प्रचण्डको दाबी- मध्यपहाडी लोकमार्गको प्रस्ताव पनि मैले नै गरेको हुँ

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले मध्यपहाडी लोकमार्गको प्रस्ताव आफूले नै गरेको दाबी गरेका छन् ।

‘जनतासँग माओवादीः मध्यपहाडी लोकमार्ग जनजागरण अभियान’का क्रममा डोटी पुगेका प्रचण्डले आफू पहिलो पटक प्रधानमन्त्री हुँदा लोकमार्गको प्रस्ताव अघि सारेको बताए ।

उनले भने, ‘पहिलो चोटी प्रधानमन्त्री हुँदा मध्यपहाडी लोकमार्ग मध्य पहाड र हिमालमा बस्ने जनताको हितलाई विचार गरेर, राष्ट्रिय एकतालाई सुदृढ गर्ने उद्देश्यद्वारा प्रेरित भएर, समृद्धिको नयाँ अभियान चलोस्, यस क्षेत्रबाट बसाइसराइको विकराल समस्या देखिएको छ, त्यसलाई रोक्न सकिन्छ भन्ने उद्देश्यले मैले नै प्रस्ताव गरेको हुँ । अहिले यो सम्पन्न हुँदैछ ।’

उनले अहिले जनताको अधिकार खोसिने खतरा भएकाले मध्यपहाडी र तराई मधेश जागरण अभियान चलाएको सुनाए । सरकारमा हुँदा पनि सुशासनको लडाइँ लडेको प्रचण्डले दाबी गरे।

दलालहरूका विरुद्ध सङ्घर्ष गरेको हुनाले नै आफू नेतृत्वको सरकार ढालेको उनले आरोप लगाए ।