‘केपी शर्मा ओलीः सपना, संघर्ष र संकल्प’ पुस्तक र यसको रचना गर्भ

२०६० सालतिर हुनुपर्छ, नेकपा एमाले लमजुङले स्मारिका प्रकाशन गरेको थियो । स्मारिकामा विभिन्न नेताको लेख थियो । त्यसैमा एउटा लेख थियो, केपी शर्मा ओलीको । जेल जीवनमा भोगेका गोलघरका ती कष्टसाध्य दिनहरू पढेपछि श्रद्धाभावले म निकै प्रभावित भएको थिएँ । त्यतिबेला मैले पत्रकारिता सुरू गरेको केही वर्षमात्रै भएको थियो । र, प्रेस चौतारी लमजुङको संस्थापकको रूपमा कार्यरत थिएँ । त्यसैबीचमा म नेपाल वान टेलिभिजनमा समाचार सम्पादन तथा समाचारवाचकको काम गर्न भारतको नयाँदिल्लीमा पुगेँ । २०६५ सालमा काठमाडौंबाट पत्रकारिता सुरू गर्न थालेपछि मात्र ओलीसँग भेट हुन थाल्यो ।

२०६९ सालमा एक दिन साँझ उहाँलाई भेट्न बालकोट पुगेको थिएँ । तत्कालीन स्वकीय सचिव रमेश आचार्यलाई सँगै राखेर उहाँलाई मैले आत्मवृत्तान्त लेख्ने चाहना सुनाएको थिएँ । उहाँले अनुमति पनि दिनुभयो । मेरो नम्बर मोबाइलमा राख्नुभयो । र, कहिलेबाट सुरू गर्ने खबर गर्छु भन्नुभयो । त्यसलगत्तै उहाँ निकै बिरामी पर्नुभयो । नेपाल र विदेशका अस्पताल धाउनुपर्ने बाध्यता आइलाग्यो । २०७१ सालमा ग्रान्डी अस्पतालको शय्यामा गएर उहाँलाई भेटेको अस्ति जस्तो मात्र लाग्छ ।

२०७१ सालमा नेकपा एमालेको काठमाडौंमा सम्पन्न नवौं राष्ट्रिय महाधिवेशनबाट उहाँ पार्टीको अध्यक्ष निर्वाचित हुनुभयो । त्यतिबेला उहाँ बिरामी अवस्थामै हुनुहुन्थ्यो । त्यसलगत्तै २०७२ सालमा पहिलो पटक प्रधानमन्त्री हुनुभयो । प्रधानमन्त्री भएपछि उहाँको व्यस्तता झनै बढ्यो, तर उहाँको बारेमा किताब लेख्ने मेरो चाहना अधुरै रह्यो । यो बीचमा उहाँसँग धेरै पटक भेटेको छु । र, जति पटक भेट्छु केही न केही नयाँ कुरा र ऊर्जा लिएर फर्किन्छु । सानादेखि ठूलासम्मलाई उत्तिकै महत्व दिने, आफ्नोपनको महसुस गराउने अनि घण्टौँसम्म बसेर अरूका कुरा सुन्ने र मार्गदर्शन गर्ने उहाँको बानीले अति नै प्रभावित छु । त्यसैले उहाँलाई भेट्न मानिसहरू घण्टौँघण्टा निवासमा पर्खिरहेका हुन्छन् ।

यो बीचमा उहाँसँग धेरै पटक भेटेको छु । र, जति पटक भेट्छु केही न केही नयाँ कुरा र ऊर्जा लिएर फर्किन्छु । सानादेखि ठूलासम्मलाई उत्तिकै महत्व दिने, आफ्नोपनको महसुस गराउने अनि घण्टौँसम्म बसेर अरूका कुरा सुन्ने र मार्गदर्शन गर्ने उहाँको बानीले अति नै प्रभावित छु ।

राजनेता केपी शर्मा ओलीको जीवन संघर्षले भरिएको छ । उहाँको दृष्टिकोण सदैव भविष्यप्रति आशावादी र परिष्कृत रहेको छ । उहाँको राजनीतिको एक प्रमुख पक्ष भनेको दृढ इच्छाशक्ति र विकासका लागि समर्पण हो । उहाँले आत्मनिर्भर नेपालको स्वप्न देख्नुभयो र त्यसको प्राप्तिका लागि आफ्नो जीवन समर्पित गर्नुभएको छ । उहाँको जीवन साहस र आत्मविश्वासको प्रतीक बनेको छ । प्रधानमन्त्री पद्मा रहँदा या नरहँदा, ओली एक राष्ट्रिय नायकका रूपमा प्रस्तुत हुनुभएको छ । जीवनभर कठिनाइ र अवरोधहरूको सामनाले उहाँको नायकत्वलाई अझ बलियो बनाएको छ ।

