रुसी भाषा बोलेको भन्दै लातभियाका सांसद निष्कासित

काठमाडौं । पूर्व सोभियत गणराज्यमध्ये एक देश लातभियाले रुसी भाषा बोलेको भन्दै एक सांसदलाई निष्कासन गरेको छ। एलेक्सी रोस्किलोभलाई रुसी भाषा प्रयोग गरेको आरोपमा हटाइएको हो।

रुसी सञ्चारमाध्यम आरटीका अनुसार, सन् १९४० देखि १९९१ सम्म लातभियामा रुसीकरण भएको इतिहासलाई निरन्तरता दिएको भन्दै उनलाई निष्कासन गरिएको हो। लातभियाको संसदमा रुसी भाषा बोल्न प्रतिबन्ध लगाइएको छ। झन्डै २५ प्रतिशतले रुसी भाषा बोल्ने देशमा संसदमा रुसी भाषा बोल्न र रुसी नागरिकलाई लातभिया आउजाउ गर्न प्रतिबन्ध लगाइएको छ।

यही प्रतिबन्धको विरोध गर्ने क्रममा सांसद रोस्किलोभ निष्कासनमा परेका हुन्। उनी ‘स्थिरताको लागि’ नामक दलका प्रतिनिधि हुन्, जसले रुसी भाषाभाषीको भावना प्रतिनिधित्व गर्छ।

उनीमाथि निष्कासन प्रक्रिया अघि बढाउँदा १०० सांसदमध्ये ६९ जनाले उनलाई हटाउने पक्षमा मतदान गरेका थिए। संसदमा लातभिया भाषामै उनले रुसी भाषा र सभ्यतामाथि प्रतिबन्ध लगाउन खोजिएको भन्दै आपत्ति जनाउँदै भने, ‘अबको कदम के बालबालिकाको नाम रुसी जस्तो सुनियो भनेर बन्द गर्ने?’

संसदमा मन्तव्यको अन्त्यमा उनले रुसी भाषामै भनेका थिए, ‘हामी यत्ति मात्र होइनौं। र रुसी हाम्रो भाषा हो।’

स्मरणीय छ, रुसले युक्रेनमाथि आक्रमण गर्नुको एक कारण युक्रेनले रुसी भाषाभाषीमाथि लगाएको प्रतिबन्ध पनि थियो। यही कारण रुसी भाषाभाषी बहुल क्षेत्रहरू—क्राइमिया, लुगान्स्क आदि—रुसमा गाभिन तयार भएका थिए।