रास्वपालाई बास्कोटाको कटाक्ष- संसदमा पलेंटी कसेर तमासा देखाएर रातभरि कांग्रेस नेताका पिँढी धाउँदैछन्

काठमाडौं । नेकपा एमालेका सांसद गोकुल बास्कोटाले राष्ट्रिय स्वतन्त्र पार्टी (रास्वपा)का उपसभापति स्वर्णिम वाग्लेले कांग्रेस सभापति शेरबहादुर देउवासँग भेट गरेको विषयलाई लिएर कटाक्ष गरेका छन् ।

गृहमन्त्री रमेश लेखकविरुद्ध भिजिट भिसा प्रकरणमा छानबिन र राजीनामाको माग गर्दै सदन अवरुद्ध गर्दै आएको रास्वपाले कांग्रेसको पिँढी धाएको भन्दै यस्तो टिप्पणी गरेका हुन् ।

बास्कोटाले सामाजिक सञ्जाल फेसबुकमा लेखेका छन्, ‘भिजिट भिसाको विषयमा संसदमा पलेंटी कसेर दिनदिनै तमासा देखाउनेहरू रातभर कांग्रेस नेताको पिँढीमा ‘देऊ न मलाई बास’ भन्दै मुरलीको धुन किन बजाइरहेका होलान् ?’

उनले यो प्रकरणमा नयाँ ट्वीस्ट आयो भने नेपाली राजनीतिको आठौँ आश्चर्य नमान्न अनुरोध गरेका छन् ।