‘डोरी’को कार्यक्रममा पुगेका सजन श्रेष्ठ- सबै साथीले फिल्म खेल्दा म मात्र बाँकी थिएँ, मेरो पनि डेब्यु भयो (भिडियाे)

काठमाडौं । चैत १५ गतेबाट रिलिजको तयारीमा रहेको चलचित्र ‘डोरी’को ट्रेलर सार्वजनिक गरिएको छ । आइतबार काठमाडौंको नयाँ बानेश्वरस्थित आइएनआइ सिनेमाजमा आयोजित एक समारोहबीच चलचित्रको ट्रेलर सार्वजनिक गरिएको हो ।

समारोहमा लेखक, निर्देशक तथा प्रमुख कलाकार अरुण लामा, अभिनेत्री अञ्जना बराइली, अभिनेताहरू प्रवीण खतिवडा, शिशिर बाङ्देल, साजन श्रेष्ठ, बिरेन्द्र सिंह कुशवाहा, राज पौडेल, राज थापा, नूतन, शारदा अधिकारी, रामबाबु रेग्मी, सङ्गीतकार तथा गायक राजनराज शिवाकोटी लगायतको उपस्थिति थियो।

सबै पात्रहरूलाई प्रस्तुत गरिएको ट्रेलर चलचित्रको शीर्षक वरपर घुमेको छ । चलचित्र एक डोरीको वरपर घुमेको छ। ट्रेलरमा सबैले डोरी खोजी गरिरहेको देखाइएको छ । सोही क्रममा आइपर्ने घटनाक्रमहरू प्रमुख रूपमा उठान गरिएको छ भने पारिवारिक तथा सामाजिक व्यवधानहरू समेत ट्रेलरमा देखिन्छ ।

ट्रेलरमा केही थ्रिल तथा हरर दृश्यहरू समेटिएका छन् । चलचित्रका निर्देशक अरुण लामाका अनुसार यो कथा पूर्णतया सामाजिक हो र कहीँ न कहीँ सबैको जीवनसँग मेल खान्छ ।

अस्वस्थ भएका कारण केही ढिला पुगेकी चलचित्रकी मुख्य अभिनेत्री अञ्जना बराईलीले ‘डोरी’ को टिमसंग जोडिएर काम गर्न पाउँदा खुसी लागेको बताइन् । उनले भनिन,’फेरि एकपटक नयाँ टिमसंग जोडिएर काम गरेकी छु। खुसी छु। मलाई सकेसम्म मेरो क्षमताले भ्याइन्जेलको काम गरौं भन्ने लाग्छ। त्यहीँ भएर पनि यो चलचित्रमा जोडिएकी हुँ।’

त्यस्तै चलचित्रका अर्का पात्र कमेडियन सजन श्रेष्ठले पनि ‘डोरी’ मा जोडिन पाएकोमा आफू खुसी भएको बताए। उनले भने,’मलाई भरोसा गर्नुभएकोमा पहिला त म निर्माण टिमलाई धन्यवाद दिन्छु। फिल्म खेल्ने रहर कसलाई हुदैन र? यो मेरो रिलिज नभएको तेश्रो फिल्म हो। तर टेक्निकली यहीँ पहिलो चलचित्र हो। सबै साथीले फिल्म खेल्दा म मात्र बाँकी थिए, यो फिल्मबाट मेरो पनि डेब्यु भयो।’

‘डोरी’को लेखन तथा निर्देशन अरुण लामाले गरेका हुन् । चलचित्रमा अरुण आफैँले प्रमुख भूमिका निभाएका छन् भने प्रवीण खतिवडा, शिशिर बाङ्देल, प्रकाश घिमिरे, अरुण लामा, अञ्जना बराइली, राज पौडेल, कविता आले, नूतन, राज थापा, बिरेन्द्र सिंह कुशवाहा लगायतका कलाकारहरूको पनि प्रमुख भूमिका रहेको छ ।

चलचित्रका निर्माता दिनेश भट्टराई हुन् भने कार्यकारी निर्माता राज थापा रहेका छन् । चलचित्रको स्क्रिप्ट डाक्टर मनोज पण्डित हुन् भने मुख्य सहायक निर्देशक दिनेश बहादुर रावत, एक्सन निर्देशक राजु तामाङ, सङ्गीत निर्देशक राजनराज सिवाकोटी, कला निर्देशक रोशन दिवाना, सम्पादक मिलन श्रेष्ठ, रङ्ग संयोजक रेनीश फागो रहेका छन् ।