सरकारले जातीय विभेद छैन भनेर सत्यलाई लुकाउन खोजेको रास्वपा सांसद परियारको आरोप (भिडिओ)

काठमाडौं । राष्ट्रिय स्वतन्त्र पार्टी (रास्वपा)का प्रमुख सचेतक सन्तोष परियारले  सरकारले जातीय विभेद छैन भनेर सत्यलाई लुकाउन खोजेको आरोप लगाएका छन् ।

प्रतिनिधिसभाको बैठकमा विशेष समयमा बोल्दै सांसद परियारले यस्तो आरोप लगाएका हुन् । उनले भने, ‘जातीय विभेद छैन भन्दै सत्यलाई लुकाउन खोजिएको छ । हामी दिउँसै रात पार्न खोजेका छौँ । सत्यबाट भाग्न खोजिरहेका छौँ ।’

विभेद छैन भनेपछि न्याय दिन पर्दैन भनेर  सरकार भाग्न खोजेको पनि उनकाे आराेप छ ।

उनले थपे,’विभेद छैन भनेपछि न्याय दिन पर्दैन भनेर भाग्न खोजेको देखिन्छ । राज्यले अहिलेसम्म नेपाली समाजको वास्तविक समस्याको पहिचान गर्न सकेको छैन । समाजको वास्तविक समस्या राज्यले बुझ्न नसक्दा नागरिक र राज्यबिच सम्बन्ध बलियो हुन सकेको छैन ।’