लखनऊ । इंडियन प्रिमियर लिग (आईपीएल ) को अन्तिम लिग खेलमा लखनऊ सुपर जायन्ट्सलाई हराउन सकेमा राेयल च्यालेन्जर्स बेंगलुरु (आरसीबी) ले बिहीबारको क्वालिफायर १ खेल्न पाउनेछ । तर यदि पराजित भए, उनीहरूले शुक्रबार एलिमिनेटर खेल्नु पर्नेछ ।
जे भए पनि, आरसीबीका लागि प्लेअफ चरण सजिलो हुने छैन, किनभने उनीहरूलाई अरू तीन टीमहरू- पञ्जाब किंग्स, मुम्बई इन्डियन्स र गुजरात टाइटन्स- भन्दा विश्रामको समय कम हुनेछ । ती तीन टिमहरूले निर्णायक खेल अघि केही दिनको विश्राम पाउनेछन् ।
यद्यपि, आरसीबीका बलिङ प्रशिक्षक मलोलन रंगराजन यस बारेमा धेरै चिन्तित देखिएनन् । ‘हामीले २७ तारिखमा लखनऊमा अन्तिम लिग खेल खेल्नेछौं र त्यसपछि २९ तारिखमा सम्भावित क्वालिफायर १ छ। हामी ढिलो सुत्नेछौं, २८ मा चाँडै यात्रा गर्नुपर्नेछ र २९ मा खेल खेल्नेछौं। यो अवस्थालाई स्विकार गरेर त्यसअनुसार तयारी गर्नु नै उत्तम हो’, रंगराजनले भने ।
आईपीएल पुनः सुरु भएयता मुम्बई इन्डियन्सबाहेक अरू सबै क्वालिफाइड टिमहरूले लय गुमाएका छन् । आरसीबीले अन्तिम जित ३ मे मा हासिल गरेको थियो र शुक्रबार सनराइजर्स हैदराबादसँग हार बेहोरेपछि अब उनीहरू चण्डीगढ़ जाने बेलामा जितको साथ जान चाहन्छन् ।
आरसीबीले यस सिजनमा सबै ६ बाहिरी खेल जितेको छ (बेंगलुरुबाट लखनऊ सारिएको खेलबाहेक) र यदि उनीहरूले एलएसजीलाई हराए, भने उनीहरूले आईपीएल इतिहासमा पहिलोपटक सातै बाहिरी खेल जित्ने कीर्तिमान राख्नेछन् ।
‘हामी बाहिरी कन्डिसनमा राम्रो खेल्न सफल भएका छौं, र म हाम्रो टिमलाई फेरि यस्तै प्रदर्शन गर्नेमा विश्वास गर्छु’, प्रशिक्षक रंगराजनले थपे ।
लखनऊका विराट कोहली प्रशंसकहरूका लागि यो उनलाई प्रत्यक्षमा हेर्ने अन्तिम अवसर हुनसक्छ । हालै टेस्ट क्रिकेटबाट सन्यास लिएका कोहलीले ठूलो पारी खेलुन् भन्ने अपेक्षा गरिएको छ ।
अर्कोतर्फ, प्लेअफ दौडबाट बाहिर भइसकेको एलएसजी आफ्नो सिजन सुखद अन्त्य गर्न चाहन्छ, जसरी चेन्नई सुपर किंग्सले आइतबार गुजरात टाइटन्सलाई हराएर गरेको थियो ।
भारतको नयाँ टेस्ट उपकप्तान ऋषभ पन्त पनि इंग्ल्यान्ड जानुअघि केही रन जोड्ने प्रयासमा हुनेछन् । उनको यो सिजन कप्तान र ब्याट्सम्यानको रूपमा निकै निराशाजनक रहेको छ ।
Leave a Reply