‘मायावी’को प्रिमियरमा बेहुलीजस्तै भएर पुगिन् दीपिका, चलचित्र हेरेपछि कसले के भने ?

काठ्माडौं । महाशिवरात्रिको अवसर पारेर बुधबारदेखि रिलिजमा आउन लागेको चलचित्र ‘मायावी’को हिजो राजधानीमा भव्य प्रिमियर गरियो । कीर्तिपुर सिनेप्लेक्समा आयोजित प्रिमियरमा चलचित्रको सम्पूर्ण टीमसहित थुप्रै चलचित्रकर्मीको बाक्लो उपस्थिति रह्यो ।

चलचित्र हेर्न निर्देशक ज्ञानेन्द्र देउजा, पूर्व मिस नेपाल उषा खड्गी, कलाकारहरु सनिषा भट्टराई, उषा उप्रेती, गायक रामकृष्ण ढकाललगायत पुगेका थिए । यस्तै, चलचित्रका मुख्य कलाकारहरु दीपिका प्रसाई, प्रशान्त ताम्राकार, करिष्मा श्रेष्ठ, सुशिल सिटौला, राजाराम पौडेल, अन्शु महर्जन, नव–नायक समीम खान पनि पुगेका थिए ।

प्रिमियरमा चलचित्रका मुख्य नायक पल शाह भने उपस्थित थिएनन् । अर्को एक चलचित्रको छायांकनका क्रममा रोल्पामा रहेकाले पल कार्यक्रममा छुटे । आफ्नो चलचित्रको प्रिमियरमा नायिका दीपिका प्रसाई भने बेहुली झैँ सिंगारिएर पुगेकी थिइन् । दीपिकालाई साथ दिन सोही चलचित्रका दुई नायक सुशील सिटौला र समिम खान उपस्थित थिए ।

चलचित्रको प्रिमियरमा कमै मात्र पुग्ने अभिनेता राजेश हमाल पनि वुधबार आयोजित दिवाकर भट्टराई निर्देशित चलचित्र ‘मायावी’ को प्रिमियरमा पुगेका थिए । उनले चलचित्र हेरेपछि ‘मायावी’ले सिंगो नेपाली फिल्म क्षेत्रलाई नै चलायमान बनाउने प्रतिक्रिया दिए ।

चलचित्र हेर्न निकै उत्साहित रहेको बताउँदै हल छिरेका हमालले मायावी हेरेपछि यो चलचित्रमा हरेक कुरा रहेको सुनाए । उनले भने, ‘चलचित्रको कथावस्तुले मन छुन्छ । गीतसंगीतको प्रयोग निकै उत्कृष्ट तरिकाले गरिएको छ । व्याकग्राउन्ड म्युजिक पनि उत्कृष्ट छ । कलाकारहरुले पनि निकै राम्रो काम गरेका छन् । यसैले, मायावीले बजार तताउने कुरामा विश्वस्त छु ।’

‘मैले अहिलेसम्म हेरेको लभ स्टोरीमा यो बेग्लै छ । यो कसरी सकिन्छ भन्ने पनि थाहा पाउन सकिँदैन । मान्छेको मन नै त हो नि, जता पनि जान सक्छ भन्ने देखाएको छ । यो लभ स्टोरी फिल्म विशेष छ’, हमालले जोडे ।

चलचित्रबाट आएको प्रतिक्रिया सुनेपछि निर्देशक दिवाकर भट्टराईले खुसी व्यक्त गरे । पललाई कार्यक्रममा सम्झिदै उनले भने, ‘ह्वी मिस यु । आज उहाँ हुनुपर्थ्यो, तर कार्यव्यस्ततालाई म बुझ्छु । चलचित्रमा सबैले राम्रो काम गर्नु भएको छ । र आज आएको प्रतिक्रियाले म निकै हर्षित छु । बाँकी अब दर्शकको हातमा छ ।’

त्यस्तै, चलचित्र हेर्न पुगेकी नायिका तथा पूर्व मिस नेपाल उषा खडगीले चलचित्र राम्रो लागेको बताइन् । उनले भनिन, ‘धेरै पछि रोमान्टिक चलचित्र हेरेको, मन पर्यो। सफ्ट अनि रोमान्टिक चलचित्र छ । ट्वीस्ट छ, रोमान्स छ, इमोसन छ । कतिपय दृष्यहरुमा आँसु आउछ । मेरो पनि आँसु झरेको थियो कति दृष्यहरुमा । चलचित्र एकदमै राम्रो छ ।’

चलचित्र हेर्न टिकटकर तथा कन्टेन्ट क्रिएटर उषा उप्रेती पनि हल पुगेकी थिइन् । चलचित्र राम्रो भएको उनले बताइन् । उनले भनिन, ‘चलचित्र राम्रो बनेको छ । नयाँ आउनु भएको कलाकारले पनि एकदमै राम्रो काम गर्नुभएको छ । करिष्माको काम धेरै तारिफयोग्य छ । सबैले चलचित्र हेरेपछि उसको कामको तारिफ गरिरहनु भएको थियो । दर्शकले एकपटक हेर्नै पर्ने चलचित्र बनेको छ ।’

त्यस्तै, चलचित्र हेर्न पुगेका अधिकाशंले चलचित्र राम्रो लागेको प्रतिक्रिया दिए । चलचित्रको कथावस्तु र प्रस्तुतिले आँखा रसाएको उनीहरुको भनाइ थियो ।

धुर्व न्यौपाने, राज कटुवाल र चन्द्र पन्तको लगानीमा तयार भएको यो चलचित्रमा प्रविन भट्टराई र करण सिंह कार्यकारी निर्माता तथा राजु पराजुली र सुमित वली सह–निर्माता छन् ।

नेम महर्जन चलचित्रका लगानीकर्ता हुन् भने चलचित्रमा राजु विक्रम थापाको डीओपी, मिलन श्रेष्ठको सम्पादन, शम्भुजित बास्कोटा र एसडी योगीको संगीत, कविराज गहतराज र प्रविण सिंहको कोरियोग्राफी छ ।