राप्रपा सांसद दिपक सिंहको खबरदारी- सरकार सुध्रिएन भने बंगलादेश र श्रीलंकाको अवस्था जनताले ल्याउनेछन् (भिडिओ)

काठमाडौं । राष्ट्रिय प्रजातन्त्र पार्टीका नेता तथा सांसद दिपक सिंहले नेपालमा बंगलादेश र श्रीलंकाजस्तो अवस्था आउने चेतावनी दिएका छन् । उनले कांग्रेस, एमाले र माओवादीका समर्थकहरुलाई पनि देश जोगाउनका लागि राजसंस्थाको पक्षमा उभिन आह्वान गरे ।

आज आयोजित राप्रपाको आमसभामा बोल्दै सिंहले भने, ‘यो सभामा मैले कांग्रेस, एमाले र माओवादीका पनि धेरै राष्ट्रवादी साथीहरु देखिराखेको छु । देश र जनता बचाउन सबै एकजुट हुनुपर्ने अवस्था आएको छ । यो तस्करले चलाएको भ्रष्ट सरकारलाई जडबाट उखेलेर फ्याकिदिउँ । अहिले पनि यो सरकार सुध्रिएन भने बंगलादेश र श्रीलंकाको अवस्था नेपाली जनताले ल्याउने छ ।’

सिंहले गत चैत १५ गते सरकारले नै पत्रकार सुरेश रजकको हत्या गरेको उनले दाबी गरे ।

सिंहको थप भनाइः

म एउटा सभासदको हैसियतले आज यो मञ्चमा उभिएको छु । मेरो लागि सबैभन्दा पहिले राष्ट्र र जनता हुन्छ । मेरो धर्म, परम्परा र संस्कृति बनाउनका लागि राजसंस्था अपरिहार्य छ । सबैलाई एउटै धागोमा उन्नका लागि राजावाहेक अरु विकल्प छैन ।

१५ गते छानीछानी जनताको छातिमा गोली हाने । पत्रकारलाई बन्दूकले हानेर कुटीकुटी घाइते बनाएर आगो लगाएको यही सरकारले हो । यो सरकारको भिजिलान्ते परिचालन गरेर कयौं मान्छेलाई अंगभंग बनाएका छन् । यो आन्दोलनमा हाम्रा डाक्टर धवलशम्शेर राणा, महामन्त्री रविन्द्र मिश्रलाई पक्राउ गरिएको छ । उनीहरू आतंक गर्ने मान्छे हो ? म ओली र गृहमन्त्रीलाई भन्छु तपाईंहरू त आठ क्लास पास गर्नुभएको हो । यी विद्वान मान्छेहरूलाई उग्र बनाएको तपाईंहरुले हो । त्यसैले निशर्त छोड्नुपर्छ, महंगो मूल्य चुकाउनुपर्छ । यदि जनता यसरी नै सडकमा आए भने दुई तिहाइको दम्भ तोडिनेछ । बंगलादेशमा सत्ता पल्टाएर भागेर जानुपरेको जस्तै यी कम्युनिष्टहरु देश छोडेर जानुपर्ने छ ।