काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पार्टीप्रति देशभर जनताको आकर्षण बढ्दै गएको दाबी गरेका छन्।
चितवनमा आयोजित पार्टी प्रवेश कार्यक्रमलाई सम्बोधन गर्दै माओवादी र माओवादी नेतृत्वप्रति जनतामा ठूलो भरोषा देखिएको बताए।
उनले चितवनका नेकपा एकीकृत समाजवादीका नेताहरुलाई पार्टीमा भित्र्याउँदै यसले केन्द्रीय अध्यक्ष माधव नेपालसँगको सम्बन्धलाई कुनै असर नगर्ने बताए।
उनले भने, ‘यो प्रवेशले नेकपा एकीकृत समाजवादीका अध्यक्ष माधव नेपालसँगको सम्बन्धलाई कुनै असर पर्नेछैैन। अहिले हामीले समाजवादी मोर्चामा नयाँ ढंगले काम गर्न खोजेका छौं। उहाँहरुलाई पार्टीमा भित्र्याउँन मेरो कुनै भूमिका छैन। चितवनकै कार्यकर्ताकै भूमिकाले भएको हो। यो पार्टी प्रवेशले माओवादी र नेकपा एसबीचको पार्टी एकताको आधार बन्दैछ।’
उनले अहिले आफूहरुले समाजवादी मोर्चामार्फत केही नयाँ गर्न खोजेको सुनाए। चितवनमा नेकपा एकीकृत समाजवादी, नेकपा एमाले, नेपाली कांग्रेस र राष्ट्रिय स्वतन्त्र पार्टी लगायतका पार्टी परित्याग गरि कृष्णराज लब्ली, अरूण पीडित लगायतका नेता कार्यकर्ताहरू माओवादी प्रवेश गरेका थिए।
नवप्रवेशीहरूलाई प्रचण्डसहित भरतपुर महानगर पालिकाका मेयर रेनु दाहाल, चितवन इन्चार्ज घनश्याम दाहाल, अध्यक्ष रामचन्द्र अधिकारी लगायतका नेताहरूले खादा, माला र अविर लगाएर पार्टीमा स्वागत गरे।
Leave a Reply