काठमाडौं । पछिल्लो समय नेपाली क्रिकेटसँग अभिन्न रुपमा जोडिएका आयरल्यान्डका कमेन्टेटर हुन् एन्ड्र्यू लियोनार्ड । नेपाली फ्यानहरूले उनलाई माया गरेर ‘तक्लु दाइ’ भन्ने गर्छन् । नेपालका प्रत्येक महत्वपूर्ण प्रतियोगिता र ऐतिहासिक म्याचहरुलाई उनले कमेन्ट्री प्यानलबाट नियाल्दै आइरहेका छन् ।
हिजो नेपालले त्रिकोणात्मक सिरिजअन्तर्गत आफ्नो पहिलो म्याचमा नेदरल्यान्ड्सँग रोमाञ्चक मुकाबिला गर्यो । यो म्याच अविश्वसनीय र विश्व क्रिकेटमै एतिहासिक बन्न पुग्यो । पहिलोपटक विश्व क्रिकेटले तीन सुपरओभर देख्यो । तर, यो म्याचमा भने लियोनार्ड कमेन्ट्रीमा छुटे । यसअघि लिग २ मा कमेन्ट्री गरेका उनी टि २० श्रृंखलामा भने अनुपस्थित छन् ।
लियोनार्ड अहिले अमेरिकाको क्यालिफोर्नियामा मेजर लिग क्रिकेटको कमेन्ट्री गर्न पुगेका छन् । विश्वकै प्रख्यात क्रिकेटरहरु सहभागी रहेको यो लिग १३ जूनदेखि १४ जुलाइसम्म आयोजना हुँदैछ । कमेन्ट्रीमा छुटे पछि लियोनार्डले नेपालको गेम हेर्न भने छुटाएनन् । उनले होटलमा ब्रेफफास्ट लिँदै मोबाइलबाट लाइभ म्याचको मजा लिएका थिए ।
लियोनार्डले एउटा भिडिओ आफ्नो फेसबुक अकाउन्टमा पोस्ट गरेका छन् जसमा उनी नेपालको अन्तिम सुपर ओभर हेरिरहेका हुन्छन् । यही क्रममा आइपुग्छन् अष्ट्रेलियाका लिजेन्ड्री ब्याट्सम्यान एडम गिलक्रिस्ट ।
लियोनार्डले गिलक्रिस्टलाई नेपाली टीमलाई ‘कार्डियाक किड्स’ भनेर चिनाउँछन् । त्यसपछि गिलक्रिस्टले पनि निकै चाख लिएर नेपाल र नेदरल्यान्ड्सको सुपर ओभर हेर्छन् । यहीबीचमा अर्का कमेन्टेटर डेनी मोरिसन पनि आइपुग्छन् ।
यो भिडिओ पोस्ट गर्दै लियोनार्डले नेपालको गेम मिस गरेको बताएका छन् ।
Leave a Reply