्हलुट गर्नुभएको छ । बजेट वितरणमा हिजो बदमासी भएको थियो आज हामीले लुट्यौँ भनेर मन्त्री ज्युहरूले भन्दै आउनु भएको छ ।’
उनले आफ्नो कार्यकालमा सानातिना कमजोरी भए पनि बजेट समानुपातिक रूपमा वितरण गरिएको दाबी गरे ।
‘बजेटले सन्तुलन काम गर्न नसकेको कारण सन्तुलन गरमात्रै भनेको हो । सरकारलाई जबाफदेही र जिम्मेवार बनाउने प्रयास प्रतिपक्षीले गर्ने हो’, आङ्बोको भनाइ छ ।
उनले बोलेको विषयमा असन्तुष्टि जनाउँदै नेपाली कांग्रेस संसदीय दलका प्रमुख सचेतक गोपाल तामाङले प्रतिपक्षीले आफ्नो कुरा राख्नु स्वाभाविक भए पनि प्रदेशसभामा छलफल भएर टुङ्गो लागिसकेको र मन्त्रीले जवाफ दिइसकेको विषयमा त्यही विषय दोहोर्याउनु आवश्यक नभएको भन्दै ध्यानाकर्षण गराए ।
Leave a Reply