काठमाडौं । सरकारले गत चैत १५ मा काठमाडौंको तीनकुनेमा भएको राजावादीको प्रदर्शनका क्रममा कोटेश्वरस्थित भाटभटेनी सुपरमार्केटमा भएको आक्रमण तथा चोरीमा संलग्न ११ जनालाई आपराधिक उपद्रवको मुद्दा चलाएको छ ।
मुलुकी फौजदारी कार्यविधि संहिता, २०७४ को दफा ३२ को व्यवस्थाअनुसार उक्त कार्यमा संलग्न ११ जनालाई आपराधिक उपद्रवको मुद्दा चलाएको हो ।
भाटभटेनी सुपरमार्केट एन्ड डिपार्टमेन्ट स्टोर प्रालिको तर्फबाट प्रवन्ध निर्देशक मीनबहादुर गुरुङसमेतको जाहेरी र प्रहरी प्रतिवेदनका आधारमा जिल्ला सरकारी वकिीको कार्यालय काठमाडौंले जिल्ला अदालत काठमाडौंमा आइतबार मुद्दा दायर गरेको हो । उनीहरुलाई आपराधिक उपद्रव गरेर हानि-नोक्सानी पुर्याएको अभियोगमा ३ वर्षसम्म कैद र ३० हजारसम्म जरिवाना माग दाबी गरिएको छ ।
उक्त कार्यमा संलग्न ४ बालकलाई प्रतिवादी बनाएर भक्तपुर बाल अदालतसमक्ष छुट्टै आरोपपत्र पेश भएको छ । बालकमा परिवर्तित नाम २६ परिसर ४४, २६ परिसर ४४ (ग), २६ परिसर ४५ र २६ परिसर ४४ (च) रहेका छन् ।
उनीहरुले तोडफोड, आगजनी तथा लुटपाट गर्दा ८० लाख ३३ हजार १९२ रुपैयाँ ५२ पैसा बराबरको धनजनको क्षति भएको भाटभटेनी सुपरमार्केटका सञ्चालकले माग दाबी गरेका छन् । जसमा प्रतिवादी बनाइएका व्यक्तिबाट बरामद भएर आएका लिपिस्टकलगायतका धनमाल गत चैत १५ कै बजार मूल्य २ लाख ४३ हजार ८७४ रुपैयाँ रहेकाले उक्त रकम घटाएर ७७ लाख ८९ हजार ३१८ रुपैयाँ ५२ पैसा प्रतिवादीबाट भराइपाउँ भन्दै माग दाबी गरिएको छ ।
को को छन् प्रतिवादी ?
- १)श्रवणकुमार लामा, दक्षिणकाली– ८ छैमले, काठमाडौं
- २) समीर मगर, उर्लाबारी– २ मोरङ हाल काठमाडौं– ३२ कोटेश्वर
- ३) रविरञ्जनकुमार सिंह हुसेना खुर्द, बैशाली जिल्ला बिहार राज्य भारत
- ४) लक्ष्मी राई, इटहरी– २ सुनसरी
- ५) आशिककुमार महतो, मिथिला– ५ धनुषा
- ६) गोविन्दा राय, रामनगर– २ सर्लाही
- ७) सुशीला कुमाल, विदुर– ६ नुवाकोट
- ८) निर्मला कार्की, चौतारा साँगाचोकगढी– ८ सिन्धुपाल्चोक
- ९) प्रेमकुमार महतो, बरहथवा– १६ सर्लाही
- १०) राधेश्याम यादव, नवराजपुर– ४ सिराहा
- ११) दिनेश महत्तो, लहान– ८ सिरहा हाल काठमाडौं– ३२ कोटेश्वर
Leave a Reply