सुखद अकुपेन्सीका साथ देशव्यापी प्रदर्शनमा ‘पिताम्बर’ र ‘कर्मा’, कस्तो छ प्रतिक्रिया?

काठमाडौं । आजबाट देशव्यापी प्रदर्शनमा आएका दुई चलचित्रहरु ‘पिताम्बर’ र ‘कर्मा’ ले पहिलो दिन सुखद ओपनिङ गरेको छ। दुवै चलचित्रको मध्यान्ह र बेलुकीका शोको अकुपेन्सी बिहानको तुलनामा केही वृद्धि भएको छ । राजधानीका कति हलहरु हाउस फुल देखिएका छन् भने दर्शक भएका ठाउँहरूमा कलाकारहरू बिहानैदेखि प्रत्यक्ष साक्षात्कार गर्न पुगिरहेका छन्।

हलबाट दर्शकको प्रतिक्रिया आउने क्रम जारी छ। दुवै चलचित्र हेर्न आएका दर्शकले सकारात्मक प्रतिक्रिया दिइरहेका छन्।

आज हलमा दर्शकको अकुपेन्सी ठिकै देखिए पनि, यी दुवै चलचित्रले पहिलो दिन कति व्यापार गरे भन्ने थाहा पाउन भोलिसम्म कुर्नु पर्नेछ।  प्रचारप्रसारबाट दर्शकमाझ राम्रो हाइप बनाएका यी दुवै एक्सन चलचित्र भएकाले पनि दर्शकको प्रतिक्रिया कस्तो आउँछ भन्ने पर्खाइमा धेरै छन्।

‘कर्मा’लाई ‘अगस्त्यः च्याप्टर १’ फेम्ड निर्देशन सौरभ चौधरीले निर्देशन गरेका हुन भने चलचित्रको कथा पनि उनी स्वयंले लेखेका हुन। ‘पिताम्बर’ लाई भने निर्देशक कृषा चौलागाइँले बनाएकी हुन। रिलिज अघि यी दुवै चलचित्रले सुखद शो पाएका थिए। दुईमध्ये प्रदीप खड्का स्टारर चलचित्र ‘पिताम्बर’ले देशव्यापी १७० शो पाएको थियो भने विपिन कार्की स्टारर चलचित्र ‘कर्मा’ले देशव्यापी १२४ शो प्राप्त गरेको थियो।

‘कर्मा’मा विपीन कार्की, उपासना सिंह ठकुरी, मुकुन भुसाल, दिब्यदेब, सरिता गिरी, बेन बस्नेत, सुज्यान सिलवाल, अनिल बुढाथोकी, निर्मल शर्मालगायतको अभिनय रहेको छ । त्यस्तै, मल्टिस्टारर चलचित्र ‘पिताम्बर’ मा प्रदीप खड्का, दयाहाङ राई, सौगात मल्ल, आर्यन सिग्देल, अनुपविक्रम शाही, सुरक्षा पन्त, गौरी मल्ल, रवीन्द्र झा, प्रमोद अग्रहरी, आर्यन सिग्देल, कामेश्वर चौरासिया, टिका पहाडी, सुलभ पहाडी, सुरवीर पण्डित, विशाल पहाडी, दिव्यदेव पन्त, सुपुष्पा भट्ट, दिव्या रायमाझी, गौरव विष्ट, आशिष पुरुष, ललित विष्ट, किशोर भट्ट, विनोदकुमार पौडेल, नारायण काफ्ले र रवीन्द्र भट्टराईको अभिनय छ ।