प्रज्ञा भवनमा नाउपा र जनमतका कार्यकर्ता विलखबन्द, पैसा नतिर्दा हल पनि बन्द

काठमाडौं । रेशम चौधरी पक्राउसँगै आज हुने भनिएको नागरिक उन्मुक्ति पार्टी र जनमत पार्टीबीचको एकता कार्यक्रम विथोलिएको छ । कार्यक्रमस्थल प्रज्ञा भवनबाटै प्रहरीले रेशमलाई उठाएपछि दुवै पार्टीपंक्तिमा आश्चर्य र अन्योल छायो ।

कार्यक्रमको सबै तयारी पूरा भइसकेको थियो । रेशम पनि प्रज्ञा भवनमा आइसकेका थिए । तर, अचानक कार्यक्रम भाँडिएपछि नेता–कार्यकर्ताहरु बिलखबन्दमा परेका छन् । जनमतका अध्यक्ष सिके राउतले पक्राउको भत्र्सना गरेका छन् ।

एकता कार्यक्रम रद्द भए पनि दिउँसोसम्म प्रज्ञा भवनमा दुवै पार्टीका कार्यकर्ताहरुको भिड थियो । उनीहरु भवन परिसरमै समूह-समूह भएर अनौपचारिक कुराकानी गरिरहेका थिए । आआफ्नै अनुमान र अड्कलवाजीहरु भइरहेका छन् ।

बुझिएअनुसार कार्यक्रमका लागि बुक गरिएको हलको पैसा तिरिएको छैन । ६ घण्टाका लागि डेढ लाखमा हल बुक गरिएको स्रोतले बतायो । तर, पैसा नतिरेका कारण हल खोलिएन, जसले गर्दा कार्यकर्ताहरु बाहिरै बस्न वाध्य भए ।