ओलीकै नेतृत्वमा नेपालले संकल्प गरेको छ— एक समृद्ध, सशक्त र आत्मनिर्भर नेपालको निर्माण । उहाँले नेपाललाई एक आत्मनिर्भर र समृद्ध राष्ट्रको रूपमा देख्ने सपना त देख्नुभयो, तर यस सपनालाई वास्तविकतामा परिणत गर्न असंख्य संघर्ष र चुनौतीहरूको सामना गर्नुपरेको छ । यद्यपि राजनीतिक स्थिरता र सामाजिक सुधारका लागि उहाँले उठाएका कदमहरू निश्चय नै ऐतिहासिक छन् । नेपालको सामाजिक र आर्थिक विकासका लागि उहाँले दूरदर्शी योजना ल्याउनुभयो । उहाँको नेतृत्वमा नेपालको विकासमा भएका छलाङ्गहरूले राष्ट्रिय गौरव र आत्मनिर्भरता कायम गर्न मद्दत गरेका छन् । नेपालको संविधानको निर्माण, देशको भौतिक संरचना र पूर्वाधारमा सुधार तथा विदेश नीतिमा भएका प्रमुख परिवर्तनहरू, यी सबै उहाँको दृढ नेतृत्व र योजनाका परिणाम हुन् । उहाँको नेतृत्वमा नेपालले अन्तर्राष्ट्रिय मञ्चमा आफ्नो पहिचान बनाएको छ । उहाँको जीवनको संघर्ष र निर्णयहरूले नै नेपालको भविष्यलाई पुनर्निर्माण र नयाँ दिशा दिने काम गरेको छ ।

उहाँले कहिल्यै आफ्नो सपना र उद्देश्यलाई थन्किन दिनुभएन, बरु ती सपनालाई साकार बनाउन कठिन संघर्षको माध्यमबाट अडिग रहनुभयो । ‘सपना, संघर्ष र संकल्प’ पुस्तक नागरिकका लागि गरिएको संघर्ष र महान उद्देश्यका लागि अडिग रहने संकल्पको चित्रण हो । उहाँको जीवनको कूटनीतिक र सैद्धान्तिक पक्षहरू, उहाँको निर्णय र कार्यक्षमता तथा नेपालको भविष्यको लागि उहाँले गरेको योगदान यस पुस्तकमा प्रस्तुत गरिएको छ । यस पुस्तकका पन्नाहरूमा लुकेका शब्दहरूले एक व्यक्तिको संघर्ष र समर्पणको कथा बयान गर्दछ, जसले नेपाली जनताको मनमा आशा र विश्वासको नवजीवन फेरेको छ ।

उहाँले नेपाललाई एक आत्मनिर्भर र समृद्ध राष्ट्रको रूपमा देख्ने सपना त देख्नुभयो, तर यस सपनालाई वास्तविकतामा परिणत गर्न असंख्य संघर्ष र चुनौतीहरूको सामना गर्नुपरेको छ । यद्यपि राजनीतिक स्थिरता र सामाजिक सुधारका लागि उहाँले उठाएका कदमहरू निश्चय नै ऐतिहासिक छन् ।

अतः यो पुस्तक केवल एक व्यक्तिको कथा होइन, राष्ट्रको सपना र संघर्षको कथा हो । यो कथा साहस, समर्पण र समृद्धिको संघर्षको प्रतीक हो । आगामी पुस्तालाई संघर्ष र समर्पणका माध्यमबाट आफ्नो सपनालाई साकार गर्न यसले प्रोत्साहन मिल्ने विश्वास लिएको छु । नेपाली राजनीतिको केन्द्रमा रहनुभएका केपी शर्मा ओलीको बारेमा मानिसका विभिन्न भ्रमहरू पनि छन् । सत्यसँग नजुध्ने र तथ्यमा उभिने उहाँको स्वभावका कारण कतिले उहाँलाई फूल त कतिले काँडा पनि भन्छन् । उहाँलाई नजिकबाट नचिन्नेहरूले अनेक अफवाह पनि फैलाउँछन्, तर यो पुस्तक उहाँलाई नजिकबाट चिन्नेहरूको हो, जसले अरूलाई पनि उहाँको बारेमा बुझ्न मद्दत हुने विश्वास लिएको छु ।

पुस्तकमा प्रधानमन्त्री ओलीका आर्थिक नीति, सरकारका उपलब्धि, सहकर्मी-शुभेच्छुकहरूको अनुभव समेटिएको छ । पुस्तकमा उहाँको प्रधानमन्त्रीत्वकाल मात्र नभई मन्त्री हुँदा सँगै काम गर्नुभएका मन्त्री र सचिवहरूको अनुभव र अनभूतिहरू पनि समेटिएका छन् । साथै समाजका विभिन्न क्षेत्रका व्यक्तित्वहरूको उहाँप्रतिको दृष्टिकोण पनि पुस्तकमा समेटिएको छ । करिब नौ महिनाको मेहनतपछि मैले यो पुस्तक तयार गरेको हो ।

एक जना व्यक्तिको जीवनका कति धेरै आयामहरू छन् भन्ने बुझ्न यो किताब सहयोगी बन्छ । उहाँका बारेमा थुप्रै लेखिन बाँकी नै छ, भविष्यमा लेखिनेछन् ।

(पत्रकार पाण्डे फागुन १९ गते लोकार्पण गरिएको कृति ‘केपी शर्मा ओलीः सपना, संघर्ष र संकल्प’का सम्पादक हुन् ।)