नेकपा एसको अपिल- प्रतिगमनकारी तथा पुनरूत्थानवादीको कूकर्मलाई नांगेझार पारौं

काठमाडौं । नेकपा एकीकृत समाजवादीले गणतन्त्रविरूद्ध प्रतिगमनकारी र पुनरूत्थानवादी शक्तिहरूको चलखेल र गतिविधिहरू बढेको ठहर गर्दै विशेष प्रस्ताव पारित गरेको छ ।

सोमबार दिउँसो बसेको सचिवालय बैठकले जननिर्वाचित संविधानसभाबाट स्थापित गणतन्त्रविरूद्ध गतिविधि हुन थालेको भन्दै परिवर्तनका पक्षधर व्यक्तिहरू एकतावद्ध भएर अगाडि बढ्नुपर्नेमा जोड दिएको छ ।

‘वर्तमान गणतन्त्रको विकल्प उन्नतस्तरको गणतन्त्र नै हो भन्ने तथ्यमा जोड दिदै हाम्रै काम र अभ्यासहरूको समेत गम्भीर आत्म समिक्षा गर्दै प्रतिगमनकारी तथा पुनरूत्थानवादी तत्वहरूले इतिहासमा उनीहरुले गरेका सम्पूर्ण कूकर्महरूलाई नांगेझार गर्न सबै राजनीतिक पार्टी, बौद्धिक जगत, नागरिक समाज र आम जनसमुदायमा अपिल गर्दछौं’, सचिवालय बैठकको निर्णयमा उल्लेख छ ।

पार्टीले आउँदो चैत १ गते पत्रकार सम्मेलन गरी पार्टीले गर्न लागेको आन्दोलनको रूपरेखा एवं कार्यक्रम सार्वजनिक गर्ने निर्णयसमेत गरेको छ ।