किसिङ विवादपछि लफडामा उदितनारायण, जेठी श्रीमती रन्जनाले भनिन्- बाँकी जिन्दगी उहाँकै साथमा रहन पाउँ

काठमाडौं । पछिल्लो केही सातायता चर्चित बलिउड गायक उदित नारायण झालाई दशा लागिरहेको छ भन्दा फरक पर्दैन । उनी एकपछि अर्को विवादमा तानिँदै गइरहेका छन् ।

कन्सर्टमा युवती फ्यानलाई किस गरेपछि विवादमा तानिएका उदित यसपटक जेठी श्रीमती रन्जना झाले हालेको भरणपोषण मुद्दामा कारण समाचारका हेडलाइन बनिरहेका छन् ।

अमरउजालाका अनुसार रन्जनाले उदितविरुद्ध आफ्नो अधिकारको हनन गरेको र सम्पति समेत अडपेको आरोप लगाएकी छन् । रन्जनाले लगाएको मुद्दाकै कारण गत शुक्रबार उदित सुपौल फ्यामेली कोर्टमा उपस्थित समेत भएका थिए ।

तर, कोर्टमा उनले रन्जनाको आरोपलाई अस्वीकार गरेका थिए । यसअघि पनि रन्जनाले बिहार महिला आयोगमा उदितविरुद्ध उजुरी दर्ता गरेकी थिइन् । महिला आयोगमा पनि उदित उपस्थित भएका थिए ।

उदितले कोर्टमा बयानका क्रममा रन्जनाले आफूबाट पैसा लिइरहेको दाबी गरेका छन् । समाचारका अनुसार उदितले रन्जनालाई मासिक रुपमा १५ हजार दिइरहेका थिए । चार वर्षअघि १५ बाट बढाएर २१ हजार दिइरहेका थिए ।

उदितले रन्जनालाई खेती गर्नका लागि एक खेत र घर पनि दिएका थिए, जसको मूल्य एक करोड भारुसम्म रहेको बताइएको छ । बिहार महिला आयोगले भने उदितले रन्जनालाई २५ लाख भारु बराबरको जमिन र गहना दिएको तर, रन्जनाले बेचिसकेको प्रमाण फेला पारेको थियो ।

यी सारा लफडाका वाबजुद रन्जनाले भने अब उदितसँगै बस्ने इच्छा जाहेर गरेकी छन् । उदितसँगै रहनु आफ्नो कानुनी अधिकार समेत भएको उनको दाबी छ । आफ्नो वकिलको माध्यमबाट बिग्रँदो स्वास्थ र बाँकी जिन्दगी उदितको साथ बस्ने इच्छा जाहेर गरेकी हुन् । उदितले आफूलाई हेला गरेको र मुम्बाइको घरमा जाँदा गुण्डा राखेर घरभित्र पस्न नदिएको आरोप समेत लगाएकी छन् ।

उदित र रन्जनाले सन् १९८४ मा विवाह गरेका थिए । तर, जब उदित चर्चित भए, यसपछि रन्जनालाई छाडेर दिपा गहतराजसँग दोस्रो विवाह गरे । यति मात्रै होइन, उदितले रन्जनालाई श्रीमती मान्नै अस्वीकार गरेका थिए ।

यसपछि रन्जनाले निरन्तर आफ्नो अधिकारका लागि लडिरहिन् । सन् २००६ मा उनले महिना आयोग गुहारिन् । यसपछि उदितले एक फ्ल्याट र भरणपोषण दिने सहमति गरेका थिए ।

उदित र दीपाका एक छोरा आदित्य नारायण झा पनि गायक तथा टेलिभिजन प्रस्तोता हुन् ।